1. Venˇ baˆ te ve chaw dawˇ hpfuhˆ htaˇ, Yaˬhoˉvaˬ aˬ htoꞈ ma ka tiꞈ te taˍ laˇ ve le?

 Yaˬhoˉvaˬ lehˬ hpanˍ shehˍ hpaˇ hpehꞈ ve awˬ hkʼoˆ kaꞈ, awˬ liˇ awˬ hkʼaˇ teh shehˍ hpaˇ, suhˉ jehˬ shehˍ hpaˇ, leh ngaˬ hui htaꞈ haꞈ ve Awˬ pa kaꞈ hpehꞈ ve yoˬ. (Chiˇ mvuh ve 100:3; Iˉsaˍyaˆ 33:22) Ngaˬ hui Gʼuiˬ sha htaꞈ venˇ baˆ te yaꞈ leh awˬ tehˬ awˬ na dawˇ hpfuhˆ ve kʼo, yawˇ ngaˬ hui htaꞈ venˇ baˆ hpehˇ laˇ gaˇ ve yoˬ. (Chiˇ mvuh ve 86:5) Yaˬhoˉvaˬ tcuh kaˍ paˍ Iˉsaˍyaˆ htaꞈ cuˇ leh ngaˬ hui htaꞈ ka tiꞈ te laˇ ve, “nawˬ hui lehˬ venˇ baˆ htaꞈ pa taw nyiˉ˗ehˍ hpehꞈ chehˇ taˍ ve htawˇ, vaˇ meu˗e hkʼa shuˍ kʼawꞈ hpu la tuˬ ngaˬ tsuhˇ baˬ laˇ tuˬ yoˬ.”—Iˉsaˍyaˆ 1:18.

2. Ngaˬ hui awˬ nu ve chaw geh teˇ geh chehˇ leh ha lehˬ ve cawˬ gaˇ ve kʼo, hkʼaˬ hkʼe gʼa te cawˇ ve le?

² Ngaˬ hui teˇ gʼaˇ le le maˇ biˇ ve chaw hpehꞈ ve yoˬ. Hkʼe te leh, ngaˬ hui tawˇ yaw ve leh te ve awˬ ceuˬ awˬ nu ve chaw beuꞈ tuˬ te piˇ ve yoˬ. (Yaˍkoˆ 3:2) Yaꞈ hkʼaˇ, chi ve lehˬ ngaˬ hui shu htaꞈ maˇ caˉ daꞈ˗o ve tehꞈ kʼoˆ gaˇ ve maˇ heˆ. Ngaˬ hui venˇ baˆ hpehˇ daꞈ ve kʼo, awˉ lawˉ htaˇ hkʼe kʼawꞈ haꞈ daꞈ gʼa ve yoˬ. (Tawˇ naˉ ve 17:9; 19:11; Maꞈhtehˍ 18:21, 22) Ngaˬ hui awˬ viˉ awˬ nyi geh awˬ lawn cawˬ daꞈ leh nyi ma naˬ tuˬ te piˇ ve kʼo, Yaˬhoˉvaˬ lehˬ ngaˬ hui htaꞈ venˇ baˆ hpehˇ daꞈ tcuh gaˇ ve yoˬ. (Kawˇlawˇsehˇ 3:13) Awˬ lawn kʼo, Yaˬhoˉvaˬ lehˬ ngaˬ hui htaꞈ ‘venˇ baˆ hpehˇ laˇ puiˉ ve’ pa taw, ngaˬ hui kaꞈ chi hkʼe te gaˇ ve yoˬ.—Iˉsaˍyaˆ 55:7.

3. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

³ Maˇ biˇ ve chaw yaˇ Yaˬhoˉvaˬ venˇ baˆ hpehˇ laˇ ve htaꞈ hkʼaˬ hkʼe te henˇ yuˬ gʼa tuˬ le? Nyi haꞈ shaˉ paˍ htaꞈ kʼoˆ piˇ cawˇ ve, te yaꞈ ve hkʼaˬ hkʼe ve le? Aˬ htoꞈ ma te Yaˬhoˉvaˬ lehˬ ngaˬ hui venˇ baˆ hpehˇ daꞈ tcuh gaˇ ve le? Awˬ viˉ awˬ nyi teˇ hpaˍ hpaˍ awˬ nu ve chaw yawˇ hui htaꞈ nyi ma naˬ jaˇ tuˬ te piˇ ve pa taw, yawˇ hui ve awˬ lawn ngaˬ hui htaꞈ aˬ htoꞈ ma maˍ laˇ ve le? Chi ve teˇ hpaˍ htaꞈ teˇ geh henˇ tuˬ yoˬ.

4. (a) Yaˬhoˉvaˬ ve kanˉ te ve chaw yawˇ uiˍ jaˇ ve venˇ baˆ htaꞈ te yaꞈ htaˇ, hkʼaˬ hkʼe te cawˇ ve le? (b) Nyi haꞈ shaˉ paˍ aˬ htoꞈ ma awˬ vuiˬ cawˬ ve le?

