1-2. (a) Teˇ gʼaˇ le le aˬ htoꞈ ma htaꞈ gʼa gaˇ ve le? (b) Ngaˬ hui aˬ htoꞈ ma ve awˬ lawn htaꞈ yonˍ gʼa ve le?

 Teˇ gʼaˇ le le shu haꞈ laˇ tcuh gaˇ, hteˇ ve cawˇ ve gʼa gaˇ ve yoˬ. Ngaˬ hui hteˇ ve cawˇ ve leh haꞈ ve laiˉ pawˆ maˇ gʼa htaˇ, awˬ hpfuhˇ maˇ cawˬ leh dawˇ law kuiˬ maˇ cawˬ tehꞈ dawˇ ve yoˬ.

² Ngaˬ hui hteˇ ve cawˇ ve leh haꞈ ve gʼa gaˇ ve tehꞈ Yaˬhoˉvaˬ shiˍ ve yoˬ. (Chiˇ mvuh ve 33:5) Yawˇ ngaˬ hui htaꞈ haꞈ jaˇ leh hteˇ ve cawˇ ve gʼa tcuh gaˇ ve tehꞈ yonˍ gʼa ve yoˬ. Awˬ liˇ tawˇ hkawˇ Yaˬhoˉvaˬ Iˉsaˍreˍlaˆ chaw htaꞈ piˇ ve ngaˬ hui henˇ htaˇ, awˬ lawn chi na gʼa ve yoˬ. Shu nawˬ htaꞈ hteˇ ve cawˇ ve leh haꞈ ve maˇ te laˇ ve kʼo, Yaˬhoˉvaˬ yawˇ ve chaw htaꞈ hkʼaˬ hkʼe taw haꞈ ve Moˉseˍ ve awˬ liˇ tawˇ hkawˇ * hkʼaw hkʼa tawˍ lehˆ maˍ laˇ ve htaꞈ chaˬ nyi sheˍ.

3. (a) Roˉmaꞈ liꞈ 13:8-10 hkʼaw kʼoˆ taˍ ve hkʼe, Moˉseˍ ve awˬ liˇ tawˇ hkawˇ htaꞈ ngaˬ hui henˇ htaˇ aˬ htoꞈ ma shiˍ ve le? (b) Awˬ lawn chi hkʼaw ngaˬ hui aˬ htoꞈ ma na hkawˇ htaꞈ hkʼawꞈ tuˬ le?

³ Moˉseˍ ve awˬ liˇ tawˇ hkawˇ henˇ htaˇ, Yaˬhoˉvaˬ haꞈ pehnˇ ve gʼa mawˬ ve yoˬ. (Roˉmaꞈ 13:8-10 gʼaw sheˍ.) Awˬ lawn chi ve hkʼaw Iˉsaˍreˍlaˆ chaw htaꞈ awˬ liˇ tawˇ hkawˇ piˇ taˍ ve teˇ hpaˍ hpaˍ ceh chaˬ nyi leh na hkawˇ chi teˇ hpaˍ hkʼawꞈ tuˬ yoˬ. Awˬ liˇ tawˇ hkawˇ chi haꞈ pehnˇ ve geh laˬ ve tehꞈ aˬ htoꞈ ma te ngaˬ hui kʼoˆ gʼa ve le? Awˬ liˇ tawˇ hkawˇ chi chaw yaˇ hteˇ ve cawˇ ve cawˬ tuˬ ga piˇ gʼa ve tehꞈ aˬ htoꞈ ma te kʼoˆ gʼa ve le? Kanˇ paˆ cawˬ ve chaw awˬ liˇ tawˇ hkawˇ chi htaꞈ hkʼaˬ hkʼe yehˇ cawˇ ve le? Awˬ liˇ tawˇ hkawˇ chi hkʼaˬ hkʼe ve  chaw htaꞈ haꞈ shaˉ piˇ ve le? Hkʼawꞈ laˇ hkawˇ shi htaˇ, ngaˬ hui awˬ gʼaˇ gʼa ve, dawˇ law kuiˬ cawˬ ve, leh haꞈ pehnˇ uiˍ jaˇ ve Awˬ pa geh meuˆ daꞈ maˇ la ve yoˬ.—Tcuh yaˇ 17:27; Roˉmaꞈ 15:4.

4. (a) Moˉseˍ ve awˬ liˇ tawˇ hkawˇ haꞈ pehnˇ ve geh laˬ ve tehꞈ aˬ htoꞈ ma te ngaˬ hui kʼoˆ gʼa ve le? (b) Maꞈhtehˍ liꞈ 22:36-40 hkʼaw Yeˍsuˆ aˬ htoꞈ ma ve awˬ liˇ tawˇ hkawˇ htaꞈ kʼoˆ taˍ ve le?

