Yeˍsuˆ mvuhˇ haˉ awˍ caˇ˗a te htaˇ, awˬ laꞈ gʼawˇ 70 gʼaˇ Yeˍsuˆ geh maˇ chehˇ ve htaꞈ ngaˬ hui maˇ dawˇ nyi cawˇ ve yoˬ. Awˬ lawn kʼo, Yeˍsuˆ yawˇ hui htaꞈ maˇ haꞈ yuˬ ve, maˇ heˆ leh yawˇ hui Yeˍsuˆ htaꞈ baˬ taˉ ve kaꞈ maˇ dawˇ nyi cawˇ. Awˬ yanˇ chi ve teˇ yanˇ, Yeˍsuˆ tcuh yaˇ hui geh ceh tiˉ chehˇ gaˇ ve yoˬ.

Tcuh yaˇ 12 gʼaˇ leh awˬ laꞈ gʼawˇ 70 gʼaˇ kaꞈ Yeˍsuˆ awˬ hkʼaˇ suh gʼaꞈ yuˬ ve chaw hpehꞈ ve pa taw, yawˇ haꞈ yuˬ ve yoˬ. Awˉ lawˉ htaˇ Yeˍsuˆ awˬ laꞈ gʼawˇ hui htaꞈ kuˬ yuˬ leh 12 gʼaˇ leuˆ yuˬ ve yoˬ. Leh chi ve teˇ moˍ htaꞈ tcuh yaˇ tehꞈ kʼoˆ ve yoˬ. (Luˉkaꞈ 6:12-16) Yeˍsuˆ Gaˍliˍlehˇ mvuhˇ miˬ lo chehˇ htaˇ, “tcuh yaˇ 12 gʼaˇ htaꞈ yawˇ kuˬ yuˬ” leh “Gʼuiˬ sha ve mvuhˇ miˬ awˬ lawn maˍ piˇ tuˬ maˇ kʼoˆ, chaw naˬ htaꞈ gu na˗e piˇ tuˬ maˇ kʼoˆ, yawˇ yawˇ hui htaꞈ kʼai tcuh ve yoˬ.” (Luˉkaꞈ 9:1-6) Peuˬ hkʼawꞈ nawˉ, Yeˍsuˆ Yuˇdaꞈ mvuhˇ miˬ lo chehˇ htaˇ, yawˇ ‘awˬ laꞈ gʼawˇ 70 gʼaˇ htaꞈ leuˆ yuˬ leh 2 gʼaˇ teˇ kaˬ 2 gʼaˇ teˇ kaˬ kʼai tcuh ve yoˬ.’ (Luˉkaꞈ 9:51; 10:1) Chi htaꞈ pa taw, Yeˍsuˆ ve awˬ laꞈ gʼawˇ laiˉ kaˬ lo bon maˍ kʼai tcuh gʼa ve yoˬ.

Yeˍsuˆ ve awˬ laꞈ gʼawˇ hpehꞈ la ve Yuˇdaꞈ chaw lehˬ, teˇ hkʼawꞈ le le Paˍsaˍhkaˍ pawehˇ te sheˍ ve yoˬ. Pawehˇ chi ve yawˇ hui ve yehˬ kʼa hkʼaw ve chaw geh teˇ geh ca te ve yoˬ. (Tawˆ kʼai ve 12:6-11, 17-20) Yeˍsuˆ suh˗e tuˬ hkʼaˬ nyiˇ nyi maˇ cawˬ˗o htaˇ, yawˇ leh tcuh yaˇ hui Yeˍruˆsaˍlehnˍ venˇ lo kʼai ve yoˬ. Paˍsaˍhkaˍ pawehˇ teˇ geh caˇ tuˬ, Yuˇdaꞈ mvuhˇ miˬ, Gaˍliˍlehˇ mvuhˇ miˬ, leh Peˍriˆ mvuhˇ miˬ lo ve awˬ laꞈ gʼawˇ htaꞈ maˇ gʼa kuˬ piˇ. Awˬ yanˇ chi ve teˇ yanˇ htaˇ, Yeˍsuˆ tcuh yaˇ hui geh chehˇ gaˇ ve tehꞈ hkʼa tawˍ lehˆ gʼa mawˬ ve yoˬ. Hkʼe te leh, yawˇ yawˇ hui htaꞈ kʼoˆ piˇ ve, “tuꞈ ve hkanˍ ve htaꞈ ngaˬ maˇ gʼa hkanˍ sheˍ htaˇ, nawˬ hui geh teˇ geh ngaˬ Paˍsaˍhkaˍ pawehˇ chi htaꞈ caˇ gaˇ jaˇ ve yoˬ.”—Luˉkaꞈ 22:15.

