1-2. Gʼuiˬ sha ve kanˉ te ve chaw ha lehˬ jaˇ tuˬ te laˇ ve aˬ htoꞈ ma le? (Yaˍkoˆ 1:22-25)

 Yaˬhoˉvaˬ leh Yeˍsuˆ ngaˬ hui htaꞈ ha lehˬ tcuh gaˇ ve yoˬ. Chiˇ mvuh ve liꞈ 119:2 hkʼaw kʼoˆ ve, “nyi ma awˬ tawˬ hkʼa gaˬ yawˇ ve awˬ liˇ tawˇ hkawˇ htaꞈ na yuˬ leh te ve chaw lehˬ, gʼa ha lehˬ ve yoˬ.” Yeˍsuˆ kʼawꞈ kʼoˆ ve, “awˬ tehˬ awˬ na awˬ bon uiˍ ve chaw teˇ hpaˍ lehˬ, Gʼuiˬ sha ve awˬ liˇ tawˇ hkawˇ htaꞈ na yuˬ leh te kʼai ve chaw hui yoˬ.”—Luˉkaꞈ 11:28.

² Ngaˬ hui Yaˬhoˉvaˬ htaꞈ oˉ kʼoˍ pui ve chaw hpehꞈ ve pa taw ha lehˬ jaˇ. Aˬ htoꞈ ma pa taw le? Awˬ tehˬ kʼo, awˬ hkʼaˇ laiˉ hkʼaˇ cawˬ ve yoˬ. Yaꞈ hkʼaˇ, ngaˬ hui ha lehˬ jaˇ tuˬ te laˇ ve awˬ hkʼaˇ teˇ hkʼaˇ lehˬ, ngaˬ hui hkʼaˬ htaˆ kaꞈ Liꞈ hpu gʼaw leh gʼaw taˍ ve awˬ ceuˬ a shaꞈ teꞈ kuiˬ hkʼaw yuˬ yehˇ ve pa taw yoˬ.—Yaˍkoˆ 1:22-25 gʼaw sheˍ.

3. Liꞈ hpu hkʼaw ngaˬ hui gʼaw ve awˬ ceuˬ htaꞈ gʼaꞈ te htaˇ aˬ htoꞈ ma awˬ bon gʼa ve le?

³ “Gʼuiˬ sha htaꞈ kawˆ leh yawˇ ve awˬ liˇ tawˇ hkawˇ teˇ hpaˍ htaꞈ na yuˬ” htaˇ, ngaˬ hui awˬ bon laiˉ ceuˬ gʼa ve yoˬ. Ngaˬ hui awˬ bon gʼa ve teˇ ceuˬ lehˬ, Yaˬhoˉvaˬ nyi hkʼaˇ suh tuˬ te piˇ ve yoˬ. Chi hkʼe shiˍ htaˇ, ngaˬ hui ha lehˬ jaˇ tuˬ te laˇ ve yoˬ. (Cuˇ yiˍ piˇ ve 12:13) Liꞈ hpu hkʼaw ngaˬ hui gʼaw ve awˬ ceuˬ htaꞈ gʼaꞈ te htaˇ, ngaˬ hui ve yehˬ kʼa hkʼaw ve chaw kaꞈ ha lehˬ jaˇ. Leh awˬ nu ve awˬ viˉ awˬ nyi geh kaꞈ meuˆ daꞈ ve yoˬ. Awˬ lawn chi hkʼe ve nawˬ gʼa hpuˇ jaw˗oˬ ve maˇ heˆ laˇ? Chi hkʼoˆ kaꞈ, Yaˬhoˉvaˬ ve awˬ liˇ awˬ hkʼaˇ htaꞈ maˇ gʼaꞈ te ve chaw hkʼa shuˍ, ngaˬ hui shoꞈ shaꞈ ve laiˉ ceuˬ maˇ gʼa hpuˇ ve yoˬ. Ngaˬ hui kaꞈ jawˇ mawˇ Daˍviˆ hkʼa shuˍ dawˇ ve yoˬ. Gʼuiˬ sha ve awˬ liˇ tawˇ hkawˇ htaꞈ yawˇ kʼoˆ peuˬ hkʼawꞈ nawˉ, yawˇ bvuhꞈ ve kʼa muiˬ hkawˇ hkʼaw Yaˬhoˉvaˬ suhˉ jehˬ tuˬ ve htaꞈ kaꞈ kʼoˆ ve yoˬ. Awˬ leh meuˇ teˇ tawn lo yawˇ kʼoˆ ve, ‘na yuˬ ve pa taw awˬ bon gʼa ve yoˬ.’—Chiˇ mvuh ve 19:7-11.

