1. (a) Yaˬhoˉvaˬ lehˬ ngaˬ hui htaꞈ aˬ htoꞈ ma ve dawˇ law kuiˬ peꞈ laˇ ve le? (b) Gʼuiˬ sha htaꞈ law ve aˬ htoꞈ ma kʼoˆ gaˇ ve le? (Awˬ maiˉ hkʼaw nyi sheˍ.)

 Yaˬhoˉvaˬ htaꞈ haꞈ ve chaw teˇ gʼaˇ le le htaꞈ yawˇ daꞈ jaˇ ve dawˇ law kuiˬ piˇ ve yoˬ. Maˇ maw ve awˬ yanˇ, dawˇ haˍ ve, naˬ ve, leh suh ve, chi ve teˇ hpaˍ htaꞈ Gʼuiˬ sha maˇ kʼawꞈ cawˬ tcuh tuˬ yoˬ. (Hpeuꞈ maˍ ve 21:3, 4) Leh Gʼuiˬ sha lehˬ “nyi ma nuˇ nehˬ ve chaw hui” htaꞈ ga piˇ tuˬ yoˬ. Chaw chi teˇ hpaˍ lehˬ Yaˬhoˉvaˬ htaꞈ law chehˇ ve chaw hpehꞈ leh miˬ guiˬ hkʼoˆ Paˍraˍdiˇsuˆ hpehꞈ tuˬ te tuˬ yoˬ. (Chiˇ mvuh ve 37:9-11) Oˇ ve teˇ yanˇ ngaˬ hui teˇ gʼaˇ le le Yaˬhoˉvaˬ geh meuˆ daꞈ jaˇ tuˬ yoˬ. Chi lehˬ daꞈ jaˇ ve dawˇ law kuiˬ hpehꞈ ve yoˬ. Yaˬhoˉvaˬ lehˬ ka tiꞈ te taˍ ve hkʼa peu˗eˬ htaꞈ awˬ tehˬ hpehꞈ tcuh tuˬ yoˬ tehꞈ ngaˬ hui yonˍ gʼa tuˬ aˬ htoꞈ ma te laˇ ve le? Yawˇ lehˬ ka tiꞈ yeˬ jaˇ. Hkʼe te leh, ngaˬ hui “Gʼuiˬ sha htaꞈ” gʼaˇ va ve yoˬ. * (Chiˇ mvuh ve 27:14) Yaˬhoˉvaˬ yawˇ ve a loˍ hkʼa peu˗eˬ biˇ la tuˬ te htaˇ hkʼa gaˬ ngaˬ hui ha lehˬ ha kʼa ve hkʼaw yeunˇ hkanˍ leh law chehˇ cawˇ ve yoˬ.—Iˉsaˍyaˆ 55:10, 11.

2. Yaˬhoˉvaˬ yawˇ ka tiꞈ te taˍ ve htaꞈ caˉ daꞈ ve aˬ htoꞈ ma te kʼai peuˬ˗oˬ ve le?

² Ponˬ laˬ htaˇ Yaˬhoˉvaˬ yawˇ ka tiꞈ te taˍ ve htaꞈ awˬ tehˬ te ve tehꞈ ngaˬ hui gʼa mawˬ˗oˬ ve yoˬ. Tawˇ pa haˉ te kʼo, Hpeuꞈ maˍ ve liꞈ hkʼaw ka tiꞈ te taˍ laˇ ve awˬ leh meuˇ ve awˬ yanˇ gaˬ kʼo, mvuhˇ miˬ teˇ peˆ le le, chaw teˇ ceuˬ le le, tawˇ hkawˇ teˇ ceuˬ le le, teˇ moˍ tiˉ te leh Yaˬhoˉvaˬ htaꞈ oˉ kʼoˍ pui tuˬ yoˬ. Leh ngaˬ hui “chaw awˬ moˍ lonˉ” htaꞈ gʼa mawˬ ve yoˬ. Chi beuꞈ teˇ co˗e awˬ tehˬ awˬ na chi hkʼe hpehꞈ ve yoˬ. (Hpeuꞈ maˍ ve 7:9, 10) Yawˇ hui lehˬ mvuhˇ miˬ teˇ peˆ le le, chaw teˇ ceuˬ le le, tawˇ hkawˇ teˇ ceuˬ le le, hpehꞈ laˬ ve leh chaw liˇ vaˇ liˇ maˇ shuˍ daꞈ ve  htawˇ, yawˇ hui awˬ viˉ awˬ nyi haꞈ daꞈ ve hkʼe haꞈ daꞈ ve leh ha lehˬ ha kʼa teˇ geh chehˇ ve yoˬ. (Chiˇ mvuh ve 133:1; Yoˇhanˬ 10:16) Chaw awˬ moˍ lonˉ chi lehˬ daꞈ ve awˬ lawn sha tanˇ nyi ma pfuhˇ ve hkʼaw hto toˇ leh miˬ guiˬ chi aꞈ kehˉ daꞈ tuˬ yoˬ tehꞈ dawˇ law kuiˬ htaꞈ kaꞈ hto toˇ ve yoˬ. (Maꞈhtehˍ 28:19, 20; Hpeuꞈ maˍ ve 14:6, 7; 22:17) Nawˬ chaw awˬ moˍ lonˉ chi ve hkʼaw teˇ gʼaˇ hpehꞈ ve kʼo, dawˇ law kuiˬ chi ve htaꞈ law chehˇ cawˇ ve yoˬ.

