Ha pa 5 maˬ 19 nyi 1940 hkʼawꞈ Leˬbaˬnonˍ mvuhˇ miˬ A˗yu venˇ lo ngaˬ paw ve yoˬ. Ngaˬ paw ve hkʼaˬ nyiˇ hkʼawꞈ maˇ gaˬ sheˍ htaˇ, ngaˬ hui ve yehˬ kʼa Ti˗po˗li venˇ lo jiˆ kʼai ve yoˬ. Ngaˬ hui ve yehˬ kʼa gawˬ lehˍ cawˬ leh ha lehˬ jaˇ. Ngaˬ hui Yaˬhoˉvaˬ htaꞈ haꞈ ve yoˬ. Ngaˬ awˬ viˉ ma 3 gʼaˇ cawˬ leh awˬ viˉ paˍ 1 gʼaˇ cawˬ ve yoˬ. Ngaˬ lehˬ awˬ leh paˍ hpehꞈ ve yoˬ. Ngaˬ pa ngaˬ e awˬ pon hpu ca ve a yeˇ uiˍ ve tehꞈ maˇ shawˍ. Ngaˬ hui a shaꞈ teꞈ kuiˬ hkʼaw a yeˇ uiˍ jaˇ ve lehˬ, Liꞈ hpu henˇ ve, hpawnˬ daꞈ˗e ve, leh awˬ nu ve chaw Gʼuiˬ sha htaꞈ shiˍ daꞈ tuˬ ga piˇ ve yoˬ.

Ngaˬ hui ve Hkriꞈ yaˇ awˬ moˍ hkʼaw leuˆ yuˬ taˍ ve chaw laiˉ gʼaˇ cawˬ ve yoˬ. Teˇ gʼaˇ lehˬ Miˆche A˗bonꞈ meh ve yoˬ. Yawˇ Hkriꞈ yaˇ awˬ moˍ Liꞈ hpu henˇ ve sheh kʼai paˍ hpehꞈ ve yoˬ. Yawˇ awˬ tehˬ ve Neuˇyawˆ venˇ lo henˇ ve yoˬ. 1921 hkʼawꞈ htaˇ, Leˬbaˬnonˍ mvuhˇ miˬ lo hto toˇ la ve awˉ lawˉ teˇ pawˆ hpehꞈ ve yoˬ. Ehn leh Kawehˇ Be˗veu Giˉlaˆ Liꞈ henˇ yehˬ henˇ peuˬ leh Leˬbaˬnonˍ mvuhˇ miˬ lo hto toˇ la ve htaꞈ ngaˬ tawnˇ gʼa ve yoˬ. Awˬ viˉ awˬ nyi Miˆche yawˇ huiˉ maˬ htaꞈ ga piˇ jaˇ. Leh yawˇ huiˉ maˬ kaꞈ ngaˬ hui ve yehˬ kʼa htaꞈ meuˆ daꞈ ve yoˬ. Laiˉ chi hkʼawꞈ peuˬ hkʼawꞈ nawˉ, Aˍmiˬriˆkaꞈ mvuhˇ miˬ lo Ehn htaꞈ teˇ pawˆ gʼa kʼawꞈ mawˬ daꞈ ve ha lehˬ jaˇ. Peuˬ hkʼawꞈ nawˉ ngaˬ Kawehˇ Be˗veu htaꞈ gʼa kʼawꞈ mawˬ daꞈ ve yoˬ. Yawˇ Vi˗faw Koˇ htaꞈ heuˆ daꞈ leh Eˍgaˍlanˍ mvuhˇ miˬ Law˗daw venˇ awˬ tcuhˆ puiˍ lo kanˉ te chehˇ ve yoˬ.

Ngaˬ yaˇ ehˉ htaˇ, Leˬbaˬnonˍ mvuhˇ miˬ lo Shaˉhkiˆhkanˍ ve chaw hkʼaˬ nyiˇ gʼaˇ maˇ cawˬ sheˍ. Yaꞈ hkʼaˇ, ngaˬ hui nyi ma pfuhˇ ve hkʼaw hto toˇ ve yoˬ. Bon awˬ hoˉ ngaˬ hui htaꞈ tawˍ laˇ ve htawˇ, ngaˬ hui hto toˇ ve yoˬ. Teˇ lawn lawn htaꞈ ngaˬ hkʼa dehꞈ tawnˇ gʼa sheˍ ve yoˬ.

