1. Yaˬhoˉvaˬ ve Shaˉhkiˆhkanˍ ve chaw 3 gʼaˇ yawˇ hui Yaˬhoˉvaˬ ve hpawˇ chehˇ ve tehꞈ hkʼaˬ hkʼe hpeuꞈ maw laˇ ve le?

 Yaˬhoˉvaˬ ve Shaˉhkiˆhkanˍ ve chaw 3 gʼaˇ gʼa hpuˇ ve awˬ lawn htaꞈ dawˇ nyi sheˍ. (1) Yaˇ miˇ ehˉ teˇ gʼaˇ jehˇ ve awˬ nyi te tuˬ liꞈ maˍ paˍ saˍ laꞈ kʼoˆ piˇ ve yoˬ. Jehˇ ve awˬ nyi te tuˬ Gʼuiˬ sha maˇ dawˇ cawˇ ve tehꞈ yawˇ shiˍ ve yoˬ. Chi htaꞈ pa taw, jehˇ ve awˬ nyi chi htaꞈ maˇ te tuˬ yawˇ yawˆ yan ve hkʼaw kʼoˆ piˇ ve yoˬ. (2) Hawˉ hkʼaˆ yaˇ nehˬ teˇ gʼaˇ yaꞈ tawˍ puiˉ jaˇ ve teˇ yehˬ peuˬ teˇ yehˬ hto toˇ chehˇ ve yoˬ. Yawˇ liꞈ henˇ kuiˬ lo ve awˬ chawˇ teˇ gʼaˇ awˬ nu ve teˇ yehˬ lo chehˇ ve tehꞈ yawˇ shiˍ ve yoˬ. Awˬ chawˇ chi ve teˇ gʼaˇ Yaˬhoˉvaˬ ve chaw htaꞈ kʼoˆ guiˇ gʼuiˬ guiˇ jaw ve yoˬ. Yaꞈ hkʼaˇ, yawˇ oˇ ve teˇ yehˬ lo kʼai leh yehˬ miˉ htawˆ ve yoˬ. (3) Yehˬ shehˍ hpaˇ teˇ gʼaˇ yehˬ kʼa hkʼaw gʼa caˇ tuˬ yawˇ kanˉ te hkeuꞈ jaˇ ve yoˬ. Teˇ nyi htaˇ awˬ hoˉ yawˇ htaꞈ maˇ hteˇ maˇ cawˇ ve te yaꞈ tuˬ te tcuh gaˇ ve yoˬ. Yawˇ maˇ te ve kʼo gʼaꞈ tawˆ laˇ ve htawˇ, “Gʼuiˬ sha ngaˬ htaꞈ hteˇ ve cawˇ ve te leh awˬ liˇ htaꞈ na yuˬ tcuh gaˇ ve pa taw, ngaˬ chi hkʼe te maˇ hpehꞈ” tehꞈ awˬ hoˉ htaꞈ kʼoˆ piˇ ve yoˬ.—Roˉmaꞈ 13:1-4; Heˍbrehˇ 13:18.

2. Ngaˬ hui aˬ htoꞈ ma ve na hkawˇ htaꞈ jehˬ daꞈ tuˬ le? Aˬ htoꞈ ma pa taw le?

² Chaw chi 3 gʼaˇ ve te hkʼaˇ dawˇ hkʼaˇ htaꞈ nawˬ aˬ htoꞈ ma mawˬ ve le? Haꞈ hanˉ ve hteˇ ve cawˇ ve leh awˬ nu ve te hkʼaˇ dawˇ hkʼaˇ htaꞈ kaꞈ nawˬ mawˬ ve yoˬ hehˉ. Yaꞈ hkʼaˇ, te hkʼaˇ dawˇ hkʼaˇ awˬ hpfuhˇ hkʼaˆ jaˇ ve teˇ ceuˬ lehˬ ka tiꞈ yeˬ ve yoˬ. Yawˇ hui teˇ gʼaˇ leh teˇ gʼaˇ Yaˬhoˉvaˬ htaꞈ ka tiꞈ yeˬ ve yoˬ. Yawˇ hui Gʼuiˬ sha ve awˬ liˇ awˬ hkʼaˇ htaꞈ te yaꞈ tuˬ maˇ te. Ka tiꞈ yeˬ ve chi yawˇ hui chi hkʼe te tuˬ ga piˇ ve yoˬ. A shu teˇ gʼaˇ te hkʼaˇ dawˇ hkʼaˇ chi hkʼe ve cawˬ ve kʼo, Yaˬhoˉvaˬ yawˇ htaꞈ nyi hkʼaˇ suh jaˇ. Ngaˬ hui kaꞈ mvuhˇ naw ma hkʼoˆ ve Awˬ pa nyi hkʼaˇ suh tuˬ te piˇ gaˇ ve yoˬ. Chi htaꞈ pa taw, na hkawˇ chi ve teˇ hpaˍ teˇ geh jehˬ daꞈ sheˍ. Ka tiꞈ yeˬ ve aˬ htoꞈ ma le? Aˬ htoꞈ ma te ngaˬ hui ka tiꞈ yeˬ cawˇ ve le? Haˍ jaˇ ve awˬ yanˇ chi ve hkʼaw ngaˬ hui hkʼaˬ hkʼe te caˉ leh ka tiꞈ yeˬ gʼa tuˬ le?

