AWˬ LAWN 34
Awˬ vuiˬ awˬ suhˉ gʼa htaˇ pa ve htaꞈ haꞈ yuˬ sheˍ
“Gʼuiˬ sha lehˬ maˇ hteˇ maˇ cawˇ ve maˇ te. Nawˬ hui Gʼuiˬ sha ve awˬ meh htaꞈ haꞈ leh yawˇ ve kanˉ htaꞈ te ve yawˇ leunˇ tuˬ ve maˇ heˆ.”—HEˍBREHˇ 6:10, MGS.
KʼA MUIˬ HKAWˇ 38 Yawˇ nawˬ htaꞈ awˬ gʼaˇ cawˬ la piˇ tuˬ yoˬ
HENˇ TUˬ VE TEˇ HPAˍ *
1-3. Gʼuiˬ sha ve kanˉ awˬ yanˇ hkʼa biˇ te ve laiˉ gʼaˇ aˬ htoꞈ ma te awˬ vuiˬ maˇ kʼawꞈ gʼa te˗o ve le?
Roˍbeuˍ leh Maˍriˆ Con kʼoˆ ve, “ngaˬ huiˉ maˬ miˍshenˍnaˍliˍ te ve 21 hkʼawꞈ gaˬ leh ngaˬ huiˉ maˬ ve awˬ pa awˬ e naˬ ve yoˬ. Ngaˬ hui yawˇ hui htaꞈ gʼa nyi haꞈ shaˉ la ve ha lehˬ jaˇ. Yaꞈ hkʼaˇ, shu mvuhˇ miˬ hkʼaw ngaˬ hui ve yehˬ hkʼe ve htaꞈ gʼa tawˆ la ve nyi ma luˬ jaˇ.”
2 Viˆliˇ leh htun˗liˇ shu mvuhˇ miˬ lo Gʼuiˬ sha ve kanˉ te jaw ve kʼoˆ ve, “ngaˬ hui maˇ chehˇ sha ve pa taw, oˇ kaˬ lo Gʼuiˬ sha ve kanˉ te tuˬ maˇ gʼa kʼai˗o ve htaꞈ shiˍ htaˇ hawˬ ve yoˬ. Shu mvuhˇ miˬ lo Gʼuiˬ sha ve kanˉ te ve htaꞈ dawˇ cawˇ jaˇ. Yaꞈ hkʼaˇ, te maˇ gʼa˗o.”
3 Aˬleˇsiˇ kʼoˆ ve, “tawˍ laˇ ve chaw Beˍteˍlaˆ hoˆ tcuh gaˇ ve tehꞈ ngaˬ hui shiˍ ve yoˬ. Yaꞈ hkʼaˇ, Beˍteˍlaˆ awˬ tehˬ tehˬ hoˆ leh ngaˬ hui gʼa tawˆ˗e htaˇ cheˆ˗ehꞈ kʼai ve yoˬ.”
4. Awˬ lawn chi ve hkʼaw ngaˬ hui aˬ htoꞈ ma na hkawˇ htaꞈ henˇ tuˬ le?
4 Chi hkʼoˆ kaꞈ awˬ viˉ awˬ nyi Gʼuiˬ sha ve kanˉ awˬ yanˇ hkʼa biˇ te ve laiˉ gʼaˇ leh Beˍteˍlaˆ hkʼaw kanˉ te ve awˬ vuiˬ awˬ suhˉ gʼa ve chaw kaꞈ * *yawˇ hui ve awˬ vuiˬ maˇ gʼa te˗oˬ ve nyi ma luˬ jaˇ ve yoˬ hehˉ. Pa ve chi htaꞈ yawˇ hui haꞈ yuˬ gʼa tuˬ aˬ htoꞈ ma ga piˇ ve le? Nawˬ yawˇ hui htaꞈ hkʼaˬ hkʼe ga piˇ gʼa tuˬ le? Na hkawˇ chi teˇ hpaˍ ngaˬ hui a shaꞈ teꞈ kuiˬ hkʼaw pa ve htaꞈ haꞈ yuˬ gʼa tuˬ ga laˇ gʼa ve yoˬ.
PA VE AWˬ HKʼAˇ HTAꞈ HAꞈ YUˬ SHEˍ
Gʼuiˬ sha ve kanˉ awˬ yanˇ hkʼa biˇ te ve chaw maˇ gʼa te˗o htaˇ, aˬ htoꞈ ma te haꞈ yuˬ gʼa tuˬ haˍ jaˇ ve le? (Awˬ tawn 5 nyi sheˍ) *