Teˇ nyi htaˇ ngaˬ leh ngaˬ viˉ Sa˗mi˗naˇ hkehˉ chaw haˉ kuiˬ yehˬ teˇ taw lo hto toˇ chehˇ ve yoˬ. Ngaˬ hui hto toˇ chehˇ htaˇ, Caˬbuˉ awˬ hoˉ ngaˬ hui geh laˬ ve yoˬ. Chaw teˇ gʼaˇ gʼaˇ yawˇ htaꞈ hto piˇ ve yoˬ hehˉ. Caˬbuˉ awˬ hoˉ Sa˗mi˗naˇ htaꞈ deˇ piˇ leh go tcuhˉ lo caꞈ ce piˇ ve yoˬ. Peuˬ hkʼawꞈ nawˉ chaw teˇ gʼaˇ gʼaˇ taˍ nuꞈ (paˍ leˆ) htaꞈ hto piˇ ve yoˬ hehˉ. Leh taˍ nuꞈ kaꞈ Caˬbuˉ awˬ hoˉ chi teˇ gʼaˇ htaꞈ taˍ nuꞈ kanˉ te kuiˬ yehˬ lo shiˍ kʼai ve yoˬ. Taˍ nuꞈ chi ve teˇ gʼaˇ awˬ nu ve chaw ngaˬ viˉ ma htaꞈ ga piˇ tuˬ kʼoˆ piˇ ve yoˬ. Taˍ nuꞈ Caˬbuˉ awˬ hoˉ htaꞈ hpfuhˆ nyi htaˇ, yawˇ naˆ pfuhˇ taˍ ve htaꞈ gʼa mawˬ ve yoˬ. Taˍ nuꞈ awˬ hoˉ Caˬbuˉ htaꞈ na piˇ ve, “nawˬ bon awˬ hoˉ maˇ heˆ leh maw˗riˆ awˬ hoˉ hpehꞈ ve laˇ?”

Ngaˬ hui ve Hkriꞈ yaˇ awˬ moˍ vuiˇ jaˇ kuiˬ lo hto toˇ˗e tuˬ chaw gʼaw caˇ ve kaˇ ngaˍ ve htaꞈ ngaˬ tawnˇ gʼa ve yoˬ. Ngaˬ hui pyawˍ jaˇ. Oˇ teˇ taw lo ve Caˬbuˉ shiˍ htaˇ, laiˉ gʼaˇ ngaˬ hui htaꞈ ca te luˬ la tcuh ve yoˬ. Yawˇ hui ngaˬ hui htaꞈ deˇ laˇ leh haˉ pui baˬ hpehˇ laˇ ve yoˬ. Ngaˬ pa htaꞈ haˉ pui baˬ hpehˇ piˇ leh mehˆ hpfuhˇ hkʼoˆ suhˍ shoˇ yaꞈ la ve yoˬ. Hkʼe te leh, ngaˬ pa leh ngaˬ e kaˇ jehˇ kuiˬ lo kʼai ve yoˬ. Ngaˬ hui kawˆ jaˇ leh yawˇ huiˉ maˬ hkʼaˇ suh juˇ kʼai ve yoˬ. Ngaˬ e ngaˬ pa ve mehˆ hpfuhˇ htaꞈ shiˆ piˇ ve ngaˬ maˇ leunˇ jaw. Ngaˬ e kʼoˆ ve, “Yaˬhoˉvaˬ˗oˬ, yawˇ hui htaꞈ venˇ baˆ hpehˇ piˇ sheˍ. Yawˇ hui aˬ htoꞈ ma te chehˇ ve htaꞈ maˇ shiˍ ve pa taw yoˬ.”

