1. Hpiˇliˇpiˆ venˇ lo Hkriꞈ yaˇ awˬ moˍ cawˬ la tuˬ a shu kaꞈ ga piˇ ve le?

 Tcuh yaˇ Pawˇluꞈ, Siˍlaˆ, Laˉkaꞈ leh Tiˆmoˉseˍ Roˉmaꞈ mvuhˇ miˬ Hpiˇiiˇpiˆ venˇ htaꞈ uˉ peunˍ kuiˬ lo gaˬ la htaˇ, oˇ kaˬ lo ve chaw laiˉ gʼaˇ nyi ma pfuhˇ leh daꞈ ve awˬ lawn sha tanˇ htaꞈ shiˍ gaˇ ve yoˬ. Awˬ viˉ awˬ nyi hawˉ hkʼaˆ chi 4 gʼaˇ Hkriꞈ yaˇ awˬ moˍ cawˬ tuˬ tanˬ ve, leh oˇ kaˬ lo ve awˬ viˉ awˬ nyi kaꞈ hpawnˬ daꞈ la ve yoˬ. Hkehˉ chaw htaꞈ haꞈ yuˬ puiˉ jaˇ ve awˬ viˉ awˬ nyi Luˍdiˇ ve aˉ hkʼaw lo yawˇ hui hpawnˬ daꞈ ve yoˬ.—Tcuh yaˇ 16:40.

2. Maˇ maw Hkriꞈ yaˇ awˬ moˍ shoꞈ shaꞈ ve aˬ htoꞈ ma gʼa hpuˇ ve le?

² Maˇ maw ve awˬ yanˇ, Hkriꞈ yaˇ awˬ moˍ awˬ suhˉ shoꞈ shaꞈ ve gʼa hpuˇ ve yoˬ. Pawˇluꞈ leh awˬ chawˇ bon maˇ gʼa maˍ tuˬ awˬ tehˬ ve htaꞈ maˇ dawˇ cawˇ ve chaw Saˍtanˍ awˬ gʼaˇ piˇ leh tawˍ tcuh ve yoˬ. Pawˇluꞈ leh Siˍlaˆ htaꞈ jawꞈ leh htawnˍ hkʼaw lo yuˬ keu piˇ ve yoˬ. Yawˇ huiˉ maˬ htaꞈ hpehˇ piˇ peuˬ hkʼawꞈ nawˉ, awˬ viˉ awˬ nyi geh ca guiˇ˗e leh awˬ gʼaˇ ca piˇ ve yoˬ. Peuˬ leh Pawˇluꞈ, Siˍlaˆ leh Tiˆmoˉseˍ Hpiˇiiˇpiˆ venˇ lo tawˆ kʼai ve yoˬ. Yaꞈ hkʼaˇ, Luˉkaꞈ oˇ kaˬ lo chehˇ sheˍ. Venˇ oˇ ve hkʼaw awˬ viˉ awˬ nyi hkʼaˬ hkʼe te tuˬ le? Yaˬhoˉvaˬ daꞈ kehˬ ve awˬ ha hpu htaꞈ cuˇ leh yawˇ hui htaꞈ ga piˇ ve pa taw, yawˇ hui nyi ma pfuhˇ ve hkʼaw Yaˬhoˉvaˬ ve kanˉ caˉ leh te ve yoˬ. (Hpiˇliˇpiˆ 2:12) Pawˇluꞈ yawˇ hui htaꞈ nyi hkʼaˇ suh jaˇ!