3. Saˍtanˍ lehˬ aˬ htoꞈ ma dawˇ teh taˍ ve le?

³ Saˍtanˍ lehˬ nawˬ htaꞈ dawˇ law kuiˬ maˇ cawˬ tcuh gaˇ. Saˍtanˍ lehˬ Yaˬhoˉvaˬ nawˬ htaꞈ maˇ haꞈ leh a yeˇ maˇ yuˬ laˇ ve tehꞈ yonˍ tcuh gaˇ leh yawˇ ka tiꞈ te taˍ ve htaꞈ maˇ gʼaꞈ te ve tehꞈ kaꞈ yonˍ tcuh gaˇ ve yoˬ. Saˍtanˍ ngaˬ hui htaꞈ dawˇ law kuiˬ maˇ cawˬ tuˬ te laˇ gʼa ve kʼo, ngaˬ hui haꞈ hanˉ ve maˇ cawˬ leh Yaˬhoˉvaˬ ve kanˉ kaꞈ maˇ te la ve yoˬ. Saˍtanˍ lehˬ Yawˇbaˆ htaꞈ dawˇ law kuiˬ maˇ cawˬ tuˬ te piˇ leh Gʼuiˬ sha ve kanˉ maˇ te tuˬ hkʼaˬ hkʼe te piˇ ve awˬ lawn chi ve hkʼaw teˇ geh henˇ tuˬ yoˬ.

4. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le? (Yawˇbaˆ 1:9-12)

⁴ Yawˇbaˆ Gʼuiˬ sha htaꞈ ka tiꞈ maˇ yeˬ tuˬ Saˍtanˍ aˬ htoꞈ ma ve awˬ hkʼaˇ htaꞈ yehˇ leh te piˇ ve, awˬ lawn chi ve hkʼaw ngaˬ hui teˇ geh henˇ tuˬ yoˬ. (Yawˇbaˆ 1:9-12 gʼaw sheˍ.) Leh ngaˬ hui Yawˇbaˆ htaꞈ hkʼaˬ hkʼe te henˇ yuˬ gʼa tuˬ kaꞈ teˇ geh henˇ tuˬ yoˬ. Yaˬhoˉvaˬ ngaˬ hui htaꞈ haꞈ leh yawˇ ka tiꞈ te taˍ ve htaꞈ hkʼaˬ htaˆ kaꞈ awˬ tehˬ te ve tehꞈ chi ve kaꞈ ngaˬ hui teˇ geh henˇ tuˬ yoˬ.

5-6. Yawˇbaˆ teˇ hkui teˇ yanˇ aˬ htoꞈ ma gʼa hpuˇ ve le?

⁵ Awˉ lawˉ htaˇ, Yawˇbaˆ a shaꞈ teꞈ kuiˬ hkʼaw ha lehˬ jaˇ. Yawˇ Yaˬhoˉvaˬ geh meuˆ daꞈ ve yoˬ. Yawˇ ve yehˬ kʼa hkʼaw ve chaw haꞈ daꞈ leh paw sha jaˇ ve yoˬ. (Yawˇbaˆ 1:1-5) Yaꞈ hkʼaˇ, teˇ nyi gaˬ leh Yawˇbaˆ teˇ ceuˬ le le shonˇ kʼai ve yoˬ. (Yawˇbaˆ 1:13-17) Peuˬ leh yawˇ ve yaˇ hkʼa peu˗eˬ kaꞈ suh˗e ve yoˬ. Chi hkʼe gʼa hpuˇ htaˇ hkʼaˬ hkʼe taw tuꞈ hkanˍ jaˇ ve htaꞈ chi beuꞈ teˇ co˗e ve awˬ pa awˬ e lehˬ yawˇ hui ve yaˇ suh˗e htaˇ shiˍ gʼa ve yoˬ hehˉ. Oˇ ve teˇ yanˇ Yawˇbaˆ leh yawˇ ve awˬ miˇ ma yaˇ 10 gʼaˇ laꞈ tcuh laꞈ hanˉ ve hkʼaw suh˗e ve shiˍ htaˇ, cheˆ˗ehˬ kʼai leh nyi ma luˬ jaˇ ve yoˬ. Yawˇbaˆ nyi ma luˬ jaˇ ve hkʼaw aˉ poꞈ zuhꞈ suhˍ leh miˬ chaˇ hkʼoˆ lo mui taˍ ve anˇ tuˬ maˇ loˍ.—Yawˇbaˆ 1:18-20.