⁴ Yaˬhoˉvaˬ teˇ ceuˬ le le haꞈ pehnˇ ve hkʼaw te ve pa taw, Moˉseˍ ve awˬ liˇ tawˇ hkawˇ haꞈ pehnˇ ve geh laˬ ve tehꞈ kʼoˆ gʼa ve yoˬ. (1 Yoˇhanˬ 4:8) Yaˬhoˉvaˬ htaꞈ haꞈ ve leh awˬ chawˇ awˬ paˆ htaꞈ haꞈ ve tawˇ hkawˇ chi 2 maˬ lehˬ Moˉseˍ ve awˬ liˇ tawˇ hkawˇ awˬ hkuiˉ puiˍ hpehꞈ ve yoˬ. (Oˉ kʼoˍ pui ve 19:18; Bon maˍ ve 6:5; Maꞈhtehˍ 22:36-40 gʼaw sheˍ.) Chi htaꞈ pa taw, awˬ liˇ tawˇ hkawˇ 600 maˬ hpaˆ ve chi Yaˬhoˉvaˬ haꞈ pehnˇ ve htaꞈ maˍ laˇ ve yoˬ. Teˇ lawn lawn htaꞈ teˇ geh nyi sheˍ.

5-6. Yaˬhoˉvaˬ awˬ ca htaꞈ aˬ htoꞈ ma te daꞈ tcuh gaˇ ve le? Yawˇ aˬ htoꞈ ma htaꞈ hkʼa dehꞈ shiˍ ve le? Tawˇ pa haˉ kʼoˆ maˍ laˇ sheˍ.

⁵ Nawˬ ve awˬ ca htaꞈ ka tiꞈ yeˬ leh yaˇ teˇ hpaˍ htaꞈ nyi haꞈ shaˉ sheˍ. Yaˬhoˉvaˬ lehˬ awˬ ca htaꞈ haꞈ daꞈ leh co co teˇ geh chehˇ tcuh gaˇ ve yoˬ. (Awˬ hkuiˉ puiˍ 2:24; Maꞈhtehˍ 19:3-6) Haˉ chawˇ haˉ paˆ te ve lehˬ awˬ ca htaꞈ te yaꞈ jaˇ ve teˇ ceuˬ hpehꞈ ve yoˬ. Chi htaꞈ pa taw, awˬ liˇ tawˇ hkawˇ 7 maˬ hkʼaw kʼoˆ ve haˉ chawˇ haˉ paˆ maˇ gʼa te. (Bon maˍ ve 5:18) Chi ‘Gʼuiˬ sha htaꞈ te yaꞈ jaˇ’ leh awˬ ca htaꞈ naˬ jaˇ tuˬ te piˇ ve yoˬ. (Awˬ hkuiˉ puiˍ 39:7-9) Haˉ chawˇ haˉ paˆ te ve kʼo, laiˉ chi hkʼawꞈ gaˬ˗oˬ ve htawˇ nyi ma naˬ chehˇ sheˍ ve yoˬ.

⁶ Awˬ ca te daꞈ ve htaꞈ Yaˬhoˉvaˬ a yeˇ yuˬ ve yoˬ. Yawˇ Iˉsaˍreˍlaˆ chaw a shu yawˇ ve awˬ miˇ ma htaꞈ hkʼa dehꞈ nyi haꞈ shaˉ tcuh gaˇ ve yoˬ. Awˬ hpawˇ awˬ liˇ tawˇ hkawˇ htaꞈ yawˆ yan ve kʼo, awˬ miˇ ma htaꞈ haꞈ leh awˬ lawn maˇ uiˍ ve kʼo maˇ baˬ. (Bon maˍ ve 24:1-4; Maꞈhtehˍ 19:3, 8) Shoꞈ shaꞈ jaˇ ve awˬ lawn cawˬ leh awˬ hpawˇ awˬ miˇ ma htaꞈ baˬ ve kʼo, baˬ ve liꞈ awˬ miˇ ma htaꞈ gʼa bvuhꞈ piˇ ve yoˬ. Awˬ miˇ ma haˉ chawˇ haˉ paˆ te yaꞈ ve tehꞈ shu maˇ gʼa dawˇ tuˬ, liꞈ chi haꞈ shaˉ piˇ taˍ ve yoˬ. Chi hkʼoˆ kaꞈ, baˬ ve liꞈ maˇ bvuhꞈ piˇ sheˍ htaˇ, mvuhˇ miˬ uˉ peunˍ paˍ htaꞈ gʼa na nyi ve yoˬ. Chi hkʼe te htaˇ, yawˇ hui maˇ gʼa baˬ daꞈ tuˬ uˉ peunˍ paˍ ga piˇ gʼa ve yoˬ. Iˉsaˍreˍlaˆ chaw a shu yawˇ awˬ to pon tiˉ dawˇ nyi leh awˬ miˇ ma htaꞈ baˬ ve kʼo, teˇ pawˆ le le Yaˬhoˉvaˬ ga piˇ ve maˇ heˆ. Yaꞈ hkʼaˇ, yaˇ miˇ oˇ ve teˇ gʼaˇ ve mehˆ gʼuiˬ htaꞈ yawˇ mawˬ leh nyi ma hkʼaˬ hkʼe taw naˬ ve yawˇ shiˍ ve yoˬ.—Maˍlaˍhkiˆ 2:13-16.

