1. Hkriꞈ yaˇ awˬ leh hkʼa gaˬ gʼuiˇ gʼa tuˬ, hkʼaˬ hkʼe gʼa te ve le?

 Hkriꞈ yaˇ teˇ gʼaˇ le le a shaꞈ awˬ pon gʼuiˇ˗enˍ daꞈ chehˇ ve yoˬ. Ngaˬ hui tanˬ gʼuiˇ chehˇ ve maˇ heˆ leh laiˉ hkʼawꞈ gʼuiˇ laˬ˗oˬ ve htawˇ, awˬ leh hkʼa gaˬ gʼa gʼuiˇ ve yoˬ. Tcuh yaˇ Pawˇluꞈ Hpiˇliˇpiˆ Hkriꞈ yaˇ htaꞈ beˆ maˍ piˇ ve ngaˬ hui htaꞈ kaꞈ awˬ gʼaˇ peꞈ laˇ gʼa ve yoˬ. Pawˇluꞈ liꞈ bvuhꞈ feu piˇ ve Hkriꞈ yaˇ awˬ moˍ oˇ ve gʼa htaˇ, teˇ hpaˍ hpaˍ kʼo awˬ viˉ awˬ nyi laiˉ hkʼawꞈ hpehꞈ˗oˬ ve yoˬ. Yawˇ hui Yaˬhoˉvaˬ htaꞈ ka tiꞈ yeˬ chehˇ ve htawˇ, nyi ma yeˬ ve awˬ hkʼaw lo caˉ leh gʼuiˇ kʼai tuˬ Pawˇluꞈ beˆ maˍ piˇ ve yoˬ. Pawˇluꞈ ‘laꞈ shawnˍ htaꞈ gʼa htaˇ hkʼa gaˬ gʼaꞈ yuˬ tcuhˉ taˍ ve’ hkʼe yawˇ hui htaꞈ kaꞈ te tcuh gaˇ ve yoˬ.—Hpiˇliˇpiˆ 3:14.

2. Pawˇluꞈ Hpiˇliˇpiˆ Hkriꞈ yaˇ htaꞈ beˆ maˍ piˇ ve aˬ htoꞈ ma te cawˇ jaˇ ve le?

² Pawˇluꞈ chi hkʼe beˆ maˍ piˇ ve cawˇ jaˇ. Hpiˇliˇpiˆ Hkriꞈ yaˇ awˬ moˍ tanˬ htaˇ kaꞈ fawˉ mehˍ ve gʼa hpuˇ ve yoˬ. 50 hkʼawꞈ htaˇ, “Maˍkeˍdawˇniˆ mvuhˇ miˬ lo laˬ leh ngaˬ hui htaꞈ ga laˇ˗oˆ” tehꞈ kʼoˆ ve htaꞈ Pawˇluꞈ, Siˍlaˆ na yuˬ leh Hpiˇliˇpiˆ venˇ lo gaˬ la ve yoˬ. (Tcuh yaˇ 16:9) Yawˇ hui oˇ kaˬ lo yaˇ miˇ teˇ gʼaˇ Luˍdiˇ meh ve htaꞈ mawˬ daꞈ ve yoˬ. Yawˇ daꞈ ve awˬ lawn sha tanˇ htaꞈ ‘na yuˬ tuˬ Yaˬhoˉvaˬ yawˇ ve nyi ma htaꞈ hpaw piˇ ve yoˬ.’ (Tcuh yaˇ 16:14) Maˇ maw yawˇ leh yehˬ kʼa hkʼaw ve chaw Baˆtiˆsaˬ haꞈ yuˬ ve yoˬ. Yaꞈ hkʼaˇ, Neˇhaiˬ shoꞈ shaꞈ tuˬ laꞈ haˉ te piˇ ve yoˬ. Venˇ yaˇ Pawˇluꞈ leh Siˍlaˆ htaꞈ venˇ awˬ hoˉ mehˆ gʼuˇ suhˍ gʼawˬ veu laˇ leh, yawˇ hui shoꞈ shaꞈ tuˬ te shehˍ hpaˇ hpehꞈ ve tehꞈ heˍ leh kʼoˆ piˇ ve yoˬ. Hkʼe te leh yawˇ huiˉ maˬ shu jawꞈ leh htawnˍ hkʼaw lo yuˬ keu piˇ leh peuˬ hkʼawꞈ nawˉ venˇ hkʼaw tawˆ kʼai tuˬ lawˬ ve yoˬ. (Tcuh yaˇ 16:16-40) Yawˇ huiˉ maˬ awˬ gʼaˇ nuˇ leh Gʼuiˬ sha ve kanˉ maˇ te˗o ve laˇ? Maˇ heˆ! Hkriꞈ yaˇ awˬ  moˍ awˬ suhˉ hkʼaw ve awˬ viˉ awˬ nyi kaꞈ yeunˇ hkanˍ ve yoˬ! Pawˇluꞈ leh Siˍlaˆ ve awˬ lawn yawˇ hui htaꞈ awˬ gʼaˇ piˇ ve yoˬ.

