“Awˬ viˉ awˬ nyi ha kʼaˉ ve leh nyi ma nuˇ nehˬ ve ngaˬ dawˇ cawˇ tuˬ te laˇ jaˇ.” Li˗shaˇ * yawˇ Liꞈ hpu henˇ gaˇ tuˬ te laˇ ve awˉ lawˉ teˇ ceuˬ lehˬ, awˬ viˉ awˬ nyi ha kʼaˉ laˇ ve htaꞈ pa taw yoˬ. Ehn kaꞈ hkʼa shuˍ shuˍ yoˬ. Yawˇ kʼoˆ ve, “awˉ lawˉ teˇ ceuˬ ngaˬ Liꞈ hpu henˇ gaˇ tuˬ te laˇ ve lehˬ, Liꞈ hpu hkʼaw maˍ laˇ ve awˬ ceuˬ htaꞈ pa taw maˇ heˆ. Yaꞈ hkʼaˇ, Shaˉhkiˆhkanˍ ve chaw ha kʼaˉve leh nyi ma nuˇ nehˬ ve htaꞈ pa taw yoˬ.” Chi teˇ hkui yawˇ huiˉ maˬ Liꞈ hpu gʼaw leh hkʼa dehꞈ dawˇ nyi ve htaꞈ dawˇ cawˇ ve yoˬ. Leh Shaˉhkiˆhkanˍ ve chaw hpehꞈ˗oˬ. Yaꞈ hkʼaˇ, yawˇ huiˉ maˬ chi hkʼe hpehꞈ gʼa ve lehˬ awˬ viˉ awˬ nyi ha kʼaˉ laˇ ve htaꞈ pa taw yoˬ.

Ngaˬ hui ha kʼaˉ ve lehˬ awˬ paˇ awˬ kui chehˇ ve chaw htaꞈ awˬ bon cawˬ ve tehꞈ gʼa mawˬ ve yoˬ. Hkʼe kʼo, ngaˬ hui ha kʼaˉ ve tehꞈ hkʼaˬ hkʼe te shu htaꞈ hpeuꞈ maw piˇ gʼa tuˬ le? Awˬ lawn chi ve hkʼaw kʼoˆ ve leh te ve awˬ ceuˬ 2 ceuˬ htaꞈ ngaˬ hui teˇ geh henˇ tuˬ yoˬ. Peuˬ hkʼawꞈ nawˉ ngaˬ hui a shu htaꞈ ha kʼaˉ ve hpeuꞈ maw piˇ cawˇ ve teˇ geh henˇ tuˬ yoˬ.

Tawˇ naˉ ve liꞈ kaˇ nanˉ uiˍ 31 hkʼaw awˬ miˇ ma “tawˇ nuˇ lehˍ” yaw puiˉ ve htaꞈ kʼoˆ taˍ ve yoˬ. (Tawˇ naˉ ve 31:26) Yawˇ tawˇ nuˇ lehˍ yaw ve tehꞈ te maˍ laˇ ve lehˬ, yawˇ tawˇ yaw ve awˬ hkʼaˇ leh awˬ hkawˇ htaꞈ yoˬ. Awˬ pa hpehꞈ ve chaw kaꞈ ha kʼaˉ ve leh nyi ma nuˇ nehˬ ve hkʼaw gʼa yaw ve yoˬ. Maˇ˗awˍ ve awˬ pa awˬ e shiˍ ve lehˬ, yawˇ hui hehnˇ ve leh nyi ma naˬ tuˬ tawˇ yaw piˇ ve kʼo, yaˇ htaꞈ heuˆ la kuiˬ cawˬ jaˇ. Awˬ pa awˬ e maˇ na sha ve tawˇ yaw ve, yawˇ hui yaˇ htaꞈ deˇ hkeh jaˇ ve pa taw, yaˇ yawˇ hui hkawˇ hkʼa dehꞈ maˇ na gaˇ ve yoˬ. Yaꞈ hkʼaˇ, awˬ pa awˬ e yaˇ htaꞈ ha kʼaˉ ve leh nuˇ nehˬ ve hkʼaw tawˇ yaw piˇ ve kʼo, yaˇ yawˇ hui ve hkawˇ na leh gʼaꞈ te gaˇ ve yoˬ.