Awˬ nu ve teˇ lawn ngaˬ tawnˇ gʼa sheˍ ve lehˬ, ngaˬ hui ve awˬ viˉ awˬ nyi geh ca guiˇ˗e htaˇ yoˬ. Ngaˬ hui ngaˬ puˍ geh ca guiˇ˗e htaˇ, bon yehˬ hkʼaw aˉ yaˇ cawˬ ve chaw teˇ gʼaˇ htaꞈ mawˬ daꞈ ve yoˬ. Ngaˬ pa ngaˬ e Shaˉhkiˆhkanˍ ve chaw hpehꞈ ve tehꞈ yawˇ shiˍ ve yoˬ. Oˇ ve teˇ yanˇ lehˬ ngaˬ 6 hkʼawꞈ ceh tiˉ sheˍ. Yawˇ ngaˬ htaꞈ kuˬ tawˆ leh na laˇ ve, “aˬ htoꞈ ma te nawˬ Baˆtiˆsaˬ laꞈ haˉ maˇ haꞈ yuˬ ve le?” Ngaˬ yawˇ htaꞈ hkʼawꞈ piˇ ve, ngaˬ maˇ uiˍ sheˍ leh ngaˬ Baˆtiˆsaˬ haꞈ yuˬ ve kʼo, Liꞈ hpu chi aꞈ kehˉ gʼa shiˍ cawˇ sheˍ ve leh yonˍ hkʼaˇ kaꞈ chi aꞈ kehˉ gʼa cawˬ cawˇ sheˍ ve yoˬ. Ngaˬ chi hkʼe hkʼawꞈ piˇ ve htaꞈ bon awˬ hoˉ maˇ dawˇ cawˇ. Ngaˬ awˬ liˇ awˬ hkʼaˇ maˇ daꞈ ve yaˇ hpehꞈ ve tehꞈ yawˇ ngaˬ puˍ htaꞈ kʼoˆ piˇ ve yoˬ.

Yaꞈ hkʼaˇ, awˬ lawn chi hkʼe ve maˇ cawˬ maˇ. Awˬ tehˬ kʼo, Leˬbaˬnonˍ chaw maˇ˗awˍ ve lehˬ, shiˍ puiˉ leh awˬ chawˇ hpehꞈ daꞈ ve yoˬ. Hkʼe te leh, ngaˬ hui Liꞈ hpu awˬ lawn laiˉ gʼaˇ htaꞈ yaw daꞈ gʼa leh, Liꞈ hpu henˇ ve chaw kaꞈ laiˉ gʼaˇ cawˬ ve yoˬ.

Ngaˬ liꞈ henˇ chehˇ sheˍ htaˇ, Veˬneˬzawˇehˇlaˇ mvuhˇ miˬ lo chehˇ ve awˬ viˉ awˬ nyi yaˇ nehˬ teˇ gʼaˇ Leˬbaˬnonˍ mvuhˇ miˬ lo ca guiˇ la ve yoˬ. Yawˇ ngaˬ hui ve Hkriꞈ yaˇ awˬ moˍ hkʼaw hpawnˬ daꞈ la ve yoˬ. Leh yawˇ ngaˬ viˉ ma Va˗fa htaꞈ maˆ ve yoˬ. Yawˇ hui heuˆ daꞈ peuˬ hkʼawꞈ nawˉ maˇ maw, Veˬneˬzawˇehˇlaˇ mvuhˇ miˬ lo ca chehˇ˗e ve yoˬ. Ngaˬ viˉ ma ngaˬ pa htaꞈ laiˉ pawˆ liꞈ bvuhꞈ feu laˇ ve, yawˇ ngaˬ hui htaꞈ dawˇ nawˇ jaˇ leh ngaˬ hui htaꞈ kaꞈ Veˬneˬzawˇehˇlaˇ mvuhˇ miˬ lo ca chehˇ la tcuh gaˇ ve yoˬ. Awˬ leh  meuˇ htaˇ ngaˬ hui ve yehˬ kʼa kaꞈ Veˬneˬzawˇehˇlaˇ mvuhˇ miˬ lo ca chehˇ˗e ve yoˬ.

