Iˉsaˍreˍlaˆ chaw Gʼuiˬ sha ka tiꞈ te taˍ piˇ ve mvuhˇ miˬ hkʼaw chehˇ htaˇ, yawˇ hui ve awˬ hkʼawꞈ tanˬ gʼaw ve lehˬ, ti mi mehˇ htaˇ leh awˬ yawˇ sheˍ htaˇ hpehꞈ ve yoˬ. Chi beuꞈ teˇ co˗e kʼo, Ha pa 9 maˬ leh Ha pa 10 maˬ hkʼe htaˇ cawˇ daꞈ ve yoˬ.

Yawˇ hui teˇ hkʼawꞈ ve awˬ yanˇ hkʼaˬ maw cawˬ ve mvuhˇ nyi htaꞈ shawˍ nyi ve yoˬ. Leh teˇ ha pa hkʼaw hkʼaˬ maw cawˬ ve awˬ yanˇ ha pa htaꞈ shawˍ nyi ve yoˬ. Yaꞈ hkʼaˇ chi hkʼe te htaˇ, teˇ hkʼawꞈ ve hkʼaw mvuhˇ nyi htaꞈ shawˍ nyi ve leh ha pa htaꞈ shawˍ nyi ve kʼo, maˇ shuˍ daꞈ. Chi htaꞈ pa taw, yawˇ hui chi ve nyiˇ ceuˬ ceuˬ hawˍ daꞈ tuˬ awˬ hkʼaˇ gʼa ca ve yoˬ. Yawˇ hui lehˬ awˬ hkʼawꞈ awˬ suhˉ maˇ tanˬ sheˍ htaˇ, awˬ nyi maˇ heˆ leh awˬ ha pa awˬ leuˉ kʼawꞈ htehˍ ve yoˬ. Chi hkʼe te htaˇ ha pa liꞈ lehˬ, ti mi mehˇ htaˇ leh gʼeuꞈ ve awˬ yanˇ htaꞈ hawˍ daꞈ ve yoˬ.

Moˉseˍ ve awˬ co˗e gaˬ htaˇ, Gʼuiˬ sha Iˉsaˍreˍlaˆ chaw htaꞈ kʼoˆ piˇ ve, yawˇ hui awˬ pon teˇ hkʼawꞈ ve hkʼaw awˉ lawˉ teˇ ha pa lehˬ, Aˍbiˆbaˍlaˆ ha pa maˇ heˆ leh Niˆsanˍ ha pa tehꞈ kʼoˆ ve yoˬ. (Tawˆ kʼai ve 12:2; 13:4) Chi beuꞈ teˇ co˗e kʼo, Ha pa 3 maˬ leh Ha pa 4 maˬ hkʼe htaˇ cawˇ daꞈ ve yoˬ. Niˆsanˍ ha pa htaˇ lehˬ Iˉsaˍreˍlaˆ chaw yawˇ hui pawehˇ cawˬ ve yoˬ. Pawehˇ chi hkʼaw yawˇ hui awˬ shiˍ awˬ nu awˉ lawˉ gʼa ve maˇ heˆ leh choꞈ shiˍ Yaˬhoˉvaˬ htaꞈ tanˇ piˇ ve yoˬ.—Tawˆ kʼai ve 23:15, 16.

Yeˍsuˆ ve awˬ co˗e htaˇ Yuˇdaꞈ chaw ve awˬ lawn (Kaˇlaˇ hkawˇ) liꞈ kʼoˆ chi hkʼaw chaˬ nyi tehˆ nyi paˍ E˗miˍ Chu˗leuˇ bvuhꞈ ve, ‘teˇ hkʼawꞈ ve hkʼaw awˬ ha pa awˬ leuˉ kʼawꞈ htehˍ ve lehˬ sha jaˇ. Niˆsanˍ Ha pa hkʼaw ha pa tawˬ htaˇ Paˍsaˍhkaˍ pawehˇ caˇ ve yoˬ. (Niˆsanˍ Ha pa 14 nyi) Yaꞈ hkʼaˇ, chi ve teˇ nyi lehˬ mvuhˇ hpeuꞈ leh tanˇ vaˇ awˬ yanˇ hkʼa maw cawˬ ve teˇ nyi peuˬ hkʼawꞈ nawˉ, gʼa te ve yoˬ. Paˍsaˍhkaˍ pawehˇ lehˬ mvuhˇ hpeuꞈ leh tanˇ vaˇ awˬ yanˇ hkʼa maw cawˬ ve awˬ nyi awˬ gʼuˇ suhˍ gʼa te ve htaꞈ mawˬ ve kʼo, yawˇ hui Niˆsanˍ Ha pa maˇ gaˬ sheˍ htaˇ teˇ ha pa kʼawꞈ htehˍ ve yoˬ.’

