Iˉsaˍreˍlaˆ chaw ve awˬ co˗e htaˇ, awˬ tehˬ oˉ kʼoˍ pui ve htaꞈ ga tuˬ hpu tanˇ tanˇ ve yoˬ. Yaꞈ hkʼaˇ, Yeˍsuˆ ve awˬ co˗e gaˬ htaˇ, Yuˇdaꞈ chaw a moˇ laiˉ hpawˇ lo gʼa keu ve pa taw, yawˇ hui awˬ pon haˍ jaˇ.

Daꞈ kehˬ ve aˉ po kʼo te tuˬ leh bon yehˬ lonˉ te tuˬ teˇ hkʼawꞈ le le Iˉsaˍreˍlaˆ chaw hawˉ hkʼaˆ teˇ gʼaˇ le le a moˇ a ciˉ gʼa keu ve yoˬ. Yeˍsuˆ ve awˬ co˗e htaˇ, tuˉ tanˇ tuˬ awˬ pon leh Heˍroˆ te taˍ ve bon yehˬ hkʼaw yehˇ tuˬ ve teˇ hpaˍ awˬ pon a moˇ gʼa keu ve yoˬ. Yuˇdaꞈ chaw teˇ hpaˍ Peˍtruˆ htaꞈ na piˇ ve, bon yehˬ kʼawꞈ gu tuˬ Yeˍsuˆ a moˇ keu˗aw laˇ? Yeˍsuˆ Peˍtruˆ htaꞈ kʼoˆ piˇ ve, a moˇ keu ve maˇ yaꞈ. Peuˬ leh Yeˍsuˆ Peˍtruˆ htaꞈ a moˇ keu tuˬ ve hpu awˬ pon ca yuˬ˗e tcuh ve yoˬ.—Maꞈhtehˍ 17:24-27.

Iˉsaˍreˍlaˆ chaw lehˬ a moˇ teˇ ceuˬ gʼa kʼawꞈ keu sheˍ ve yoˬ. Awˬ shiˍ awˬ nu leh yawˇ hui gʼa taˍ ve hpu teˇ chi pun teˇ pun gʼa keu cawˇ ve yoˬ. (Oˉ kʼoˍ pui ve 27:30-32; Heh puiˉ hkʼaw 18:26-28) Bon awˬ hoˉ teˇ hpaˍ mvuhˇ miˬ yaˇ htaꞈ kʼoˆ piˇ ve, awˬ shiˍ awˬ nu leh yawˇ hui gʼa taˍ ve awˬ ceuˬ hkʼa peu˗eˬ “i hkinˇ, hawˉ loˍ leh gʼaˆ shaweh teˇ hpaˍ” kaꞈ teˇ chi pun teˇ pun gʼa tanˇ piˇ ve yoˬ. Teˇ chi pun teˇ pun tanˇ ve yaꞈ ve tehꞈ Yeˍsuˆ maˇ gʼa kʼoˆ. Liꞈ bvuhꞈ paˍ leh Hpaˍriˍsehˇ chaw heˍ paˍ teˇ hpaˍ˗oˬ, tehꞈ Yeˍsuˆ deˇ piˇ ve yoˬ. Yawˇ hui awˬ lawn maˇ uiˍ ve htaꞈ a yeˇ yuˬ leh awˬ lawn uiˍ ve htaꞈ a yeˇ maˇ yuˬ.—Maꞈhtehˍ 23:23.