3. Hpiˇliˇpiˆ liꞈ 1:9-11 hkʼaw Pawˇluꞈ aˬ htoꞈ ma awˬ lawn bon lawˬ ve le?

³ Aˬ laˬ hkʼe 10 hkʼawꞈ hkʼe gaˬ leh, Pawˇluꞈ Hpiˇliˇpiˆ venˇ lo Hkriꞈ yaˇ awˬ moˍ htaꞈ liꞈ bvuhꞈ feu piˇ ve yoˬ. Nawˬ liꞈ chi gʼaw htaˇ, Pawˇluꞈ awˬ viˉ awˬ nyi htaꞈ hkʼaˬ hkʼe taw haꞈ ve gʼa mawˬ ve yoˬ. Pawˇluꞈ kʼoˆ ve, ‘Yeˍsuˆ Hkriꞈ haꞈ pehnˇ ve hkʼaw ngaˬ nawˬ hui hkʼa peu˗eˬ htaꞈ dawˇ nawˇ jaˇ.’ (Hpiˇliˇpiˆ 1:8) Pawˇluꞈ awˬ viˉ awˬ nyi htaꞈ liꞈ bvuhꞈ piˇ  ve hkʼaw kʼoˆ ve ngaˬ nawˬ hui awˬ pon bon lawˬ ve yoˬ. Awˬ viˉ awˬ nyi shaˬ te shaˬ haꞈ daꞈ tuˬ, aˬ htoꞈ ma a yeˇ uiˍ ve hkʼa biˇ te gʼa tuˬ, shu ve yonˍ hkʼaˇ htaꞈ maˇ gʼa tawˍ piˇ tuˬ leh awˬ viˉ awˬ nyi hkʼaˬ htaˆ kaꞈ daꞈ ve tiˉ te daꞈ tuˬ Yaˬhoˉvaˬ ga piˇ tuˬ ngaˬ lawˬ ve yoˬ. Pawˇluꞈ kʼoˆ ve tawˇ htaꞈ nawˬ kaꞈ awˬ gʼaˇ gʼa ve yoˬ. Pawˇluꞈ Hpiˇliˇpiˆ venˇ lo awˬ viˉ awˬ nyi htaꞈ liꞈ bvuhꞈ piˇ ve gʼaw nyi sheˍ. (Hpiˇliˇpiˆ 1:9-11 gʼaw sheˍ.) Peuˬ leh Pawˇluꞈ kʼoˆ ve teˇ hpaˍ htaꞈ hkʼaˬ hkʼe yuˬ yehˇ gʼa ve teˇ geh henˇ tuˬ yoˬ.

4. (a) 1 Yoˇhanˬ liꞈ 4:9, 10 hkʼaw kʼoˆ taˍ ve hkʼe, Yaˬhoˉvaˬ ngaˬ hui htaꞈ haꞈ ve hkʼaˬ hkʼe hpeuꞈ maw laˇ ve le? (b) Ngaˬ hui yawˇ htaꞈ hkʼaˬ hkʼe taw haꞈ cawˇ ve le?

⁴ Ngaˬ hui ve venˇ baˆ htaꞈ hpehˇ hkʼa laˇ tuˬ yawˇ ve Yaˇ paˍ miˬ guiˬ hkʼoˆ lo peu laˇ ve chi Yaˬhoˉvaˬ haꞈ pehnˇ uiˍ jaˇ ve tehꞈ hpeuꞈ maw laˇ ve yoˬ. (1 Yoˇhanˬ 4:9, 10 gʼaw sheˍ.) Haꞈ pehnˇ ve chi ngaˬ hui yawˇ htaꞈ haꞈ tuˬ te laˇ ve yoˬ. (Roˉmaꞈ 5:8) Ngaˬ hui Gʼuiˬ sha htaꞈ hkʼaˬ hkʼe taw haꞈ cawˇ ve le? Yeˍsuˆ Hpaˍriˍseˇ teˇ gʼaˇ htaꞈ kʼoˆ piˇ ve, ‘nawˬ ve nyi ma hkʼa peu˗eˬ, nawˬ ve co ha hkʼa peu˗eˬ leh nawˬ ve dawˇ hkʼaˇ hkʼa peu˗eˬ [Yaˬhoˉvaˬ] htaꞈ gʼa haꞈ ve yoˬ’ tehꞈ ngaˬ hui na gʼa tuˬ ga laˇ ve yoˬ. (Maꞈhtehˍ 22:36, 37) Ngaˬ hui nyi ma hkʼa peu˗eˬ yawˇ htaꞈ haꞈ leh teˇ nyi le le haꞈ gaˇ ve yoˬ. Pawˇluꞈ Hpiˇliˇpiˆ venˇ awˬ viˉ awˬ nyi htaꞈ kʼoˆ piˇ ve, “haꞈ pehnˇ ve teˇ ceuˬ shaˬ te shaˬ uiˍ la maˇ la tuˬ ” te˗o. Ngaˬ hui ve Gʼuiˬ sha htaꞈ shaˬ te shaˬ haꞈ maˇ la tuˬ hkʼaˬ hkʼe te cawˇ ve le?