Yaˬhoˉvaˬ ve Shaˉhkiˆhkanˍ ve chaw kaꞈ Yeˍsuˆ suh ve dawˇ nawˇ ve hpawnˬ daꞈ ve te tuˬ, awˬ hkʼaˇ chi htaꞈ yehˇ leh Ha pa 3 maˬ maˇ heˆ leh Ha pa 4 maˬ hkʼaw hkʼaˬ ve teˇ nyi te tuˬ shawˍ teh ve yoˬ. Awˬ nyi oˇ ve lehˬ, Heˍbrehˇ ve ha pa liꞈ Niˆsanˍ Ha pa 14 nyi htaꞈ cawˇ daꞈ ve yoˬ. Awˬ nyi chi ve teˇ nyi htaˇ te tuˬ, miˬ guiˬ chi hkʼoˆ lo Shaˉhkiˆhkanˍ ve chaw htaꞈ awˉ lawˉ htaˇ kaꞈ kʼoˆ piˇ ve yoˬ. *

Iˉsaˍreˍlaˆ chaw lehˬ, ha pa peuˬ leh ha pa awˬ suhˉ kʼawꞈ tanˬ ve awˬ yanˇ htaꞈ hkʼaˬ hkʼe te shiˍ gʼa ve le? Chi beuꞈ teˇ co˗e ngaˬ hui lehˬ, ha pa liꞈ maˇ heˆ leh tawˇ yaw tuˬ awˬ hkʼeun hkʼaw nyi gʼa ve pa taw maˇ haˍ. Yaꞈ hkʼaˇ, Liꞈ hpu ve awˬ co˗e htaˇ chi htaꞈ shiˍ tuˬ sha ve maˇ heˆ.

Noˉaꞈ ve awˬ co˗e htaˇ, teˇ ha pa le le hkʼaˬ htaˆ kaꞈ 30 nyi cawˬ ve tehꞈ yawˇ hui shawˍ ve yoˬ. (Awˬ hkuiˉ puiˍ 7:11, 24; 8:3, 4) Yaꞈ hkʼaˇ, Iˉsaˍreˍlaˆ chaw ve awˬ co˗e htaˇ, teˇ ha pa le le hkʼaˬ htaˆ kaꞈ 30 nyi cawˬ ve maˇ heˆ. Heˍbrehˇ chaw awˬ pon ha pa tawˆ la ve awˉ lawˉ teˇ nyi htaꞈ ha pa suhˉ tanˬ shawˍ ve yoˬ. Chi htaꞈ pa taw, Heˍbrehˇ ve ha pa liꞈ hkʼaw 29 nyi maˇ heˆ leh 30 cawˬ ve yoˬ. Chi ve lehˬ ha pa caw ve htaꞈ cawˬ ve yoˬ.

Teˇ pawˆ htaˇ Daˍviˆ leh Yawˇnaˆtanˍ kʼoˆ ve, “shawˉ pawˍ kʼo ha pa tawˬ ve pawehˇ te tuˬ ve awˬ yanˇ gaˬ peuˬ.” (1 Saˍmo˗eˍlaˆ 20:5, 18) Yawˇ hui ve awˬ co˗e htaˇ, ha pa liꞈ awˬ nyi gʼaw ve cawˬ˗oˬ ve yoˬ. Hkʼe kʼo, Yuˇdaꞈ chaw ha pa suhˉ hkʼaˬ htaˆ tanˬ ve hkʼaˬ hkʼe te shiˍ gʼa ve le? Yuˇdaꞈ chaw ve awˬ liˇ awˬ hkʼaˇ leh chaw liˇ vaˇ liˇ htaꞈ caˉ daꞈ ve Miˆchaˍnaˍ liꞈ kʼoˆ hkʼaw kʼoˆ ve, Yuˇdaꞈ chaw Baˍbuˍlonˍ mvuhˇ miˬ lo awˬ ceˬ te kʼawꞈ la peuˬ hkʼawꞈ nawˉ, suhˉ jehˬ paˍ awˬ moˍ hpawnˬ daꞈ ve cawˬ ve yoˬ. Yuˇdaꞈ chaw pawehˇ te ve 7 ha pa ve awˬ yanˇ hkʼaw 30 nyi teˇ nyi htaˇ yawˇ hui hpawnˬ daꞈ ve cawˬ ve yoˬ. Yawˇ hui hpawnˬ daꞈ ve hkʼaw hkʼaˬ ve teˇ nyi ha pa suhˉ tanˬ tuˬ shawˍ nyi ve yoˬ. Yawˇ hui hkʼaˬ hkʼe te shawˍ nyi ve le?

