1. Yeˍsuˆ ve awˬ laꞈ gʼawˇ, chaw maˇ maˇ Yeˍruˆsaˍlehnˍ venˇ lo laˬ ve chaw htaꞈ aˬ htoꞈ ma te tuˬ kʼoˆ piˇ ve le?

 Hawˉ hkʼaˆ leh yaˇ miˇ maˇ maˇ Yeˍsuˆsaˍlehnˍ venˇ lo laˬ ve yoˬ. Yawˇ hui laiˉ mvuhˇ miˬ lo laˬ leh laiˉ chaw ceuˬ tawˇ hkawˇ yaw ve yoˬ. Leh yawˇ hui anˇ lawꞈ lawꞈ ve awˬ lawn gʼa hpuˇ ve yoˬ. Yuˇdaꞈ chaw teˇ hpaˍ kaꞈ yawˇ hui ve tawˇ hkawˇ yaw gʼa ve yoˬ. Yaꞈ hkʼaˇ, chi aꞈ kehˉ anˇ tuˬ uiˍ jaˇ ve lehˬ, Yuˇdaꞈ chaw chi teˇ hpaˍ ve awˬ lawn leh tcuh yaˇ Peˍtruˆ yawˇ hui htaꞈ kʼoˆ piˇ ve yoˬ. Yawˇ hui Yeˍsuˆ htaꞈ yonˍ ve kʼo, gʼa ponˬ tuˬ ve tehꞈ shiˍ ve yoˬ. Chi yawˇ hui dawˇ cawˇ jaˇ tuˬ te piˇ leh kʼoˆ ve, “ngaˬ hui hkʼaˬ hkʼe gʼa te tuˬ le?” Hkʼe te leh Peˍtruˆ yawˇ hui htaꞈ kʼoˆ piˇ ve, “nawˬ hui Baˆtiˆsaˬ hkanˍ yuˬ˗oꞈ.”—Tcuh yaˇ 2:37, 38.

2. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le? (Awˬ htaꞈ hpawˇ ve awˬ han htaꞈ nyi sheˍ.)

² Peuˬ hkʼawꞈ nawˉ anˇ tuˬ uiˍ ve awˬ heˆ kʼawꞈ hpehꞈ la ve yoˬ. Oˇ ve teˇ nyi hkʼaw aˬ laˬ hkʼe 3,000 gʼaˇ Baˆtiˆsaˬ haꞈ yuˬ leh Yeˍsuˆ ve awˬ laꞈ gʼawˇ hpehꞈ la ve yoˬ. Chi ve lehˬ Yeˍsuˆ yawˇ awˬ hkʼaˇ suh gʼaꞈ yuˬ ve chaw htaꞈ kʼoˆ piˇ ve, shu awˬ laꞈ gʼawˇ hpehꞈ la tuˬ maˍ piˇ ve tanˬ ve kanˉ teˇ ceuˬ hpehꞈ ve yoˬ. Leh yawˇ awˬ hkʼaˇ suh gʼaꞈ yuˬ ve chaw kaꞈ kanˉ chi ve yaꞈ nyi hkʼa gaˬ te chehˇ sheˍ ve yoˬ. Hkʼaˬ nyiˇ naˍ riˍ maˇ gaˬ ve hkʼaw chaw teˇ gʼaˇ awˬ laꞈ gʼawˇ hpehꞈ la gʼa tuˬ ga piˇ ve chi teˇ hkui te maˇ gʼa. Chaw teˇ hpaˍ kʼo, awˬ laꞈ gʼawˇ hpehꞈ la tuˬ laiˉ ha pa maˇ heˆ leh laiˉ hkʼawꞈ gʼa yehˇ ve yoˬ. Nawˬ chaw teˇ gʼaˇ htaꞈ Liꞈ hpu maˍ piˇ chehˇ ve kʼo, chaw teˇ gʼaˇ htaꞈ ga piˇ ve hkʼaˬ hkʼe taw gʼa coˇ caˇ ve nawˬ na gʼa tuˬ yoˬ hehˉ. Liꞈ hpu henˇ ve chaw uiˍ la mvuh la leh Baˆtiˆsaˬ haꞈ yuˬ tuˬ ga piˇ ve nawˬ hkʼaˬ hkʼe te gʼa ve awˬ lawn chi ve hkʼaw teˇ geh henˇ tuˬ yoˬ.

3. Maꞈhtehˍ liꞈ 28:19, 20 hkʼaw kʼoˆ taˍ ve hkʼe, Liꞈ hpu henˇ chehˇ ve chaw uiˍ la mvuh la leh Baˆtiˆsaˬ haꞈ yuˬ tuˬ hkʼaˬ hkʼe gʼa te cawˇ ve le?

