1. Yaˬhoˉvaˬ ve kanˉ te ve chaw aˬ htoꞈ ma te teˇ pawˆ pawˆ kʼo chehˇ bawˬ ve le?

 Ngaˬ hui kaꞈ teˇ pawˆ pawˆ chehˇ bawˬ ve yoˬ. Chaw teˇ hpaˍ awˬ pon kʼo, teˇ hkui ceh tiˉ chehˇ bawˬ ve yoˬ. Chaw teˇ hpaˍ awˬ pon kʼo, chehˇ bawˬ ve awˬ yanˇ maw ve yoˬ. Ngaˬ hui kaꞈ chaw maˇ maˇ geh chehˇ ve htawˇ, teˇ pawˆ pawˆ kʼo chehˇ bawˬ ve yoˬ. Teˇ hpaˍ kʼo, Hkriꞈ yaˇ awˬ moˍ teˇ kaˬ lo ca chehˇ˗e gehˇ sheˍ ve pa taw, awˬ viˉ awˬ nyi geh maˇ meuˆ daꞈ sheˍ. Teˇ hpaˍ kʼo, yawˇ hui ve yehˬ kʼa meuˆ daꞈ jaˇ ve geh hpaˆ daꞈ taˉ leh awˬ nu ve teˇ kaˬ lo ca chehˇ˗e ve pa taw, chehˇ bawˬ ve yoˬ. Teˇ hpaˍ kʼo, yawˇ hui haꞈ ve chaw suh˗e ve pa taw, chehˇ bawˬ leh yawˇ hui teˇ geh chehˇ ve awˬ yanˇ htaꞈ dawˇ nawˇ ve yoˬ. Teˇ hpaˍ kʼo, awˬ tehˬ ve htaꞈ henˇ la gehˇ sheˍ ve pa taw, yehˬ kʼa maˇ heˆ leh awˬ chawˇ tawˍ piˇ ve htaꞈ gʼa hpuˇ htaˇ chehˇ bawˬ ve yoˬ.

2. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

² Ngaˬ hui htaꞈ caˉ daꞈ ve teˇ ceuˬ le le Yaˬhoˉvaˬ na gʼa leh shiˍ ve yoˬ. Ngaˬ hui chehˇ bawˬ htaˇ, yawˇ shiˍ leh ga laˇ gaˇ ve yoˬ. Yaꞈ hkʼaˇ, Yaˬhoˉvaˬ ngaˬ hui htaꞈ hkʼaˬ hkʼe ga laˇ ve le? Ngaˬ hui chehˇ bawˬ htaˇ ngaˬ hui hkʼaˬ hkʼe te cawˇ ve le? Hkriꞈ yaˇ awˬ moˍ hkʼaw awˬ viˉ awˬ nyi chehˇ bawˬ ve htaꞈ ngaˬ hui hkʼaˬ hkʼe ga piˇ gʼa tuˬ le? Chi ve teˇ hpaˍ htaꞈ teˇ geh nyi sheˍ.

3. Yaˬhoˉvaˬ Eˇliˇyaꞈ htaꞈ a yeˇ yuˬ piˇ ve tehꞈ hkʼaˬ hkʼe hpeuꞈ maw piˇ ve le?

³ Yaˬhoˉvaˬ yawˇ ve kanˉ te ve chaw teˇ gʼaˇ le le htaꞈ a yeˇ yuˬ leh yawˇ ngaˬ hui htaꞈ ha lehˬ tcuh gaˇ ve yoˬ. Gʼuiˬ sha ngaˬ hui awˬ paˇ lo chehˇ leh ngaˬ hui nyi ma luˬ leh awˬ gʼaˇ nuˇ htaˇ kaꞈ yawˇ shiˍ ve yoˬ. (Chiˇ mvuh ve 145:18, 19) Eˇliˇyaꞈ ve awˬ lawn htaꞈ teˇ geh nyi sheˍ. Yaˬhoˉvaˬ Eˇliˇyaꞈ ve te hkʼaˇ dawˇ hkʼaˇ htaꞈ hkʼaˬ hkʼe taw a yeˇ yuˬ piˇ ve teˇ geh nyi sheˍ. Oˇ ve teˇ yanˇ, Gʼuiˬ sha ve chaw htaꞈ fawˉ mehˍ piˇ jaˇ leh yawˇ htaꞈ kaꞈ kanˇ paˆ cawˬ ve canˇ paˍ gʼaꞈ yuˬ  piˇ ve pa taw, Eˇliˇyaꞈ lehˬ tuꞈ jaˇ hkanˍ jaˇ ve awˬ yanˇ hkʼaw chehˇ ve yoˬ. (1 Jawˇmawˇ 19:1, 2) Chi hkʼoˆ kaꞈ, Yaˬhoˉvaˬ ve tcuh kaˍ paˍ yawˇ teˇ gʼaˇ ceh tiˉ leuˉ taˉ ve tehꞈ Eˇliˇyaꞈ dawˇ ve yoˬ. Chi yawˇ awˬ gʼaˇ nuˇ jaˇ tuˬ te piˇ ve yoˬ. (1 Jawˇmawˇ 19:10) Eˇliˇyaꞈ hkʼaˬ hkʼe dawˇ ve Yaˬhoˉvaˬ shiˍ leh laꞈ haˉ ga piˇ ve yoˬ. Eˇliˇyaꞈ yawˇ teˇ gʼaˇ tiˉ chehˇ ve maˇ heˆ tehꞈ yonˍ gʼa tuˬ, Yaˬhoˉvaˬ mvuhˇ naw ma tcuh yaˇ htaꞈ peu piˇ leh awˬ gʼaˇ piˇ tcuh ve yoˬ. Yaꞈ hkʼaˇ, Iˉsaˍreˍlaˆ chaw laiˉ gʼaˇ ka tiꞈ yeˬ ve hkʼaw Yaˬhoˉvaˬ ve kanˉ te chehˇ sheˍ ve yoˬ!—1 Jawˇmawˇ 19:5, 18.