7-8. (a) Yaˬhoˉvaˬ awˬ pa awˬ e htaꞈ aˬ htoꞈ ma te tcuh gaˇ ve le? (Awˬ htaꞈ hpawˇ ve awˬ han htaꞈ nyi sheˍ.) (b) Ngaˬ hui htaꞈ aˬ htoꞈ ma maˍ laˇ ve le?

⁷ Yaˬhoˉvaˬ yaˇ teˇ hpaˍ htaꞈ ha lehˬ leh kawˆ tuˬ maˇ cawˬ tcuh gaˇ ve tehꞈ awˬ liˇ tawˇ hkawˇ chi hpeuꞈ maw laˇ ve yoˬ. Yaˬhoˉvaˬ lehˬ awˬ pa awˬ e yaˇ teˇ hpaˍ htaꞈ awˬ suhˍ awˬ shaˍ hpawˇ leh co ha hpawˇ nyi haꞈ shaˉ tcuh ve yoˬ. Yaˬhoˉvaˬ ve awˬ liˇ tawˇ hkawˇ htaꞈ yaˇ haꞈ leh awˬ hpfuhˇ shiˍ tuˬ, awˬ pa awˬ e awˬ yanˇ gʼa yehˇ leh gʼa maˍ piˇ ve yoˬ. (Bon maˍ ve 6:6-9; 7:13) Yawˇ hui yaˇ ehˉ htaꞈ haiˬ jaˇ ve te piˇ ve pa taw, Yaˬhoˉvaˬ ciˍ yanˍ piˇ ve yoˬ. (Yeˍraˍmiˆ 7:31, 33) Awˬ pa awˬ e yaˇ htaꞈ mawˇ hkʼe shawˍ leh hkʼaˬ hkʼe te gaˇ kaꞈ te gʼa ve tehꞈ maˇ gʼa dawˇ. Yaˇ lehˬ Yaˬhoˉvaˬ geh gʼa ve awˬ shinˉ awˬ ka hpehꞈ leh hkʼa dehꞈ gʼa nyi haꞈ shaˉ ve yoˬ.—Chiˇ mvuh ve 127:3.

⁸ Henˇ tuˬ ve: Awˬ ca te daꞈ ve htaꞈ Yaˬhoˉvaˬ hkʼaˬ htaˆ kaꞈ nyi chehˇ ve yoˬ. Yawˇ awˬ pa awˬ e yaˇ htaꞈ haꞈ tcuh gaˇ ve yoˬ. Awˬ pa awˬ e yaˇ htaꞈ te piˇ ve awˬ hkʼaˇ yawˇ htaꞈ gʼa kʼoˆ piˇ tuˬ yoˬ.

9-11. Shu mawˇ maˇ gʼa sheˉ lai tuˬ aˬ htoꞈ ma te Yaˬhoˉvaˬ awˬ liˇ tawˇ hkawˇ peꞈ laˇ ve le?

⁹ Shu mawˇ taˇ heuˆ gaˇ leh taˇ sheˉ lai. Awˬ liˇ tawˇ hkawˇ teˇ chi maˬ lehˬ shu mawˇ taˇ heuˆ gaˇ leh  taˇ sheˉ lai tehꞈ kʼoˆ taˍ ve yoˬ. (Bon maˍ ve 5:21; Roˉmaꞈ 7:7) Yaˬhoˉvaˬ awˬ liˇ tawˇ hkawˇ chi peꞈ laˇ ve lehˬ awˬ hpfuhˇ hkʼaˆ ve htaꞈ henˇ yuˬ tuˬ maˍ laˇ ve yoˬ. Yawˇ ve chaw nyi ma leh dawˇ hkʼaˇ htaꞈ gʼa haꞈ shaˉ ve yoˬ. Haiˬ ve te tawˆ la ve lehˬ dawˇ hkʼaˇ htaꞈ awˉ lawˉ tanˬ ve tehꞈ yawˇ shiˍ ve yoˬ. (Tawˇ naˉ ve 4:23) Iˉsaˍreˍlaˆ chaw heuˆ gaˇ ve maˇ daꞈ ve dawˇ hkʼaˇ nyi ma hkʼaw cawˬ tcuh ve kʼo, shu htaꞈ haꞈ ve maˇ te piˇ. Tawˇ pa haˉ te kʼo, jawˇ mawˇ Daˍviˆ va chi htaꞈ yaw ve yoˬ. Awˬ tehˬ kʼo, yawˇ daꞈ ve chaw hpehꞈ ve yoˬ. Yaꞈ hkʼaˇ, teˇ pawˆ htaˇ yawˇ shu miˇ ma htaꞈ heuˆ gaˇ ve yoˬ. Heuˆ gaˇ ve chi yawˇ venˇ baˆ te yaꞈ tuˬ te piˇ ve yoˬ. (Yaˍkoˆ 1:14, 15) Daˍviˆ haˉ chawˇ haˉ paˆ te ve, yaˇ miˇ ve awˬ hpawˇ htaꞈ coˇ caˇ leh heˍ piˇ ve, leh yawˇ htaꞈ tiˇ pehˍ tcuh ve yoˬ.—2 Saˍmo˗eˍlaˆ 11:2-4; 12:7-11.

