1. Ngaˬ hui aˬ htoꞈ ma awˬ lawn htaꞈ kawˆ ve le?

 Awˬ viˉ awˬ nyi ve awˬ lawn htaꞈ dawˇ nyi sheˍ. Nin˗teunˇ leh Maˍriˆ * hto toˇ ve chaw loˍ jaˇ kuiˬ lo Gʼuiˬ sha ve kanˉ te gaˇ ve yoˬ. Yawˇ hui ve a shaꞈ teꞈ hkʼaˇ gʼa pa cawˇ ve tehꞈ shiˍ ve yoˬ. Yaꞈ hkʼaˇ, yawˇ hui hpu maˇ cawˬ maˇ˗oˬ ve kʼo, ha lehˬ ve cawˬ gʼa sheˍ ve laˇ tehꞈ kawˆ ve yoˬ. Awˬ nu ve teˇ gʼaˇ lehˬ Be˗nin˗a ve awˬ lawn hpehꞈ ve yoˬ. Yaˬhoˉvaˬ ve Shaˉhkiˆhkanˍ ve chaw htaꞈ tawˍ ve mvuhˇ miˬ hkʼaw yawˇ chehˇ ve yoˬ. Yawˇ Shaˉhkiˆhkanˍ ve chaw hpehꞈ la htaˇ, yawˇ fawˉ mehˍ ve htaꞈ gʼa hpuˇ tuˬ yoˬ tehꞈ shiˍ ve pa taw kawˆ jaˇ. Yaꞈ hkʼaˇ, chi aꞈ kehˉ kawˆ jaˇ ve teˇ ceuˬ lehˬ, yawˇ bon liˇ pa ve tehꞈ yehˬ kʼa hkʼaw ve chaw shiˍ ve kʼo, yawˇ hui hkʼaˬ hkʼe dawˇ tuˬ ve le? Awˬ nu ve teˇ lawn cawˬ sheˍ ve lehˬ, Va˗li˗lin ve awˬ lawn hpehꞈ ve yoˬ. Yawˇ lehˬ mvuhˇ haˉ caˉ ve a naˍ pehˉ kʼai vaiˇ jaˇ ve tehꞈ saˍ laꞈ gʼonˍ chaˬ nyi mawˬ ve yoˬ. Saˍ laꞈ gʼonˍ Va˗li˗lin ve yonˍ hkʼaˇ htaꞈ yawˆ yan laˇ tuˬ, yawˇ gʼa shawˆ hpeꞈ htaˇ awˬ suhˍ maˇ yehˇ laˇ tuˬ, chi hkʼe ve saˍ laꞈ gʼonˍ htaꞈ ca ve yoˬ. Leh yawˇ suh ve htaꞈ kaꞈ kawˆ ve yoˬ.

2. Aˬ htoꞈ ma te ngaˬ hui kawˆ ve htaꞈ gʼa gʼaˇ tcuh cawˇ ve le?

² Nawˬ oˇ hkʼe ve htaꞈ kawˆ jaw˗aw laˇ? Ngaˬ hui laiˉ gʼaˇ kaꞈ oˇ hkʼe ve htaꞈ gʼa hpuˇ jaw˗oˬ. Ngaˬ hui kawˆ ve htaꞈ yuˬ tiˍ tuˬ maˇ shiˍ ve kʼo, ngaˬ hui Yaˬhoˉvaˬ geh meuˆ daꞈ ve dawˇ cheˆ ve htaꞈ heuˆ la kuiˬ cawˬ ve yoˬ. Saˍtanˍ kaꞈ ngaˬ hui htaꞈ chi hkʼe hpehꞈ tcuh gaˇ ve yoˬ. Chi hkʼoˆ kaꞈ, ngaˬ hui kawˆ leh Gʼuiˬ sha ve awˬ liˇ awˬ hkʼaˇ htaꞈ maˇ na yuˬ tuˬ Saˍtanˍ coˇ caˇ ve yoˬ. Leh daꞈ ve awˬ lawn sha tanˇ hto toˇ tehꞈ kʼoˆ ve htaꞈ ngaˬ hui maˇ na yuˬ tcuh gaˇ ve yoˬ. (Hpeuꞈ maˍ ve 12:17) Saˍtanˍ lehˬ haiˬ jaˇ leh kanˇ paˆ cawˬ ve yoˬ. Yaꞈ hkʼaˇ, nawˬ Saˍtanˍ htaꞈ ponˬ gʼa ve yoˬ. Nawˬ hkʼaˬ hkʼe te gʼa tuˬ le?

