1. Cuˇ yiˍ piˇ ve liꞈ 7:20 hkʼaw awˬ tehˬ ve awˬ lawn htaꞈ Sawˉlaꞈmonˍ hkʼaˬ hkʼe kʼoˆ ve le?

 Jawˇ mawˇ Sawˉlaꞈmonˍ kʼoˆ ve, “hkʼaˬ htaˆ kaꞈ daꞈ ve kanˉ htaꞈ tiˉ te leh, teˇ pawˆ kaꞈ maˇ te yaꞈ jaw ve chaw miˬ guiˬ hkʼoˆ teˇ gʼaˇ kaꞈ maˇ cawˬ.” (Cuˇ yiˍ piˇ ve 7:20) Ngaˬ hui teˇ gʼaˇ le le venˇ baˆ yaˇ hpehꞈ ve yoˬ. Hkʼe te leh, Gʼuiˬ sha leh awˬ nu ve chaw venˇ baˆ hpehˇ laˇ ve htaꞈ ngaˬ hui gʼa cawˇ ve yoˬ.—1 Yoˇhanˬ 1:8.

2. Nawˬ meuˆ daꞈ jaˇ ve awˬ chawˇ nawˬ htaꞈ venˇ baˆ hpehˇ laˇ htaˇ hkʼaˬ hkʼe dawˇ ve le?

² Nawˬ awˬ chawˇ meuˆ daꞈ jaˇ ve htaꞈ nyi ma luˬ tuˬ te piˇ htaˇ ve htaꞈ tawnˇ gʼa˗aw laˇ? Nawˬ yawˇ geh kʼawꞈ cawˇ daꞈ gaˇ ve yoˬ. Hkʼe te leh, nawˬ yawˇ geh venˇ baˆ hpehˇ laˇ tuˬ lawˬ ve yoˬ. Leh yawˇ venˇ baˆ hpehˇ laˇ htaˇ, nawˬ hkʼaˬ hkʼe dawˇ ve le? Nyi ma sha leh ha lehˬ jaˇ ve yoˬ.

3. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

³ Yaˬhoˉvaˬ lehˬ ngaˬ hui meuˆ daꞈ jaˇ ve awˬ chawˇ hpehꞈ tcuh gaˇ ve yoˬ. Yaꞈ hkʼaˇ, teˇ pawˆ pawˆ kʼo ngaˬ hui tawˇ yaw ve maˇ heˆ leh te ve teˇ ceuˬ ceuˬ yawˇ nyi ma luˬ tuˬ te piˇ ve yoˬ. Aˬ htoꞈ ma te Yaˬhoˉvaˬ ngaˬ hui htaꞈ venˇ baˆ hpehˇ laˇ gaˇ ve tehꞈ yonˍ gʼa ve le? Yaˬhoˉvaˬ venˇ baˆ hpehˇ piˇ ve lehˬ, chaw yaˇ venˇ baˆ hpehˇ piˇ ve htaꞈ hkʼaˬ hkʼe te peun daꞈ ve le? Leh Yaˬhoˉvaˬ a shu htaꞈ venˇ baˆ hpehˇ piˇ ve le? Chi ve teˇ hpaˍ awˬ lawn chi ve hkʼaw teˇ geh henˇ tuˬ yoˬ.

4. Yaˬhoˉvaˬ lehˬ venˇ baˆ hpehˇ piˇ puiˉ jaˇ ve tehꞈ aˬ htoꞈ ma te ngaˬ hui yonˍ gʼa ve le?

⁴ Liꞈ hpu hkʼaw ngaˬ hui htaꞈ ka tiꞈ te laˇ ve, Yaˬhoˉvaˬ lehˬ venˇ baˆ hpehˇ piˇ puiˉ jaˇ ve Gʼuiˬ sha hpehꞈ ve yoˬ. Siˉnaˆ hkʼaw hkʼoˆ lo Yaˬhoˉvaˬ yawˇ htaꞈ caˉ daꞈ ve mvuhˇ naw ma tcuh yaˇ htaꞈ cuˇ leh Moˉseˍ htaꞈ kʼoˆ piˇ tcuh ve yoˬ. Oˇ kaˬ lo kʼoˆ ve, “Gʼuiˬ sha lehˬ ha kʼaˉ puiˉ leh awˬ bon te piˇ puiˉ ve Gʼuiˬ sha hpehꞈ leh, nyi ma dawˇ zuhˬ gaˇ zuhˬ ve Gʼuiˬ sha, haꞈ pehnˇ uiˍ leh ka tiꞈ yeˬ ve Gʼuiˬ sha hpehꞈ ve yoˬ. Ngaˬ lehˬ, chaw awˬ hinˉ awˬ meunˍ gʼaˇ htaꞈ ka tiꞈ yeˬ leh, yawˇ hui ve venˇ baˆ teˇ  hpaˍ htaꞈ hpehˇ piˇ puiˉ ve Gʼuiˬ sha hpehꞈ ve yoˬ.” (Tawˆ kʼai ve 34:6, 7) Yaˬhoˉvaˬ lehˬ ha kʼaˉ puiˉ leh nyi ma nuˇ nehˬ jaˇ ve Gʼuiˬ sha hpehꞈ ve yoˬ. Venˇ baˆ te yaꞈ ve chaw dawˇ hpfuhˆ htaˇ, yawˇ hkʼaˬ htaˆ kaꞈ venˇ baˆ hpehˇ piˇ puiˉ ve yoˬ.—Neˍhaˍmiˆ 9:17; Chiˇ mvuh ve 86:15.

