Yonˍ ve ngaˬ hui awˬ gʼaˇ hehnˇ tuˬ te laˇ ve yoˬ. Chi Saˍtanˍ ngaˬ hui htaꞈ co ha hpawˇ tiˇ pehˍ gaˇ ve htawˇ, yonˍ ve htaꞈ pa taw “haiˬ ve awˬ shehˍ hpaˇ teˇ gʼaˇ bawˆ laˇ ve aˬ miˍ to chehˇ ve hkʼaˆ ce teˇ hpaˍ htaꞈ tiˇ pehˍ” gʼa ve yoˬ. (Eˇfeˇsuꞈ 6:16) Ngaˬ hui yonˍ ve kʼo, shoꞈ shaꞈ ve hkʼaw hkʼa shuˍ uiˍ ve htawˇ yeunˇ hkanˍ gʼaˇ ve yoˬ. Yeˍsuˆ awˬ laꞈ gʼawˇ htaꞈ kʼoˆ piˇ ve, “nawˬ hui yonˍ ve teˇ ceuˬ gʼawˇ caˉ yawˇ hkʼe hui cawˬ ve kʼo, hkʼaw chi teˇ shiˍ htaꞈ, oˇ kaˬ lo jiˆ kʼai˗o tehꞈ kʼoˆ piˇ ve teˇ yanˇ, jiˆ kʼai tuˬ yoˬ.” (Maꞈhtehˍ 17:20) Yonˍ ve lehˬ ngaˬ hui co ha hpawˇ awˬ gʼaˇ hehnˇ la tuˬ ga laˇ ve yoˬ. Yonˍ ve lehˬ aˬ htoꞈ ma le? Ngaˬ hui ve nyi ma yonˍ hkʼaˇ htaꞈ hkʼaˬ hkʼe te heuˆ la gʼa ve le? Ngaˬ hui ve yonˍ hkʼaˇ uiˍ la mvuh la tuˬ hkʼaˬ hkʼe te gʼa tuˬ le?—Roˉmaꞈ 4:3.

Ngaˬ hui yonˍ ve lehˬ Liꞈ hpu htaꞈ yonˍ ve ceh kʼoˆ gaˇ ve maˇ heˆ. Awˬ lawn kʼo, “Neˇ teˇ hpaˍ htawˇ yonˍ leh kawˆ cheˇ chehˇ ve yoˬ.” (Yaˍkoˆ 2:19) Hkʼe kʼo yonˍ ve lehˬ aˬ htoꞈ ma le?

Liꞈ hpu hkʼaw a yeˇ uiˍ ve 2 ceuˬ htaꞈ kʼoˆ taˍ ve yoˬ. Awˉ lawˉ teˇ ceuˬ lehˬ “yonˍ ve teˇ ceuˬ htaꞈ pa taw, ngaˬ hui dawˇ law taˍ ve teˇ hpaˍ htaꞈ awˬ tehˬ awˬ na gʼa tuˬ ve htaꞈ . . . ngaˬ hui hkʼa dehꞈ dehꞈ shiˍ taˍ ve yoˬ.” (Heˍbrehˇ 11:1a) Ngaˬ hui yonˍ ve kʼo, Yaˬhoˉvaˬ kʼoˆ ve teˇ ceuˬ le le awˬ tehˬ hpehꞈ la tuˬ yoˬ tehꞈ hkʼa dehꞈ yonˍ ve yoˬ. Yaˬhoˉvaˬ Iˉsaˍreˍlaˆ chaw htaꞈ kʼoˆ piˇ ve, ‘a shu yawˇ ve awˬ yanˇ cawˇ cawˇ kanˉ te kʼai tuˬ, mvuhˇ lawꞈ kʼaw leh mvuhˇ hpeuꞈ ve awˬ yanˇ htaꞈ ngaˬ ka tiꞈ te taˍ peuˬ. Ka tiꞈ chi ve teˇ pawˆ kaꞈ luˬ kʼai tuˬ ve maˇ heˆ. Oˇ ve hkʼa shuˍ, ngaˬ ve awˬ ceˬ paˍ Daˍviˆ geh ka tiꞈ te piˇ taˍ ve luˬ kʼai tuˬ ve maˇ heˆ.’ (Yeˍraˍmiˆ 33:20, 21) Mvuhˇ nyi maˇ tawˆ la˗o leh mvuhˇ lawꞈ kʼaw leh mvuhˇ hpeuꞈ ve awˬ yanˇ maˇ cawˬ˗o tehꞈ dawˇ jaw˗aw laˇ? Miˬ guiˬ ve awˬ liˇ mvuhˇ nyi htaꞈ caw chehˇ ve luˬ kʼai tuˬ ve tehꞈ ngaˬ hui maˇ dawˇ jaw ve kʼo, chi htaꞈ Hpanˍ shehˍ hpaˇ htaꞈ kaꞈ nawˬ yonˍ gʼa ve maˇ heˆ laˇ? Yonˍ gʼa ve yoˬ!—Iˉsaˍyaˆ 55:10, 11; Maꞈhtehˍ 5:18.