4. Maˍkuˆ liꞈ 10:29, 30 hkʼaw yehˬ kʼa hkʼaw ve chaw leh awˬ chawˇ ga piˇ ve htaꞈ maˇ gʼa ve chaw Yaˬhoˉvaˬ dawˇ haˍ ve tehꞈ hkʼaˬ hkʼe hpeuꞈ maw laˇ ve le?

⁴ Ngaˬ hui Yaˬhoˉvaˬ ve kanˉ te tuˬ leuˆ ve kʼo, laiˉ ceuˬ gʼa yuˬ tanˇ ve tehꞈ yawˇ shiˍ ve yoˬ. Chi lehˬ yehˬ kʼa hkʼaw ve chaw maˇ heˆ leh awˬ chawˇ ga piˇ ve htaꞈ maˇ gʼa ve kʼoˆ gaˇ ve yoˬ. Peˍtruˆ kaꞈ awˬ lawn chi hkʼe ve Yeˍsuˆ htaꞈ kʼoˆ piˇ jaw ve yoˬ. Yawˇ Yeˍsuˆ htaꞈ na piˇ htaˇ dawˇ haˍ ve hkʼaw kʼoˆ ve, “ngaˬ hui lehˬ hkʼa peu˗eˬ htaꞈ baˬ taˉ leh nawˬ awˬ hkʼaˇ suh laˬ peuˬ. Hkʼe te leh, ngaˬ hui aˬ htoꞈ ma gʼa tuˬ ve le?” (Maꞈhtehˍ 19:27) Hkʼe te leh, Yeˍsuˆ awˬ laꞈ gʼawˇ htaꞈ kʼoˆ piˇ ve, yawˇ hui ve yehˬ kʼa hkʼaw ve htaꞈ shuˍ ve awˬ viˉ awˬ nyi Hkriꞈ yaˇ awˬ moˍ hkʼaw gʼa chehˇ ve yoˬ. (Maˍkuˆ 10:29, 30 gʼaw sheˍ.) Yehˬ kʼa tanˬ shehˍ hpaˇ Yaˬhoˉvaˬ ka tiꞈ te taˍ laˇ ve, yawˇ ve kanˉ te gaˇ ve chaw htaꞈ yawˇ ga piˇ tuˬ yoˬ. (Chiˇ mvuh ve 9:10) Chehˇ bawˬ ve htaꞈ yeunˇ hkanˍ gʼaˇ tuˬ, Yaˬhoˉvaˬ ga laˇ gaˇ ve tehꞈ chi teˇ hkui ngaˬ hui shiˍ˗oˬ. Yaꞈ hkʼaˇ, Yaˬhoˉvaˬ ga laˇ tuˬ ngaˬ hui hkʼaˬ hkʼe gʼa te cawˇ ve le?

5. Yaˬhoˉvaˬ nawˬ htaꞈ hkʼaˬ hkʼe ga laˇ ve hkʼa dehꞈ dawˇ nyi ve lehˬ aˬ htoꞈ ma te daꞈ ve awˬ lawn hpehꞈ ve le?

⁵ Yaˬhoˉvaˬ nawˬ htaꞈ nyi haꞈ shaˉ laˇ ve leh hkʼaˬ hkʼe ga laˇ ve hkʼa dehꞈ dawˇ nyi sheˍ. (Chiˇ mvuh ve 55:22) Chi hkʼe te ve lehˬ nawˬ teˇ gʼaˇ tiˉ chehˇ ve maˇ heˆ tehꞈ mawˬ tuˬ te laˇ ve yoˬ. Awˬ viˉ awˬ nyi yaˇ miˇ haˉ Hkeh˗lawn * meh ve yehˬ kʼa hkʼaw yawˇ teˇ gʼaˇ tiˉ Shaˉhkiˆhkanˍ ve chaw hpehꞈ ve kʼoˆ ve, “ponˬ taˉ ve awˬ yanˇ htaꞈ kʼawꞈ dawˇ nyi htaˇ, ngaˬ shoꞈ shaꞈ ve laiˉ ceuˬ htaꞈ yeunˇ hkanˍ gʼaˇ tuˬ, Yaˬhoˉvaˬ ga laˇ ve pa taw, ngaˬ teˇ gʼaˇ tiˉ chehˇ ve maˇ heˆ tehꞈ dawˇ ve yoˬ. Yaꞈ hkʼaˇ, Yaˬhoˉvaˬ ngaˬ geh chehˇ leh hkʼaˬ htaˆ kaꞈ ga laˇ chehˇ ve tehꞈ ngaˬ yonˍ gʼa ve yoˬ.”

