1. Yehˬ kʼa hkʼaw ve chaw leh awˬ viˉ awˬ nyi htaꞈ aˬ htoꞈ ma te tcuh gaˇ ve le?

 Hpaw˗le * kʼoˆ ve, “ngaˬ Liꞈ hpu tanˬ henˇ htaˇ, ngaˬ ve yehˬ kʼa teˇ geh miˬ guiˬ awˬ suhˉ hkʼaw loꞈ˗e tcuh gaˇ ve yoˬ. Ngaˬ geh Yaˬhoˉvaˬ htaꞈ oˉ kʼoˍ pui tcuh gaˇ jaˇ ve lehˬ ngaˬ hpawˇ leh ngaˬ yaˇ paˍ yoˬ.” Nawˬ ve yehˬ kʼa hkʼaw ve chaw leh awˬ viˉ awˬ nyi Yaˬhoˉvaˬ htaꞈ maˇ shiˍ sheˍ ve cawˬ˗aw laˇ? Nawˬ kaꞈ Hpaw˗le hkʼa shuˍ yehˬ kʼa hkʼaw ve chaw geh Yaˬhoˉvaˬ htaꞈ oˉ kʼoˍ pui gaˇ ve yoˬ.

2. Chi ve hkʼaw aˬ htoꞈ ma na hkawˇ htaꞈ henˇ tuˬ le?

² Yehˬ kʼa hkʼaw ve chaw leh awˬ viˉ awˬ nyi daꞈ ve awˬ lawn sha tanˇ na leh co co taiˍ taiˍ ve a shaꞈ gʼa tuˬ ngaˬ hui nyiˉ piˇ maˇ gʼa. Yaꞈ hkʼaˇ, Liꞈ hpu hkʼaw na yuˬ leh dawˇ nyi tuˬ ga piˇ gʼa ve yoˬ. (2 Tiˆmoˉseˍ 3:14, 15) Aˬ htoꞈ ma te yehˬ kʼa hkʼaw ve chaw leh awˬ viˉ awˬ nyi htaꞈ hto maˍ piˇ cawˇ ve le? Aˬ htoꞈ ma te yawˇ hui ve dawˇ hkʼaˇ htaꞈ a yeˇ yuˬ piˇ cawˇ ve le? Yawˇ hui ngaˬ hui hkʼe Yaˬhoˉvaˬ htaꞈ haꞈ tuˬ aˬ htoꞈ ma ga piˇ gʼa ve le? Hkriꞈ yaˇ awˬ moˍ hkʼaw ve chaw ngaˬ hui htaꞈ hkʼaˬ hkʼe ga laˇ gʼa tuˬ le? Chi ve hkʼaw henˇ tuˬ yoˬ.

3. 2 Peˍtruˆ liꞈ 3:9 hkʼaw kʼoˆ taˍ ve hkʼe, aˬ htoꞈ ma te yehˬ kʼa hkʼaw ve chaw leh awˬ viˉ awˬ nyi htaꞈ hto maˍ piˇ cawˇ ve le?

³ Maˇ maw kʼo, Yaˬhoˉvaˬ miˬ guiˬ chi peuˬ˗e tcuh tuˬ yoˬ. Awˬ tehˬ ve htaꞈ haꞈ yuˬ ve chaw tiˉ gʼa ponˬ tuˬ yoˬ. (Tcuh yaˇ 13:48) Maˇ shiˍ daꞈ ve chaw htaꞈ hto maˍ piˇ tuˬ, awˬ yanˇ leh awˬ gʼaˇ yehˇ maˇ jaˇ.  Hkʼe te leh yehˬ kʼa hkʼaw ve chaw leh awˬ viˉ awˬ nyi Yaˬhoˉvaˬ htaꞈ oˉ kʼoˍ pui la tuˬ ngaˬ hui ga piˇ gaˇ ve yoˬ. Haꞈ pehnˇ uiˍ ve Awˬ pa Yaˬhoˉvaˬ lehˬ “chaw hkʼa peu˗eˬ venˇ baˆ htaꞈ dawˇ hpfuhˆ leh teˇ gʼaˇ kaꞈ maˇ gʼa luˬ kʼai tuˬ yawˇ heuˆ gaˇ” ve yoˬ.—2 Peˍtruˆ 3:9 gʼaw sheˍ.