4. Gʼuiˬ sha ve tawˇ hkawˇ htaꞈ hkʼaˬ htaˆ kaꞈ gʼaꞈ te gʼa tuˬ aˬ htoꞈ ma te maˇ sha ve le?

 ⁴ Ngaˬ hui teˇ gʼaˇ leh teˇ gʼaˇ kanˉ maˇ jaˇ ve pa taw, Gʼuiˬ sha ve tawˇ hkawˇ htaꞈ gʼaꞈ te tuˬ teˇ pawˆ pawˆ kʼo maˇ sha ve yoˬ. Yaꞈ hkʼaˇ, chi hkʼe hpehꞈ ve htawˇ, Yaˬhoˉvaˬ ngaˬ hui htaꞈ aˬ htoꞈ ma te tcuh gaˇ ve shiˍ tuˬ, ngaˬ hui Liꞈ hpu gʼaw leh henˇ tuˬ awˬ yanˇ gʼa shawˍ teh cawˇ ve yoˬ. Chi htaꞈ pa taw, ngaˬ hui hkʼaˬ htaˆ kaꞈ Liꞈ hpu gʼaw tuˬ ga laˇ gʼa ve, beˆ maˍ laˇ ve teˇ ceuˬ ceuˬ htaꞈ teˇ geh nyi sheˍ. Chi hkʼoˆ kaꞈ, ngaˬ hui gʼaw taˍ ve awˬ ceuˬ htaꞈ hkʼa dehꞈ dawˇ nyi gʼa tuˬ ga laˇ gʼa ve, leh a shaꞈ teꞈ kuiˬ hkʼaw yuˬ yehˇ gʼa tuˬ ga laˇ gʼa ve kaꞈ teˇ geh henˇ tuˬ yoˬ.

LIꞈ HPU GʼAW TUˬ AWˬ YANˇ SHAWˍ TEH VE

5. Ngaˬ hui kanˉ maˇ jaˇ ve htawˇ aˬ htoꞈ ma awˬ vuiˬ cawˬ sheˍ ve le?

⁵ Yaˬhoˉvaˬ ve chaw maˇ˗awˍ ve kanˉ maˇ jaˇ. Liꞈ hpu hkʼaw kʼoˆ taˍ ve hkʼe, ngaˬ hui ve awˬ vuiˬ htaꞈ a yeˇ yuˬ tuˬ awˬ yanˇ gʼa shawˍ teh cawˇ ve yoˬ. Tawˇ pa haˉ te kʼo, ngaˬ hui awˬ to leh yehˬ kʼa hkʼaw ve chaw htaꞈ hu tuˬ kanˉ gʼa te cawˇ ve yoˬ. (1 Tiˆmoˉseˍ 5:8) Awˬ viˉ awˬ nyi laiˉ gʼaˇ kʼo, yehˬ kʼa hkʼaw ve chaw naˬ ve, maˇ heˆ leh chaw mawˇ htaꞈ gʼa nyi haꞈ shaˉ ve yoˬ. Leh ngaˬ hui teˇ gʼaˇ le le kaꞈ a shu yawˇ awˬ to chehˇ sha cawˬ sha hpawˇ haꞈ shaˉ tuˬ awˬ yanˇ gʼa yehˇ ve yoˬ. Awˬ vuiˬ chi ve teˇ hpaˍ ngaˬ hui gʼa te ve awˬ hkʼoˆ kaꞈ, Hkriꞈ yaˇ awˬ moˍ hkʼaw awˬ vuiˬ gʼa te ve, leh a yeˇ uiˍ jaˇ ve teˇ ceuˬ lehˬ, ngaˬ hui gʼa hto toˇ˗e cawˇ ve yoˬ. Awˬ vuiˬ chi ve teˇ hpaˍ htaꞈ ngaˬ hui dawˇ nyi htaˇ, hkʼaˬ htaˆ kaꞈ Liꞈ hpu gʼaw ve, hkʼa dehꞈ dawˇ nyi ve, leh henˇ taˍ ve awˬ ceuˬ htaꞈ yuˬ yehˇ ve, chi ve teˇ hpaˍ htaꞈ te gʼa tuˬ awˬ yanˇ hkʼaˬ hkʼe te ca gʼa tuˬ le?