1953 hkʼawꞈ ngaˬ hui Veˬneˬzawˇehˇlaˇ mvuhˇ miˬ lo gaˬ la leh Hka˗la˗kaˆ venˇ, mvuhˇ miˬ kanˉ te kuiˬ awˬ paˇ lo chehˇ ve yoˬ. Oˇ ve teˇ yanˇ ngaˬ maˇ uiˍ sheˍ leh mvuhˇ miˬ kanˉ te paˍ awˬ hoˉ htaꞈ kaˇ gʼaꞈ piˇ ve chaw kaꞈ cawˬ ve ngaˬ gʼa mawˬ htaˇ dawˇ cawˇ jaˇ. Shu mvuhˇ miˬ lo jiˆ laˬ ve ngaˬ pa leh ngaˬ e awˬ pon kʼo maˇ sha. Chaw ceuˬ tawˇ hkawˇ, chaw liˇ vaˇ liˇ, caˇ tuˬ leh mvuhˇ haw awˬ shaˉ chi ve teˇ hpaˍ yawˇ hui gʼa pa ve yoˬ. Chi ve teˇ hpaˍ htaꞈ yawˇ hui pa gʼa la˗oˬ htaˇ, maˇ daꞈ ve awˬ lawn gʼa hpuˇ ve yoˬ.

Ngaˬ pa naˬ ve yoˬ. Maˇ˗awˍ ve kʼo, ngaˬ pa awˬ gʼaˇ hehnˇ leh tcuhˇ tcuhˬ maˇ naˬ. Chi htaꞈ pa taw, ngaˬ pa naˬ˗a laˇ htaˇ anˇ jaˇ. Saˍ laꞈ gʼonˍ kʼoˆ ve, ngaˬ pa lehˬ awˬ pe htaꞈ mvuhˇ haˉ caˇ ve pa taw, gʼa shawˆ hpeꞈ ve yoˬ. Shawˆ hpeꞈ ve teˇ shinˉ peuˬ hkʼawꞈ nawˉ ngaˬ pa suh˗e ve yoˬ.

Ngaˬ hui nyi ma hkʼaˬ hkʼe taw luˬ ve ca kʼoˆ laˇ kuiˬ maˇ shiˍ. Oˇ ve teˇ yanˇ lehˬ ngaˬ 13 hkʼawꞈ ceh tiˉ sheˍ. Ngaˬ hui cheˆ˗ehˬ kʼai leh teꞈ chiˉ te kuiˬ kaꞈ maˇ shiˍ. Miˬ guiˬ hkʼa peu˗eˬ paˆ˗e ve htaꞈ shuˍ ve yoˬ. Ngaˬ e awˬ lawn chi ve htaꞈ haꞈ yuˬ gʼa tuˬ awˬ yanˇ gʼa yehˇ maw jaˇ. Yaꞈ hkʼaˇ, ngaˬ hui caˉ leh a shaꞈ gʼa kʼawꞈ teꞈ kʼai leh awˬ lawn chi haꞈ yuˬ gʼa tuˬ, Yaˬhoˉvaˬ ga laˇ ve tehꞈ shiˍ ve yoˬ. Ngaˬ a shaꞈ 16 hkʼawꞈ htaˇ, Hka˗la˗kaˆ venˇ lo liꞈ 9 tanˇ henˇ peuˬ ve yoˬ. Oˇ ve teˇ yanˇ, ngaˬ hui ve yehˬ kʼa htaꞈ gʼa nyi haꞈ shaˉ piˇ gaˇ jaˇ.

Ro˗beuꞈ A˗ra˗ho Giˉlaˆ Liꞈ henˇ yehˬ lo henˇ peuˬ leh Veˬneˬzawˇehˇlaˇ mvuhˇ miˬ lo Gʼuiˬ sha ve kanˉ ca te la ve htaꞈ ngaˬ viˉ ma Sa˗mi˗naˇ heuˆ daꞈ ve yoˬ. Yawˇ huiˉ maˬ Neuˇyawˆ venˇ lo jiˆ kʼai tuˬ dawˇ cheˆ ve yoˬ. Ngaˬ hui ve yehˬ kʼa ngaˬ htaꞈ liꞈ tanˇ mvuh ve henˇ tcuh gaˇ ve yoˬ. Ngaˬ ngaˬ viˉ ma geh chehˇ˗e leh oˇ kaˬ lo henˇ ve yoˬ. Ngaˬ viˉ ma leh yawˇ ve awˬ hpawˇ geh chehˇ ve awˬ yanˇ htaˇ, yawˇ hui ngaˬ uiˍ la mvuh la leh Yaˬhoˉvaˬ geh meuˆ daꞈ tuˬ ga laˇ ve yoˬ. Buˆlinˍ Hkriꞈ yaˇ awˬ moˍ Saˬpenˬ tawˇ hkawˇ yaw ve awˬ viˉ awˬ nyi co ha hpawˇ awˬ gʼaˇ hehnˇ ve laiˉ gʼaˇ ngaˬ htaꞈ ga laˇ ve yoˬ. awˬ viˉ awˬ nyi Min˗htawnˇ Hen˗shenˇ leh Feˉdeˬriꞈ Fanˍ htaꞈ ngaˬ gʼa shiˍ daꞈ ve ha lehˬ jaˇ. Yawˇ huiˉ maˬ Buˆlinˍ Beˍteˍlaˆ hkʼaw kanˉ te chehˇ ve yoˬ.