5. Ngaˬ hui haꞈ ve hkʼaˬ hkʼe te cawˬ maˇ la gʼa tuˬ le?

⁵ Ngaˬ hui Gʼuiˬ sha htaꞈ haꞈ gʼa tuˬ yawˇ htaꞈ gʼa shiˍ daꞈ ve yoˬ. Liꞈ hpu hkʼaw kʼoˆ ve, “maˇ haꞈ puiˉ ve chaw lehˬ, Gʼuiˬ sha htaꞈ maˇ shiˍ. Awˬ lawn kʼo, Gʼuiˬ sha lehˬ haꞈ pehnˇ ve teˇ ceuˬ hpehꞈ ve yoˬ.” (1 Yoˇhanˬ 4:8) Tcuh yaˇ Pawˇluꞈ kʼoˆ ve, “daꞈ ve awˬ ceuˬ htaꞈ shiˍ puiˉ tuˬ, cuˇ yiˍ maˍ yiˍ teˇ ceuˬ” ngaˬ hui cawˬ ve kʼo Gʼuiˬ sha htaꞈ haꞈ maˇ la tuˬ yoˬ. (Hpiˇliˇpiˆ 1:9) Ngaˬ hui Liꞈ hpu tanˬ henˇ htaˇ, Gʼuiˬ sha htaꞈ hkʼa dehꞈ maˇ shiˍ sheˍ ve htawˇ yawˇ htaꞈ haꞈ ve yoˬ. Yaꞈ hkʼaˇ, yawˇ htaꞈ hkʼa dehꞈ shiˍ ve kʼo, gʼaˇ hteꞈ kʼawꞈ haꞈ ve yoˬ. Chi htaꞈ pa taw teˇ nyi le le Liꞈ hpu gʼaw leh hkʼa dehꞈ dawˇ nyi ve ngaˬ hui awˬ pon a yeˇ uiˍ jaˇ!—Hpiˇliˇpiˆ 2:16.

6. 1 Yoˇhanˬ liꞈ 4:11, 20, 21 hkʼaw kʼoˆ taˍ ve hkʼe, ngaˬ hui a shu htaꞈ kaꞈ gʼa haꞈ sheˍ ve le?

⁶ Yaˬhoˉvaˬ ngaˬ hui htaꞈ haꞈ ve chi, awˬ viˉ awˬ nyi htaꞈ haꞈ tuˬ te laˇ ve yoˬ. (1 Yoˇhanˬ 4:11, 20, 21 gʼaw sheˍ.) Ngaˬ hui Yaˬhoˉvaˬ htaꞈ oˉ kʼoˍ pui leh yawˇ ve te hkʼaˇ dawˇ hkʼaˇ daꞈ ve htaꞈ henˇ yuˬ ve pa taw, awˬ viˉ awˬ nyi htaꞈ haꞈ tuˬ sha ve tehꞈ dawˇ ve yoˬ. Chi hkʼoˆ kaꞈ Yeˍsuˆ ve a shaꞈ ngaˬ hui awˬ pon tanˇ laˇ ve haꞈ pehnˇ uiˍ jaˇ ve htaꞈ henˇ yuˬ gaˇ ve yoˬ. Yaꞈ hkʼaˇ teˇ pawˆ pawˆ kʼo, ngaˬ hui htaꞈ haꞈ daꞈ kʼoˆ laˇ ve chi gʼaꞈ te tuˬ maˇ sha. Hpiˇliˇpiˆ venˇ lo awˬ viˉ awˬ nyi ve awˬ lawn htaꞈ dawˇ nyi sheˍ.

7. Pawˇluꞈ Eˇvawˇdiˆ leh Suˇtuˆ htaꞈ beˆ maˍ piˇ ve chi ngaˬ hui htaꞈ hkʼaˬ hkʼe maˍ laˇ ve le?

⁷ Eˇvawˇdiˆ leh Suˇtuˆ nyi ma pfuhˇ jaˇ leh tcuh yaˇ Pawˇluꞈ “geh kanˉ te” ve yoˬ. Yaꞈ hkʼaˇ, yawˇ huiˉ maˬ diˇ daꞈ leh awˬ chawˇ maˇ te daꞈ˗o. Pawˇluꞈ Hpiˇliˇpiˆ venˇ hkʼaw liꞈ bvuhꞈ feu piˇ htaˇ yawˇ huiˉ maˬ kaꞈ oˇ kaˬ lo ve Hkriꞈ yaˇ awˬ moˍ hkʼaw chehˇ leh Pawˇluꞈ Eˇvawˇdiˆ leh Suˇtuˆ ve awˬ meh kaꞈ kʼoˆ leh “nyi ma hawˍ daꞈ la tuˬ” shaˍ tiꞈ piˇ ve yoˬ. (Hpiˇliˇpiˆ 4:2, 3) Pawˇluꞈ Hkriꞈ yaˇ awˬ moˍ hkʼa peu˗eˬ ve htaꞈ kaꞈ gʼa beˆ maˍ piˇ ve tehꞈ shiˍ leh “nawˬ hui hkʼa te ve hkʼa peu˗eˬ awˬ hkʼaw lo, hkʼanˇ ve leh tawˇ kʼawꞈ shaˬ ve teˇ ceuˬ taˇ te” tehꞈ kʼoˆ piˇ ve yoˬ. (Hpiˇliˇpiˆ 2:14) Pawˇluꞈ beˆ maˍ piˇ ve chi awˬ viˉ awˬ nyi yaˇ miˇ chi 2 gʼaˇ htaꞈ ga piˇ leh Hkriꞈ yaˇ awˬ moˍ kaꞈ shaˬ te shaˬ haꞈ daꞈ maˇ la tuˬ ga piˇ ve yoˬ.