4. Yehˬ kʼa hkʼaw ve chaw leh awˬ viˉ awˬ nyi geh hto maˍ piˇ htaˇ, hkʼaˬ hkʼe kʼoˆ yaꞈ la gʼa ve le?

⁴ Shu gʼa ponˬ tuˬ ngaˬ hui hto maˍ piˇ htaˇ, daꞈ ve leh maˇ daꞈ ve kaꞈ cawˬ ve tehꞈ tawnˇ taˍ cawˇ ve yoˬ. Maˇ shiˍ daꞈ ve chaw geh hto maˍ piˇ htaˇ shaˍ tiꞈ te ve yoˬ. Yaꞈ hkʼaˇ, yehˬ kʼa hkʼaw ve chaw leh awˬ viˉ awˬ nyi geh hto maˍ piˇ htaˇ, teˇ pawˆ pawˆ kʼo shaˍ tiꞈ maˇ te leh hteˇ˗ehˍ kʼoˆ piˇ ve yoˬ.

5. Yehˬ kʼa hkʼaw ve chaw leh awˬ viˉ awˬ nyi htaꞈ maˇ hto maˍ piˇ sheˍ htaˇ, aˬ htoꞈ ma htaꞈ dawˇ nyi cawˇ ve le?

⁵ Yehˬ kʼa hkʼaw ve chaw leh awˬ viˉ awˬ nyi htaꞈ hto maˍ piˇ ve awˉ lawˉ teˇ pawˆ ve htaꞈ dawˇ nyi htaˇ, chi hkʼe maˇ kʼoˆ piˇ cawˇ tehꞈ dawˇ leh laiˉ gʼaˇ nyi ma luˬ ve yoˬ. Tcuh yaˇ Pawˇluꞈ Hkriꞈ yaˇ htaꞈ beˆ maˍ piˇ ve, “chaw teˇ gʼaˇ le le htaꞈ nawˬ hui hkʼaˬ hkʼe gʼa yaw hkʼawꞈ cawˇ ve htaꞈ shiˍ tuˬ, nawˬ hui tawˇ yaw ve teˇ hpaˍ lehˬ, hkʼaˬ htaˆ kaꞈ shu awˬ pon cawˇ daꞈ leh na sha ve tawˇ hkawˇ htaꞈ yaw leh, aˉ lehꞈ hkawꞈ taˍ ve hkʼe hpehꞈ piˇ˗oˆ.” (Kawˇlawˇsehˇ 4:5, 6) Yawˇ hui htaꞈ hto maˍ piˇ htaˇ, beˆ maˍ laˇ hkawˇ chi htaꞈ gʼaꞈ te ve kʼo daꞈ ve yoˬ. Chi hkʼe maˇ te ve kʼo ngaˬ hui hkawˇ maˇ na gaˇ taˬ.

6-7. Aˬ htoꞈ ma te awˬ ca Shaˉhkiˆhkanˍ ve chaw maˇ hpehꞈ ve htaꞈ a yeˇ yuˬ piˇ cawˇ ve le? Tawˇ pa haˉ kʼoˆ maˍ laˇ sheˍ.

⁶ Shu ve dawˇ hkʼaˇ htaꞈ dawˇ nyi piˇ sheˍ. Hpaw˗le htaꞈ kʼawꞈ dawˇ nyi sheˍ. “Awˉ lawˉ htaˇ ngaˬ hpawˇ geh Liꞈ hpu hkʼaw ve awˬ lawn ceh tiˉ yaw daꞈ ve yoˬ. Awˬ nu ve awˬ lawn tcuhˇ tcuhˬ maˇ  yaw daꞈ.” Pai˗aˇ Liꞈ hpu a ciˉ ceh shiˍ leh awˬ miˇ ma yaw ve htaꞈ maˇ na gʼa. Awˬ miˇ ma lehˬ bon awˬ lawn htaꞈ tiˉ dawˇ nyi chehˇ ve tehꞈ awˬ hpawˇ dawˇ leh maˇ heˆ heˆ ve bon hkʼaw loꞈ˗e leh kawˆ tuˬ cawˬ la ve htaꞈ yawˇ dawˇ haˍ ve yoˬ.

