Hkriꞈ yaˇ awˬ moˍ hkʼaw nawˬ te gaˇ ve, hkʼe kaꞈ te maˇ gʼa ve awˬ vuiˬ cawˬ˗aw laˇ? Awˬ vuiˬ oˇ ve awˬ nu ve awˬ viˉ awˬ nyi te chehˇ sheˍ ve yoˬ. Maˇ heˆ kʼo, awˬ vuiˬ oˇ ve nawˬ te jaw ve htawˇ kaꞈ a shaꞈ maˇ ve, maˇ chehˇ shaˍ ve, tanˇ kaˬ hkʼaˇ maˇ daꞈ ve, maˇ heˆ leh yehˬ kʼa htaꞈ gʼa nyi haꞈ shaˉ ve pa taw, chi teˇ hkui te maˇ gʼa˗o ve yoˬ hehˉ. Teˇ ceuˬ ceuˬ kʼo, Gʼuiˬ sha ve kanˉ hkʼaˇ pa ve pa taw awˬ vuiˬ oˇ ve nawˬ maˇ te˗o. Hkʼe te leh, Gʼuiˬ sha ve kanˉ te ve hkʼaw nawˬ te gaˇ ve hkʼe teˇ ceuˬ le le maˇ gʼa te tehꞈ dawˇ leh nyi ma luˬ ve yoˬ. Yaꞈ hkʼaˇ, awˬ gʼaˇ maˇ gʼa nuˇ tuˬ, leh shu htaꞈ a canˇ maˇ gʼa cawˬ tuˬ, ngaˬ hui hkʼaˬ hkʼe te cawˇ ve le? Ngaˬ hui hkʼaˬ htaˆ kaꞈ hkʼaˬ hkʼe te ha lehˬ gʼa tuˬ le?

Baˆtiˆsaˬ piˇ paˍ Yoˇhanˬ htaꞈ ngaˬ hui henˇ yuˬ gʼa ve yoˬ. Yawˇ daꞈ ve awˬ vuiˬ laiˉ ceuˬ te gʼa ve yoˬ. Yaꞈ hkʼaˇ, yawˇ ve a shaꞈ awˬ leh meuˇ chi hkʼe hpehꞈ tuˬ maˇ dawˇ nyi jaw. Yawˇ Gʼuiˬ sha ve kanˉ te la ve aꞈ kehˉ htawnˍ hkʼaw lo chi maw maw gʼa chehˇ tuˬ maˇ dawˇ nyi jaw. Yaꞈ hkʼaˇ, Yoˇhanˬ hkʼaˬ htaˆ kaꞈ ha lehˬ gʼa ve yoˬ. Yawˇ htaꞈ aˬ htoꞈ ma ga piˇ ve le? Ngaˬ hui kaꞈ dawˇ taˍ ve hkʼe maˇ hpehꞈ ve kʼo, hkʼaˬ hkʼe te hkʼaˬ htaˆ kaꞈ ha lehˬ gʼa tuˬ le?