Nyiˇ ceuˬ teˇ ceuˬ lehˬ “yonˍ ve teˇ ceuˬ htaꞈ pa taw, . . . ngaˬ hui maˇ mawˬ sheˍ ve awˬ ceuˬ teˇ hpaˍ awˬ tehˬ awˬ na cawˬ taˍ ve htaꞈ . . . ngaˬ hui hkʼa dehꞈ dehꞈ shiˍ taˍ ve yoˬ.” (Heˍbrehˇ 11:1b) ‘Mvuhˇ haw shaˉ awˬ tehˬ cawˬ ve tehꞈ hkʼaˬ hkʼe te shiˍ gʼa ve le?’ tehꞈ yaˇ na laˇ ve kʼo, hkʼaˬ hkʼe hkʼawꞈ piˇ tuˬ le? Nawˬ kaꞈ mvuhˇ haw shaˉ maˇ mawˬ gʼa. Yaꞈ hkʼaˇ, ngaˬ hui shaˉ hkʼaˬ hkʼe te gʼawˬ gʼa ve, mvuhˇ haw hkʼaˬ hkʼe te meuˆ gʼa ve nawˬ yawˇ htaꞈ kʼoˆ maˍ piˇ tuˬ yoˬ. Yaˇ na gʼa˗oˬ ve kʼo, mvuhˇ haw shaˉ maˇ mawˬ gʼa ve htawˇ, awˬ tehˬ cawˬ ve tehꞈ yaˇ kaꞈ yonˍ gʼa ve yoˬ. Ngaˬ hui ve yonˍ hkʼaˇ kaꞈ chi hkʼe gʼa dawˇ ve yoˬ.—Roˉmaꞈ 1:20.