5. Ngaˬ hui pa ve htaꞈ heuˆ la kuiˬ hkʼaˬ hkʼe cawˬ ve le?
5 Ngaˬ hui hto toˇ kuiˬ leh Beˍteˍlaˆ hkʼaw Gʼuiˬ sha ve kanˉ te ve maˇ kʼoˆ, chaw yaˇ leh oˇ kaˬ lo Gʼuiˬ sha ve kanˉ te ve htaꞈ haꞈ ve yoˬ. Ngaˬ hui awˬ vuiˬ te chehˇ ve htaꞈ maˇ gʼa te˗o ve kʼo, nyi ma maˇ sha ve yoˬ. Gʼuiˬ sha ve kanˉ teˇ geh te jaw ve chaw htaꞈ dawˇ nawˇ ve yoˬ. Ngaˬ hui htaꞈ tawˍ laˇ leh oˇ kaˬ lo gʼa tawˆ la ve pa taw, yawˇ hui htaꞈ dawˇ haˍ jaˇ. (Maꞈhtehˍ 10:23; 2 Kawˇrenˍhtuˆ 11:28, 29) Chi hkʼoˆ kaꞈ teˇ kaˬ lo jiˆ kʼai leh ngaˬ hui ve chehˇ kuiˬ hpehꞈ ve htawˇ, chaw liˇ vaˇ liˇ gʼa kʼawꞈ henˇ ve haˍ jaˇ. Roˍbeuˍ leh Maˍriˆ con kʼoˆ ve, “ngaˬ hui ve chaw liˇ vaˇ liˇ leh hto toˇ tuˬ ve awˬ hkʼaˇ kaꞈ hkʼa dehꞈ maˇ shiˍ. Shu mvuhˇ miˬ lo Gʼuiˬ sha ve kanˉ ca te ve maw jaˇ˗oˬ ve pa taw, ngaˬ hui ve chehˇ kuiˬ lo kʼawꞈ la htaˇ, shu mvuhˇ miˬ chaw hkʼe hpehꞈ ve yoˬ.” Awˬ viˉ awˬ nyi teˇ hpaˍ kʼo maˇ dawˇ maˇ gaˇ ve hkʼaw teˇ ceuˬ ceuˬ hpehꞈ la leh hpu gʼa yehˇ cawˇ ve pa taw, awˬ vuiˬ maˇ kʼawꞈ gʼa te˗o. Yawˇ hui dawˇ haˍ ve, kawˆ ve, leh awˬ gʼaˇ nuˇ ve yoˬ. Yaꞈ hkʼaˇ, hkʼaˬ hkʼe ga piˇ gʼa tuˬ le?
Ngaˬ hui Yaˬhoˉvaˬ geh meuˆ daꞈ ve leh yawˇ htaꞈ gʼaˇ va ve a yeˇ uiˍ jaˇ (Awˬ tawn 6-7 nyi sheˍ) *
6. Ngaˬ hui hkʼaˬ htaˆ kaꞈ Yaˬhoˉvaˬ geh hkʼaˬ hkʼe te meuˆ daꞈ gʼa tuˬ le?
6 Yaˬhoˉvaˬ geh hkʼaˬ htaˆ kaꞈ meuˆ daꞈ sheˍ. (Yaˍkoˆ 4:8) Chi ngaˬ hui hkʼaˬ hkʼe te gʼa tuˬ le? Gʼuiˬ sha ngaˬ hui ve “bon lawˬ hkawˇ htaꞈ na yuˬ laˇ ve” tehꞈ yonˍ gʼa ve yoˬ. (Chiˇ mvuh ve 65:2) Chiˇ mvuh ve liꞈ 62:8 hkʼaw kʼoˆ ve, “dawˇ haˍ tuˬ hkʼa peu˗eˬ yawˇ htaꞈ hto piˇ” ve kʼo “ngaˬ hui lawˬ ve leh dawˇ ve hkʼa peu˗eˬ aꞈ kehˉ leuˉ leh yawˇ maˇ chaweh te laˇ puiˉ ve yoˬ.” (Eˇfeˇsuꞈ 3:20) Ngaˬ hui lawˬ ve hkʼe ceh peꞈ laˇ tuˬ ve maˇ heˆ. Awˬ leuˉ kaꞈ peꞈ laˇ tuˬ yoˬ.
7. (a) Yaˬhoˉvaˬ geh hkʼaˬ htaˆ kaꞈ meuˆ daꞈ tuˬ aˬ htoꞈ ma ga laˇ ve le? (b) Heˍbrehˇ liꞈ 6:10-12 hkʼaw kʼoˆ taˍ ve hkʼe, ngaˬ hui hkʼaˬ htaˆ kaꞈ ka tiꞈ yeˬ ve hkʼaw Yaˬhoˉvaˬ ve kanˉ te ve kʼo, awˬ bon hkʼaˬ hkʼe gʼa tuˬ le?