3. Pawˇluꞈ awˬ leh hkʼa gaˬ Yaˬhoˉvaˬ htaꞈ ka tiꞈ yeˬ tuˬ, hkʼaˬ hkʼe te ve le? Ngaˬ hui aˬ htoꞈ ma ve na hkawˇ htaꞈ na tuˬ le?

³ Pawˇluꞈ yeunˇ hkanˍ gʼaˇ leh awˬ leh hkʼa gaˬ gʼuiˇ gaˬ tuˬ coˇ caˇ jaˇ. (2 Kawˇrenˍhtuˆ 4:16) Yaꞈ hkʼaˇ, Pawˇluꞈ awˬ leh hkʼa gaˬ Yaˬhoˉvaˬ htaꞈ ka tiꞈ yeˬ tuˬ yawˇ hkʼaˬ htaˆ kaꞈ laꞈ shawnˍ htaꞈ dawˇ nyi tcuhˉ taˍ ve yoˬ. Pawˇluꞈ ve awˬ lawn ngaˬ hui htaꞈ hkʼaˬ hkʼe maˍ laˇ ve le? Chi beuꞈ teˇ co˗e ka tiꞈ yeˬ ve awˬ viˉ awˬ nyi shoꞈ shaꞈ ve cawˬ maˇ jaˇ ve htawˇ, yeunˇ hkanˍ gʼaˇ ve ngaˬ hui htaꞈ maˍ laˇ gʼa ve a shu cawˬ ve le? Ngaˬ hui awˬ gʼaˇ maˇ nuˇ leh te tcuhˉ taˍ gʼa tuˬ, awˬ gʼuˇ suhˍ hpawˇ ve dawˇ law kuiˬ hkʼaˬ hkʼe ga laˇ ve le?

4. Pawˇluꞈ gʼa hpuˇ ve maˇ sha ve htawˇ, yawˇ hkʼaˬ hkʼe te caˉ leh Yaˬhoˉvaˬ ve kanˉ te gʼa ve le?

⁴ Pawˇluꞈ Hpiˇliˇpiˆ Hkriꞈ yaˇ htaꞈ liꞈ bvuhꞈ feu piˇ htaˇ, hkʼaˬ hkʼe te chehˇ ve dawˇ nyi sheˍ. Yawˇ shu aˉ hkʼaw haw tiˍ˗a piˇ leh bon maˍ toˇ maˇ gʼa ve htawˇ, hkʼa laˬ ve chaw htaꞈ maˍ piˇ leh Hkriꞈ yaˇ awˬ moˍ teˇ hpaˍ htaꞈ liꞈ bvuhꞈ feu piˇ ve yoˬ. Chi beuꞈ teˇ co˗e, awˬ viˉ awˬ nyi teˇ kaˬ kʼai maˇ gʼa ve kaꞈ yawˇ geh laˬ ve chaw htaꞈ hto maˍ piˇ ve yoˬ. Chi hkʼoˆ kaꞈ mawˬ daꞈ maˇ gʼa ve chaw htaꞈ kʼo liꞈ bvuhꞈ feu piˇ ve yoˬ.