⁶ Peuˬ hkʼawꞈ nawˉ Saˍtanˍ lehˬ Yawˇbaˆ awˬ to naˬ tuˬ kaꞈ te piˇ leh hpehꞈ bawˬ jaˇ tuˬ kaꞈ te piˇ ve yoˬ. (Yawˇbaˆ 2:6-8; 7:5) Yawˇbaˆ lehˬ oˇ teˇ taw lo chehˇ ve chaw yawˇ htaꞈ yawˆ yan piˇ jaw ve yoˬ. Laiˉ gʼaˇ yawˇ geh awˬ lawn ca na la leh beˆ maˍ laˇ tuˬ kaꞈ lawˬ jaw ve yoˬ. (Yawˇbaˆ 31:18) Yaꞈ hkʼaˇ, chi teˇ hkui yawˇ geh chaw teˇ gʼaˇ kaꞈ maˇ laˬ gaˇ˗o. Awˬ viˉ awˬ nyi, awˬ chawˇ, maˇ heˆ leh awˬ ceˬ teˇ hpaˍ kaꞈ yawˇ geh maˇ laˬ˗o.—Yawˇbaˆ 19:13, 14, 16.

7. (a) Yawˇbaˆ yawˇ gʼa hpuˇ ve haiˬ ve awˬ ceuˬ chi hkʼe ve hkʼaˬ kaˬ lo laˬ ve tehꞈ dawˇ ve le? Yaꞈ hkʼaˇ, yawˇ aˬ htoꞈ ma maˇ te gaˇ ve le? (b) Awˬ han chi ve hkʼaw gʼa mawˬ ve, Hkriꞈ yaˇ lehˬ Yawˇbaˆ hkʼa shuˍ shoꞈ shaꞈ ve aˬ htoꞈ ma gʼa hpuˇ ve le?

⁷ Yawˇbaˆ chi hkʼe gʼa hpuˇ ve lehˬ yawˇ htaꞈ Yaˬhoˉvaˬ nyi hkʼaˇ maˇ suh ve tehꞈ Saˍtanˍ Yawˇbaˆ htaꞈ dawˇ tcuh gaˇ ve yoˬ. Tawˇ pa haˉ te kʼo, Yawˇbaˆ ve yaˇ 10 gʼaˇ yehˬ hkʼaw hti caˇ hti dawˬ chehˇ htaˇ, Saˍtanˍ mvuhˇ haw htaꞈ yehˇ leh te luˬ piˇ ve yoˬ. (Yawˇbaˆ 1:18, 19) Leh Saˍtanˍ lehˬ mvuhˇ naw ma hkʼoˆ lo aˬ miˍ ce la tcuh leh Yawˇbaˆ ve to nuˇ to shaˆ leh awˬ ceˬ hkʼa peu˗eˬ htaꞈ teˍ pehˍ tcuh ve yoˬ. (Yawˇbaˆ 1:16) Mvuhˇ haw lonˉ leh aˬ miˍ chi lehˬ yawˇ hkʼaˇ yawˇ hpehꞈ la ve maˇ heˆ. Chi ve lehˬ Yaˬhoˉvaˬ te laˇ ve tehꞈ Yawˇbaˆ dawˇ ve yoˬ. Yawˇbaˆ lehˬ yawˇ Yaˬhoˉvaˬ nyi ma luˬ tuˬ te piˇ ve tehꞈ dawˇ ve yoˬ. Chi hkʼe hpehꞈ ve htawˇ, yawˇ Gʼuiˬ sha htaꞈ venˇ baˆ maˇ taˍ. Yawˇbaˆ kʼoˆ ve, Gʼuiˬ sha lehˬ yawˇ htaꞈ daꞈ ve awˬ ceuˬ laiˉ hkʼawꞈ peꞈ laˇ ve yoˬ. Yawˇ Gʼuiˬ sha geh daꞈ ve awˬ ceuˬ gʼa ve kʼo, maˇ daꞈ ve awˬ ceuˬ maˇ gʼa hpehꞈ ve laˇ tehꞈ yawˇ dawˇ ve yoˬ. Hkʼe te leh, Yawˇbaˆ kʼoˆ ve, ‘Yaˬhoˉvaˬ ve awˬ meh htaꞈ chiˇ uiˍ chiˇ mvuh piˇ˗oˆ.’ (Yawˇbaˆ 1:20, 21; 2:10) Yawˇbaˆ lehˬ hpu, nyi ma, leh awˬ to hpawˇ shoꞈ shaꞈ ve gʼa hpuˇ ve htawˇ, yawˇ Yaˬhoˉvaˬ htaꞈ ka tiꞈ yeˬ chehˇ sheˍ. Yawˇ chi hkʼe gʼa hpuˇ ve htawˇ, Saˍtanˍ lehˬ Yawˇbaˆ htaꞈ te luˬ piˇ chehˇ sheˍ.