8. Awˬ viˉ awˬ nyi htaꞈ maˇ haꞈ tuˬ aˬ htoꞈ ma te laˇ ve le? Ngaˬ hui dawˇ hkʼaˇ chi hkʼe ve htaꞈ tawˍ daꞈ gʼaˇ tuˬ aˬ htoꞈ ma ga laˇ ve le?

 ⁸ Eˇvawˇdiˆ leh Suˇtuˆ hkʼe, awˬ viˉ awˬ nyi ve yaꞈ kuiˬ htaꞈ nyi ve pa taw, teˇ pawˆ pawˆ kʼo yawˇ hui htaꞈ haꞈ tuˬ haˍ jaˇ. Yaꞈ hkʼaˇ, ngaˬ hui teˇ nyi le le te yaꞈ ve yoˬ. Ngaˬ hui shu ve yaꞈ kuiˬ htaꞈ tiˉ nyi ve kʼo, yawˇ hui htaꞈ haꞈ tuˬ haˍ jaˇ. Tawˇ pa haˉ te kʼo, awˬ viˉ awˬ nyi teˇ gʼaˇ hpawnˬ daꞈ kuiˬ hkʼaw daꞈ kehˬ tuˬ maˇ gʼa te laˇ ve kʼo, ngaˬ hui nyi ma maˇ sha. Awˬ viˉ awˬ nyi oˇ ve teˇ gʼaˇ te yaꞈ jaw ve htaꞈ ngaˬ hui kʼawꞈ dawˇ nyi ve kʼo, nyi ma maˇ sha leh yawˇ htaꞈ haꞈ tuˬ haˍ jaˇ. Nawˬ chi hkʼe gʼa hpuˇ htaˇ, chi htaꞈ dawˇ nyi sheˍ. Ngaˬ hui leh awˬ viˉ awˬ nyi te yaꞈ ve htaꞈ Yaˬhoˉvaˬ mawˬ ve yoˬ. Yaꞈ hkʼaˇ, Yaˬhoˉvaˬ ngaˬ hui leh awˬ viˉ awˬ nyi htaꞈ kaꞈ haꞈ ve yoˬ. Chi htaꞈ pa taw, ngaˬ hui Yaˬhoˉvaˬ htaꞈ henˇ yuˬ leh awˬ viˉ awˬ nyi htaꞈ daꞈ ve hpawˇ hkʼaˬ htaˆ kaꞈ nyi sheˍ. Ngaˬ hui awˬ viˉ awˬ nyi htaꞈ haꞈ tuˬ coˇ caˇ htaˇ, nyi ma dawˇ hkʼaˇ taˍ hkʼaˇ teˇ hkʼaˇ tiˉ cawˬ la ve yoˬ.—Hpiˇliˇpiˆ 2:1, 2.

9. Pawˇluꞈ Hpiˇliˇpiˆ Hkriꞈ yaˇ awˬ moˍ htaꞈ liꞈ bvuhꞈ piˇ ve hkʼaw “a yeˇ uiˍ ve” aˬ htoꞈ ma kaꞈ cawˬ ve le?

⁹ Daꞈ kehˬ ve awˬ ha hpu Pawˇluꞈ htaꞈ dawˇ pawnˍ piˇ leh Hpiˇliˇpiˆ Hkriꞈ yaˇ awˬ moˍ htaꞈ kʼoˆ piˇ ve, “aˬ htoꞈ ma a yeˇ uiˍ ve gʼa shiˍ cawˇ ve yoˬ.” (Hpiˇliˇpiˆ 1:10, MGS.) Yaˬhoˉvaˬ ve awˬ meh htaꞈ hkʼaˬ htaˆ kaꞈ yawˆ yan tuˬ, yawˇ ve a loˍ awˬ tehˬ biˇ la tuˬ te piˇ ve, leh Hkriꞈ yaˇ awˬ moˍ hkʼaw dawˇ sha gawˬ lehˍ ve cawˬ leh teˇ moˍ tiˉ hpehꞈ ve chi teˇ kaꞈ yawˇ kʼoˆ taˍ ve a yeˇ uiˍ jaˇ ve htaꞈ caˉ daꞈ ve yoˬ. (Maꞈhtehˍ 6:9, 10; Yoˇhanˬ 13:35) Chi ngaˬ hui a shaꞈ teꞈ kuiˬ hkʼaw a yeˇ uiˍ jaˇ tehꞈ shawˍ ve kʼo, Yaˬhoˉvaˬ htaꞈ haꞈ ve tehꞈ hpeuꞈ maw piˇ ve yoˬ.