³ Liꞈ hpu henˇ ve chaw Baˆtiˆsaˬ haꞈ yuˬ gʼa tuˬ Liꞈ hpu hkʼaw yawˇ henˇ taˍ ve awˬ ceuˬ htaꞈ gʼa yuˬ yehˇ cawˇ ve yoˬ. (Maꞈhtehˍ 28:19, 20 gʼaw sheˍ.) Liꞈ hpu henˇ chehˇ ve chaw henˇ taˍ ve awˬ ceuˬ htaꞈ yuˬ yehˇ htaˇ, yawˇ kaꞈ Yeˍsuˆ tawˇ pa haˉ tehˆ maˍ laˇ ve hkʼaw haˉ pui hkʼoˆ lo yehˬ te ve, “cuˇ yiˍ cawˬ paˍ” htaꞈ shuˍ tuˬ yoˬ. (Maꞈhtehˍ 7:24, 25; Luˉkaꞈ 6:47, 48) Liꞈ hpu henˇ chehˇ ve chaw henˇ taˍ ve awˬ ceuˬ htaꞈ yuˬ yehˇ tuˬ, hkʼaˬ hkʼe ga piˇ gʼa tuˬ le? Ngaˬ hui te gʼa ve 3 ceuˬ htaꞈ teˇ geh nyi sheˍ.

4. Liꞈ hpu henˇ ve chaw uiˍ la mvuh la leh Baˆtiˆsaˬ haꞈ yuˬ tuˬ caˉ leh hkʼaˬ hkʼe ga piˇ gʼa tuˬ le? (Awˇ ceˍ awˇ fa “ Nawˬ geh Liꞈ hpu henˇ chehˇ ve chaw dawˇ teh taˍ ve cawˬ tuˬ leh dawˇ teh taˍ ve htaꞈ gʼaꞈ te gʼa tuˬ ga piˇ sheˍ” htaꞈ nyi sheˍ.)

⁴ Nawˬ geh Liꞈ hpu henˇ chehˇ ve chaw dawˇ teh taˍ ve cawˬ tuˬ ga piˇ sheˍ. Aˬ htoꞈ ma te nawˬ chi hkʼe te cawˇ ve le? Awˬ lawn chi ve htaꞈ dawˇ nyi sheˍ. Tawˇ pa haˉ te kʼo, nawˬ vuiˇ jaˇ ve teˇ kaˬ lo ca guiˇ˗e ve yoˬ. Nawˬ kaˇ teˇ pawˆ tiˉ oˇ kaˬ lo gaˬ˗e tuˬ gʼaꞈ kʼai ve kʼo, aˬ htoꞈ ma te vuiˇ jaˇ law tehꞈ dawˇ ve yoˬ. Hkʼaˬ hkʼe htaˇ gaˬ˗e tuˬ le naˍ tehꞈ dawˇ ve yoˬ. Yaꞈ hkʼaˇ, nawˬ yaꞈ kʼaw jaˇ lo hko daꞈ jaˇ ve hkʼaw jehˇ leh guiˇ˗aˉ ve kʼo, nawˬ kʼai tuˬ ve awˬ ti maˇ vuiˇ law tehꞈ dawˇ ve yoˬ. Chi ve hkʼa shuˍ shuˍ Liꞈ hpu henˇ ve chaw dawˇ teh taˍ ve cawˬ leh teˇ ceuˬ peuˬ teˇ ceuˬ a yehˉ yehˉ te ve kʼo, Baˆtiˆsaˬ haꞈ yuˬ tuˬ dawˇ teh taˍ gʼa ve yoˬ. Nawˬ ve a shaꞈ co co taiˍ taiˍ ha lehˬ gʼa ve! liꞈ kʼoˆ hkʼaw “Dawˇ teh taˍ ve” cawˬ ve yoˬ. Nawˬ chi ve htaꞈ yehˇ leh Liꞈ hpu henˇ ve chaw dawˇ teh taˍ ve cawˬ tuˬ ga piˇ sheˍ. Nawˬ geh Liꞈ hpu henˇ chehˇ ve chaw geh teˇ lawn leh teˇ lawn henˇ peuˬ˗oˬ htaˇ, “Dawˇ teh taˍ ve” htaꞈ caˉ daꞈ ve henˇ gehˇ sheˍ ve awˬ lawn htaꞈ hkʼaˬ hkʼe yuˬ yehˇ gʼa tuˬ leh yawˇ dawˇ teh taˍ ve htaꞈ yaw daꞈ sheˍ. Nawˬ geh Liꞈ hpu henˇ chehˇ ve chaw awˬ nu ve awˬ ceuˬ te gʼa ve dawˇ teh taˍ ve htaꞈ dawˇ nyi htaˇ, “Awˬ nu ve teˇ hpaˍ” kʼoˆ ve hkʼaw bvuhꞈ keu sheˍ. Liꞈ hpu henˇ ve chaw dawˇ teh taˍ ve htaꞈ hkʼaˬ htaˆ kaꞈ gʼaꞈ te gʼa tuˬ ga piˇ ve, “Dawˇ teh taˍ ve” chi ve htaꞈ yehˇ sheˍ.

5. Maˍkuˆ liꞈ 10:17-22 hkʼaw kʼoˆ taˍ ve hkʼe, paw sha ve chaw hawˉ hkʼaˆ htaꞈ aˬ htoˬ ma te tuˬ Yeˍsuˆ kʼoˆ piˇ ve le? Aˬ htoꞈ ma te yawˇ chi hkʼe te tuˬ Yeˍsuˆ kʼoˆ piˇ ve le?