29 hkʼawꞈ mvuhˇ goˇ yanˇ htaˇ, Yaˬhoˉvaˬ piˇ ve kanˉ Yoˇhanˬ tanˬ te ve yoˬ. Yawˇ ve kanˉ lehˬ chaw yaˇ Meˍsiˉyaꞈ htaꞈ haꞈ yuˬ tuˬ te leh, “mvuhˇ naw ma mvuhˇ miˬ gaˬ la paˇ neˇ ve pa taw, venˇ baˆ htaꞈ dawˇ hpfuhˆ loˬ” tehꞈ kʼoˆ piˇ ve yoˬ. (Maꞈhtehˍ 3:2; Luˉkaꞈ 1:12-17) Yawˇ ve hkawˇ na tuˬ laiˉ gʼaˇ vuiˇ jaˇ kuiˬ lo laˬ leh, venˇ baˆ dawˇ hpfuhˆ leh Baˆtiˆsaˬ haꞈ yuˬ ve yoˬ. Leh bon awˬ hoˉ teˇ hpaˍ maˇ pa ve kʼo ciˍ yanˍ ve htaꞈ gʼa hkanˍ tuˬ yoˬ tehꞈ Yoˇhanˬ shaˍ tiꞈ piˇ ve yoˬ. (Maꞈhtehˍ 3:5-12) 29 hkʼawꞈ suhˆ hpaꞈ piˍ htaˇ, yawˇ a yeˇ uiˍ jaˇ ve awˬ vuiˬ gʼa ve yoˬ. Yawˇ Yeˍsuˆ htaꞈ Baˆtiˆsaˬ piˇ ve yoˬ. Oˇ ve teˇ yanˇ tanˬ leh shu Meˍsiˉyaꞈ lehˬ Yeˍsuˆ hpehꞈ ve awˬ hkʼaˇ suh gʼaꞈ kʼai tuˬ Yoˇhanˬ beˆ maˍ piˇ ve yoˬ.—Yoˇhanˬ 1:32-37.

Yeˍsuˆ Yoˇhanˬ htaꞈ kʼoˆ ve teˇ yanˇ, “yaˇ miˇ geh hkʼa paw la ve chaw hui awˬ hkʼaw lo, Baˆtiˆsaˬ piˇ paˍ Yoˇhanˬ aꞈ kehˉ uiˍ ve chaw teˇ gʼaˇ kaꞈ maˇ tawˆ la jaw” tehꞈ yawˇ kʼoˆ ve yoˬ. (Maꞈhtehˍ 11:11) Yoˇhanˬ awˬ bon laiˉ ceuˬ gʼa ve pa taw ha lehˬ jaˇ. Chi teˇ hkui kaꞈ laiˉ gʼaˇ Yoˇhanˬ hkʼa shuˍ awˬ bon laiˉ ceuˬ gʼa ve yoˬ. Tawˇ pa haˉ te kʼo, Hteˍriˇ leh yawˇ ve awˬ miˇ ma Shen˗daˇ Gʼuiˬ sha ve kanˉ awˬ yanˇ hkʼa  biˇ 50 hkʼawꞈ hpaˆ te ve yoˬ. Hteˍriˇ kʼoˆ ve, “ngaˬ awˬ vuiˬ laiˉ ceuˬ te jaw ve yoˬ. Hkʼaˬ htaˆ kaꞈ gʼuˇ suhˍ peuˍ ve, Beˍteˍlaˆ hkʼaw kanˉ te ve, toˇ nyi shehˍ hpaˇ te ve, leh chi teˇ hkui tcuh peu ve gʼuˇ suhˍ peuˍ ve te chehˇ ve yoˬ.” Yaˬhoˉvaˬ ngaˬ hui htaꞈ awˬ vuiˬ peꞈ laˇ htaˇ, ngaˬ hui ha lehˬ jaˇ. Yaꞈ hkʼaˇ, Yoˇhanˬ ve awˬ lawn maˍ laˇ sheˍ ve, ngaˬ hui a shaꞈ teꞈ hkʼaˇ pa htaˇ caˉ leh kʼawꞈ ha lehˬ gaˇ ve kʼo, gʼa coˇ caˇ jaˇ.