⁴ Awˬ viˉ awˬ nyi teˇ hpaˍ hpaˍ uiˍ jaˇ ve venˇ baˆ htaꞈ te yaꞈ ve ngaˬ hui shiˍ htaˇ, ngaˬ hui nyi haꞈ shaˉ paˍ htaꞈ hto piˇ cawˇ ve yoˬ. Te yaꞈ ve chi hkʼe ve lehˬ 1 Kawˇrenˍhtuˆ liꞈ 6:9, 10 hkʼaw kʼoˆ taˍ ve yoˬ. Chi lehˬ Gʼuiˬ sha ve awˬ liˇ tawˇ hkawˇ htaꞈ te yaꞈ ve yoˬ. Awˬ viˉ awˬ nyi teˇ gʼaˇ chi hkʼe te yaꞈ htaˇ, Yaˬhoˉvaˬ venˇ baˆ hpehˇ laˇ tuˬ yawˇ bon gʼa lawˬ cawˇ leh yawˇ nyi haꞈ shaˉ paˍ geh tawˇ gʼa yaw daꞈ cawˇ ve yoˬ. (Chiˇ mvuh ve 32:5; Yaˍkoˆ 5:14) Leh nyi haꞈ shaˉ paˍ aˬ htoꞈ ma awˬ vuiˬ cawˬ ve le? Awˬ tehˬ kʼo, Yaˬhoˉvaˬ teˇ gʼaˇ ceh tiˉ Yeˍsuˆ htaiˍ hkʼawꞈ laˇ ve htaꞈ cuˇ leh venˇ baˆ hpehˇ piˇ gʼa ve yoˬ. * Te yaꞈ ve chaw Hkriꞈ yaˇ awˬ moˍ hkʼaw kʼawꞈ chehˇ tcuh cawˇ ve laˇ tehꞈ, nyi haꞈ shaˉ paˍ Liꞈ hpu htaꞈ cuˇ leh dawˇ cheˆ tuˬ, Yaˬhoˉvaˬ yawˇ hui htaꞈ awˬ vuiˬ piˇ ve yoˬ. (1 Kawˇrenˍhtuˆ 5:12) Te yaꞈ ve chaw yawˇ dawˇ taˍ leh te yaꞈ ve laˇ? Yawˇ te yaꞈ tuˬ awˬ hkʼaˇ gu teh˗oˬ ve laˇ? Yawˇ te yaꞈ peuˬ kaꞈ te yaꞈ ve awˬ yanˇ maw˗oˬ ve laˇ? A yeˇ uiˍ jaˇ ve lehˬ yawˇ awˬ tehˬ awˬ na venˇ baˆ dawˇ hpfuhˆ ve tehꞈ shaˉ hkiˆ cawˬ˗aw laˇ? Leh Yaˬhoˉvaˬ yawˇ htaꞈ venˇ baˆ hpehˇ laˇ˗oˬ ve tehꞈ yawˇ hpeuꞈ maw piˇ tuˬ teˇ ceuˬ ceuˬ aˬ htoꞈ ma cawˬ ve le? Chi ve teˇ hpaˍ htaꞈ nyi haꞈ shaˉ paˍ gʼa nyi cawˇ ve yoˬ.—Tcuh yaˇ 3:19.

5. Nyi haꞈ shaˉ paˍ te ve awˬ ceuˬ awˬ bon hkʼaˬ hkʼe cawˬ ve le?

⁵ Te yaꞈ ve chaw geh nyi haꞈ shaˉ paˍ yaw daꞈ htaˇ, yawˇ hui dawˇ teh taˍ ve lehˬ Yaˬhoˉvaˬ dawˇ cheˆ ve hkʼe gʼa dawˇ cheˆ ve yoˬ. Yawˇ hui chi hkʼe te gʼa tuˬ bon gʼa lawˬ ve, Liꞈ hpu hkʼaw ve awˬ liˇ awˬ hkʼaˇ htaꞈ hkʼa dehꞈ hpfuhˆ nyi ve, leh te yaꞈ ve chaw htaꞈ caˉ daꞈ ve Liꞈ hpu hkʼaw ve awˬ liˇ awˬ hkʼaˇ htaꞈ gʼa gʼaꞈ te ve yoˬ. (Maꞈhtehˍ 18:18) Chi lehˬ Hkriꞈ yaˇ awˬ moˍ htaꞈ awˬ bon hkʼaˬ hkʼe cawˬ ve le? Te yaꞈ leh venˇ baˆ maˇ dawˇ hpfuhˆ ve kʼo, Hkriꞈ yaˇ awˬ moˍ hkʼaw maˇ kʼawꞈ gʼa chehˇ. Chi Hkriꞈ yaˇ awˬ moˍ htaꞈ haꞈ shaˉ ve yoˬ. (1 Kawˇrenˍhtuˆ 5:6, 7, 11-13; Tiˇtuˆ 3:10, 11) Chi hkʼoˆ kaꞈ, te yaꞈ ve chaw htaꞈ ga piˇ leh Yaˬhoˉvaˬ venˇ baˆ hpehˇ laˇ ve htaꞈ gʼa tuˬ kaꞈ ga piˇ ve yoˬ. (Luˉkaꞈ 5:32) Nyi haꞈ shaˉ paˍ lehˬ venˇ baˆ dawˇ hpfuhˆ ve chaw awˬ pon bon lawˬ piˇ leh yawˇ Yaˬhoˉvaˬ geh teˇ pawˆ kʼawꞈ meuˆ daꞈ tuˬ ga piˇ ve yoˬ.—Yaˍkoˆ 5:15.

