1. Saˍmaˍriˆ chaw chi teˇ gʼaˇ Yeˍsuˆ gu na˗e piˇ ve yawˇ awˬ hpfuhˇ shiˍ ve tehꞈ hkʼaˬ hkʼe te tawˆ la ve le?

 Oˇ kaˬ lo ve 10 gʼaˇ dawˇ haˍ jaˇ. Yawˇ hui hkiˬ tuꞈ paˍ hpehꞈ leh maˇ daꞈ la gʼa. Yaꞈ hkʼaˇ teˇ nyi htaˇ Yeˍsuˆ vuiˇ kuiˬ lo chehˇ taˍ ve htaꞈ yawˇ hui gʼa mawˬ ve yoˬ. Uiˍ jaˇ ve saˍ laꞈ lonˉ chi teˇ gʼaˇ chaw naˬ htaꞈ gu na˗e gʼa ve tehꞈ yawˇ hui gʼa kaˇ jaw leh, yawˇ hui htaꞈ kaꞈ gu na˗e laˇ gʼa ve tehꞈ yonˍ ve yoˬ. Hkʼe te leh yawˇ hui lehˬ “Jawˇmawˇ Yeˍsuˆ˗oˬ, ngaˬ hui htaꞈ ha kʼaˉ laˇ˗oˆ” tehꞈ bvuhˬ chaweh kuˬ ve yoˬ. Yeˍsuˆ hkiˬ tuꞈ paˍ 10 gʼaˇ htaꞈ gu na˗e piˇ ve yoˬ. Yawˇ hui teˇ gʼaˇ le le Yeˍsuˆ htaꞈ awˬ bon uiˍ jaˇ tehꞈ dawˇ ve yoˬ hehˉ. Yaꞈ hkʼaˇ, teˇ gʼaˇ lehˬ dawˇ ve ceh maˇ heˆ, yawˇ awˬ hpfuhˇ shiˍ ve te tawˆ la ve yoˬ. Saˍmaˍriˆ chaw hpehꞈ ve chi teˇ gʼaˇ lehˬ “awˬ hkawˇ bvuhˬ chaweh kuˬ leh Gʼuiˬ sha htaꞈ chiˇ uiˍ chiˇ mvuh ve yoˬ.”—Luˉkaꞈ 17:12-19.

2-3. (a) Awˬ hpfuhˇ shiˍ ve te tawˆ la ve htaꞈ aˬ htoꞈ ma te ngaˬ hui leunˇ˗e la ve le? (b) Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

² Saˍmaˍriˆ chaw chi teˇ gʼaˇ hkʼa shuˍ, ngaˬ hui kaꞈ daꞈ ve chaw htaꞈ awˬ bon uiˍ jaˇ kʼoˆ piˇ gaˇ ve yoˬ. Yaꞈ hkʼaˇ, teˇ pawˆ pawˆ kʼo awˬ bon uiˍ jaˇ kʼoˆ piˇ leh te tawˆ la ve htaꞈ ngaˬ hui leunˇ˗e la ve yoˬ.

³ Awˬ bon uiˍ jaˇ kʼoˆ piˇ leh te tawˆ la ve aˬ htoꞈ ma te a yeˇ uiˍ jaˇ ve awˬ lawn chi ve hkʼaw ngaˬ hui henˇ tuˬ yoˬ. Liꞈ hpu hkʼaw ve chaw teˇ hpaˍ daꞈ ve leh maˇ daꞈ ve awˬ lawn htaꞈ ngaˬ hui henˇ tuˬ yoˬ. Awˬ hpfuhˇ shiˍ ve te tawˆ la ve awˬ hkʼaˇ teˇ hpaˍ htaꞈ kaꞈ henˇ tuˬ yoˬ.

4-5. Aˬ htoꞈ ma te ngaˬ hui awˬ hpfuhˇ shiˍ ve te tawˆ la cawˇ ve le?

⁴ Yaˬhoˉvaˬ lehˬ awˬ hpfuhˇ shiˍ ve te tawˆ la ve daꞈ jaˇ ve henˇ yuˬ tuˬ hpehꞈ ve yoˬ. Yawˇ te ve awˬ hkʼaˇ teˇ hkʼaˇ lehˬ yawˇ nyi hkʼaˇ suh tuˬ te piˇ ve chaw htaꞈ awˬ bon naꞈ piˇ ve yoˬ. (2 Saˍmo˗eˍlaˆ 22:21;  Chiˇ mvuh ve 13:6; Maꞈhtehˍ 10:40, 41) Liꞈ hpu hkʼaw kʼoˆ ve, “Gʼuiˬ sha haꞈ ve awˬ yaˇ awˬ duˬ hpehꞈ ve hkʼe, yawˇ te ve hkʼa shuˍ shuˍ te˗o.” (Eˇfeˇsuꞈ 5:1) Hkʼe te leh, Yaˬhoˉvaˬ htaꞈ ngaˬ hui henˇ yuˬ leh awˬ hpfuhˇ shiˍ ve te tawˆ la gaˇ ve yoˬ.