 ⁵ Nawˬ geh Liꞈ hpu henˇ chehˇ ve chaw te hkʼaˇ dawˇ hkʼaˇ pa tuˬ ga piˇ sheˍ. (Maˍkuˆ 10:17-22 gʼaw sheˍ.) Paw sha ve chaw hawˉ hkʼaˆ chi ve teˇ gʼaˇ yawˇ ve te hkʼaˇ dawˇ hkʼaˇ pa tuˬ sha ve maˇ heˆ tehꞈ Yeˍsuˆ shiˍ ve htawˇ, yawˇ ve mawˇ jeˬ hkʼa peu˗eˬ hawˇ tuˬ Yeˍsuˆ kʼoˆ piˇ ve yoˬ. (Maˍkuˆ 10:23) Aˬ htoꞈ ma pa taw le? Yeˍsuˆ yawˇ htaꞈ haꞈ ve pa taw yoˬ. Liꞈ hpu henˇ ve chaw yawˇ ve te hkʼaˇ dawˇ hkʼaˇ maˇ pa gʼa sheˍ ve tehꞈ, ngaˬ hui dawˇ ve pa taw kʼoˆ piˇ maˇ haˆ. Chaw teˇ hpaˍ te hkʼaˇ dawˇ hkʼaˇ awˬ piˍ htaꞈ baˬ taˉ leh te hkʼaˇ dawˇ hkʼaˇ awˬ suhˉ kʼawꞈ cawˬ tuˬ awˬ yanˇ gʼa yehˇ maw ve yoˬ. (Kawˇlawˇsehˇ 3:9, 10) Yaꞈ hkʼaˇ, nawˬ geh Liꞈ hpu henˇ chehˇ ve chaw geh awˬ lawn chi ve haˆ yaw daꞈ ve kʼo, yawˇ kaꞈ te hkʼaˇ dawˇ hkʼaˇ haˆ pa gʼa tuˬ yoˬ hehˉ. Awˬ lawn chi nawˬ yawˇ geh yaw daꞈ ve kʼo, nawˬ yawˇ htaꞈ dawˇ haˍ ve tehꞈ yawˇ shiˍ tuˬ te piˇ ve yoˬ.—Chiˇ mvuh ve 141:5; Tawˇ naˉ ve 27:17.

6. Liꞈ hpu henˇ chehˇ ve chaw htaꞈ gʼa henˇ taˍ ve awˬ lawn hkʼaˬ hkʼe dawˇ ve le tehꞈ aˬ htoꞈ ma te ngaˬ hui na piˇ cawˇ ve le?

⁶ Liꞈ hpu henˇ chehˇ ve chaw htaꞈ gʼa henˇ taˍ ve awˬ lawn htaꞈ caˉ daꞈ ve hkʼaˬ hkʼe dawˇ ve na piˇ ve a yeˇ uiˍ jaˇ. Chi hkʼe te ve lehˬ, yawˇ gʼa henˇ chehˇ ve awˬ ceuˬ htaꞈ na gʼa leh yonˍ˗aw laˇ tehꞈ ngaˬ hui shiˍ tuˬ ga laˇ ve yoˬ. Chi hkʼe ve nawˬ hkʼaˬ htaˆ kaꞈ te ve kʼo, yawˇ maˇ haꞈ yuˬ gʼa ve awˬ lawn geh henˇ gaˬ˗oˬ htaˇ, nawˬ yawˇ geh yaw daꞈ tuˬ sha ve yoˬ. Nawˬ ve a shaꞈ co co taiˍ taiˍ ha lehˬ gʼa ve! liꞈ kʼoˆ hkʼaw chi hkʼe ve na hkawˇ cawˬ maˇ jaˇ. Tawˇ pa haˉ te kʼo, awˬ lawn 04 hkʼaw na ve, “Yaˬhoˉvaˬ ve awˬ meh htaꞈ Gʼuiˬ sha tehꞈ kuˬ ve kʼo, yawˇ hkʼaˬ hkʼe dawˇ tuˬ le? Yaꞈ hkʼaˇ, Yaˬhoˉvaˬ ve awˬ meh htaꞈ tcuhˇ tcuhˬ maˇ kuˬ leh Yaˬhoˉvaˬ ve awˬ meh htaꞈ Gʼuiˬ sha ceh kuˬ ve kʼo yawˇ hkʼaˬ hkʼe dawˇ tuˬ ve le?” Awˬ lawn 09 hkʼaw na ve, “Nawˬ aˬ htoꞈ ma ve awˬ lawn bon lawˬ gaˇ ve le?” Awˉ lawˉ htaˇ nawˬ geh Liꞈ hpu henˇ chehˇ ve chaw lehˬ chi hkʼe hkʼawꞈ laˇ tuˬ haˍ ve yoˬ. Yawˇ a ciˉ awˬ yanˇ yehˇ leh gʼa dawˇ nyi ve yoˬ. Liꞈ hpu awˬ tawn yuˬ laˬ taˍ ve maˇ heˆ leh liꞈ kʼoˆ chi ve hkʼaw ve awˬ han yawˇ awˬ hkʼaˇ ca puiˉ tuˬ nawˬ ga piˇ gʼa ve yoˬ.