5. Chiˇ mvuh ve liꞈ 103:13, 14 hkʼaw kʼoˆ taˍ ve hkʼe, Yaˬhoˉvaˬ chaw yaˇ htaꞈ hkʼa dehꞈ shiˍ ve lehˬ, yawˇ aˬ htoꞈ ma te gaˇ tuˬ te piˇ ve le?

⁵ Yaˬhoˉvaˬ lehˬ ngaˬ hui htaꞈ hpanˍ shehˍ hpaˇ hpehꞈ ve yoˬ! Hkʼe te leh, ngaˬ hui htaꞈ caˉ daꞈ ve teˇ ceuˬ le le yawˇ shiˍ ve yoˬ. Miˬ guiˬ hkʼoˆ chehˇ ve chaw teˇ gʼaˇ le le htaꞈ caˉ daꞈ ve Yaˬhoˉvaˬ lehˬ teˇ ceuˬ le le shiˍ ve tehꞈ dawˇ nyi sheˍ. (Chiˇ mvuh ve 139:15-17) Chi htaꞈ pa taw, awˬ pa awˬ e geh gʼa ve maˇ biˇ ve teˇ ceuˬ le le htaꞈ Yaˬhoˉvaˬ mawˬ ve yoˬ. Chi hkʼoˆ kaꞈ, chi hkʼe hpehꞈ ve lehˬ ngaˬ hui a shaꞈ teꞈ kuiˬ hkʼaw aˬ htoꞈ ma gʼa hpuˇ jaw ve kaꞈ yawˇ shiˍ sheˍ ve yoˬ. Yaˬhoˉvaˬ chaw yaˇ htaꞈ hkʼa dehꞈ shiˍ ve lehˬ, yawˇ aˬ htoꞈ ma te gaˇ tuˬ te piˇ ve le? Yawˇ ngaˬ hui htaꞈ ha kʼaˉ ve yoˬ.—Chiˇ mvuh ve 78:39; Chiˇ mvuh ve 103:13, 14 gʼaw sheˍ.

6. Yaˬhoˉvaˬ lehˬ ngaˬ hui htaꞈ venˇ baˆ hpehˇ laˇ gaˇ jaˇ ve tehꞈ hkʼaˬ hkʼe gʼa mawˬ ve le?

⁶ Yaˬhoˉvaˬ lehˬ ngaˬ hui htaꞈ venˇ baˆ hpehˇ laˇ gaˇ jaˇ ve tehꞈ gʼa mawˬ ve yoˬ. Aˍdanˍ venˇ baˆ te yaꞈ ve pa taw, ngaˬ hui venˇ baˆ yaˇ hpehꞈ leh gʼa suh˗e ve tehꞈ Yaˬhoˉvaˬ shiˍ ve yoˬ. (Roˉmaꞈ 5:12) Ngaˬ hui hkʼaˬ hkʼe taw coˇ caˇ ve htawˇ maˇ kʼoˆ, ngaˬ hui awˬ to leh awˬ nu ve chaw venˇ baˆ gʼa ponˬ leh suh ve htaꞈ kaꞈ gʼa ponˬ tuˬ ngaˬ hui ga piˇ maˇ gʼa. (Chiˇ mvuh ve 49:7-9) Yaꞈ hkʼaˇ, Yaˬhoˉvaˬ lehˬ ngaˬ hui htaꞈ haꞈ leh ha kʼaˉ laˇ ve yoˬ. Hkʼe te leh, yawˇ ngaˬ hui htaꞈ ga laˇ tuˬ teˇ ceuˬ ceuˬ te ve yoˬ. Yoˇhanˬ liꞈ 3:16 hkʼaw kʼoˆ ve, Yaˬhoˉvaˬ lehˬ yawˇ ve Yaˇ paˍ teˇ gʼaˇ tiˉ cawˬ ve htawˇ, ngaˬ hui awˬ pon htaiˍ hkʼawꞈ tcuh laˇ ve yoˬ. Yawˇ htaꞈ yonˍ ve chaw teˇ gʼaˇ le le venˇ baˆ leh suh ve htaꞈ gʼa ponˬ tuˬ yoˬ. (Maꞈhtehˍ 20:28; Roˉmaꞈ 5:19) Leh Yeˍsuˆ awˬ tehˬ awˬ na chi hkʼe te ve htaꞈ ngaˬ hui gʼa mawˬ ve yoˬ. (Heˍbrehˇ 2:9) Yaˬhoˉvaˬ yawˇ haꞈ jaˇ ve Yaˇ paˍ tuꞈ jaˇ hkanˍ jaˇ ve leh yaꞈ taw jaˇ ve hkʼaw gʼa suh˗e ve htaꞈ yawˇ mawˬ htaˇ, yawˇ nyi ma hkʼaˬ hkʼe taw naˬ jaˇ ve htaꞈ dawˇ nyi sheˍ. Yaˬhoˉvaˬ ngaˬ hui htaꞈ venˇ baˆ maˇ hpehˇ laˇ gaˇ ve kʼo, yawˇ ve Yaˇ paˍ ngaˬ hui awˬ pon maˇ hkanˍ suh tcuh laˇ taˬ.