⁷ Oˇ htaˇ, Hpaw˗le hkawꞈ nyi shinˉ nyi leh mvuhˇ hpeuꞈ la htaˇ awˬ viˉ awˬ nyi geh awˬ yanˇ yehˇ maˇ jaˇ. Hpawnˬ daꞈ˗e ve, hto toˇ˗e ve, leh awˍ teˇ geh caˇ˗e ve yoˬ. Hpaw˗le kʼoˆ ve, “teˇ pawˆ pawˆ kʼo Pai˗aˇ aˉ hkʼaw gaˬ la htaˇ teˇ gʼaˇ kaꞈ maˇ mawˬ ve pa taw, chehˇ bawˬ ve yoˬ.” Aˬ htoꞈ ma te Pai˗aˇ chi hkʼe dawˇ ve ngaˬ hui na gʼa ve yoˬ. Yawˇ awˬ miˇ ma leh yaˇ htaꞈ dawˇ nawˇ ve yoˬ. Awˬ miˇ ma leh yaˇ a shu geh kʼai ve naˍ yawˇ maˇ shiˍ. Awˬ miˇ ma lehˬ yawˇ aꞈ kehˉ awˬ chawˇ htaꞈ a yeˇ yuˬ jaˇ. Hkʼe te leh Pai˗aˇ awˬ miˇ ma htaꞈ baˬ˗a kʼoˆ piˇ ve yoˬ. Nawˬ dawˇ kʼo, Hpaw˗le awˬ hpawˇ htaꞈ chi aꞈ kehˉ a yeˇ yuˬ piˇ ve kʼo, hkʼaˬ hkʼe hpehꞈ tuˬ le?

8. 1 Peˍtruˆ liꞈ 3:1, 2 hkʼaw kʼoˆ taˍ ve hkʼe, yehˬ kʼa hkʼaw ve chaw leh awˬ viˉ awˬ nyi ha lehˬ tuˬ aˬ htoꞈ ma te piˇ gʼa ve le?

⁸ Daꞈ ve te hkʼaˇ dawˇ hkʼaˇ htaꞈ mawˬ tcuh sheˍ. Tawˇ yaw ve aꞈ kehˉ te tawˆ la ve lehˬ daꞈ ve yoˬ. Laiˉ pawˆ kʼo, awˬ viˉ awˬ nyi ngaˬ hui yaw ve aꞈ kehˉ te tawˆ la ve htaꞈ dawˇ cawˇ ve yoˬ. (1 Peˍtruˆ 3:1, 2 gʼaw sheˍ.) Awˬ leh meuˇ htaˇ Hpaw˗le kaꞈ chi htaꞈ na gʼa la ve yoˬ. Yawˇ kʼoˆ ve, “awˬ tehˬ kʼo, Pai˗aˇ ngaˬ leh yaˇ htaꞈ haꞈ leh maˇ baˬ gaˇ. Yawˇ ngaˬ htaꞈ baˬ˗a kʼoˆ laˇ htaˇ, Yaˬhoˉvaˬ ve awˬ liˇ awˬ hkʼaˇ awˬ ca htaꞈ caˉ daꞈ ve hkʼaˬ hkʼe gʼaꞈ te cawˇ ve ngaˬ shiˍ la ve yoˬ. Ngaˬ kʼoˆ ve aꞈ kehˉ daꞈ ve kaꞈ gʼa te tawˆ la ve yoˬ.” Hpaw˗le awˬ hpawˇ geh Liꞈ hpu hkʼaw ve awˬ lawn ceh tiˉ maˇ yaw leh awˬ nu ve awˬ lawn kaꞈ yaw daꞈ ve yoˬ. Awˬ miˇ ma nyi ma gawˬ lehˍ cawˬ la leh yaˇ kaꞈ na yuˬ puiˉ ve Pai˗aˇ gʼa mawˬ ve yoˬ. (Tawˇ naˉ ve 31:18, 27, 28) Liꞈ hpu ngaˬ hui ve yehˬ kʼa htaꞈ ga laˇ leh daꞈ la ve htaꞈ  mawˬ htaˇ, Pai˗aˇ kaꞈ Liꞈ hpu henˇ gaˇ la ve yoˬ.—1 Kawˇrenˍhtuˆ 7:12-14, 16.