7. Hpehꞈ laˬ jaw ve awˬ lawn htaꞈ yehˇ leh Liꞈ hpu henˇ ve chaw htaꞈ hkʼaˬ hkʼe ga piˇ gʼa tuˬ le?

⁷ Liꞈ hpu henˇ ve chaw yawˇ ve te hkʼaˇ dawˇ hkʼaˇ hkʼaˬ hkʼe gʼa pa tuˬ shiˍ htaˇ, awˬ nu ve chaw hpehꞈ laˬ jaw ve awˬ lawn yawˇ gʼaꞈ te gʼa tuˬ kʼoˆ maˍ piˇ sheˍ. Tawˇ pa haˉ te kʼo, nawˬ geh Liꞈ hpu henˇ chehˇ ve chaw hkʼaˬ htaˆ kaꞈ hpawnˬ daꞈ ve maˇ laˬ sheˍ ve kʼo, Yaˬhoˉvaˬ ngaˬ htaꞈ dawˇ haˍ ve tehꞈ kʼoˆ ve VDO maˍ piˇ sheˍ. Nawˬ ve a shaꞈ co co taiˍ taiˍ ha lehˬ gʼa ve! liꞈ kʼoˆ hkʼaw awˬ lawn 14 “Kʼawꞈ caˉ nyi gʼa ve” hkʼaw nyi sheˍ. Laiˉ gʼaˇ hpehꞈ laˬ jaw ve awˬ lawn hkʼaw “Henˇ shiˍ maˇ la tuˬ” ca gʼa ve maˇ heˆ leh “Kʼawꞈ caˉ nyi gʼa ve” hkʼaw kaꞈ nyi gʼa ve yoˬ. * Yaꞈ hkʼaˇ, nawˬ geh Liꞈ hpu henˇ chehˇ ve chaw leh awˬ nu ve chaw geh Liꞈ hpu henˇ chehˇ ve chaw htaꞈ “oˇ ve teˇ gʼaˇ kaꞈ te gʼa ve, nawˬ kaꞈ te gʼa cawˇ ve” tehꞈ, maˇ gʼa kʼoˆ tuˬ shaˍ tiꞈ gʼa te ve yoˬ. Liꞈ hpu henˇ ve chaw htaꞈ chi hkʼe leˇ ve a shu yawˇ hkʼaˇ yawˇ dawˇ gʼa tcuh cawˇ ve yoˬ. VDO hkʼaw a yeˇ uiˍ ve awˬ lawn htaꞈ nawˬ kʼoˆ maˍ piˇ leh VDO hkʼaw ve chaw Liꞈ hpu hkʼaw maˍ laˇ ve htaꞈ hkʼaˬ hkʼe gʼaꞈ te ve kʼoˆ daꞈ sheˍ. VDO oˇ ve hkʼaw a yeˇ uiˍ ve Liꞈ hpu awˬ tawn htaꞈ nawˬ kʼoˆ ve, maˇ heˆ leh nawˬ geh Liꞈ hpu henˇ chehˇ ve chaw pa gʼa tuˬ teˇ ceuˬ ceuˬ htaꞈ kʼoˆ maˍ piˇ sheˍ. VDO hkʼaw ve chaw htaꞈ Yaˬhoˉvaˬ hkʼaˬ hkʼe ga piˇ ve teˇ pawˆ le le nawˬ kʼoˆ maˍ piˇ sheˍ.

8. Liꞈ hpu henˇ ve chaw Yaˬhoˉvaˬ htaꞈ haꞈ tuˬ ngaˬ hui hkʼaˬ hkʼe ga piˇ gʼa tuˬ le?

⁸ Nawˬ geh Liꞈ hpu henˇ chehˇ ve chaw Yaˬhoˉvaˬ htaꞈ haꞈ tuˬ ga piˇ sheˍ. Chi ve nawˬ hkʼaˬ hkʼe te, te gʼa tuˬ le? Nawˬ te gʼa ve hkʼe teˇ pawˆ le le Yaˬhoˉvaˬ ve te hkʼaˇ dawˇ hkʼaˇ kʼoˆ maˍ piˇ sheˍ. Yaˬhoˉvaˬ lehˬ haꞈ pehnˇ ve Gʼuiˬ sha hpehꞈ leh yawˇ htaꞈ haꞈ ve chaw teˇ gʼaˇ le le htaꞈ yawˇ ga piˇ chehˇ ve tehꞈ, Liꞈ hpu henˇ ve chaw mawˬ tuˬ ga piˇ sheˍ. (1 Tiˆmoˉseˍ  1:11; Heˍbrehˇ 11:6) Liꞈ hpu hkʼaw ve awˬ ceuˬ htaꞈ yuˬ yehˇ ve kʼo, yawˇ awˬ bon hkʼaˬ hkʼe gʼa ve mawˬ tuˬ nawˬ ga piˇ sheˍ. Liꞈ hpu henˇ ve chaw gʼaꞈ te htaˇ, awˬ bon gʼa ve tehꞈ na gʼa tuˬ kʼoˆ maˍ piˇ sheˍ. Chi Yaˬhoˉvaˬ yawˇ htaꞈ haꞈ ve tehꞈ hpeuꞈ maw piˇ ve yoˬ. (Iˉsaˍyaˆ 48:17, 18) Nawˬ geh Liꞈ hpu henˇ ve chaw Yaˬhoˉvaˬ htaꞈ haꞈ maˇ la htaˇ, yawˇ ve te hkʼaˇ dawˇ hkʼaˇ pa gaˇ tuˬ yoˬ.—1 Yoˇhanˬ 5:3.

9. Maˍkuˆ liꞈ 10:29, 30 hkʼaw kʼoˆ taˍ ve hkʼe, Baˆtiˆsaˬ haꞈ yuˬ leh awˬ laꞈ gʼawˇ hpehꞈ la tuˬ ngaˬ hui aˬ htoꞈ ma gʼa yuˬ tanˇ ve le?