8. Saˍtanˍ lehˬ Yawˇbaˆ htaꞈ aˬ htoꞈ ma kʼawꞈ te piˇ ve le?

 ⁸ Saˍtanˍ lehˬ awˬ nu ve teˇ hkʼaˇ htaꞈ kʼawꞈ yehˇ leh Yawˇbaˆ htaꞈ te luˬ piˇ ve yoˬ. Saˍtanˍ lehˬ Yawˇbaˆ ve awˬ chawˇ maˇ daꞈ ve 3 gʼaˇ htaꞈ cuˇ leh Yawˇbaˆ yawˇ awˬ to awˬ hpfuhˇ maˇ cawˬ ve tehꞈ dawˇ tuˬ te tcuh ve yoˬ. Yawˇbaˆ haiˬ ve laiˉ ceuˬ htaꞈ te ve pa taw maˇ daꞈ ve awˬ ceuˬ gʼa hpuˇ ve tehꞈ awˬ chawˇ 3 gʼaˇ kʼoˆ ve yoˬ. (Yawˇbaˆ 22:5-9) Chi hkʼoˆ kaꞈ, Yawˇbaˆ hkʼaˬ hkʼe taw coˇ caˇ ve htawˇ, Yaˬhoˉvaˬ yawˇ htaꞈ nyi hkʼaˇ maˇ suh taˍ tehꞈ dawˇ tuˬ yawˇ hui te piˇ ve yoˬ. (Yawˇbaˆ 4:18; 22:2, 3; 25:4) Yawˇbaˆ ve maˇ daꞈ ve awˬ chawˇ 3 gʼaˇ chi lehˬ, Yaˬhoˉvaˬ yawˇ htaꞈ haꞈ leh awˬ tehˬ nyi haꞈ shaˉ laˇ ve laˇ tehꞈ yawˇ htawˇ dawˇ nawˬ dawˇ cawˬ tuˬ te piˇ ve yoˬ. Leh Yawˇbaˆ te ve awˬ ceuˬ Gʼuiˬ sha awˬ pon awˬ hpfuhˇ cawˬ˗aw laˇ tehꞈ dawˇ tuˬ kaꞈ te piˇ ve yoˬ. Yawˇ ve awˬ chawˇ 3 gʼaˇ chi ve yawˇ htaꞈ tawˇ yaw piˇ ve lehˬ, yawˇ nyi ma gʼaˇ hteꞈ kʼawꞈ luˬ tuˬ te piˇ ve yoˬ.

9. Yawˇbaˆ haꞈ hanˉ ve leh yonˍ yeˬ ve cawˬ tuˬ aˬ htoꞈ ma ga piˇ ve le?

⁹ Yawˇbaˆ lehˬ mawˇ gʼawˆ baˬ taˍ kuiˬ lo mui taˍ leh awˬ to hkʼa peu˗eˬ naˬ jaˇ ve htaꞈ dawˇ nyi sheˍ. (Yawˇbaˆ 2:8) Yawˇbaˆ ve awˬ chawˇ 3 gʼaˇ kaꞈ yawˇ htaꞈ maˇ daꞈ ve awˬ lawn ceh tiˉ kʼoˆ piˇ ve yoˬ. Yawˇ aˬ htoꞈ ma te ve htawˇ, awˬ hpfuhˇ maˇ cawˬ leh tcuhˉ kuiˬ maˇ cawˬ tehꞈ kʼoˆ piˇ ve yoˬ. Yawˇbaˆ gʼa hpuˇ ve tuꞈ ve hkanˍ ve lehˬ haˉ pui hehnˇ jaˇ ve htaꞈ shuˍ leh yaˇ suh˗e ve dawˇ haˍ jaˇ ve kaꞈ nyi ma htaꞈ heuˆ jaˇ. Awˉ lawˉ htaˇ Yawˇbaˆ lehˬ taꞈ iˉ mui taˍ leh tawˇ kaꞈ maˇ yaw. (Yawˇbaˆ 2:13–3:1) Yawˇbaˆ taꞈ iˉ mui taˍ ve lehˬ Gʼuiˬ sha htaꞈ maˇ yonˍ˗o ve tehꞈ yawˇ ve awˬ chawˇ 3 gʼaˇ dawˇ ve yoˬ. Leh yawˇ hui dawˇ ve maˇ cawˇ. Oˇ ve teˇ yanˇ Yawˇbaˆ yawˇ hui ve mehˆ hpfuhˇ htaꞈ nyi leh kʼoˆ piˇ ve, ‘suh htaˇ hkʼa gaˬ ngaˬ Gʼuiˬ sha htaꞈ ka tiꞈ yeˬ tuˬ yoˬ.’ (Yawˇbaˆ 27:5) Yawˇbaˆ tuꞈ ve hkanˍ ve chi hkʼe taw gʼa hpuˇ ve htawˇ, yawˇ haꞈ hanˉ ve leh yonˍ yeˬ ve cawˬ tuˬ aˬ htoꞈ ma ga piˇ ve le? Yawˇbaˆ awˬ meꞈ awˬ hponˇ luˬ kʼai ve htawˇ, yawˇ dawˇ law kuiˬ cawˬ sheˍ. Yaˬhoˉvaˬ yawˇ htaꞈ haꞈ leh ga laˇ tuˬ yoˬ tehꞈ yawˇ yonˍ sheˍ ve yoˬ. Yawˇ suh˗e ve htawˇ, Yaˬhoˉvaˬ yawˇ htaꞈ kʼawꞈ teꞈ tu la tcuh laˇ tuˬ yoˬ tehꞈ yawˇ shiˍ ve yoˬ.—Yawˇbaˆ 14:13-15.