10. Ngaˬ hui hkʼa biˇ te gʼa ve tehꞈ Yaˬhoˉvaˬ shawˍ laˇ tuˬ aˬ htoꞈ ma gʼa te ve le?

¹⁰ Chi hkʼoˆ kaꞈ Pawˇluꞈ kʼawꞈ kʼoˆ ve, ngaˬ hui “hkʼa biˇ” gʼa te cawˇ ve yoˬ. Chi ngaˬ hui biˇ ve chaw gʼa hpehꞈ cawˇ ve tehꞈ kʼoˆ gaˇ ve maˇ heˆ. Ngaˬ hui Yaˬhoˉvaˬ htaꞈ tehˆ maˇ gʼa. Yaꞈ hkʼaˇ, ngaˬ hui te gʼa ve hkʼe te ve kʼo, haꞈ pehnˇ ve shaˬ te shaˬ cawˬ ve, aˬ htoꞈ ma a yeˇ uiˍ ve shiˍ cawˇ ve tehꞈ hpeuꞈ maw piˇ ve kʼo, Gʼuiˬ sha ngaˬ hui htaꞈ hkʼa biˇ te gʼa ve tehꞈ shawˍ laˇ tuˬ yoˬ. Haꞈ pehnˇ ve teˇ ceuˬ hpeuꞈ maw piˇ gʼa ve lehˬ, shu ve yonˍ hkʼaˇ hkui htiˆ poˬ tuˬ maˇ gʼa te piˇ.

11. Aˬ htoꞈ ma te ngaˬ hui shu ve yonˍ hkʼaˇ hkui htiˇ poˬ tuˬ maˇ te piˇ cawˇ ve le?

¹¹ Pawˇluꞈ ngaˬ hui htaꞈ shaˍ tiꞈ peꞈ laˇ ve, shu ve yonˍ hkʼaˇ hkui htiˇ poˬ tuˬ maˇ gʼa te piˇ. Chi hkʼaˬ hkʼe te gʼa tuˬ hehˉ le? Ngaˬ hui leuˆ ve awˬ ceuˬ lehˬ shu ve yonˍ hkʼaˇ hkui htiˇ poˬ tuˬ te piˇ la ve yoˬ. Ngaˬ hui gʼaˇ jehˇ htaˇ, veuꞈ kʼaˇ leh kanˉ te tuˬ leuˆ htaˇ chi teˇ hpaˍ yoˬ. Ngaˬ hui leuˆ ve awˬ ceuˬ maˇ yaꞈ tehꞈ dawˇ ve kaꞈ awˬ viˉ awˬ nyi nyi ma maˇ sha tuˬ te piˇ ve kʼo, yawˇ ve yonˍ hkʼaˇ hkui htiˇ poˬ tuˬ te piˇ la ve yoˬ hehˉ. Chi lehˬ venˇ baˆ uiˍ jaˇ. Yeˍsuˆ kʼoˆ ve, ngaˬ hui shu ve yonˍ hkʼaˇ hkui htiˇ poˬ tuˬ te piˇ ve kʼo, kʼawˍ peˍ htaꞈ haˉ pui mawˍ lonˉ hpeh kʼu leh naˉ jaˇ ve laˇ tsuhˇ gʼuiˬ hkʼaw baˬ keu ve lehˬ daꞈ leuˉ ve yoˬ!—Maꞈhtehˍ 18:6.

12. Gʼuˇ suhˍ peuˍ ve chaw teˇ ca ve awˬ lawn ngaˬ hui htaꞈ aˬ htoꞈ ma maˍ laˇ ve le?

¹² Gʼuˇ suhˍ peuˍ ve chaw teˇ ca ve awˬ lawn, Yeˍsuˆ beˆ maˍ piˇ ve htaꞈ hkʼaˬ hkʼe yuˬ yehˇ ve teˇ geh chaˬ nyi sheˍ. Yawˇ hui Hkriꞈ yaˇ awˬ moˍ hkʼaw Baˆtiˆsaˬ haꞈ yuˬ gehˇ sheˍ ve teˇ ca geh Gʼuiˬ sha ve kanˉ teˇ geh te ve yoˬ. Awˬ viˉ awˬ nyi chi teˇ ca yaˇ nehˬ htaˇ awˬ pa awˬ e laiˉ ceuˬ maˇ te tcuh. Hkriꞈ yaˇ lehˬ awˬ han lonˉ nyi kuiˬ lo daꞈ ve awˬ han hpehꞈ ve htawˇ, maˇ nyi cawˇ tehꞈ yawˇ hui yonˍ ve yoˬ. Gʼuˇ suhˍ peuˍ ve chaw teˇ ca awˬ han lonˉ ca nyi˗e ve tehꞈ yawˇ hui shiˍ htaˇ cheˆ˗ehꞈ kʼai ve yoˬ. Chi gʼuˇ suhˍ peuˍ ve chaw shiˍ htaˇ maˇ kʼawꞈ ca  nyi˗o. Awˬ viˉ awˬ nyi chi 2 gʼaˇ dawˇ shiˍ puiˉ ve nyi ma keunˍ daꞈ cawˇ daꞈ ve cawˬ htaˇ hehꞈ, ca kʼawꞈ nyi tehꞈ dawˇ ve yoˬ. (Heˍbrehˇ 5:14) Gʼuˇ suhˍ peuˍ ve chaw teˇ ca awˬ viˉ awˬ nyi htaꞈ haꞈ ve tehꞈ kʼoˆ ve ceh maˇ heˆ te ve hkʼaw hpeuꞈ maw piˇ ve yoˬ.—Roˉmaꞈ 14:19-21; 1 Yoˇhanˬ 3:18.