⁵ Chi htaꞈ dawˇ nyi sheˍ. Awˬ hpfuhˇ shiˍ ve te tawˆ la ve lehˬ mehˬ jaˇ ve caˇ tuˬ htaꞈ shuˍ ve yoˬ. Shu htaꞈ pehˬ piˇ htaˇ kaꞈ ngaˬ hui ha lehˬ ve yoˬ. Ngaˬ hui te piˇ ve htaꞈ shu awˬ hpfuhˇ shiˍ htaˇ, ngaˬ hui ha lehˬ ve yoˬ. Ngaˬ hui awˬ hpfuhˇ shiˍ ve te tawˆ la htaˇ, chaw oˇ ve teˇ gʼaˇ ha lehˬ ve yoˬ. Yawˇ hui coˇ caˇ leh te ve htaꞈ ngaˬ hui awˬ bon uiˍ jaˇ tehꞈ dawˇ ve yawˇ hui shiˍ htaˇ, yawˇ hui kaꞈ ha lehˬ ve yoˬ. Chi htaꞈ pa taw, ngaˬ hui leh oˇ ve teˇ gʼaˇ kaꞈ kʼawꞈ meuˆ daꞈ maˇ la tuˬ yoˬ.

6. Ngaˬ hui awˬ bon uiˍ jaˇ kʼoˆ piˇ ve lehˬ shi a pfuhˉ caˉ shiˍ te taˍ ve htaꞈ hkʼaˬ hkʼe shuˍ daꞈ ve le?

⁶ Ngaˬ hui awˬ bon uiˍ jaˇ kʼoˆ piˇ ve awˬ hpfuhˇ hkʼaˆ jaˇ. Liꞈ hpu hkʼaw kʼoˆ ve, “daꞈ ve dawˇ hkʼaˇ hkʼa dehꞈ hpeuꞈ maˍ laˇ gʼa ve teˇ ceuˬ lehˬ, hpu hkʼeun htaꞈ tcuhˉ taˍ ve [shi a pfuhˉ caˉ shiˍ te taˍ ve, MGS] hkʼe hpehꞈ ve yoˬ.” (Tawˇ naˉ ve 25:11) Hpu hkʼeun htaꞈ tcuhˉ taˍ ve shi a pfuhˉ caˉ shiˍ te taˍ ve hkʼaˬ ma daꞈ jaˇ ve dawˇ nyi sheˍ! Awˬ hpfuhˇ hkʼaˆ jaˇ ve maˇ heˆ laˇ? Nawˬ daꞈ jaˇ ve laꞈ shawnˍ chi hkʼe ve gʼa htaˇ hkʼaˬ hkʼe dawˇ tuˬ le? Awˬ bon uiˍ jaˇ kʼoˆ piˇ ve kaꞈ awˬ hpfuhˇ hkʼa shuˍ hkʼaˆ ve yoˬ. Shi a pfuhˉ caˉ shiˍ te taˍ ve chi maw maw cawˬ gʼa ve yoˬ. Ngaˬ hui awˬ bon uiˍ jaˇ kʼoˆ piˇ htaˇ, ngaˬ hui kʼoˆ piˇ ve chaw kaꞈ chi maw maw tawnˇ gʼa ve yoˬ.

7. Chiˇ mvuh ve liꞈ 27:4 hkʼaw kʼoˆ taˍ ve hkʼe, Daˍviˆ leh awˬ nu ve Chiˇ mvuh ve liꞈ bvuhꞈ paˍ awˬ hpfuhˇ shiˍ ve hkʼaˬ hkʼe te tawˆ la ve le?