Ngaˬ liꞈ tanˇ mvuh ve 1 hkʼawꞈ henˇ peuˬ˗e te htaˇ, ngaˬ ve a shaꞈ htaꞈ caˉ daꞈ ve tanˬ dawˇ nyi ve yoˬ. Shaw nyi kuiˬ Taꞈ yehˬ hkʼaw ve awˬ lawn Hkriꞈ yaˇ Yaˬhoˉvaˬ ve kanˉ te ve dawˇ teh taˍ ve cawˬ ve htaꞈ ngaˬ gʼaw nyi leh awˬ lawn chi ve htaꞈ caˉ daꞈ ve ngaˬ hkʼa dehꞈ dawˇ nyi ve yoˬ. Hkriꞈ yaˇ awˬ moˍ hkʼaw ve awˬ viˉ awˬ nyi gʼuˇ suhˍ peuˍ ve te leh Beˍteˍlaˆ hkʼaw kaꞈ kanˉ te ve htaꞈ mawˬ ve yoˬ. Yawˇ hui ha lehˬ jaˇ leh, ngaˬ yawˇ hui hkʼe hpehꞈ gaˇ ve yoˬ. Yaꞈ hkʼaˇ, oˇ ve teˇ yanˇ ngaˬ Baˆtiˆsaˬ maˇ haꞈ yuˬ sheˍ. Maˇ maw ngaˬ Yaˬhoˉvaˬ htaꞈ awˬ to gʼa chiˇ aꞈ piˇ ve tehꞈ dawˇ ve yoˬ. Leh a yeˇ uiˍ jaˇ ve htaꞈ ngaˬ dawˇ cheˆ leh Ha pa 3 maˬ 30 nyi 1957 hkʼawꞈ htaˇ, ngaˬ Baˆtiˆsaˬ haꞈ yuˬ ve yoˬ.

A yeˇ uiˍ jaˇ ve awˬ lawn dawˇ cheˆ peuˬ hkʼawꞈ nawˉ, a yeˇ uiˍ ve awˬ nu ve teˇ ceuˬ dawˇ cheˆ tuˬ dawˇ nyi ve lehˬ, Gʼuiˬ sha ve kanˉ awˬ yanˇ hkʼa biˇ te ve yoˬ. Ngaˬ Gʼuiˬ sha ve kanˉ awˬ yanˇ hkʼa biˇ te gaˇ jaˇ. Yaꞈ hkʼaˇ, chi sha ve maˇ heˆ tehꞈ ngaˬ shiˍ ve yoˬ.  Ngaˬ Gʼuiˬ sha ve kanˉ kaꞈ te leh, liꞈ tanˇ mvuh ve kaꞈ henˇ ve hkʼaˬ hkʼe te te gʼa tuˬ le? Ngaˬ liꞈ tanˇ mvuh ve htaꞈ maˇ henˇ˗o leh, Veˬneˬzawˇehˇlaˇ mvuhˇ miˬ lo kʼoꞈ˗e leh, gʼuˇ suhˍ peuˍ ve te gaˇ ve tehꞈ ngaˬ e leh ngaˬ viˉ ma htaꞈ liꞈ laiˉ pawˆ bvuhꞈ feu piˇ ve yoˬ.