9. Aˬ htoꞈ ma te yehˬ kʼa hkʼaw ve chaw leh awˬ viˉ awˬ nyi htaꞈ caˉ leh ga piˇ cawˇ ve le?

⁹ Coˇ caˇ leh yawˇ hui htaꞈ ga piˇ sheˍ. Yaˬhoˉvaˬ lehˬ henˇ yuˬ tuˬ daꞈ jaˇ. Yawˇ chaw teˇ gʼaˇ le le awˬ tehˬ ve htaꞈ haꞈ yuˬ leh co co taiˍ taiˍ ve a shaꞈ gʼa tuˬ “shaˍ tiꞈ piˇ laˇ tcuhˉ taˍ ve yoˬ.” (Yeˍraˍmiˆ 44:4) Tcuh yaˇ Pawˇluꞈ kaꞈ Tiˆmoˉseˍ shu htaꞈ hkʼa dehꞈ ga piˇ tehꞈ kʼoˆ piˇ ve yoˬ. Awˬ lawn kʼo, yawˇ ve hkawˇ na ve chaw teˇ hpaˍ gʼa ponˬ tuˬ yoˬ. (1 Tiˆmoˉseˍ 4:16) Yehˬ kʼa hkʼaw ve chaw leh awˬ viˉ awˬ nyi htaꞈ haꞈ ve pa taw, Liꞈ hpu hkʼaw awˬ tehˬ ve htaꞈ shiˍ tcuh gaˇ ve yoˬ. Ponˬ kʼai ve awˬ yanˇ, Hpaw˗le yaw ve leh te tawˆ la ve yawˇ ve yehˬ kʼa htaꞈ daꞈ la tuˬ te piˇ ve yoˬ. Chi teˇ hkui yawˇ ve awˬ hpawˇ geh Yaˬhoˉvaˬ htaꞈ oˉ kʼoˍ teˇ geh gʼa pui ve ha lehˬ jaˇ. Yawˇ huiˉ maˬ gʼuˇ suhˍ peuˍ ve chaw hpehꞈ leh awˬ hpawˇ Hkriꞈ yaˇ awˬ moˍ hkʼaw nyi haꞈ shaˉ paˍ kaꞈ te ve yoˬ.