Yoˇhanˬ hkʼaˬ htaˆ kaꞈ awˬ hpfuhˇ shiˍ ve pa taw, ha lehˬ gʼa ve yoˬ. Yeˍsuˆ Baˆtiˆsaˬ haꞈ yuˬ peuˬ hkʼawꞈ nawˉ, Yoˇhanˬ awˬ hkʼaˇ suh gʼaꞈ kʼai ve chaw i la leh Yeˍsuˆ awˬ hkʼaˇ suh gʼaꞈ kʼai ve chaw maˇ la ve yoˬ. Yoˇhanˬ awˬ hkʼaˇ suh gʼaꞈ kʼai ve chaw lehˬ yawˇ htaꞈ dawˇ haˍ leh kʼoˆ piˇ ve, yawˇ “shu htaꞈ Baˆtiˆsaˬ piˇ chehˇ” leh teˇ gʼaˇ le le yawˇ geh kʼai ve yoˬ. (Yoˇhanˬ 3:26) Yoˇhanˬ hkʼawꞈ piˇ ve, “awˬ hpawˇ heuˆ tuˬ ve yaˇ miˇ haˉ htaꞈ gʼa ve teˇ gʼaˇ lehˬ, awˬ miˇ ma heuˆ shehˍ hpaˇ hpehꞈ ve yoˬ. Awˬ paˇ lo huˉ taˍ leh awˬ miˇ ma heuˆ shehˍ hpaˇ ve awˬ hkawˇ htaꞈ gʼa kaˇ ve awˬ chawˇ teˇ gʼaˇ lehˬ, awˬ miˇ ma heuˆ shehˍ hpaˇ ve tawˇ hkawˇ htaꞈ gʼa kaˇ ve pa taw ha lehˬ jaˇ ve yoˬ. Oˇ ve hkʼa shuˍ shuˍ, ha lehˬ ve teˇ ceuˬ ngaˬ awˬ hkʼaw lo biˇ la peuˬ.” (Yoˇhanˬ 3:29) Yoˇhanˬ Yeˍsuˆ htaꞈ maˇ gʼa enˍ daꞈ. Yeˍsuˆ ve kanˉ a yeˇ uiˍ ve pa taw, yawˇ ve awˬ vuiˬ chi teˇ hkui awˬ hpfuhˇ maˇ cawˬ˗o ve tehꞈ yawˇ maˇ dawˇ. Yoˇhanˬ ‘awˬ miˇ ma heuˆ shehˍ hpaˇ ve awˬ chawˇ’ hpehꞈ gʼa ve pa taw, yawˇ ha lehˬ ve yoˬ.

Yoˇhanˬ ve awˬ vuiˬ haˍ jaˇ ve htawˇ, yawˇ ve dawˇ hkʼaˇ yawˇ ha lehˬ tuˬ te piˇ ve yoˬ. Tawˇ pa haˉ te kʼo, yawˇ paw la htaˇ kaꞈ Naˍzaˍrehˆ chaw hpehꞈ ve pa taw, yawˇ a pehˉ meuˇ gʼuiˬ dawˬ maˇ hpehꞈ. (Luˉkaꞈ 1:15) Yeˍsuˆ Yoˇhanˬ ve a shaꞈ teꞈ hkʼaˇ htaꞈ kʼoˆ htaˇ, “Yoˇhanˬ laˬ leh, maˇ caˇ maˇ dawˬ ve” tehꞈ kʼoˆ ve yoˬ. Yaꞈ hkʼaˇ, Yeˍsuˆ leh yawˇ ve awˬ laꞈ gʼawˇ awˬ liˇ oˇ ve hkʼe maˇ gʼaꞈ te. (Maꞈhtehˍ 11:18, 19) Chi hkʼoˆ kaꞈ, Yoˇhanˬ anˇ tuˬ maˇ te jaw. Yaꞈ hkʼaˇ, Yeˍsuˆ ve awˬ laꞈ gʼawˇ anˇ tuˬ te tuˬ kanˇ paˆ gʼa ve yoˬ. Yeˍsuˆ ve awˬ laꞈ gʼawˇ teˇ hpaˍ hpaˍ kʼo, Yoˇhanˬ awˬ hkʼaˇ suh kaꞈ gʼaꞈ kʼai jaw ve yoˬ. (Maꞈhtehˍ 10:1; Yoˇhanˬ 10:41) Yoˇhanˬ awˬ lawn chi yawˇ htaꞈ heuˆ la tuˬ maˇ cawˬ tcuh. Yawˇ ka tiꞈ yeˬ ve hkʼaw Yaˬhoˉvaˬ piˇ taˍ ve awˬ vuiˬ htaꞈ caˉ leh te ve yoˬ.