3. (a) Ngaˬ hui awˬ pon ka tiꞈ yeˬ ve aˬ htoꞈ ma htaꞈ kʼoˆ gaˇ ve le? (b) Biˇ ve daꞈ ve ngaˬ hui awˬ pon a yeˇ uiˍ ve laˇ? Tawˇ pa haˉ kʼoˆ maˍ laˇ sheˍ.

³ Yaˬhoˉvaˬ ve kanˉ te ve chaw awˬ pon ka tiꞈ yeˬ ve tcuhˉ kuiˬ lehˬ yawˇ htaꞈ nyi ma awˬ tawˬ hkʼa gaˬ haꞈ ve, leh yawˇ awˬ pon teˇ ceuˬ le le te gaˇ ve nyi ma htaꞈ te luˬ laˇ maˇ gʼa ve kʼoˆ gaˇ ve yoˬ. Ngaˬ hui maˇ gʼa dawˇ cheˆ sheˍ htaˇ Yaˬhoˉvaˬ ve a loˍ htaꞈ awˉ lawˉ dawˇ nyi cawˇ ve yoˬ. Liꞈ hpu hkʼaw ka tiꞈ yeˬ ve kʼoˆ ve lehˬ biˇ ve, daꞈ ve gʼa hpehꞈ cawˇ ve yoˬ. Tawˇ pa haˉ te kʼo, Iˉsaˍreˍlaˆ chaw to nuˇ to shaˆ yuˬ leh Yaˬhoˉvaˬ htaꞈ tuˉ tanˇ la htaˇ, awˬ liˇ tawˇ hkawˇ hkʼaw kʼoˆ ve, to nuˇ to shaˆ oˇ ve biˇ ve, daꞈ ve, gʼa hpehꞈ piˇ ve yoˬ. (Oˉ kʼoˍ pui ve 22:21, 22) Gʼuiˬ sha ve chaw yawˇ htaꞈ tuˉ tanˇ piˇ htaˇ hkui luˬ ve, naˬ paw pawˇ ve leh mehˆ teˇ paˉ ceh cawˬ ve, maˇ heˆ leh buiˇ tcuhˉ ve to nuˇ to shaˆ maˇ gʼa hpehꞈ piˇ. Yaˬhoˉvaˬ awˬ pon kʼo to nuˇ to shaˆ oˇ ve biˇ ve, daꞈ ve, gʼa hpehꞈ cawˇ ve yoˬ. (Maˍlaˍhkiˆ 1:6-9) Aˬ htoꞈ ma te Yaˬhoˉvaˬ awˬ pon biˇ ve a yeˇ uiˍ jaˇ ve tehꞈ ngaˬ hui na gʼa ve yoˬ. Iˉ shiˍ, liꞈ kʼoˆ maˇ heˆ leh awˬ hkʼeun teˇ hpaˍ ngaˬ hui vuiˬ htaˇ biˇ ve htaꞈ heuˆ gaˇ ve yoˬ. Awˬ ceuˬ oˇ ve biˇ ve, daꞈ ve, cawˬ tcuh gaˇ ve yoˬ. Ngaˬ hui Yaˬhoˉvaˬ htaꞈ haꞈ ve ka tiꞈ yeˬ ve chi yawˇ kaꞈ ngaˬ hui hkʼa shuˍ biˇ ve, daꞈ ve, heuˆ gaˇ ve yoˬ. Teˇ ceuˬ le le biˇ ve, daꞈ ve, gʼa hpehꞈ cawˇ ve yoˬ.

4. (a) Ngaˬ hui maˇ biˇ ve chaw hpehꞈ ve htawˇ, aˬ htoꞈ ma te ka tiꞈ yeˬ gʼa sheˍ ve le? (b) Chiˇ mvuh ve liꞈ 103:12-14 hkʼaw kʼoˆ taˍ ve hkʼe, Yaˬhoˉvaˬ ngaˬ hui geh aˬ htoꞈ ma dawˇ law ve le?