6. 1 Peˍtruˆ liꞈ 5:9, 10 hkʼaw chehˇ bawˬ ve chaw htaꞈ awˬ gʼaˇ hkʼaˬ hkʼe piˇ gʼa tuˬ le?

 ⁶ Awˬ viˉ awˬ nyi chehˇ bawˬ ve chaw htaꞈ Yaˬhoˉvaˬ hkʼaˬ hkʼe ga piˇ ve le? (1 Peˍtruˆ 5:9, 10 gʼaw sheˍ.) Awˬ viˉ awˬ nyi hawˉ hkʼaˆ Hiˉru˗cheˆ yehˬ kʼa hkʼaw Shaˉhkiˆhkanˍ ve chaw teˇ gʼaˇ tiˉ hpehꞈ ve maw jaˇ˗oˬ ve kʼoˆ ve, “Hkriꞈ yaˇ awˬ moˍ hkʼaw awˬ viˉ awˬ nyi htaꞈ ngaˬ nyi htaˇ, a shu teˇ gʼaˇ kaꞈ shoꞈ shaꞈ ve awˬ lawn gʼa hpuˇ ve yoˬ. Yaꞈ hkʼaˇ, teˇ gʼa le le kaꞈ Yaˬhoˉvaˬ ve kanˉ te tuˬ coˇ caˇ jaˇ. Chi hkʼe hpehꞈ ve htaꞈ gʼa mawˬ htaˇ, yehˬ kʼa hkʼaw Shaˉhkiˆhkanˍ ve chaw teˇ gʼaˇ tiˉ hpehꞈ ve htawˇ awˬ gʼaˇ gʼa jaˇ.”

7. Bon lawˬ ve nawˬ htaꞈ hkʼaˬ hkʼe ga laˇ ve le?

⁷ Bon lawˬ ve, Liꞈ hpu gʼaw ve, leh hkʼaˬ htaˆ kaꞈ hpawnˬ daꞈ˗e ve. Nawˬ bon lawˬ htaˇ hkʼaˬ hkʼe dawˇ ve awˬ ceuˬ Gʼuiˬ sha htaꞈ gʼa kʼoˆ piˇ cawˇ ve yoˬ. (1 Peˍtruˆ 5:7) Awˬ viˉ awˬ nyi yaˇ miˇ haˉ Maˆshenˍ ve awˬ lawn htaꞈ teˇ geh nyi sheˍ. Yawˇ Yaˬhoˉvaˬ ve kanˉ te tuˬ leuˆ yuˬ ve pa taw, yehˬ kʼa hkʼaw ve chaw geh oˇ htaˇ hkʼe leˇ maˇ meuˆ daꞈ tehꞈ dawˇ ve yoˬ. Yawˇ kʼoˆ ve, “ngaˬ chehˇ bawˬ ve htaꞈ yeunˇ hkanˍ gʼaˇ tuˬ ga laˇ gʼa ve a yeˇ uiˍ jaˇ ve teˇ ceuˬ lehˬ, bon lawˬ ve hkʼaw dawˇ taˍ ve awˬ ceuˬ hkʼa peu˗eˬ Yaˬhoˉvaˬ htaꞈ kʼoˆ piˇ ve yoˬ. Gʼuiˬ sha lehˬ ngaˬ ve Awˬ pa hpehꞈ leh ngaˬ teˇ nyi le le yawˇ geh laiˉ pawˆ bon lawˬ ve yoˬ. Ngaˬ hkʼaˬ hkʼe dawˇ ve awˬ ceuˬ hkʼa peu˗eˬ yawˇ htaꞈ kʼoˆ maˍ piˇ ve yoˬ.”

8. Liꞈ hpu gʼaw ve leh hkʼa dehꞈ dawˇ nyi ve nawˬ htaꞈ hkʼaˬ hkʼe ga laˇ ve le?

⁸ Nawˬ teˇ nyi le le Liꞈ hpu gʼaw leh Yaˬhoˉvaˬ nawˬ htaꞈ haꞈ ve tehꞈ hpeuꞈ maw laˇ ve awˬ lawn htaꞈ caˉ daꞈ ve dawˇ nyi sheˍ. Awˬ viˉ awˬ nyi yaˇ miˇ Behn˗kaˆ kaꞈ teˇ gʼaˇ yehˬ kʼa hkʼaw ve chaw maˇ daꞈ ve tawˇ yaw piˇ ve htaꞈ gʼa yeunˇ hkanˍ ve yoˬ. Yawˇ kʼoˆ ve, “Liꞈ hpu hkʼaw ve awˬ lawn ngaˬ gʼaw leh awˬ viˉ awˬ nyi ngaˬ hkʼa shuˍ gʼa hpuˇ ve awˬ lawn htaꞈ hkʼa dehꞈ dawˇ nyi htaˇ, chi ngaˬ htaꞈ ga laˇ gʼa jaˇ.” Awˬ viˉ awˬ nyi teˇ hpaˍ kʼo, yawˇ hui htaꞈ ga piˇ gʼa jaˇ ve Liꞈ hpu awˬ tawn htaꞈ tawnˇ gʼa ve yoˬ. Tawˇ pa haˉ te kʼo, Chiˇ mvuh ve liꞈ 27:10 leh Iˉsaˍyaˆ liꞈ 41:10 htaꞈ tawnˇ gʼa ve yoˬ. Teˇ hpaˍ kʼo, hpawnˬ daꞈ tuˬ awˬ pon gu ve maˇ heˆ leh Liꞈ hpu gʼaw htaˇ, awˬ hkawˇ na ve pa taw maˇ chehˇ bawˬ˗o.