10. Aˬ htoꞈ ma te ngaˬ hui yeunˇ hkanˍ cawˇ ve le?

¹⁰ Yeunˇ hkanˍ sheˍ. Gʼuiˬ sha ve awˬ liˇ awˬ hkʼaˇ yuˬ yehˇ tuˬ dawˇ cheˆ htaˇ, awˬ to leh yonˍ hkʼaˇ kaꞈ gʼa pa ve yoˬ. Chi yehˬ kʼa hkʼaw ve chaw leh awˬ viˉ awˬ nyi haꞈ yuˬ tuˬ maˇ sha. Yawˇ hui ve bon hkʼaw ve awˬ liˇ teˇ hpaˍ htaꞈ maˇ te leh mvuhˇ miˬ hpawˇ kaꞈ maˇ caˉ daꞈ. Awˉ lawˉ htaˇ teˇ gʼaˇ gʼaˇ ve awˬ viˉ awˬ nyi beuꞈ jaˇ ve yoˬ hehˉ. (Maꞈhtehˍ 10:35, 36) Yaꞈ hkʼaˇ, yawˇ hui htaꞈ dawˇ law gʼa sheˍ. Ngaˬ hui ve yonˍ hkʼaˇ yawˇ hui na gʼa tuˬ maˇ ga piˇ ve kʼo, yawˇ hui co co taiˍ taiˍ ve a shaꞈ maˇ gʼa keunˍ ve tehꞈ dawˇ cheˆ piˇ ve yoˬ. Chi ngaˬ hui ve awˬ vuiˬ maˇ heˆ. Awˬ lawn kʼo, suhˉ jehˬ tuˬ Yaˬhoˉvaˬ lehˬ Yeˍsuˆ htaꞈ ceh tiˉ piˇ taˍ ve yoˬ. (Yoˇhanˬ 5:22) Ngaˬ hui yeunˇ hkanˍ ve kʼo awˬ leh meuˇ htaˇ, yehˬ kʼa hkʼaw ve chaw leh awˬ viˉ awˬ nyi awˬ tehˬ ve htaꞈ haꞈ yuˬ tuˬ yoˬ.—Awˇ ceˍ awˇ fa “ Vehˆsaiˉ awˬ bon cawˬ ve hpawˇ yehˇ ve” htaꞈ nyi sheˍ.

11-13. Aˍleˆ awˬ pa awˬ e htaꞈ te piˇ ve awˬ hkʼaˇ nawˬ htaꞈ aˬ htoꞈ ma maˍ laˇ ve le?

¹¹ Yawˇ hui htaꞈ daꞈ ve te piˇ ve htawˇ yonˍ hkʼaˇ yonˍ yeˬ sheˍ. (Tawˇ naˉ ve 15:2) Aˍleˆ ve awˬ lawn htaꞈ dawˇ nyi sheˍ. Yawˇ ve awˬ pa awˬ e Gʼuiˬ sha htaꞈ maˇ yonˍ leh mvuhˇ miˬ hpawˇ a yeˇ yuˬ jaˇ. Yawˇ vuiˇ jaˇ kuiˬ lo ca chehˇ˗e htaˇ Yaˬhoˉvaˬ ve awˬ lawn gʼa henˇ ve yoˬ. Liꞈ hpu hkʼaw daꞈ ve awˬ lawn gʼa henˇ ve awˬ pa awˬ e htaꞈ haˆ kʼoˆ piˇ cawˇ ve tehꞈ yawˇ shiˍ ve yoˬ. Yawˇ kʼoˆ ve, “nawˬ ve yonˍ hkʼaˇ leh bon htaꞈ caˉ daꞈ ve awˬ liˇ awˬ hkʼaˇ, maˇ kʼoˆ piˇ leh law chehˇ ve taˇ te. Nawˬ yawˇ hui htaꞈ kʼoˆ piˇ leh shiˍ la htaˇ, cheˆ˗ehꞈ kʼai tuˬ yoˬ.” Aˍleˆ awˬ pa awˬ e dawˇ cawˇ ve htaꞈ a yeˇ yuˬ ve yoˬ. Chi lehˬ haꞈ pehnˇ ve yoˬ. Yawˇ awˬ pa awˬ e htaꞈ liꞈ bvuhꞈ piˇ leh kʼoˆ ve, awˬ lawn chi Liꞈ hpu hkʼaw hkʼaˬ hkʼe caˉ daꞈ ve le, yawˇ hui hkʼaˬ hkʼe dawˇ ve htaꞈ na piˇ ve yoˬ. (1 Kawˇrenˍhtuˆ 13:1-13) Yawˇ htaꞈ hkʼa dehꞈ nyi haꞈ shaˉ laˇ ve awˬ bon uiˍ jaˇ kʼoˆ piˇ leh yawˇ huiˉ maˬ htaꞈ laꞈ shawnˍ feu piˇ ve yoˬ. Awˬ pa awˬ e geh ca guiˇ˗e htaˇ kanˉ teˇ ceuˬ le le gʼa te piˇ ve yoˬ. Awˉ lawˉ htaˇ yawˇ ve yonˍ hkʼaˇ kʼoˆ piˇ ve, yawˇ huiˉ maˬ maˇ dawˇ cawˇ.