⁴ Ngaˬ hui ka tiꞈ yeˬ gʼa tuˬ biˇ ve chaw gʼa hpehꞈ ve laˇ? Awˬ tehˬ kʼo, ngaˬ hui maˇ biˇ leh laiˉ ceuˬ te yaꞈ la ve tehꞈ dawˇ ve yoˬ hehˉ. Yaꞈ hkʼaˇ, aˬ htoꞈ ma te ngaˬ hui maˇ kawˆ cawˇ ve chi ve nyiˇ ceuˬ htaꞈ dawˇ nyi sheˍ. Awˉ lawˉ teˇ ceuˬ, Yaˬhoˉvaˬ ngaˬ hui maˇ daꞈ ve awˬ ceuˬ htaꞈ yawˇ maˇ nyi. Liꞈ hpu hkʼaw kʼoˆ ve, “[Yaˬhoˉvaˬ] ngaˬ hui te yaꞈ ve venˇ baˆ teˇ hpaˍ htaꞈ bvuhꞈ tawnˇ taˍ ve hkʼe kʼo, a shu teˇ gʼaˇ ciˍ yanˍ ve htaꞈ gʼa ponˬ tuˬ le?” (Chiˇ mvuh ve 130:3) Ngaˬ hui maˇ biˇ leh venˇ baˆ yaˇ hpehꞈ ve htaꞈ yawˇ shiˍ leh hkʼaˬ htaˆ kaꞈ venˇ baˆ hpehˇ laˇ ve yoˬ. (Chiˇ mvuh ve 86:5) Nyiˇ ceuˬ teˇ ceuˬ ngaˬ hui te gʼa ve te maˇ gʼa ve awˬ ceuˬ Yaˬhoˉvaˬ shiˍ leh te maˇ gʼa ve awˬ leuˉ yawˇ maˇ dawˇ law. (Chiˇ mvuh ve 103:12-14 gʼaw sheˍ.) Hkʼe kʼo yawˇ mehˆ gʼuˇ suhˍ ngaˬ hui biˇ ve,daꞈ ve, chaw hpehꞈ tuˬ hkʼaˬ hkʼe te gʼa tuˬ le?

5. Yaˬhoˉvaˬ ve chaw haꞈ ve cawˬ kʼo hkʼaˬ hkʼe te ka tiꞈ yeˬ gʼa tuˬ le?

⁵ Yaˬhoˉvaˬ ve chaw haꞈ ve cawˬ kʼo ka tiꞈ yeˬ gʼa ve yoˬ. Ngaˬ hui Gʼuiˬ sha htaꞈ haꞈ leh mvuhˇ naw ma hkʼoˆ ve Awˬ pa htaꞈ ka tiꞈ yeˬ ve biˇ ve, daꞈ ve, gʼa hpehꞈ cawˇ ve yoˬ. Ngaˬ hui beˬ ve lawˇ ve gʼa hpuˇ htaˇ haꞈ ve chi biˇ ve, daꞈ ve, cawˬ ve kʼo ka tiꞈ yeˬ ve tehꞈ hpeuꞈ maw piˇ gʼa ve yoˬ. (1 Raˍsaˍvanˍ 28:9; Maꞈhtehˍ 22:37) 3 gʼaˇ ve awˬ lawn htaꞈ kʼawꞈ dawˇ nyi sheˍ. Aˬ htoꞈ ma te yawˇ hui oˇ hkʼe te ve le? Yaˇ miˇ ehˉ oˇ ve liꞈ henˇ yehˬ lo ha lehˬ ve maˇ cawˬ gaˇ ve laˇ? Hawˉ hkʼaˆ yaˇ nehˬ oˇ ve teˇ gʼaˇ yehˬ miˉ paˇ lo yaꞈ taw ve cawˬ gaˇ ve laˇ? Yehˬ shehˍ hpaˇ oˇ ve kanˉ te kuiˬ lo tawˆ˗e gaˇ ve laˇ? Oˇ hkʼe maˇ heˆ taˬ. Yawˇ hui Yaˬhoˉvaˬ ve awˬ liˇ awˬ hkʼaˇ hteˇ ve cawˇ ve htaꞈ shiˍ leh mvuhˇ naw ma hkʼoˆ ve Awˬ pa nyi hkʼaˇ suh tuˬ coˇ caˇ leh te piˇ gaˇ ve pa taw yoˬ. Yawˇ hui maˇ dawˇ cheˆ sheˍ htaˇ yawˇ htaꞈ awˉ lawˉ dawˇ nyi ve yoˬ. Yawˇ hui ka tiꞈ yeˬ ve kʼoˆ ve ceh maˇ heˆ. Awˬ tehˬ gʼaꞈ te ve yoˬ.

6. (a) Aˬ htoꞈ ma te nawˬ ka tiꞈ gʼa yeˬ cawˇ ve le? (b) Aˍdanˍ leh Eˇvaꞈ ka tiꞈ maˇ yeˬ ve tehꞈ aˬ htoꞈ ma hpeuꞈ maw laˇ ve le?