5. Hpiˇliˇpiˆ liꞈ 3:12-14 hkʼaw kʼoˆ taˍ ve hkʼe, Pawˇluꞈ laꞈ shawnˍ htaꞈ caˉ leh dawˇ nyi tuˬ yawˇ hkʼaˬ hkʼe te ve le?

⁵ Pawˇluꞈ te jaw ve daꞈ ve htawˇ maˇ daꞈ ve htawˇ, awˬ lawn chi yawˇ Yaˬhoˉvaˬ ve kanˉ te ve htaꞈ maˇ heuˆ la tcuh. “Awˬ gʼuˇ suhˍ lo cawˬ taˍ ve awˬ ceuˬ teˇ hpaˍ htaꞈ gʼaˇ hteꞈ laꞈ sheh che yuˬ” gʼa tuˬ, “ponˬ laˬ peuˬ ve awˬ ceuˬ teˇ hpaˍ htaꞈ ngaˬ leunˇ baˬ taˉ” ve yoˬ tehꞈ yawˇ kʼoˆ ve yoˬ. (Hpiˇliˇpiˆ 3:12-14 gʼaw sheˍ.) Pawˇluꞈ kanˉ hkʼa dehꞈ maˇ te˗o tuˬ te piˇ ve aˬ htoꞈ ma cawˬ ve hehˉ le? Awˉ lawˉ teˇ maˬ lehˬ yawˇ Hkriꞈ yaˇ maˇ hpehꞈ sheˍ htaˇ, Yuˇdaꞈ chaw hkʼaw awˬ meh bvuhˬ ve teˇ gʼaˇ hpehꞈ ve yoˬ. Yaꞈ hkʼaˇ, chi hkʼa peu˗eˬ “shonˇ ve awˬ ceuˬ hpehꞈ ve” tehꞈ yawˇ dawˇ ve yoˬ. (Hpiˇliˇpiˆ 3:3-8) Nyiˇ maˬ teˇ maˬ lehˬ yawˇ Hkriꞈ yaˇ htaꞈ fawˉ mehˍ piˇ jaw ve pa taw, nyi ma maˇ sha leh awˬ gʼaˇ nuˇ leh kanˉ maˇ te˗o ve maˇ te laˇ tcuh. Shehˆ maˬ teˇ maˬ lehˬ yawˇ Yaˬhoˉvaˬ ve kanˉ te maˇ jaˇ˗o leh kaiˬ ve hkʼaw maˇ te˗o kaꞈ hpehꞈ ve tehꞈ maˇ dawˇ. Shu Pawˇluꞈ htaꞈ htawnˍ hkʼaw lo yuˬ keu piˇ ve, jawꞈ piˇ ve, haˉ pui baˬ hpehˇ piˇ leh, haw loꞈ kʼoˍ luˬ kʼai ve, caˇ tuˬ leh veuꞈ kʼaˇ maˇ cawˬ ve kaꞈ gʼa hpuˇ ve htawˇ, yawˇ Gʼuiˬ sha ve kanˉ hkʼa dehꞈ te gʼa ve yoˬ. (2 Kawˇrenˍhtuˆ 11:23-27) Yaꞈ hkʼaˇ, Pawˇluꞈ laiˉ ceuˬ gʼa te leh gʼa hpuˇ ve htawˇ, caˉ leh gʼa te ve tehꞈ yawˇ shiˍ ve yoˬ. Ngaˬ hui kaꞈ Pawˇluꞈ hkʼa shuˍ gʼa te ve yoˬ.

6. Ngaˬ hui leunˇ cawˇ ve “ponˬ laˬ peuˬ ve” awˬ ceuˬ aˬ htoꞈ ma cawˬ ve le?

⁶ Ngaˬ hui Pawˇluꞈ htaꞈ henˇ yuˬ leh “ponˬ laˬ peuˬ ve awˬ ceuˬ teˇ hpaˍ htaꞈ” hkʼaˬ hkʼe te leunˇ baˬ taˉ gʼa ve le? Nawˬ te yaꞈ jaw ve htaꞈ pa taw, nyi ma luˬ leh teꞈ chiˉ maˇ te gaˇ˗o tehꞈ dawˇ ve laˇ? Hkʼe kʼo Yeˍsuˆ Hkriꞈ htaiˍ hkʼawꞈ laˇ ve htaꞈ a shu yawˇ hkʼaˇ yawˇ Liꞈ hpu henˇ leh hkʼa dehꞈ dawˇ nyi sheˍ. Nawˬ chi hkʼe te leh bon lawˬ ve kʼo, awˬ gʼaˇ gʼa leh nyi ma maˇ luˬ tuˬ ga laˇ gʼa ve yoˬ. Nawˬ te yaꞈ leh Yaˬhoˉvaˬ venˇ baˆ hpehˇ laˇ˗oˬ ve htaꞈ hkʼa dehꞈ na gʼa tuˬ yoˬ. Pawˇluꞈ ve awˬ lawn teˇ ceuˬ kʼawꞈ maˍ laˇ sheˍ ve yoˬ. Nawˬ Yaˬhoˉvaˬ ve kanˉ maˇ maˇ te gʼa tuˬ, kanˉ hpu gʼa maˇ ve htaꞈ baˬ taˉ ve laˇ? Hkʼe kʼo, kanˉ oˇ ve te chehˇ sheˍ ve kʼo aˬ ma awˬ ceuˬ gʼa tuˬ ve tehꞈ maˇ dawˇ leh ponˬ laˬ peuˬ ve htaꞈ leunˇ baˬ taˉ gʼa ve yoˬ. (Heh puiˉ hkʼaw 11:4-6; Cuˇ yiˍ piˇ ve 7:10) Chi hkʼoˆ kaꞈ, “ponˬ laˬ  peuˬ ve” chi Yaˬhoˉvaˬ ve kanˉ ngaˬ hui te jaw ve leh tuꞈ hkanˍ ve yeunˇ hkanˍ jaw ve htaꞈ kaꞈ caˉ daꞈ ve yoˬ. Yaˬhoˉvaˬ ngaˬ hui htaꞈ hkʼaˬ hkʼe te awˬ bon naꞈ laˇ leh ga laˇ jaw ve dawˇ nyi ve kʼo, ngaˬ hui ve Awˬ pa geh meuˆ daꞈ gʼa ve yoˬ. Yaꞈ hkʼaˇ, ngaˬ hui Yaˬhoˉvaˬ awˬ pon laiˉ ceuˬ te piˇ˗oˬ tehꞈ maˇ dawˇ nyi cawˇ.—1 Kawˇrenˍhtuˆ 15:58.