¹⁰ A shu teˇ gʼaˇ awˬ liˇ tawˇ hkawˇ chi htaꞈ maˇ na yuˬ leh shu mawˇ htaꞈ heuˆ gaˇ ve kʼo, Yaˬhoˉvaˬ shiˍ ve yoˬ. (1 Raˍsaˍvanˍ 28:9) Awˬ liˇ tawˇ hkawˇ chi Yaˬhoˉvaˬ ve chaw haiˬ ve dawˇ hkʼaˇ leh te yaꞈ ve htaꞈ jaw kʼai gʼa tuˬ maˍ piˇ taˍ ve yoˬ. Yaˬhoˉvaˬ haꞈ pehnˇ uiˍ jaˇ ve leh cuˇ yiˍ cawˬ jaˇ ve Awˬ pa hpehꞈ ve maˇ heˆ laˇ?

¹¹ Henˇ tuˬ ve: Yaˬhoˉvaˬ awˬ htaꞈ hpawˇ ceh mawˬ ve maˇ heˆ. Yawˇ nyi ma hkʼaw cawˬ ve awˬ ceuˬ htaꞈ kaꞈ mawˬ ve yoˬ. (1 Saˍmo˗eˍlaˆ 16:7) Te hkʼaˇ dawˇ hkʼaˇ teˇ ceuˬ kaꞈ yawˇ htaꞈ faˉ maˇ gʼa. Ngaˬ hui daꞈ ve te hkʼaˇ dawˇ hkʼaˇ yawˇ mawˬ leh chi hkʼe ve cawˬ tcuh gaˇ ve yoˬ. Yaꞈ hkʼaˇ, ngaˬ hui maˇ te yaꞈ sheˍ htaˇ, yawˇ ngaˬ hui htaꞈ maˇ daꞈ ve dawˇ hkʼaˇ yuˬ tiˍ tcuh gaˇ ve yoˬ.—2 Raˍsaˍvanˍ 16:9; Maꞈhtehˍ 5:27-30.

12. Moˉseˍ ve awˬ liˇ tawˇ hkawˇ ngaˬ hui htaꞈ aˬ htoꞈ ma maˍ laˇ sheˍ ve le?

¹² Yaˬhoˉvaˬ hteˇ ve cawˇ ve htaꞈ haꞈ ve tehꞈ Moˉseˍ ve awˬ liˇ tawˇ hkawˇ maˍ laˇ ve yoˬ. (Chiˇ mvuh ve 37:28; Iˉsaˍyaˆ 61:8) Shu htaꞈ hteˇ ve cawˇ ve te piˇ tuˬ yawˇ daꞈ jaˇ ve henˇ yuˬ tuˬ te maˍ laˇ taˍ ve yoˬ. Iˉsaˍreˍlaˆ chaw Yaˬhoˉvaˬ ve awˬ liˇ tawˇ hkawˇ htaꞈ na yuˬ htaˇ, yawˇ awˬ bon naꞈ piˇ ve yoˬ. Yaꞈ hkʼaˇ, yawˇ hui Yaˬhoˉvaˬ ve hteˇ ve cawˇ ve htaꞈ a yeˇ maˇ yuˬ ve pa taw, tuꞈ ve hkanˍ ve gʼa hpuˇ ve yoˬ. Awˬ liˇ tawˇ hkawˇ teˇ chi maˬ hkʼaw ve nyiˇ maˬ htaꞈ teˇ geh nyi sheˍ.

13-14. Awˬ liˇ tawˇ hkawˇ teˇ chi maˬ hkʼaw ve awˉ lawˉ nyiˇ maˬ aˬ htoꞈ ma le? Awˬ liˇ tawˇ hkawˇ chi ve teˇ hpaˍ htaꞈ na yuˬ htaˇ Iˉsaˍreˍlaˆ chaw aˬ htoꞈ ma awˬ bon gʼa ve le?

¹³ Yaˬhoˉvaˬ htaꞈ ceh tiˉ oˉ kʼoˍ pui ve. Awˬ liˇ tawˇ hkawˇ teˇ chi maˬ hkʼaw ve awˉ lawˉ nyiˇ maˬ lehˬ Yaˬhoˉvaˬ htaꞈ ceh tiˉ oˉ kʼoˍ gʼa pui leh awˬ nu ve gʼuiˬ sha htaꞈ oˉ kʼoˍ maˇ gʼa pui ve yoˬ. (Tawˆ kʼai ve 20:3-6) Chi teˇ hpaˍ lehˬ Yaˬhoˉvaˬ awˬ pon maˇ heˆ. Yaꞈ hkʼaˇ, yawˇ ve chaw awˬ pon yoˬ. Yawˇ hui Gʼuiˬ sha htaꞈ ka tiꞈ yeˬ htaˇ, daꞈ ve awˬ bon laiˉ ceuˬ gʼa ve yoˬ. Yawˇ hui awˬ nu ve gʼuiˬ sha htaꞈ oˉ kʼoˍ pui htaˇ, tuꞈ ve hkanˍ ve gʼa hpuˇ ve yoˬ.