13. Ngaˬ hui shu hkui htiˇ poˬ tuˬ hkʼaˬ hkʼe te piˇ la ve le?

¹³ Ngaˬ hui shu ve yonˍ hkʼaˇ hkui htiˇ poˬ tuˬ te piˇ gʼa ve teˇ ceuˬ lehˬ shu yaꞈ kʼai tuˬ te piˇ ve yoˬ hehˉ. Chi hkʼaˬ hkʼe hpehꞈ la gʼa ve le? Awˬ lawn chi htaꞈ dawˇ nyi sheˍ. Liꞈ hpu henˇ ve chaw teˇ gʼaˇ tzuhˬ yeꞈ caˆ jaw leh yawˇ jehˇ tuˬ coˇ caˇ peuˬ hkʼawꞈ nawˉ tzuhˬ maˇ dawˬ˗o. Peuˬ hkʼawꞈ nawˉ Liꞈ hpu henˇ ve chaw chi teˇ gʼaˇ co ha hpawˇ uiˍ la mvuh la leh Baˆtiˆsaˬ haꞈ yuˬ ve yoˬ. Peuˬ leh awˬ viˉ awˬ nyi hawˉ hkʼaˆ teˇ gʼaˇ aˉ hkʼaw lo awˍ caˇ la tuˬ jehˬ piˇ leh yawˇ htaꞈ tzuhˬ yuˬ piˇ leh kʼoˆ ve, “chi teˇ hkui nawˬ Baˆtiˆsaˬ haꞈ yuˬ˗oˬ leh Yaˬhoˉvaˬ ve daꞈ kehˬ ve awˬ ha hpu nawˬ geh cawˬ˗oˬ. Daꞈ kehˬ ve awˬ ha hpu hkʼaw cawˬ ve teˇ ceuˬ lehˬ a shu yawˇ awˬ to htaꞈ gʼaˇ puiˉ ve yoˬ. Nawˬ awˬ to htaꞈ yuˬ tiˍ gʼaˇ ve kʼo, a ciˉ dawˬ hpehꞈ ve mehˬ.” Beˆ maˍ hkawˇ chi awˬ viˉ awˬ nyi awˬ suhˉ na leh maˇ daꞈ ve hpawˇ yuˬ yehˇ ve kʼo, hkʼaˬ hkʼe hpehꞈ la tuˬ ve dawˇ nyi sheˍ.

14. Hpiˇliˇpiˆ liꞈ 1:10 hkʼaw gʼaꞈ te tuˬ hpawnˬ daꞈ ve hkʼaw ngaˬ hui htaꞈ aˬ htoꞈ ma maˍ laˇ ve le?

¹⁴ Hpiˇliˇpiˆ liꞈ 1:10 hpawnˬ daꞈ ve hkʼaw ngaˬ hui laiˉ ceuˬ yuˬ yehˇ gʼa ve maˍ laˇ ve yoˬ. Awˉ lawˉ teˇ ceuˬ lehˬ, Yaˬhoˉvaˬ a yeˇ uiˍ jaˇ tehꞈ shawˍ ve awˬ ceuˬ hpawnˬ daꞈ kuiˬ hkʼaw ngaˬ hui htaꞈ maˍ laˇ ve yoˬ. Nyiˇ ceuˬ teˇ ceuˬ lehˬ, “hkʼa biˇ” te gʼa tuˬ leh yuˬ yehˇ gʼa tuˬ kaꞈ hpawnˬ daꞈ kuiˬ hkʼaw ngaˬ hui htaꞈ maˍ laˇ ve yoˬ. Shehˆ ceuˬ teˇ ceuˬ lehˬ, ngaˬ  hui awˬ gʼaˇ gʼa leh ‘haꞈ pehnˇ ve leh daꞈ ve te˗a veuˬ.’ (Heˍbrehˇ 10:24, 25) Ngaˬ hui awˬ viˉ awˬ nyi geh awˬ gʼaˇ gʼa ve kʼo, Gʼuiˬ sha leh awˬ viˉ awˬ nyi htaꞈ haꞈ maˇ la ve yoˬ. Ngaˬ hui Gʼuiˬ sha leh awˬ viˉ awˬ nyi htaꞈ nyi ma awˬ tawˬ hkʼa gaˬ haꞈ htaˇ, shu ve yonˍ hkʼaˇ hkui htiˇ maˇ gʼa poˬ tuˬ ngaˬ hui te gʼa ve hkʼe teˇ ceuˬ le le te tuˬ yoˬ.