7. (a) 1 Kawˇrenˍhtuˆ liꞈ 9:24-27 hkʼaw kʼoˆ taˍ ve hkʼe, a shaꞈ awˬ pon gʼuiˇ˗enˍ daꞈ ve htaꞈ gʼaˇ tuˬ, hkʼaˬ hkʼe gʼa te cawˇ ve le? Tawˇ pa haˉ kʼoˆ maˍ laˇ sheˍ.

⁷ Yeˍsuˆ “gʼaˇ hteꞈ te˗o” tehꞈ kʼoˆ ve htaꞈ Pawˇluꞈ hkʼa dehꞈ na gʼa ve yoˬ. (Luˉkaꞈ 13:23, 24) Yeˍsuˆ hkʼa shuˍ, Pawˇluꞈ kaꞈ awˬ leh hkʼa gaˬ gʼa yeˬ ve tehꞈ yawˇ shiˍ ve yoˬ. Hkʼe te leh Hkriꞈ yaˇ ve a shaꞈ teꞈ hkʼaˇ lehˬ gʼuiˇ˗enˍ daꞈ chehˇ ve htaꞈ tehˆ daꞈ ve yoˬ. (1 Kawˇrenˍhtuˆ 9:24-27 gʼaw sheˍ.) Gʼuiˇ˗enˍ daꞈ ve chaw lehˬ awˬ leh meuˇ ve awˬ ti htaꞈ ceh tiˉ dawˇ nyi leh awˬ nu ve awˬ ceuˬ htaꞈ maˇ dawˇ nyi. Tawˇ pa haˉ te kʼo, gʼuiˇ˗enˍ daꞈ ve chaw lehˬ yaꞈ kʼaw jaˇ lo mawˇ hawˇ kuiˬ htaꞈ gʼuiˇ hpanˍ htaˇ, jehˇ leh aˬ htoꞈ ma hawˇ ve yawˇ nyi ve laˇ? Yawˇ gʼaˇ gaˇ ve kʼo, maˇ nyi taˬ! Ngaˬ hui kaꞈ a shaꞈ awˬ pon gʼuiˇ chehˇ ve yoˬ. Ngaˬ hui awˬ nu ve awˬ ceuˬ htaꞈ maˇ dawˇ nyi leh Yaˬhoˉvaˬ htaꞈ ka tiꞈ yeˬ tuˬ ceh tiˉ dawˇ nyi ve kʼo, laꞈ shawnˍ gʼa tuˬ yoˬ!

8. Ngaˬ hui awˬ gʼaˇ nuˇ tuˬ te laˇ gʼa ve 3 ceuˬ aˬ htoꞈ ma le?

⁸ Chi teˇ hkui, ngaˬ hui awˬ gʼaˇ nuˇ tuˬ te laˇ gʼa ve 3 ceuˬ htaꞈ teˇ geh chaˬ nyi sheˍ. Dawˇ taˍ ve hkʼe maˇ hpehꞈ la ve, ngaˬ hui mawˇ leh awˬ gʼaˇ i kʼai ve, leh shoꞈ shaꞈ ve gʼa hpuˇ maw jaˇ ve chi ve teˇ hpaˍ yoˬ. Awˬ nu ve chaw teˇ hpaˍ chi hkʼe ve gʼa hpuˇ htaˇ hkʼaˬ hkʼe te ve ngaˬ hui htaꞈ maˍ laˇ gʼa ve yoˬ.—Hpiˇliˇpiˆ 3:17.

9. Dawˇ taˍ ve hkʼe maˇ hpehꞈ la ve kʼo, hkʼaˬ hkʼe kʼai tuˬ le?

⁹ Dawˇ taˍ ve hkʼe maˇ hpehꞈ la ve. Yaˬhoˉvaˬ ka tiꞈ te taˍ laˇ ve htaꞈ ngaˬ hui law chehˇ ve yoˬ. Yuˇdaꞈ mvuhˇ miˬ hkʼaw haiˬ ve htaꞈ Yaˬhoˉvaˬ gu tuˬ tcuh kaˍ paˍ Haˍbaˍkuˆ lawˬ htaˇ, “hkʼa dehꞈ law taˍ˗oꞈ” tehꞈ Yaˬhoˉvaˬ yawˇ htaꞈ kʼoˆ piˇ ve yoˬ. (Haˍbaˍkuˆ 2:3) Yaꞈ hkʼaˇ, dawˇ taˍ ve hkʼe maˇ hpehꞈ la ve kʼo, ngaˬ hui ha lehˬ ve i kʼai la ve leh awˬ gʼaˇ nuˇ la gʼa  ve yoˬ. (Tawˇ naˉ ve 13:12) Aˬ laˬ hkʼe 1914 hkʼawꞈ htaˇ, awˬ viˉ awˬ nyi teˇ hpaˍ hpaˍ chi hkʼe hpehꞈ ve yoˬ. Oˇ ve teˇ hkʼawꞈ leuˆ yuˬ taˍ ve chaw laiˉ gʼaˇ mvuhˇ naw ma hkʼoˆ gʼa taˆ˗e tuˬ dawˇ law taˍ ve yoˬ. Chi hkʼe maˇ hpehꞈ la htaˇ, ka tiꞈ yeˬ ve chaw hkʼaˬ hkʼe te ve le?