Chi teˇ hkui kaꞈ Yaˬhoˉvaˬ peꞈ laˇ taˍ ve awˬ vuiˬ htaꞈ ngaˬ hui awˬ hpfuhˇ shiˍ ve kʼo, hkʼaˬ htaˆ kaꞈ ha lehˬ ve cawˬ gʼa ve yoˬ. Hteˍriˇ kʼoˆ ve, “ngaˬ gʼa ve awˬ vuiˬ teˇ ceuˬ le le hkʼa dehꞈ coˇ caˇ leh te ve yoˬ.” Yawˇ Gʼuiˬ sha ve kanˉ awˬ yanˇ hkʼa biˇ te ve htaꞈ dawˇ nyi htaˇ yawˇ kʼoˆ ve, “ngaˬ daꞈ ve awˬ ceuˬ htaꞈ tiˉ dawˇ mawˬ ve yoˬ. Ngaˬ nyi ma luˬ ve tehꞈ maˇ dawˇ jaw.”

Aˬ htoꞈ ma te ngaˬ hui Gʼuiˬ sha peꞈ laˇ ve awˬ vuiˬ te chehˇ ve htaꞈ hkʼa dehꞈ dawˇ nyi ve kʼo, ngaˬ hui ha lehˬ ve maˇ maˇ cawˬ gʼa ve yoˬ. Ngaˬ hui “teˇ geh Gʼuiˬ sha ve kanˉ te shehˍ hpaˇ” hpehꞈ gʼa ve yoˬ. (1 Kawˇrenˍhtuˆ 3:9) Ngaˬ hui awˬ hpfuhˇ hkʼaˆ jaˇ ve shi muꞈ hkʼu htaꞈ hkʼa dehꞈ tuˍ shiˆ ve kʼo, daꞈ jaˇ tuˬ yoˬ. Chi hkʼa shuˍ shuˍ Yaˬhoˉvaˬ geh kanˉ teˇ geh gʼa te ve hkʼaˬ hkʼe taw daꞈ jaˇ ve htaꞈ hkʼa dehꞈ dawˇ nyi ve kʼo, ngaˬ hui hkʼaˬ htaˆ kaꞈ ha lehˬ gʼa tuˬ yoˬ. Ngaˬ hui ve kanˉ leh shu ve kanˉ htaꞈ maˇ tehˆ daꞈ. Ngaˬ hui ve awˬ vuiˬ shu ve hkʼe taw awˬ hpfuhˇ maˇ cawˬ tehꞈ maˇ dawˇ.—Gaˍlaˍtiˆ 6:4.

Yoˇhanˬ yawˇ ve kanˉ hkʼaˬ htaˆ kaꞈ gʼa te tuˬ ve maˇ heˆ tehꞈ yawˇ shiˍ ve yoˬ. Yaꞈ hkʼaˇ, kanˉ chi laꞈ haˉ peuˬ˗e tuˬ ve yawˇ maˇ shiˍ. (Yoˇhanˬ 3:30) 30 hkʼawꞈ htaˇ Yoˇhanˬ Yeˍsuˆ htaꞈ Baˆtiˆsaˬ piˇ peuˬ hkʼawꞈ nawˉ 6 ha pa gaˬ leh, Jawˇmawˇ Heˍroˆ Yoˇhanˬ htaꞈ htawnˍ hkʼaw yuˬ keu piˇ ve yoˬ. Yaꞈ hkʼaˇ, Yoˇhanˬ caˉ leh shu htaꞈ bon maˍ piˇ ve yoˬ. (Maˍkuˆ 6:17-20) Yawˇ chi hkʼe gʼa hpuˇ ve kaꞈ aˬ htoꞈ ma te hkʼaˬ htaˆ kaꞈ ha lehˬ gʼa sheˍ ve le? Yawˇ Yaˬhoˉvaˬ awˬ pon aˬ htoꞈ ma awˬ lawn a yeˇ uiˍ jaˇ ve htaꞈ hkʼaˬ htaˆ kaꞈ dawˇ nyi ve yoˬ.