7 Yaˬhoˉvaˬ geh hkʼaˬ htaˆ kaꞈ meuˆ daꞈ tuˬ nawˬ teˇ nyi le le Liꞈ hpu gʼaw leh gʼaw ve awˬ lawn htaꞈ hkʼa dehꞈ gʼa dawˇ nyi ve yoˬ. Miˍshenˍnaˍliˍ te jaw ve kʼoˆ ve, “yehˬ kʼa hkʼaw hkʼaˬ htaˆ kaꞈ oˉ kʼoˍ pui ve leh hpawnˬ daꞈ˗e tuˬ gu ve, nawˬ awˬ vuiˬ gʼa htaˇ te jaw ve hkʼe te sheˍ.” Chi hkʼoˆ kaꞈ, Hkriꞈ yaˇ awˬ moˍ awˬ suhˉ geh hto toˇ ve te gʼa ve hkʼe te sheˍ. Oˇ htaˇ hkʼe awˬ vuiˬ maˇ te gʼa˗oˬ ve htawˇ ka tiꞈ yeˬ leh hkʼaˬ htaˆ kaꞈ te ve chaw htaꞈ Yaˬhoˉvaˬ leunˇ tuˬ ve maˇ heˆ.—Heˍbrehˇ 6:10-12 gʼaw sheˍ.
8. 1 Yoˇhanˬ liꞈ 2:15-17 hkʼaw beˆ maˍ laˇ ve a shaꞈ teꞈ hkʼaˇ hkʼaˬ htaˆ kaꞈ caˇ lawꞈ dawˬ lawꞈ te ve hkʼaˬ hkʼe ga laˇ ve le?
8 Hkʼaˬ htaˆ kaꞈ a shaꞈ teꞈ hkʼaˇ caˇ lawꞈ dawˬ lawꞈ te sheˍ. Nawˬ a shaꞈ teꞈ kuiˬ hkʼaw miˬ guiˬ ve dawˇ haˍ tuˬ Hkriꞈ yaˇ ve te hkʼaˇ dawˇ hkʼaˇ htaꞈ taˇ “hoˆ taˍ” tcuh. (Maꞈhtehˍ 13:22) A shaꞈ teꞈ hkʼaˇ hkʼaw hpu chi ma ma cawˬ tuˬ Gʼuiˬ sha ve kanˉ maˇ te ve chaw, awˬ chawˇ, maˇ heˆ leh awˬ viˉ awˬ nyi kʼoˆ laˇ ve htaꞈ taˇ na. (1 Yoˇhanˬ 2:15-17 gʼaw sheˍ.) Ngaˬ hui ve yonˍ hkʼaˇ yeˬ tuˬ, nyi ma sha tuˬ, hpu shi mawˇ jeˬ chi teˇ hpaˍ ngaˬ hui loˍ htaˇ, Yaˬhoˉvaˬ ka tiꞈ te taˍ laˇ ve htaꞈ yonˍ gʼa ve yoˬ.—Heˍbrehˇ 4:16; 13:5, 6.
9. Tawˇ naˉ ve liꞈ 22:3, 7 hkʼaw kʼoˆ taˍ ve hkʼe, aˬ htoꞈ ma te a yeˇ maˇ uiˍ ve kʼo jeˬ maˇ cha cawˇ ve le? Ngaˬ hui cuˇ yiˍ cawˬ ve hkʼaw dawˇ cheˆ gʼa tuˬ aˬ htoꞈ ma ga laˇ gʼa ve le?
9 Maˇ loˍ ve kʼo jeˬ taˇ te cha sheˍ. (Tawˇ naˉ ve 22:3, 7 gʼaw sheˍ.) Teˇ kaˬ lo ca chehˇ˗e ve kʼo hpu yehˇ maˇ jaˇ ve pa taw jeˬ cha tuˬ yoˬ. Awˬ chawˇ geh hpu chiˇ ve maˇ kʼoˆ, hpu chiˇ laˇ kuiˬ hkʼaw chiˇ leh maˇ loˍ ve mawˇ taˇ vuiˬ. Yehˬ kʼa hkʼaw ve chaw naˬ ve kʼo, nawˬ hpu hkʼaˬ hkʼe ma chiˇ tuˬ dawˇ cheˆ htaˇ, dawˇ haˍ jaˇ. Chi hkʼe gʼa hpuˇ htaˇ “bon lawˬ ve, lawˬ hkawˉ ve” lehˬ nawˬ cuˇ yiˍ cawˬ ve hkʼaw dawˇ cheˆ gʼa tuˬ yoˬ tehꞈ tawnˇ taˍ sheˍ. ‘Nawˬ hui ve nyi ma leh dawˇ hkʼaˇ teˇ hpaˍ’ gawˬ lehˍ cawˬ tuˬ bon lawˬ ve hkʼaw Yaˬhoˉvaˬ haꞈ shaˉ laˇ leh cawˇ ve htaꞈ dawˇ cheˆ gʼa tuˬ yoˬ.—Hpiˇliˇpiˆ 4:6, 7; 1 Peˍtruˆ 5:7.