10. Awˬ viˉ awˬ nyi teˇ ca dawˇ taˍ ve hkʼe maˇ hpehꞈ la ve htawˇ hkʼaˬ hkʼe te ve le?

¹⁰ Ka tiꞈ yeˬ ve Hkri yaˇ 2 gʼaˇ ve awˬ lawn htaꞈ dawˇ nyi sheˍ. 1908 hkʼawꞈ awˬ viˉ awˬ nyi Rawˇyanˍ Saˍpehˆ 20 hkʼawꞈ htaˇ Baˆtiˆsaˬ haꞈ yuˬ ve yoˬ. Yawˇ maˇ maw kʼo laꞈ shawnˍ gʼa tuˬ tehꞈ yonˍ ve yoˬ. 1911 hkʼawꞈ yawˇ ve yaˇ miˇ haˉ Hpeun geh heuˆ daꞈ tuˬ lawˬ htaˇ yawˇ kʼoˆ piˇ ve, “1914 hkʼawꞈ htaˇ hkʼaˬ hkʼe hpehꞈ la tuˬ maˇ shiˍ. Hkʼe te leh heuˆ daꞈ tuˬ kʼo haˆ haˆ gʼa te ve!” Yaꞈ hkʼaˇ, 1914 hkʼawꞈ htaˇ mvuhˇ naw ma hkʼoˆ taˆ˗e tuˬ laꞈ shawnˍ maˇ gʼa ve pa taw, yawˇ huiˉ maˬ a shaꞈ awˬ pon maˇ gʼuiˇ˗o ve laˇ? Maˇ heˆ. Yawˇ huiˉ maˬ laꞈ shawnˍ gʼa tuˬ ceh maˇ heˆ. Hkʼaˬ htaˆ kaꞈ Gʼuiˬ sha ve a loˍ te tuˬ dawˇ nyi ve yoˬ. Yawˇ huiˉ maˬ awˬ leh hkʼa gaˬ yeunˇ hkanˍ ve hkʼaw gʼuiˇ gaˇ ve yoˬ. Rawˇyanˍ leh Hpeun miˬ guiˬ hkʼoˆ ve awˬ vuiˬ te peuˬ htaˇ hkʼa gaˬ ka tiꞈ yeˬ leh Gʼuiˬ sha ve kanˉ kaiˬ ve hkʼaw te ve yoˬ. Yaˬhoˉvaˬ yawˇ ve awˬ meh daꞈ kehˬ tuˬ te piˇ ve, yawˇ uˉ peunˍ ve cawˇ jaˇ ve tehꞈ hpeuꞈ maw laˇ ve, leh yawˇ ka tiꞈ te taˍ ve htaꞈ hkʼa peu˗eˬ te biˇ tuˬ ve awˬ yanˇ nawˬ kaꞈ mawˬ gaˇ tuˬ yoˬ hehˉ. Yaˬhoˉvaˬ tinˍ taˍ ve awˬ yanˇ gaˬ kʼo, chi ve hkʼa peu˗eˬ hpehꞈ la tuˬ yoˬ. Awˬ yanˇ oˇ ve hkʼa gaˬ ngaˬ hui kaiˬ ve hkʼaw Yaˬhoˉvaˬ ve kanˉ te sheˍ. Dawˇ taˍ ve hkʼe maˇ hpehꞈ la ve htawˇ, awˬ gʼaˇ nuˇ tuˬ taˇ te laˇ tcuh.

11-12. Ngaˬ hui mawˇ leh awˬ gʼaˇ i kʼai ve htawˇ, aˬ htoꞈ ma te Yaˬhoˉvaˬ ve kanˉ ka tiꞈ yeˬ ve hkʼaw te gʼa sheˍ ve le? Tawˇ pa haˉ kʼoˆ maˍ laˇ sheˍ.