6. Tawˆ cheˆ piˇ ve chaw lehˬ Yaˬhoˉvaˬ venˇ baˆ hpehˇ laˇ tuˬ tehꞈ dawˇ lawˬ gʼa˗aw laˇ? Kʼoˆ maˍ laˇ sheˍ.

⁶ Nyi haꞈ shaˉ paˍ lehˬ te yaꞈ ve chaw geh yaw daꞈ˗oˬ leh yawˇ venˇ baˆ maˇ dawˇ hpfuhˆ ve kʼo, yawˇ htaꞈ gʼa tawˆ cheˆ piˇ ve yoˬ. Leh yawˇ mvuhˇ miˬ ve awˬ liˇ awˬ hkʼaˇ htaꞈ kaꞈ te yaꞈ ve kʼo, nyi haꞈ shaˉ paˍ kaꞈ yawˇ htaꞈ maˇ ga piˇ. Awˬ lawn kʼo, Yaˬhoˉvaˬ lehˬ mvuhˇ miˬ hkʼoˆ kanˉ te paˍ htaꞈ kanˇ paˆ piˇ leh a shu teˇ gʼaˇ mvuhˇ miˬ ve awˬ liˇ htaꞈ te yaꞈ leh venˇ baˆ dawˇ hpfuhˆ ve maˇ dawˇ hpfuhˆ ve htawˇ, awˬ liˇ teh taˍ ve hkʼe ciˍ yanˍ tcuh ve yoˬ. (Roˉmaꞈ 13:4) Peuˬ hkʼawꞈ nawˉ, yawˇ te yaꞈ ve tehꞈ haꞈ yuˬ ve, awˬ tehˬ awˬ na venˇ baˆ dawˇ hpfuhˆ ve, leh yawˇ ve te hkʼaˇ dawˇ hkʼaˇ coˇ caˇ leh pa ve, Yaˬhoˉvaˬ kaꞈ yawˇ htaꞈ venˇ baˆ hpehˇ piˇ gaˇ ve yoˬ. (Luˉkaꞈ 15:17-24) Yawˇ hkʼaˬ hkʼe taw te yaꞈ ve htawˇ, Yaˬhoˉvaˬ venˇ baˆ hpehˇ piˇ tuˬ yoˬ.—2 Raˍsaˍvanˍ 33:9, 12, 13; 1 Tiˆmoˉseˍ 1:15.

7. Ngaˬ hui htaꞈ te yaꞈ laˇ ve chaw htaꞈ venˇ baˆ hpehˇ piˇ ve aˬ htoꞈ ma htaꞈ kʼoˆ gaˇ ve le?

⁷ Te yaꞈ ve chaw htaꞈ venˇ baˆ hpehˇ piˇ cawˇ˗aw laˇ tehꞈ, ngaˬ hui maˇ gʼa dawˇ cheˆ ve ha lehˬ jaˇ. Yaˬhoˉvaˬ teˇ gʼaˇ ceh tiˉ chi ve htaꞈ dawˇ cheˆ gʼa ve yoˬ. Yaꞈ hkʼaˇ, teˇ lawn lawn kʼo ngaˬ hui gʼa dawˇ cheˆ ve yoˬ. Chaw teˇ gʼaˇ ngaˬ hui htaꞈ nyi ma naˬ jaˇ tuˬ te laˇ ve, peuˬ leh yawˇ ngaˬ hui geh ca lawˬ hkawˉ la ve maˇ heˆ leh maˇ lawˬ hkawˉ la ve yoˬ. Chi hkʼe gʼa hpuˇ htaˇ ngaˬ hui yawˇ htaꞈ venˇ baˆ hpehˇ piˇ leh maˇ kʼawꞈ beuꞈ˗o tuˬ dawˇ cheˆ gʼa ve yoˬ. Yaꞈ hkʼaˇ, chi hkʼe te tuˬ sha ve maˇ heˆ, leuˉ leh ngaˬ hui htaꞈ nyi ma naˬ jaˇ tuˬ te laˇ ve kʼo awˬ yanˇ gʼa yehˇ ve yoˬ. Shaw nyi kuiˬ Taꞈ yehˬ Ha pa 9 maˬ 15 nyi 1994 hkʼawꞈ hkʼaw kʼoˆ ve, “venˇ baˆ te ve chaw htaꞈ nawˬ venˇ baˆ hpehˇ piˇ htaˇ venˇ baˆ chi hkʼe ve htaꞈ nawˬ a yeˇ maˇ te˗oˬ ve tehꞈ kʼoˆ gaˇ ve maˇ heˆ. Hkriꞈ yaˇ awˬ pon kʼo, venˇ baˆ hpehˇ piˇ ve lehˬ awˬ  lawn chi ve Yaˬhoˉvaˬ htaꞈ yonˍ gʼa ve hkʼaw chiˇ aꞈ piˇ ve htaꞈ kʼoˆ gaˇ ve yoˬ. Yaˬhoˉvaˬ lehˬ mvuhˇ naw ma miˬ naˆ ma hkʼa peu˗eˬ hkʼoˆ hteˇ cawˇ jaˇ ve suhˉ jehˬ shehˍ hpaˇ hpehꞈ ve yoˬ. Keunˍ daꞈ ve awˬ yanˇ hkʼaw yawˇ hteˇ ve cawˇ ve awˬ ceuˬ te laˇ tuˬ yoˬ.” Aˬ htoꞈ ma te Yaˬhoˉvaˬ lehˬ ngaˬ hui htaꞈ venˇ baˆ hpehˇ daꞈ tcuh gaˇ leh awˬ lawn chi yawˇ htaꞈ chiˇ aꞈ piˇ tcuh gaˇ ve le?