⁹ Liꞈ hpu henˇ ve chaw uiˍ la mvuh la leh Baˆtiˆsaˬ haꞈ yuˬ tuˬ yawˇ teˇ ceuˬ ceuˬ gʼa yuˬ tanˇ ve yoˬ. Chi awˬ gʼuˇ suhˍ htaˇ kʼoˆ kʼai peuˬ ve paw sha jaˇ ve hawˉ hkʼaˆ teˇ gʼaˇ hkʼa shuˍ yoˬ. Liꞈ hpu henˇ ve chaw teˇ hpaˍ hpaˍ hpu shi mawˇ jeˬ gʼa yuˬ tanˇ ve yoˬ. Yawˇ kanˉ te ve Liꞈ hpu hkʼaw maˇ hawˍ daꞈ ve kʼo, yawˇ kanˉ gʼa kʼawꞈ pa ve yoˬ. Chi hkʼoˆ kaꞈ, Yaˬhoˉvaˬ htaꞈ maˇ haꞈ ve chaw geh yawˇ awˬ chawˇ maˇ gʼa te˗o leh teˇ hpaˍ kʼo Shaˉhkiˆhkanˍ ve chaw htaꞈ maˇ dawˇ cawˇ ve pa taw, yehˬ kʼa hkʼaw maˇ chehˇ tcuh ve yoˬ. Chaw teˇ hpaˍ awˬ pon kʼo chi hkʼe yuˬ tanˇ ve sha ve maˇ heˆ tehꞈ Yeˍsuˆ shiˍ ve yoˬ. Yeˍsuˆ ka tiꞈ te taˍ laˇ ve, yawˇ awˬ hkʼaˇ suh gʼaꞈ yuˬ ve chaw lehˬ nyi ma maˇ gʼa luˬ. Yaˬhoˉvaˬ yawˇ hui htaꞈ laꞈ shawnˍ piˇ ve lehˬ yawˇ hui htaꞈ haꞈ ve Hkriꞈ yaˇ ve yehˬ kʼa hkʼaw awˬ chawˇ cawˬ tcuh ve yoˬ. (Maˍkuˆ 10:29, 30 gʼaw sheˍ.) Liꞈ hpu henˇ ve chaw laꞈ shawnˍ chi ve htaꞈ awˬ bon gʼa tuˬ nawˬ hkʼaˬ hkʼe ga piˇ gʼa tuˬ le?

10. Ma˗nu˗ehˍ ve awˬ lawn htaꞈ nawˬ hkʼaˬ hkʼe henˇ yuˬ gʼa tuˬ le?

¹⁰ Nawˬ geh Liꞈ hpu henˇ ve chaw htaꞈ awˬ chawˇ te sheˍ. Nawˬ Liꞈ hpu henˇ ve chaw htaꞈ dawˇ haˍ ve tehꞈ mawˬ tcuh tuˬ a yeˇ uiˍ jaˇ ve awˬ lawn hpehꞈ ve yoˬ. Aˬ htoꞈ ma pa taw le? Mehˆsiˬkoˬ mvuhˇ miˬ lo chehˇ ve Ma˗nu˗ehˍ ve awˬ lawn htaꞈ nyi sheˍ. Yawˇ Liꞈ hpu henˇ ve chaw hpehꞈ htaˇ ve htaꞈ kʼoˆ ve, “ngaˬ hui Liꞈ hpu maˇ henˇ sheˍ htaˇ teˇ pawˆ le le ngaˬ htaꞈ Liꞈ hpu maˍ laˇ ve chaw ngaˬ hkʼaˬ hkʼe kʼai le na laˇ ve yoˬ. Yawˇ ngaˬ nyi ma sha tuˬ te laˇ leh awˬ nu ve awˬ lawn kaꞈ ngaˬ yawˇ htaꞈ kʼoˆ maˍ piˇ gaˇ tuˬ te laˇ ve yoˬ. Yawˇ ngaˬ htaꞈ dawˇ haˍ ve tehꞈ ngaˬ shiˍ ve yoˬ.”