⁶ Aˬ htoꞈ ma te ka tiꞈ yeˬ ve ngaˬ hui awˬ pon a yeˇ uiˍ jaˇ ve le? Saˍtanˍ Yaˬhoˉvaˬ htaꞈ tawˍ daꞈ leh  nawˬ htaꞈ kaꞈ tawˍ daꞈ ve pa taw, nawˬ ka tiꞈ gʼa yeˬ ve yoˬ. Eˍdenˍ hko hkʼaw tanˬ leh mvuhˇ naw ma tcuh yaˇ chi teˇ gʼaˇ Saˍtanˍ leh “tawˍ daꞈ paˍ” hpehꞈ la ve yoˬ. Yawˇ Yaˬhoˉvaˬ ve awˬ meh luˬ tuˬ te ve yoˬ. Gʼuiˬ sha maˇ daꞈ ve uˉ peunˍ shehˍ hpaˇ hpehꞈ ve, a shu yawˇ awˬ pon tiˉ dawˇ nyi ve, leh ka tiꞈ maˇ yeˬ ve tehꞈ Saˍtanˍ she pfuhˍ piˇ ve yoˬ. Aˍdanˍ leh Eˇvaꞈ Saˍtanˍ hpawˇ chehˇ leh Yaˬhoˉvaˬ htaꞈ tawˍ daꞈ ve pa taw, sheˉ lai jaˇ. (Awˬ hkuiˉ puiˍ 3:1-6) Yawˇ hui Yaˬhoˉvaˬ geh meuˆ daꞈ tuˬ awˬ hkʼaˇ cawˬ ve yoˬ. Yaꞈ hkʼaˇ, Saˍtanˍ Yaˬhoˉvaˬ htaꞈ tawˍ daꞈ htaˇ yawˇ hui haꞈ ve biˇ ve, daꞈ ve, maˇ heˆ. Na hkawˇ teˇ maˬ kʼawꞈ cawˬ ve yoˬ. Yaˬhoˉvaˬ htaꞈ haꞈ ve pa taw, ka tiꞈ yeˬ ve chaw teˇ gʼaˇ gʼaˇ cawˬ˗aw laˇ? Na hkawˇ chi ve Yawˇbaˆ awˬ pon a yeˇ uiˍ jaˇ.

7. Yawˇbaˆ liꞈ 1:8-11 hkʼaw kʼoˆ taˍ ve hkʼe, Yaˬhoˉvaˬ leh Saˍtanˍ Yawˇbaˆ yonˍ ve htaꞈ hkʼaˬ hkʼe dawˇ ve le?

⁷ Iˉsaˍreˍlaˆ chaw Eˇjiˇtuꞈ mvuhˇ miˬ hkʼaw chehˇ htaˇ, Yawˇbaˆ maˇ suh sheˍ. Yawˇ ka tiꞈ yeˬ ve awˬ nu ve chaw htaꞈ peun daꞈ jaˇ. Yawˇ kaꞈ ngaˬ hui hkʼa shuˍ maˇ biˇ ve chaw hpehꞈ leh laiˉ pawˆ te yaꞈ ve yoˬ. Yaꞈ hkʼaˇ, Yawˇbaˆ ka tiꞈ yeˬ ve pa taw, Yaˬhoˉvaˬ haꞈ ve yoˬ. Oˇ ve teˇ yanˇ chaw yaˇ Yaˬhoˉvaˬ htaꞈ ka tiꞈ yeˬ ve Saˍtanˍ tawˍ daꞈ jaw˗oˬ ve yoˬ hehˉ. Chi htaꞈ pa taw, Yaˬhoˉvaˬ Saˍtanˍ htaꞈ kuˬ leh Yawˇbaˆ htaꞈ ca nyi tcuh ve yoˬ. Yawˇbaˆ ve a shaꞈ teꞈ hkʼaˇ Saˍtanˍ heˍ ve tehꞈ hpeuꞈ maw laˇ ve yoˬ! Saˍtanˍ Yawˇbaˆ htaꞈ lawˇ nyi tuˬ Yaˬhoˉvaˬ geh a hkaw˗anˬ lawˬ ve yoˬ. Yaˬhoˉvaˬ yawˇ ve awˬ chawˇ Yawˇbaˆ htaꞈ yonˍ gʼa jaˇ leh Saˍtanˍ yawˇ htaꞈ lawˇ nyi tuˬ a hkaw˗anˬ piˇ ve yoˬ.—Yawˇbaˆ 1:8-11 gʼaw sheˍ.