Ngaˬ hui awˬ pa awˬ e maˇ hpehꞈ ve htawˇ ngaˬ hui teˇ gʼaˇ le le ha kʼaˉ ve leh nyi ma nuˇ nehˬ ve hkʼaw tawˇ gʼa yaw cawˇ ve yoˬ. Chi ve ngaˬ hui hkʼaˬ hkʼe te gʼa tuˬ le? Tawˇ naˉ ve liꞈ 31:26 ngaˬ hui shiˍ tuˬ maˍ laˇ ve yoˬ. Chi teˇ tawn hkʼaw awˬ miˇ ma lehˬ “cuˇ yiˍ cawˬ ve hkʼaw tawˇ nuˇ lehˍ yaw puiˉ ve yoˬ.” Chi kʼoˆ gaˇ ve lehˬ yawˇ tawˇ maˇ yaw sheˍ htaˇ, aˬ htoꞈ ma tawˇ yaw tuˬ leh tawˇ hkʼaˬ hkʼe yaw piˇ tuˬ dawˇ nyi sheˍ ve yoˬ. Ngaˬ hui kaꞈ hkʼa shuˍ shuˍ yoˬ. Ngaˬ hui a shu yawˇ awˬ to htaꞈ na nyi cawˇ ve, ‘ngaˬ chi hkʼe yaw ve kʼo, shu hkʼaˬ hkʼe dawˇ tuˬ ve le? Yawˇ beuꞈ tuˬ maˇ heˆ leh nyi ma sha tuˬ ve laˇ?’ (Tawˇ naˉ ve 15:1) Ngaˬ hui tawˇ maˇ yaw sheˍ htaˇ awˉ lawˉ dawˇ nyi ve lehˬ a yeˇ uiˍ jaˇ.

Tawˇ naˉ ve liꞈ awˬ nu ve teˇ tawn hkʼaw kʼawꞈ kʼoˆ sheˍ ve, “maˇ dawˇ nyi leh yaw ve tawˇ teˇ hpaˍ lehˬ, aˉ htaw hkʼa shuˍ shu htaꞈ naˬ piˇ lawˬ ve yoˬ.” (Tawˇ naˉ ve 12:18) Ngaˬ hui yaw ve leh tawˇ yaw ve awˬ hkawˇ shu hkʼaˬ hkʼe dawˇ ve htaꞈ ngaˬ hui awˉ lawˉ dawˇ nyi ve kʼo, ngaˬ hui tawˇ yaw ve htaꞈ shaˍ tiꞈ te tuˬ yoˬ. Ngaˬ hui ha kʼaˉ ve hkʼaw tawˇ yaw ve kʼo, awˬ nu ve chaw htaꞈ maˇ daꞈ ve hpawˇ maˇ dawˇ leh maˇ daꞈ ve tawˇ kaꞈ maˇ yaw piˇ. Leh ngaˬ hui yawˇ hui htaꞈ tawˇ maˇ daꞈ ve maˇ yaw piˇ leh tawˇ hehnˇ ve kaꞈ maˇ yaw piˇ. Yaꞈ hkʼaˇ, ngaˬ hui daꞈ ve hpawˇ tawˇ yaw ve lehˬ, na sha ve leh nuˇ nehˬ ve hkʼaw tawˇ yaw piˇ ve yoˬ. (Eˇfeˇsuꞈ 4:31, 32) Awˬ lawn chi lehˬ Yaˬhoˉvaˬ daꞈ jaˇ ve henˇ yuˬ tuˬ hpehꞈ ve yoˬ. Eˇliˇyaꞈ kawˆ htaˇ, Gʼuiˬ sha mvuhˇ naw ma tcuh yaˇ htaꞈ cuˇ leh ‘tawˇ nuˇ lehˍ yaw’ piˇ tcuh ve yoˬ. (1 Jawˇ mawˇ 19:12) Yaꞈ hkʼaˇ, ha kʼaˉ ve lehˬ tawˇ yaw ve ceh tiˉ hpeuꞈ maw piˇ ve maˇ heˆ. Te ve hkʼaw kaꞈ gʼa hpeuꞈ maw piˇ ve yoˬ. Hkʼe kʼo, ngaˬ hui hkʼaˬ hkʼe te tuˬ le?