11. Liꞈ hpu henˇ ve chaw ngaˬ hui geh awˬ chawˇ te ve kʼo, yawˇ awˬ bon hkʼaˬ hkʼe gʼa tuˬ le?

 ¹¹ Yeˍsuˆ awˬ laꞈ gʼawˇ htaꞈ awˬ chawˇ te ve hkʼe, nawˬ geh Liꞈ hpu henˇ chehˇ ve chaw htaꞈ kaꞈ awˬ chawˇ te sheˍ. (Yoˇhanˬ 3:22) Nawˬ geh Liꞈ hpu henˇ chehˇ ve chaw uiˍ la mvuh la˗oˬ ve kʼo, aˉ hkʼaw laˬ leh awˍ teˇ geh caˇ ve, kaˍ fiˍ teˇ geh dawˬ ve, maˇ heˆ leh JW awˬ han tawˆ kuiˬ teˇ geh nyi gʼa ve yoˬ. Yehˬ kʼa hkʼaw ve chaw leh awˬ chawˇ geh pawehˇ cawˬ ve awˬ yanˇ htaˇ, yawˇ maˇ te leh chehˇ bawˬ ve pa taw, awˬ yanˇ chi ngaˬ hui geh guiˇ laˬ tuˬ jehˬ piˇ ve kʼo, yawˇ ha lehˬ ve yoˬ. Yuˬganˬdaˬ mvuhˇ miˬ lo chehˇ ve Hka˗che˗veh kʼoˆ ve, “Liꞈ hpu maˍ ve chaw geh ngaˬ awˬ chawˇ te htaˇ, Liꞈ hpu henˇ ve awˬ yanˇ htaˇ hkʼe Yaˬhoˉvaˬ htaꞈ caˉ daꞈ ve awˬ lawn gʼa henˇ ve yoˬ. Yaˬhoˉvaˬ yawˇ ve chaw htaꞈ hkʼaˬ hkʼe taw nyi haꞈ shaˉ piˇ ve leh yawˇ hui ha lehˬ jaˇ ve tehꞈ ngaˬ gʼa mawˬ˗oˬ ve yoˬ. Ngaˬ yawˇ hui hkʼe leˇ hpehꞈ gaˇ ve yoˬ.”

12. Aˬ htoꞈ ma te awˬ viˉ awˬ nyi laiˉ gʼaˇ ngaˬ hui geh Liꞈ hpu teˇ geh maˍ˗e tuˬ jehˬ piˇ cawˇ ve le?

¹² Awˬ viˉ awˬ nyi laiˉ gʼaˇ Liꞈ hpu teˇ geh maˍ˗e tuˬ jehˬ piˇ sheˍ. Teˇ pawˆ pawˆ kʼo, Liꞈ hpu maˍ˗e tuˬ ngaˬ hui tiˉ kʼai ve maˇ heˆ leh, awˬ viˉ awˬ nyi kʼai jaw ve chaw htaꞈ jehˬ piˇ leh kʼai ve kʼo sha ve tehꞈ dawˇ ve yoˬ. Yaꞈ hkʼaˇ, awˬ nu ve awˬ viˉ awˬ nyi htaꞈ kaꞈ shiˍ kʼai ve kʼo, Liꞈ hpu henˇ ve chaw awˬ bon gʼa maˇ tuˬ yoˬ. Monˍdoˬvaˬ mvuhˇ miˬ lo chehˇ ve De˗me˗htiˆ kʼoˆ ve, “ngaˬ geh Liꞈ hpu maˍ laˇ ve awˬ viˉ awˬ nyi teˇ gʼaˇ leh teˇ gʼaˇ kʼoˆ maˍ laˇ tuˬ awˬ hkʼaˇ cawˬ ve yoˬ. Gʼa henˇ ve awˬ lawn htaꞈ ngaˬ laiˉ ceuˬ nyi mawˬ tuˬ chi ga laˇ ve yoˬ. Ngaˬ awˉ lawˉ teˇ pawˆ hpawnˬ daꞈ˗e htaˇ kaꞈ awˬ viˉ awˬ nyi laiˉ gʼaˇ htaꞈ ngaˬ gʼa mawˬ daꞈ jaw˗oˬ ve pa taw, tawˇ yaw haˆ ve yoˬ.”

13. Aˬ htoꞈ ma te Liꞈ hpu henˇ ve chaw hpawnˬ daꞈ la tuˬ ga piˇ cawˇ ve le?

¹³ Nawˬ geh Liꞈ hpu henˇ ve chaw hpawnˬ daꞈ la tuˬ ga piˇ sheˍ. Aˬ htoꞈ ma pa taw ngaˬ hui chi hkʼe te cawˇ ve le? Yaˬhoˉvaˬ yawˇ ve kanˉ te ve chaw teˇ geh hpawnˬ daꞈ˗oꞈ tehꞈ kʼoˆ laˇ ve pa taw yoˬ. Chi lehˬ yawˇ htaꞈ oˉ kʼoˍ pui ve teˇ ceuˬ hpehꞈ ve yoˬ. (Heˍbrehˇ 10:24, 25) Chi hkʼoˆ kaꞈ, Hkriꞈ yaˇ awˬ moˍ hkʼaw ve awˬ viˉ awˬ nyi kaꞈ ngaˬ hui ve yehˬ kʼa hkʼe hpehꞈ ve yoˬ. Ngaˬ hui hpawnˬ daꞈ˗e htaˇ kaꞈ aˉ hkʼaw lo caˇ tuˬ mehˬ mehˬ teˇ geh caˇ ve htaꞈ shuˍ ve yoˬ. Liꞈ hpu henˇ ve chaw htaꞈ hpawnˬ daꞈ la tuˬ jehˬ piˇ ve kʼo, yawˇ uiˍ la mvuh la leh Baˆtiˆsaˬ haꞈ yuˬ gʼa tuˬ a yeˇ uiˍ jaˇ ve awˬ ceuˬ htaꞈ te chehˇ ve tehꞈ nawˬ ga piˇ chehˇ ve yoˬ. Chi yawˇ awˬ pon sha ve maˇ heˆ. Nawˬ ve a shaꞈ co co taiˍ taiˍ ha lehˬ gʼa ve! liꞈ kʼoˆ Liꞈ hpu henˇ ve chaw hpawnˬ daꞈ la tuˬ hkʼaˬ hkʼe ga piˇ gʼa tuˬ le?