¹⁴ Hkaˍnanˍniˆ chaw htaꞈ dawˇ nyi sheˍ. Yawˇ hui a shaꞈ maˇ teꞈ ve gʼuiˬ sha htaꞈ oˉ kʼoˍ pui leh awˬ tehˬ a shaꞈ teꞈ chehˇ ve Gʼuiˬ sha htaꞈ oˉ kʼoˍ maˇ pui ve pa taw, yawˇ hui a shaꞈ teꞈ hkʼaˇ maˇ daꞈ. (Chiˇ mvuh ve 115:4-8) Oˉ kʼoˍ pui ve hkʼaw yawˇ hui chaꞈ chiˆ jaˇ ve laiˉ ceuˬ htaꞈ te leh yaˇ htaꞈ tuˉ tanˇ ve yoˬ. Iˉsaˍreˍlaˆ chaw kaꞈ Yaˬhoˉvaˬ htaꞈ a yeˇ maˇ yuˬ leh shaˉ hoꞈ htaꞈ oˉ kʼoˍ pui htaˇ, yawˇ hui ve awˬ hpfuhˇ i kʼai yawnˇ kʼai leh yehˬ kʼa hkʼaw ve chaw htaꞈ naˬ tuˬ te piˇ ve yoˬ. (2 Raˍsaˍvanˍ 28:1-4) Sheh kʼai paˍ Yaˬhoˉvaˬ ve hteˇ ve cawˇ ve htaꞈ baˬ taˉ ve, kanˇ paˆ maˇ daꞈ ve hpawˇ yehˇ leh awˬ gʼaˇ nuˇ ve chaw htaꞈ fawˉ mehˍ piˇ ve yoˬ. (Yeˍsaˍkeˍlaˆ 34:1-4) Yaˇ miˇ leh yaˇ ehˉ htaꞈ te luˬ piˇ ve chaw htaꞈ Yaˬhoˉvaˬ suhˉ jehˬ piˇ tuˬ yoˬ tehꞈ Iˉsaˍreˍlaˆ chaw htaꞈ shaˍ tiꞈ piˇ ve yoˬ. (Bon maˍ ve 10:17, 18; 27:19) Yaꞈ hkʼaˇ, yawˇ ve chaw yawˇ htaꞈ ka tiꞈ yeˬ  leh yawˇ hui hteˇ ve cawˇ ve hkʼaw te daꞈ htaˇ, awˬ bon naꞈ piˇ tuˬ yoˬ.—1 Jawˇmawˇ 10:4-9.

15. Yaˬhoˉvaˬ htaꞈ caˉ daꞈ ve awˬ lawn ngaˬ hui htaꞈ aˬ htoꞈ ma maˍ laˇ ve le?

¹⁵ Henˇ tuˬ ve: Chaw teˇ gʼaˇ Yaˬhoˉvaˬ htaꞈ oˉ kʼoˍ pui ve tehꞈ kʼoˆ leh awˬ liˇ awˬ hkʼaˇ htaꞈ a yeˇ maˇ yuˬ leh shu htaꞈ te luˬ htaˇ, Yaˬhoˉvaˬ htaꞈ venˇ baˆ taˍ maˇ hpehꞈ. Yaꞈ hkʼaˇ, Yaˬhoˉvaˬ ngaˬ hui htaꞈ haꞈ leh ngaˬ hui maˇ hteˇ maˇ cawˇ ve gʼa hpuˇ htaˇ, yawˇ shiˍ ve yoˬ. Awˬ e yaˇ naˬ ve htaꞈ shiˍ ve aꞈ kehˉ Yaˬhoˉvaˬ ngaˬ hui ve dawˇ hkʼaˇ htaꞈ shiˍ ve yoˬ. (Iˉsaˍyaˆ 49:15) Yawˇ laꞈ haˉ maˇ ga piˇ ve htawˇ, cawˇ ve awˬ yanˇ gaˬ kʼo, te ve htaꞈ yawˇ nyi leh venˇ baˆ maˇ dawˇ hpfuhˆ ve chaw htaꞈ suhˉ jehˬ piˇ tuˬ yoˬ.

16-18. Moˉseˍ ve awˬ liˇ tawˇ hkawˇ hkʼaˬ hkʼe hpawˇ kaꞈ yehˇ gʼa ve le? Chi ngaˬ hui htaꞈ aˬ htoꞈ ma maˍ laˇ ve le?