6. Liꞈ hpu gʼaw ve nawˬ awˬ pon a yeˇ uiˍ jaˇ tehꞈ hkʼaˬ hkʼe te shawˍ gʼa tuˬ le? (Awˬ han htaꞈ nyi sheˍ.)

⁶ Hkriꞈ yaˇ awˬ pon kʼo, Liꞈ hpu gʼaw ve lehˬ a yeˇ uiˍ jaˇ ve teˇ ceuˬ hpehꞈ ve yoˬ. Chi htaꞈ pa taw, ngaˬ hui Liꞈ hpu gʼaw tuˬ awˬ yanˇ shawˍ teh taˍ ve htaꞈ gʼa gʼaꞈ te ve yoˬ. (Hpiˇliˇpiˆ 1:10) Chiˇ mvuh ve liꞈ kaˇ nanˉ uiˍ 1 hkʼaw kʼoˆ ve, “chaw oˇ hkʼe ve teˇ gʼaˇ lehˬ, Gʼuiˬ sha ve awˬ liˇ tawˇ hkawˇ htaꞈ na yuˬ leh, mvuhˇ lawꞈ kʼaw mvuhˇ hpeuꞈ henˇ yuˬ tcuhˉ taˍ ve yoˬ.” (Chiˇ mvuh ve 1:1, 2) Liꞈ hpu gʼaw tuˬ ngaˬ hui awˬ yanˇ gʼa shawˍ teh ve tehꞈ, chi teˇ tawn hkʼaw hkʼa tawˍ lehˆ gʼa mawˬ ve yoˬ. Yaꞈ hkʼaˇ, Liꞈ hpu gʼaw tuˬ hkʼaˬ ve teˇ yanˇ daꞈ jaˇ  ve awˬ yanˇ hpehꞈ ve le? Teˇ gʼaˇ leh teˇ gʼaˇ awˬ pon awˬ yanˇ maˇ shuˍ daꞈ ve yoˬ. Yaꞈ hkʼaˇ, a yeˇ uiˍ jaˇ ve lehˬ hkʼaˬ htaˆ kaꞈ Liꞈ hpu gʼaw gʼa tuˬ, awˬ yanˇ gʼa shawˍ teh cawˇ ve yoˬ. Awˬ viˉ awˬ nyi hawˉ hkʼaˆ teˇ gʼaˇ Viˆteuˇ meh ve kʼoˆ ve, “ngaˬ mvuhˇ shawˉ htaˇ Liꞈ hpu gʼaw ve dawˇ cawˇ ve yoˬ. Ngaˬ teˇ naꞈ tu ve maˇ dawˇ cawˇ ve htawˇ, mvuhˇ shawˉ teˇ naꞈ kʼo shoꞈ shaꞈ laˇ ve hkʼa dehꞈ maˇ cawˬ tehꞈ ngaˬ dawˇ ve yoˬ. Leh ngaˬ gʼaw taˍ ve awˬ ceuˬ htaꞈ a yeˇ hkʼa dehꞈ yuˬ gʼa ve yoˬ.” Teˇ pawˆ pawˆ kʼo nawˬ kaꞈ Viˆteuˇ hkʼa shuˍ dawˇ ve yoˬ hehˉ. Chi htaꞈ pa taw, nawˬ a shu yawˇ awˬ to htaꞈ na nyi cawˇ ve, ‘ngaˬ awˬ pon kʼo Liꞈ hpu gʼaw ve hkʼaˬ ve teˇ yanˇ daꞈ jaˇ ve awˬ yanˇ hpehꞈ ve le?’

NAWˬ GʼAW VE AWˬ CEUˬ HTAꞈ HKʼA DEHꞈ DAWˇ NYI VE

7-8. Ngaˬ hui Liꞈ hpu gʼaw ve htaꞈ awˬ bon hkʼa dehꞈ maˇ gʼa tuˬ te laˇ ve aˬ htoꞈ ma cawˬ ve le? Tawˇ pa haˉ kʼoˆ maˍ laˇ sheˍ.