8. Ngaˬ hui shu htaꞈ venˇ baˆ hpehˇ piˇ ve lehˬ Yaˬhoˉvaˬ ha kʼaˉ laˇ ve htaꞈ awˬ hpfuhˇ shiˍ ve tehꞈ hkʼaˬ hkʼe te hpeuꞈ maw piˇ ve le?

⁸ Ngaˬ hui shu htaꞈ venˇ baˆ hpehˇ piˇ ve kʼo, Yaˬhoˉvaˬ ha kʼaˉ laˇ ve htaꞈ awˬ hpfuhˇ shiˍ ve tehꞈ hpeuꞈ maw piˇ ve. Yeˍsuˆ tawˇ pa haˉ te maˍ laˇ ve hkʼaw awˬ ceˬ teˇ gʼaˇ awˬ shehˍ hpaˇ geh jeˬ cha jaˇ leh maˇ kʼawꞈ shaiˍ tcuh ve yoˬ. Leh Yeˍsuˆ kaꞈ Yaˬhoˉvaˬ chi ve htaꞈ shuˍ ve tehꞈ tehˆ taˍ ve yoˬ. Yaꞈ hkʼaˇ, awˬ ceˬ chi ve teˇ gʼaˇ lehˬ yawˇ ve awˬ chawˇ yawˇ geh jeˬ a ciˉ ceh tiˉ cha ve htawˇ yawˇ maˇ ha kʼaˉ piˇ. (Maꞈhtehˍ 18:23-35) Awˬ lawn chi ngaˬ hui htaꞈ aˬ htoꞈ ma maˍ laˇ ve le? Yaˬhoˉvaˬ ha kʼaˉ laˇ ve htaꞈ ngaˬ hui awˬ hpfuhˇ shiˍ ve kʼo, chi ve ngaˬ hui awˬ nu ve chaw htaꞈ venˇ baˆ hpehˇ piˇ gaˇ tuˬ te laˇ ve yoˬ. (Chiˇ mvuh ve 103:9) Ponˬ laˬ ve laiˉ hkʼawꞈ htaˇ Shaw nyi kuiˬ Taꞈ yehˬ hkʼaw kʼoˆ ve, “ngaˬ hui shu htaꞈ venˇ baˆ hkʼaˬ ma hpehˇ piˇ ve htawˇ, Yaˬhoˉvaˬ Yeˍsuˆ htaꞈ cuˇ leh ngaˬ hui htaꞈ venˇ baˆ hpehˇ laˇ ve, leh ha kʼaˉ laˇ ve htaꞈ tehˆ maˇ gʼa.”

9. Yaˬhoˉvaˬ a shu htaꞈ ha kʼaˉ ve le? (Maꞈhtehˍ 6:14, 15)

⁹ Ngaˬ hui shu htaꞈ venˇ baˆ hpehˇ piˇ ve kʼo, Yaˬhoˉvaˬ kaꞈ ngaˬ hui htaꞈ venˇ baˆ hpehˇ laˇ ve. Shu htaꞈ ha kʼaˉ piˇ ve chaw htaꞈ Yaˬhoˉvaˬ ha kʼaˉ ve yoˬ. (Maꞈhtehˍ 5:7; Yaˍkoˆ 2:13) Yeˍsuˆ awˬ laꞈ gʼawˇ htaꞈ bon lawˬ tuˬ maˍ piˇ htaˇ, awˬ lawn chi ngaˬ hui hkʼa tawˍ lehˆ mawˬ gʼa ve yoˬ. (Maꞈhtehˍ 6:14, 15 gʼaw sheˍ.) Yaˬhoˉvaˬ Yawˇbaˆ htaꞈ te tcuh ve awˬ ceuˬ htaꞈ caˉ daꞈ ve ngaˬ hui henˇ yuˬ gʼa ve yoˬ. Yawˇbaˆ ve awˬ chawˇ 3 gʼaˇ lehˬ Eˇliˇhpaˆ, Biˇlaˍdaˆ leh Zawˇhpaˆ Yawˇbaˆ htaꞈ tawˇ maˇ daꞈ ve yaw piˇ leh chi yawˇ nyi ma luˬ tuˬ te piˇ ve yoˬ. Yaꞈ hkʼaˇ, Yaˬhoˉvaˬ lehˬ Yawˇbaˆ yawˇ hui awˬ pon bon lawˬ piˇ tuˬ kaꞈ kʼoˆ piˇ ve yoˬ. Yawˇbaˆ gʼaꞈ te htaˇ Yaˬhoˉvaˬ awˬ bon naꞈ piˇ ve yoˬ.—Yawˇbaˆ 42:8-10.