¹⁶ Moˉseˍ ve awˬ liˇ tawˇ hkawˇ Iˉsaˍreˍlaˆ chaw ve a shaꞈ laiˉ hpawˇ lo caˉ daꞈ ve yoˬ. Chi htaꞈ pa taw, awˬ hoˉ awˬ naˬ teˇ hpaˍ Yaˬhoˉvaˬ ve chaw htaꞈ suhˉ jehˬ piˇ htaˇ, hteˇ ve cawˇ ve hkʼaw gʼa te ve yoˬ. Yawˇ hui co ha hpawˇ ceh suhˉ jehˬ piˇ ve maˇ heˆ. Maˇ cawˇ maˇ hawˍ daꞈ ve leh mvuhˇ miˬ awˬ liˇ htaꞈ te yaꞈ ve kaꞈ suhˉ jehˬ piˇ ve yoˬ. Awˬ lawn chi teˇ hpaˍ htaꞈ nyi sheˍ.

¹⁷ Iˉsaˍreˍlaˆ chaw teˇ gʼaˇ shu htaꞈ tiˇ pehˍ ve kʼo, yawˇ htaꞈ laꞈ haˉ maˇ tiˇ pehˍ piˇ. Yawˇ suh keunˍ ve maˇ suh keunˍ ve, mvuhˇ miˬ uˉ peunˍ paˍ awˉ lawˉ suhˉ gʼa jehˬ ve yoˬ. (Bon maˍ ve 19:2-7, 11-13) Teˇ nyi le le a shaꞈ teꞈ kuiˬ hkʼaw caˉ daꞈ ve kaꞈ yawˇ hui suhˉ jehˬ ve yoˬ. Tawˇ pa haˉ te kʼo, hpu shi mawˇ jeˬ hpawˇ maˇ heˆ leh awˬ hpawˇ awˬ miˇ ma yaꞈ daꞈ ve hpawˇ kaꞈ yoˬ. (Tawˆ kʼai ve 21:35; Bon maˍ ve 22:13-19) Uˉ peunˍ paˍ hteˇ cawˇ leh Iˉsaˍreˍlaˆ chaw awˬ liˇ tawˇ hkawˇ na yuˬ ve kʼo, teˇ gʼaˇ le le awˬ bon gʼa leh Yaˬhoˉvaˬ htaꞈ yawˆ yan gʼa ve yoˬ.—Oˉ kʼoˍ pui ve 20:7, 8; Iˉsaˍyaˆ 48:17, 18.

¹⁸ Henˇ tuˬ ve: Yaˬhoˉvaˬ ngaˬ hui a shaꞈ teꞈ hkʼaˇ htaꞈ a yeˇ yuˬ ve yoˬ. Ngaˬ hui shu htaꞈ te piˇ htaˇ, hteˇ ve cawˇ ve leh haꞈ pehnˇ ve hkʼaw yawˇ te tcuh gaˇ ve yoˬ. Ngaˬ hui aˉ hkʼaw lo teˇ gʼaˇ tiˉ chehˇ ve htawˇ, kʼoˆ ve leh te ve htaꞈ yawˇ a yeˇ yuˬ ve yoˬ.—Heˍbrehˇ 4:13.

19-21. (a) Nyi haꞈ shaˉ paˍ leh suhˉ jehˬ paˍ Gʼuiˬ sha ve chaw htaꞈ hkʼaˬ hkʼe gʼa te piˇ ve le? (b) Moˉseˍ ve awˬ liˇ tawˇ hkawˇ chaw yaˇ htaꞈ hkʼaˬ hkʼe haꞈ shaˉ piˇ ve le? Ngaˬ hui htaꞈ aˬ htoꞈ ma maˍ laˇ ve le?

¹⁹ Awˬ paˇ awˬ kui chehˇ ve mvuhˇ miˬ maˇ daꞈ ve dawˇ hkʼaˇ Yaˬhoˉvaˬ yawˇ ve chaw htaꞈ maˇ heuˆ la tcuh gaˇ. Chi htaꞈ pa taw, uˉ peunˍ paˍ leh suhˉ jehˬ paˍ hteˇ ve cawˇ ve awˬ liˇ tawˇ hkawˇ htaꞈ yehˇ tuˬ yawˇ dawˇ law ve yoˬ. Yaꞈ hkʼaˇ, suhˉ jehˬ paˍ chaw yaˇ htaꞈ hehnˇ ve hkʼaw maˇ gʼa te piˇ. Yawˇ hui hteˇ ve cawˇ ve htaꞈ gʼa haꞈ ve yoˬ.—Bon maˍ ve 1:13-17; 16:18-20.