⁷ Liꞈ hpu chi ma ma gʼaw ve htawˇ, awˬ lawn awˬ tanˇ htaꞈ hkʼa dehꞈ maˇ dawˇ nyi ve hpehꞈ kʼai gʼa ve yoˬ. Ngaˬ hui teˇ ceuˬ ceuˬ gʼaw ve peuˬ hkʼawꞈ nawˉ, hkʼa dehꞈ maˇ tawnˇ gʼa ve laˇ? Teˇ gʼaˇ le le kaꞈ chi hkʼe hpehꞈ jaw ve yoˬ. Liꞈ hpu gʼaw htaˇ, chi hkʼe hpehꞈ ve sheˉ lai jaˇ. Teˇ pawˆ pawˆ kʼo, ngaˬ hui laiˉ puꞈ gʼaw gʼa tuˬ dawˇ teh taˍ ve yoˬ. Chi hkʼe te ve htawˇ, chiˇ mvuh keunˍ cawˬ ve yoˬ. Awˬ tehˬ kʼo, ngaˬ hui teˇ gʼaˇ le le dawˇ teh taˍ leh gʼaꞈ te gʼa tcuh cawˇ ve yoˬ. (1 Kawˇrenˍhtuˆ 9:26) Yaꞈ hkʼaˇ, ngaˬ hui Liꞈ hpu gʼaw ve ceh tiˉ maˇ te cawˇ. Liꞈ hpu gʼaw htaˇ awˬ bon hkʼa dehꞈ gʼa tcuh gaˇ ve yoˬ.

⁸ Suhˆ hpaꞈ hawˆ hpaꞈ teꞈ chehˇ gʼa tuˬ mvuhˇ yeˬ htaꞈ loˍ ve hkʼe, tawˇ pa haˉ chi ve htaꞈ dawˇ nyi sheˍ. Yaꞈ hkʼaˇ, teˇ hkui tiˉ ve hkʼaw mvuhˇ yeˬ laˬ hehnˇ jaˇ ve kʼo, miˬ guiˬ nehˆ jaˇ leh iˉ kaˆ teunˇ ve yoˬ. Chi hkʼe hpehꞈ htaˇ mvuhˇ yeˬ laˬ jaˇ ve kʼo, suhˆ hpaꞈ hawˆ hpaꞈ awˬ pon awˬ bon maˇ cawˬ. Mvuhˇ yeˬ a yehˉ yehˉ laˬ ve kʼo, mvuhˇ yeˬ gʼuiˬ jeꞈ hkʼaw loꞈ˗e gʼa leh suhˆ hpaꞈ hawˆ hpaꞈ uiˍ la gʼa ve yoˬ. Chi ve hkʼa shuˍ shuˍ, ngaˬ hui Liꞈ hpu haˆ haˆ gʼaw ve, maˇ heˆ leh Liꞈ hpu gʼaw vaiˇ jaˇ ve kʼo, hkʼa dehꞈ dawˇ nyi maˇ gʼa ve, tawnˇ maˇ gʼa ve, leh yuˬ yehˇ tuˬ kaꞈ te maˇ gʼa ve yoˬ.—Yaˍkoˆ 1:24.