7. Yaˬhoˉvaˬ venˇ baˆ hpehˇ piˇ ve Liꞈ hpu hkʼaw a shu ve awˬ lawn cawˬ ve le?

⁷ Yaˬhoˉvaˬ venˇ baˆ hpehˇ piˇ ve Liꞈ hpu hkʼaw chaw laiˉ gʼaˇ ve awˬ lawn cawˬ ve yoˬ. (Eˇfeˇsuꞈ 4:32) Nawˬ a shu htaꞈ dawˇ mawˬ ve le? Nawˬ jawˇ mawˇ Maˍnaˍseˍ htaꞈ dawˇ mawˬ ve yoˬ hehˉ. Yawˇ Yaˬhoˉvaˬ htaꞈ laiˉ pawˆ te yaꞈ leh haiˬ ve laiˉ ceuˬ tanˬ te ve yoˬ. Tawˇ pa haˉ te kʼo, yawˇ maˇ heˆ heˆ  ve oˉ kʼoˍ pui kuiˬ te ve, yawˇ ve yaˇ laiˉ gʼaˇ tuˉ tanˇ piˇ ve, leh Yaˬhoˉvaˬ ve bon yehˬ hkʼaw shaˉ hoꞈ te teh ve yoˬ. Liꞈ hpu hkʼaw Maˍnaˍseˍ htaꞈ kʼoˆ ve, “yawˇ Gʼuiˬ sha htaꞈ te yaꞈ jaˇ leh, Gʼuiˬ sha nyi ma zuhˆ tuˬ te ve yoˬ.” (2 Raˍsaˍvanˍ 33:2-7) Yaꞈ hkʼaˇ, Maˍnaˍseˍ lehˬ yawˇ te ve awˬ ceuˬ htaꞈ nyi ma luˬ leh venˇ baˆ dawˇ hpfuhˆ htaˇ, Yaˬhoˉvaˬ Maˍnaˍseˍ htaꞈ venˇ baˆ hpehˇ piˇ leh yawˇ jawˇ mawˇ gʼa kʼawꞈ te ve yoˬ. (2 Raˍsaˍvanˍ 33:12, 13) Chi hkʼoˆ kaꞈ, nawˬ jawˇ mawˇ Daˍviˆ htaꞈ kaꞈ dawˇ mawˬ ve yoˬ hehˉ. Daˍviˆ Yaˬhoˉvaˬ htaꞈ laiˉ pawˆ te yaꞈ jaˇ ve yoˬ. Chi lehˬ yawˇ haˉ chawˇ haˉ paˆ te leh awˬ nu ve chaw htaꞈ tiˇ pehˍ tuˬ awˬ hkʼaˇ gu ve yoˬ. Yaꞈ hkʼaˇ, Daˍviˆ awˬ tehˬ awˬ na venˇ baˆ dawˇ hpfuhˆ leh yawˇ te yaꞈ ve tehꞈ haꞈ yuˬ htaˇ, Yaˬhoˉvaˬ kaꞈ yawˇ htaꞈ venˇ baˆ hpehˇ piˇ ve yoˬ. (2 Saˍmo˗eˍlaˆ 12:9, 10, 13, 14) Yaˬhoˉvaˬ ngaˬ hui htaꞈ kaꞈ venˇ baˆ hpehˇ laˇ gaˇ ve tehꞈ yonˍ gʼa ve yoˬ. Uiˍ jaˇ mvuh jaˇ ve Yaˬhoˉvaˬ lehˬ hkʼaˬ hkʼe te venˇ baˆ hpehˇ piˇ puiˉ jaˇ ve, leh yawˇ venˇ baˆ hpehˇ piˇ ve lehˬ chaw yaˇ venˇ baˆ hpehˇ piˇ ve hkʼaˬ hkʼe peun daꞈ ve teˇ geh henˇ tuˬ yoˬ.