14. Liꞈ hpu henˇ ve chaw hpawnˬ daꞈ la tuˬ ngaˬ hui hkʼaˬ hkʼe ga piˇ gʼa tuˬ le?

¹⁴ Nawˬ geh Liꞈ hpu henˇ chehˇ ve chaw hpawnˬ daꞈ la gʼa tuˬ Nawˬ ve a shaꞈ co co taiˍ taiˍ ha lehˬ gʼa ve! liꞈ kʼoˆ awˬ lawn 10 htaꞈ yehˇ sheˍ. Liꞈ kʼoˆ chi maˇ tawˆ la sheˍ htaˇ, awˬ viˉ awˬ nyi hpehꞈ laˬ jaw ve chaw teˇ hpaˍ Liꞈ hpu maˍ htaˇ, awˉ lawˉ yehˇ tcuh nyi ve yoˬ. Liꞈ hpu henˇ ve chaw hpawnˬ daꞈ la gʼa tuˬ ga piˇ ve awˬ bon gʼa jaˇ tehꞈ yawˇ hui dawˇ ve yoˬ. Yaꞈ hkʼaˇ, nawˬ awˬ lawn 10 gaˬ tuˬ taˇ law chehˇ. Liꞈ hpu henˇ ve chaw hpawnˬ daꞈ la gʼa tuˬ te gʼa ve kʼo haˆ haˆ jehˬ piˇ sheˍ. Yawˇ maˇ laˬ sheˍ ve kʼo, caˉ leh jehˬ piˇ sheˍ. Liꞈ hpu henˇ ve chaw teˇ gʼaˇ leh teˇ gʼaˇ shoꞈ shaꞈ ve gʼa hpuˇ ve maˇ shuˍ daꞈ. Chi htaꞈ pa taw, nawˬ geh Liꞈ hpu henˇ chehˇ ve chaw maˇ hpawnˬ daꞈ la gʼa ve shoꞈ shaꞈ ve aˬ htoꞈ ma cawˬ ve chaˬ nyi leh hpawnˬ daꞈ la gʼa tuˬ caˉ leh jehˬ piˇ sheˍ. Liꞈ hpu henˇ ve chaw maˇ hpawnˬ daꞈ la sheˍ ve kʼo, awˬ gʼaˇ taˇ nuˇ. Yeunˇ hkanˍ leh yawˇ htaꞈ teˇ hkui teˇ hkui jehˬ piˇ sheˍ.

15. Liꞈ hpu henˇ ve chaw aˬ htoꞈ ma htaꞈ kawˆ ve le?

¹⁵ Nawˬ Shaˉhkiˆhkanˍ ve chaw hpehꞈ la htaˇ, aˬ htoꞈ ma htaꞈ kawˆ ve tawnˇ gʼa˗aw laˇ? Teˇ pawˆ pawˆ kʼo, teˇ yehˬ peuˬ teˇ yehˬ hto toˇ ve htaꞈ kawˆ ve, maˇ heˆ leh awˬ chawˇ leh yehˬ kʼa hkʼaw ve chaw tawˍ laˇ ve htaꞈ kaꞈ kawˆ ve yoˬ hehˉ. Nawˬ chi hkʼe dawˇ jaw ve kʼo, nawˬ geh Liꞈ hpu henˇ chehˇ ve chaw ve dawˇ hkʼaˇ htaꞈ nawˬ na gʼa ve yoˬ. Yeˍsuˆ kʼoˆ ve chi hkʼe te kawˆ ve lehˬ a hkʼe leˇ hpehꞈ ve yoˬ. Kawˆ jaˇ leh  Yaˬhoˉvaˬ ve kanˉ maˇ te˗oˬ ve maˇ te tuˬ Yeˍsuˆ awˬ laꞈ gʼawˇ htaꞈ shaˍ tiꞈ piˇ ve yoˬ. (Maꞈhtehˍ 10:16, 17, 27, 28) Awˬ laꞈ gʼawˇ kawˆ ve htaꞈ gʼaˇ tuˬ Yeˍsuˆ hkʼaˬ hkʼe ga piˇ ve le? Leh nawˬ yawˇ ve awˬ lawn htaꞈ hkʼaˬ hkʼe te henˇ yuˬ gʼa tuˬ le?