9. Ngaˬ hui Liꞈ hpu gʼaw vaiˇ jaˇ tehꞈ dawˇ ve kʼo, hkʼaˬ hkʼe te cawˇ ve le?

⁹ Teˇ pawˆ pawˆ kʼo, nawˬ Liꞈ hpu gʼaw ve vaiˇ jaˇ ve laˇ? Gʼaw vaiˇ jaˇ ve kʼo, nawˬ hkʼaˬ hkʼe te cawˇ  ve le? A yehˉ yehˉ gʼaw ve, maˇ heˆ leh nawˬ gʼaw gehˇ sheˍ ve awˬ lawn htaꞈ caˉ daꞈ ve, hkʼa dehꞈ dawˇ nyi cawˇ ve yoˬ. Chi hkʼe te ve haˍ jaˇ ve maˇ heˆ. Liꞈ hpu gʼaw ve htaꞈ hkʼa dehꞈ dawˇ nyi tuˬ, nawˬ a shu yawˇ hkʼaˇ yawˇ Liꞈ hpu henˇ ve awˬ yanˇ yehˇ ve yoˬ. Nawˬ Liꞈ hpu gʼaw ve htaꞈ hkʼa dehꞈ dawˇ nyi ve awˬ yanˇ cawˬ tuˬ, Liꞈ hpu laiˉ tawn maˇ gʼaw ve yoˬ. Viˆteuˇ kʼawꞈ kʼoˆ ve, “ngaˬ Liꞈ hpu teˇ puꞈ ceh tiˉ gʼaw ve yoˬ. Leh ngaˬ mvuhˇ shawˉ teˇ naꞈ gʼaw ve yoˬ. Chi hkʼe te ve pa taw, ngaˬ teˇ nyi mvuhˇ hkʼa hpeuꞈ dawˇ nyi gʼa ve yoˬ.” Nawˬ hkʼaˬ hkʼe htaˇ gʼaw tuˬ leuˆ yuˬ ve htawˇ maˇ kʼoˆ, nawˬ gʼaw ve awˬ ceuˬ htaꞈ hkʼa dehꞈ dawˇ nyi gʼa tuˬ, a yeˇ uiˍ jaˇ ve awˬ ceuˬ lehˬ, a yehˉ yehˉ gʼa gʼaw ve yoˬ.—Chiˇ mvuh ve 119:97; Awˇ ceˍ awˇ fa “ Dawˇ nyi tuˬ awˬ pon na hkawˇ” htaꞈ nyi sheˍ.

10. Nawˬ gʼaw taˍ ve awˬ ceuˬ htaꞈ hkʼaˬ hkʼe yuˬ yehˇ tuˬ tawˇ pa haˉ kʼoˆ maˍ laˇ sheˍ. (1 Hteˇsaˍlawˇniˆ 5:17, 18)

¹⁰ Nawˬ Liꞈ hpu hkʼaˬ hkʼe htaˇ gʼaw ve leh awˬ yanˇ hkʼaˬ hkʼe maw yehˇ ve htawˇ maˇ kʼoˆ, nawˬ gʼaw taˍ ve awˬ ceuˬ htaꞈ yuˬ yehˇ tuˬ taˇ leunˇ sheˍ. Nawˬ Liꞈ hpu gʼaw ve kʼo, a shu yawˇ awˬ to htaꞈ na nyi cawˇ ve, ‘ngaˬ gʼaw taˍ ve awˬ ceuˬ yaꞈ nyi maˇ heˆ leh haˆ haˆ hkʼaˬ hkʼe te yuˬ yehˇ gʼa tuˬ le?’ Tawˇ pa haˉ te kʼo, nawˬ 1 Hteˇsaˍlawˇniˆ liꞈ 5:17, 18 hkʼaw gʼaw ve yoˬ. (Gʼaw sheˍ.) Chi ve 2 tawn htaꞈ nawˬ gʼaw peuˬ hkʼawꞈ nawˉ, nawˬ bon hkʼaˬ hkʼe taw lawˬ ve htaꞈ dawˇ nyi leh, nawˬ bon lawˬ ve tcuhˉ kuiˬ hkʼaˬ hkʼe cawˬ ve le kaꞈ dawˇ nyi sheˍ. Chi hkʼoˆ kaꞈ, nawˬ Yaˬhoˉvaˬ htaꞈ awˬ bon uiˍ jaˇ tehꞈ kʼoˆ piˇ ve awˬ ceuˬ kaꞈ dawˇ nyi gʼa ve yoˬ. Tawˇ pa haˉ te kʼo, nawˬ teˇ nyi leh teˇ nyi Yaˬhoˉvaˬ htaꞈ awˬ bon uiˍ jaˇ tehꞈ kʼoˆ piˇ gʼa ve 3 ceuˬ htaꞈ kaꞈ dawˇ nyi sheˍ. Nawˬ awˬ lawn chi ve htaꞈ caˉ daꞈ ve ceh dawˇ nyi ve kaꞈ awˬ bon gʼa ve yoˬ. Teˇ nyi le le nawˬ gʼaw ve awˬ ceuˬ htaꞈ teˇ lawn le le hkʼa dehꞈ dawˇ nyi htaˇ, awˬ bon hkʼaˬ hkʼe taw gʼa ve htaꞈ kaꞈ dawˇ nyi sheˍ. Leh chi hkʼe te ve kʼo, Gʼuiˬ sha maˍ laˇ ve tawˇ hkawˇ htaꞈ na leh gʼaꞈ te ve chaw hpehꞈ ve yoˬ. Yaꞈ hkʼaˇ, nawˬ Liꞈ hpu gʼaw peuˬ hkʼawꞈ nawˉ nawˬ gʼa pa cawˇ ve laiˉ ceuˬ cawˬ ve kʼo, hkʼaˬ hkʼe te tuˬ le?