²⁰ Yaˬhoˉvaˬ yawˇ ve chaw htaꞈ haꞈ ve pa taw, teˇ gʼaˇ˗ehˬ kaꞈ maˇ hteˇ maˇ cawˇ ve maˇ gʼa hpuˇ tuˬ, yawˇ awˬ liˇ tawˇ hkawˇ teh ve yoˬ. Tawˇ pa haˉ te kʼo, chaw teˇ gʼaˇ htaꞈ naˬ taweh maˇ gʼa she pfuhˍ piˇ tuˬ awˬ liˇ tawˇ hkawˇ ga piˇ ve yoˬ. Chaw teˇ gʼaˇ te yaꞈ  ve tehꞈ shu kʼoˆ htaˇ, a shu teˇ gʼaˇ chi hkʼe kʼoˆ ve yawˇ shiˍ tuˬ a hkaw˗anˬ cawˬ ve yoˬ. (Bon maˍ ve 19:16-19; 25:1) Te yaꞈ ve chaw htaꞈ suhˉ maˇ jehˬ piˇ sheˍ htaˇ, shaˉ hkiˆ 2 gʼaˇ gʼa cawˬ ve yoˬ. (Bon maˍ ve 17:6; 19:15) Yaꞈ hkʼaˇ, shaˉ hkiˆ teˇ gʼaˇ ceh tiˉ cawˬ ve kʼo˗ehꞈ? Yawˇ te yaꞈ ve htaꞈ pa taw maˇ ciˍ yanˍ laˇ tehꞈ taˇ dawˇ. Yawˇ te ve htaꞈ Yaˬhoˉvaˬ mawˬ ve yoˬ. Yehˬ kʼa hkʼaw awˬ pa kanˇ paˆ cawˬ ve htawˇ, teˇ ceuˬ le le hpawˇ yehˇ maˇ hpehꞈ. Teˇ pawˆ pawˆ yehˬ kʼa hkʼaw maˇ cawˇ maˇ hawˍ daꞈ ve kʼo, uˉ peunˍ paˍ ga piˇ tuˬ a hkaw˗anˬ cawˬ leh awˬ leh meuˇ htaˇ dawˇ cheˆ piˇ gʼa ve yoˬ.—Bon maˍ ve 21:18-21.

²¹ Henˇ tuˬ ve: Yaˬhoˉvaˬ daꞈ jaˇ ve henˇ yuˬ tuˬ hpehꞈ ve yoˬ. Yawˇ te ve teˇ ceuˬ le le hteˇ ve cawˇ ve yoˬ. (Chiˇ mvuh ve 9:7) A shu teˇ gʼaˇ yawˇ ve awˬ liˇ awˬ hkʼaˇ htaꞈ gʼaꞈ te ve kʼo, yawˇ laꞈ shawnˍ piˇ tuˬ yoˬ. Kanˇ paˆ yaꞈ ve hpawˇ yehˇ ve chaw htaꞈ yawˇ ciˍ yanˍ piˇ tuˬ yoˬ. (2 Saˍmo˗eˍlaˆ 22:21-23; Yeˍsaˍkeˍlaˆ 9:9, 10) Teˇ hpaˍ hpaˍ haiˬ jaˇ ve htaꞈ te leh ciˍ yanˍ ve maˇ gʼa hkanˍ ve htaꞈ shuˍ ve yoˬ. Yaꞈ hkʼaˇ, cawˇ ve awˬ yanˇ gaˬ htaˇ Yaˬhoˉvaˬ yawˇ htaꞈ ciˍ yanˍ piˇ tuˬ yoˬ. (Tawˇ naˉ ve 28:13) Yawˇ hui venˇ baˆ maˇ dawˇ hpfuhˆ ve kʼo, “teꞈ chehˇ ve Gʼuiˬ sha ve laꞈ sheh awˬ hkʼaw lo ce loꞈ˗e tuˬ ve lehˬ kawˆ tuˬ uiˍ jaˇ ve teˇ ceuˬ hpehꞈ” ve tehꞈ yawˇ hui shiˍ tuˬ yoˬ.—Heˍbrehˇ 10:30, 31.

22-24. (a) Awˬ liˇ tawˇ hkawˇ a shu htaꞈ haꞈ shaˉ piˇ ve le? Yaˬhoˉvaˬ htaꞈ caˉ daꞈ ve ngaˬ hui htaꞈ aˬ htoꞈ ma maˍ laˇ ve le? (b) Tawˆ kʼai ve liꞈ 22:22-24 hkʼaw ngaˬ hui htaꞈ shaˍ tiꞈ hkʼaˬ hkʼe peꞈ laˇ ve le?

²² Awˬ liˇ tawˇ hkawˇ lehˬ a shu yawˇ awˬ to htaꞈ haꞈ shaˉ maˇ gʼa ve chaw htaꞈ haꞈ shaˉ piˇ ve yoˬ Tawˇ pa haˉ te kʼo, Iˉsaˍreˍlaˆ mvuhˇ miˬ hkʼaw chehˇ la  ve yaˇ cuˬ shi, mehˇ chawˇ ma, leh buiˇ shaˆ aˉ naˆ chaw yoˬ. Iˉsaˍreˍlaˆ mvuhˇ miˬ hkʼaw suhˉ jehˬ paˍ “hkehˉ chaw leh yaˇ cuˬ shi teˇ hpaˍ htaꞈ maˇ hteˇ maˇ cawˇ ve hkʼaw suhˉ jehˬ piˇ ve maˇ gʼa te. Mehˇ chawˇ ma htaꞈ hpu chiˇ piˇ ve kʼo, chiˇ piˇ ve hpu oˇ ve awˬ tan yawˇ ve aˉ poꞈ htaꞈ nawˬ maˇ gʼa yuˬ teh taˍ” tehꞈ kʼoˆ piˇ ve yoˬ. (Bon maˍ ve 24:17) Yaˬhoˉvaˬ lehˬ shu htaꞈ maˇ gʼaˇ puiˉ ve chaw htaꞈ haꞈ leh ha kʼaˉ ve yoˬ. A shu teˇ gʼaˇ yawˇ hui htaꞈ maˇ hteˇ maˇ cawˇ ve te piˇ ve kʼo, yawˇ htaꞈ ciˍ yanˍ piˇ tuˬ yoˬ.—Tawˆ kʼai ve 22:22-24 gʼaw sheˍ.