⁷ Oˇ htaˇ teˇ co˗e Gʼuiˬ sha ve chaw laiˉ gʼaˇ awˬ hpfuhˇ shiˍ ve te tawˆ la ve yoˬ. Daˍviˆ kaꞈ teˇ gʼaˇ yoˬ. (Chiˇ mvuh ve 27:4 gʼaw sheˍ.) Awˬ tehˬ oˉ  kʼoˍ pui ve yawˇ awˬ hpfuhˇ shiˍ jaˇ leh awˬ lawn chi shu kaꞈ hkʼa dehꞈ mawˬ gʼa ve yoˬ. Bon yehˬ te tuˬ yawˇ hpu shi mawˇ jeˬ maˇ maˇ tanˇ ve yoˬ. Aˍsaˆ ve awˬ ceuˬ awˬ hkʼaˇ kaꞈ awˬ hpfuhˇ shiˍ jaˇ leh Gʼuiˬ sha htaꞈ chiˇ mvuh tuˬ kʼa muiˬ hkawˇ bvuhꞈ ve yoˬ. Kʼa muiˬ hkawˇ teˇ maˬ hkʼaw yawˇ hui Yaˬhoˉvaˬ htaꞈ awˬ bon uiˍ jaˇ kʼoˆ piˇ leh yawˇ ve anˇ tuˬ uiˍ ve kanˉ teˇ hpaˍ htaꞈ chiˇ mvuh ve yoˬ. (Chiˇ mvuh ve 75:1) Daˍviˆ leh Aˍsaˆ ve awˬ ceuˬ awˬ hkʼaˇ htaꞈ Yaˬhoˉvaˬ awˬ bon maˇ maˇ naꞈ piˇ ve, yawˇ hui awˬ hpfuhˇ shiˍ jaˇ. Chi yawˇ hui Yaˬhoˉvaˬ htaꞈ shiˍ tcuh gaˇ ve yoˬ. Chiˇ mvuh ve liꞈ bvuhꞈ paˍ htaꞈ ngaˬ hui henˇ yuˬ gʼa˗aw laˇ?

8-9. Tcuh yaˇ Pawˇluꞈ awˬ viˉ awˬ nyi htaꞈ awˬ hpfuhˇ shiˍ ve tehꞈ hkʼaˬ hkʼe te tawˆ la ve le? Yawˇ hui awˬ bon hkʼaˬ hkʼe gʼa ve le?

⁸ Tcuh yaˇ Pawˇluꞈ awˬ viˉ awˬ nyi htaꞈ awˬ hpfuhˇ shiˍ ve tehꞈ yawˇ yawˇ hui ve awˬ lawn kʼoˆ ve htaꞈ ngaˬ hui shiˍ gʼa ve yoˬ. Yawˇ Gʼuiˬ sha geh bon lawˬ htaˇ, awˬ viˉ awˬ nyi awˬ pon awˬ bon uiˍ jaˇ kʼoˆ piˇ ve yoˬ. Roˉmaꞈ liꞈ 16:1-15 hkʼaw awˬ viˉ awˬ nyi 27 gʼaˇ ve awˬ meh bvuhꞈ ve yoˬ. Piˇkiˇlaˆ leh Aˍkuˉlaˆ ve awˬ lawn Pawˇluꞈ bvuhꞈ htaˇ, “a shaꞈ gʼa ponˬ tuˬ ngaˬ awˬ pon hkanˍ suh taˬ ve chaw hpehꞈ ve” tehꞈ yawˇ hui htaꞈ chiˇ mvuh piˇ ve yoˬ. Hpiˉbeˍ kaꞈ “chaw laiˉ gʼaˇ htaꞈ ga piˇ peuˬ ve awˬ hkʼoˆ, ngaˬ htaꞈ kaꞈ ga laˇ peuˬ ve” tehꞈ Pawˇluˬ bvuhꞈ taˍ ve yoˬ. Yawˇ awˬ viˉ awˬ nyi kaiˬ ve chi teˇ hpaˍ htaꞈ chiˇ mvuh piˇ ve yoˬ.—Roˉmaꞈ 16:1-15.

⁹ Awˬ viˉ awˬ nyi maˇ biˇ ve Pawˇluꞈ shiˍ ve htawˇ, Roˉmaꞈ liꞈ awˬ leh meuˇ teˇ tawn hkʼaw yawˇ hui te hkʼaˇ dawˇ hkʼaˇ daꞈ ve ceh bvuhꞈ taˍ ve yoˬ. Pawˇluꞈ bvuhꞈ taˍ ve liꞈ hpawnˬ daꞈ kuiˬ lo gʼaw ve awˬ viˉ awˬ nyi gʼa kaˇ htaˇ, yawˇ hui awˬ gʼaˇ gʼa jaˇ ve yoˬ hehˉ! Hkʼe te leh yawˇ hui Pawˇluꞈ htaꞈ meuˆ daꞈ maˇ la ve yoˬ. Hkriꞈ yaˇ awˬ moˍ hkʼaw awˬ viˉ awˬ nyi daꞈ ve awˬ ceuˬ htaꞈ kʼoˆ leh te htaˇ, nawˬ yawˇ htaꞈ awˬ hpfuhˇ shiˍ ve tehꞈ kʼoˆ piˇ˗aw laˇ?