Chi hkʼe te tuˬ Yeˍsuˆ daꞈ ve awˬ hkʼaˇ laiˉ hkʼaˇ cawˬ ve yoˬ. Maˇ maw ve awˬ yanˇ, “miˬ guiˬ yaˇ ve venˇ baˆ htaꞈ yuˬ baˬ shehˍ hpaˇ, Gʼuiˬ sha ve Yawˬ ehˉ” gʼa suh˗e tuˬ yoˬ. (Yoˇhanˬ 1:29) Yawˇ Yeˍruˆsaˍlehnˍ venˇ lo gʼa suh˗e tuˬ yoˬ. Choˬ kaˬ lo Gʼuiˬ sha htaꞈ tuˉ tanˇ kuiˬ cawˬ maw jaˇ˗oˬ ve awˬ ti hpehꞈ ve yoˬ. Paˍsaˍhkaˍ pawehˇ te htaˇ, yawˬ ehˉ tiˇ caˇ ve lehˬ, Iˉsaˍreˍlaˆ chaw Eˇjiˇtuꞈ mvuhˇ miˬ lo Yaˬhoˉvaˬ ga ponˬ piˇ ve htaꞈ tawnˇ gʼa tuˬ ga piˇ ve yoˬ. Yaꞈ hkʼaˇ, Yeˍsuˆ yawˇ ve awˬ to tanˇ laˇ ve lehˬ, chaw yaˇ teˇ gʼaˇ le le venˇ baˆ leh suh ve htaꞈ ponˬ tuˬ yawˇ htaiˍ hkʼawꞈ laˇ ve yoˬ. (1 Kawˇrenˍhtuˆ 5:7, 8) Yeˍsuˆ yawˇ te ve awˬ ceuˬ lehˬ, tcuh yaˇ 12 gʼaˇ Hkriꞈ yaˇ awˬ moˍ hkʼaw sheh kʼai tuˬ, yawˇ awˬ yanˇ piˇ ve yoˬ. (Eˇfeˇsuꞈ 2:20-22) Nyi ma pfuhˇ lawꞈ lawꞈ te laˇ ve awˬ ceuˬ lehˬ, daꞈ kehˬ ve Yeˍruˆsaˍlehnˍ venˇ “awˬ hkuiˉ puiˍ kawˍ taˍ ve haˉ pui 12 shiˍ cawˬ leh, oˇ ve teˇ hpaˍ awˬ hkʼoˆ htaꞈ Yawˬ ehˉ ve tcuh yaˇ 12 gʼaˇ ve awˬ meh bvuhꞈ taˍ ve yoˬ.” (Hpeuꞈ maˍ ve 21:10-14) Ka tiꞈ yeˬ ve tcuh yaˇ chi ve teˇ hpaˍ Gʼuiˬ sha ve a loˍ biˇ la tuˬ, a yeˇ uiˍ ve awˬ vuiˬ cawˬ ve tehꞈ hkʼa tawˍ lehˆ gʼa mawˬ ve yoˬ. Yeˍsuˆ Paˍsaˍhkaˍ pawehˇ caˇ ve awˬ leh meuˇ teˇ pawˆ, tcuh yaˇ hui aˬ htoꞈ ma pa taw yawˇ geh chehˇ tcuh gaˇ ve tehꞈ ngaˬ hui na gʼa ve yoˬ. Peuˬ hkʼawꞈ nawˉ a yeˇ uiˍ ve awˬ lawn hpehꞈ la tuˬ ve lehˬ, Yeˍsuˆ ve mvuhˇ haˉ awˍ caˇ ve yoˬ.

Mvuhˇ haˉ awˍ caˇ htaˇ, awˬ laꞈ gʼawˇ 70 gʼaˇ leh awˬ nu ve awˬ laꞈ gʼawˇ hui Yeˍsuˆ geh maˇ gʼa chehˇ ve yoˬ. Yaꞈ hkʼaˇ, mvuhˇ haˉ awˍ caˇ ve Yeˍsuˆ te ve htaꞈ ka tiꞈ yeˬ ve awˬ laꞈ gʼawˇ teˇ gʼaˇ le le awˬ pon awˬ bon cawˬ ve yoˬ. Oˇ ve teˇ yanˇ leuˆ yuˬ taˍ ve Hkriꞈ yaˇ teˇ gʼaˇ le le Gʼuiˬ sha ve mvuhˇ miˬ ve awˬ lawn ka tiꞈ te ve yoˬ. Chi ve lehˬ, oˇ ve teˇ haˉ Yeˍsuˆ tcuh yaˇ hui htaꞈ ka tiꞈ te piˇ ve awˬ lawn hpehꞈ ve yoˬ.—Luˉkaꞈ 22:29, 30.