Ngaˬ hui yonˍ ve cawˬ tuˬ, hteˇ ve cawˇ ve cuˇ yiˍ awˉ lawˉ gʼa cawˬ cawˇ ve yoˬ. (1 Tiˆmoˉseˍ 2:4) Yaꞈ hkʼaˇ, chi hkʼe ceh cawˬ ve maˇ lawꞈ. Tcuh yaˇ Pawˇluꞈ kʼoˆ ve, ‘chaw yaˇ lehˬ nyi ma hkʼaw yonˍ ve yoˬ.’ (Roˉmaꞈ 10:10) Ngaˬ hui awˬ tehˬ ve htaꞈ yonˍ ve ceh maˇ heˆ, awˬ hpfuhˇ kaꞈ gʼa shiˍ ve yoˬ. Chi hkʼe te ve kʼo, ngaˬ hui ve teˇ hkʼaˇ dawˇ hkʼaˇ awˬ tehˬ ve htaꞈ hawˍ daꞈ tuˬ yoˬ. (Yaˍkoˆ 2:20) A shu teˇ gʼaˇ awˬ tehˬ ve htaꞈ awˬ hpfuhˇ maˇ shiˍ ve kʼo, yawˇ ve yonˍ hkʼaˇ  maˇ pa gaˇ leh yawˇ dawˇ taˍ ve hkʼe te gaˇ ve pa taw, awˬ tehˬ ve htaꞈ maˇ haꞈ yuˬ. (2 Peˍtruˆ 3:3, 4; Yuˇdaꞈ 18) Chi htaꞈ pa taw, Liꞈ hpu ve awˬ co˗eˬ htaˇ, anˇ tuˬ htaꞈ mawˬ ve chaw hkʼa peu˗eˬ yonˍ ve maˇ heˆ. (Heh puiˉ hkʼaw 14:11; Yoˇhanˬ 12:37) Gʼuiˬ sha ve awˬ ha hpu awˬ tehˬ ve htaꞈ haꞈ ve chaw ceh tiˉ yonˍ tuˬ ga piˇ ve yoˬ.—Gaˍlaˍtiˆ 5:22; 2 Hteˇsaˍlawˇniˆ 2:10, 11.

Jawˇmawˇ Daˍviˆ kaꞈ teˇ gʼaˇ yonˍ yeˬ jaˇ. (Heˍbrehˇ 11:32, 33) Yaꞈ hkʼaˇ, Daˍviˆ ve yehˬ kʼa hkʼaw teˇ gʼaˇ le le yonˍ yeˬ ve maˇ heˆ. Gawˇliˇyaˆ ca na dawˆ la htaˇ, Daˍviˆ nyi ma zuhˆ jaˇ. Yaꞈ hkʼaˇ, Daˍviˆ ve awˬ viˉ paˍ Eˇlaˍbaˆ Daˍviˆ nyi ma uiˍ leh caˆ muiˬ puiˉ ve tehꞈ kʼoˆ ve yoˬ. (1 Saˍmo˗eˍlaˆ 17:26-28) Ngaˬ hui teˇ gʼaˇ le le paw la htaˇ kaꞈ yonˍ ve maˇ heˆ, leh awˬ pa awˬ e ngaˬ hui htaꞈ peꞈ laˇ ve kaꞈ maˇ heˆ. Daˍviˆ Gʼuiˬ sha geh meuˆ daꞈ ve pa taw, yawˇ yonˍ yeˬ la ve yoˬ.

Daˍviˆ hkʼaˬ hkʼe yonˍ yeˬ ve Chiˇ mvuh ve liꞈ 27 hkʼaw yawˇ kʼoˆ taˍ ve yoˬ. (27:1) Daˍviˆ gʼa hpuˇ ve awˬ ceuˬ leh yawˇ ve canˇ paˍ htaꞈ Yaˬhoˉvaˬ hkʼaˬ hkʼe te piˇ ve htaꞈ yawˇ hkʼa dehꞈ dawˇ nyi ve yoˬ. (27:2, 3) Yaˬhoˉvaˬ htaꞈ oˉ kʼoˍ pui tuˬ ve awˬ hkʼaˇ yawˇ awˬ hpfuhˇ shiˍ jaˇ. (27:4) Daˍviˆ aˉ po kʼoˍ bon yehˬ lo awˬ nu ve chaw geh Gʼuiˬ sha htaꞈ oˉ kʼoˍ pui ve yoˬ. (27:6) Yawˇ Yaˬhoˉvaˬ geh nyi ma awˬ tawˬ hkʼa gaˬ bon lawˬ ve yoˬ. (27:7, 8) Daˍviˆ Gʼuiˬ sha yawˇ htaꞈ maˍ tcuh gaˇ ve yoˬ. (27:11) Daˍviˆ na piˇ ve, “ngaˬ maˇ yonˍ ve kʼo hkʼaˬ hkʼe hpehꞈ tuˬ le?”—27:13, MGS.