10. Yeˍsuˆ yawˇ awˬ hkʼaˇ suh gʼaꞈ yuˬ ve chaw awˬ hpfuhˇ shiˍ ve tehꞈ kʼoˆ piˇ ve awˬ hkʼaˇ ngaˬ hui htaꞈ aˬ htoꞈ ma maˍ laˇ ve le?

¹⁰ Yeˍsuˆ Aˍsiˆ mvuhˇ miˬ awˬ hkʼaw lo cawˬ ve Hkriꞈ yaˇ awˬ moˍ teˇ hpaˍ htaꞈ liꞈ bvuhꞈ piˇ htaˇ, yawˇ hui te ve kanˉ htaꞈ Yeˍsuˆ awˬ hpfuhˇ shiˍ ve tehꞈ kʼoˆ piˇ ve yoˬ. Tawˇ pa haˉ te kʼo, Saˍtiˍrehˇ venˇ hkʼaw chehˇ ve Hkriꞈ yaˇ awˬ moˍ htaꞈ liꞈ bvuhꞈ piˇ htaˇ yawˇ kʼoˆ ve, “nawˬ kanˉ te chehˇ ve teˇ ceuˬ, haꞈ pehnˇ ve teˇ ceuˬ, yonˍ ve teˇ ceuˬ, shu htaꞈ ga piˇ ve teˇ ceuˬ leh, yeunˇ hkanˍ puiˉ ve teˇ ceuˬ htaꞈ ngaˬ shiˍ ve yoˬ. Chi hkʼoˆ kaꞈ, chi beuꞈ nawˬ te chehˇ ve kanˉ teˇ hpaˍ lehˬ, awˉ lawˉ htaˇ nawˬ te ve kanˉ teˇ hpaˍ aꞈ kehˉ maˇ ve htaꞈ ngaˬ shiˍ ve yoˬ.” (Hpeuꞈ maˍ ve 2:19) Yeˍsuˆ kʼoˆ leh yawˇ hui daꞈ ve htaꞈ te gaˇ ve nyi ma cawˬ ve pa taw, yawˇ hui kanˉ maˇ maˇ te ve htaꞈ yawˇ chiˇ mvuh piˇ ve yoˬ. Yeˍsuˆ Saˍtiˍrehˇ Hkriꞈ yaˇ awˬ moˍ hkʼaw ve chaw teˇ hpaˍ htaꞈ gʼa kʼoˆ maˍ piˇ ve htawˇ, awˉ lawˉ htaˇ leh awˬ leh meuˇ htaˇ yawˇ hui htaꞈ awˬ gʼaˇ piˇ ve yoˬ. (Hpeuꞈ maˍ ve 2:25-28) Awˬ tehˬ kʼo Hkriꞈ yaˇ awˬ moˍ teˇ kaˬ le le awˬ hkʼoˆ Yeˍsuˆ kanˇ paˆ cawˬ ve yoˬ. Ngaˬ hui kanˉ te ve htaꞈ yawˇ awˬ bon uiˍ jaˇ kʼoˆ laˇ tuˬ maˇ loˍ. Yaꞈ hkʼaˇ, yawˇ chi hkʼe te ve lehˬ nyi haꞈ shaˉ paˍ awˬ pon henˇ yuˬ tuˬ daꞈ jaˇ!