10. Yawˇbaˆ ve awˬ lawn ngaˬ hui htaꞈ aˬ htoꞈ ma maˍ laˇ ve le?

¹⁰ Yawˇbaˆ ve awˬ lawn ngaˬ hui htaꞈ maˍ laˇ ve, Saˍtanˍ lehˬ ngaˬ hui Yaˬhoˉvaˬ htaꞈ baˬ taˉ tuˬ nyiˉ laˇ maˇ gʼa leh yawˇ lehˬ teˇ ceuˬ le le htaꞈ mawˬ ve yoˬ. Chi hkʼoˆ kaꞈ, Yawˇbaˆ ve awˬ lawn a yeˇ uiˍ ve laiˉ lawn htaꞈ ngaˬ hui na gʼa tuˬ ga laˇ ve yoˬ. Chi teˇ hkui teˇ lawn lawn htaꞈ teˇ geh nyi sheˍ.

11. Ngaˬ hui caˉ leh Yaˬhoˉvaˬ htaꞈ gʼaˇ va ve kʼo, aˬ htoꞈ ma htaꞈ yonˍ gʼa ve le? (Yaˍkoˆ 4:7)

¹¹ Ngaˬ hui caˉ leh Yaˬhoˉvaˬ htaꞈ gʼaˇ va ve kʼo, Yawˇbaˆ ve awˬ lawn ngaˬ hui shiˍ tuˬ ga laˇ ve yoˬ. Ngaˬ hui shoꞈ shaꞈ ve aˬ htoꞈ ma gʼa hpuˇ ve htawˇ maˇ kʼoˆ, ngaˬ hui yeunˇ hkanˍ gʼaˇ leh Saˍtanˍ htaꞈ kaꞈ tawˍ daꞈ gʼaˇ ve yoˬ. Leh awˬ bon hkʼaˬ hkʼe gʼa tuˬ le? Saˍtanˍ ngaˬ hui geh hpaw˗e tuˬ yoˬ tehꞈ Liꞈ hpu hkʼaw ngaˬ hui yonˍ gʼa tuˬ ga laˇ ve yoˬ.—Yaˍkoˆ 4:7 gʼaw sheˍ.

12. Kʼawꞈ teꞈ tu la ve dawˇ law kuiˬ Yawˇbaˆ htaꞈ hkʼaˬ hkʼe ga piˇ ve le?

¹² Kʼawꞈ teꞈ tu la ve dawˇ law kuiˬ htaꞈ ngaˬ hui gʼa yonˍ cawˇ ve yoˬ. Peuˬ taˉ ve teˇ lawn hkʼaw ngaˬ hui gʼa henˇ˗oˬ ve, Saˍtanˍ lehˬ suh ve htaꞈ kawˆ ve yehˇ leh ngaˬ hui Yaˬhoˉvaˬ htaꞈ ka tiꞈ maˇ yeˬ tuˬ te laˇ ve yoˬ. Saˍtanˍ kʼoˆ ve, Yawˇbaˆ lehˬ yawˇ awˬ to maˇ gʼa suh tuˬ Gʼuiˬ sha htaꞈ kaꞈ baˬ taˉ gʼa ve yoˬ. Yawˇ chi hkʼe kʼoˆ ve maˇ cawˇ. Yawˇbaˆ yawˇ a shaꞈ teꞈ kuiˬ hkʼaw haˍ jaˇ ve awˬ ceuˬ gʼa hpuˇ leh gʼa suh˗e tuˬ yoˬ tehꞈ dawˇ ve htawˇ, yawˇ aˬ htoꞈ ma gʼa hpuˇ ve kaꞈ Yaˬhoˉvaˬ htaꞈ ka tiꞈ yeˬ tuˬ yoˬ tehꞈ dawˇ ve yoˬ. Yaˬhoˉvaˬ lehˬ daꞈ jaˇ ve Gʼuiˬ sha hpehꞈ leh hkʼaˬ htaˆ kaꞈ cawˇ ve htaꞈ te ve tehꞈ Yawˇbaˆ yonˍ ve yoˬ. Hkʼe te leh yawˇ yeunˇ hkanˍ gʼaˇ ve yoˬ. Yaˬhoˉvaˬ chi teˇ hkui Yawˇbaˆ htaꞈ maˇ ga piˇ ve htawˇ, awˬ gʼuˇ suhˍ hpawˇ Yaˬhoˉvaˬ Yawˇbaˆ htaꞈ kʼawꞈ teꞈ tu la piˇ tuˬ yoˬ tehꞈ yonˍ ve yoˬ. Yawˇbaˆ lehˬ kʼawꞈ teꞈ tu la ve dawˇ law kuiˬ htaꞈ hkʼa dehꞈ yonˍ ve yoˬ. Yawˇbaˆ hkʼa shuˍ ngaˬ hui kaꞈ kʼawꞈ teꞈ tu la ve dawˇ law kuiˬ htaꞈ hkʼa dehꞈ yonˍ ve kʼo, ngaˬ hui Yaˬhoˉvaˬ htaꞈ ka tiꞈ maˇ yeˬ tuˬ teˇ ceuˬ kaꞈ te laˇ maˇ gʼa leh ngaˬ hui gʼa suh˗e ve htawˇ Yaˬhoˉvaˬ htaꞈ baˬ taˉ tuˬ kaꞈ te laˇ maˇ gʼa.