¹² Aˍleˆ awˬ pa awˬ e geh chehˇ htaˇ, teˇ nyi le le Liꞈ hpu gʼaw ve yoˬ. Aˍleˆ kʼoˆ ve, “Liꞈ hpu ngaˬ awˬ pon a yeˇ hkʼaˬ hkʼe taw uiˍ ve ngaˬ e htaꞈ mawˬ tcuh gaˇ ve yoˬ.” Yawˇ ve yaˇ aˬ htoꞈ ma te chi hkʼe taw pa kʼai ve shiˍ gaˇ leh Liꞈ hpu hkʼaw yaꞈ ve tehꞈ dawˇ ve pa taw, awˬ pa dawˇ cheˆ leh Liꞈ hpu henˇ nyi ve yoˬ. Aˍleˆ kʼoˆ ve, “ngaˬ pa htaꞈ Liꞈ hpu teˇ kʼoˆ piˇ leh liꞈ kaꞈ chi suhˉ bvuhꞈ piˇ ve yoˬ.” Hkʼaˬ hkʼe hpehꞈ la ve le? Yawˇ Liꞈ hpu hkʼaw yaꞈ kuiˬ maˇ mawˬ leh dawˇ cawˇ jaˇ.

¹³ Ngaˬ hui fawˉ mehˍ ve gʼa hpuˇ tuˬ yoˬ tehꞈ shiˍ ve htawˇ, daꞈ ve htaꞈ gʼa te leh gʼa yonˍ yeˬ ve yoˬ.  (1 Kawˇrenˍhtuˆ 4:12b) Tawˇ pa haˉ te kʼo, Aˍleˆ awˬ e tawˍ piˇ ve htaꞈ gʼa yeunˇ hkanˍ ve yoˬ. Yawˇ kʼoˆ ve, “ngaˬ Baˆtiˆsaˬ haꞈ yuˬ htaˇ, yawˇ hkawˇ maˇ na” tehꞈ ngaˬ e kʼoˆ ve yoˬ. Aˍleˆ hkʼaˬ hkʼe te ve le? “Aˬ htoꞈ ma te ngaˬ dawˇ cheˆ leh Shaˉhkiˆhkanˍ ve chaw hpehꞈ ve, hkʼaˬ hkʼe hpehꞈ ve htawˇ chi htaꞈ maˇ pa taˬ tehꞈ ngaˬ ve yonˍ hkʼaˇ ngaˬ e htaꞈ yawˆ yan ve hkʼaw kʼoˆ maˍ piˇ ve yoˬ. Ngaˬ ngaˬ e htaꞈ hkʼaˬ htaˆ kaꞈ haꞈ ve tehꞈ kʼoˆ piˇ ve yoˬ. Ngaˬ huiˉ maˬ hawˬ peuˬ hkʼawꞈ nawˉ ngaˬ e htaꞈ awˬ chiˇ te caˍ piˇ ve yoˬ. Oˇ teˇ hkui tanˬ leh Liꞈ hpu ngaˬ ve dawˇ hkʼaˇ daꞈ la tuˬ ga laˇ ve tehꞈ ngaˬ e mawˬ ve yoˬ.”