11. Heˍbrehˇ liꞈ 12:16 hkʼaw kʼoˆ taˍ ve hkʼe, Gʼuiˬ sha piˇ taˍ ve htaꞈ Iˉsawˇ hkʼaˬ hkʼe dawˇ ve le?

¹¹ Liꞈ hpu hkʼaw ve chaw teˇ hpaˍ hpaˍ awˬ hpfuhˇ hkʼa dehꞈ maˇ shiˍ. Tawˇ pa haˉ te kʼo, Iˉsawˇ ve awˬ pa awˬ e Yaˬhoˉvaˬ htaꞈ haꞈ leh yawˆ yan ve htawˇ, yawˇ piˇ taˍ ve htaꞈ Iˉsawˇ awˬ hpfuhˇ maˇ shiˍ. (Heˍbrehˇ 12:16 gʼaw sheˍ.) Ngaˬ hui hkʼaˬ hkʼe te shiˍ gʼa ve le? Yawˇ yaˇ uiˍ ve aˉ yaˇ awˍ chiˇ gʼuiˬ teˇ hkehˇ pa ve yoˬ. (Awˬ hkuiˉ puiˍ  25:30-34) Peuˬ leh yawˇ chi hkʼe dawˇ cheˆ ve nyi ma luˬ jaˇ. Yaꞈ hkʼaˇ, yawˇ cawˬ ve awˬ ceuˬ htaꞈ awˬ hpfuhˇ maˇ shiˍ ve pa taw, yawˇ yaˇ uiˍ ve aˉ yaˇ maˇ gʼa˗o ve htawˇ hkʼanˇ maˇ hpehꞈ.

12-13. Iˉsaˍreˍlaˆ chaw awˬ hpfuhˇ hkʼa dehꞈ maˇ shiˍ ve tehꞈ hkʼaˬ hkʼe hpeuꞈ maw laˇ ve le?

¹² Gʼuiˬ sha Iˉsaˍreˍlaˆ chaw htaꞈ laiˉ ceuˬ te piˇ ve pa taw, yawˇ hui awˬ hpfuhˇ shiˍ cawˇ ve yoˬ. Yaˬhoˉvaˬ Eˇjiˇtuꞈ chaw htaꞈ awˬ hiˆ 10 ceuˬ hpehꞈ la piˇ peuˬ hkʼawꞈ nawˉ, Iˉsaˍreˍlaˆ chaw awˬ ceˬ te ve htaꞈ gʼa ponˬ ve yoˬ. Yawˇ hui Eˇjiˇtuꞈ mvuhˇ miˬ lo tawˆ˗e htaˇ, Yaˬhoˉvaˬ Eˇjiˇtuꞈ maꞈ yaˇ hkʼa peu˗eˬ htaꞈ laˇ tsuhˇ gʼuiˬ nyi hkʼaw te luˬ piˇ ve yoˬ. Iˉsaˍreˍlaˆ chaw awˬ hpfuh shiˍ jaˇ ve pa taw, gʼaˇ ve kʼa muiˬ hkawˇ yawˇ hui Yaˬhoˉvaˬ htaꞈ kʼa piˇ ve yoˬ.

¹³ Iˉsaˍreˍlaˆ chaw awˬ nu ve shoꞈ shaꞈ ve htaꞈ gʼa hpuˇ htaˇ, Yaˬhoˉvaˬ yawˇ hui htaꞈ daꞈ ve te piˇ jaw ve yawˇ hui leunˇ kʼai ve yoˬ. Yawˇ hui awˬ hpfuhˇ hkʼa dehꞈ maˇ shiˍ ve tehꞈ hpeuꞈ maw laˇ ve yoˬ. (Chiˇ mvuh ve 106:7) “Iˉsaˍreˍlaˆ chaw hui . . . Moˉseˍ leh Aˍronˍ mehˆ gʼuˇ suhˍ hkʼanˇ maˍ piˇ” ve yoˬ. (Tawˆ kʼai ve 16:2, 8) Chi awˬ tehˬ tehˬ kʼo yawˇ hui Yaˬhoˉvaˬ htaꞈ hkʼanˇ maˍ piˇ chehˇ ve yoˬ. Yaˬhoˉvaˬ yawˇ ve chaw awˬ hpfuhˇ maˇ shiˍ ve pa taw, nyi ma luˬ ve yoˬ. Hkʼe te leh Iˉsaˍreˍlaˆ chaw oˇ ve teˇ toˆ hkʼa peu˗eˬ heh puiˉ hkʼaw suh˗e tuˬ yoˬ, Yawˇsuˆ leh Kaˍlehˆ ceh leuˉ taˉ ve yoˬ tehꞈ Yaˬhoˉvaˬ kʼoˆ piˇ ve yoˬ. (Heh puiˉ hkʼaw 14:22-24; 26:65) Maˇ daꞈ ve chi hkʼe ve ngaˬ hui jaw kʼai leh daꞈ ve chaw awˬ lawn henˇ yuˬ tuˬ, ngaˬ hui hkʼaˬ hkʼe te cawˇ ve teˇ geh nyi sheˍ.

14-15. (a) Awˬ hpawˇ leh awˬ miˇ ma awˬ hpfuhˇ shiˍ ve tehꞈ hkʼaˬ hkʼe te tawˆ la gʼa ve le? (b) Awˬ pa awˬ e yaˇ awˬ hpfuhˇ shiˍ ve te tawˆ la gʼa tuˬ hkʼaˬ hkʼe maˍ piˇ gʼa ve le?