3. Ngaˬ hui kawˆ ve htaꞈ gʼaˇ tcuh tuˬ aˬ htoꞈ ma ga laˇ gʼa ve le?

 ³ Yaˬhoˉvaˬ ngaˬ hui htaꞈ haꞈ leh ngaˬ hui geh chehˇ ve tehꞈ yonˍ ve kʼo, Saˍtanˍ ngaˬ hui htaꞈ kawˆ ve awˬ ceuˬ te laˇ ve htaꞈ gʼaˇ ve yoˬ. (Chiˇ mvuh ve 118:6) Chiˇ mvuh ve liꞈ kaˇ nanˉ uiˍ 118 bvuhꞈ paˍ ve awˬ lawn htaꞈ dawˇ nyi sheˍ. Yawˇ kawˆ tuˬ laiˉ ceuˬ htaꞈ gʼa hpuˇ ve yoˬ. Tawˇ pa haˉ te kʼo, yawˇ canˇ paˍ cawˬ maˇ jaˇ leh yawˇ ve canˇ paˍ teˇ hpaˍ hpaˍ kʼo, aˉ yaˇ cawˬ ve yoˬ. (Awˬ tawn 9, 10) Teˇ pawˆ pawˆ kʼo, yawˇ shu nyiˉ piˇ ve laiˉ ceuˬ htaꞈ gʼa hpuˇ ve yoˬ. (Awˬ tawn 13) Leh yawˇ htaꞈ Yaˬhoˉvaˬ kaꞈ maˍ piˇ ve yoˬ. (Awˬ tawn 18) Yaꞈ hkʼaˇ, Chiˇ mvuh ve liꞈ bvuhꞈ paˍ chi teˇ gʼaˇ kʼoˆ ve, “ngaˬ kawˆ tuˬ ve maˇ heˆ.” Yawˇ kawˆ tuˬ maˇ cawˬ leh nyi ma gawˬ lehˍ ve cawˬ tuˬ aˬ htoꞈ ma te piˇ ve le? Yawˇ Yaˬhoˉvaˬ maˍ piˇ ve htaꞈ gʼa ve htawˇ, Yaˬhoˉvaˬ lehˬ yawˇ htaꞈ haꞈ jaˇ ve Awˬ pa hpehꞈ ve tehꞈ yawˇ shiˍ ve yoˬ. Yawˇ aˬ htoꞈ ma gʼa hpuˇ ve htawˇ Yaˬhoˉvaˬ yawˇ htaꞈ ga laˇ tuˬ yoˬ tehꞈ yawˇ yonˍ ve yoˬ.—Chiˇ mvuh ve 118:29.

4. Yaˬhoˉvaˬ ngaˬ hui htaꞈ awˬ tehˬ awˬ na haꞈ ve tehꞈ yonˍ ve kʼo, ngaˬ hui aˬ htoꞈ ma htaꞈ maˇ kawˆ ve le?

⁴ Yaˬhoˉvaˬ nawˬ htaꞈ awˬ tehˬ awˬ na haꞈ ve tehꞈ gʼa yonˍ cawˇ ve yoˬ. Chi hkʼe yonˍ ve lehˬ kawˆ ve 3 ceuˬ htaꞈ gʼaˇ tuˬ ga laˇ ve yoˬ. (1) Yehˬ kʼa htaꞈ hu maˇ gʼa la ve htaꞈ kawˆ ve, (2) chaw htaꞈ kawˆ ve, (3) suh ve htaꞈ kawˆ ve, awˬ lawn chi ve hkʼaw tanˬ htaˇ ve awˬ viˉ awˬ nyi kawˆ ve htaꞈ gʼaˇ ve, chi ve teˇ hpaˍ htaꞈ teˇ geh henˇ tuˬ yoˬ. Leh Yaˬhoˉvaˬ yawˇ hui htaꞈ awˬ tehˬ awˬ na haꞈ ve tehꞈ yonˍ gʼa ve yoˬ.

5. Yehˬ shehˍ hpaˇ aˬ htoꞈ ma ve awˬ lawn htaꞈ dawˇ haˍ ve le? (Awˬ htaꞈ hpawˇ ve awˬ han htaꞈ nyi sheˍ.)

⁵ Hkriꞈ yaˇ hpehꞈ ve yehˬ shehˍ hpaˇ lehˬ yehˬ kʼa htaꞈ hu tuˬ awˬ vuiˬ cawˬ ve yoˬ. (1 Tiˆmoˉseˍ 5:8) Nawˬ yehˬ shehˍ hpaˇ hpehꞈ ve kʼo, a naˍ cawˬ ve awˬ yanˇ htaˇ, kanˉ maˇ cawˬ la ve htaꞈ kawˆ ve yoˬ. Yehˬ ngaˍ hpfuhˇ piˇ tuˬ, yehˬ vuiˬ˗aˍ ve maˇ peuˬ sheˍ ve awˬ hpfuhˇ piˇ tuˬ, maˇ heˆ leh caˇ tuˬ vuiˬ tuˬ hpu cawˬ˗aw laˇ tehꞈ dawˇ haˍ ve yoˬ. Maˇ heˆ leh, nawˬ kanˉ maˇ gʼa te˗oˬ htaˇ, kanˉ awˬ suhˉ ca gʼa˗aw laˇ tehꞈ dawˇ haˍ ve yoˬ. Nin˗teunˇ leh Maˍriˆ kanˉ hkʼa dehꞈ maˇ gʼa te˗oˬ htaˇ, hpu maˇ yehˇ lawꞈ ve htaꞈ kawˆ ve hkʼa shuˍ, nawˬ kaꞈ kawˆ ve yoˬ hehˉ. Saˍtanˍ lehˬ kawˆ ve chi hkʼe ve htaꞈ yehˇ leh laiˉ gʼaˇ Gʼuiˬ sha ve kanˉ maˇ te tuˬ te piˇ ve yoˬ.

6. Saˍtanˍ lehˬ ngaˬ hui aˬ htoꞈ ma htaꞈ yonˍ tcuh gaˇ ve le?

⁶ Yaˬhoˉvaˬ ngaˬ hui htaꞈ a yeˇ maˇ yuˬ laˇ leh yehˬ kʼa htaꞈ hu tuˬ yawˇ maˇ ga laˇ ve tehꞈ Saˍtanˍ ngaˬ hui htaꞈ yonˍ tcuh gaˇ ve yoˬ. Ngaˬ hui kanˉ gʼa te tuˬ teˇ ceuˬ le le gʼa te ve tehꞈ Saˍtanˍ ngaˬ hui htaꞈ dawˇ tcuh gaˇ ve yoˬ. Chi hkʼe hpehꞈ htaˇ, ngaˬ hui Yaˬhoˉvaˬ kʼoˆ ve awˬ ceuˬ htaꞈ kaꞈ maˇ te gaˇ la ve yoˬ.