8. Yaˬhoˉvaˬ lehˬ daꞈ jaˇ ve suhˉ jehˬ shehˍ hpaˇ hpehꞈ leh yawˇ venˇ baˆ hpehˇ laˇ ve awˬ bon hkʼaˬ hkʼe gʼa ve le?

⁸ Yaˬhoˉvaˬ lehˬ, “miˬ guiˬ hkʼoˆ ve suhˉ jehˬ shehˍ hpaˇ” hpehꞈ ve yoˬ. (Awˬ hkuiˉ puiˍ 18:25) Daꞈ jaˇ ve suhˉ jehˬ shehˍ hpaˇ lehˬ awˬ liˇ awˬ hkʼaˇ htaꞈ shiˍ jaˇ. Leh Yaˬhoˉvaˬ kaꞈ awˬ tehˬ awˬ na chi hkʼe hpehꞈ ve yoˬ. Yawˇ lehˬ suhˉ jehˬ shehˍ hpaˇ ceh tiˉ hpehꞈ ve maˇ heˆ. Yawˇ lehˬ ngaˬ hui htaꞈ awˬ liˇ awˬ hkʼaˇ teh laˇ shehˍ hpaˇ kaꞈ hpehꞈ ve yoˬ. (Iˉsaˍyaˆ 33:22) Aˬ htoꞈ ma cawˇ ve leh maˇ cawˇ ve Yaˬhoˉvaˬ lehˬ hkʼa dehꞈ shiˍ ve yoˬ. Yawˇ hkʼe taw shiˍ ve teˇ gʼaˇ kaꞈ maˇ cawˬ. Daꞈ jaˇ ve suhˉ jehˬ shehˍ hpaˇ lehˬ te hkʼaˇ dawˇ hkʼaˇ aˬ htoꞈ ma gʼa cawˬ sheˍ ve le? Suhˉ maˇ jehˬ piˇ sheˍ htaˇ, yawˇ lehˬ awˬ tehˬ ve teˇ ceuˬ le le htaꞈ gʼa shiˍ cawˇ ve yoˬ. Yaˬhoˉvaˬ kaꞈ chi hkʼe hpehꞈ ve yoˬ. Yawˇ lehˬ teˇ ceuˬ le le htaꞈ hkʼa dehꞈ shiˍ leh daꞈ jaˇ ve suhˉ jehˬ shehˍ hpaˇ hpehꞈ ve yoˬ. Yawˇ htaꞈ shuˍ ve teˇ gʼaˇ kaꞈ maˇ cawˬ.

9. Yaˬhoˉvaˬ lehˬ venˇ baˆ maˇ hpehˇ piˇ sheˍ htaˇ, chaw oˇ ve teˇ gʼaˇ htaꞈ caˉ daꞈ ve aˬ htoꞈ ma htaꞈ awˉ lawˉ shiˍ ve le?

⁹ Yaˬhoˉvaˬ lehˬ miˬ guiˬ hkʼoˆ lo ve suhˉ jehˬ shehˍ hpaˇ htaꞈ peun daꞈ jaˇ. Yawˇ teˇ ceuˬ le le htaꞈ hkʼa dehꞈ shiˍ ve yoˬ. (Awˬ hkuiˉ puiˍ 18:20, 21; Chiˇ mvuh ve 90:8) Chaw yaˇ lehˬ mawˬ ve leh kaˇ ve awˬ ceuˬ htaꞈ ceh tiˉ suhˉ jehˬ cheˆ piˇ ve yoˬ. Yaꞈ hkʼaˇ, Yaˬhoˉvaˬ lehˬ chi hkʼe maˇ heˆ. Aˬ htoꞈ ma te chaw teˇ hpaˍ teˇ ceuˬ ceuˬ te ve Yaˬhoˉvaˬ hkʼa dehꞈ na gʼa ve yoˬ. Tawˇ pa haˉ te kʼo, yawˇ lehˬ awˬ pa awˬ e ve dawˇ hkʼaˇ htaꞈ shuˍ ve yoˬ. Leh yawˇ htaꞈ awˬ pa awˬ e hkʼaˬ hkʼe te maˍ piˇ ve, yawˇ awˬ paˇ awˬ kui lo ve hkʼaˬ hkʼe hpehꞈ ve, leh yawˇ ve te hkʼaˇ dawˇ hkʼaˇ hkʼaˬ hkʼe cawˬ ve htaꞈ Gʼuiˬ sha shiˍ ve yoˬ. Yaˬhoˉvaˬ lehˬ chaw yaˇ ve nyi ma htaꞈ kaꞈ shiˍ ve yoˬ. Leh yawˇ aˬ htoꞈ ma htaꞈ pa taw te ve kaꞈ Gʼuiˬ sha shiˍ ve yoˬ. Yaˬhoˉvaˬ mehˆ gʼuˇ suhˍ teˇ ceuˬ kaꞈ fawˉ taˍ maˇ gʼa. (Heˍbrehˇ 4:13) Chi htaꞈ pa taw, Yaˬhoˉvaˬ lehˬ a shu teˇ gʼaˇ htaꞈ venˇ baˆ hpehˇ piˇ ve kʼo, chaw oˇ ve teˇ gʼaˇ htaꞈ caˉ daꞈ ve yawˇ hkʼa peu˗eˬ shiˍ ve yoˬ.

10. Yaˬhoˉvaˬ dawˇ cheˆ ve lehˬ hkʼaˬ htaˆ kaꞈ hteˇ cawˇ ve tehꞈ aˬ htoꞈ ma te ngaˬ hui shiˍ gʼa ve le? (Bon maˍ ve 32:4)

¹⁰ Yaˬhoˉvaˬ dawˇ cheˆ ve lehˬ hkʼaˬ htaˆ kaꞈ hteˇ cawˇ ve yoˬ. Yawˇ lehˬ chaw mehˆ hpfuhˇ htaꞈ maˇ nyi. Chaw mehˆ hpfuhˇ, paw sha ve, aˉ yaˇ, awˬ meh bvuhˬ ve, maˇ heˆ leh puiˉ ve hpehꞈ ve, chi ve teˇ hpaˍ htaꞈ pa taw Yaˬhoˉvaˬ venˇ baˆ hpehˇ piˇ ve maˇ heˆ. (1 Saˍmo˗eˍlaˆ 16:7; Yaˍkoˆ 2:1-4) Yaˬhoˉvaˬ htaꞈ nyiˉ piˇ ve maˇ heˆ leh hpu hkʼawˇ piˇ ve teˇ gʼaˇ kaꞈ te maˇ gʼa. (2 Raˍsaˍvanˍ 19:7) Yaˬhoˉvaˬ lehˬ yawˇ ve te hkʼaˇ dawˇ hkʼaˇ htaꞈ cuˇ leh dawˇ cheˆ piˇ ve maˇ heˆ. (Tawˆ kʼai ve 34:7) Yaˬhoˉvaˬ hkʼa dehꞈ na gʼa ve lehˬ, yawˇ daꞈ jaˇ ve suhˉ jehˬ shehˍ hpaˇ hpehꞈ ve yoˬ.—Bon maˍ ve 32:4 gʼaw sheˍ.