Ngaˬ hui Yaˬhoˉvaˬ htaꞈ henˇ yuˬ ve kʼo, tawˇ yaw ve leh te ve awˬ ceuˬ ha kʼaˉ ve tehꞈ hpeuꞈ maw piˇ ve yoˬ. (Eˇfeˇsuꞈ 4:32; 5:1, 2) Chi awˬ gʼuˇ suhˍ htaˇ kʼoˆ kʼai peuˬ ve Li˗shaˇ kʼoˆ ve, “ngaˬ hui ve yehˬ kʼa laꞈ tcuh laꞈ haˉ yehˬ gʼa jiˆ kʼai tuˬ nyiˉ laˇ  ve yoˬ. Oˇ ve teˇ yanˇ ngaˬ Liꞈ hpu maˇ henˇ sheˍ. Yaꞈ hkʼaˇ, Shaˉhkiˆhkanˍ ve chaw awˬ hpawˇ awˬ miˇ ma 2 ca kanˉ lawˬ jehˇ leh ngaˬ hui htaꞈ ca ga la ve yoˬ.” Awˬ viˉ awˬ nyi ha kʼaˉ ve leh nuˇ nehˬ ve tehꞈ hpeuꞈ maw laˇ htaˇ, Li˗shaˇ Liꞈ hpu henˇ gaˇ ve yoˬ.

“Ngaˬ Yaˬhoˉvaˬ ve Shaˉhkiˆhkanˍ ve chaw htaꞈ awˉ lawˉ tanˬ mawˬ daꞈ htaˇ ‘aˬ htoꞈ ma te yawˇ hui ngaˬ htaꞈ daꞈ ve te laˇ leh ngaˬ htaꞈ a yeˇ yuˬ laˇ ve le?’ Yawˇ hui htaꞈ maˇ yonˍ gʼa leh htawˇ dawˇ nawˬ dawˇ cawˬ ve yoˬ. Hkʼawꞈ nawˉ htaˇ ngaˬ htaꞈ Liꞈ hpu maˍ laˇ ve chaw ngaˬ htaꞈ haꞈ leh ha kʼaˉ ve te laˇ ve pa taw ngaˬ yawˇ htaꞈ yonˍ tuˬ te laˇ ve yoˬ.” Chi awˬ bon hkʼaˬ hkʼe cawˬ ve le? Ehn kʼoˆ ve, “oˇ ve teˇ yanˇ tanˬ leh ngaˬ coˇ caˇ leh Liꞈ hpu hkʼa dehꞈ henˇ ve yoˬ.”

Shaˉhkiˆhkanˍ ve chaw yawˇ hui htaꞈ haꞈ leh ha kʼaˉ ve tehꞈ hpeuꞈ maw laˇ htaˇ dawˇ cawˇ jaˇ. Hkʼe te leh, yawˇ hui Liꞈ hpu henˇ gaˇ tuˬ te laˇ ve yoˬ. Leh Hkriꞈ yaˇ awˬ moˍ hkʼaw ve awˬ viˉ awˬ nyi yawˇ hui htaꞈ haꞈ leh ha kʼaˉ ve tehꞈ hpeuꞈ maw laˇ htaˇ yawˇ hui Shaˉhkiˆhkanˍ ve chaw htaꞈ meuˆ daꞈ leh yonˍ gʼa tuˬ te laˇ ve yoˬ.

Chaw teˇ hpaˍ hpaˍ lehˬ chaw liˇ vaˇ liˇ chi hkʼe ve hkʼaw uiˍ la ve pa taw, tawˇ nuˇ lehˍ yaw leh ha lehˬ puiˉ ve yoˬ. Chi hkʼe te ve kaꞈ daꞈ ve yoˬ.  Yaꞈ hkʼaˇ, chi ve teˇ hkʼaˇ ceh tiˉ yawˇ ha kʼaˉ ve tehꞈ hpeuꞈ maw piˇ tuˬ te piˇ ve kʼo, chi lehˬ Gʼuiˬ sha ha kʼaˉ ve cawˬ tcuh gaˇ ve hkʼe maˇ heˆ.—Tcuh yaˇ 28:2 htaꞈ tehˆ daꞈ sheˍ.