Nawˬ Chiˇ mvuh ve liꞈ 27 htaꞈ hkʼa dehꞈ dawˇ nyi ve kʼo, Daˍviˆ hkʼa shuˍ yonˍ yeˬ gʼa ve yoˬ. Yonˍ ve cawˬ tuˬ cuˇ yiˍ awˉ lawˉ gʼa cawˬ ve pa taw, nawˬ Liꞈ hpu leh ngaˬ hui ve kanˉ hkʼaˇ hkʼaw ve liꞈ maˇ maˇ henˇ ve kʼo, daꞈ kehˬ ve awˬ ha hpu ve awˬ shiˍ ve teˇ hpawˇ yonˍ ve chi uiˍ la mvuh la tuˬ yoˬ. (Chiˇ mvuh ve 1:2, 3) Liꞈ hpu henˇ htaˇ awˬ yanˇ yehˇ leh hkʼa dehꞈ dawˇ nyi sheˍ. Hkʼa dehꞈ dawˇ nyi ve lehˬ jeꞈ hkʼa shuˍ hpehꞈ ve yoˬ. Jeꞈ daꞈ ve kʼo, Yaˬhoˉvaˬ ngaˬ hui awˬ pon te laˇ ve htaꞈ ngaˬ hui awˬ hpfuhˇ shiˍ maˇ la tuˬ yoˬ. Leh chi ngaˬ hui ve yonˍ hkʼaˇ yonˍ yeˬ gaˇ tuˬ te laˇ leh, Hkriꞈ yaˇ awˬ moˍ hkʼaw yawˇ htaꞈ oˉ kʼoˍ pui gaˇ tuˬ leh daꞈ ve dawˇ law kuiˬ shu htaꞈ hto piˇ gaˇ tuˬ kaꞈ te laˇ ve yoˬ. (Heˍbrehˇ 10:23-25) Chi hkʼoˆ kaꞈ ngaˬ hui yonˍ ve kʼo, “hkʼaˬ htaˆ kaꞈ bon gʼa lawˬ” tuˬ yoˬ. (Luˉkaꞈ 18:1-8) Hkʼe te leh Yaˬhoˉvaˬ geh “hkʼaˬ htaˆ kaꞈ bon lawˬ tcuhˉ taˍ” leh ‘Gʼuiˬ sha ngaˬ hui awˬ pon dawˇ nyi puiˉ ve’ tehꞈ yonˍ sheˍ. (1 Hteˇsaˍlawˇniˆ 5:17; 1 Peˍtruˆ 5:7) Ngaˬ hui ve yonˍ hkʼaˇ teˇ ceuˬ ceuˬ te gaˇ tuˬ te laˇ leh, chi ngaˬ hui ve yonˍ hkʼaˇ kʼawꞈ yonˍ yeˬ tuˬ te laˇ ve yoˬ.—Yaˍkoˆ 2:22.

Yeˍsuˆ maˇ suh sheˍ teˇ haˉ htaˇ, yawˇ ve awˬ laꞈ gʼawˇ htaꞈ kʼoˆ piˇ ve, “Gʼuiˬ sha htaꞈ yonˍ˗oꞈ. Ngaˬ htaꞈ htawˇ yonˍ˗oꞈ.” (Yoˇhanˬ 14:1) Hkʼe te leh ngaˬ hui Yaˬhoˉvaˬ ceh tiˉ yonˍ ve maˇ heˆ, Yeˍsuˆ htaꞈ kaꞈ  yonˍ ve yoˬ. Ngaˬ hui hkʼaˬ hkʼe te gʼa tuˬ le? 3 hkʼaˇ teˇ geh nyi sheˍ.