TE GʼA TUˬ VE HTAꞈ DAWˇ TEH TAˍ VE

11. Aˬ htoꞈ ma te teˇ pawˆ pawˆ kʼo, nawˬ awˬ gʼaˇ nuˇ ve le? Tawˇ pa haˉ kʼoˆ maˍ laˇ sheˍ.

¹¹ Nawˬ Liꞈ hpu gʼaw htaˇ nawˬ laiˉ ceuˬ gʼa pa cawˇ ve htaꞈ mawˬ ve pa taw, teˇ pawˆ pawˆ awˬ gʼaˇ nuˇ ve yoˬ. Tawˇ pa haˉ te kʼo, chaw mehˆ hpfuhˇ htaꞈ taˇ nyi tehꞈ kʼoˆ laˇ ve beˆ maˍ laˇ hkawˇ htaꞈ nawˬ gʼa gʼaw ve yoˬ. (Yaˍkoˆ 2:1-8) Nawˬ shu htaꞈ daꞈ ve te piˇ gʼa tuˬ te hkʼaˇ dawˇ hkʼaˇ gʼa pa cawˇ ve htaꞈ gʼa mawˬ ve kʼo, nawˬ teˇ ceuˬ ceuˬ pa tuˬ dawˇ teh taˍ ve yoˬ. Chi hkʼe te gʼa ve chiˇ mvuh keunˍ cawˬ jaˇ. Peuˬ hkʼawꞈ nawˉ teˇ nyi, nawˬ tawˇ yaw ve htaꞈ shaˍ tiꞈ te tuˬ a yeˇ uiˍ jaˇ ve Liꞈ hpu awˬ tawn htaꞈ gʼa gʼaw ve yoˬ. (Yaˍkoˆ 3:1-12) Leh teˇ pawˆ pawˆ kʼo, nawˬ kaꞈ maˇ daꞈ ve hpawˇ kʼoˆ ve yoˬ. Hkʼe te leh, nawˬ awˬ viˉ awˬ nyi htaꞈ daꞈ ve hpawˇ kʼoˆ gʼa tuˬ, leh awˬ gʼaˇ piˇ gʼa tuˬ, htaꞈ dawˇ  nyi ve yoˬ. Leh peuˬ hkʼawꞈ nawˉ teˇ nyi, miˬ guiˬ ve awˬ liˇ awˬ hkʼaˇ htaꞈ maˇ gʼa caˉ daꞈ tuˬ shaˍ tiꞈ peꞈ laˇ ve tawˇ hkawˇ htaꞈ, nawˬ Liꞈ hpu hkʼaw gʼa gʼaw ve yoˬ. (Yaˍkoˆ 4:4-12) Nawˬ pyawˍ ve awˬ ceuˬ htaꞈ cuˇ yiˍ cawˬ ve hkʼaw gʼa leuˆ cawˇ ve tehꞈ kaꞈ gʼa mawˬ ve yoˬ. Leh 4 nyi teˇ nyi hkʼaw, nawˬ a shu yawˇ ve te hkʼaˇ dawˇ hkʼaˇ gʼa pa cawˇ ve laiˉ ceuˬ htaꞈ gʼa mawˬ ve yoˬ hehˉ.

12. Nawˬ Liꞈ hpu gʼaw leh a shu yawˇ ve te hkʼaˇ dawˇ hkʼaˇ gʼa pa cawˇ ve laiˉ ceuˬ htaꞈ mawˬ ve kʼo, aˬ htoꞈ ma te awˬ gʼaˇ maˇ nuˇ cawˇ ve le? (Awˬ maiˉ htaꞈ nyi sheˍ.)