Ha kʼaˉ ve lehˬ Gʼuiˬ sha ve awˬ ha hpu ve awˬ shiˍ nawꞈ ve teˇ hpaˍ hpehꞈ ve yoˬ. (Gaˍlaˍtiˆ 5:22, 23) Hkʼe te leh, Gʼuiˬ sha ve daꞈ kehˬ ve awˬ ha hpu ngaˬ hui htaꞈ gʼa ga laˇ tcuh ve yoˬ. Ngaˬ hui chi hkʼe te ve kʼo, ngaˬ hui kaꞈ Yaˬhoˉvaˬ leh Yeˍsuˆ htaꞈ henˇ yuˬ gʼa ve yoˬ. Ngaˬ hui Hkriꞈ yaˇ hpehꞈ ve pa taw awˬ nu ve chaw htaꞈ a yeˇ yuˬ ve yoˬ. Leh ngaˬ hui ha kʼaˉ ve tehꞈ hpeuꞈ maw piˇ ve lehˬ Yaˬhoˉvaˬ leh awˬ nu ve chaw htaꞈ haꞈ ve pa taw yoˬ. Ha kʼaˉ ve lehˬ nyi ma hkʼaw tawˆ la ve pa taw kanˇ paˆ cawˬ jaˇ leh Gʼuiˬ sha nyi hkʼaˇ suh jaˇ ve awˬ ceuˬ hpehꞈ ve yoˬ.

Shu ngaˬ hui htaꞈ tawˇ nuˇ lehˍ yaw laˇ leh daꞈ ve te laˇ ve chaw htaꞈ ngaˬ hui kʼawꞈ te piˇ ve lehˬ a hkʼe leˇ ceh hpehꞈ ve yoˬ. (2 Saˍmo˗eˍlaˆ 2:6) Tawˇ pa haˉ te kʼo, ngaˬ hui yawˇ htaꞈ awˬ bon uiˍ jaˇ kʼoˆ piˇ ve yoˬ hehˉ. (Kawˇlawˇsehˇ 3:15) Yaꞈ hkʼaˇ, chaw teˇ hpaˍ ngaˬ hui tawˇ nuˇ lehˍ yaw piˇ ve htaꞈ maˇ gʼa keunˍ ve kʼo, hkʼaˬ hkʼe te tuˬ le?

Ngaˬ hui Yaˬhoˉvaˬ ve awˬ lawn htaꞈ dawˇ nyi sheˍ. Yawˇ lehˬ tawˇ nuˇ lehˍ yaw ve daꞈ jaˇ ve henˇ yuˬ tuˬ hpehꞈ ve yoˬ. Awˬ tehˬ kʼo, chaw yaˇ lehˬ tawˇ nuˇ lehˍ yaw laˇ ve htaꞈ maˇ gʼa keunˍ. Heˍlaˍsaˆ ve Liꞈ hpu hkʼaw “awˬ bon awˬ shinˉ” tehꞈ kʼoˆ ve tawˇ laiˉ pawˆ yehˇ ve yoˬ. Gʼuiˬ sha ngaˬ hui htaꞈ tawˇ nuˇ lehˍ yaw laˇ ve a yeˇ uiˍ jaˇ ve teˇ lawn htaꞈ teˇ geh henˇ sheˍ.

Peuˬ laˬ ve laiˉ hkʼawꞈ htaˇ, Yaˬhoˉvaˬ chaw yaˇ laiˉ lanˬ gʼaˇ htaꞈ ha kʼaˉ ve tehꞈ hpeuꞈ maw piˇ ve lehˬ, yawˇ hui a shaꞈ teꞈ kuiˬ hkʼaw loˍ ve awˬ ceuˬ hkʼaˬ htaˆ kaꞈ piˇ ve yoˬ. (Maꞈhtehˍ 5:45) Chaw yaˇ teˇ gʼaˇ le le Yaˬhoˉvaˬ htaꞈ maˇ shiˍ sheˍ ve htawˇ, Yaˬhoˉvaˬ ha kʼaˉ ve tehꞈ hpeuꞈ maw piˇ ve yoˬ. (Eˇfeˇsuꞈ 2:4, 5, 8) Tawˇ pa haˉ te kʼo, chaw yaˇ teˇ gʼaˇ le le htaꞈ awˬ hpfuhˇ hkʼaˆ jaˇ ve awˬ ceuˬ piˇ ve lehˬ, yawˇ ve Yaˇ paˍ teˇ gʼaˇ tiˉ cawˬ ve htawˇ chaw yaˇ htaꞈ htaiˍ hkʼawꞈ laˇ tcuh ve yoˬ. Tcuh yaˇ Pawˇluꞈ kʼoˆ ve, ‘Gʼuiˬ sha ve awˬ bon uiˍ jaˇ maˇ jaˇ ve htaꞈ’ hpeuꞈ maw laˇ ve yoˬ. (Eˇfeˇsuꞈ 1:7) Chi hkʼoˆ kaꞈ, ngaˬ hui venˇ baˆ yaˇ hpehꞈ leh Yaˬhoˉvaˬ htaꞈ nyi ma luˬ tuˬ teˇ hkui teˇ hkui te piˇ ve htawˇ, yawˇ ngaˬ hui htaꞈ beˆ maˍ laˇ leh hkʼaˬ htaˆ kaꞈ maˍ laˇ sheˍ ve yoˬ. Gʼuiˬ sha maˍ laˇ ve yawˇ ve tawˇ hkawˇ lehˬ, “mvuhˇ yeˬ gʼuiˬ hkʼe hpehꞈ ve yoˬ.” (Bon maˍ ve 32:2) Ngaˬ hui hkʼaˬ hkʼe taw coˇ caˇ ve htawˇ, Yaˬhoˉvaˬ ve awˬ bon awˬ shinˉ hkʼa peu˗eˬ htaꞈ ngaˬ hui te hkʼawꞈ piˇ gʼa tuˬ awˬ nyi maˇ cawˬ. Ngaˬ hui Yaˬhoˉvaˬ ha kʼaˉ laˇ ve htaꞈ maˇ gʼa ve kʼo, awˬ gʼuˇ suhˍ hpawˇ ngaˬ hui ve a shaꞈ teꞈ kuiˬ hkʼaw dawˇ law kuiˬ kaꞈ maˇ cawˬ.—1 Peˍtruˆ 1:13 htaꞈ tehˆ daꞈ sheˍ.