Yaꞈ hkʼaˇ, ngaˬ Hka˗la˗kaˆ venˇ lo Ha pa 6 maˬ 1957 hkʼawꞈ htaˇ kʼoꞈ˗e ve yoˬ. Ngaˬ hui ve yehˬ kʼa hkʼaw hpu maˇ yehˇ lawꞈ leh 1 gʼaˇ kanˉ gʼa kʼawꞈ te maˇ ve tehꞈ ngaˬ mawˬ ve yoˬ. Ngaˬ hkʼaˬ hkʼe ga piˇ gʼa tuˬ le? Ngaˬ hpu htawnˍ yehˬ hkʼaw kanˉ gʼa ve yoˬ. Yaꞈ hkʼaˇ, ngaˬ gʼuˇ suhˍ peuˍ ve te gaˇ jaˇ. Ngaˬ choˬ kaˬ lo kʼawꞈ la ve lehˬ gʼuˇ suhˍ peuˍ ve te gaˇ ve pa taw yoˬ. Hkʼe te leh, ngaˬ nyiˇ ceuˬ ceuˬ te tuˬ dawˇ cheˆ ve yoˬ. Ngaˬ hpu htawnˍ yehˬ hkʼaw kaꞈ kanˉ laiˉ hkʼawꞈ te leh, gʼuˇ suhˍ peuˍ ve kaꞈ laiˉ hkʼawꞈ te ve yoˬ. Ngaˬ kanˉ maˇ jaˇ ve htawˇ ha lehˬ jaˇ!

Jaˬmaˬniˬ chaw She˗vi meh ve Yaˬhoˉvaˬ htaꞈ haꞈ jaˇ ve geh ngaˬ gʼa heuˆ daꞈ ve ha lehˬ jaˇ. Yawˇ Veˬneˬzawˇehˇlaˇ mvuhˇ miˬ lo awˬ pa awˬ e geh teˇ geh jiˆ laˬ ve yoˬ. Leh ngaˬ huiˉ maˬ yaˇ 2 gʼaˇ cawˬ ve yoˬ. Ngaˬ hui ve yaˇ paˍ Miˆche meh (Miˆhkaˍ) leh yaˇ miˇ Sha˗mi˗raˇ meh ve yoˬ. Chi hkʼoˆ kaꞈ, ngaˬ e ngaˬ geh ca chehˇ la tcuh ve yoˬ. Ngaˬ yehˬ kʼa htaꞈ nyi haꞈ shaˉ tuˬ gʼuˇ suhˍ peuˍ ve te ve gʼa jehˇ ve htawˇ, hto toˇ ve te gʼa ve hkʼe te sheˍ ve yoˬ. Ngaˬ huiˉ maˬ awˬ yanˇ cawˬ htaˇ, teˇ tcuhˉ teˇ yanˇ gʼuˇ suhˍ peuˍ ve te ve yoˬ.

Awˉ lawˉ htaˇ ngaˬ kʼoˆ maˍ laˇ peuˬ ve, oˇ ve teˇ yanˇ lehˬ ngaˬ hui ve yaˇ liꞈ henˇ chehˇ sheˍ. Oˇ ve teˇ yanˇ lehˬ ngaˬ ve a shaꞈ teꞈ hkʼaˇ daꞈ jaˇ leh kanˉ te kuiˬ lo a shu teˇ gʼaˇ kaꞈ ngaˬ htaꞈ yawˆ yan laˇ ve yoˬ. Yaꞈ hkʼaˇ, ngaˬ Yaˬhoˉvaˬ ve kanˉ te shehˍ hpaˇ hpehꞈ ve tehꞈ, awˬ nu ve chaw htaꞈ dawˇ tcuh gaˇ ve yoˬ. Awˬ lawn chi ve ngaˬ hkʼaˬ htaˆ kaꞈ dawˇ nyi ve yoˬ. Hkʼe te leh ngaˬ leh ngaˬ miˇ ma yehˬ kʼa hkʼaw lo hpu gʼa ve awˬ lawn yaw daꞈ ve yoˬ. Ngaˬ kanˉ te kuiˬ lo tawˆ˗e ve kʼo, ngaˬ hui hpu teˇ diˬ gʼa leh jehˬ kaꞈ maˇ cha. Ngaˬ hui ve a shaꞈ teꞈ hkʼaˇ caˇ lawꞈ dawˬ lawꞈ te ve kʼo, ngaˬ hui ve hpu gʼa yehˇ maw sheˍ.