10. Ngaˬ hui beuꞈ chehˇ sheˍ ve kʼo, ngaˬ hui ve awˬ to htaꞈ hkʼaˬ hkʼe te luˬ ve le? (Eˇfeˇsuꞈ 4:31, 32)

¹⁰ Ngaˬ hui shu htaꞈ venˇ baˆ maˇ hpehˇ piˇ ve kʼo, a shu yawˇ awˬ to htaꞈ te luˬ chehˇ ve. Ngaˬ hui shu htaꞈ beuꞈ chehˇ sheˍ ve kʼo, ngaˬ hui mawˇ teˇ ceuˬ ceuˬ hehnˇ ve taˆ taˍ ve htaꞈ shuˍ ve yoˬ. Yaꞈ hkʼaˇ, ngaˬ hui maˇ beuꞈ˗o ve kʼo, nyi ma sha ve yoˬ. Leh Yaˬhoˉvaˬ kaꞈ ngaˬ hui htaꞈ chi hkʼe hpehꞈ tcuh gaˇ ve yoˬ. (Eˇfeˇsuꞈ 4:31, 32 gʼaw sheˍ.) Gʼuiˬ sha kʼoˆ ve, “nyi ma zuhˆ ve taˇ cawˬ piˇ.” (Chiˇ mvuh ve 37:8) Beˆ maˍ laˇ ve chi htaꞈ gʼaꞈ te ve chaw lehˬ cuˇ yiˍ cawˬ jaˇ. Awˬ lawn kʼo, ngaˬ hui beuꞈ chehˇ sheˍ ve kʼo, a shu yawˇ awˬ to nyi ma naˬ tuˬ te ve yoˬ. (Tawˇ naˉ ve 14:30) Venˇ baˆ maˇ hpehˇ piˇ leh beuꞈ chehˇ sheˍ ve kʼo, naˆ tsuhˇ awˬ tawꞈ ma caˇ ve htaꞈ shuˍ ve yoˬ. Chi lehˬ ngaˬ hui beuꞈ ve chaw htaꞈ heuˆ kuiˬ maˇ cawˬ. Ngaˬ hui htaꞈ ceh tiˉ heuˆ la kuiˬ cawˬ ve yoˬ. Ngaˬ hui shu htaꞈ venˇ baˆ hpehˇ piˇ ve lehˬ a shu yawˇ awˬ to htaꞈ laꞈ shawnˍ piˇ ve hkʼe shuˍ ve yoˬ. Ngaˬ hui nyi ma sha leh Yaˬhoˉvaˬ ve kanˉ caˉ leh ha lehˬ ha kʼa ve hkʼaw te gʼa ve yoˬ.—Tawˇ naˉ ve 11:17.

11. Te hkʼawꞈ ve htaꞈ Liꞈ hpu hkʼaw hkʼaˬ hkʼe kʼoˆ laˇ taˍ ve le? (Roˉmaꞈ 12:19-21)

¹¹ Te hkʼawꞈ ve lehˬ Yaˬhoˉvaˬ ve awˬ vuiˬ hpehꞈ ve. Yaˬhoˉvaˬ lehˬ ngaˬ hui htaꞈ te yaꞈ laˇ ve chaw htaꞈ ngaˬ hui ciˍ yanˍ piˇ tuˬ a hkaw˗anˬ maˇ peꞈ laˇ ve yoˬ. (Roˉmaꞈ 12:19-21 gʼaw sheˍ.) Ngaˬ hui lehˬ awˬ lawn hkʼa peu˗eˬ maˇ shiˍ ve pa taw, Gʼuiˬ sha hkʼa shuˍ ngaˬ hui cawˇ ve htaꞈ dawˇ cheˆ maˇ gʼa. (Heˍbrehˇ 4:13) Chi hkʼoˆ kaꞈ, teˇ pawˆ pawˆ kʼo ngaˬ hui nyi ma zuhˆ jaˇ leh awˬ hkʼaˇ maˇ ca ve yoˬ. Hkʼe te leh, ngaˬ hui cawˇ ve hkʼaw dawˇ cheˆ maˇ gʼa. Yaˬhoˉvaˬ Yaˍkoˆ htaꞈ dawˇ pawnˍ piˇ leh bvuhꞈ tcuh ve, “chaw yaˇ nyi ma zuhˆ ve teˇ ceuˬ lehˬ, Gʼuiˬ sha ve hteˇ ve cawˇ ve htaꞈ tawˆ la tuˬ te maˇ gʼa.” (Yaˍkoˆ 1:20) Yaˬhoˉvaˬ lehˬ hteˇ ve cawˇ ve htaꞈ te ve tehꞈ ngaˬ hui yonˍ gʼa leh awˬ gʼuˇ suhˍ hpawˇ teˇ gʼaˇ le le hteˇ ve cawˇ ve htaꞈ gʼa tuˬ yoˬ.

12. Yaˬhoˉvaˬ hteˇ ve cawˇ ve htaꞈ ngaˬ hui yonˍ gʼa ve tehꞈ hkʼaˬ hkʼe te hpeuꞈ maw piˇ gʼa tuˬ le?

 ¹² Ngaˬ hui shu htaꞈ venˇ baˆ hpehˇ piˇ ve kʼo, Yaˬhoˉvaˬ hteˇ ve cawˇ ve htaꞈ yonˍ ve tehꞈ ngaˬ hui hpeuꞈ maw piˇ ve. Venˇ baˆ htaꞈ pa taw luˬ ve sheˆ ve teˇ ceuˬ le le ngaˬ hui Yaˬhoˉvaˬ htaꞈ chiˇ aꞈ piˇ ve kʼo, yawˇ htaꞈ yonˍ ve tehꞈ hpeuꞈ maw piˇ ve yoˬ. Gʼuiˬ sha lehˬ awˬ lawn oˇ ve maˇ hpehꞈ la jaw ve hkʼe leˇ te laˇ tuˬ yoˬ. Yaˬhoˉvaˬ ka tiꞈ te taˍ laˇ ve, miˬ guiˬ awˬ suhˉ hkʼaw “ponˬ laˬ peuˬ ve awˬ ceuˬ teˇ hpaˍ htaꞈ kʼawꞈ dawˇ nawˇ tuˬ ve maˇ heˆ.” (Iˉsaˍyaˆ 65:17) Yaꞈ hkʼaˇ, chaw teˇ gʼaˇ gʼaˇ ngaˬ hui nyi ma naˬ tuˬ te laˇ ve kʼo, ngaˬ hui maˇ beuꞈ˗o leh awˬ tehˬ awˬ na yawˇ htaꞈ venˇ baˆ hpehˇ piˇ ve hpehꞈ kʼai gʼa˗aw laˇ? Awˬ viˉ awˬ nyi teˇ gʼaˇ gʼaˇ ve awˬ lawn htaꞈ teˇ geh nyi sheˍ.