14. Yehˬ kʼa hkʼaw ve chaw leh awˬ viˉ awˬ nyi nyiˉ laˇ htaˇ, aˬ htoꞈ ma te ngaˬ hui yonˍ yeˬ cawˇ ve le?

¹⁴ Ngaˬ hui Yaˬhoˉvaˬ htaꞈ oˉ kʼoˍ pui ve a yeˇ hkʼaˬ hkʼe taw uiˍ ve, yehˬ kʼa hkʼaw ve chaw leh awˬ viˉ awˬ nyi na gʼa tuˬ awˬ yanˇ gʼa yehˇ ve yoˬ. Tawˇ pa haˉ te kʼo, Aˍleˆ awˬ pa awˬ e kanˉ daꞈ daꞈ ve ca piˇ ve htaꞈ te cawˇ ve htawˇ, yawˇ gʼuˇ suhˍ peuˍ ve te tuˬ dawˇ cheˆ htaˇ awˬ e kʼawꞈ hawˬ ve yoˬ. Yaꞈ hkʼaˇ, Aˍleˆ ve dawˇ hkʼaˇ maˇ pa. Yawˇ kʼoˆ ve, “yehˬ kʼa hkʼaw ve chaw nawˬ htaꞈ nyiˉ laˇ leh nawˬ gʼaꞈ te ve kʼo, awˬ nu ve awˬ ceuˬ kaꞈ nyiˉ laˇ tuˬ yoˬ. Yaꞈ hkʼaˇ, nawˬ yonˍ yeˬ leh daꞈ ve htaꞈ caˉ leh te ve kʼo, yawˇ hui nawˬ ve hkawˇ na gaˇ tuˬ yoˬ.” Chi Aˍleˆ ve yehˬ kʼa hkʼaw hpehꞈ la ve yoˬ. Chi teˇ hkui awˬ pa awˬ e gʼuˇ suhˍ peuˍ ve te leh awˬ pa kaꞈ Hkriꞈ yaˇ awˬ moˍ hkʼaw nyi haꞈ shaˉ paˍ te ve yoˬ.

15. Maꞈhtehˍ liꞈ 5:14-16 leh 1 Peˍtruˆ liꞈ 2:12 hkʼaw kʼoˆ taˍ ve hkʼe, Hkriꞈ yaˇ awˬ moˍ hkʼaw “daꞈ ve” te daꞈ ve lehˬ yehˬ kʼa hkʼaw ve chaw leh awˬ viˉ awˬ nyi htaꞈ hkʼaˬ hkʼe ga piˇ gʼa ve le?

¹⁵ Yaˬhoˉvaˬ chaw yaˇ yawˇ geh gʼawˬ veu laˇ ve lehˬ Hkriꞈ yaˇ awˬ moˍ hkʼaw “daꞈ ve” te daꞈ tuˬ awˬ  pon yoˬ. (Maꞈhtehˍ 5:14-16; 1 Peˍtruˆ 2:12 gʼaw sheˍ.) Nawˬ ve awˬ ca Shaˉhkiˆhkanˍ ve chaw maˇ hpehꞈ ve kʼo, yawˇ Hkriꞈ yaˇ awˬ moˍ hkʼaw ve chaw htaꞈ mawˬ daꞈ jaw˗aw laˇ? Chi awˬ gʼuˇ suhˍ kʼoˆ peuˬ ve Hpaw˗le lehˬ yawˇ awˬ hpawˇ awˬ viˉ awˬ nyi htaꞈ shiˍ daꞈ maˇ la tuˬ, yawˇ aˉ hkʼaw laˬ tuˬ jehˬ piˇ ve yoˬ. Awˬ tehˬ kʼo, Yaˬhoˉvaˬ ve Shaˉhkiˆhkanˍ ve chaw hkʼaˬ hkʼe hpehꞈ ve, Pai˗aˇ na gʼa tuˬ awˬ viˉ awˬ nyi teˇ gʼaˇ kʼoˆ laˇ ve htaꞈ dawˇ nawˇ ve yoˬ. Yawˇ kʼoˆ ve, “awˬ viˉ awˬ nyi chi teˇ gʼaˇ ngaˬ geh bawˉ shiˍ nyi tuˬ yawˇ ve kanˉ lawˬ jehˇ ve yoˬ. Yawˇ kaꞈ ngaˬ hkʼe hpehꞈ ve law.”