Awˉ lawˉ teˇ hkʼaˇ lehˬ Gʼuiˬ sha nawˬ htaꞈ dawˇ nawˇ leh htaiˍ hkʼawꞈ ve laꞈ shawnˍ peꞈ laˇ ve tehꞈ tawnˇ taˍ sheˍ. Tcuh yaˇ Pawˇluꞈ kʼoˆ ve, “ngaˬ htaꞈ haꞈ leh ngaˬ awˬ pon yawˇ awˬ to tanˇ peuˬ ve, Gʼuiˬ sha ve Yaˇ hpu htaꞈ ngaˬ yonˍ ve pa taw teꞈ chehˇ” ve yoˬ. (Gaˍlaˍtiˆ 2:20) Nawˬ Yeˍsuˆ htaꞈ yonˍ ve kʼo, yawˇ htaiˍ hkʼawꞈ laˇ ve nawˬ htaꞈ awˬ tehˬ ga laˇ gʼa ve, nawˬ venˇ baˆ hpehˇ la tuˬ te laˇ gʼa ve, co co taiˍ taiˍ ve dawˇ lawˬ kuiˬ kaꞈ peꞈ laˇ ve tehꞈ hkʼa dehꞈ yonˍ ve tehꞈ kʼoˆ gaˇ ve yoˬ. Chi lehˬ Gʼuiˬ sha haꞈ pehnˇ uiˍ jaˇ ve teˇ ceuˬ hpehꞈ ve yoˬ. (Roˉmaꞈ 8:32, 38, 39; Eˇfeˇsuꞈ 1:7) Htaiˍ hkʼawꞈ ve nawˬ htaꞈ awˬ tehˬ awˬ na ga laˇ gʼa ve tehꞈ yonˍ ve kʼo, awˬ hpfuhˇ maˇ cawˬ tehꞈ maˇ dawˇ tuˬ te laˇ ve yoˬ.—2 Hteˇsaˍlawˇniˆ 2:16, 17.

Nyiˇ hkʼaˇ teˇ hkʼaˇ lehˬ Yeˍsuˆ tuˉ tanˇ laˇ ve htaꞈ cuˇ leh Yaˬhoˉvaˬ geh meuˆ daꞈ tuˬ bon lawˬ sheˍ. Htaiˍ hkʼawꞈ ve htaꞈ pa taw, “ngaˬ hui ha kʼaˉ ve teˇ ceuˬ htaꞈ kaꞈ, loˍ ve awˬ yanˇ awˬ hkʼaw lo ga laˇ tuˬ ve awˬ bon htaꞈ kaꞈ gʼa tuˬ, nyi ma haꞈ hanˉ ve awˬ hkʼaw lo” Yaˬhoˉvaˬ geh bon lawˬ gʼa ve yoˬ. (Heˍbrehˇ 4:15, 16; 10:19-22) Ngaˬ hui bon maˇ maˇ lawˬ htaˇ, venˇ baˆ htaꞈ tawˍ daꞈ gʼaˇ tuˬ yoˬ.—Luˉkaꞈ 22:40.