11. Yaˬhoˉvaˬ venˇ baˆ hpehˇ piˇ ve lehˬ chaw yaˇ venˇ baˆ hpehˇ piˇ ve htaꞈ hkʼaˬ hkʼe peun daꞈ ve le?

¹¹ Yaˬhoˉvaˬ venˇ baˆ hpehˇ piˇ ve lehˬ chaw yaˇ venˇ baˆ hpehˇ piˇ ve htaꞈ peun daꞈ jaˇ ve tehꞈ Heˍbrehˇ liꞈ bvuhꞈ paˍ shiˍ ve yoˬ. Leh Gʼuiˬ sha hkʼe leˇ venˇ baˆ hpehˇ piˇ puiˉ ve chaw teˇ gʼaˇ kaꞈ maˇ cawˬ. Liꞈ kʼoˆ teˇ kʼoˆ hkʼaw kʼoˆ ve, teˇ pawˆ pawˆ kʼo Heˍbrehˇ liꞈ bvuhꞈ paˍ Heˍbrehˇ ve tawˇ  hkawˇ teˇ hkawˇ yehˇ ve, “venˇ baˆ te ve chaw htaꞈ Gʼuiˬ sha venˇ baˆ hpehˇ piˇ htaˇ, Heˍbrehˇ hkawˇ chi Gʼuiˬ sha awˬ pon yehˇ ve yoˬ. Chaw yaˇ hkʼaˇ chaw yaˇ venˇ baˆ hpehˇ daꞈ htaˇ, tawˇ hkawˇ chi chaw yaˇ awˬ pon maˇ yehˇ.” Venˇ baˆ dawˇ hpfuhˆ ve chaw htaꞈ venˇ baˆ hpehˇ piˇ tuˬ, Yaˬhoˉvaˬ teˇ gʼaˇ ceh tiˉ kanˇ paˆ cawˬ ve yoˬ. Yaˬhoˉvaˬ venˇ baˆ hpehˇ laˇ ve ngaˬ hui awˬ pon awˬ bon hkʼaˬ hkʼe cawˬ ve le?

12-13. (a) Yaˬhoˉvaˬ venˇ baˆ hpehˇ laˇ ve awˬ bon hkʼaˬ hkʼe cawˬ ve le? (b) Yaˬhoˉvaˬ venˇ baˆ hpehˇ laˇ ve awˬ bon hkʼaˬ hkʼe maw maw cawˬ ve le?

¹² Yaˬhoˉvaˬ ngaˬ hui htaꞈ venˇ baˆ hpehˇ laˇ˗oˬ ve tehꞈ haꞈ yuˬ htaˇ, ngaˬ hui “dawˇ sha ve” htaꞈ gʼa ve yoˬ. Chi lehˬ ngaˬ hui nyi ma gawˬ lehˍ cawˬ leh ngaˬ hui yaꞈ ve tehꞈ maˇ dawˇ tuˬ te laˇ ve htaꞈ kʼoˆ gaˇ ve yoˬ. Yaˬhoˉvaˬ venˇ baˆ hpehˇ laˇ ve ceh tiˉ ngaˬ hui chi hkʼe dawˇ tuˬ te laˇ ve yoˬ. (Tcuh yaˇ 3:19) Yaˬhoˉvaˬ ngaˬ hui htaꞈ venˇ baˆ hpehˇ laˇ htaˇ, ngaˬ hui maˇ te yaꞈ jaw ve hkʼe leˇ yawˇ ngaˬ hui geh kʼawꞈ meuˆ daꞈ tuˬ yoˬ.

¹³ Yaˬhoˉvaˬ ngaˬ hui htaꞈ venˇ baˆ hpehˇ laˇ˗oˬ htaˇ, ngaˬ hui te yaꞈ ve awˬ ceuˬ htaꞈ yawˇ kʼawꞈ dawˇ nyi leh ciˍ yanˍ laˇ tuˬ ve maˇ heˆ. (Iˉsaˍyaˆ 43:25; Yeˍraˍmiˆ 31:34) Liꞈ hpu hkʼaw kʼoˆ ve, “mvuhˇ nyi tawˆ hpawˇ lehˬ, mvuhˇ nyi kʼehˬ hpawˇ htaꞈ vuiˇ jaˇ ve hkʼe, yawˇ lehˬ ngaˬ hui ve venˇ baˆ teˇ hpaˍ ngaˬ hui htaꞈ vuiˇ kuiˬ lo yuˬ baˬ ve yoˬ.” * (Chiˇ mvuh ve 103:12) Yaˬhoˉvaˬ ngaˬ hui htaꞈ venˇ baˆ hpehˇ laˇ ve dawˇ nyi htaˇ, ngaˬ hui yawˇ htaꞈ awˬ bon uiˍ jaˇ tehꞈ kʼoˆ piˇ gaˇ leh chiˇ mvuh piˇ gaˇ ve yoˬ. (Chiˇ mvuh ve 130:4) Leh yawˇ lehˬ a shu htaꞈ venˇ baˆ hpehˇ piˇ sheˍ ve le?