¹¹ Mawˇ leh awˬ gʼaˇ i kʼai ve. Gʼuiˇ˗enˍ daꞈ ve chaw lehˬ awˬ gʼaˇ gʼa hehnˇ ve yoˬ. Yaꞈ hkʼaˇ, Yaˬhoˉvaˬ htaꞈ ka tiꞈ yeˬ leh yawˇ ve kanˉ te gaˇ ve nyi ma cawˬ tuˬ, awˬ gʼaˇ hehnˇ tuˬ maˇ loˍ. Laiˉ gʼaˇ awˬ gʼaˇ i la htaˇ kaꞈ daꞈ jaˇ ve awˬ ceuˬ Yaˬhoˉvaˬ htaꞈ piˇ gaˇ sheˍ ve yoˬ. (2 Kawˇrenˍhtuˆ 4:16) Tawˇ pa haˉ te kʼo, awˬ viˉ awˬ nyi Awˇhteuˬ Siˍhkawˆ * 88 hkʼawꞈ htaˇ, yawˇ Beˍteˍlaˆ hkʼaw kanˉ te ve 55 hkʼawꞈ gaˬ˗oˬ ve yoˬ. Oˇ ve teˇ yanˇ yawˇ maˇ chehˇ sha leh awˬ gʼaˇ hkʼa dehꞈ maˇ cawˬ˗oˬ. Teˇ nyi htaˇ yawˇ htaꞈ nyi haꞈ shaˉ ve saˍ laꞈ gʼonˍ htaꞈ ga piˇ shehˍ ma kʼoˆ piˇ ve, “nawˬ Yaˬhoˉvaˬ ve kanˉ te maˇ jaˇ˗oˬ ve hehˉ neˬ.” Yaꞈ hkʼaˇ, Awˇhteuˬ yawˇ te jaw ve awˬ ceuˬ htaꞈ tiˉ maˇ dawˇ nyi. Yawˇ gʼuiˬ leh kʼoˆ ve, “nawˬ kʼoˆ ve cawˇ ve yoˬ. Yaꞈ hkʼaˇ, ngaˬ te jaw ve awˬ ceuˬ a yeˇ maˇ uiˍ. Chi teˇ hkui tanˬ leh ngaˬ aˬ htoꞈ ma te tuˬ ve a yeˇ uiˍ jaˇ.”

¹² Nawˬ Yaˬhoˉvaˬ ve kanˉ laiˉ hkʼawꞈ te˗oˬ ve  htawˇ, chi teˇ hkui maˇ chehˇ sha leh oˇ htaˇ hkʼe leˇ te maˇ gʼa˗o laˇ? Hkʼe kaꞈ awˬ gʼaˇ taˇ nuˇ. Oˇ htaˇ nawˬ te jaw ve kanˉ Yaˬhoˉvaˬ tawnˇ gʼa leh awˬ hpfuhˇ shiˍ ve yoˬ. (Heˍbrehˇ 6:10) Ngaˬ hui Yaˬhoˉvaˬ ve kanˉ hkʼa dehꞈ te maˇ gʼa ve kʼo, yawˇ htaꞈ maˇ haꞈ ve tehꞈ kʼoˆ gaˇ ve maˇ heˆ. Yaꞈ hkʼaˇ, ngaˬ hui daꞈ ve dawˇ hkʼaˇ cawˬ leh te gʼa ve hkʼe teˇ ceuˬ le le te ve kʼo, ngaˬ hui Yaˬhoˉvaˬ htaꞈ haꞈ jaˇ ve tehꞈ hpeuꞈ maw piˇ chehˇ ve yoˬ. (Kawˇlawˇsehˇ 3:23) Ngaˬ hui hkʼaˬ hkʼe taw ceh te gʼa ve Yaˬhoˉvaˬ shiˍ leh te maˇ gʼa ve awˬ leuˉ yawˇ maˇ dawˇ law.—Maˍkuˆ 12:43, 44.

13. Ngaˬ hui tuꞈ hkanˍ ve gʼa hpuˇ chehˇ ve htawˇ, caˉ leh Yaˬhoˉvaˬ ve kanˉ te gʼa tuˬ, Aˬnaˬtoˇliˆ leh Liˇdiˬyaˆ ve awˬ lawn ngaˬ hui htaꞈ hkʼaˬ hkʼe te awˬ gʼaˇ peꞈ laˇ ve le?