13. Saˍtanˍ Yawˇbaˆ htaꞈ te luˬ piˇ ve awˬ hkʼaˇ teˇ hpaˍ htaꞈ aˬ htoꞈ ma te ngaˬ hui dawˇ nyi cawˇ ve le?

¹³ Saˍtanˍ Yawˇbaˆ htaꞈ yehˇ ve awˬ hkʼaˇ ngaˬ hui gʼa dawˇ nyi cawˇ ve yoˬ. Awˬ lawn kʼo, Saˍtanˍ lehˬ awˬ hkʼaˇ chi hkʼe ve ngaˬ hui htaꞈ kaꞈ yehˇ ve yoˬ. Saˍtanˍ kʼoˆ ve, ‘Chaw yaˇ [Yawˇbaˆ ceh tiˉ maˇ heˆ] a shaꞈ gʼa teꞈ chehˇ hpehꞈ tuˬ yawˇ hkʼa cawˬ ve mawˇ hkʼa peu˗eˬ ve htaꞈ shonˇ kʼai piˇ hpehꞈ ve yoˬ.’ (Yawˇbaˆ 2:4, 5) Saˍtanˍ kʼoˆ ve, ngaˬ hui Yaˬhoˉvaˬ htaꞈ awˬ tehˬ awˬ na maˇ haꞈ. Ngaˬ hui a shaꞈ teꞈ kuiˬ hkʼaw teˇ ceuˬ ceuˬ gʼa hpuˇ ve kʼo, ngaˬ hui a shaꞈ gʼa pon tuˬ Gʼuiˬ sha htaꞈ baˬ taˉ tuˬ yoˬ. Saˍtanˍ kʼawꞈ kʼoˆ sheˍ ve, Gʼuiˬ sha kaꞈ ngaˬ hui htaꞈ maˇ haꞈ. Leh ngaˬ hui Gʼuiˬ sha awˬ pon te piˇ ve htaꞈ yawˇ awˬ hpfuhˇ maˇ shiˍ. Yaꞈ hkʼaˇ, ngaˬ hui Saˍtanˍ te ve awˬ hkʼaˇ htaꞈ shiˍ leh ngaˬ hui htaꞈ maˇ heˍ tcuh.

14. Tuꞈ ve hkanˍ ve ngaˬ hui aˬ htoꞈ ma htaꞈ shiˍ tuˬ te laˇ ve le? Tawˇ pa haˉ kʼoˆ maˍ laˇ sheˍ.

¹⁴ Tuꞈ ve hkanˍ ve gʼa hpuˇ ve lehˬ ngaˬ hui hkʼaˬ hkʼe ve chaw hpehꞈ ve shiˍ tuˬ te laˇ ve yoˬ. Yawˇbaˆ tuꞈ ve hkanˍ ve gʼa hpuˇ ve kaꞈ yawˇ hkʼaˬ kaˬ lo awˬ gʼaˇ nuˇ ve htaꞈ mawˬ leh gu tuˬ kaꞈ te piˇ ve yoˬ. Tawˇ pa haˉ te kʼo, yawˇ lehˬ nyi ma nuˇ nehˬ jaˇ ve yoˬ. (Yawˇbaˆ 42:3) Ngaˬ hui shoꞈ shaꞈ ve maˇ heˆ leh tuꞈ ve hkanˍ ve gʼa hpuˇ htaˇ, ngaˬ hui hkʼaˬ hkʼe ve chaw hpehꞈ ve shiˍ tuˬ te laˇ ve yoˬ. Awˬ viˉ awˬ nyi Niˆhko˗lai * yawˇ kaꞈ chi hkʼe shiˍ tuˬ te piˇ ve yoˬ. Niˆhko˗lai lehˬ a anˍ laiˉ ceuˬ cawˬ ve htawˇ, htawnˍ hkʼaw lo gʼa chehˇ ve yoˬ. Yawˇ kʼoˆ ve, “Hkriꞈ yaˇ ve te hkʼaˇ dawˇ hkʼaˇ hkʼaˬ hkʼe hpehꞈ ve htaꞈ shiˍ tuˬ, htawnˍ hkʼaw lo ve a shaꞈ teꞈ hkʼaˇ lehˬ daˆ dawˆ nyi tuˬ awˬ hkʼeun (X˗ray) htaꞈ shuˍ ve yoˬ.” Ngaˬ hui gʼaˇ nuˇ kuiˬ hkʼaˬ kaˬ lo cawˬ ve tehꞈ shiˍ ve kʼo, ngaˬ hui kaꞈ a shu yawˇ awˬ to htaꞈ pa gʼa ve yoˬ.