9. Hpawnˬ daꞈ˗e ve nawˬ htaꞈ hkʼaˬ hkʼe ga laˇ ve le?

⁹ Nawˬ hkʼaˬ htaˆ kaꞈ coˇ caˇ leh hpawnˬ daꞈ˗e sheˍ. Hpawnˬ daꞈ ve hkʼaw awˬ vuiˬ te ve teˇ hpaˍ geh nawˬ awˬ gʼaˇ gʼa leh awˬ viˉ awˬ nyi htaꞈ shiˍ daꞈ maˇ tuˬ yoˬ. (Heˍbrehˇ 10:24, 25) Chi awˬ gʼuˇ suhˍ htaˇ kʼoˆ kʼai peuˬ ve Maˆshenˍ kʼoˆ ve, “ngaˬ yaꞈ taw puiˉ jaˇ ve htawˇ, ngaˬ hkʼaˬ htaˆ kaꞈ hpawnˬ daꞈ˗e leh teˇ pawˆ le le hkʼawꞈ ve yoˬ. Chi ngaˬ awˬ viˉ awˬ nyi geh meuˆ daꞈ tuˬ te laˇ leh, Hkriꞈ yaˇ awˬ moˍ hkʼaw teˇ gʼaˇ hpehꞈ ve tehꞈ dawˇ tuˬ te laˇ ve yoˬ.”

10. Awˬ viˉ awˬ nyi htaꞈ awˬ chawˇ te ve aˬ htoꞈ ma te a yeˇ uiˍ jaˇ ve le?

¹⁰ Awˬ viˉ awˬ nyi htaꞈ awˬ chawˇ te sheˍ. Hkriꞈ yaˇ awˬ moˍ hkʼaw nawˬ teˇ ceuˬ ceuˬ henˇ yuˬ gʼa ve chaw cawˬ˗aw laˇ tehꞈ chaˬ nyi sheˍ. Yawˇ a shaꞈ nawˬ hkʼe ma ve maˇ heˆ leh, hpehꞈ laˬ jaw ve maˇ shuˍ daꞈ ve htawˇ, yawˇ geh awˬ chawˇ te nyi sheˍ.  Liꞈ hpu hkʼaw ngaˬ hui htaꞈ kʼoˆ laˇ ve, “chaw mawˇ teˇ hpaˍ lehˬ cuˇ yiˍ cawˬ ve yoˬ.” (Yawˇbaˆ 12:12) A shaꞈ maˇ ve chaw htawˇ, a shaꞈ i ve chaw geh henˇ yuˬ gʼa ve yoˬ. Daˍviˆ Yawˇnaˆtanˍ aꞈ kehˉ a shaꞈ i jaˇ ve htawˇ, yawˇ huiˉ maˬ meuˆ daꞈ jaˇ. (1 Saˍmo˗eˍlaˆ 18:1) Yawˇ hui a shaꞈ teꞈ kuiˬ hkʼaw shoꞈ shaꞈ ve laiˉ ceuˬ gʼa hpuˇ ve yoˬ. Yaꞈ hkʼaˇ, yawˇ hui ga daꞈ ve pa taw, Yaˬhoˉvaˬ ve kanˉ caˉ leh te gʼa ve yoˬ. (1 Saˍmo˗eˍlaˆ 23:16-18) Eh˗ri˗naˆ yehˬ kʼa hkʼaw Shaˉhkiˆhkanˍ ve chaw teˇ gʼaˇ tiˉ hpehꞈ ve kʼoˆ ve, “Hkriꞈ yaˇ awˬ moˍ hkʼaw ve awˬ viˉ awˬ nyi lehˬ, awˬ pa awˬ e leh ngaˬ hui ve yehˬ kʼa hkʼaw ve chaw hkʼe hpehꞈ gʼa ve yoˬ. Yaˬhoˉvaˬ lehˬ, yawˇ hui htaꞈ cuˇ leh ngaˬ hui loˍ ve awˬ ceuˬ ga laˇ tcuh ve yoˬ.”