8. Saˍtanˍ Yawˇbaˆ htaꞈ hkʼaˬ hkʼe te luˬ piˇ ve le?

⁸ Saˍtanˍ haiˬ jaˇ leh tiˇ pehˍ shehˍ hpaˇ hpehꞈ ve yoˬ. Saˍtanˍ Yawˇbaˆ cawˬ taˍ ve htaꞈ te luˬ piˇ ve yoˬ. Paw sha ve, awˬ ceˬ, yawˇ ve awˬ meh bvuhˬ ve  Saˍtanˍ te luˬ piˇ ve yoˬ. Yawˇbaˆ ve yaˇ 10 gʼaˇ kaꞈ suh˗e tcuh ve yoˬ. Yawˇbaˆ ve awˬ to maˇ chehˇ sha tuˬ te piˇ leh yawˇ ve oˉ kʼoˍ te leh hkui sheh hkʼa gaˬ shaˉ chuˇ tawˆ tcuh ve yoˬ. Yawˇ ve awˬ miˇ ma nyi ma luˬ jaˇ leh Yawˇbaˆ Gʼuiˬ sha htaꞈ hkeu taˉ leh suh˗e tuˬ nyiˉ piˇ ve yoˬ. Yawˇbaˆ kaꞈ suh˗e gaˇ ve yoˬ. Yaꞈ hkʼaˇ, yawˇ ka tiꞈ yeˬ sheˍ ve yoˬ. Peuˬ hkʼawꞈ nawˉ, Saˍtanˍ awˬ nu ve awˬ hkʼaˇ kʼawꞈ yehˇ leh yawˇ htaꞈ te luˬ piˇ ve yoˬ. Yawˇbaˆ ve awˬ chawˇ 3 gʼaˇ htaꞈ cuˇ ve yoˬ. Yawˇ hui laiˉ pawˆ ca guiˇ la ve yoˬ. Yaꞈ hkʼaˇ, yawˇ hui Yawˇbaˆ htaꞈ awˬ gʼaˇ maˇ piˇ. Hkʼe te leh yawˇ hui Yawˇbaˆ htaꞈ diˇ leh kʼoˆ guiˇ piˇ ve yoˬ. Yawˇbaˆ ve awˬ lawn hkʼa peu˗eˬ Gʼuiˬ sha htaꞈ she pfuhˍ leh, yawˇ ka tiꞈ yeˬ ve htaꞈ Gʼuiˬ sha a yeˇ maˇ yuˬ ve tehꞈ yawˇ hui kʼoˆ piˇ ve yoˬ. Yawˇ hui kʼawꞈ kʼoˆ ve Yawˇbaˆ haiˬ jaˇ leh maˇ daꞈ ve awˬ ceuˬ gʼa hpuˇ ve chi keunˍ jaˇ!—Yawˇbaˆ 1:13-22; 2:7-11; 15:4, 5; 22:3-6; 25:4-6.

9. Yawˇbaˆ beˬ ve lawˇ ve laiˉ ceuˬ gʼa hpuˇ ve htawˇ yawˇ aˬ htoꞈ ma htaꞈ maˇ chiˇ baˬ ve le?

⁹ Yawˇbaˆ gʼa hpuˇ ve awˬ ceuˬ hkʼa peu˗eˬ htaꞈ hkʼaˬ hkʼe te haꞈ yuˬ gʼa ve le? Yawˇ biˇ ve chaw maˇ hpehꞈ. Yawˇ kaꞈ nyi ma zuhˆ leh awˬ chawˇ htaꞈ maˇ daꞈ ve kʼoˆ piˇ ve yoˬ. Gʼuiˬ sha ve hteˇ ve cawˇ ve aꞈ kehˉ yawˇ ve hteˇ ve cawˇ ve htaꞈ haꞈ shaˉ ve yoˬ. (Yawˇbaˆ 6:3; 13:4, 5; 32:2; 34:5) Yaꞈ hkʼaˇ, yawˇ haˍ jaˇ ve gʼa hpuˇ ve htawˇ, Yaˬhoˉvaˬ htaꞈ maˇ chiˇ baˬ. Maˇ daꞈ ve awˬ chawˇ hkawˇ yawˇ maˇ na. Yawˇ kʼoˆ ve, “nawˬ hui lehˬ, cawˇ ve yoˬ tehꞈ ngaˬ teˇ pawˆ kaꞈ kʼoˆ tuˬ ve maˇ heˆ. Ngaˬ suh htaˇ hkʼa gaˬ Gʼuiˬ sha htaꞈ ka tiꞈ yeˬ tuˬ yoˬ!” (Yawˇbaˆ 27:5, MGS) Yawˇ ve tawˇ a yeˇ uiˍ jaˇ. Yawˇbaˆ kʼoˆ ve hkʼe te gʼa ve yoˬ. Ngaˬ hui kaꞈ te gʼa ve yoˬ.