15. Ngaˬ hui a shu ve hkawˇ na cawˇ ve le? Leh aˬ htoꞈ ma pa taw le?

¹⁵ Ngaˬ hui Yaˬhoˉvaˬ hkawˇ gʼa na ve yoˬ. Canˇ paˍ htaꞈ maˇ heˆ. Yaˬhoˉvaˬ Yawˇbaˆ geh tawˇ yaw daꞈ htaˇ, yawˇ Yaˬhoˉvaˬ hkawˇ hkʼa dehꞈ na ve  yoˬ. Yaˬhoˉvaˬ Yawˇbaˆ geh laiˉ ceuˬ yaw daꞈ leh Yaˬhoˉvaˬ Yawˇbaˆ htaꞈ na piˇ ve, ‘ngaˬ kanˇ paˆ hkʼaˬ hkʼe taw cawˬ ve nawˬ maw˗aw laˇ? Nawˬ gʼa hpuˇ ve teˇ ceuˬ le le ngaˬ mawˬ ve tehꞈ nawˬ shiˍ˗aw laˇ? Ngaˬ nawˬ htaꞈ maˇ dawˇ haˍ leh nawˬ htaꞈ maˇ ga laˇ gʼa ve tehꞈ nawˬ dawˇ˗aw laˇ?’ Yaˬhoˉvaˬ hkʼaˬ hkʼe taw daꞈ ve Yawˇbaˆ shiˍ leh na gʼa la ve yoˬ. Yawˇbaˆ nyi ma nuˇ nehˬ ve hkʼaw kʼoˆ ve, “oˇ ve teˇ yanˇ ngaˬ lehˬ, shu kʼoˆ laˇ ve awˬ ceuˬ teˇ hpaˍ htaꞈ ceh gʼa shiˍ ve yoˬ. Yaꞈ hkʼaˇ, chi beuꞈ nawˬ htaꞈ ngaˬ ve mehˆ shiˍ hkʼa tawˍ lehˆ gʼa mawˬ taˍ peuˬ.” (Yawˇbaˆ 42:5) Yawˇbaˆ chi ve teˇ tawn htaꞈ kʼoˆ htaˇ, mawˇ gʼawˆ baˬ kuiˬ lo yawˇ mui taˍ ve, yawˇ ve awˬ to hkʼaw kuiˬ behˬ kuiˬ hkʼa biˇ cawˬ ve, leh yaˇ teˇ hpaˍ suh˗e ve nyi ma luˬ jaˇ ve yoˬ. Yaꞈ hkʼaˇ, yawˇ chi hkʼe gʼa hpuˇ ve htawˇ, Yaˬhoˉvaˬ Yawˇbaˆ htaꞈ haꞈ leh nyi hkʼaˇ suh jaˇ ve tehꞈ Yawˇbaˆ shiˍ tuˬ te piˇ sheˍ ve yoˬ.—Yawˇbaˆ 42:7, 8.

16. Iˉsaˍyaˆ liꞈ 49:15, 16 hkʼaw kʼoˆ taˍ ve hkʼe, ngaˬ hui tuꞈ ve hkanˍ ve gʼa hpuˇ htaˇ, aˬ htoꞈ ma htaꞈ tawnˇ taˍ cawˇ ve le?

¹⁶ Chi beuꞈ teˇ co˗e kaꞈ hkʼa shuˍ shuˍ, laiˉ gʼaˇ ngaˬ hui htaꞈ nyi cha leh maˇ daꞈ ve te laˇ ve yoˬ. Tawˇ pa haˉ te kʼo, yawˇ hui ngaˬ hui ve awˬ meh leh Gʼuiˬ sha ve kanˉ hkʼaˇ luˬ tuˬ coˇ caˇ leh te laˇ ve yoˬ. Chi hkʼoˆ kaꞈ, “hkʼa mvuhˇ hkʼa na” kʼoˆ laˇ ve yoˬ. (Maꞈhtehˍ 5:11) Yawˇbaˆ ve awˬ lawn ngaˬ hui gʼa henˇ ve hkʼe, ngaˬ hui tuꞈ ve hkanˍ ve gʼa hpuˇ ve htawˇ, ka tiꞈ yeˬ gʼa tuˬ yoˬ tehꞈ Yaˬhoˉvaˬ yonˍ gʼa ve yoˬ. Yaˬhoˉvaˬ ngaˬ hui htaꞈ haꞈ leh yawˇ htaꞈ gʼaˇ va ve chaw htaꞈ yawˇ maˇ chiˇ baˬ. (Iˉsaˍyaˆ 49:15, 16 gʼaw sheˍ.) Chi htaꞈ pa taw, Gʼuiˬ sha ve canˇ paˍ ngaˬ hui htaꞈ hkʼa mvuhˇ hkʼa na kʼoˆ laˇ ve tawˇ htaꞈ a yeˇ taˇ yuˬ. Tuˬraˬkiˬ mvuhˇ miˬ lo chehˇ ve awˬ viˉ awˬ nyi Cin leh yawˇ ve yehˬ kʼa tuꞈ ve hkanˍ ve laiˉ ceuˬ gʼa hpuˇ ve yoˬ. Yawˇ kʼoˆ ve, “Gʼuiˬ sha ve kanˉ te ve chaw htaꞈ caˉ daꞈ ve heˍ ve awˬ lawn na ve kʼo, ngaˬ hui nyi ma luˬ  tuˬ te laˇ ve yoˬ. Hkʼe te leh, ngaˬ hui Gʼuiˬ sha ve mvuhˇ miˬ dawˇ law kuiˬ htaꞈ a yeˇ yuˬ leh Gʼuiˬ sha ve kanˉ coˇ caˇ leh te ve yoˬ. Ngaˬ hui chi hkʼe te htaˇ ha lehˬ jaˇ.” Ngaˬ hui teˇ gʼaˇ le le Yawˇbaˆ hkʼa shuˍ Yaˬhoˉvaˬ hkawˇ hkʼa dehꞈ gʼa na ve yoˬ. Gʼuiˬ sha ve canˇ paˍ heˍ ve tawˇ hkawˇ lehˬ, ngaˬ hui ve dawˇ law kuiˬ htaꞈ tawˍ laˇ maˇ gʼa.