Yoˇhanˬ htawnˍ hkʼaw lo chehˇ htaˇ, Yeˍsuˆ ve kanˉ hkʼaˬ hkʼe tawn uiˍ la mvuh la ve yawˇ gʼa kaˇ ve yoˬ. (Maꞈhtehˍ 11:2; Luˉkaꞈ 7:18) Yeˍsuˆ lehˬ awˬ tehˬ awˬ na Meˍsiˉyaꞈ hpehꞈ ve tehꞈ Yoˇhanˬ shiˍ ve yoˬ. Yaꞈ hkʼaˇ, Yeˍsuˆ tcuh kaˍ paˍ ve tawˇ hkawˇ hkʼa peu˗eˬ hkʼaˬ hkʼe te biˇ gʼa tuˬ le, yawˇ htawˇ dawˇ nawˬ dawˇ cawˬ sheˍ ve hehˉ. Meˍsiˉyaꞈ jawˇ mawˇ te tuˬ ve pa taw, chi teˇ hkui tanˬ leh Yeˍsuˆ uˉ peunˍ tuˬ ve tehꞈ kʼoˆ gaˇ ve laˇ? Chi hkʼe hpehꞈ ve kʼo, Yoˇhanˬ kaꞈ htawnˍ hkʼaw hpehˇ piˇ tuˬ ve tehꞈ kʼoˆ gaˇ ve laˇ? Yoˇhanˬ yawˇ awˬ hkʼaˇ suh gʼaꞈ kʼai ve 2 gʼaˇ htaꞈ cuˇ leh Yeˍsuˆ htaꞈ ca na˗e tcuh ve, “nawˬ lehˬ laˬ tuˬ ve chaw teˇ gʼaˇ yoˬ laˇ? Maˇ heˆ kʼo, awˬ kaˍ awˬ nu teˇ  gʼaˇ htaꞈ ngaˬ hui gʼa dawˇ law tuˬ sheˍ laˇ?” (Luˉkaꞈ 7:19) Yawˇ huiˉ maˬ kʼawꞈ la htaˇ, Yeˍsuˆ chaw maˇ maˇ htaꞈ anˇ tuˬ te leh gu na˗e piˇ ve Yoˇhanˬ htaꞈ kʼoˆ piˇ ve yoˬ hehˉ. Yeˍsuˆ yawˇ huiˉ maˬ htaꞈ cuˇ leh Yoˇhanˬ htaꞈ kʼoˆ piˇ tcuh ve, “mehˆ cuˉ ve chaw hui mehˆ mawˬ la ve, hkui luˬ ve chaw hui yaꞈ kʼaw juˇ kʼai ve, hkiˬ tuꞈ keuˆ ve chaw hui daꞈ la kehˬ la ve, naˍ paw pawˇ ve chaw hui naˍ paw kaˇ la ve, suh ve chaw hui kʼawꞈ teꞈ tu la ve leh, haˍ ve gʼawˇ ve chaw hui htawˇ, ha lehˬ ve bon hkawˇ htaꞈ gʼa kaˇ ve yoˬ.”—Luˉkaꞈ 7:20-22.