14. Yaˬhoˉvaˬ venˇ baˆ hpehˇ piˇ ve htaꞈ caˉ daꞈ ve ngaˬ hui aˬ htoꞈ ma gʼa henˇ˗oˬ ve le?

¹⁴ Yaˬhoˉvaˬ a shu teˇ gʼaˇ htaꞈ venˇ baˆ hpehˇ piˇ htaˇ, chaw oˇ ve teˇ gʼaˇ hkʼaˬ hkʼe taw te yaꞈ ve htaꞈ cawˬ ve maˇ heˆ tehꞈ ngaˬ hui gʼa henˇ˗oˬ ve yoˬ. Chi hkʼoˆ kaꞈ, Yaˬhoˉvaˬ lehˬ hpanˍ shehˍ hpaˇ, awˬ liˇ awˬ hkʼaˇ teh shehˍ hpaˇ, leh suhˉ jehˬ shehˍ hpaˇ hpehꞈ ve pa taw, yawˇ lehˬ cuˇ yiˍ cawˬ leh hkʼa dehꞈ na gʼa ve tehꞈ ngaˬ hui gʼa shiˍ ve yoˬ. Leh Yaˬhoˉvaˬ cuˇ yiˍ chi ve htaꞈ yehˇ leh venˇ baˆ hpehˇ piˇ tuˬ, maˇ hpehˇ piˇ tuˬ, dawˇ cheˆ gʼa ve yoˬ. Leh Yaˬhoˉvaˬ venˇ baˆ hpehˇ piˇ htaˇ, aˬ htoꞈ ma htaꞈ dawˇ nyi ve le?

15. Luˉkaꞈ liꞈ 12:47, 48 hkʼaw kʼoˆ taˍ ve hkʼe, awˉ lawˉ teˇ ceuˬ lehˬ Yaˬhoˉvaˬ venˇ baˆ hpehˇ piˇ tuˬ dawˇ cheˆ htaˇ, aˬ htoꞈ ma htaꞈ dawˇ nyi ve le?

¹⁵ Awˉ lawˉ teˇ ceuˬ lehˬ te yaꞈ ve chaw yawˇ te ve awˬ ceuˬ yaꞈ ve tehꞈ shiˍ˗aw laˇ Yaˬhoˉvaˬ nyi ve  yoˬ. Awˬ lawn chi ve Yeˍsuˆ Luˉkaꞈ liꞈ 12:47, 48 hkʼaw hkʼa tawˍ lehˆ kʼoˆ laˇ taˍ ve yoˬ. (Gʼaw sheˍ.) Yaˬhoˉvaˬ maˇ dawˇ cawˇ tehꞈ shiˍ ve htawˇ, te yaꞈ tuˬ awˬ hkʼaˇ ca ve, leh venˇ baˆ uiˍ jaˇ ve htaꞈ te ve yoˬ. Yaˬhoˉvaˬ yawˇ htaꞈ venˇ baˆ maˇ hpehˇ piˇ tuˬ ve hehˉ laˇ? (Maˍkuˆ 3:29; Yoˇhanˬ 9:41) Yaꞈ hkʼaˇ, teˇ pawˆ pawˆ yaꞈ ve tehꞈ shiˍ ve htawˇ, ngaˬ hui te yaꞈ ve yoˬ. Leh Yaˬhoˉvaˬ ngaˬ hui htaꞈ venˇ baˆ hpehˇ laˇ tuˬ yoˬ tehꞈ dawˇ˗aw laˇ? Venˇ baˆ hpehˇ laˇ tuˬ yoˬ tehꞈ dawˇ ve yoˬ. Ngaˬ hui htaꞈ venˇ baˆ hpehˇ laˇ tuˬ laˇ tehꞈ Yaˬhoˉvaˬ dawˇ cheˆ htaˇ, 2 ceuˬ teˇ ceuˬ htaꞈ caˉ daꞈ ve yawˇ dawˇ nyi ve yoˬ.

16. Venˇ baˆ dawˇ hpfuhˆ ve aˬ htoꞈ ma htaꞈ kʼoˆ gaˇ ve le? Yaˬhoˉvaˬ ngaˬ hui htaꞈ venˇ baˆ hpehˇ laˇ tcuh gaˇ ve kʼo, aˬ htoꞈ ma te chi a yeˇ uiˍ jaˇ ve le?