10. Saˍtanˍ Yawˇbaˆ htaꞈ lawˇ nyi piˇ ve chi ngaˬ hui htaꞈ hkʼaˬ hkʼe caˉ daꞈ ve le?

¹⁰ Saˍtanˍ Yawˇbaˆ htaꞈ lawˇ nyi piˇ ve hkʼe ngaˬ hui htaꞈ kaꞈ lawˇ nyi laˇ ve yoˬ. Awˬ lawn chi nawˬ htaꞈ hkʼaˬ hkʼe caˉ daꞈ ve le? Saˍtanˍ kʼoˆ ve, nawˬ Yaˬhoˉvaˬ htaꞈ awˬ tehˬ haꞈ ve maˇ heˆ. Nawˬ ve a shaꞈ gʼa ponˬ tuˬ ceh yawˇ ve kanˉ te ve yoˬ. Nawˬ ka tiꞈ yeˬ ve awˬ tehˬ maˇ heˆ! (Yawˇbaˆ 2:4, 5; Hpeuꞈ maˍ ve 12:10) Nawˬ hkʼaˬ hkʼe dawˇ ve le? Nyi ma luˬ ve maˇ heˆ laˇ? Yaꞈ hkʼaˇ, chi ve htaꞈ dawˇ nyi sheˍ. Yaˬhoˉvaˬ nawˬ htaꞈ yonˍ gʼa leh daꞈ jaˇ ve kanˉ te tcuh laˇ ve yoˬ. Nawˬ htaꞈ lawˇ nyi tuˬ Yaˬhoˉvaˬ Saˍtanˍ htaꞈ a hkaw˗anˬ piˇ ve yoˬ. Nawˬ ka tiꞈ yeˬ gʼa tuˬ tehꞈ Yaˬhoˉvaˬ yonˍ leh Saˍtanˍ heˍ ve tehꞈ nawˬ hpeuꞈ maw piˇ gʼa tuˬ ga piˇ gʼa ve yoˬ. Nawˬ chi hkʼe te gʼa tuˬ yawˇ ka tiꞈ te taˍ laˇ ve yoˬ. (Heˍbrehˇ 13:6) Mvuhˇ naw ma miˬ naˆ ma hkʼoˆ uiˍ jaˇ mvuh jaˇ ve ngaˬ hui htaꞈ yonˍ gʼa ve yoˬ. Chi lehˬ daꞈ jaˇ ve awˬ vuiˬ hpehꞈ ve maˇ heˆ laˇ! Ka tiꞈ yeˬ ve a yeˇ uiˍ jaˇ ve tehꞈ nawˬ mawˬ ve maˇ heˆ laˇ? Chi Saˍtanˍ heˍ ve htaꞈ hkʼawꞈ piˇ ve, ngaˬ hui ve Awˬ pa awˬ meh bvuhˬ tuˬ ga piˇ ve, leh yawˇ uˉ peunˍ ve hpawˇ chehˇ ve yoˬ. Ngaˬ hui hkʼaˬ hkʼe te leh te hkʼaˇ dawˇ hkʼaˇ daꞈ ve chi cawˬ gʼa tuˬ le?

11. Yawˇbaˆ ve awˬ lawn htaꞈ ngaˬ hui aˬ htoꞈ ma gʼa henˇ ve le?

¹¹ “Awˬ leh meuˇ ve” awˬ yanˇ hkʼaw Saˍtanˍ ngaˬ hui htaꞈ gʼaˇ hteꞈ fawˉ mehˍ laˇ ve yoˬ. (2 Tiˆmoˉseˍ 3:1) Awˬ yanˇ chi hkʼe ve hkʼaw ngaˬ hui ka tiꞈ yeˬ gʼa tuˬ aˬ htoꞈ ma te gʼa ve le? Yawˇbaˆ ve awˬ lawn htaꞈ ngaˬ hui laiˉ ceuˬ gʼa henˇ ve yoˬ. Yawˇbaˆ beˬ ve lawˇ ve maˇ gʼa hpuˇ sheˍ htaˇ, yawˇ awˬ yanˇ maw chaweh ka tiꞈ yeˬ ve yoˬ. Ngaˬ hui a shu yawˇ awˬ to htaꞈ awˬ gʼaˇ piˇ leh ka tiꞈ yeˬ gʼa tuˬ Yawˇbaˆ ve awˬ lawn 3 lawn htaꞈ teˇ geh henˇ tuˬ yoˬ.

12. (a) Yawˇbaˆ liꞈ 26:7, 8, 14 hkʼaw kʼoˆ taˍ ve hkʼe, Yawˇbaˆ Yaˬhoˉvaˬ htaꞈ hkʼaˬ hkʼe yawˆ yan ve le? (b) Ngaˬ hui Yaˬhoˉvaˬ htaꞈ hkʼaˬ hkʼe yawˆ yan gʼa tuˬ le?