Yoˇhanˬ chi hkʼe gʼa kaˇ htaˇ, awˬ gʼaˇ gʼa jaˇ ve yoˬ. Yeˍsuˆ Meˍsiˉyaꞈ htaꞈ caˉ daꞈ ve tcuh kaˍ paˍ tawˇ hkawˇ te biˇ la chehˇ ve tehꞈ hpeuꞈ maw piˇ ve yoˬ. Yeˍsuˆ Yoˇhanˬ htaꞈ htawnˍ hkʼaw lo maˇ gʼa hpehˇ piˇ ve htawˇ, Yoˇhanˬ ve awˬ vuiˬ awˬ hpfuhˇ cawˬ sheˍ ve yoˬ. Yawˇ tuꞈ hkanˍ ve laiˉ ceuˬ gʼa hpuˇ ve htawˇ ha lehˬ gʼa ve yoˬ.

Yoˇhanˬ hkʼa shuˍ, Yaˬhoˉvaˬ awˬ pon aˬ htoꞈ ma awˬ lawn a yeˇ uiˍ jaˇ ve htaꞈ ngaˬ hui hkʼaˬ htaˆ kaꞈ dawˇ nyi ve kʼo, yeunˇ hkanˍ gʼaˇ leh ha lehˬ gʼa ve yoˬ. (Kawˇlawˇsehˇ 1:9-11) Ngaˬ hui Liꞈ hpu gʼaw leh hkʼa dehꞈ dawˇ nyi ve kʼo, Gʼuiˬ sha htaꞈ te piˇ ve teˇ ceuˬ le le awˬ hpfuhˇ cawˬ ve tehꞈ tawnˇ gʼa ve yoˬ. (1 Kawˇrenˍhtuˆ 15:58) Shen˗daˇ kʼoˆ ve, “ngaˬ teˇ nyi le le Liꞈ hpu teˇ pfuhꞈ gʼaw ve lehˬ Yaˬhoˉvaˬ geh meuˆ daꞈ tuˬ ga laˇ ve yoˬ. Chi ngaˬ awˬ pon dawˇ nyi ve aꞈ kehˉ Yaˬhoˉvaˬ htaꞈ dawˇ nyi tuˬ ga laˇ ve yoˬ.” Chi hkʼoˆ kaꞈ, awˬ kaˍ awˬ nu ve awˬ ti lo Gʼuiˬ sha ve kanˉ hkʼaˇ hkʼaˬ hkʼe te chehˇ ve htaꞈ dawˇ nyi ve kʼo, ngaˬ hui gʼaˇ hpuˇ chehˇ ve awˬ ceuˬ htaꞈ maˇ dawˇ nyi˗o. Yaˬhoˉvaˬ te chehˇ ve awˬ ceuˬ htaꞈ dawˇ nyi gʼa ve yoˬ. Shen˗daˇ kʼoˆ sheˍ ve, “JW awˬ han tawˆ kuiˬ hkʼaw teˇ ha pa le le tawˆ ve awˬ lawn lehˬ Gʼuiˬ sha ve kanˉ hkaˇ htaꞈ meuˆ daꞈ tuˬ te laˇ leh, ngaˬ hui Gʼuiˬ sha ve kanˉ te ve hkʼaw ha lehˬ gʼa ve yoˬ.”

Baˆtiˆsaˬ piˇ paˍ Yoˇhanˬ lehˬ Gʼuiˬ sha ve kanˉ te ve awˬ yanˇ maˇ maw ve htawˇ, yawˇ “Eˇliˇyaꞈ ve nyi ma leh kanˇ paˆ cawˬ ve” hkʼe kanˉ hkʼa dehꞈ te ve yoˬ. (Luˉkaꞈ 1:17; Yaˍkoˆ 5:17) Ngaˬ hui yawˇ hkʼe gʼa ve awˬ vuiˬ htaꞈ hkʼaˬ htaˆ kaꞈ awˬ hpfuhˇ shiˍ leh Yaˬhoˉvaˬ awˬ pon aˬ htoꞈ ma awˬ lawn a yeˇ uiˍ jaˇ ve htaꞈ dawˇ nyi ve kʼo, ngaˬ hui aˬ htoꞈ ma gʼa hpuˇ ve htawˇ, ha lehˬ gʼa ve yoˬ.