¹² Nawˬ ve te hkʼaˇ dawˇ hkʼaˇ laiˉ ceuˬ htaꞈ gʼa pa cawˇ ve tehꞈ mawˬ ve kʼo, awˬ gʼaˇ taˇ nuˇ. Chi ve lehˬ nawˬ daꞈ ve dawˇ hkʼaˇ cawˬ ve tehꞈ gʼa mawˬ ve yoˬ. Nyi ma nuˇ nehˬ ve chaw Liꞈ hpu gʼaw htaˇ, yawˇ ve te hkʼaˇ dawˇ hkʼaˇ hkʼaˬ teˇ kaˬ lo gʼa pa cawˇ ve htaꞈ ca nyi ve yoˬ. a Ngaˬ hui “shiˍ puiˉ ve teˇ ceuˬ lehˬ, awˬ suhˉ” hkʼe hkʼaˬ htaˆ kaꞈ gʼa hpehꞈ cawˇ ve tehꞈ tawnˇ taˍ sheˍ. (Kawˇlawˇsehˇ 3:10) Nawˬ Gʼuiˬ sha ve tawˇ hkawˇ htaꞈ hkʼaˬ htaˆ kaꞈ gʼaꞈ te gʼa tuˬ aˬ htoꞈ ma ga laˇ gʼa ve le?

13. Nawˬ te gʼa tuˬ ve awˬ ceuˬ htaꞈ hkʼaˬ hkʼe dawˇ teh taˍ gʼa ve le? (Awˬ han htaꞈ nyi sheˍ.)

¹³ Beˆ maˍ laˇ ve chi ve hkʼa peu˗eˬ htaꞈ nawˬ teˇ pawˆ tiˉ gʼaꞈ te ve aꞈ kehˉ, nawˬ 1 ceuˬ maˇ heˆ leh 2 ceuˬ htaꞈ dawˇ teh taˍ leh awˉ lawˉ leuˆ yuˬ leh te cawˇ ve yoˬ. (Tawˇ naˉ ve 11:2) Nawˬ chi hkʼe gʼaꞈ te htaˇ, nawˬ pa gaˇ ve aˬ htoꞈ ma cawˬ ve htaꞈ bvuhꞈ tawˆ la nyi sheˍ. Peuˬ hkʼawꞈ nawˉ 1 ceuˬ maˇ heˆ leh 2 ceuˬ nawˬ te gaˇ ve htaꞈ leuˆ yuˬ sheˍ. Awˬ nu ve awˬ ceuˬ peuˬ hkʼawꞈ nawˉ htaˇ kʼawꞈ te sheˍ. Leh nawˬ hkʼaˬ hkʼe te tuˬ tanˬ cawˇ ve le?

14. Nawˬ dawˇ teh taˍ ve hkʼaˬ hkʼe ve htaꞈ awˉ lawˉ tanˬ te cawˇ ve le?

¹⁴ Nawˬ hkʼa sha sha˗ehˬ te gʼa tuˬ ve awˬ ceuˬ htaꞈ leuˆ yuˬ ve, maˇ heˆ leh nawˬ ve te hkʼaˇ dawˇ hkʼaˇ gʼa pa cawˇ ve awˬ ceuˬ htaꞈ awˉ lawˉ te cawˇ ve yoˬ. Nawˬ dawˇ teh taˍ ve cawˬ˗oˬ ve kʼo, Yaˬhoˉvaˬ ve Shaˉhkiˆhkanˍ ve chaw ve hpfuhˆ nyi tuˬ laꞈ caˉ htaꞈ hpfuhˆ nyi sheˍ. Nawˬ dawˇ teh taˍ ve  htaꞈ caˉ daꞈ ve bon lawˬ sheˍ. Nawˬ “te gaˇ ve nyi ma cawˬ tuˬ leh te gʼa tuˬ” Yaˬhoˉvaˬ ga laˇ tuˬ lawˬ sheˍ. (Hpiˇliˇpiˆ 2:13) Peuˬ hkʼawꞈ nawˉ nawˬ gʼaw taˍ ve awˬ ceuˬ htaꞈ yuˬ yehˇ sheˍ. Nawˬ dawˇ teh taˍ ve awˉ lawˉ teˇ ceuˬ htaꞈ te gʼa˗oˬ htaˇ, nawˬ awˬ nu ve dawˇ teh taˍ ve awˬ ceuˬ htaꞈ caˉ leh te gʼa tuˬ awˬ gʼaˇ cawˬ ve yoˬ. Nawˬ ve te hkʼaˇ dawˇ hkʼaˇ pa leh Hkriꞈ yaˇ ve te hkʼaˇ dawˇ hkʼaˇ cawˬ˗oˬ htaˇ, awˬ nu ve awˬ ceuˬ htaꞈ pa ve sha ve tehꞈ nawˬ dawˇ ve yoˬ.