¹² Yawˇbaˆ Yaˬhoˉvaˬ htaꞈ haꞈ ve maˇ la tuˬ  yawˇ htaꞈ yawˆ yan ve yoˬ. Yawˇbaˆ Yaˬhoˉvaˬ hpanˍ taˍ ve awˬ ceuˬ teˇ hpaˍ htaꞈ dawˇ nyi ve yoˬ. (Yawˇbaˆ 26:7, 8, 14 gʼaw sheˍ.) Miˬ guiˬ, mvuhˇ naw ma, moˬ, leh mvuhˇ tiˉ po˗eꞈ htaꞈ yawˇ dawˇ nyi htaˇ dawˇ cawˇ jaˇ. Yaꞈ hkʼaˇ, yawˇ Yaˬhoˉvaˬ hpanˍ taˍ ve awˬ ceuˬ htaꞈ a ciˉ ceh tiˉ cawˬ ve tehꞈ shiˍ ve yoˬ. Yawˇ Yaˬhoˉvaˬ kʼoˆ ve htaꞈ kaꞈ dawˇ cawˇ ve yoˬ. Gʼuiˬ sha ve tawˇ hkawˇ awˬ hpfuhˇ hkʼaˆ jaˇ tehꞈ yawˇ shawˍ ve yoˬ. (Yawˇbaˆ 23:12) Yawˇbaˆ Yaˬhoˉvaˬ htaꞈ yawˆ yan ve yoˬ. Yawˇbaˆ yawˇ ve Awˬ pa htaꞈ haꞈ leh nyi hkʼaˇ suh tuˬ te piˇ gaˇ ve yoˬ. Yawˇ ka tiꞈ yeˬ gʼa tuˬ gʼaˇ hteꞈ coˇ caˇ ve yoˬ. Ngaˬ hui kaꞈ gʼa te ve yoˬ. Yawˇbaˆ ve awˬ co˗e htaˇ ve chaw aꞈ kehˉ ngaˬ hui Gʼuiˬ sha hpanˍ taˍ ve htaꞈ shiˍ ve yoˬ. Awˬ tehˬ awˬ na Yaˬhoˉvaˬ hkʼaˬ hkʼe hpehꞈ ve Liꞈ hpu htaꞈ dawˇ pawnˍ piˇ leh bvuhꞈ taˍ ve ngaˬ hui htaꞈ ga laˇ ve yoˬ. Ngaˬ hui gʼa henˇ ve awˬ ceuˬ Yaˬhoˉvaˬ htaꞈ haꞈ gaˇ tuˬ te laˇ ve yoˬ. Ngaˬ hui Yaˬhoˉvaˬ htaꞈ haꞈ leh yawˆ yan ve kʼo, yawˇ ve hkawˇ na yuˬ gaˇ ve yoˬ. Chi hkʼe te htaˇ ngaˬ hui ka tiꞈ yeˬ gʼa tuˬ yoˬ.—Yawˇbaˆ 28:28.

13, 14. (a) Yawˇbaˆ liꞈ 31:1 hkʼaw kʼoˆ taˍ ve hkʼe, Yawˇbaˆ na yuˬ ve tehꞈ hkʼaˬ hkʼe hpeuꞈ maw laˇ ve le? (b) Ngaˬ hui yawˇ htaꞈ hkʼaˬ hkʼe te henˇ yuˬ gʼa tuˬ le?

¹³ Yawˇbaˆ awˬ gʼaˇ gʼa leh ka tiꞈ yeˬ gʼa tuˬ yawˇ na yuˬ ve yoˬ. Yawˇbaˆ shiˍ ve ka tiꞈ yeˬ gaˇ ve kʼo, gʼa na yuˬ ve yoˬ. Awˬ tehˬ kʼo, ngaˬ hui na yuˬ ve teˇ pawˆ le le ka tiꞈ yeˬ gʼa ve yoˬ. Yawˇbaˆ a shaꞈ teꞈ ve hkʼaw Gʼuiˬ sha hkawˇ na yuˬ tuˬ coˇ caˇ jaˇ. Tawˇ pa haˉ te kʼo, Yawˇbaˆ yaˇ miˇ htaꞈ nyi leh pehꞈ ve tzuhˆ ve maˇ gʼa te tuˬ shaˍ tiꞈ te ve yoˬ. (Yawˇbaˆ 31:1 gʼaw sheˍ.) Heuˆ daꞈ˗oˬ ve chaw a shu yawˇ ve awˬ miˇ ma maˇ heˆ kʼo, awˬ nu ve yaˇ miˇ htaꞈ a yeˇ maˇ yuˬ cawˇ. Chi beuꞈ teˇ co˗e ngaˬ hui pehꞈ ve tzuhˆ ve hpawˇ te gaˇ tuˬ te laˇ ve yoˬ. Yawˇbaˆ hkʼa shuˍ ngaˬ hui ve awˬ ca maˇ heˆ ve htaꞈ maˇ nyi tuˬ tawˍ baˬ˗aw laˇ? Ngaˬ hui awˬ kʼu nyi ve awˬ han teˇ ceuˬ le le htaꞈ maˇ nyi tuˬ tawˍ baˬ˗aw laˇ? (Maꞈhtehˍ 5:28) Ngaˬ hui teˇ nyi le le a shu yawˇ awˬ to htaꞈ yuˬ tiˍ ve kʼo, awˬ gʼaˇ gʼa leh ka tiꞈ yeˬ gʼa ve yoˬ.

¹⁴ Hpu shi mawˇ jeˬ hpawˇ kaꞈ Yawˇbaˆ Yaˬhoˉvaˬ  hkawˇ na yuˬ ve yoˬ. Yawˇbaˆ hpu shi mawˇ jeˬ htaꞈ gʼaˇ va ve kʼo, haiˬ jaˇ ve htaꞈ te la leh suhˉ jehˬ laˇ tuˬ kaꞈ yawˇ shiˍ ve yoˬ. (Yawˇbaˆ 31:24, 25, 28) Chi beuꞈ teˇ co˗e miˬ guiˬ yaˇ hpu shi mawˇ jeˬ maˇ maˇ cawˬ tcuh gaˇ ve yoˬ. Ngaˬ hui Liꞈ hpu hkʼaw kʼoˆ taˍ ve htaꞈ na yuˬ leh hpu shi mawˇ jeˬ hpawˇ cawˇ ve dawˇ hkʼaˇ cawˬ ve kʼo, ngaˬ hui a shu yawˇ awˬ to htaꞈ awˬ gʼaˇ piˇ leh ka tiꞈ yeˬ gʼa tuˬ coˇ caˇ ve yoˬ.—Tawˇ naˉ ve 30:8, 9; Maꞈhtehˍ 6:19-21.