11. Nawˬ chaw teˇ gʼaˇ htaꞈ meuˆ daꞈ gaˇ ve kʼo, hkʼaˬ hkʼe gʼa te cawˇ ve le?

¹¹ Nawˬ yaꞈ taw puiˉ ve kʼo, chaw teˇ gʼaˇ geh awˬ chawˇ tanˬ te ve lehˬ sha ve maˇ heˆ. Awˬ viˉ awˬ nyi Ra˗hta˗naˆ lehˬ yaꞈ taw puiˉ jaˇ. Yawˇ awˬ tehˬ ve htaꞈ henˇ htaˇ, tawˍ ve tsuhˇ ve gʼa hpuˇ jaˇ. Yawˇ kʼoˆ ve, “awˬ viˉ awˬ nyi gʼa ga laˇ tcuh cawˇ ve tehꞈ chi teˇ hkui ngaˬ shiˍ ve yoˬ.” Nawˬ ve te hkʼaˇ dawˇ hkʼaˇ shu htaꞈ kʼoˆ maˍ piˇ tuˬ sha ve maˇ heˆ. Yaꞈ hkʼaˇ, nawˬ chi hkʼe te ve kʼo, nawˬ meuˆ daꞈ jaˇ ve awˬ chawˇ teˇ gʼaˇ cawˬ tuˬ yoˬ hehˉ. Awˬ chawˇ teˇ hpaˍ nawˬ htaꞈ ga laˇ gaˇ leh awˬ gʼaˇ peꞈ laˇ gaˇ ve yoˬ. Yawˇ hui nawˬ htaꞈ ga laˇ gʼa tuˬ nawˬ gʼa kʼoˆ maˍ piˇ cawˇ ve yoˬ.

12. Gʼuiˬ sha ve kanˉ te ve nawˬ daꞈ ve awˬ chawˇ gʼa tuˬ hkʼaˬ hkʼe ga laˇ gʼa ve le?

¹² Chaw teˇ gʼaˇ htaꞈ awˬ chawˇ te gʼa tuˬ daꞈ jaˇ ve awˬ hkʼaˇ teˇ hkʼaˇ lehˬ, yawˇ geh Gʼuiˬ sha ve kanˉ teˇ geh te ve yoˬ. Chi awˬ gʼuˇ suhˍ htaˇ kʼoˆ kʼai peuˬ ve Hkeh˗lawn kʼoˆ ve, “ngaˬ awˬ viˉ awˬ nyi yaˇ miˇ teˇ hpaˍ geh Gʼuiˬ sha ve kanˉ te htaˇ, Hkriꞈ yaˇ ve kanˉ laiˉ ceuˬ teˇ geh te ve pa taw, ngaˬ daꞈ ve awˬ chawˇ gʼa ve yoˬ. Ponˬ laˬ ve laiˉ hkʼawꞈ htaˇ, Yaˬhoˉvaˬ yawˇ hui htaꞈ cuˇ leh ngaˬ htaꞈ ga laˇ ve tehꞈ gʼa shiˍ ve yoˬ.” Chaw teˇ gʼaˇ htaꞈ awˬ chawˇ te gaˇ ve kʼo, gʼa coˇ caˇ jaˇ ve htawˇ awˬ hpfuhˇ hkʼawꞈ jaˇ. Yaˬhoˉvaˬ awˬ chawˇ chi hkʼe ve teˇ hpaˍ htaꞈ cuˇ leh nawˬ chehˇ bawˬ ve maˇ heˆ leh awˬ gʼaˇ nuˇ htaˇ ga laˇ tcuh ve yoˬ.—Tawˇ naˉ ve 17:17.

13. Hkriꞈ yaˇ awˬ moˍ hkʼaw ve chaw teˇ gʼaˇ le le aˬ htoꞈ ma ve awˬ vuiˬ cawˬ ve le?

¹³ Teˇ gʼaˇ le le Hkriꞈ yaˇ awˬ moˍ hkʼaw cawˇ daꞈ hawˍ daꞈ tuˬ te gʼa leh, teˇ gʼaˇ tiˉ chehˇ leh chehˇ bawˬ ve tehꞈ maˇ gʼa dawˇ tuˬ, awˬ viˉ awˬ nyi teˇ gʼaˇ le le htaꞈ haꞈ ve tehꞈ hpeuꞈ maw piˇ sheˍ. (Yoˇhanˬ 13:35) Ngaˬ hui kʼoˆ ve leh te ve awˬ ceuˬ shu htaꞈ heuˆ la kuiˬ cawˬ jaˇ. Awˬ viˉ awˬ nyi yaˇ miˇ teˇ gʼaˇ kʼoˆ ve, “ngaˬ awˬ tehˬ ve htaꞈ tanˬ henˇ htaˇ, Hkriꞈ yaˇ awˬ moˍ hkʼaw ve awˬ viˉ awˬ nyi kaꞈ ngaˬ ve yehˬ kʼa hkʼaw ve chaw hkʼe hpehꞈ ve yoˬ. Awˬ viˉ awˬ nyi maˇ cawˬ ve kʼo, ngaˬ Shaˉhkiˆhkanˍ ve chaw hpehꞈ la maˇ gʼa taˬ.” Awˬ tehˬ ve hkʼaw chehˇ la ve teˇ gʼaˇ tiˉ ve htaꞈ yawˇ kaꞈ Hkriꞈ yaˇ awˬ moˍ hkʼaw ve chaw teˇ gʼaˇ hpehꞈ ve tehꞈ dawˇ tuˬ ga piˇ ve, nawˬ aˬ htoꞈ ma te gʼa tuˬ le?