Yaˬhoˉvaˬ ha kʼaˉ laˇ ve pa taw ngaˬ hui nyi ma pfuhˇ leh yawˇ maˍ laˇ ve htaꞈ gʼaꞈ te gaˇ tuˬ te laˇ ve yoˬ. Ngaˬ hui chaw teˇ hpaˍ hpaˍ htaꞈ ceh ha kʼaˉ ve tehꞈ hpeuꞈ maw piˇ ve aꞈ kehˉ ngaˬ hui Yaˬhoˉvaˬ htaꞈ henˇ yuˬ leh ha kʼaˉ piˇ sheˍ. (1 Hteˇsaˍlawˇniˆ 5:15) Ngaˬ hui hkʼaˬ htaˆ kaꞈ ha kʼaˉ ve tehꞈ hpeuꞈ maw piˇ ve kʼo, kaˆ jaˇ ve awˬ yanˇ htaˇ aˬ miˍ ceh taˍ ve htaꞈ shuˍ ve yoˬ. Yehˬ kʼa hkʼaw ve chaw, awˬ viˉ awˬ nyi, kanˉ te kuiˬ lo ve awˬ chawˇ, liꞈ henˇ yehˬ lo ve awˬ chawˇ leh awˬ paˇ awˬ kui chehˇ ve chaw htaꞈ awˬ gʼaˇ piˇ ve yoˬ.

Yehˬ kʼa hkʼaw ve chaw leh Hkriꞈ yaˇ awˬ moˍ hkʼaw ve awˬ viˉ awˬ nyi htaꞈ, ngaˬ hui tawˇ yaw ve leh te ve awˬ ceuˬ hkʼaˬ ve teˇ gʼaˇ htaꞈ, ha kʼaˉ ve tehꞈ hpeuꞈ maw piˇ gʼa ve le? Nawˬ ve Hkriꞈ yaˇ awˬ moˍ hkʼaw awˬ viˉ awˬ nyi hkʼaˬ ve teˇ gʼaˇ ga piˇ tuˬ loˍ jaˇ ve le? Tawˇ pa haˉ te kʼo, aˉ hkʼaw kanˉ ga te piˇ ve, aˉ kʼaꞈ aˉ ji daꞈ kehˬ tuˬ ga te piˇ ve, maˇ heˆ leh yawˇ hui htaꞈ caˇ tuˬ mawˇ gʼa ga vuiˬ piˇ ve yoˬ. Nawˬ hto toˇ kuiˬ awˬ ti lo ga laˇ tuˬ loˍ ve chaw htaꞈ mawˬ htaˇ nawˬ yawˇ htaꞈ ga piˇ˗aw laˇ?

Yaˬhoˉvaˬ htaꞈ henˇ yuˬ ve lehˬ tawˇ yaw ve leh te ve awˬ ceuˬ hkʼaˬ htaˆ kaꞈ ha kʼaˉ ve tehꞈ hpeuꞈ maw piˇ sheˍ.