¹³ Shoꞈ shaꞈ ve gʼa hpuˇ maw jaˇ ve. Yaˬhoˉvaˬ ve chaw teˇ hpaˍ kʼo tuꞈ hkanˍ ve leh fawˉ mehˍ ve htaꞈ laiˉ hkʼawꞈ gʼa yeunˇ hkanˍ ve yoˬ. Tawˇ pa haˉ te kʼo, Aˬnaˬtoˇliˆ Mehˇniˍ 12 hkʼawꞈ htaˇ, shu yawˇ awˬ pa htaꞈ htawnˍ hkʼaw lo yuˬ keu piˇ leh peuˬ hkʼawꞈ nawˉ Saiˬ˗biˬ˗ri˗aˬ lo kʼai tcuh ve yoˬ. Oˇ kaˬ lo Monˍdoˬvaˬ mvuhˇ miˬ chehˇ ve yawˇ ve yehˬ kʼa htaꞈ 7,000 kiˇ loˇ vuiˇ daꞈ ve yoˬ. Peuˬ hkʼawꞈ nawˉ teˇ hkʼawꞈ, Aˬnaˬtoˇliˆ, yawˇ awˬ e, awˬ puˍ awˬ pi kaꞈ kʼai tcuh ve yoˬ. Oˇ kaˬ lo yawˇ hui hpawnˬ daꞈ˗e tuˬ, a ngeu hkʼoˆ 30 kiˇ loˇ gʼa juˇ kʼai ve yoˬ. Aˬnaˬtoˇliˆ Liˇdiˬyaˆ geh heuˆ daꞈ leh yaˇ miˇ 1 hkʼawꞈ gaˬ htaˇ, yawˇ htawnˍ hkʼaw 3 hkʼawꞈ gʼa chehˇ ve yoˬ. Yawˇ hui tuꞈ hkanˍ jaˇ ve htawˇ, caˉ leh Yaˬhoˉvaˬ ve kanˉ ka tiꞈ yeˬ ve hkʼaw te gʼa ve yoˬ. Chi teˇ hkui Aˬnaˬtoˇliˆ Aˍshaˆ awˬ kʼaw ji miˬ guiˬ Awˬ tcuhˆ puiˍ Kawˍmiˍtiˍ hkʼaw ve teˇ gʼaˇ hpehꞈ ve yoˬ. Aˬnaˬtoˇliˆ leh Liˇdiˬyaˆ hkʼa shuˍ, ngaˬ hui kaꞈ yeunˇ hkanˍ leh Yaˬhoˉvaˬ ve kanˉ te gʼa ve hkʼe teˇ ceuˬ le le te gaˇ ve yoˬ.—Gaˍlaˍtiˆ 6:9.

14. Pawˇluꞈ laꞈ shawnˍ gʼa tuˬ hkʼaˬ hkʼe gʼa te ve le?

¹⁴ Pawˇluꞈ awˬ leh hkʼa gaˬ gʼuiˇ leh laꞈ shawnˍ gʼa tuˬ tehꞈ hkʼa dehꞈ yonˍ ve yoˬ. Yawˇ leuˆ yuˬ taˍ ve chaw hpehꞈ ve pa taw, ‘mvuhˇ naw ma lo taˆ˗e tuˬ, Gʼuiˬ sha lehˬ Yeˍsuˆ Hkriꞈ htaꞈ cuˇ leh kuˬ yuˬ ve laꞈ shawnˍ htaꞈ’ yawˇ law chehˇ ve yoˬ. Yaꞈ hkʼaˇ, laꞈ shawnˍ chi htaꞈ gʼa tuˬ, yawˇ “gʼaꞈ yuˬ tcuhˉ taˍ ve yoˬ.” (Hpiˇliˇpiˆ 3:14) Hpiˇliˇpiˆ Hkriꞈ yaˇ yawˇ hui ve laꞈ shawnˍ htaꞈ hkʼa dehꞈ dawˇ nyi tuˬ, Pawˇluꞈ tawˇ pa haˉ htaꞈ yehˇ leh kʼoˆ maˍ piˇ ve yoˬ.

15. Hpiˇliˇpiˆ Hkriꞈ yaˇ gʼaꞈ yuˬ tcuhˉ taˍ gʼa tuˬ, Pawˇluꞈ mvuhˇ miˬ yaˇ ve awˬ lawn hkʼaˬ hkʼe tehˆ maˍ piˇ leh awˬ gʼaˇ piˇ ve le?

¹⁵ Hpiˇliˇpiˆ Hkriꞈ yaˇ mvuhˇ naw ma mvuhˇ miˬ yaˇ hpehꞈ ve tehꞈ Pawˇluꞈ tawnˇ taˍ tcuh ve yoˬ. (Hpiˇliˇpiˆ 3:20) Aˬ htoꞈ ma te mvuhˇ miˬ yaˇ hpehꞈ  ve lehˬ a yeˇ uiˍ jaˇ ve le? Oˇ ve teˇ yanˇ, Roˉmaꞈ ve mvuhˇ miˬ yaˇ hpehꞈ ve lehˬ awˬ hpfuhˇ hkʼaˆ jaˇ. * Yaꞈ hkʼaˇ, mvuhˇ naw ma mvuhˇ miˬ yaˇ hpehꞈ ve leuˆ yuˬ taˍ ve Hkriꞈ yaˇ lehˬ Roˉmaꞈ ve mvuhˇ miˬ yaˇ aꞈ kehˉ awˬ bon gʼa leh awˬ hpfuhˇ hkʼaˆ jaˇ! Hkʼe te leh Pawˇluꞈ yawˇ hui htaꞈ kʼoˆ piˇ ve, “hkʼaˬ hkʼe hpehꞈ ve htawˇ, nawˬ hui hkʼa te hkʼa dawˇ ve teˇ hpaˍ Hkriꞈ ve ha lehˬ ve bon hkawˇ htaꞈ keunˍ daꞈ piˇ lawˬ˗oꞈ.” (Hpiˇliˇpiˆ 1:27) Chi beuꞈ teˇ co˗e, leuˆ yuˬ taˍ ve Hkriꞈ yaˇ mvuhˇ naw ma lo taˆ˗e leh co co taiˍ taiˍ chehˇ tuˬ ve laꞈ shawnˍ htaꞈ gʼaꞈ yuˬ tcuhˉ taˍ ve yoˬ. Yawˇ hui daꞈ ve henˇ yuˬ tuˬ hpehꞈ ve yoˬ.