14. Hkriꞈ yaˇ awˬ moˍ hkʼaw laˬ gehˇ sheˍ ve chaw htaꞈ ngaˬ hui awˬ chawˇ te gʼa tuˬ hkʼaˬ hkʼe gʼa te cawˇ ve le?

¹⁴ Yawˇ htaꞈ coˇ caˇ leh awˬ chawˇ te piˇ sheˍ. Ngaˬ hui chi hkʼe te gʼa tuˬ Liꞈ hpu henˇ ve chaw maˇ heˆ leh, awˬ viˉ awˬ nyi jiˆ laˬ gehˇ sheˍ ve chaw htaꞈ laꞈ sheh caˉ leh tawˇ yaw piˇ ve yoˬ. (Roˉmaꞈ 15:7) Yaꞈ hkʼaˇ, ngaˬ hui yawˇ htaꞈ laꞈ sheh caˉ leh tawˇ yaw piˇ ve ceh maˇ te. Ngaˬ hui yawˇ htaꞈ awˬ chawˇ te leh hkʼa dehꞈ meuˆ daꞈ gaˇ ve yoˬ. Chi htaꞈ pa taw, nawˬ yawˇ htaꞈ a yeˇ yuˬ piˇ leh yawˇ shoꞈ shaꞈ ve aˬ htoꞈ ma gʼa hpuˇ chehˇ ve le tehꞈ na gʼa piˇ sheˍ. Yawˇ nyi ma maˇ sha tuˬ taˇ te piˇ. Chaw teˇ hpaˍ kʼo, yawˇ ve te hkʼaˇ dawˇ hkʼaˇ shu htaꞈ maˇ kʼoˆ maˍ piˇ gaˇ. Yawˇ ve te hkʼaˇ dawˇ hkʼaˇ kʼoˆ maˍ laˇ tuˬ, nawˬ maˇ nyiˉ piˇ tuˬ shaˍ tiꞈ te cawˇ leh, yawˇ awˬ meu˗eˇ awˬ meu˗eˇ kʼoˆ maˍ laˇ tuˬ nawˬ na hkawˇ na piˇ sheˍ. Yawˇ awˬ tehˬ ve htaꞈ hkʼaˬ hkʼe te henˇ ve na piˇ sheˍ. Peuˬ leh yawˇ kʼoˆ maˍ laˇ ve htaꞈ nawˬ hkʼa dehꞈ na taˍ sheˍ.

15. Co ha hpawˇ ve chaw mawˇ Hkriꞈ yaˇ awˬ moˍ hkʼaw awˬ viˉ awˬ nyi htaꞈ hkʼaˬ hkʼe ga piˇ gʼa tuˬ le?

¹⁵ Ngaˬ hui teˇ gʼaˇ leh teˇ gʼaˇ a yeˇ yuˬ daꞈ ve kʼo, Hkriꞈ yaˇ awˬ moˍ hkʼaw ve chaw teˇ gʼaˇ le le uiˍ la mvuh la leh yonˍ hkʼaˇ yonˍ yeˬ jaˇ tuˬ yoˬ. Nyi haꞈ  shaˉ paˍ leh yonˍ hkʼaˇ yonˍ yeˬ jaˇ ve chaw chi hkʼe te ve kʼo, yawˇ hui shu htaꞈ ga piˇ gʼa jaˇ tuˬ yoˬ. Meh˗ri˗shaˆ awˬ tehˬ ve hkʼaw uiˍ la leh awˬ e teˇ gʼaˇ ceh tiˉ yawˇ htaꞈ hu piˇ ve yoˬ. Yawˇ kʼoˆ ve, “Hkriꞈ yaˇ awˬ moˍ hkʼaw ve awˬ viˉ awˬ nyi hawˉ hkʼaˆ ngaˬ htaꞈ nyi haꞈ shaˉ laˇ leh awˬ yanˇ peꞈ laˇ ve pa taw, awˬ bon uiˍ jaˇ tehꞈ kʼoˆ piˇ gaˇ ve yoˬ. Yawˇ hui ngaˬ ve awˬ pa hkʼe hpehꞈ ve yoˬ. Teˇ pawˆ le le ngaˬ chaw teˇ gʼaˇ htaꞈ tawˇ yaw gaˇ ve kʼo, ngaˬ hkawˇ na laˇ ve chaw cawˬ ve tehꞈ ngaˬ shiˍ ve yoˬ.” Ma˗ri˗si˗oˆ htaꞈ Liꞈ hpu maˍ laˇ ve chaw maˇ hto toˇ˗oˬ ve pa taw, yawˇ teˇ gʼaˇ tiˉ chehˇ ve tehꞈ dawˇ ve yoˬ. Yawˇ kʼoˆ ve, “nyi haꞈ shaˉ paˍ ngaˬ htaꞈ a yeˇ yuˬ laˇ leh hkʼa dehꞈ nyi haꞈ shaˉ laˇ ve yoˬ. Chi ngaˬ htaꞈ ga laˇ jaˇ. Yawˇ hui ngaˬ htaꞈ hkʼaˬ htaˆ kaꞈ tawˇ yaw laˇ ve, Gʼuiˬ sha ve kanˉ teˇ geh te ve, leh yawˇ hui a shu yawˇ hkʼaˇ yawˇ Liꞈ hpu henˇ ve daꞈ ve awˬ lawn kaꞈ ngaˬ htaꞈ kʼoˆ maˍ laˇ ve yoˬ. Ngaˬ hui teˇ geh bawˉ shiˍ leˍ guiˇ ve yoˬ.” Chi teˇ hkui Ma˗ri˗si˗oˆ leh Meh˗ri˗shaˆ Gʼuiˬ sha ve kanˉ awˬ yanˇ hkʼa biˇ te chehˇ ve yoˬ.