GʼUIˬ SHA VE TAWˇ HKAWˇ “NAWˬ HUI HKRIꞈ YAˇ TEˇ HPAˍ AWˬ HKʼAW LO KANˉ TE CHEHˇ VE”

15. Yaˬhoˉvaˬ ve chaw leh awˬ nu ve chaw Liꞈ hpu gʼaw ve htaꞈ hkʼaˬ hkʼe peun daꞈ ve le? (1 Hteˇsaˍlawˇniˆ 2:13)

¹⁵ Chaw teˇ hpaˍ kʼo, yawˇ Liꞈ hpu laiˉ pawˆ gʼaw peuˬ˗oˬ tehꞈ kʼoˆ ve yoˬ. Yaꞈ hkʼaˇ, Liꞈ hpu hkʼaw maˍ laˇ ve awˬ ceuˬ htaꞈ yawˇ hui awˬ tehˬ yonˍ˗aw laˇ? Yawˇ hui gʼaw taˍ ve awˬ ceuˬ htaꞈ yuˬ yehˇ ve, maˇ heˆ leh Liꞈ hpu hkʼaw beˆ maˍ laˇ ve htaꞈ a shu yawˇ ve dawˇ hkʼaˇ pa tuˬ gʼaꞈ te˗aw laˇ? Yawˇ hui chi hkʼe maˇ te ve nyi ma luˬ jaˇ. Yaꞈ hkʼaˇ, ngaˬ hui Yaˬhoˉvaˬ ve chaw hpehꞈ ve pa taw, awˉ lawˉ peuˇ ve Hkriꞈ yaˇ htaꞈ henˇ yuˬ ve yoˬ. Chi ve lehˬ, “Gʼuiˬ sha ve tawˇ hkawˇ awˬ tehˬ awˬ na hpehꞈ ve” tehꞈ ngaˬ hui shawˍ ve yoˬ. Chi hkʼoˆ kaꞈ, Gʼuiˬ sha ve tawˇ hkawˇ ngaˬ hui awˬ pon awˬ bon cawˬ tcuh ve yoˬ. Chi ve lehˬ Liꞈ hpu hkʼaw maˍ laˇ ve htaꞈ gʼaꞈ te ve yoˬ.—1 Hteˇsaˍlawˇniˆ 2:13 gʼaw sheˍ.

16. Ngaˬ hui Gʼuiˬ sha ve tawˇ hkawˇ htaꞈ gʼaꞈ te ve chaw hpehꞈ tuˬ aˬ htoꞈ ma ga laˇ gʼa ve le?

¹⁶ Liꞈ hpu gʼaw leh gʼaꞈ te gʼa tuˬ sha ve maˇ heˆ. Liꞈ hpu gʼaw tuˬ awˬ yanˇ shawˍ teh ve haˍ jaˇ tehꞈ ngaˬ hui dawˇ ve yoˬ. Liꞈ hpu haˆ haˆ gʼaw leh hkʼa dehꞈ maˇ gʼa dawˇ nyi ve kaꞈ ngaˬ hui dawˇ ve yoˬ hehˉ. Leh ngaˬ hui gʼa pa cawˇ ve laiˉ ceuˬ htaꞈ mawˬ ve kʼo, awˬ gʼaˇ nuˇ ve yoˬ hehˉ. Chi ve teˇ hpaˍ hkʼe nawˬ gʼa hpuˇ ve htawˇ, Yaˬhoˉvaˬ nawˬ htaꞈ ga laˇ ve pa taw nawˬ te gʼa tuˬ yoˬ. Chi htaꞈ pa taw, nawˬ Yaˬhoˉvaˬ htaꞈ ga laˇ tcuh leh yawˇ beˆ maˍ laˇ ve htaꞈ gʼaꞈ te sheˍ. Gʼa kaˇ leh leunˇ ve chaw taˇ hpehꞈ piˇ. Ngaˬ hui Liꞈ hpu gʼaw htaˇ leuˉ leh yuˬ yehˇ ve kʼo, ngaˬ hui a shaꞈ teꞈ kuiˬ hkʼaw ha lehˬ jaˇ tuˬ yoˬ.—Yaˍkoˆ 1:25.