¹⁴ Yehˬ kʼa hkʼaw. Yehˬ kʼa hkʼaw ve chaw teˇ gʼaˇ leh teˇ gʼaˇ awˬ hpfuhˇ shiˍ ve te tawˆ la htaˇ, teˇ gʼaˇ le le awˬ bon gʼa ve yoˬ. Awˬ hpawˇ awˬ miˇ ma awˬ bon uiˍ jaˇ kʼoˆ daꞈ ve kʼo, yawˇ hui meuˆ daꞈ maˇ la tuˬ yoˬ. Yawˇ hui venˇ baˆ hpehˇ daꞈ sha tuˬ yoˬ. Awˬ miˇ ma daꞈ ve awˬ ceuˬ htaꞈ kʼoˆ leh te htaˇ awˬ hpawˇ gʼa mawˬ ve ceh maˇ lawꞈ. Yawˇ awˬ hpfuhˇ shiˍ ve te tawˆ la tuˬ, awˬ hpawˇ “yawˇ htaꞈ chiˇ mvuh piˇ ve yoˬ.” (Tawˇ naˉ ve 31:10, 28) Awˬ miˇ ma kaꞈ awˬ hpawˇ te laˇ ve awˬ ceuˬ htaꞈ awˬ bon uiˍ jaˇ kʼoˆ piˇ cawˇ ve yoˬ.

¹⁵ Awˬ pa awˬ e˗oˬ, yaˇ awˬ hpfuhˇ shiˍ ve te tawˆ la gʼa tuˬ hkʼaˬ hkʼe maˍ piˇ gʼa ve le? Yaˇ nawˬ kʼoˆ  leh te ve htaꞈ gʼaꞈ te tuˬ yoˬ tehꞈ tawnˇ taˍ sheˍ. Hkʼe te leh yaˇ te laˇ ve awˬ ceuˬ htaꞈ awˬ bon uiˍ jaˇ kʼoˆ piˇ sheˍ. Yaˇ shu te laˇ ve htaꞈ awˬ bon uiˍ jaˇ kʼoˆ piˇ tuˬ maˍ piˇ sheˍ. Awˬ bon uiˍ jaˇ kʼoˆ piˇ ve lehˬ nyi ma hkʼaw te tawˆ la leh yawˇ ve tawˇ hkawˇ awˬ bon cawˬ jaˇ tehꞈ yaˇ htaꞈ maˍ piˇ cawˇ ve yoˬ. Awˬ viˉ awˬ nyi Hkeh˗liˇ kʼoˆ ve, “ngaˬ e 32 hkʼawꞈ htaˇ, yawˇ teˇ gʼaˇ tiˉ yaˇ 3 gʼaˇ htaꞈ gʼa nyi haꞈ shaˉ ve yoˬ. Oˇ ve teˇ yanˇ ngaˬ e tuꞈ jaˇ ve ngaˬ maˇ na gʼa. Ngaˬ 32 hkʼawꞈ gaˬ htaˇ na gʼa la ve yoˬ. Hkʼe te leh yawˇ ve yaˇ 3 gʼaˇ htaꞈ nyi haꞈ shaˉ tuˬ hkʼaˬ hkʼe taw coˇ caˇ ve htaꞈ ngaˬ awˬ hpfuhˇ shiˍ leh awˬ bon uiˍ jaˇ tehꞈ kʼoˆ piˇ ve yoˬ. Maˇ maw ve awˬ yanˇ htaˇ, awˬ e kʼoˆ ve, ‘nawˬ tawˇ yaw laˇ ve htaꞈ ngaˬ tawnˇ gʼa sheˍ.’ Chi ve htaꞈ yawˇ dawˇ nyi htaˇ, yawˇ ha lehˬ ve yoˬ.”