16-17. Ngaˬ hui shu htaꞈ hkʼaˬ hkʼe ga piˇ gʼa tuˬ le?

¹⁶ Yawˇ loˍ htaˇ ga piˇ sheˍ. (Gaˍlaˍtiˆ 6:10) Le˗oˍ vuiˇ jaˇ kuiˬ lo miˍshenˍnaˍliˍ gʼa te ve yoˬ. Yawˇ kʼoˆ ve, “chaw oˇ ve teˇ gʼaˇ loˍ htaˇ daꞈ ve awˬ ceuˬ te piˇ ve ceh kaꞈ ngaˬ dawˇ ve kʼo lawꞈ˗oˬ. Hkʼe taw taw te piˇ tuˬ maˇ loˍ. Teˇ nyi htaˇ ngaˬ maˇ dawˇ maˇ gaˇ gʼa hpuˇ ve htaꞈ tawnˇ gʼa ve yoˬ. Ngaˬ aˉ hkʼaw maˇ gaˬ la sheˍ htaˇ dawˇ maˇ jaˇ. Yaꞈ hkʼaˇ, oˇ ve teˇ nyi awˬ hpawˇ awˬ miˇ ma teˇ ca yawˇ hui ve aˉ hkʼaw lo awˍ caˇ˗e tuˬ jehˬ laˇ ve yoˬ. Yawˇ hui ngaˬ htaꞈ awˬ chiˇ awˍ te caˍ laˇ ve yoˬ. Oˇ ve teˇ nyi aˬ htoꞈ ma caˇ ve ngaˬ maˇ tawnˇ gʼa. Yaꞈ hkʼaˇ, yawˇ hui ngaˬ kʼoˆ ve htaꞈ hkʼa dehꞈ na taˍ laˇ ve htaꞈ tawnˇ gʼa ve yoˬ. Chi ngaˬ nyi ma sha jaˇ tuˬ te laˇ ve yoˬ.”

¹⁷ Teˇ gʼaˇ le le kaꞈ awˬ viˉ awˬ nyi geh hpawnˬ daꞈ lonˉ 1 nyi maˇ heˆ leh hpawnˬ daꞈ lonˉ 3 nyi teˇ geh chehˇ ve htaꞈ dawˇ cawˇ ve yoˬ. Awˬ yanˇ oˇ ve ngaˬ hui awˬ nu ve chaw geh yaw daꞈ tuˬ awˬ yanˇ cawˬ leh hpawnˬ daꞈ ve hkʼaw ngaˬ hui dawˇ cawˇ ve awˬ ceuˬ teˇ hpaˍ htaꞈ gʼa yaw daꞈ ve pa taw yoˬ. Yaꞈ hkʼaˇ, chi awˬ gʼuˇ suhˍ htaˇ kʼoˆ kʼai peuˬ ve Hkeh˗lawn kʼoˆ ve, “hpawnˬ daꞈ lonˉ 1 nyi maˇ heˆ leh hpawnˬ daꞈ lonˉ 3 nyi cawˬ htaˇ, teˇ pawˆ le le ngaˬ chehˇ bawˬ jaˇ.” Aˬ htoꞈ ma te yawˇ chi hkʼe dawˇ ve le? Yawˇ kʼoˆ ve, “awˬ viˉ awˬ nyi laiˉ ha gʼaˇ cawˬ ve htawˇ maˇ˗awˍ ve kʼo, yawˇ hui geh tawˇ yaw daꞈ ve chaw cawˬ ve yoˬ. Teˇ geh mui ve chaw cawˬ ve, teˇ hpaˍ kʼo yawˇ hui ve yehˬ kʼa hkʼaw ve chaw geh laˬ ve yoˬ. Chi ngaˬ teˇ gʼaˇ tiˉ chehˇ ve tehꞈ dawˇ tuˬ te laˇ ve yoˬ.” Chaw teˇ hpaˍ kʼo yawˇ hui haꞈ ve chaw suh˗e gehˇ sheˍ ve pa taw, hpawnˬ daꞈ lonˉ hkʼaw kʼai tuˬ haˍ jaˇ tehꞈ dawˇ ve yoˬ. Hpawnˬ daꞈ lonˉ yawˇ teˇ gʼaˇ tiˉ  awˉ lawˉ teˇ pawˆ kʼai ve kʼo haˍ jaˇ. Chi hkʼe gʼa hpuˇ chehˇ ve chaw htaꞈ nawˬ shiˍ daꞈ˗aw laˇ? Gʼuˇ suhˍ teˇ pawˆ hpawnˬ daꞈ lonˉ hkʼaw nawˬ geh mui tuˬ aˬ htoꞈ ma te nawˬ maˇ jehˬ piˇ nyi ve le?