13-14. Hto˗niˇ leh Ho˗sheh venˇ baˆ hpehˇ daꞈ ve htaꞈ caˉ daꞈ ve nawˬ htaꞈ aˬ htoꞈ ma maˍ laˇ ve le?

¹³ Ngaˬ hui ve awˬ viˉ awˬ nyi laiˉ gʼaˇ yawˇ hui htaꞈ naˬ leh nyi ma luˬ tuˬ te piˇ ve chaw htaꞈ venˇ baˆ hpehˇ piˇ ve yoˬ. Chi hkʼe te htaˇ, yawˇ hui aˬ htoꞈ ma awˬ bon gʼa ve teˇ geh nyi sheˍ.

¹⁴ Ponˬ laˬ ve laiˉ hkʼawꞈ Hto˗niˇ * Liꞈ hpu maˇ henˇ sheˍ htaˇ, hawˉ hkʼaˆ teˇ gʼaˇ Ho˗sheh meh ve yawˇ ve awˬ viˉ paˍ htaꞈ tiˇ pehˍ piˇ ve yoˬ. Oˇ ve teˇ yanˇ Hto˗niˇ nyi ma zuhˆ jaˇ leh hehnˇ ve awˬ ceuˬ htaꞈ te ve yoˬ. Hkʼe te leh, yawˇ Ho˗sheh htaꞈ tiˇ pehˍ gaˇ ve yoˬ. Ho˗sheh htawnˍ hkʼaw lo tawˆ la peuˬ hkʼawꞈ nawˉ, Hto˗niˇ naˆ vuiˬ leh Ho˗sheh htaꞈ tiˇ pehˍ tuˬ ka tiꞈ te ve yoˬ. Oˇ ve teˇ yanˇ Hto˗niˇ Liꞈ hpu henˇ ve yoˬ. Yawˇ kʼoˆ ve, “ngaˬ Liꞈ hpu gʼa henˇ˗oˬ htaˇ ngaˬ te hkʼaˇ dawˇ hkʼaˇ pa leh maˇ daꞈ ve laiˉ ceuˬ kaꞈ gʼa pa cawˇ ve tehꞈ shiˍ ve yoˬ. Ngaˬ htaꞈ nyi ma naˬ tuˬ te laˇ ve chaw htaꞈ venˇ baˆ hpehˇ piˇ leh maˇ beuꞈ cawˇ ve tehꞈ shiˍ ve yoˬ.” Peuˬ hkʼawꞈ nawˉ, Hto˗niˇ Baˆtiˆsaˬ haꞈ yuˬ leh nyi haꞈ shaˉ paˍ hpehꞈ ve yoˬ. Ho˗sheh kaꞈ Baˆtiˆsaˬ haꞈ yuˬ leh Yaˬhoˉvaˬ ve Shaˉhkiˆhkanˍ ve chaw hpehꞈ˗oˬ ve tehꞈ Hto˗niˇ shiˍ htaˇ cheˆ˗ehꞈ kʼai ve yoˬ. Yawˇ huiˉ maˬ gʼa mawˬ daꞈ htaˇ kʼuˉ daꞈ leh Hto˗niˇ Ho˗sheh htaꞈ kʼoˆ piˇ ve nawˬ htaꞈ venˇ baˆ hpehˇ laˇ˗oˬ mehˍ. Chi Ho˗sheh gʼa kaˇ htaˇ ha lehˬ jaˇ ve yoˬ. Hto˗niˇ awˬ tehˬ awˬ na venˇ baˆ hpehˇ piˇ ve pa taw, Yaˬhoˉvaˬ awˬ bon naꞈ piˇ ve tehꞈ ngaˬ hui gʼa mawˬ ve yoˬ.

15-16. Peˍtruˆ leh Shon awˬ nu ve chaw htaꞈ venˇ baˆ hpehˇ piˇ ve htaꞈ caˉ daꞈ ve nawˬ htaꞈ aˬ htoꞈ ma maˍ laˇ ve le?