16. Hpiˇliˇpiˆ liꞈ 4:6, 7 hkʼaw kʼoˆ taˍ ve hkʼe, ngaˬ hui ve dawˇ law kuiˬ mvuhˇ naw ma hkʼoˆ gʼa chehˇ tuˬ maˇ kʼoˆ miˬ guiˬ hkʼoˆ gʼa chehˇ tuˬ maˇ kʼoˆ, hkʼaˬ hkʼe gʼa te cawˇ ve le?

¹⁶ Ngaˬ hui ve dawˇ law kuiˬ mvuhˇ naw ma hkʼoˆ gʼa chehˇ tuˬ maˇ kʼoˆ miˬ guiˬ hkʼoˆ gʼa chehˇ tuˬ maˇ kʼoˆ, ngaˬ hui gʼaꞈ yuˬ tcuhˉ taˍ ve yoˬ. Ngaˬ hui aˬ htoꞈ ma htaꞈ gʼa yeunˇ hkanˍ ve htawˇ, peuˬ taˉ ve awˬ ceuˬ htaꞈ maˇ dawˇ nyi cawˇ leh, ngaˬ hui Yaˬhoˉvaˬ ve kanˉ caˉ leh te gʼa tuˬ teˇ ceuˬ kaꞈ maˇ tawˍ laˇ tcuh cawˇ. (Hpiˇliˇpiˆ 3:16) Yaˬhoˉvaˬ ve ka tiꞈ biˇ la tuˬ ngaˬ hui law maw jaˇ˗oˬ ve, maˇ heˆ kʼo ngaˬ hui a shaꞈ maˇ leh awˬ gʼaˇ i kʼai ve yoˬ hehˉ. Tuꞈ hkanˍ ve leh fawˉ mehˍ ve kaꞈ laiˉ hkʼawꞈ yeunˇ hkanˍ laˬ˗oˬ ve yoˬ hehˉ. “Aˬ htoꞈ ma teˇ ceuˬ awˬ lawn htaꞈ maˇ kʼoˆ, taˇ dawˇ hkiˉ.” Nawˬ hui bon lawˬ ve leh lawˬ hkawˉ ve awˬ hkʼaw lo hkʼa lawˬ gaˇ ve teˇ hpaˍ Gʼuiˬ sha htaꞈ hto piˇ˗oˆ. Ca dawˇ maˇ gaˬ ve dawˇ sha gaˇ sha ve teˇ ceuˬ Gʼuiˬ sha peꞈ laˇ tuˬ yoˬ.—Hpiˇliˇpiˆ 4:6, 7 gʼaw sheˍ.

17. Gʼuˇ suhˍ teˇ lawn hkʼaw ngaˬ hui aˬ htoꞈ ma htaꞈ gʼa henˇ tuˬ le?

¹⁷ Gʼuiˇ˗enˍ daꞈ ve chaw awˬ leh meuˇ lo gaˬ la yoˬ te leh gʼaˇ hteꞈ gʼuiˇ ve hkʼe, ngaˬ hui a shaꞈ awˬ pon gʼuiˇ chehˇ ve awˬ leh meuˇ hkʼa gaˬ gʼuiˇ gʼa tuˬ coˇ caˇ sheˍ. Ngaˬ hui awˬ gʼuˇ suhˍ hpawˇ daꞈ jaˇ ve dawˇ law kuiˬ htaꞈ hkʼa dehꞈ dawˇ nyi leh te gʼa ve teˇ ceuˬ le le te gaˇ ve yoˬ. Ngaˬ hui hkʼaˬ hkʼe te cawˇ ve yaꞈ kʼaw htaꞈ hteˇ˗ehˍ kʼai leh, yeunˇ hkanˍ ve hkʼaw hkʼaˬ hkʼe te kʼawꞈ gʼuiˇ gʼa tuˬ le? Aˬ htoꞈ ma a yeˇ uiˍ jaˇ ve ngaˬ hui hkʼa dehꞈ leuˆ yuˬ gʼa tuˬ, gʼuˇ suhˍ teˇ lawn hkʼaw gʼa henˇ tuˬ yoˬ.—Hpiˇliˇpiˆ 1:9, 10.