7. Yeˍsuˆ ngaˬ hui htaꞈ aˬ htoꞈ ma ka tiꞈ te taˍ laˇ ve le?

⁷ Yeˍsuˆ lehˬ yawˇ ve Awˬ pa Yaˬhoˉvaˬ htaꞈ hkʼa dehꞈ shiˍ ve yoˬ. Hkʼe te leh, yawˇ ka tiꞈ te taˍ laˇ ve, ‘ngaˬ hui loˍ ve teˇ hpaˍ htaꞈ ngaˬ hui maˇ lawˬ sheˍ htaˇ kaꞈ ngaˬ hui ve Awˬ pa shiˍ taˍ peuˬ.’ (Maꞈhtehˍ 6:8) Ngaˬ hui loˍ ve awˬ ceuˬ teˇ hpaˍ htaꞈ Yaˬhoˉvaˬ peꞈ laˇ tuˬ yoˬ tehꞈ Yeˍsuˆ shiˍ ve yoˬ. Yaˬhoˉvaˬ lehˬ ngaˬ hui ve yehˬ shehˍ hpaˇ hpehꞈ ve yoˬ. Hkʼe te leh, 1 Tiˆmoˉseˍ liꞈ 5:8 hkʼaw yehˬ shehˍ hpaˇ teˇ gʼaˇ le le htaꞈ te tehꞈ kʼoˆ piˇ ve awˬ ceuˬ htaꞈ, Gʼuiˬ sha yawˇ te tuˬ yoˬ tehꞈ ngaˬ hui yonˍ gʼa ve yoˬ.

8. (a) Ngaˬ hui yehˬ kʼa htaꞈ hu maˇ gʼa la ve htaꞈ kawˆ ve kʼo, dawˇ hkʼaˇ chi hkʼe ve htaꞈ gʼaˇ tuˬ ngaˬ hui htaꞈ aˬ htoꞈ ma ga laˇ gʼa ve le? (Maꞈhtehˍ 6:31-33) (b) Awˬ han hkʼaw ve awˬ hpawˇ awˬ miˇ ma awˬ viˉ awˬ nyi yaˇ miˇ htaꞈ caˇ tuˬ ca yuˬ piˇ ve ngaˬ hui hkʼaˬ hkʼe henˇ yuˬ gʼa ve le?

⁸ Yaˬhoˉvaˬ ngaˬ hui leh ngaˬ hui ve yehˬ kʼa htaꞈ haꞈ ve tehꞈ yonˍ gʼa ve kʼo, ngaˬ hui loˍ ve teˇ ceuˬ le le htaꞈ cawˬ tuˬ tehꞈ yonˍ gʼa ve yoˬ. (Maꞈhtehˍ 6:31-33 gʼaw sheˍ.) Yaˬhoˉvaˬ ngaˬ hui htaꞈ nyi haꞈ shaˉ laˇ leh loˍ ve awˬ ceuˬ cawˬ tcuh gaˇ ve yoˬ. Yaˬhoˉvaˬ lehˬ piˇ gaˇ puiˉ ve Gʼuiˬ sha hpehꞈ leh ngaˬ hui htaꞈ haꞈ jaˇ. Yawˇ miˬ guiˬ htaꞈ hpanˍ htaˇ, ngaˬ hui a shaꞈ teꞈ chehˇ gʼa tuˬ loˍ ve awˬ ceuˬ ceh tiˉ yawˇ peꞈ laˇ ve maˇ heˆ. Yaꞈ hkʼaˇ, ngaˬ hui ha lehˬ ve cawˬ tuˬ yawˇ laiˉ ceuˬ htaꞈ hpanˍ taˍ laˇ ve yoˬ. (Awˬ hkuiˉ puiˍ 2:9) Ngaˬ hui loˍ ve awˬ ceuˬ ceh tiˉ cawˬ ve htawˇ, ngaˬ hui cawˬ taˍ ve awˬ ceuˬ htaꞈ Yaˬhoˉvaˬ nyi haꞈ shaˉ laˇ ve tehꞈ dawˇ nyi cawˇ ve  yoˬ. (Maꞈhtehˍ 6:11) Ngaˬ hui Yaˬhoˉvaˬ awˬ pon teˇ ceuˬ le le yuˬ tanˇ ve lehˬ, chi teˇ hkui leh awˬ gʼuˇ suhˍ hpawˇ yawˇ ngaˬ hui htaꞈ peꞈ laˇ ve daꞈ jaˇ ve awˬ ceuˬ htaꞈ tehˆ maˇ gʼa tehꞈ hkʼaˬ htaˆ kaꞈ tawnˇ taˍ cawˇ ve yoˬ. Nin˗teunˇ leh Maˍriˆ awˬ lawn chi hkʼe ve yawˇ huiˉ maˬ gʼa hpuˇ ve yoˬ.—Iˉsaˍyaˆ 65:21, 22.