¹⁶ 2 ceuˬ teˇ ceuˬ lehˬ chaw oˇ ve teˇ gʼaˇ awˬ tehˬ awˬ na venˇ baˆ dawˇ hpfuhˆ˗aw laˇ tehꞈ Yaˬhoˉvaˬ nyi ve yoˬ. Venˇ baˆ dawˇ hpfuhˆ ve aˬ htoꞈ ma htaꞈ kʼoˆ gaˇ ve le? Venˇ baˆ dawˇ hpfuhˆ ve lehˬ “te hkʼaˇ dawˇ hkʼaˇ pa tuˬ coˇ caˇ ve htaꞈ” kʼoˆ gaˇ ve yoˬ. Yawˇ maˇ daꞈ ve awˬ ceuˬ te ve htaꞈ nyi ma luˬ jaˇ ve, maˇ heˆ leh cawˇ ve awˬ ceuˬ htaꞈ maˇ gʼa te ve pa taw nyi ma luˬ ve, chi ve htaꞈ kʼoˆ gaˇ ve yoˬ. Venˇ baˆ dawˇ hpfuhˆ ve chaw lehˬ te yaꞈ ve awˬ ceuˬ htaꞈ ceh tiˉ nyi ma luˬ ve maˇ heˆ. Yaꞈ hkʼaˇ, yawˇ Yaˬhoˉvaˬ geh maˇ meuˆ daꞈ tuˬ te laˇ ve pa taw gʼa te yaꞈ kʼai ve htaꞈ nyi ma luˬ jaˇ ve yoˬ. Jawˇ mawˇ Maˍnaˍseˍ leh jawˇ mawˇ Daˍviˆ ve awˬ lawn htaꞈ ngaˬ hui dawˇ nyi sheˍ. Yawˇ huiˉ maˬ venˇ baˆ uiˍ jaˇ ve htaꞈ te yaꞈ ve htawˇ, awˬ tehˬ awˬ na venˇ baˆ dawˇ hpfuhˆ ve pa taw Yaˬhoˉvaˬ venˇ baˆ hpehˇ piˇ ve yoˬ. (1 Jawˇ mawˇ 14:8) Yaˬhoˉvaˬ lehˬ te yaꞈ ve chaw venˇ baˆ dawˇ hpfuhˆ ve tehꞈ shaˉ hkiˆ gʼa mawˬ htaˇ, venˇ baˆ hpehˇ piˇ ve yoˬ. Yaꞈ hkʼaˇ, te yaꞈ ve htaꞈ ceh tiˉ nyi ma luˬ ve maˇ lawꞈ. Te yaꞈ ve chaw lehˬ teˇ ceuˬ ceuˬ gʼa te tawˆ la ve yoˬ. * Yaˬhoˉvaˬ lehˬ venˇ baˆ hpehˇ piˇ tuˬ dawˇ cheˆ htaˇ, 3 ceuˬ teˇ ceuˬ htaꞈ caˉ daꞈ ve yawˇ dawˇ nyi ve yoˬ.

17. Te hkʼaˇ dawˇ hkʼaˇ awˬ suhˉ pa ve aˬ htoꞈ ma htaꞈ kʼoˆ gaˇ ve le? Leh ngaˬ hui maˇ kʼawꞈ te yaꞈ tuˬ aˬ htoꞈ ma te chi a yeˇ uiˍ jaˇ ve le? (Iˉsaˍyaˆ 55:7)

¹⁷ 3 ceuˬ teˇ ceuˬ lehˬ chaw oˇ ve teˇ gʼaˇ te hkʼaˇ dawˇ hkʼaˇ awˬ suhˉ pa˗aw laˇ tehꞈ Yaˬhoˉvaˬ nyi ve yoˬ. Yawˇ yaꞈ ve awˬ ceuˬ htaꞈ maˇ te˗o leh Yaˬhoˉvaˬ kʼoˆ piˇ ve hkʼe yawˇ gʼaꞈ te ve yoˬ. (Iˉsaˍyaˆ 55:7 gʼaw sheˍ.) Chi hkʼoˆ kaꞈ, yawˇ ve te hkʼaˇ dawˇ hkʼaˇ pa leh Yaˬhoˉvaˬ dawˇ ve hkʼe gʼa dawˇ ve yoˬ. (Roˉmaꞈ 12:2; Eˇfeˇsuꞈ 4:23) Maˇ daꞈ ve awˬ ceuˬ htaꞈ yawˇ maˇ dawˇ leh maˇ kʼawꞈ te tuˬ gʼa coˇ caˇ ve yoˬ.  (Kawˇlawˇsehˇ 3:7-10) Yaˬhoˉvaˬ venˇ baˆ hpehˇ laˇ tuˬ, leh ngaˬ hui ve venˇ baˆ htaꞈ shiˆ baˬ laˇ tuˬ, Yeˍsuˆ htaiˍ hkʼawꞈ laˇ ve htaꞈ ngaˬ hui gʼa yonˍ ve yoˬ. Yaꞈ hkʼaˇ, chi hkʼe ceh tiˉ maˇ heˆ. Ngaˬ hui ve te hkʼaˇ dawˇ hkʼaˇ awˬ tehˬ awˬ na pa ve tehꞈ Yaˬhoˉvaˬ mawˬ tuˬ gʼa te ve yoˬ.—1 Yoˇhanˬ 1:7.