Oˇ ve teˇ pawˆ dawˇ cheˆ ve sha ve maˇ heˆ. Yaꞈ hkʼaˇ, ngaˬ miˇ ma leh ngaˬ e kaꞈ awˬ gʼaˇ peꞈ laˇ jaˇ! Ngaˬ Gʼuiˬ sha ve kanˉ awˬ yanˇ hkʼa biˇ teˇ pawˆ gʼa kʼawꞈ te ve ha lehˬ jaˇ. Teˇ ceuˬ le le nyi˗a kʼo daꞈ ve yoˬ. Yaꞈ hkʼaˇ, ha lehˬ jaˇ ve awˬ lawn teˇ lawn cawˬ ve yoˬ.

She˗vi yaˇ hu ve tehꞈ saˍ laꞈ gʼonˍ kʼoˆ laˇ ve yoˬ. Ngaˬ huiˉ maˬ ha lehˬ jaˇ! Yaꞈ hkʼaˇ, ngaˬ gʼuˇ suhˍ peuˍ ve te tuˬ dawˇ teh taˍ ve htaꞈ gʼa kʼawꞈ dawˇ nyi ve yoˬ. Ngaˬ hui ve yaˇ htaꞈ haˆ haˆ mawˬ gaˇ jaˇ. Yaꞈ hkʼaˇ, ngaˬ gʼuˇ suhˍ peuˍ ve te gʼa sheˍ laˇ? tehꞈ dawˇ ve yoˬ.

Tawˇ yaw daꞈ peuˬ hkʼawꞈ nawˉ, gʼuˇ suhˍ peuˍ ve te tuˬ dawˇ teh taˍ ve hkʼe gʼaꞈ te ve yoˬ. Ngaˬ hui ve yaˇ paˍ Hke˗be Ha pa 4 maˬ 1985 hkʼawꞈ htaˇ paw ve  yoˬ. Peuˬ hkʼawꞈ nawˉ, ngaˬ kanˉ te kuiˬ lo tawˆ la leh oˇ ve teˇ hkʼawꞈ Ha pa 6 maˬ htaˇ, ngaˬ gʼuˇ suhˍ peuˍ ve teˇ pawˆ kʼawꞈ te ve yoˬ. Peuˬ hkʼawꞈ nawˉ ngaˬ daꞈ jaˇ ve awˬ vuiˬ kʼawꞈ gʼa ve lehˬ, awˬ tcuhˆ puiˍ hkʼaw ve kawˍmiˍtiˍ teˇ gʼaˇ gʼa te ve yoˬ. Awˬ tcuhˆ puiˍ lehˬ Hka˗la˗kaˆ venˇ lo cawˬ ve maˇ heˆ. Teˇ shinˉ ve hkʼaw 2 nyi maˇ heˆ leh 3 nyi ngaˬ 80 kiˇ loˇ kʼai kʼawꞈ gʼa te ve yoˬ.

Awˬ tcuhˆ puiˍ lehˬ La˗veˆtaw˗ri lo cawˬ ve yoˬ. Ngaˬ hui ve yehˬ kʼa Beˍteˍlaˆ awˬ paˇ lo gʼa chehˇ tuˬ oˇ kaˬ lo jiˆ kʼai tuˬ dawˇ cheˆ ve yoˬ. Ngaˬ hui awˬ pon chi dawˇ cheˆ ve a yeˇ uiˍ jaˇ. Ngaˬ yehˬ kʼa hkʼaw ve chaw teˇ gʼaˇ le le htaꞈ chiˇ mvuh piˇ gaˇ leh awˬ bon uiˍ jaˇ kʼoˆ piˇ gaˇ ve yoˬ. Ngaˬ viˉ paˍ Ba˗ha ngaˬ hui awˬ tanˬ ngaˬ e htaꞈ nyi haꞈ shaˉ laˇ˗a tehꞈ kʼoˆ laˇ ve yoˬ. Oˇ ve teˇ yanˇ ngaˬ hui ve yaˇ Miˆhkaˍ yehˬ kʼa ca˗oˬ leh, Sha˗mi˗raˇ yehˬ kʼa maˇ ca sheˍ. La˗veˆtaw˗ri lo jiˆ laˬ leh, Hka˗la˗kaˆ lo ve awˬ chawˇ teˇ hpaˍ htaꞈ gʼa hpaˆ daꞈ ve yoˬ. Ngaˬ hui venˇ lonˉ hkʼaw chehˇ jaw ve pa taw, ngaˬ miˇ ma She˗vi venˇ ehˉ hkʼaw chehˇ tuˬ gʼa pa ve yoˬ. Ngaˬ hui yehˬ maˇ uiˍ ve htaꞈ gʼa kʼawꞈ chehˇ ve yoˬ. Hka˗la˗kaˆ te leh ngaˬ hui La˗veˆtaw˗ri lo jiˆ laˬ htaˇ, laiˉ ceuˬ gʼa pa ve yoˬ.