9. Nin˗teunˇ leh Maˍriˆ ve awˬ lawn nawˬ htaꞈ aˬ htoꞈ ma maˍ laˇ ve le?

⁹ Koˬlam˗biˬ˗a mvuhˇ miˬ lo chehˇ ve Nin˗teunˇ leh Maˍriˆ lehˬ yawˇ hui yehˬ daꞈ daꞈ ve cawˬ leh kanˉ kaꞈ daꞈ daꞈ ve cawˬ ve yoˬ. Yawˇ hui kʼoˆ ve, “awˬ tehˬ kʼo, ngaˬ hui kaꞈ a shaꞈ teꞈ hkʼaˇ caˇ lawꞈ dawˬ lawꞈ cawˬ gaˇ leh Yaˬhoˉvaˬ ve kanˉ maˇ maˇ te gaˇ ve yoˬ. Ngaˬ hui hpu hkʼa dehꞈ maˇ cawˬ ve kʼo, ha lehˬ gʼa tuˬ sheˍ ve laˇ tehꞈ kawˆ ve yoˬ.” Yawˇ hui dawˇ hkʼaˇ chi hkʼe ve htaꞈ gʼaˇ tuˬ aˬ htoꞈ ma ga piˇ ve le? Nin˗teunˇ leh Maˍriˆ Yaˬhoˉvaˬ yawˇ hui htaꞈ hkʼaˬ hkʼe taw haꞈ laˇ ve htaꞈ dawˇ nyi leh, Yaˬhoˉvaˬ yawˇ hui htaꞈ awˬ tehˬ awˬ na haꞈ ve tehꞈ hpeuꞈ maw laˇ ve gʼa mawˬ ve yoˬ. Yaˬhoˉvaˬ yawˇ hui htaꞈ hkʼa dehꞈ nyi haꞈ shaˉ laˇ ve htaꞈ yonˍ gʼa˗oˬ htaˇ, yawˇ hui kanˉ daꞈ daꞈ ve htaꞈ maˇ te ve, yehˬ hawˇ taˉ leh hto toˇ ve chaw loˍ jaˇ kuiˬ lo kʼai ve yoˬ. Yawˇ hui chi hkʼe dawˇ cheˆ ve htaꞈ chi teˇ hkui hkʼaˬ hkʼe dawˇ ve le? Nin˗teunˇ kʼoˆ ve, “Maꞈhtehˍ liꞈ 6:33 hkʼaw ka tiꞈ te taˍ laˇ ve, ngaˬ hui htaꞈ awˬ tehˬ hpehꞈ la ve yoˬ. Ngaˬ hui loˍ ve awˬ ceuˬ cawˬ ve yoˬ. Ngaˬ hui oˇ htaˇ aꞈ kehˉ a shaꞈ teꞈ kuiˬ hkʼaw ha lehˬ jaˇ.”

10. Aˬ htoꞈ ma te ngaˬ hui chaw htaꞈ kawˆ ve le?

¹⁰ Aˍdanˍ leh Eˇvaꞈ Gʼuiˬ sha htaꞈ hpfuhˆ peuˬ hkʼawꞈ nawˉ, chaw yaˇ hkʼaˇ chaw yaˇ te luˬ daꞈ ve yoˬ. (Cuˇ yiˍ piˇ ve 8:9) Tawˇ pa haˉ te kʼo, chaw yaˇ lehˬ kanˇ paˆ yehˇ leh awˬ nu ve chaw htaꞈ ciˍ yanˍ leh haiˬ ve te piˇ ve yoˬ. Liꞈ henˇ kuiˬ lo ve yaˇ teˇ hpaˍ hpaˍ htawˇ, nyi ma naˬ tuˬ te daꞈ ve yoˬ. Teˇ pawˆ pawˆ kʼo, awˬ to htaꞈ te luˬ tuˬ kaꞈ kawˆ ho piˇ ve yoˬ. Yehˬ kʼa hkʼaw ve chaw htaꞈ kaꞈ haiˬ ve te piˇ ve yoˬ. Hkʼe te leh, ngaˬ hui chaw htaꞈ kaꞈ kawˆ ve yoˬ. Chaw yaˇ htaꞈ kawˆ ve awˬ ceuˬ Saˍtanˍ cuˇ leh ngaˬ hui htaꞈ hkʼaˬ hkʼe te laˇ ve le?

11-12. Saˍtanˍ lehˬ chaw yaˇ kawˆ ve htaꞈ cuˇ leh ngaˬ hui htaꞈ hkʼaˬ hkʼe te laˇ ve le?

¹¹ Saˍtanˍ lehˬ chaw yaˇ kawˆ ve awˬ ceuˬ htaꞈ cuˇ leh Yaˬhoˉvaˬ maˇ dawˇ cawˇ ve awˬ ceuˬ htaꞈ ngaˬ hui te leh maˇ hto toˇ tuˬ te laˇ ve yoˬ. Saˍtanˍ lehˬ chaw yaˇ uˉ peunˍ ve ngaˬ hui ve kanˉ htaꞈ tawˍ laˇ tcuh leh laiˉ mvuhˇ miˬ lo ve ngaˬ hui ve awˬ viˉ awˬ nyi htaꞈ kaꞈ fawˉ mehˍ piˇ ve yoˬ. (Luˉkaꞈ 21:12; Hpeuꞈ maˍ ve 2:10) Laiˉ gʼaˇ Yaˬhoˉvaˬ ve Shaˉhkiˆhkanˍ ve chaw htaꞈ caˉ daꞈ ve maˇ heˆ heˆ ve awˬ lawn kʼoˆ ve yoˬ. Awˬ lawn chi htaꞈ yonˍ ve chaw ngaˬ hui htaꞈ kʼoˆ guiˇ gʼuiˬ guiˇ laˇ leh ngaˬ hui htaꞈ kaꞈ te luˬ laˇ gʼa ve yoˬ. (Maꞈhtehˍ 10:36) Ngaˬ hui chi hkʼe gʼa hpuˇ htaˇ anˇ˗aw laˇ? Maˇ anˇ. Awˬ lawn kʼo, Saˍtanˍ lehˬ awˉ lawˉ peuˇ ve Hkriꞈ  yaˇ htaꞈ kaꞈ chi hkʼe te piˇ ve yoˬ.—Tcuh yaˇ 5:27, 28, 40.