¹⁵ 1985 hkʼawꞈ htaˇ, Peˍtruˆ leh Shon hpawnˬ daꞈ chehˇ htaˇ aˬ miˍ shiˍ poˆ˗a laˇ ve yoˬ. Hawˉ hkʼaˆ teˇ gʼaˇ hpawnˬ daꞈ kuiˬ yehˬ hkʼaw aˬ miˍ shiˍ teh  ve yoˬ. Shon lehˬ naˬ jaˇ leh suh htaˇ hkʼa gaˬ mehˆ maˇ mawˬ leh naˍ paw kaꞈ maˇ kaˇ˗oˬ ve yoˬ. Chi hkʼoˆ kaꞈ, yawˇ ve naˍ hkʼawˇ awˬ peꞈ hawnˉ puiˉ ve kaꞈ maˇ kʼawꞈ hawnˉ puiˉ˗oˬ. * Peˍtruˆ leh Shon teˇ hkui teˇ hkui dawˇ ve, ‘haiˬ jaˇ ve chi hkʼe te ve lehˬ hkʼaˬ hkʼe te haˆ ve le?’ Laiˉ hkʼawꞈ peuˬ hkʼawꞈ nawˉ aˬ miˍ shiˍ teh ve chaw htaꞈ yuˬ gʼa leh suh htaˇ hkʼa gaˬ htawnˍ hkʼaw gʼa chehˇ ve yoˬ. Shu Peˍtruˆ leh Shon htaꞈ na piˇ ve, yawˇ htaꞈ venˇ baˆ hpehˇ piˇ˗aw laˇ. Yawˇ huiˉ maˬ kʼoˆ ve, “Yaˬhoˉvaˬ kʼoˆ laˇ ve ngaˬ hui beuꞈ chehˇ sheˍ ve kʼo, awˬ to hpawˇ, nyi ma hpawˇ, leh te hkʼaˇ dawˇ hkʼaˇ hpawˇ kaꞈ maˇ chehˇ sha ve yoˬ. Aˬ miˍ shiˍ poˆ˗a laˇ htaˇ, ngaˬ hui htaꞈ heuˆ la ve yoˬ. Peuˬ hkʼawꞈ nawˉ ngaˬ hui a shaꞈ teꞈ kuiˬ hkʼaw nyi ma gawˬ lehˍ ve cawˬ tuˬ, aˬ miˍ shiˍ teh ve chaw htaꞈ ngaˬ hui venˇ baˆ hpehˇ piˇ leh maˇ beuꞈ˗o tuˬ Yaˬhoˉvaˬ ga laˇ tuˬ bon lawˬ ve yoˬ.”

¹⁶ Peˍtruˆ leh Shon maˇ beuꞈ˗o ve, chi sha ve laˇ? Chi sha ve maˇ heˆ. Yawˇ hui kʼoˆ ve, “teˇ pawˆ pawˆ Shon aˬ miˍ shiˍ poˆ heuˆ˗a ve awˬ kuiˉ kʼawꞈ naˬ htaˇ, ngaˬ hui nyi ma zuhˆ ve yoˬ. Yaꞈ hkʼaˇ, ngaˬ hui oˇ ve htaꞈ tiˉ maˇ gʼa dawˇ nyi tuˬ coˇ caˇ ve yoˬ. Leh chi hkʼe ve dawˇ hkʼaˇ kaꞈ awˬ meu˗eˇ awˬ meu˗eˇ mehˉ kʼai ve yoˬ. Hkʼe te leh, ngaˬ hui nyi ma awˬ tawˬ hkʼa gaˬ kʼoˆ gʼa ve, teˇ nyi kʼo aˬ miˍ shiˍ teh paˍ awˬ viˉ awˬ nyi hpehꞈ la ve kʼo, ngaˬ hui yawˇ htaꞈ haꞈ yuˬ piˇ tuˬ yoˬ. Ngaˬ hui gʼa hpuˇ ve awˬ ceuˬ maˍ laˇ ve, Liꞈ hpu hkʼaw ve awˬ liˇ awˬ hkʼaˇ htaꞈ yuˬ yehˇ ve kʼo, ngaˬ hui nyi ma sha jaˇ. Liꞈ hpu hkʼaw ve awˬ liˇ awˬ hkʼaˇ lehˬ ngaˬ hui maˇ dawˇ gaˬ ve hkʼaw hpehˇ laˇ ve laiˉ hkʼaˇ cawˬ ve yoˬ. Maˇ maw ve awˬ yanˇ ngaˬ hui gʼa hpuˇ ve awˬ ceuˬ hkʼa peu˗eˬ htaꞈ Yaˬhoˉvaˬ gu laˇ tuˬ yoˬ tehꞈ gʼa shiˍ htaˇ nyi ma sha jaˇ ve yoˬ.”