16. Yehˬ kʼa hkʼaw ve chaw leh awˬ viˉ awˬ nyi ngaˬ hui geh hpawnˬ daꞈ la tuˬ aˬ htoꞈ ma te jehˬ piˇ cawˇ ve le?

¹⁶ Daꞈ jaˇ ve lehˬ yehˬ kʼa hkʼaw ve chaw leh awˬ viˉ awˬ nyi ngaˬ hui geh hpawnˬ daꞈ la tuˬ jehˬ piˇ ve yoˬ. (1 Kawˇrenˍhtuˆ 14:24, 25) Pai˗aˇ awˉ lawˉ teˇ pawˆ kʼai ve lehˬ Yeˍsuˆ suh ve dawˇ nawˇ tuˬ hpawnˬ daꞈ htaˇ yoˬ. Chi kanˉ te peuˬ hkʼawꞈ nawˉ awˬ yanˇ maˇ yehˇ maw ve pa taw yoˬ. Pai˗aˇ kʼoˆ ve, “bon maˍ paˍ hkʼaˬ hkʼe maˍ ve ngaˬ hkʼa dehꞈ na maˇ gʼa. Yaꞈ hkʼaˇ, oˇ kaˬ lo ve chaw htaꞈ ngaˬ dawˇ cawˇ jaˇ. Yawˇ hui ngaˬ htaꞈ laꞈ sheh caˉ laˇ ve yoˬ. Yawˇ hui ngaˬ htaꞈ a yeˇ yuˬ laˇ jaˇ.” Hpaw˗le leh yaˇ paˍ hpawnˬ daꞈ˗e ve, hto toˇ˗e ve awˬ viˉ awˬ nyi teˇ ca a yeˇ yuˬ piˇ jaˇ. Pai˗aˇ awˬ miˇ ma ve yonˍ hkʼaˇ htaꞈ shiˍ gaˇ leh Liꞈ hpu henˇ tuˬ dawˇ cheˆ htaˇ, hawˉ hkʼaˆ teˇ gʼaˇ geh maˍ laˇ tuˬ lawˬ ve yoˬ.

17. Ngaˬ hui a shu yawˇ awˬ to htaꞈ venˇ baˆ maˇ taˍ cawˇ ve aˬ htoꞈ ma le? Yehˬ kʼa hkʼaw ve chaw leh awˬ viˉ awˬ nyi htaꞈ aˬ htoꞈ ma te dawˇ law gʼa sheˍ ve le?

¹⁷ Yehˬ kʼa hkʼaw ve chaw leh awˬ viˉ awˬ nyi Yaˬhoˉvaˬ htaꞈ oˉ kʼoˍ teˇ geh pui gaˇ ve yoˬ. Yaꞈ hkʼaˇ, yawˇ hui Yaˬhoˉvaˬ htaꞈ oˉ kʼoˍ pui la tuˬ ngaˬ hui ga piˇ˗oˬ ve htawˇ, Shaˉhkiˆhkanˍ ve chaw maˇ hpehꞈ la sheˍ. Yawˇ hui chi hkʼe dawˇ cheˆ ve ngaˬ hui a shu yawˇ awˬ to htaꞈ venˇ baˆ taˇ taˍ. Ngaˬ hui hkʼe yonˍ tuˬ yawˇ hui htaꞈ nyiˉ piˇ maˇ gʼa. Yaꞈ hkʼaˇ, ngaˬ hui Yaˬhoˉvaˬ htaꞈ oˉ kʼoˍ pui ve ha lehˬ jaˇ ve htaꞈ yawˇ hui gʼa mawˬ htaˇ, dawˇ cawˇ la tuˬ yoˬ. Hkʼe te leh yawˇ hui awˬ pon bon lawˬ piˇ ve, dawˇ cawˇ tuˬ tawˇ yaw piˇ ve, yawˇ hui htaꞈ hto maˍ piˇ tuˬ awˬ gʼaˇ taˇ nuˇ sheˍ. (Tcuh yaˇ 20:20) Nawˬ coˇ caˇ ve htaꞈ Yaˬhoˉvaˬ awˬ bon naꞈ laˇ tuˬ, yonˍ gʼa ve yoˬ. Yehˬ kʼa hkʼaw ve chaw leh awˬ viˉ awˬ nyi na htaˇ, gʼa ponˬ tuˬ yoˬ.