15. “Hteˇ ve cawˇ ve awˬ shiˍ hkʼa biˇ” cawˬ ve aˬ htoꞈ ma htaꞈ kʼoˆ gaˇ ve le?

¹⁵ Hpiˇliˇpiˆ venˇ awˬ viˉ awˬ nyi ‘hteˇ ve cawˇ ve awˬ shiˍ hkʼa biˇ’ cawˬ tuˬ Pawˇluꞈ hkʼaˬ htaˆ kaꞈ bon lawˬ ve yoˬ. (Hpiˇliˇpiˆ 1:11) “Hteˇ ve cawˇ ve awˬ shiˍ” lehˬ yawˇ hui Yaˬhoˉvaˬ htaꞈ haꞈ leh awˬ viˉ awˬ nyi htaꞈ haꞈ ve kaꞈ caˉ daꞈ ve yoˬ. Chi hkʼoˆ kaꞈ Yeˍsuˆ ve awˬ lawn leh daꞈ jaˇ ve dawˇ law kuiˬ shu htaꞈ kʼoˆ piˇ ve kaꞈ caˉ daꞈ ve yoˬ. Hpiˇliˇpiˆ liꞈ 2:15 hkʼaw Pawˇluꞈ teˇ ceuˬ htaꞈ kʼawꞈ tehˆ sheˍ. “Awˬ gʼeuˆ ba ve hkʼe miˬ guiˬ hkʼoˆ lo chaw chi teˇ co htaꞈ nawˬ hui ba piˇ chehˇ ve” tehꞈ yawˇ kʼoˆ gaˇ ve yoˬ. Yeˍsuˆ yawˇ ve awˬ laꞈ gʼawˇ lehˬ “miˬ guiˬ ve awˬ gʼeuˆ hpehꞈ ve” pa taw, yawˇ chi hkʼe tehˆ ve lehˬ keunˍ jaˇ. (Maꞈhtehˍ 5:14-16) Chi hkʼoˆ kaꞈ Yeˍsuˆ yawˇ ve awˬ laꞈ gʼawˇ htaꞈ kʼoˆ piˇ ve, “chaw ceuˬ hkʼa peu˗eˬ ngaˬ ve awˬ laꞈ gʼawˇ hpehꞈ la tuˬ ca te˗o.” Leh “mvuhˇ leh miˬ leh hkʼa gaˬ, nawˬ hui ngaˬ ve shaˉ hkiˆ hkanˍ shehˍ hpaˇ gʼa hpehꞈ tuˬ yoˬ.” (Maꞈhtehˍ 28:18-20; Tcuh yaˇ 1:8) Kanˉ chi ve ngaˬ hui nyi ma awˬ tawˬ hkʼa gaˬ te ve kʼo, “hteˇ ve cawˇ ve awˬ shiˍ” cawˬ tuˬ yoˬ.

16. Hpiˇliˇpiˆ liꞈ 1:12-14 hkʼaw ngaˬ hui tuꞈ ve hkanˍ ve gʼa hpuˇ ve htawˇ “awˬ gʼeuˆ ba” gʼa ve tehꞈ hkʼaˬ hkʼe te hpeuꞈ maw piˇ gʼa ve le? (Awˬ htaꞈ hpawˇ ve awˬ han htaꞈ nyi sheˍ.)