Yeˍruˆsaˍlehnˍ venˇ mvuh kuiˬ lo huˉ taˍ ve hawˉ hkʼaˆ teˇ hpaˍ lehˬ, ha pa awˉ lawˉ tawˆ la ve htaꞈ huˉ nyi taˍ ve yoˬ. Ha pa tawˆ la ve htaꞈ yawˇ hui mawˬ htaˇ, yawˇ hui lehˬ suhˉ jehˬ shehˍ hpaˇ awˬ moˍ htaꞈ haˆ ca kʼoˆ piˇ ve yoˬ. Ha pa htaꞈ mawˬ ve tehꞈ shaˉ hkiˆ laiˉ ceuˬ cawˬ ve kʼo, suhˉ jehˬ shehˍ hpaˇ awˬ moˍ oˇ ve teˇ nyi lehˬ ha pa awˬ suhˉ tanˬ ve tehꞈ mvuhˇ miˬ yaˇ htaꞈ hto piˇ ve yoˬ. Moˬ maˇ jaˇ leh ha pa htaꞈ maˇ nyi mawˬ ve  kʼo, oˇ ve teˇ ha pa 30 nyi cawˬ ve tehꞈ kʼoˆ ve yoˬ. Leh 30 nyi peuˬ hkʼawꞈ nawˉ ve teˇ nyi htaꞈ ha pa suhˉ kʼawꞈ tanˬ gʼaw ve yoˬ.

Miˆchaˍnaˍ liꞈ kʼoˆ hkʼaw kʼoˆ ve, suhˉ jehˬ shehˍ hpaˇ awˬ moˍ ha pa suhˉ tanˬ ve teˇ nyi htaˇ, Yeˍruˆsaˍlehnˍ venˇ awˬ paˇ Shaˍlonˍ hkʼaw hkʼoˆ lo aˬ miˍ ceh tcuh ve yoˬ. Iˉsaˍreˍlaˆ chaw chehˇ kuiˬ hkʼaw teˇ hpaˍ hkʼoˆ lo aˬ miˍ ceh taˍ ve htaꞈ shu gʼa mawˬ htaˇ, ha pa suhˉ tanˬ ve tehꞈ shu kʼoˆ daꞈ kʼai ve yoˬ. Oˇ ve teˇ co˗e peuˬ hkʼawꞈ nawˉ, chaw htaꞈ cuˇ leh awˬ lawn chi ca hto piˇ tcuh ve yoˬ. Yeˍruˆsaˍlehnˍ venˇ lo leh awˬ kaˍ awˬ nu teˇ kaˬ lo chehˇ ve Yuˇdaꞈ chaw ha pa suhˉ tanˬ ve hkʼaˬ ve teˇ nyi hpehꞈ ve tehꞈ yawˇ hui shiˍ gʼa ve yoˬ. Chi lehˬ yawˇ hui hkʼaˬ kaˬ lo chehˇ ve htawˇ, awˬ yanˇ teˇ yanˇ tiˉ hkʼaw pawehˇ hkʼa shuˍ te gʼa ve yoˬ.

Nawˬ Yuˇdaꞈ chaw ve ha pa, pawehˇ teˇ hpaˍ, leh awˬ tcuhˉ awˬ yanˇ htaꞈ shiˍ gʼa tuˬ awˇ ceˍ awˇ fa Heˍbrehˇ ve ha pa liꞈ hkʼaw nyi gʼa ve yoˬ.