15. (a) Yawˇbaˆ ka tiꞈ yeˬ gʼa tuˬ aˬ htoꞈ ma ve dawˇ law kuiˬ ga piˇ ve le? (b) Aˬ htoꞈ ma te Yaˬhoˉvaˬ ngaˬ hui htaꞈ laꞈ shawnˍ peꞈ laˇ tuˬ ve htaꞈ hkʼaˬ htaˆ kaꞈ dawˇ nyi ve chi ga laˇ gʼa ve le?

¹⁵ Yawˇbaˆ ka tiꞈ yeˬ gʼa tuˬ Gʼuiˬ sha yawˇ htaꞈ awˬ gʼuˇ suhˍ hpawˇ laꞈ shawnˍ peꞈ laˇ tuˬ ve htaꞈ dawˇ nyi taˍ ve yoˬ. Yawˇbaˆ ka tiꞈ yeˬ ve htaꞈ Yaˬhoˉvaˬ a yeˇ yuˬ ve tehꞈ yawˇ yonˍ ve yoˬ. (Yawˇbaˆ 31:6) Yawˇbaˆ tuꞈ ve hkanˍ ve laiˉ ceuˬ gʼa hpuˇ ve htawˇ, awˬ leh meuˇ htaˇ Yaˬhoˉvaˬ yawˇ htaꞈ laꞈ shawnˍ peꞈ laˇ tuˬ yoˬ tehꞈ yawˇ yonˍ ve yoˬ. Chi yawˇ ka tiꞈ yeˬ gʼa tuˬ ga piˇ ve yoˬ. Yawˇbaˆ ka tiꞈ yeˬ ve htaꞈ Yaˬhoˉvaˬ nyi hkʼaˇ suh jaˇ leh yawˇ maˇ biˇ ve chaw hpehꞈ sheˍ ve kaꞈ Yaˬhoˉvaˬ awˬ bon maˇ maˇ naꞈ piˇ ve yoˬ! (Yawˇbaˆ 42:12-17; Yaˍkoˆ 5:11) Daꞈ jaˇ ve laꞈ shawnˍ kaꞈ Yawˇbaˆ htaꞈ law taˍ ve yoˬ. Nawˬ ka tiꞈ yeˬ ve htaꞈ Yaˬhoˉvaˬ laꞈ shawnˍ peꞈ laˇ tuˬ yoˬ tehꞈ dawˇ law˗aw laˇ? Ngaˬ hui ve Gʼuiˬ sha maˇ pa jaw. (Maˍlaˍhkiˆ 3:6) Ngaˬ hui ka tiꞈ yeˬ ve htaꞈ Gʼuiˬ sha awˬ hpfuhˇ shiˍ ve kʼo, awˬ gʼuˇ suhˍ hpawˇ ve dawˇ law kuiˬ ngaˬ hui ve nyi ma hkʼaw hkʼa tawˍ lehˆ cawˬ ve tawnˇ gʼa ve yoˬ.—1 Hteˇsaˍlawˇniˆ 5:8, 9.

16. Ngaˬ hui aˬ htoꞈ ma te tuˬ dawˇ teh taˍ ve le?

¹⁶ Nawˬ caˉ leh ka tiꞈ yeˬ tuˬ dawˇ teh taˍ sheˍ. Teˇ pawˆ pawˆ kʼo, nawˬ teˇ gʼaˇ tiˉ chehˇ ve tehꞈ dawˇ ve yoˬ. Yaꞈ hkʼaˇ, nawˬ teˇ gʼaˇ tiˉ chehˇ ve maˇ heˆ. Miˬ guiˬ chi hkʼoˆ lo laiˉ lanˬ gʼaˇ ka tiꞈ yeˬ ve hkʼaw nawˬ chehˇ taˍ ve yoˬ. Oˇ htaˇ teˇ co˗e hawˉ hkʼaˆ yaˇ miˇ yawˇ hui suh ve htaꞈ gʼa hpuˇ ve htawˇ, ka tiꞈ yeˬ gʼa ve hkʼaw nawˬ kaꞈ teˇ gʼaˇ hpehꞈ ve yoˬ. (Heˍbrehˇ 11:36-38; 12:1) Ngaˬ hui Yawˇbaˆ ve tawˇ htaꞈ gʼaꞈ te tuˬ coˇ caˇ sheˍ. Yawˇ kʼoˆ ve, “ngaˬ suh htaˇ hkʼa gaˬ Gʼuiˬ sha htaꞈ ka tiꞈ yeˬ tuˬ yoˬ!” Ngaˬ hui ka tiꞈ yeˬ leh Yaˬhoˉvaˬ awˬ meꞈ awˬ hponˇ gʼa tuˬ te piˇ ve yoˬ.