16. Ngaˬ hui shu htaꞈ awˬ bon uiˍ jaˇ kʼoˆ piˇ htaˇ yawˇ awˬ gʼaˇ hkʼaˬ hkʼe gʼa ve le? Tawˇ pa haˉ kʼoˆ maˍ laˇ sheˍ.

¹⁶ Hkriꞈ yaˇ awˬ moˍ hkʼaw. Ngaˬ hui awˬ viˉ awˬ nyi htaꞈ awˬ hpfuhˇ shiˍ ve te tawˆ la htaˇ, yawˇ hui htaꞈ awˬ gʼaˇ piˇ ve yoˬ. Awˬ viˉ awˬ nyi Haw˗heˇ nyi haꞈ shaˉ paˍ hpehꞈ ve yawˇ 28 hkʼawꞈ htaˇ, maˇ chehˇ sha leh teˇ ha pa hpawnˬ daꞈ˗e maˇ gʼa. Peuˬ hkʼawꞈ nawˉ yawˇ hpawnˬ daꞈ la gʼa ve htawˇ, awˬ vuiˬ te maˇ gʼa sheˍ. Yawˇ kʼoˆ ve, “ngaˬ teꞈ chiˉ te maˇ gʼa ve pa taw, ngaˬ awˬ hpfuhˇ maˇ cawˬ tehꞈ dawˇ ve yoˬ. Yaꞈ hkʼaˇ, teˇ pawˆ htaˇ hpawnˬ daꞈ peuˬ hkʼawꞈ nawˉ awˬ viˉ awˬ nyi kʼoˆ laˇ ve, ‘ngaˬ hui yehˬ kʼa awˬ pon nawˬ daꞈ jaˇ ve te maˍ laˇ ve lehˬ awˬ bon uiˍ jaˇ kʼoˆ laˇ gaˇ ve yoˬ. Ponˬ laˬ ve laiˉ hkʼawꞈ htaˇ, nawˬ bon maˍ laˇ ve ngaˬ hui dawˇ cawˇ jaˇ. Ngaˬ hui co ha hpawˇ uiˍ la mvuh la gʼa tuˬ te laˇ ve yoˬ.’ Ngaˬ mehˆ gʼuiˬ yaꞈ la ve yoˬ. Chi ngaˬ htaꞈ awˬ gʼaˇ peꞈ laˇ jaˇ.”

17. Kawˇlawˇsehˇ liꞈ 3:15 hkʼaw kʼoˆ taˍ ve hkʼe ngaˬ hui Yaˬhoˉvaˬ htaꞈ awˬ hpfuhˇ shiˍ ve hkʼaˬ hkʼe te tawˆ la gʼa ve le?

¹⁷ Ngaˬ hui ve Gʼuiˬ sha. Yaˬhoˉvaˬ ngaˬ hui htaꞈ co ha hpawˇ ve caˇ tuˬ peꞈ laˇ maˇ jaˇ. Hpawnˬ daꞈ ve, liꞈ kʼoˆ, vehˆsaiˉ hkʼaw Yaˬhoˉvaˬ ngaˬ hui htaꞈ beˆ maˍ laˇ ve yoˬ. Bon maˍ ve gʼa kaˇ htaˇ, liꞈ kʼoˆ teˇ kʼoˆ gʼa gʼaw htaˇ, awˬ han teˇ maˬ gʼa nyi htaˇ, ‘chi ngaˬ loˍ jaˇ’ tehꞈ dawˇ jaw˗aw laˇ? Ngaˬ hui Yaˬhoˉvaˬ htaꞈ awˬ hpfuhˇ shiˍ ve hkʼaˬ hkʼe te tawˆ la gʼa ve le? (Kawˇlawˇsehˇ 3:15 gʼaw sheˍ.) Teˇ hkʼaˇ lehˬ daꞈ jaˇ ve laꞈ shawnˍ chi hkʼe ve awˬ pon awˬ bon uiˍ jaˇ kʼoˆ piˇ tuˬ, hkʼaˬ htaˆ kaꞈ Yaˬhoˉvaˬ geh bon lawˬ ve yoˬ.—Yaˍkoˆ 1:17.

18. Gʼuiˬ sha ve mvuhˇ miˬ Hpawnˬ daꞈ kuiˬ yehˬ htaꞈ ngaˬ hui awˬ hpfuhˇ shiˍ ve hkʼaˬ hkʼe te tawˆ la gʼa ve le?

¹⁸ Ngaˬ hui Yaˬhoˉvaˬ htaꞈ awˬ hpfuhˇ shiˍ ve te  tawˆ la tuˬ, oˉ kʼoˍ pui kuiˬ nyi haꞈ shaˉ leh daꞈ kehˬ tuˬ te gʼa ve yoˬ. Ngaˬ hui Gʼuiˬ sha ve mvuhˇ miˬ Hpawnˬ daꞈ kuiˬ yehˬ htaꞈ hkʼaˬ htaˆ kaꞈ nyi haꞈ shaˉ ve yoˬ. Awˬ hkawˇ tawˆ ve awˬ hkʼeun kaꞈ hkʼa dehꞈ nyi haꞈ shaˉ leh maˇ gʼa luˬ˗e tcuh. Ngaˬ hui Gʼuiˬ sha ve mvuhˇ miˬ Hpawnˬ daꞈ kuiˬ yehˬ htaꞈ hkʼa dehꞈ nyi haꞈ shaˉ ve kʼo, chi maw maw gʼa yehˇ leh tcuhˇ tcuhˬ maˇ gʼa gu leh, cawˬ taˍ ve hpu laiˉ mvuhˇ miˬ hkʼaw Gʼuiˬ sha ve mvuhˇ miˬ Hpawnˬ daꞈ kuiˬ yehˬ kʼawꞈ te gʼa leh gu gʼa ve yoˬ.