18. 2 Kawˇrenˍhtuˆ liꞈ 6:11-13 hkʼaw beˆ maˍ laˇ taˍ ve htaꞈ, ngaˬ hui shu htaꞈ jehˬ piˇ htaˇ hkʼaˬ hkʼe gʼaꞈ te gʼa tuˬ le?

¹⁸ Teˇ geh awˬ yanˇ yehˇ sheˍ. Nawˬ awˬ viˉ awˬ nyi geh awˬ nu ve awˬ ceuˬ te htaˇ, jehˬ jaw ve chaw htaꞈ ceh tiˉ taˇ jehˬ piˇ. Awˬ nu ve chaw htaꞈ jehˬ piˇ leh teˇ gʼaˇ tiˉ chehˇ ve tehꞈ dawˇ ve chaw htaꞈ kaꞈ jehˬ piˇ sheˍ. Chaw chi teˇ moˍ htaꞈ ngaˬ hui “haꞈ” gaˇ ve yoˬ. (2 Kawˇrenˍhtuˆ 6:11-13 gʼaw sheˍ.) Chi awˬ gʼuˇ suhˍ htaˇ kʼoˆ kʼai peuˬ ve Meh˗ri˗shaˆ kʼoˆ ve, “awˬ chawˇ teˇ hpaˍ teˇ geh guiˇ˗e tuˬ jehˬ laˇ ve maˇ heˆ leh, yawˇ hui ve aˉ hkʼaw lo jehˬ kʼai laˇ leh yawˇ hui geh gʼa chehˇ htaˇ ngaˬ ha lehˬ jaˇ.” Nawˬ chehˇ ve Hkriꞈ yaˇ awˬ moˍ hkʼaw jehˬ piˇ gʼa tuˬ a shu htaꞈ dawˇ mawˬ ve le?

19. Ngaˬ hui awˬ viˉ awˬ nyi geh awˬ yanˇ yehˇ ve kʼo, yawˇ awˬ bon uiˍ jaˇ kʼoˆ laˇ tuˬ ve hkʼaˬ hkʼe htaˇ le?

¹⁹ Ngaˬ hui awˬ viˉ awˬ nyi geh awˬ yanˇ yehˇ ve kʼo, awˬ bon uiˍ jaˇ kʼoˆ laˇ ve awˬ yanˇ teˇ yanˇ cawˬ ve yoˬ. Tawˇ pa haˉ te kʼo, awˬ viˉ awˬ nyi teˇ hpaˍ kʼo, yawˇ hui ve yehˬ kʼa hkʼaw ve chaw Shaˉhkiˆhkanˍ ve chaw maˇ hpehꞈ ve pa taw, yawˇ hui ve pawehˇ cawˬ htaˇ hpehꞈ haˍ jaˇ ve yoˬ. Chaw teˇ hpaˍ kʼo, yawˇ hui haꞈ ve chaw suh˗e ve awˬ nyi gaˬ htaˇ nyi ma luˬ jaˇ ve yoˬ. Chi hkʼe dawˇ ve chaw htaꞈ ngaˬ hui geh guiˇ la tuˬ jehˬ piˇ ve kʼo, yawˇ hui awˬ pon “daꞈ ve teˇ ceuˬ htaꞈ awˬ tehˬ awˬ na dawˇ nyi” piˇ ve tehꞈ, ngaˬ hui gʼa hpeuꞈ maw piˇ ve yoˬ.—Hpiˇliˇpiˆ 2:20.

20. Maꞈhtehˍ liꞈ 12:48-50 hkʼaw Yeˍsuˆ ve tawˇ hkawˇ ngaˬ hui chehˇ bawˬ htaˇ hkʼaˬ hkʼe ga laˇ ve le?

²⁰ Ngaˬ hui chehˇ bawˬ tuˬ te laˇ ve laiˉ hkʼaˇ cawˬ ve yoˬ. Yaˬhoˉvaˬ ngaˬ hui ve te hkʼaˇ dawˇ hkʼaˇ htaꞈ shiˍ jaˇ ve tehꞈ, maˇ leunˇ cawˇ leh ngaˬ hui chi hkʼe ve dawˇ hkʼaˇ htaꞈ yeunˇ hkanˍ gʼaˇ tuˬ yawˇ ga laˇ tuˬ yoˬ. Gʼuiˬ sha ngaˬ hui htaꞈ ga laˇ ve awˬ hkʼaˇ teˇ hkʼaˇ lehˬ, awˬ viˉ awˬ nyi htaꞈ yehˇ ve yoˬ. (Maꞈhtehˍ 12:48-50 gʼaw sheˍ.) Gʼuiˬ sha ngaˬ hui htaꞈ ga laˇ ve htaꞈ awˬ bon uiˍ jaˇ tehꞈ kʼoˆ piˇ gaˇ ve kʼo, awˬ viˉ awˬ nyi htaꞈ ga piˇ tuˬ ngaˬ hui gʼa coˇ caˇ cawˇ ve yoˬ. Ngaˬ hui hkʼaˬ hkʼe dawˇ ve htawˇ maˇ kʼoˆ, ngaˬ hui teˇ gʼaˇ tiˉ chehˇ ve maˇ heˆ. Yaˬhoˉvaˬ ngaˬ hui awˬ paˇ lo hkʼaˬ htaˆ kaꞈ chehˇ ve yoˬ!