¹² Saˍtanˍ lehˬ mvuhˇ miˬ uˉ peunˍ ve htaꞈ cuˇ leh kawˆ tuˬ te laˇ ve awˬ hkʼoˆ kaꞈ, yehˬ kʼa htaꞈ cuˇ leh kawˆ tuˬ kaꞈ te laˇ sheˍ ve yoˬ. Teˇ hpaˍ hpaˍ kʼo, yawˇ Shaˉhkiˆhkanˍ ve chaw hpehꞈ la ve, yehˬ kʼa hkʼaw ve chaw hkʼaˬ hkʼe dawˇ la ve htaꞈ kawˆ ve yoˬ. Chaw teˇ hpaˍ kʼo, fawˉ mehˍ ve aꞈ kehˉ chi hkʼe ve htaꞈ kawˆ ve yoˬ. Yawˇ hui lehˬ yehˬ kʼa hkʼaw ve chaw leh awˬ viˉ awˬ nyi htaꞈ haꞈ jaˇ. Leh yawˇ hui Yaˬhoˉvaˬ htaꞈ haꞈ leh shiˍ la tcuh gaˇ ve yoˬ. Gʼuiˬ sha leh Shaˉhkiˆhkanˍ ve chaw htaꞈ caˉ daꞈ ve maˇ daꞈ ve, yawˇ hui ve awˬ viˉ awˬ nyi kʼoˆ ve htaꞈ gʼa kaˇ htaˇ nyi ma luˬ ve yoˬ. Yaꞈ hkʼaˇ, teˇ pawˆ pawˆ kʼo, yawˇ hui ve awˬ viˉ awˬ nyi awˉ lawˉ htaˇ maˇ dawˇ cawˇ leh tawˍ piˇ ve htawˇ, hkʼawꞈ nawˉ htaˇ Shaˉhkiˆhkanˍ ve chaw hpehꞈ la ve yoˬ. Nawˬ Shaˉhkiˆhkanˍ ve chaw hpehꞈ ve pa taw, yehˬ kʼa hkʼaw ve chaw tehꞈ maˇ shawˍ laˇ ve kʼo, hkʼaˬ hkʼe te tuˬ le?

13. Yehˬ kʼa hkʼaw ve chaw tehꞈ maˇ shawˍ laˇ˗o htaˇ, Yaˬhoˉvaˬ ngaˬ hui htaꞈ haꞈ leh ga laˇ tuˬ yoˬ tehꞈ hkʼaˬ hkʼe te yonˍ gʼa ve le? (Chiˇ mvuh ve 27:10)

¹³ Ngaˬ hui Chiˇ mvuh ve liꞈ 27:10 htaꞈ gʼaw htaˇ awˬ gʼaˇ gʼa jaˇ ve yoˬ. (Gʼaw sheˍ.) Yaˬhoˉvaˬ ngaˬ hui htaꞈ hkʼaˬ hkʼe taw haꞈ ve tawnˇ taˍ ve kʼo, ngaˬ hui nyi ma gawˬ lehˍ cawˬ leh tawˍ laˇ ve gʼa hpuˇ ve htawˇ maˇ kawˆ. Yaˬhoˉvaˬ lehˬ ngaˬ hui yeunˇ hkanˍ ve htaꞈ awˬ bon naꞈ laˇ tuˬ yoˬ tehꞈ yonˍ gʼa ve yoˬ. Yaˬhoˉvaˬ lehˬ ngaˬ hui htaꞈ awˬ to, nyi ma, leh yonˍ hkʼaˇ hpawˇ kaꞈ nyi haꞈ shaˉ laˇ tuˬ yoˬ tehꞈ yonˍ gʼa ve yoˬ. Ngaˬ hui htaꞈ nyi haꞈ shaˉ laˇ ve lehˬ Yaˬhoˉvaˬ hkʼe taw daꞈ ve teˇ gʼaˇ˗ehˬ kaꞈ maˇ cawˬ. Awˬ lawn tanˬ htaˇ kʼoˆ kʼai peuˬ ve, Be˗nin˗a kaꞈ chi hkʼe gʼa hpuˇ ve yoˬ.