10. Hkʼaˬ hkʼe te awˬ chawˇ awˬ suhˉ ca gʼa tuˬ le?
10 Daꞈ ve awˬ chawˇ leh yehˬ kʼa hkʼaw ve chaw geh hkʼaˬ htaˆ kaꞈ meuˆ daꞈ sheˍ. Nawˬ dawˇ ve, gʼa hpuˇ chehˇ ve, daꞈ ve awˬ chawˇ htaꞈ kʼoˆ maˍ piˇ sheˍ. Nawˬ hkʼe gʼa hpuˇ jaw ve chaw htaꞈ kaꞈ kʼoˆ maˍ piˇ sheˍ. Chi hkʼe te ve kʼo nawˬ nyi ma sha tuˬ ga laˇ gʼa ve yoˬ. (Cuˇ yiˍ piˇ ve 4:9, 10) Nawˬ chehˇ jaw kuiˬ lo ve chaw htawˇ awˬ chawˇ hpehꞈ ve yoˬ. Yaꞈ hkʼaˇ, awˬ vuiˬ awˬ suhˉ gʼa htaˇ awˬ chawˇ awˬ suhˉ kaꞈ gʼa ca ve yoˬ. Nawˬ awˬ chawˇ cawˬ tuˬ shu htaꞈ awˉ lawˉ awˬ chawˇ gʼa te ve tehꞈ tawnˇ taˍ sheˍ. Chi nawˬ hkʼaˬ hkʼe te gʼa tuˬ le? Peuˬ laˬ htaˇ, nawˬ Gʼuiˬ sha ve kanˉ te ve, hkʼaˬ hkʼe taw ha lehˬ ve awˬ lawn awˬ viˉ awˬ nyi htaꞈ kʼoˆ maˍ piˇ sheˍ. Nawˬ Gʼuiˬ sha ve kanˉ awˬ yanˇ hkʼa biˇ te ve htaꞈ dawˇ cawˇ jaˇ ve, Hkriꞈ yaˇ awˬ moˍ hkʼaw ve chaw teˇ hpaˍ maˇ na gʼa ve htawˇ, teˇ hpaˍ kʼo kʼawꞈ shiˍ gaˇ leh nawˬ ve awˬ chawˇ hpehꞈ la ve yoˬ. Yaꞈ hkʼaˇ, nawˬ Gʼuiˬ sha ve kanˉ te ve maˇ heˆ leh nawˬ ve awˬ lawn tiˉ kʼoˆ leh shu nyi ma maˇ sha tuˬ taˇ te.
11. Nawˬ ve awˬ ca hkʼaˬ htaˆ kaꞈ ha lehˬ tuˬ hkʼaˬ hkʼe te piˇ gʼa ve le?
11 Nawˬ ve awˬ hpawˇ maˇ heˆ awˬ miˇ ma naˬ ve pa taw, nawˬ ve awˬ vuiˬ maˇ gʼa te˗o ve kʼo yawˇ htaꞈ venˇ baˆ taˇ taˬ. Nawˬ maˇ chehˇ sha ve pa taw, awˬ vuiˬ maˇ gʼa te˗o ve kʼo nawˬ awˬ hto htaꞈ venˇ baˆ taˇ taˬ. Nawˬ nyi ma maˇ sha ve lehˬ nawˬ ve awˬ ca te laˇ ve tehꞈ taˇ dawˇ. Nawˬ huiˉ maˬ “teˇ gʼaˇ tiˉ hpehꞈ la peuˬ.” Aˬ htoꞈ ma gʼa hpuˇ ve htawˇ teˇ gʼaˇ leh teˇ gʼaˇ ga daꞈ tuˬ nawˬ Yaˬhoˉvaˬ geh ka tiꞈ te taˍ peuˬ. (Maꞈhtehˍ 19:5, 6) Maˇ dawˇ maˇ gaˇ ve hkʼaw nawˬ yaˇ cawˬ ve pa taw, Gʼuiˬ sha ve kanˉ awˬ yanˇ hkʼa biˇ maˇ gʼa te˗o. Nawˬ awˬ vuiˬ te jaw ve aꞈ kehˉ yaˇ a yeˇ uiˍ jaˇ ve tehꞈ shiˍ tcuh sheˍ. Yaˇ lehˬ Yaˬhoˉvaˬ nawˬ htaꞈ peꞈ laˇ ve, “laꞈ shawnˍ” hpehꞈ ve tehꞈ yawˇ htaꞈ kʼoˆ piˇ sheˍ. (Chiˇ mvuh ve 127:3-5) Chi hkʼoˆ kaꞈ oˇ htaˇ Gʼuiˬ sha ve kanˉ awˬ yanˇ hkʼa biˇ te ve awˬ lawn yaˇ htaꞈ kaꞈ kʼoˆ maˍ piˇ sheˍ. Chi hkʼe te ve kʼo, nawˬ Yaˬhoˉvaˬ ve kanˉ awˬ yanˇ hkʼa biˇ te jaw ve hkʼe yaˇ kaꞈ te gaˇ tuˬ yoˬ.
AWˬ VIˉ AWˬ NYI HKʼAˬ HKʼE TE GA LAˇ GʼA TUˬ LE?