18. Yaˬhoˉvaˬ venˇ baˆ hpehˇ laˇ ve htaꞈ caˉ daꞈ ve ngaˬ hui aˬ htoꞈ ma gʼa henˇ˗oˬ ve le?

¹⁸ Yaˬhoˉvaˬ lehˬ venˇ baˆ hpehˇ piˇ puiˉ jaˇ ve tehꞈ ngaˬ hui gʼa henˇ˗oˬ ve htaꞈ kʼawꞈ dawˇ nyi sheˍ. Mvuhˇ naw ma miˬ naˆ ma hkʼoˆ Yaˬhoˉvaˬ htaꞈ shuˍ ve teˇ gʼaˇ kaꞈ maˇ cawˬ. Aˬ htoꞈ ma pa taw ngaˬ hui chi hkʼe kʼoˆ gʼa ve le? Awˉ lawˉ teˇ ceuˬ lehˬ, Yaˬhoˉvaˬ venˇ baˆ hpehˇ piˇ puiˉ jaˇ ve yoˬ. 2 ceuˬ teˇ ceuˬ lehˬ, ngaˬ hui htaꞈ caˉ daꞈ ve Yaˬhoˉvaˬ teˇ ceuˬ le le shiˍ leh ngaˬ hui awˬ tehˬ awˬ na venˇ baˆ dawˇ hpfuhˆ˗aw laˇ tehꞈ yawˇ shiˍ ve yoˬ. 3 ceuˬ teˇ ceuˬ lehˬ, Yaˬhoˉvaˬ venˇ baˆ hpehˇ laˇ htaˇ, ngaˬ hui maˇ te yaꞈ jaw ve hkʼe ngaˬ hui ve venˇ baˆ hkʼa peu˗eˬ htaꞈ yawˇ hpehˇ laˇ gʼa ve yoˬ. Chi lehˬ ngaˬ hui nyi ma sha tuˬ te laˇ leh ngaˬ hui te yaꞈ ve tehꞈ maˇ dawˇ tuˬ kaꞈ te laˇ ve yoˬ. Yaˬhoˉvaˬ ngaˬ hui htaꞈ nyi hkʼaˇ suh˗oˬ ve tehꞈ ngaˬ hui shiˍ ve yoˬ.

19. Ngaˬ hui maˇ biˇ ve chaw hpehꞈ leh te yaꞈ sheˍ ve htawˇ, aˬ htoꞈ ma te ngaˬ hui ha lehˬ gʼa ve le?

¹⁹ Ngaˬ hui lehˬ maˇ biˇ ve chaw hpehꞈ ve pa taw, venˇ baˆ te leh laiˉ pawˆ te yaꞈ sheˍ ve yoˬ. Yaꞈ hkʼaˇ, Liꞈ hpu htaꞈ hkʼa dehꞈ na gʼa tuˬ liꞈ (Kaˇlaˇ hkawˇ) 2 kʼoˆ teˇ kʼoˆ liꞈ mehˆ hpfuhˇ 771 hkʼaw ngaˬ hui awˬ gʼaˇ gʼa ve yoˬ. Choˬ kaˬ lo kʼoˆ ve, “Yaˬhoˉvaˬ lehˬ ha kʼaˉ puiˉ jaˇ ve Gʼuiˬ sha hpehꞈ leh yawˇ ve kanˉ te ve chaw awˬ gʼaˇ nuˇ kuiˬ laiˉ ceuˬ cawˬ ve tehꞈ yawˇ shiˍ ve yoˬ. Hkʼe te leh, yawˇ hui lehˬ maˇ biˇ ve chaw hpehꞈ ve pa taw, te yaꞈ ve awˬ ceuˬ htaꞈ hkʼaˬ htaˆ kaꞈ nyi ma luˬ chehˇ tuˬ maˇ loˍ. (Chiˇ mvuh ve 103:8-14; 130:3) Yawˇ hui Gʼuiˬ sha kʼoˆ piˇ ve htaꞈ puiˉ ve hpehꞈ ve hkʼe coˇ caˇ leh te ve kʼo, yawˇ hui ha lehˬ gʼa ve yoˬ. (Hpiˇliˇpiˆ 4:4-6; 1 Yoˇhanˬ 3:19-22).” Chi ve lehˬ ngaˬ hui htaꞈ awˬ gʼaˇ peꞈ laˇ jaˇ!

20. Gʼuˇ suhˍ teˇ lawn hkʼaw ngaˬ hui aˬ htoꞈ ma htaꞈ henˇ tuˬ le?

²⁰ Ngaˬ hui te yaꞈ ve awˬ ceuˬ htaꞈ nyi ma luˬ htaˇ, Yaˬhoˉvaˬ ngaˬ hui htaꞈ venˇ baˆ hpehˇ laˇ puiˉ jaˇ ve pa taw ha lehˬ jaˇ leh awˬ bon uiˍ jaˇ. Venˇ baˆ hpehˇ piˇ ve awˬ lawn ngaˬ hui Yaˬhoˉvaˬ htaꞈ hkʼaˬ hkʼe te henˇ yuˬ gʼa ve le? Ngaˬ hui venˇ baˆ hpehˇ piˇ ve leh Yaˬhoˉvaˬ venˇ baˆ hpehˇ piˇ ve hkʼaˬ hkʼe peun daꞈ ve le? Leh awˬ lawn chi htaꞈ na gʼa ve lehˬ aˬ htoꞈ ma te a yeˇ uiˍ jaˇ ve le? Gʼuˇ suhˍ teˇ lawn hkʼaw chi ve teˇ hpaˍ htaꞈ ngaˬ hui teˇ geh henˇ tuˬ yoˬ.