Oˇ ve teˇ yanˇ, Yuˇdaꞈ chaw Roˉmaꞈ uˉ peunˍ ve htaꞈ a moˇ laiˉ ceuˬ gʼa keu piˇ sheˍ ve yoˬ. Miˬ guiˬ ve awˬ hpfuhˇ kaꞈ gʼa keu piˇ ve yoˬ. Miˬ guiˬ shehˍ hpaˇ lehˬ, yawˇ hui gʼa taˍ ve awˬ shiˍ awˬ nu 20 maˇ heˆ leh 25 pun gʼa keu piˇ ve yoˬ. Hpu maˇ heˆ leh awˬ shiˍ awˬ nu keu piˇ kaꞈ gʼa ve yoˬ. Chi hkʼoˆ kaꞈ, Yuˇdaꞈ chaw teˇ gʼaˇ le le Roˉmaꞈ uˉ peunˍ ve htaꞈ a moˇ teˇ ceuˬ gʼa keu piˇ sheˍ ve yoˬ. Chi ve teˇ ceuˬ yoˬ, Hpaˍriˍsehˇ hui Yeˍsuˆ htaꞈ na piˇ ve, oˇ ve teˇ yanˇ a moˇ keu ve awˬ lawn ngaˬ hui na gʼa tuˬ Yeˍsuˆ ga laˇ ve yoˬ. Yeˍsuˆ kʼoˆ ve, “hkʼe te leh, jawˇ mawˇ Kehˉsaˍ ve mawˇ jawˇ mawˇ Kehˉsaˍ htaꞈ piˇ˗oˆ. Gʼuiˬ sha ve mawˇ Gʼuiˬ sha htaꞈ piˇ˗oˆ.”—Maꞈhtehˍ 22:15-22.

A moˇ teˇ ceuˬ gʼa keu sheˍ ve lehˬ, mawˇ gʼa ve leh tawˆ˗e ve awˬ hpfuhˇ kaꞈ gʼa keu ve yoˬ. Haw loꞈ kʼoˍ jehˇ kuiˬ, coˬ hpanˍ htaˇ, yaꞈ kʼaw ce hpanˍ htaˇ, leh venˇ hkʼaw maˇ heˆ leh tcuh hkʼaw loꞈ la te htaˇ, a moˇ gʼa keu piˇ sheˍ ve yoˬ.

A moˇ chi hkʼe keu ve lehˬ, Roˉmaꞈ uˉ peunˍ ve awˬ hawˉ lo chehˇ ve chaw teˇ hpaˍ hpehꞈ haˍ jaˇ. Yeˍsuˆ miˬ guiˬ hkʼoˆ chehˇ htaˇ, Roˉmaꞈ chaw ve chaˬ nyi tehˆ nyi paˍ Ta˗hki˗tuˆ lehˬ Hta˗beh˗liˆ uˉ peunˍ ve awˬ yanˇ htaꞈ kʼoˆ ve yoˬ. Ta˗hki˗tuˆ kʼoˆ ve, “Suˇriˆ leh Yuˇdaꞈ chaw a moˇ gʼa keu maˇ jaˇ ve pa taw, a moˇ hkʼe taw maˇ keu tcuh laˇ tuˬ mvuhˇ miˬ uˉ peunˍ ve geh lawˬ hkawˉ ve yoˬ.”

Chi hkʼe ceh maˇ heˆ. Mvuhˇ miˬ yaˇ htaꞈ a moˇ gʼaˇ hteꞈ kʼawꞈ keu tcuh ve yoˬ. Oˇ ve teˇ yanˇ, awˬ hkawnˍ shaw paˍ gʼa te tuˬ a shu hpu keu gʼa maˇ ve kʼo, oˇ ve teˇ gʼaˇ gʼa te ve yoˬ. Yawˇ awˬ nu ve teˇ gʼaˇ htaꞈ hpu kʼawꞈ piˇ leh awˬ hkawnˍ ca gʼawˆ tcuh ve yoˬ. Yawˇ leh awˬ hkawnˍ ca gʼawˆ ve chaw kaꞈ awˬ yawˬ gʼaˇ hteꞈ gʼa tuˬ te ve yoˬ. Oˇ ve teˇ yanˇ Saˍkehˇ htaꞈ hpu gʼawˆ piˇ tuˬ awˬ ceˬ cawˬ ve yoˬ. (Luˉkaꞈ 19:1, 2) Chi htaꞈ pa taw, oˇ htaˇ teˇ co˗e ve chaw awˬ hkawnˍ gʼawˆ maˇ jaˇ ve htaꞈ yawˇ hui nyi hkʼaˇ maˇ suh leh, nyi bawˬ jaˇ ve tehꞈ ngaˬ hui na gʼa ve yoˬ.