14. Be˗nin˗a ve awˬ lawn nawˬ htaꞈ aˬ htoꞈ ma maˍ laˇ ve le?

¹⁴ Mvuhˇ miˬ uˉ peunˍ ve chaw Be˗nin˗a htaꞈ fawˉ mehˍ laˇ tuˬ shiˍ ve htawˇ, yawˇ Yaˬhoˉvaˬ ve Shaˉhkiˆhkanˍ ve chaw hpehꞈ la ve yoˬ. Be˗nin˗a lehˬ Yaˬhoˉvaˬ yawˇ htaꞈ haꞈ jaˇ ve tehꞈ shiˍ leh, chaw htaꞈ kawˆ ve gʼaˇ tuˬ hkʼaˬ hkʼe ga piˇ ve teˇ geh nyi sheˍ. Yawˇ kʼoˆ ve, “ngaˬ dawˇ taˍ ve aꞈ kehˉ fawˉ mehˍ laˇ jaˇ. Yaꞈ hkʼaˇ, ngaˬ chi aꞈ kehˉ kawˆ jaˇ ve lehˬ yehˬ kʼa hkʼaw ve chaw tawˍ laˇ ve yoˬ. Ngaˬ dawˇ cheˆ leh Shaˉhkiˆhkanˍ ve chaw hpehꞈ la ve, ngaˬ pa nyi ma luˬ tuˬ te piˇ la ve htaꞈ kawˆ leh yehˬ kʼa hkʼaw ve chaw ngaˬ htaꞈ maˇ yawˆ yan laˇ ve htaꞈ kaꞈ kawˆ ve yoˬ.” Yaˬhoˉvaˬ lehˬ yawˇ haꞈ ve chaw htaꞈ nyi haꞈ shaˉ piˇ tuˬ yoˬ tehꞈ Be˗nin˗a yonˍ ve yoˬ. Yawˇ kʼawꞈ kʼoˆ ve, “awˬ viˉ awˬ nyi hpu maˇ yehˇ lawꞈ ve, nyi cha piˇ ve, leh te luˬ piˇ htaˇ yawˇ hui yeunˇ hkanˍ gʼaˇ tuˬ, Yaˬhoˉvaˬ hkʼaˬ hkʼe ga piˇ ve htaꞈ ngaˬ hkʼa dehꞈ dawˇ nyi ve yoˬ. Ngaˬ Yaˬhoˉvaˬ htaꞈ gʼaˇ hkʼa dehꞈ va ve kʼo, yawˇ ngaˬ htaꞈ awˬ bon naꞈ laˇ tuˬ yoˬ tehꞈ shiˍ ve yoˬ. Ngaˬ hui Yaˬhoˉvaˬ htaꞈ ka tiꞈ yeˬ ve kʼo, yawˇ ngaˬ hui htaꞈ ga laˇ tuˬ yoˬ tehꞈ ngaˬ shiˍ ve yoˬ. Ngaˬ htaꞈ taˍ nuꞈ  (paˍ leˆ) laiˉ pawˆ yuˬ gʼa leh naˬ jaˇ tuˬ te laˇ htaˇ, Yaˬhoˉvaˬ ga laˇ ve htaꞈ ngaˬ gʼa ve yoˬ.” Be˗nin˗a awˬ pon kʼo, Yaˬhoˉvaˬ lehˬ yawˇ ve Awˬ pa hpehꞈ leh awˬ viˉ awˬ nyi kaꞈ yawˇ ve yehˬ kʼa hkʼaw ve chaw hkʼe hpehꞈ ve yoˬ.

15. Aˬ htoꞈ ma te ngaˬ hui suh ve htaꞈ kawˆ ve le?

¹⁵ Liꞈ hpu hkʼaw kʼoˆ ve suh ve lehˬ canˇ paˍ hpehꞈ ve yoˬ. (1 Kawˇrenˍhtuˆ 15:25, 26) Ngaˬ hui awˬ to maˇ heˆ leh ngaˬ hui haꞈ ve chaw naˬ jaˇ htaˇ, suh ve awˬ lawn htaꞈ ngaˬ hui dawˇ nyi htaˇ nyi ma maˇ sha ve yoˬ. Aˬ htoꞈ ma pa taw ngaˬ hui suh ve htaꞈ kawˆ ve le? Yaˬhoˉvaˬ ngaˬ hui htaꞈ suh tuˬ hpanˍ laˇ ve maˇ heˆ. Co co taiˍ taiˍ chehˇ gʼa tuˬ hpanˍ laˇ ve yoˬ. (Cuˇ yiˍ piˇ ve 3:11) Yaꞈ hkʼaˇ, suh ve htaꞈ kawˆ ve kaꞈ awˬ bon cawˬ ve yoˬ. Tawˇ pa haˉ te kʼo, awˬ bon cawˬ ve caˇ tuˬ htaꞈ caˇ ve, hkʼaˬ htaˆ kaꞈ awˬ gʼaˇ caw ve, saˍ laꞈ gʼonˍ geh kʼai ve, maˇ heˆ leh naˬ htaˇ naˆ tsuhˇ dawˬ ve leh kawˆ tuˬ cawˬ ve awˬ ceuˬ htaꞈ maˇ te tuˬ chi ve teˇ hpaˍ ngaˬ hui shiˍ tuˬ ga laˇ ve yoˬ.

16. Saˍtanˍ lehˬ suh ve htaꞈ kawˆ ve htaꞈ cuˇ leh hkʼaˬ hkʼe te ve le?

¹⁶ Ngaˬ hui a shaꞈ htaꞈ haꞈ ve tehꞈ Saˍtanˍ shiˍ ve yoˬ. Ngaˬ hui a shaꞈ gʼa teꞈ chehˇ tuˬ awˬ pon ngaˬ hui cawˬ taˍ ve teˇ ceuˬ le le leh Yaˬhoˉvaˬ geh meuˆ daꞈ ve shonˇ kʼai piˇ hpehꞈ ve tehꞈ Saˍtanˍ kʼoˆ ve yoˬ. (Yawˇbaˆ 2:4, 5) Yaꞈ hkʼaˇ, Saˍtanˍ dawˇ ve lehˬ yaꞈ jaˇ. Saˍtanˍ lehˬ “suh ve teˇ ceuˬ awˬ hkʼoˆ kanˇ paˆ cawˬ” ve yoˬ. Hkʼe te leh, ngaˬ hui Yaˬhoˉvaˬ htaꞈ baˬ taˉ tuˬ suh ve htaꞈ kawˆ tuˬ Saˍtanˍ yehˇ ve yoˬ. (Heˍbrehˇ 2:14, 15) Ngaˬ hui Yaˬhoˉvaˬ htaꞈ yonˍ sheˍ ve kʼo, teˇ pawˆ pawˆ kʼo Saˍtanˍ hpawˇ chehˇ ve chaw ngaˬ hui htaꞈ tiˇ pehˍ laˇ tuˬ yoˬ tehꞈ kawˆ ho laˇ ve yoˬ. Teˇ pawˆ pawˆ ngaˬ hui naˬ jaˇ htaˇ Gʼuiˬ sha ve awˬ liˇ awˬ hkʼaˇ maˇ cawˇ ve htaꞈ haꞈ shaˉ tuˬ Saˍtanˍ te tcuh gaˇ ve yoˬ. Tawˇ pa haˉ te kʼo, saˍ laꞈ gʼonˍ maˇ heˆ leh ngaˬ hui ve awˬ viˉ awˬ nyi Shaˉhkiˆhkanˍ ve chaw maˇ hpehꞈ ve suhˍ keu tuˬ nyiˉ laˇ ve yoˬ. Maˇ heˆ leh teˇ hpaˍ hpaˍ Liꞈ hpu hkʼaw ve awˬ liˇ awˬ hkʼaˇ maˇ cawˇ ve hpawˇ ngaˬ hui haꞈ shaˉ tuˬ jehˬ laˇ ve yoˬ.