¹⁶ Ngaˬ hui chehˇ ve awˬ tcuhˉ awˬ yanˇ hkʼaˬ hkʼe hpehꞈ ve htawˇ, awˬ gʼeuˆ ba piˇ gʼa ve yoˬ. Teˇ pawˆ pawˆ kʼo ngaˬ hui hto toˇ ve chi shu hkui htiˇ poˬ tuˬ hkʼe hpehꞈ ve htawˇ, ngaˬ hui hto toˇ gaˇ tuˬ te laˇ ve yoˬ. Tcuh yaˇ Pawˇluꞈ Hpiˇliˇpiˆ venˇ lo awˬ viˉ awˬ nyi htaꞈ liꞈ bvuhꞈ piˇ htaˇ, Roˉmaꞈ venˇ aˉ hkʼaw lo haw tiˍ taˍ ve yoˬ. Pawˇluꞈ sho caˆ keu taˍ piˇ ve  htawˇ, htawnˍ nyi haꞈ shaˉ paˍ leh yawˇ geh ca guiˇ la ve chaw htaꞈ bon maˍ piˇ ve yoˬ. Chi hkʼe gʼa hpuˇ ve htawˇ, Pawˇluꞈ nyi ma pfuhˇ ve hkʼaw bon maˍ ve yoˬ. Hkʼe te leh awˬ viˉ awˬ nyi co ha hpawˇ uiˍ la mvuh la tuˬ te piˇ leh ‘nyi ma haꞈ hanˉ ve hkʼaw Gʼuiˬ sha ve tawˇ hkawˇ maˍ piˇ tuˬ yawˇ hui maˇ kawˆ.’—Hpiˇliˇpiˆ 1:12-14 gʼaw sheˍ, Hpiˇliˇpiˆ 4:22.

17. Chi teˇ hkui ve awˬ viˉ awˬ nyi tuꞈ hkanˍ ve hkʼaw gʼa chehˇ ve htawˇ, “hteˇ ve cawˇ ve awˬ shiˍ” cawˬ leh hto toˇ gʼa ve awˬ lawn kʼoˆ maˍ laˇ sheˍ.

¹⁷ Awˬ viˉ awˬ nyi laiˉ gʼaˇ Pawˇluꞈ hkʼe haꞈ hanˉ jaˇ. Yawˇ hui ve mvuhˇ miˬ lo teˇ yehˬ peuˬ teˇ yehˬ hto toˇ tuˬ a hkaw˗anˬ maˇ gʼa ve htawˇ, hto toˇ gʼa tuˬ awˬ hkʼaˇ kʼawꞈ ca ve yoˬ. (Maꞈhtehˍ 10:16-20) Mvuhˇ miˬ teˇ peˆ hkʼaw chi hkʼe gʼa hpuˇ htaˇ, hto toˇ ve chaw a shu yawˇ “chehˇ kuiˬ” lo ceh hto toˇ tehꞈ toˇ nyi shehˍ hpaˇ beˆ maˍ piˇ ve yoˬ. A shu yawˇ ve awˬ viˉ awˬ nyi, awˬ chawˇ, liꞈ teˇ geh henˇ ve chaw, kanˉ teˇ geh te ve chaw, leh shiˍ daꞈ ve chaw teˇ hpaˍ htaꞈ hto maˍ piˇ sheˍ. Ponˬ kʼai ve 2 hkʼawꞈ gaˬ leh Hkriꞈ yaˇ awˬ moˍ kʼawꞈ maˇ la ve yoˬ. Ngaˬ hui hto toˇ tuˬ a hkaw˗anˬ maˇ gʼa ve mvuhˇ miˬ hkʼaw maˇ gʼa chehˇ ve htawˇ, awˬ viˉ awˬ nyi hto toˇ tuˬ awˬ hkʼaˇ shiˍ ve chi ngaˬ hui htaꞈ maˍ laˇ ve yoˬ. Chi htaꞈ pa taw, nawˬ hto toˇ gʼa tuˬ awˬ hkʼaˇ ca sheˍ. Nawˬ chi hkʼe te ve kʼo tuꞈ hkanˍ ve awˬ yanˇ hkʼaw chehˇ ve htawˇ, Yaˬhoˉvaˬ ga laˇ leh nawˬ caˉ leh hto toˇ gʼa tuˬ tehꞈ yonˍ gʼa ve yoˬ.—Hpiˇliˇpiˆ 2:13.

18. Ngaˬ hui aˬ htoꞈ ma te tuˬ dawˇ teh taˍ ve le?

¹⁸ Pawˇluꞈ htaꞈ dawˇ pawnˍ piˇ leh Hpiˇliˇpiˆ venˇ awˬ viˉ awˬ nyi htaꞈ liꞈ bvuhꞈ piˇ taˍ ve beˆ maˍ piˇ hkawˇ, chi teˇ hkui ngaˬ hui hkʼa dehꞈ na yuˬ cawˇ ve yoˬ. Daꞈ ve kehˬ ve nyi ma cawˬ ve lehˬ aˬ htoꞈ ma a yeˇ uiˍ ve shiˍ cawˇ ve, hkʼa biˇ te gʼa ve chaw hpehꞈ cawˇ ve, shu ve yonˍ hkʼaˇ hkui htiˇ poˬ tuˬ maˇ gʼa te ve yoˬ. Ngaˬ hui haꞈ pehnˇ ve shaˬ te shaˬ cawˬ leh Awˬ pa Yaˬhoˉvaˬ awˬ meꞈ awˬ hponˇ gʼa tuˬ te sheˍ.