Yeˍsuˆ awˬ paˇ lo chaw hkʼawˇ 2 gʼaˇ suhˆ hkuiˉ daw hkʼoˆ htaꞈ pehˍ taˍ ve htaꞈ laiˉ gʼaˇ shiˍ ve yoˬ. (Maꞈhtehˍ 27:35-38) Yeˍsuˆ suh taˍ ve htaꞈ hpa htiˆ leh tuˍ piˇ ve htaꞈ caˉ daꞈ ve, chaw teˇ hpaˍ Liꞈ hpu hkʼaw gʼa gʼaw htaˇ maˇ cawˇ tehꞈ dawˇ ve yoˬ.—Maˍkuˆ 15:42-46.

Chaˬ nyi tehˆ nyi paˍ teˇ hpaˍ kʼoˆ ve, chaw hkʼawˇ tiˇ pehˍ taˍ ve htaꞈ keunˍ daꞈ ve hkʼaw tuˍ piˇ ve maˇ cawˇ tehꞈ dawˇ ve yoˬ. Tawˇ pa haˉ te kʼo, haˉ kʼoˍ hkʼaw tuˍ piˇ ve yoˬ. Cuˇ yiˍ cawˬ paˍ Eh˗li˗anˬ Sa˗ban kʼoˆ ve, oˇ ve htaꞈ caˉ daꞈ ve liꞈ kʼoˆ teˇ kʼoˆ hkʼaw kʼoˆ ve, “suhˆ hkuiˉ daw hkʼoˆ lo htaꞈ pehˍ piˇ ve chaw lehˬ haiˬ jaˇ ve chaw hpehꞈ ve yoˬ. Cuˇ yiˍ cawˬ paˍ teˇ hpaˍ dawˇ ve, chaw chi hkʼe ve htaꞈ maˇ˗awˍ ve chaw suh˗aˬ ve hkʼe te tuˍ piˇ ve lehˬ gʼuiˬ yawˬ jaˇ tehꞈ kʼoˆ ve yoˬ.” Roˉmaꞈ chaw lehˬ chaw hkʼawˇ htaꞈ yaꞈ taw tcuh gaˇ ve yoˬ. Hkʼe te leh, yawˇ hui chaw suh taˍ ve htaꞈ suhˆ hkuiˉ daw hkʼoˆ lo maˇ yuˬ yaꞈ piˇ leh to nuˇ to shaˆ htaꞈ caˇ tcuh ve yoˬ. Leh leuˉ taˍ ve awˬ nu ve awˬ ceuˬ lehˬ awˬ nu ve chaw suh taˍ kuiˬ lo teˇ geh gʼawˆ baˬ piˇ ve yoˬ.

Yuˇdaꞈ chaw teˇ hpaˍ hpaˍ suhˆ hkuiˉ daw hkʼoˆ lo tiˇ pehˍ piˇ taˍ ve awˬ muꞈ ku htaꞈ hpfuhˆ mawˬ htaˇ, chi hkʼe te piˇ ve maˇ heˆ tehꞈ gʼa shiˍ ve yoˬ. 1968 hkʼawꞈ htaˇ, suhˆ hkuiˉ daw hkʼoˆ lo tiˇ pehˍ piˇ taˍ ve hawˉ hkʼaˆ teˇ gʼaˇ ve awˬ muꞈ ku Yeˍruˆsaˍlehnˍ venˇ awˬ paˇ lo haˉ kʼoˍ hkʼaw hpfuhˆ mawˬ ve yoˬ. Choˬ kaˬ lo maˇ˗awˍ ve Yuˇdaꞈ chaw tuˍ kuiˬ awˬ ti hpehꞈ ve yoˬ. Awˬ muꞈ ku gʼawˆ keu kuiˬ ta kʼoˍ hkʼaw hkui mehˍ cu ve awˬ muꞈ ku kaꞈ cawˬ taˍ ve yoˬ. Hkui mehˍ cu htaꞈ dawˆ keu taˍ ve sho cuˇ lehˬ, zuhˬ ve hpawˇ laꞈ naw 4 naw hpaˆ hkʼe taw cawˬ leh suhˆ baˆ htaꞈ kaꞈ dawˆ keu taˍ ve yoˬ. Eh˗li˗anˬ Sa˗ban kʼoˆ ve, “hkui mehˍ cu oˇ ve lehˬ hawˉ hkʼaˆ Ye˗ho˗hka˗nan ve hkui mehˍ cu hpehꞈ ve yoˬ. Yeˍsuˆ haˉ kʼoˍ hkʼaw tuˍ taˍ ve lehˬ, ha lehˬ ve bon hkawˇ liꞈ hkʼaw bvuhꞈ taˍ ve shaˉ hkiˆ gʼa mawˬ ve yoˬ. A yeˇ uiˍ jaˇ ve lehˬ Yeˍsuˆ ve awˬ co˗e htaˇ, Roˉmaꞈ chaw suhˆ hkuiˉ daw hkʼoˆ lo htaꞈ pehˍ taˍ ve chaw htaꞈ, Yuˇdaꞈ chaw haꞈ yuˬ leh yawˇ hui hkʼa shuˍ tuˍ piˇ ve tehꞈ Ye˗ho˗hka˗nan ve hkui mehˍ cu lehˬ ngaˬ hui shiˍ tuˬ te laˇ ve yoˬ.

Ye˗ho˗hka˗nan ve hkui mehˍ cu ve awˬ muꞈ ku lehˬ, Yeˍsuˆ hkʼaˬ kaˬ teˇ hkʼaˇ lo htaꞈ keu piˇ ve htaꞈ peun daꞈ ve mawˬ tuˬ te laˇ ve yoˬ. Yaꞈ hkʼaˇ, chaw hkʼawˇ teˇ hpaˍ ve awˬ muꞈ ku lehˬ, haˉ kʼoˍ hkʼaw maˇ gʼa gʼawˆ baˬ piˇ ve tehꞈ hkui mehˍ cu ve awˬ muꞈ ku htaꞈ mawˬ htaˇ, ngaˬ hui shiˍ gʼa ve yoˬ. Yawˇ hui htaꞈ keunˍ daꞈ ve hkʼaw tuˍ piˇ ve yoˬ. Chi htaꞈ pa taw, Liꞈ hpu hkʼaw kʼoˆ ve, Yeˍsuˆ ve awˬ to htaꞈ hpa htiˆ piˇ leh haˉ kʼoˍ hkʼaw tuˍ piˇ ve tehꞈ awˬ tehˬ awˬ na shaˉ hkiˆ gʼa mawˬ ve yoˬ.

Yaꞈ hkʼaˇ, chi aꞈ kehˉ a yeˇ uiˍ jaˇ ve lehˬ Yaˬhoˉvaˬ kʼoˆ taˍ ve, Yeˍsuˆ lehˬ paw sha ve chaw geh teˇ geh tuˍ taˍ ve yoˬ. Leh Gʼuiˬ sha kʼoˆ taˍ ve awˬ ceuˬ htaꞈ teˇ ceuˬ kaꞈ tawˍ piˇ maˇ gʼa. Chi awˬ tehˬ hpehꞈ ve yoˬ.—Iˉsaˍyaˆ 53:9; 55:11.