²³ Yehˬ kʼa hkʼaw ve chaw htaꞈ pehꞈ ve tzuhˆ ve maˇ gʼa te tuˬ kaꞈ, awˬ liˇ tawˇ hkawˇ haꞈ shaˉ piˇ taˍ ve yoˬ. Yehˬ kʼa hkʼaw ve chaw teˇ geh zuhꞈ ve te maˇ hpehꞈ. (Oˉ kʼoˍ pui ve 18:6-30) Iˉsaˍreˍlaˆ awˬ paˇ awˬ kui ve mvuhˇ miˬ chi hkʼe ve htaꞈ haꞈ yuˬ ve htawˇ, Yaˬhoˉvaˬ ve chaw yawˇ hkʼe dawˇ ve yoˬ. Chi ve htaꞈ chaꞈ chiˆ jaˇ ve tehꞈ yawˇ hui shawˍ ve yoˬ.

²⁴ Henˇ tuˬ ve: Yaˬhoˉvaˬ lehˬ sheh kʼai paˍ teˇ hpaˍ yawˇ ve chaw htaꞈ haꞈ pehnˇ ve hkʼaw nyi haꞈ shaˉ tcuh gaˇ ve yoˬ. Yawˇ pehꞈ ve tzuhˆ ve htaꞈ nyi bawˬ jaˇ leh shu htaꞈ maˇ gʼaˇ puiˉ ve chaw htawˇ, hteˇ ve cawˇ ve hkʼaw haꞈ shaˉ piˇ tcuh gaˇ ve yoˬ.

25-26. (a) Aˬ htoꞈ ma te haꞈ pehnˇ ve leh hteˇ ve cawˇ ve a shaꞈ teꞈ leh shaˉ gʼawˬ ve hkʼe hpehꞈ ve tehꞈ kʼoˆ gʼa ve le? (b) Awˬ lawn chi htaꞈ caˉ daꞈ ve gʼuˇ suhˍ teˇ lawn hkʼaw ngaˬ hui aˬ htoꞈ ma htaꞈ henˇ tuˬ le?

²⁵ Haꞈ pehnˇ ve leh hteˇ ve cawˇ ve a shaꞈ teꞈ leh shaˉ gʼawˬ ve hkʼe hpehꞈ ve yoˬ. Chaw yaˇ awˬ pon, teˇ ceuˬ maˇ heˆ leh teˇ ceuˬ ceh cawˬ ve kaꞈ maˇ lawꞈ. Hkʼe te leh, Yaˬhoˉvaˬ hteˇ ve cawˇ ve hkʼaw te laˇ ve htaꞈ mawˬ htaˇ, yawˇ htaꞈ haꞈ maˇ la ve yoˬ. Ngaˬ hui yawˇ htaꞈ haꞈ leh hteˇ ve cawˇ ve awˬ liˇ awˬ hkʼaˇ htaꞈ gʼaꞈ te htaˇ, shu htaꞈ haꞈ leh hteˇ ve cawˇ ve hkʼaw te piˇ gaˇ ve yoˬ.

²⁶ Moˉseˍ ve awˬ liˇ tawˇ hkawˇ lehˬ Iˉsaˍreˍlaˆ chaw Yaˬhoˉvaˬ geh meuˆ daꞈ tuˬ ga piˇ ve yoˬ. Yaꞈ hkʼaˇ, Yeˍsuˆ ve a shaꞈ tanˇ laˇ peuˬ hkʼawꞈ nawˉ awˬ liˇ tawˇ hkawˇ chi maˇ kʼawꞈ yehˇ˗o. Awˬ liˇ tawˇ hkawˇ chi aꞈ kehˉ daꞈ ve cawˬ ve yoˬ. (Roˉmaꞈ 10:4) Tcuh yaˇ Pawˇluꞈ kʼoˆ ve, awˬ liˇ tawˇ hkawˇ ‘gaˬ la tuˬ ve daꞈ ve awˬ ceuˬ teˇ hpaˍ ve aˉ gʼuiˬ ha hpehꞈ ve yoˬ.’ (Heˍbrehˇ 10:1) Hkriꞈ yaˇ awˬ moˍ hkʼaw haꞈ pehnˇ ve leh hteˇ ve cawˇ ve cawˬ htaˇ, daꞈ ve awˬ bon hkʼaˬ hkʼe gʼa tuˬ gʼuˇ suhˍ teˇ lawn hkʼaw kʼoˆ maˍ laˇ tuˬ yoˬ.