Shehˆ hkʼaˇ teˇ hkʼaˇ lehˬ Yeˍsuˆ htaꞈ na yuˬ sheˍ. Tcuh yaˇ Yoˇhanˬ kʼoˆ ve, “Yaˇ hpu htaꞈ yonˍ ve chaw lehˬ, co tiꞈ ha tiꞈ cawˬ ve yoˬ. Yaˇ hpu htaꞈ maˇ haꞈ yuˬ ve chaw lehˬ, co tiꞈ ha tiꞈ htaꞈ maˇ gʼa mawˬ. Yawˇ awˬ hkʼoˆ htaꞈ Gʼuiˬ sha nyi ma zuhˆ ve teˇ ceuˬ cawˬ taˍ ve yoˬ.” (Yoˇhanˬ 3:36) Yoˇhanˬ kʼoˆ ve, yonˍ ve chaw leh maˇ na yuˬ ve chaw peun daꞈ jaˇ. Hkʼe te leh nawˬ Yeˍsuˆ htaꞈ yonˍ gaˇ ve kʼo, yawˇ hkawˇ gʼa na yuˬ ve yoˬ. Ngaˬ hui “Hkriꞈ ve awˬ liˇ tawˇ hkawˇ” na yuˬ ve lehˬ yawˇ maˍ laˇ leh beˆ maˍ laˇ ve teˇ ceuˬ le le htaꞈ na yuˬ ve tehꞈ kʼoˆ gaˇ ve yoˬ. (Gaˍlaˍtiˆ 6:2) Yeˍsuˆ hkawˇ na yuˬ tuˬ, “ka tiꞈ yeˬ leh cuˇ yiˍ cawˬ ve awˬ ceˬ” beˆ maˍ laˇ ve htaꞈ ngaˬ hui gʼa gʼaꞈ te ve yoˬ. (Maꞈhtehˍ 24:45) Ngaˬ hui Yeˍsuˆ hkawˇ na yuˬ ve kʼo, tuꞈ hkanˍ ve mvuhˇ haw lonˉ hkʼa shuˍ gʼa hpuˇ ve htawˇ, yeunˇ hkanˍ gʼaˇ ve yoˬ.—Luˉkaꞈ 6:47, 48.

Oˇ htaˇ chaw teˇ gʼaˇ Yeˍsuˆ htaꞈ kʼoˆ piˇ ve, “ngaˬ yonˍ ve yoˬ! Ngaˬ yonˍ maˇ biˇ ve awˬ ceuˬ htaꞈ a ciˉ ga laˇ˗oˆ!” (Maˍkuˆ 9:24) Yawˇ yonˍ ve cawˬ˗oˬ ve htawˇ, gʼa cawˬ sheˍ ve tehꞈ nyi ma nuˇ nehˬ ve hkʼaw na gʼa ve yoˬ. Yawˇ hkʼa shuˍ ngaˬ hui teˇ gʼaˇ le le htawˇ teˇ ceuˬ ceuˬ gʼa hpuˇ htaˇ, yonˍ ve gʼa kʼawꞈ cawˬ ve yoˬ. Ngaˬ hui teˇ gʼaˇ le le chi teˇ hkui kaꞈ yonˍ ve yonˍ yeˬ tuˬ te gʼa ve yoˬ. Ngaˬ hui Liꞈ hpu gʼaw leh hkʼa dehꞈ dawˇ nyi ve kʼo, yonˍ yeˬ gʼa leh Yaˬhoˉvaˬ ngaˬ hui awˬ pon te laˇ ve ngaˬ hui awˬ hpfuhˇ shiˍ jaˇ tuˬ yoˬ. Ngaˬ hui Yaˬhoˉvaˬ htaꞈ oˉ kʼoˍ pui ve, daꞈ ve dawˇ law kuiˬ shu htaꞈ kʼoˆ piˇ ve, leh bon hkʼaˬ htaˆ kaꞈ lawˬ ve kʼo, ngaˬ hui ve yonˍ hkʼaˇ yonˍ yeˬ tuˬ yoˬ. Ngaˬ hui chi hkʼe te htaˇ, daꞈ jaˇ ve laꞈ shawnˍ gʼa tuˬ yoˬ. Liꞈ hpu hkʼaw kʼoˆ ve, ‘haꞈ ve chaw teˇ hpaˍ˗oˬ, daꞈ kehˬ jaˇ ve nawˬ hui yonˍ ve teˇ ceuˬ awˬ hkʼaw lo uiˍ la yeˬ la piˇ˗oˆ. Nawˬ hui lehˬ, Gʼuiˬ sha ve haꞈ pehnˇ ve awˬ hkʼaw lo a shu yawˇ awˬ to yeˬ chaweh chehˇ taˍ˗oꞈ.’—Yuˇdaꞈ 20, 21.