12. (a) Gʼuiˬ sha ve kanˉ awˬ yanˇ hkʼa biˇ te ve chaw awˬ vuiˬ htaꞈ kʼawꞈ te gʼa tuˬ ngaˬ hui aˬ htoꞈ ma ga piˇ gʼa ve le? (b) Yawˇ hui pa ve htaꞈ haꞈ yuˬ gʼa tuˬ ngaˬ hui hkʼaˬ hkʼe ga piˇ gʼa tuˬ le?
12 Awˬ viˉ awˬ nyi Gʼuiˬ sha ve kanˉ awˬ yanˇ hkʼa biˇ kʼawꞈ te gʼa tuˬ, Hkriꞈ yaˇ awˬ moˍ leh awˬ viˉ awˬ nyi laiˉ gʼaˇ ga piˇ ve chiˇ mvuh kuiˬ cawˬ jaˇ. Awˬ gʼaˇ piˇ ve, hpu shi mawˇ jeˬ ga piˇ ve, maˇ heˆ leh yawˇ hui ve yehˬ kʼa hkʼaw ve chaw htaꞈ gʼa nyi haꞈ shaˉ piˇ ve yoˬ. (Gaˍlaˍtiˆ 6:2) Awˬ viˉ awˬ nyi Gʼuiˬ sha ve kanˉ awˬ yanˇ hkʼa biˇ te ve, awˬ vuiˬ awˬ suhˉ gʼa leh nawˬ ve Hkriꞈ yaˇ awˬ moˍ hkʼaw ca chehˇ la ve kʼo, yawˇ kanˉ te ve maˇ daꞈ ve maˇ heˆ leh te yaꞈ ve pa taw, gʼa tawˆ la ve tehꞈ taˇ dawˇ. * Yawˇ hui pa gʼa tuˬ ga piˇ sheˍ. Chi teˇ hkui yawˇ hui maˇ chehˇ sha leh Gʼuiˬ sha ve kanˉ hkʼa dehꞈ te maˇ gʼa ve htawˇ, yawˇ hui htaꞈ haꞈ yuˬ piˇ leh te gʼa ve awˬ ceuˬ htaꞈ chiˇ mvuh piˇ sheˍ. Nawˬ yawˇ hui htaꞈ shiˍ daꞈ maˇ la tuˬ te sheˍ. Yawˇ hui ve cuˇ yiˍ, maˍ laˇ ve, leh awˬ lawn htaꞈ henˇ yuˬ sheˍ.
13. Awˬ vuiˬ awˬ suhˉ gʼa ve chaw htaꞈ ngaˬ hui hkʼaˬ hkʼe ga piˇ gʼa tuˬ le?
13 Awˉ lawˉ htaˇ awˬ viˉ awˬ nyi awˬ vuiˬ awˬ suhˉ gʼa ve chaw lehˬ yehˬ, kʼai kʼai laˬ laˬ ve, kanˉ, maˇ heˆ leh loˍ ve awˬ ceuˬ nawˬ ga laˇ tuˬ loˍ ve yoˬ. Yawˇ hui a shaꞈ teꞈ chehˇ kuiˬ hkʼaw ve awˬ lawn, awˬ hkawnˍ kuiˬ ve leh awˬ nu ve kaꞈ shiˍ gaˇ ve yoˬ. Yawˇ hui htaꞈ ha kʼaˉ laˇ tuˬ maˇ heˆ, na gʼa laˇ tuˬ htaꞈ loˍ ve yoˬ. Yawˇ hui maˇ chehˇ sha ve, yehˬ kʼa hkʼaw ve chaw naˬ ve, maˇ heˆ leh yawˇ hui haꞈ ve chaw suh˗e leh nyi ma luˬ ve yoˬ. * Yawˇ hui kʼoˆ leh maˇ te tawˆ la ve htawˇ, awˬ viˉ awˬ nyi leh awˬ chawˇ htaꞈ gʼa hpaˆ daꞈ ve nyi ma luˬ ve yoˬ. Yawˇ hui teˇ pawˆ tiˉ laiˉ ceuˬ gʼa hpuˇ ve htaꞈ haꞈ yuˬ gʼa tuˬ awˬ yanˇ gʼa yehˇ ve yoˬ.