17. Roˉmaꞈ liꞈ 8:37-39 hkʼaw kʼoˆ taˍ ve hkʼe, aˬ htoꞈ ma te ngaˬ hui suh ve htaꞈ maˇ kawˆ cawˇ ve le?

¹⁷ Ngaˬ hui teˇ gʼaˇ le le maˇ suh gaˇ. Yaꞈ hkʼaˇ, ngaˬ hui gʼa suh puiˉ ve kʼo, Yaˬhoˉvaˬ ngaˬ hui htaꞈ hkʼaˬ htaˆ kaꞈ haꞈ chehˇ ve yoˬ. (Roˉmaꞈ 8:37-39 gʼaw sheˍ.) Gʼuiˬ sha ve awˬ chawˇ lehˬ yawˇ hkʼaˬ htaˆ kaꞈ tawnˇ gʼa ve yoˬ. Yawˇ hui suh˗oˬ ve htawˇ, a shaꞈ teꞈ chehˇ sheˍ ve tehꞈ Gʼuiˬ sha shawˍ ve yoˬ. (Luˉkaꞈ 20:37, 38) Gʼuiˬ sha yawˇ hui htaꞈ kʼawꞈ teꞈ tu la piˇ tcuh gaˇ jaˇ. (Yawˇbaˆ 14:15) Ngaˬ hui “co tiꞈ ha tiꞈ” gʼa tuˬ awˬ pon Yaˬhoˉvaˬ lehˬ yuˬ tanˇ laˇ jaˇ. (Yoˇhanˬ 3:16) Yawˇ chi hkʼe te ve lehˬ ngaˬ hui htaꞈ haꞈ laˇ ve, dawˇ haˍ laˇ ve tehꞈ ngaˬ hui mawˬ tuˬ te laˇ ve yoˬ. Ngaˬ hui naˬ jaˇ leh suh˗e la yoˬ te htaˇ Yaˬhoˉvaˬ ngaˬ hui htaꞈ haꞈ leh dawˇ haˍ laˇ ve htaꞈ mawˬ htaˇ, ngaˬ hui yawˇ htaꞈ baˬ taˉ maˇ gʼa. Ngaˬ hui Gʼuiˬ sha geh meuˆ daꞈ gaˇ jaˇ. Chi htaꞈ pa taw, awˬ gʼaˇ awˬ shaˉ gʼa tuˬ, cuˇ yiˍ gʼa tuˬ loˍ ve yoˬ. Va˗vi˗vin leh yawˇ ve awˬ hpawˇ kaꞈ chi hkʼe te ve awˬ lawn htaꞈ teˇ geh nyi sheˍ.—Chiˇ mvuh ve 41:3.