Leh teˇ ceuˬ le le gʼa kʼawꞈ pa sheˍ. Hke˗be heuˆ daꞈ˗oˬ leh Sha˗mi˗raˇ kaꞈ teˇ kaˬ lo ca kʼawꞈ jiˆ chehˇ˗e ve yoˬ. Ngaˬ leh ngaˬ miˇ ma 2007 hkʼawꞈ htaˇ, Beˍteˍlaˆ lo chehˇ la tuˬ kuˬ laˇ ve yoˬ. Chi teˇ hkui hkʼa gaˬ ngaˬ hui oˇ kaˬ lo chehˇ sheˍ. Ngaˬ hui ve yaˇ Miˆhkaˍ nyi haꞈ shaˍ paˍ hpehꞈ leh yawˇ ve awˬ miˇ ma Mo˗ne˗kanˇ geh gʼuˇ suhˍ peuˍ ve teˇ geh te chehˇ ve yoˬ. Hke˗be kaꞈ nyi haꞈ shaˉ paˍ te chehˇ ve yoˬ. Iˉtaˬliˬ mvuhˇ miˬ lo yawˇ ve awˬ miˇ ma Ehn˗ba˗laˇ geh Gʼuiˬ sha ve kanˉ teˇ geh te chehˇ ve yoˬ. Sha˗mi˗raˇ gʼuˇ suhˍ peuˍ ve te leh aˉ hkʼaw chehˇ leh Beˍteˍlaˆ kanˉ kaꞈ gʼa ga ve yoˬ.

Ngaˬ ve a shaꞈ a yeˇ uiˍ ve dawˇ cheˆ tuˬ ve laiˉ lawn cawˬ ve yoˬ. Yaꞈ hkʼaˇ, ngaˬ nyi ma maˇ luˬ jaw. Oˇ htaˇ hkʼe leˇ kʼawꞈ hpehꞈ gʼa ve kʼo ngaˬ kaꞈ hkʼa shuˍ kʼawꞈ dawˇ cheˆ ve yoˬ. Yaˬhoˉvaˬ ve kanˉ te ve awˬ vuiˬ gʼa ve teˇ hpaˍ htaꞈ ngaˬ awˬ hpfuhˇ shiˍ jaˇ. Ponˬ laˬ ve awˬ yanˇ laiˉ hkʼawꞈ ngaˬ gʼa mawˬ ve, Yaˬhoˉvaˬ geh hkʼaˬ htaˆ kaꞈ meuˆ daꞈ ve lehˬ a yeˇ uiˍ jaˇ. Awˬ lawn uiˍ ve leh maˇ uiˍ ve dawˇ cheˆ ve htawˇ, “ca dawˇ maˇ gaˬ ve dawˇ sha gaˇ sha ve teˇ ceuˬ” Gʼuiˬ sha ngaˬ hui htaꞈ peꞈ laˇ gʼa ve yoˬ. (Hpiˇliˇpiˆ 4:6, 7) Ngaˬ leh ngaˬ miˇ ma Beˍteˍlaˆ hkʼaw kanˉ gʼa te ve ha lehˬ jaˇ. Ngaˬ hui hkʼaˬ htaˆ kaꞈ Yaˬhoˉvaˬ htaꞈ dawˇ nyi ve pa taw, teˇ pawˆ le le dawˇ cheˆ ve htaꞈ Yaˬhoˉvaˬ awˬ bon naꞈ laˇ ve htaꞈ gʼa mawˬ ve yoˬ.