16. Liꞈ hpu henˇ ve chaw yawˇ ve yonˍ hkʼaˇ shu htaꞈ kʼoˆ maˍ piˇ gʼa tuˬ ngaˬ hui hkʼaˬ hkʼe maˍ piˇ gʼa tuˬ le?

¹⁶ Nawˬ geh Liꞈ hpu henˇ chehˇ ve chaw yawˇ ve yonˍ hkʼaˇ shu htaꞈ kʼoˆ maˍ piˇ gʼa tuˬ a yehˉ yehˉ maˍ piˇ sheˍ. Yeˍsuˆ ve awˬ laꞈ gʼawˇ kaꞈ bon maˍ˗e tuˬ kʼoˆ piˇ htaˇ kawˆ ve yoˬ hehˉ. A shu htaꞈ bon gʼa maˍ piˇ ve leh aˬ htoꞈ ma ve awˬ lawn maˍ piˇ tuˬ Yeˍsuˆ yawˇ hui htaꞈ kʼoˆ piˇ ve yoˬ. (Maꞈhtehˍ 10:5-7) Nawˬ hkʼaˬ hkʼe te Yeˍsuˆ htaꞈ henˇ yuˬ gʼa tuˬ le? Liꞈ hpu henˇ ve chaw a shu htaꞈ hto maˍ piˇ gʼa tuˬ ga piˇ ve yoˬ. Tawˇ pa haˉ te kʼo, yawˇ Liꞈ hpu hkʼaw awˬ tehˬ ve htaꞈ gʼa henˇ ve kʼo, awˬ bon hkʼaˬ hkʼe gʼa tuˬ, Liꞈ hpu henˇ ve chaw a shu htaꞈ dawˇ mawˬ ve le tehꞈ na piˇ sheˍ. Peuˬ hkʼawꞈ nawˉ Liꞈ hpu henˇ ve chaw awˬ lawn oˇ ve hkʼa sha sha˗ehˬ gu gʼa tuˬ maˍ piˇ sheˍ. Hpehꞈ gʼa ve kʼo, Nawˬ ve a shaꞈ co co taiˍ taiˍ ha lehˬ gʼa ve! liꞈ kʼoˆ hkʼaw “Chaw teˇ hpaˍ kʼoˆ ve” leh “Chaw teˇ hpaˍ na nyi laˇ ve” chi ve htaꞈ cuˇ leh teˇ geh te jawˬ nyi sheˍ.

17. Maꞈhtehˍ liꞈ 10:19, 20, 29-31 hkʼaw yehˇ leh Liꞈ hpu henˇ ve chaw Yaˬhoˉvaˬ htaꞈ gʼaˇ va tuˬ hkʼaˬ hkʼe ga piˇ gʼa ve le?

¹⁷ Nawˬ geh Liꞈ hpu henˇ chehˇ ve chaw Yaˬhoˉvaˬ htaꞈ gʼaˇ va tuˬ ga piˇ sheˍ. Yaˬhoˉvaˬ yawˇ hui htaꞈ haꞈ leh awˬ tehˬ ga laˇ tuˬ yoˬ tehꞈ awˬ laꞈ gʼawˇ yonˍ gʼa tuˬ Yeˍsuˆ ga piˇ ve yoˬ. (Maꞈhtehˍ 10:19, 20, 29-31 gʼaw sheˍ.) Liꞈ hpu henˇ ve chaw Yaˬhoˉvaˬ htaꞈ gʼaˇ va tuˬ ga piˇ leh yawˇ dawˇ teh taˍ ve htaꞈ caˉ daꞈ ve te gʼa tuˬ bon lawˬ ve kʼo, Gʼuiˬ sha yawˇ htaꞈ kaꞈ ga laˇ gʼa ve tehꞈ yonˍ gʼa ve yoˬ. Poˬlan mvuhˇ miˬ lo chehˇ ve Fan˗seh˗chehˆ yawˇ Liꞈ hpu henˇ chehˇ ve chaw hpehꞈ htaˇ ve htaꞈ kʼoˆ ve, “ngaˬ geh Liꞈ hpu maˍ laˇ ve chaw bon lawˬ htaˇ, ngaˬ dawˇ teh taˍ ve awˬ pon kaꞈ bon lawˬ laˇ ve yoˬ. Ngaˬ geh Liꞈ hpu maˍ laˇ ve chaw bon lawˬ hkawˇ Yaˬhoˉvaˬ hkʼawꞈ piˇ ve htaꞈ ngaˬ gʼa mawˬ htaˇ, ngaˬ kaꞈ ngaˬ hkʼaˇ ngaˬ bon lawˬ ve yoˬ. Leh ngaˬ kanˉ awˬ suhˉ gʼa htaˇ kaꞈ kanˉ lawˬ jehˇ leh Hkriꞈ yaˇ awˬ moˍ hkʼaw hpawnˬ daꞈ ve leh hpawnˬ daꞈ lonˉ kʼai gʼa tuˬ Yaˬhoˉvaˬ ga laˇ tuˬ lawˬ ve yoˬ. Yaˬhoˉvaˬ ngaˬ htaꞈ awˬ tehˬ ga laˇ ve gʼa mawˬ ve yoˬ.”

18. Yaˬhoˉvaˬ Liꞈ hpu maˍ ve chaw te ve awˬ ceuˬ htaꞈ hkʼaˬ hkʼe dawˇ ve le?

¹⁸ Yaˬhoˉvaˬ Liꞈ hpu henˇ ve chaw htaꞈ a yeˇ yuˬ leh dawˇ haˍ ve yoˬ. Liꞈ hpu maˍ ve chaw laiˉ gʼaˇ Gʼuiˬ sha geh meuˆ daꞈ la tuˬ ga piˇ ve hkʼaˬ hkʼe taw gʼa coˇ caˇ ve htaꞈ yawˇ na gʼa ve yoˬ. Liꞈ hpu maˍ ve chaw htaꞈ Gʼuiˬ sha haꞈ ve yoˬ. (Iˉsaˍyaˆ 52:7) Nawˬ geh Liꞈ hpu henˇ chehˇ ve chaw maˇ cawˬ ve kʼo, awˬ viˉ awˬ nyi geh teˇ geh Liꞈ hpu maˍ˗e leh yawˇ geh Liꞈ hpu henˇ chehˇ ve chaw uiˍ la mvuh la leh Baˆtiˆsaˬ haꞈ yuˬ gʼa tuˬ nawˬ kaꞈ ga piˇ gʼa ve yoˬ.