19. Toˇ nyi shehˍ hpaˇ teˇ gʼaˇ leh yawˇ ve awˬ miˇ ma ve awˬ lawn ngaˬ hui htaꞈ aˬ htoꞈ ma maˍ laˇ ve le?

¹⁹ Ngaˬ hui awˬ pon kaiˬ ve hkʼaw kanˉ te laˇ ve chaw. Yawˇ te ve ngaˬ hui awˬ hpfuhˇ shiˍ ve tehꞈ kʼoˆ piˇ htaˇ, yawˇ gʼa hpuˇ chehˇ ve awˬ ceuˬ haꞈ yuˬ sha ve yoˬ hehˉ. Toˇ nyi shehˍ hpaˇ teˇ gʼaˇ leh yawˇ ve awˬ miˇ ma ve awˬ lawn htaꞈ dawˇ nyi sheˍ. Mvuhˇ kaˆ jaˇ ve hkʼaw yawˇ hui hto toˇ taˉ leh kʼawꞈ la htaˇ heuˬ jaˇ. Kaˆ jaˇ ve pa taw, awˬ miˇ ma aˉ poꞈ lehˍ lonˉ gʼa veuꞈ ve yoˬ. Mvuhˇ shawˉ naꞈ htaˇ, yawˇ awˬ hpawˇ htaꞈ kʼoˆ piˇ ve, toˇ nyi shehˍ hpaˇ ve kanˉ te maˇ gʼa˗oˬ hehˉ. Oˇ ve teˇ shawˉ hkʼaw awˬ tcuhˆ puiˍ lo ve liꞈ gaˬ la ve yoˬ. Liꞈ chi awˬ miˇ ma awˬ pon bvuhꞈ taˍ ve yoˬ. Yawˇ kanˉ te kaiˬ leh yeunˇ hkanˍ ve htaꞈ chiˇ mvuh piˇ ve yoˬ. Teˇ shinˉ le le haˉ kuiˬ gʼa pa ve haˍ jaˇ ve tehꞈ yawˇ hui shiˍ ve yoˬ. Yawˇ ve awˬ hpawˇ kʼoˆ ve, “chiˇ mvuh laˇ ve liꞈ chi yawˇ ve nyi ma hkʼaw gaˬ jaˇ ve pa taw, maˇ teˇ gaˇ˗o tehꞈ yawˇ maˇ kʼawꞈ hkʼanˇ˗o. Teˇ pawˆ pawˆ ngaˬ maˇ te gaˇ˗o tehꞈ dawˇ htaˇ, ngaˬ caˉ leh te tuˬ yawˇ awˬ gʼaˇ peꞈ laˇ ve yoˬ.” Yawˇ toˇ nyi shehˍ hpaˇ ve kanˉ aˬ laˬ hkʼe 40 hkʼawꞈ te gʼa ve yoˬ.

20. Teˇ nyi le le ngaˬ hui coˇ caˇ leh aˬ htoꞈ ma te cawˇ ve le?

²⁰ Teˇ nyi le le ngaˬ hui awˬ bon uiˍ jaˇ kʼoˆ piˇ leh te tawˆ la sheˍ. Miˬ guiˬ chi hkʼoˆ lo maˇ˗awˍ ve chaw awˬ hpfuhˇ maˇ shiˍ. Yaꞈ hkʼaˇ, ngaˬ hui kʼoˆ ve leh te tawˆ la ve yawˇ hui awˬ gʼaˇ gʼa tuˬ te piˇ gʼa ve yoˬ. Ngaˬ hui awˬ bon uiˍ hkawˇ yaw ve chi lehˬ awˬ chawˇ te ve co co yeˬ gʼa ve yoˬ. A yeˇ uiˍ jaˇ ve lehˬ ngaˬ hui ve Awˬ pa Yaˬhoˉvaˬ awˬ hpfuhˇ shiˍ ve te tawˆ la ve htaꞈ henˇ yuˬ gʼa ve yoˬ.