17. Heˍbrehˇ liꞈ kaˇ nanˉ uiˍ 11 hkʼaw Gʼuiˬ sha ve kanˉ te ve chaw ve awˬ lawn nawˬ htaꞈ aˬ htoꞈ ma maˍ laˇ ve le?

¹⁷ Gʼuiˬ sha ve kanˉ te ve chaw tuꞈ ve hkanˍ ve gʼa hpuˇ ve htawˇ, haꞈ hanˉ leh yonˍ yeˬ ve, Yawˇbaˆ kaꞈ teˇ gʼaˇ hpehꞈ ve yoˬ. Pawˇluꞈ Heˍbrehˇ chaw awˬ viˉ awˬ nyi htaꞈ liꞈ bvuhꞈ piˇ htaˇ, Gʼuiˬ sha ve kanˉ te ve chaw laiˉ gʼaˇ htaꞈ yawˇ kʼoˆ ve yoˬ. Pawˇluꞈ lehˬ chaw chi teˇ hpaˍ htaꞈ “shaˉ hkiˆ hkanˍ shehˍ hpaˇ chi taw taw maˇ leh, moˬ hkʼa shuˍ shuˍ” hpehꞈ ve tehꞈ kʼoˆ ve yoˬ. (Heˍbrehˇ 12:1) Gʼuiˬ sha ve kanˉ te ve chaw chi teˇ hpaˍ kaꞈ tuꞈ ve hkanˍ ve gʼa hpuˇ ve yoˬ. Yaꞈ hkʼaˇ, yawˇ hui Yaˬhoˉvaˬ geh ka tiꞈ yeˬ gʼa ve yoˬ. (Heˍbrehˇ 11:36-40) Yawˇ hui coˇ caˇ leh yeunˇ hkanˍ ve awˬ bon cawˬ˗aw laˇ? Awˬ bon cawˬ ve yoˬ. Yawˇ hui lehˬ Gʼuiˬ sha ka tiꞈ te taˍ ve teˇ ceuˬ le le awˬ tehˬ hpehꞈ la ve htaꞈ maˇ mawˬ ve htawˇ, yawˇ hui Yaˬhoˉvaˬ htaꞈ gʼaˇ va ve yoˬ. Yaˬhoˉvaˬ yawˇ hui htaꞈ haꞈ leh nyi hkʼaˇ suh ve tehꞈ yawˇ hui yonˍ gʼa ve yoˬ. Yawˇ hui yonˍ ve Yaˬhoˉvaˬ ka tiꞈ te taˍ ve teˇ ceuˬ le le awˬ tehˬ hpehꞈ la tuˬ ve htaꞈ yawˇ hui gʼa mawˬ tuˬ yoˬ. (Heˍbrehˇ 11:4, 5) Yawˇ hui ve awˬ lawn ngaˬ hui caˉ leh Yaˬhoˉvaˬ htaꞈ gʼaˇ va tuˬ ga laˇ ve yoˬ.

18. Nawˬ aˬ htoꞈ ma te tuˬ dawˇ teh taˍ ve le? (Heˍbrehˇ 11:6)

¹⁸ Chi beuꞈ teˇ ce˗e miˬ guiˬ chi hkʼoˆ lo teˇ ceuˬ le le shaˬ te shaˬ haiˬ jaˇ ve yoˬ. (2 Tiˆmoˉseˍ 3:13) Saˍtanˍ lehˬ Yaˬhoˉvaˬ ve chaw htaꞈ lawˇ nyi piˇ chehˇ sheˍ. Awˬ gʼuˇ suhˍ hpawˇ ngaˬ hui tuꞈ ve hkanˍ ve aˬ htoꞈ ma gʼa hpuˇ ve htawˇ maˇ kʼoˆ, ngaˬ hui Yaˬhoˉvaˬ awˬ pon kanˉ gʼaˇ hteꞈ coˇ caˇ te leh “teꞈ chehˇ ve Gʼuiˬ sha htaꞈ ngaˬ hui dawˇ law tcuhˉ taˍ ve” tehꞈ yonˍ ve yoˬ. (1 Tiˆmoˉseˍ 4:10) “[Yaˬhoˉvaˬ] hkʼaˬ ma haꞈ leh ha kʼaˉ puiˉ ve htaꞈ nawˬ hui gʼa mawˬ” tuˬ awˬ leh meuˇ htaˇ Gʼuiˬ sha lehˬ Yawˇbaˆ htaꞈ daꞈ ve awˬ ceuˬ teˇ hpaˍ piˇ ve tehꞈ nawˬ hui tawnˇ taˍ sheˍ. (Yaˍkoˆ 5:11) Ngaˬ hui kaꞈ hkʼaˬ htaˆ kaꞈ Yaˬhoˉvaˬ htaꞈ ka tiꞈ yeˬ sheˍ. Leh Gʼuiˬ sha lehˬ “yawˇ htaꞈ ca ve chaw hui htaꞈ awˬ bon piˇ” tuˬ yoˬ tehꞈ ngaˬ hui yonˍ gʼa ve yoˬ.—Heˍbrehˇ 11:6 gʼaw sheˍ.