17. Mai˗la venˇ baˆ hpehˇ piˇ ve htaꞈ caˉ daꞈ ve nawˬ htaꞈ aˬ htoꞈ ma maˍ laˇ ve le?

¹⁷ Mai˗la Liꞈ hpu tanˬ henˇ htaˇ, heuˆ daꞈ˗oˬ leh yaˇ kaꞈ nyiˇ gʼaˇ cawˬ ve yoˬ. Yaꞈ hkʼaˇ, yawˇ ve awˬ hpawˇ awˬ tehˬ ve htaꞈ maˇ dawˇ cawˇ. Peuˬ hkʼawꞈ nawˉ yawˇ ve awˬ hpawˇ haˉ chawˇ haˉ paˆ te leh yehˬ kʼa htaꞈ baˬ taˉ ve yoˬ. Mai˗la kʼoˆ ve, “ngaˬ hpawˇ ngaˬ leh yaˇ htaꞈ baˬ taˉ laˇ htaˇ, awˬ nu ve chaw yawˇ hui haꞈ ve chaw yawˇ hui htaꞈ hpfuhˆ piˇ ve hkʼa shuˍ ngaˬ hpawˇ kaꞈ ngaˬ htaꞈ hpfuhˆ laˇ ve yoˬ. Ngaˬ cheˆ˗ehꞈ kʼai ve leh dawˇ maˇ jaˇ leh nyi ma luˬ jaˇ. Ngaˬ beuꞈ jaˇ leh ngaˬ awˬ to htaꞈ tiˉ venˇ baˆ taˍ ve yoˬ.” Mai˗la awˬ hpawˇ htaꞈ baˬ˗oˬ  ve htawˇ, yawˇ awˬ hpawˇ chi hkʼe te laˇ ve pa taw nyi ma naˬ chehˇ sheˍ ve yoˬ. Yawˇ kʼoˆ ve, “ngaˬ beuꞈ leh laiˉ ha pa dawˇ maˇ jaˇ. Chi hkʼe hpehꞈ ve lehˬ, ngaˬ Yaˬhoˉvaˬ leh awˬ nu ve chaw geh meuˆ daꞈ ve htaꞈ heuˆ la kuiˬ cawˬ ve tehꞈ shiˍ la ve yoˬ.” Chi awˬ gʼuˇ suhˍ htaˇ, Mai˗la yawˇ awˬ hpawˇ htaꞈ beuꞈ jaˇ leh yawˇ ve awˬ hpawˇ maˇ daꞈ ve laiˉ ceuˬ gʼa hpuˇ piˇ tehꞈ dawˇ ve yoˬ. Yaꞈ hkʼaˇ, chi teˇ hkui yawˇ chi hkʼe maˇ dawˇ˗o. Awˬ hpawˇ Liꞈ hpu henˇ la leh Yaˬhoˉvaˬ geh meuˆ daꞈ la tcuh gaˇ ve yoˬ. Mai˗la peuˬ taˉ ve awˬ lawn htaꞈ tiˉ maˇ dawˇ nyi˗o ve pa taw, awˬ gʼuˇ suhˍ hpawˇ Yaˬhoˉvaˬ ka tiꞈ te taˍ laˇ ve htaꞈ caˉ daꞈ ve dawˇ nyi tuˬ awˬ yanˇ cawˬ ve yoˬ. Mai˗la mehˇ chawˇ ma hpehꞈ ve htawˇ, yawˇ ve yaˇ 2 gʼaˇ Yaˬhoˉvaˬ ve kanˉ te tuˬ maˍ piˇ gʼa ve yoˬ. Chi teˇ hkui yawˇ ve yaˇ 2 gʼaˇ leh yehˬ kʼa hkʼaw ve chaw geh Yaˬhoˉvaˬ ve kanˉ teˇ geh gʼa te ve ha lehˬ jaˇ.

18. Yaˬhoˉvaˬ lehˬ daꞈ jaˇ ve suhˉ jehˬ shehˍ hpaˇ hpehꞈ ve pa taw, ngaˬ hui aˬ htoꞈ ma awˬ lawn htaꞈ yonˍ gʼa ve le?

¹⁸ Ngaˬ hui awˬ nu ve chaw htaꞈ suhˉ jehˬ piˇ tuˬ awˬ vuiˬ maˇ cawˬ ve pa taw ha lehˬ jaˇ. Suhˉ jehˬ piˇ ve awˬ vuiˬ lehˬ Yaˬhoˉvaˬ ve awˬ vuiˬ ceh tiˉ hpehꞈ ve yoˬ! Yaˬhoˉvaˬ lehˬ daꞈ jaˇ ve suhˉ jehˬ shehˍ hpaˇ hpehꞈ ve yoˬ. (Roˉmaꞈ 14:10-12) Yaˬhoˉvaˬ lehˬ yawˇ ve awˬ liˇ awˬ hkʼaˇ biˇ jaˇ ve hkʼe hkʼaˬ htaˆ kaꞈ suhˉ jehˬ piˇ gʼa ve tehꞈ ngaˬ hui yonˍ ve yoˬ. (Awˬ hkuiˉ puiˍ 18:25; 1 Jawˇ mawˇ 8:32) Yaˬhoˉvaˬ lehˬ maˇ hteˇ maˇ cawˇ ve htaꞈ te tuˬ awˬ nyi maˇ cawˬ!

19. Yaˬhoˉvaˬ ve hteˇ ve cawˇ ve biˇ jaˇ ve pa taw, yawˇ aˬ htoꞈ ma te tuˬ ve le?

¹⁹ Chaw yaˇ ve venˇ baˆ leh maˇ biˇ ve htaꞈ pa taw luˬ ve sheˆ ve teˇ ceuˬ le le htaꞈ Yaˬhoˉvaˬ gu laˇ tuˬ ve awˬ nyi htaꞈ ngaˬ hui law chehˇ ve yoˬ. Oˇ ve teˇ yanˇ, naˬ ve gawˬ ve leh nyi ma luˬ ve hkʼa peu˗eˬ co co taiˍ taiˍ gu na˗e laˇ tuˬ yoˬ. Leh maˇ daꞈ ve awˬ ceuˬ oˇ ve teˇ hpaˍ htaꞈ ngaˬ hui kʼawꞈ dawˇ nawˇ tuˬ ve maˇ heˆ. (Chiˇ mvuh ve 72:12-14; Hpeuꞈ maˍ ve 21:3, 4) Yaꞈ hkʼaˇ, oˇ ve teˇ nyi maˇ gaˬ sheˍ htaˇ, Yaˬhoˉvaˬ venˇ baˆ hpehˇ piˇ ve awˬ lawn htaꞈ ngaˬ hui henˇ yuˬ gaˇ ve yoˬ. Leh ngaˬ hui kaꞈ chi hkʼe te gʼa tuˬ yawˇ ga laˇ ve pa taw awˬ bon uiˍ jaˇ tehꞈ kʼoˆ piˇ gaˇ ve yoˬ.