14. Hkriꞈ yaˇ awˬ moˍ hkʼaw ve chaw, yaˇ miˇ teˇ gʼaˇ pa ve htaꞈ haꞈ yuˬ gʼa tuˬ hkʼaˬ hkʼe ga piˇ ve le?
14 Awˬ yanˇ maw la htaˇ, nawˬ ga piˇ ve lehˬ yawˇ pa ve htaꞈ haꞈ yuˬ gʼa tuˬ sha ve yoˬ. Tawˇ pa haˉ te kʼo, awˬ viˉ awˬ nyi yaˇ miˇ teˇ gʼaˇ shu mvuhˇ miˬ lo Gʼuiˬ sha ve kanˉ awˬ yanˇ maw chaweh te jaw ve kʼoˆ ve, “ngaˬ awˬ vuiˬ te jaw ve hkʼe gʼa te htaˇ, teˇ nyi le le Liꞈ hpu maˍ˗e ve yoˬ. Yaꞈ hkʼaˇ, teˇ kaˬ lo kʼawꞈ kʼai htaˇ, Liꞈ hpu leh VDO maˍ piˇ tuˬ chaw kaꞈ maˇ mawˬ. Hkʼe te leh awˬ viˉ awˬ nyi Liꞈ hpu maˍ˗e tuˬ jehˬ laˇ leh teˇ geh kʼai ve yoˬ. Awˬ viˉ awˬ nyi ka tiꞈ yeˬ leh nyi ma pfuhˇ ve geh Gʼuiˬ sha ve kanˉ gʼa te ve, co ha hpawˇ uiˍ la mvuh la chehˇ ve chaw geh Liꞈ hpu maˍ˗e ve gʼa mawˬ htaˇ, chi ngaˬ nyi ma sha tuˬ leh daꞈ ve hpawˇ kʼawꞈ dawˇ tuˬ ga laˇ ve yoˬ. Chi hkʼoˆ kaꞈ, choˬ kaˬ ve chaw geh hto toˇ ve tawˇ tanˬ yaw daꞈ tuˬ kaꞈ shiˍ la ve yoˬ. Chi ve ngaˬ ha lehˬ tuˬ te laˇ ve yoˬ.”
HKʼAˬ HTAˆ KAꞈ TE GʼA VE HKʼE TE SHEˍ
Nawˬ chehˇ kuiˬ lo ve chaw htaꞈ hto maˍ piˇ ve (Awˬ tawn 15-16 nyi sheˍ) *
15. Nawˬ awˬ vuiˬ awˬ suhˉ gʼa ve htawˇ dawˇ taˍ ve hkʼe hkʼaˬ hkʼe te gʼa tuˬ le?
15 Nawˬ awˬ vuiˬ awˬ suhˉ gʼa ve htawˇ dawˇ taˍ ve hkʼe te gʼa ve yoˬ. Nawˬ kanˉ te ve maˇ daꞈ leh awˬ hpfuhˇ maˇ cawˬ ve pa taw, pa laˇ ve tehꞈ taˇ dawˇ. Chi teˇ hkui Yaˬhoˉvaˬ nawˬ htaꞈ hkʼaˬ hkʼe taw ga laˇ ve htaꞈ dawˇ nyi leh hkʼaˬ htaˆ kaꞈ hto toˇ sheˍ. Awˉ lawˉ peuˇ ve ka tiꞈ yeˬ ve Hkriꞈ yaˇ hkʼaˬ kaˬ lo ca chehˇ˗e ve htawˇ, “teˇ kaˬ peuˬ teˇ kaˬ lo kʼai leh ha lehˬ ve bon hkawˇ ca maˍ piˇ ve” htaꞈ henˇ yuˬ sheˍ. (Tcuh yaˇ 8:1, 4) Nawˬ hkʼaˬ htaˆ kaꞈ hto toˇ ve kʼo awˬ bon gʼa tuˬ yoˬ. Tawˇ pa haˉ te kʼo, gʼuˇ suhˍ peuˍ ve chaw laiˉ gʼaˇ, mvuhˇ miˬ teˇ peꞈ hkʼaw gʼaꞈ tawˆ piˇ ve yoˬ. Yawˇ hui yaw gʼa ve tawˇ hkawˇ loˍ jaˇ kuiˬ lo kʼawꞈ kʼai ve yoˬ. Gʼuˇ suhˍ peuˍ ve chaw ca ga piˇ˗e kuiˬ lo hkʼaˬ nyiˇ ha pa maˇ gaˬ sheˍ kaꞈ hpawnˬ daꞈ ve awˬ moˍ ehˉ teh gʼa ve yoˬ.
16. Nawˬ ve awˬ vuiˬ awˬ suhˉ htaꞈ hkʼaˬ hkʼe te ha lehˬ gʼa tuˬ le?
16 “[Yaˬhoˉvaˬ] peꞈ laˇ ve ha lehˬ tuˬ awˬ ceuˬ lehˬ, nawˬ hui htaꞈ awˬ gʼaˇ uiˍ la piˇ tuˬ yoˬ.” (Neˍhaˍmiˆ 8:10) Ngaˬ hui kanˉ chi ve htaꞈ hkʼaˬ hkʼe taw dawˇ cawˇ ve htawˇ, ha lehˬ gʼa ve maˇ heˆ. Yaˬhoˉvaˬ geh meuˆ daꞈ ve ceh tiˉ ha lehˬ gʼa ve yoˬ. Chi htaꞈ pa taw ngaˬ hui hkʼaˬ htaˆ kaꞈ ha lehˬ gaˇ ve kʼo, Yaˬhoˉvaˬ geh gʼa meuˆ daꞈ ve yoˬ. Gʼuiˬ sha ve cuˇ yiˍ, beˆ maˍ laˇ ve, leh yawˇ hkʼaˬ htaˆ kaꞈ ga laˇ tuˬ lawˬ cawˇ ve yoˬ. Nawˬ oˇ kaˬ lo ve chaw htaꞈ haꞈ leh nawˬ ga gʼa ve hkʼe ga piˇ˗oˬ ve tehꞈ tawnˇ taˍ sheˍ. Chi htaꞈ pa taw, nawˬ ve awˬ vuiˬ awˬ suhˉ htaꞈ hkʼaˬ htaˆ kaꞈ te ve kʼo, nawˬ te jaw ve hkʼe kʼawꞈ te gaˇ tuˬ Yaˬhoˉvaˬ ga laˇ tuˬ yoˬ.—Cuˇ yiˍ piˇ ve 7:10.