18. Va˗vi˗vin ve awˬ lawn nawˬ htaꞈ aˬ htoꞈ ma maˍ laˇ ve le?

¹⁸ Va˗vi˗vin 35 hkʼawꞈ htaˇ, mvuhˇ haˉ caˉ ve a naˍ hpehꞈ leh pehˉ kʼai vaiˇ jaˇ ve tehꞈ saˍ laꞈ gʼonˍ chaˬ nyi mawˬ ve yoˬ. Yaˬhoˉvaˬ yawˇ htaꞈ haꞈ leh yawˇ suh ve htaꞈ maˇ kawˆ tuˬ, hkʼaˬ hkʼe ga piˇ ve teˇ geh nyi sheˍ. Va˗vi˗vin kʼoˆ ve, “saˍ laꞈ gʼonˍ tehˆ nyi mawˬ ve htaꞈ ca na˗e htaˇ, ngaˬ leh ngaˬ hpawˇ awˉ lawˉ htaˇ hkʼe maˇ shuˍ. Saˍ laꞈ gʼonˍ kʼoˆ laˇ ve, ngaˬ gʼa shawˆ hpeꞈ ve yoˬ. Ngaˬ htaꞈ shawˆ hpeꞈ laˇ tuˬ saˍ laꞈ gʼonˍ laiˉ gʼaˇ geh kʼai ve yoˬ. Yaꞈ hkʼaˇ, ngaˬ awˬ suhˍ maˇ keu ve kʼo, teˇ gʼaˇ˗ehˬ kaꞈ maˇ shawˆ hpeꞈ laˇ. Ngaˬ kawˆ jaˇ ve yoˬ. Awˬ suhˍ keu ve lehˬ Yaˬhoˉvaˬ ve awˬ liˇ awˬ hkʼaˇ htaꞈ maˇ hawˍ daꞈ ve pa taw, ngaˬ maˇ keu. Yaˬhoˉvaˬ ngaˬ htaꞈ hkʼaˬ hkʼe taw haꞈ ve gʼa mawˬ ve yoˬ. Chi teˇ hkui ngaˬ Yaˬhoˉvaˬ htaꞈ haꞈ ve gʼa hpeuꞈ maw piˇ ve yoˬ. Maˇ daꞈ ve awˬ lawn gʼa kaˇ ve teˇ pawˆ le le ngaˬ Yaˬhoˉvaˬ nyi hkʼaˇ suh tuˬ te piˇ leh Saˍtanˍ ngaˬ htaꞈ kaꞈ maˇ gʼaˇ tcuh tuˬ dawˇ teh taˍ ve yoˬ. Hkʼe te leh, gʼa shawˆ hpeꞈ htaˇ kaꞈ awˬ suhˍ maˇ yehˇ leh kawˆ tuˬ maˇ cawˬ. Chi teˇ hkui ngaˬ hkʼa dehꞈ maˇ chehˇ sha sheˍ ve htawˇ, Gʼuiˬ sha lehˬ ngaˬ htaꞈ maˇ  baˬ taˉ laˇ jaw. Saˍ laꞈ gʼonˍ geh tehˆ nyi taˍ ve maˇ ca na˗e sheˍ htaˇ, oˇ ve teˇ shinˉ htaˇ ngaˬ hui hpawnˬ daꞈ kuiˬ hkʼaw ‘chi teˇ hkui tuꞈ ve hkanˍ ve htaꞈ haꞈ hanˉ ve hkʼaw haꞈ yuˬ gʼa tuˬ’ * awˬ lawn gʼa henˇ ve yoˬ. Chi ngaˬ hui htaꞈ ga laˇ gʼa jaˇ leh gʼaw peuˬ kaꞈ gʼaw ve yoˬ. Daꞈ ve awˬ lawn chi hkʼe ve, Gʼuiˬ sha ve kanˉ te ve, Yaˬhoˉvaˬ htaꞈ hkʼaˬ htaˆ kaꞈ oˉ kʼoˍ pui ve ngaˬ leh ngaˬ hpawˇ nyi ma gawˬ lehˍ cawˬ tuˬ ga laˇ ve, dawˇ hkʼaˇ keunˍ lawꞈ cawˇ lawꞈ ve cawˬ ve, leh ngaˬ hui cuˇ yiˍ cawˬ ve hkʼaw dawˇ cheˆ gʼa tuˬ kaꞈ ga laˇ ve yoˬ.”

19. Maˇ maw maw ve awˬ yanˇ hkʼaw aˬ htoꞈ ma hpehꞈ la tuˬ le?

¹⁹ Yaˬhoˉvaˬ lehˬ miˬ guiˬ chi hkʼoˆ lo ngaˬ hui ve awˬ viˉ awˬ nyi shoꞈ shaꞈ ve teˇ ceuˬ le le htaꞈ gʼaˇ tuˬ ga piˇ leh Saˍtanˍ htaꞈ tawˍ daꞈ gʼaˇ tuˬ kaꞈ ga piˇ ve yoˬ. Nawˬ kaꞈ chi hkʼa shuˍ te gʼa ve yoˬ. (1 Peˍtruˆ 5:8, 9) Maˇ maw ve awˬ yanˇ hkʼaw Yaˬhoˉvaˬ lehˬ, Yeˍsuˆ leh yawˇ geh teˇ geh uˉ peunˍ ve chaw htaꞈ ‘Saˍtanˍ ve kanˉ teˇ hpaˍ htaꞈ’ te luˬ tcuh tuˬ yoˬ. (1 Yoˇhanˬ 3:8) Peuˬ hkʼawꞈ nawˉ, miˬ guiˬ hkʼoˆ lo Gʼuiˬ sha ve kanˉ te ve chaw “shu fawˉ mehˍ ve leh, kawˆ tuˬ ve awˬ ceuˬ teˇ hpaˍ htaꞈ nawˬ hui gʼa ponˬ tuˬ yoˬ.” (Iˉsaˍyaˆ 54:14; Miˆhkaˍ 4:4) Yaꞈ hkʼaˇ, oˇ ve teˇ nyi maˇ gaˬ sheˍ htaˇ, ngaˬ hui kawˆ ve htaꞈ gʼaˇ tuˬ gʼa coˇ caˇ ve yoˬ.

20. Ngaˬ hui kawˆ ve htaꞈ gʼaˇ tuˬ aˬ htoꞈ ma gʼa te cawˇ ve le?

²⁰ Yaˬhoˉvaˬ lehˬ yawˇ ve kanˉ te ve chaw htaꞈ haꞈ leh hkʼaˬ htaˆ kaꞈ nyi haꞈ shaˉ piˇ tuˬ yoˬ tehꞈ ngaˬ hui gʼa yonˍ gʼa tcuh ve yoˬ. Ngaˬ hui chi hkʼe yonˍ gʼa tuˬ Yaˬhoˉvaˬ lehˬ oˇ htaˇ teˇ co˗e yawˇ ve kanˉ te ve chaw htaꞈ hkʼaˬ hkʼe te nyi haꞈ shaˉ piˇ ve ngaˬ hui dawˇ nyi leh tawˇ yaw daꞈ cawˇ ve yoˬ. Chi hkʼoˆ kaꞈ, ngaˬ hui shoꞈ shaꞈ ve teˇ hpaˍ gʼa hpuˇ htaˇ, peuˬ taˉ ve awˬ yanˇ yawˇ ngaˬ hui htaꞈ hkʼaˬ hkʼe ga laˇ ve le gʼa tawnˇ taˍ cawˇ ve yoˬ. Ngaˬ hui kawˆ ve htaꞈ gʼaˇ tuˬ Yaˬhoˉvaˬ ngaˬ hui htaꞈ ga laˇ tuˬ yoˬ tehꞈ yonˍ gʼa ve yoˬ.—Chiˇ mvuh ve 34:4.