17. Chi teˇ hkui ngaˬ hui awˬ vuiˬ te ve htaꞈ caˉ daꞈ ve aˬ htoꞈ ma tawnˇ taˍ cawˇ ve le?
17 Yaˬhoˉvaˬ ve kanˉ lehˬ hkʼaˬ htaˆ kaꞈ gʼa te ve yoˬ. Chi teˇ hkui ngaˬ hui te chehˇ ve awˬ vuiˬ lehˬ teˇ hkui teˇ yanˇ ceh hpehꞈ ve yoˬ. Miˬ guiˬ awˬ suhˉ hkʼaw ngaˬ hui awˬ vuiˬ awˬ suhˉ gʼa tuˬ yoˬ. Aˬleˇsiˇ kʼoˆ peuˬ ve hkʼe chi teˇ hkui yawˇ gʼa hpuˇ ve awˬ ceuˬ awˬ gʼuˇ suhˍ hpawˇ pa ve htaꞈ haꞈ yuˬ gʼa tuˬ gu hehnˇ taˍ˗oˬ. Yawˇ kʼoˆ ve “Yaˬhoˉvaˬ awˬ tehˬ cawˬ leh miˬ guiˬ awˬ suhˉ kaꞈ awˬ tehˬ cawˬ ve tehꞈ ngaˬ hkʼaˬ htaˆ kaꞈ shiˍ ve yoˬ. Yaꞈ hkʼaˇ, Gʼuiˬ sha ngaˬ awˬ paˇ neˇ lo maˇ chehˇ leh miˬ guiˬ awˬ suhˉ kaꞈ haˆ haˆ maˇ gaˬ la sheˍ tehꞈ dawˇ ve yoˬ. Chi teˇ hkui Yaˬhoˉvaˬ ngaˬ awˬ paˇ lo chehˇ taˍ ve htaꞈ shuˍ leh miˬ guiˬ awˬ suhˉ gaˬ la tuˬ kaꞈ awˬ paˇ neˇ jaˇ˗oˬ.” (Tcuh yaˇ 2:25) Chi htaꞈ pa taw ngaˬ hui aˬ htoꞈ ma ve awˬ vuiˬ te ve htawˇ, hkʼaˬ htaˆ kaꞈ Yaˬhoˉvaˬ geh meuˆ daꞈ cawˇ ve yoˬ. Gʼuiˬ sha ngaˬ hui htaꞈ baˬ taˉ laˇ tuˬ awˬ nyi maˇ cawˬ leh ngaˬ hui ve awˬ vuiˬ hkʼaˬ kaˬ lo gʼa te ve htawˇ ha lehˬ gʼa tuˬ yawˇ ga laˇ tuˬ yoˬ.—Iˉsaˍyaˆ 41:13.
KʼA MUIˬ HKAWˇ 90 Teˇ gʼaˇ leh teˇ gʼaˇ awˬ gʼaˇ piˇ daꞈ ve
^ Teˇ pawˆ pawˆ kʼo, awˬ viˉ awˬ nyi Gʼuiˬ sha ve kanˉ awˬ yanˇ hkʼa biˇ te chehˇ ve chaw awˬ vuiˬ pa piˇ ve maˇ heˆ leh yawˇ hui ve awˬ vuiˬ te chehˇ ve maˇ kʼawꞈ gʼa te˗o ve yoˬ hehˉ. Yawˇ hui aˬ htoꞈ ma awˬ lawn gʼa hpuˇ ve, leh yawˇ hui pa ve htaꞈ haꞈ yuˬ gʼa tuˬ aˬ htoꞈ ma ga piˇ gʼa ve awˬ lawn chi ve hkʼaw henˇ tuˬ yoˬ. Chi hkʼoˆ kaꞈ awˬ viˉ awˬ nyi awˬ gʼaˇ piˇ leh hkʼaˬ hkʼe ga piˇ gʼa ve, leh ngaˬ hui a shaꞈ teꞈ kuiˬ hkʼaw pa ve chi hkʼe ve gʼa hpuˇ htaˇ, Liꞈ hpu hkʼaw ve awˬ liˇ awˬ hkʼaˇ ngaˬ hui teˇ gʼaˇ le le htaꞈ hkʼaˬ hkʼe ga laˇ gʼa ve kaꞈ henˇ tuˬ yoˬ.
^ Awˬ lawn chi ve hkʼaw “awˬ vuiˬ awˬ suhˉ” tcuhˉ kuiˬ lehˬ Gʼuiˬ sha ve kanˉ awˬ yanˇ hkʼa biˇ te ve teˇ ceuˬ maˇ te˗oˬ leh, awˬ vuiˬ teˇ ceuˬ kʼawꞈ te ve htaꞈ kʼoˆ gaˇ ve yoˬ. Chi lehˬ tcuh peu ve gʼuˇ suhˍ peuˍ ve te ve, hkʼaˬ htaˆ kaꞈ gʼuˇ suhˍ peuˍ ve te ve, hto toˇ ve chaw te ve maˇ heˆ leh awˬ nu ve awˬ vuiˬ htaꞈ kaꞈ kʼoˆ gaˇ ve yoˬ.
^ Chi hkʼa shuˍ Gʼuiˬ sha ve kanˉ hkʼaˇ kʼoˆ taˍ ve hkʼe, awˬ viˉ awˬ nyi hawˉ hkʼaˆ laiˉ gʼaˇ mawˇ˗oˬ htaˇ awˬ vuiˬ maˇ te˗oˬ leh yawˇ hui aꞈ kehˉ a shaꞈ i ve awˬ viˉ awˬ nyi awˬ vuiˬ oˇ ve htaꞈ kʼawꞈ te ve yoˬ. Shaw nyi kuiˬ Taꞈ yehˬ Ha pa 9 maˬ 2018 hkʼawꞈ awˬ lawn “Awˬ viˉ awˬ nyi a shaꞈ maˇ˗oˬ ve nawˬ ka tiꞈ yeˬ ve htaꞈ Yaˬhoˉvaˬ awˬ hpfuhˇ shiˍ ve” (Laˇhuˍ hkawˇ maˇ cawˬ) leh Shaw nyi kuiˬ Taꞈ yehˬ Ha pa 10 maˬ 2018 hkʼawꞈ awˬ lawn “A shaꞈ teꞈ hkʼaˇ pa kʼai ve htawˇ nyi ma gawˬ lehˍ ve htaꞈ haꞈ shaˉ gʼa sheˍ ve” htaꞈ nyi sheˍ.
^ Awˬ viˉ awˬ nyi Hkriꞈ yaˇ awˬ moˍ teˇ kaˬ lo ca chehˇ˗e htaˇ, gʼuˇ suhˍ peuˍ ve, nyi haꞈ shaˉ pa, maˇ heˆ leh ga piˇ shehˍ hpaˇ caˉ leh te gʼa tuˬ, nyi haꞈ shaˉ paˍ te gʼa ve hkʼe awˬ viˉ awˬ nyi ca chehˇ˗e ve Hkriꞈ yaˇ awˬ moˍ hkʼaw liꞈ haˆ gʼa bvuhꞈ feu piˇ ve yoˬ.
^ Laiˉ tawn cawˬ ve, Tu loˬ! 2018 hkʼawꞈ 3 kʼoˆ teˇ kʼoˆ hkʼaw “Haꞈ ve chaw suh˗e htaˇ nyi ma luˬ ve htaꞈ haꞈ yuˬ gʼa tuˬ” htaꞈ nyi sheˍ. (Laˇhu hkawˇ maˇ cawˬ.)
^ AWˬ HAN HTAꞈ KʼOˆ MAˍ TAˍ VE: Awˬ viˉ awˬ nyi teˇ ca miˍshenˍnaˍliˍ ve awˬ vuiˬ maˇ gʼa te˗o leh shu mvuhˇ miˬ lo tawˆ la htaˇ hawˬ leh Hkriꞈ yaˇ awˬ moˍ hkʼaw ve chaw htaꞈ laꞈ sheh caˉ daꞈ˗taˉ ve.
^ AWˬ HAN HTAꞈ KʼOˆ MAˍ TAˍ VE: Yawˇ hui chehˇ kuiˬ lo kʼawꞈ la leh yawˇ hui gʼa hpuˇ chehˇ ve shoꞈ shaꞈ ve htaꞈ haꞈ yuˬ gʼa tuˬ hkʼaˬ htaˆ kaꞈ bon lawˬ ve.
^ AWˬ HAN HTAꞈ KʼOˆ MAˍ TAˍ VE: Yawˇ hui Gʼuiˬ sha ve kanˉ awˬ yanˇ hkʼa biˇ kʼawꞈ te tuˬ yawˇ ga piˇ ve. Yawˇ hui miˍshenˍnaˍliˍ te htaˇ tawˇ hkawˇ henˇ taˍ ve lehˬ yawˇ hui Hkriꞈ yaˇ awˬ moˍ teˇ kaˬ lo ca chehˇ˗e htaˇ, oˇ kaˬ lo ve chaw htaꞈ hto maˍ piˇ ve.
