Yuˇdaꞈ chaw ve hpawnˬ daꞈ kuiˬ hkʼaˬ hkʼe ve le?

Yuˇdaꞈ chaw ve hpawnˬ daꞈ kuiˬ oˇ htaˇ teˇ co˗e kaꞈ cawˬ ve yoˬ. Yuˇdaꞈ chaw maˍ leh oˉ kʼoˍ pui tuˬ, oˇ kaˬ lo hpawnˬ daꞈ ve yoˬ. Heˍbrehˇ ve Liꞈ hpu awˬ tawn hkʼaw hpawnˬ daꞈ kuiˬ chi htaꞈ maˇ kʼoˆ jaw. Yaꞈ hkʼaˇ, Heˍlaˍsaˆ ve Liꞈ hpu awˬ tawn hkʼaw kʼoˆ taˍ ve hkʼe, awˉ lawˉ peuˇ ve Hkriꞈ yaˇ awˬ co˗e htaˇ chi hkʼe ve cawˬ maˇ ve yoˬ.

Liꞈ hpu chaˬ nyi paˍ laiˉ gʼaˇ kʼoˆ ve, Yuˇdaꞈ chaw Baˍbuˍlonˍ mvuhˇ miˬ lo shu ceˬ te tuˬ yuˬ kʼai htaˇ kaꞈ hpawnˬ daꞈ kuiˬ chi cawˬ˗oˬ ve yoˬ. Liꞈ kʼoˆ teˇ kʼoˆ hkʼaw kʼoˆ ve, “yawˇ hui a shu yawˇ ve mvuhˇ miˬ leh bon yehˬ htaꞈ chehˇ vuiˇ ve pa taw nyi ma luˬ ve yoˬ. Hkʼe te leh, Gʼuiˬ sha ve awˬ liˇ tawˇ hkawˇ gʼaw tuˬ, yawˇ hui shinˉ nyi htaˇ mawˬ daꞈ ve yoˬ.” Yawˇ hui kʼoꞈ˗e htaˇ, Liꞈ hpu gʼaw leh bon lawˬ tuˬ, yawˇ hui hkʼaˬ htaˆ kaꞈ hpawnˬ daꞈ ve yoˬ. Chi hkʼe te tuˬ, yawˇ hui chehˇ kuiˬ lo hpawnˬ daꞈ kuiˬ te ve yoˬ.

Awˉ lawˉ peuˇ ve Hkriꞈ yaˇ awˬ co˗e htaˇ, Yuˇdaꞈ chaw hpawnˬ daꞈ kuiˬ chi ve Iˉsaˍreˍlaˆ leh awˬ paˇ awˬ kui ve mvuhˇ miˬ teˇ kaˬ le le lo cawˬ ve yoˬ. Liꞈ hpu chaˬ nyi paˍ Li Leˬvinˇ kʼoˆ ve, “Yuˇdaꞈ chaw hpawnˬ daꞈ kuiˬ oˇ kaˬ lo Liꞈ hpu henˇ ve, hti caˇ hti dawˬ ve, suhˉ jehˬ ve, hpu tanˇ tanˇ ve, leh mvuhˇ miˬ hpawˇ hpawnˬ daꞈ ve yoˬ. Yaꞈ hkʼaˇ, a yeˇ uiˍ jaˇ ve lehˬ yawˇ hui bon hpawˇ hpawnˬ daꞈ ve yoˬ.” Hkʼe te leh Yeˍsuˆ kaꞈ hpawnˬ daꞈ˗e tuˬ oˇ kaˬ lo kʼai ve yoˬ. (Maˍkuˆ 1:21; 6:2; Luˉkaꞈ 4:16) Oˇ kaˬ lo chehˇ ve chaw htaꞈ Yeˍsuˆ maˍ leh awˬ gʼaˇ piˇ ve yoˬ. Hkʼe te leh Hkriꞈ yaˇ awˬ moˍ cawˬ peuˬ hkʼawꞈ nawˉ, tcuh yaˇ Pawˇluꞈ kaꞈ hpawnˬ daꞈ kuiˬ chi hkʼe ve hkʼaw bon maˍ ve yoˬ. Co ha hpawˇ ve htaꞈ dawˇ cawˇ ve chaw Yuˇdaꞈ chaw ve hpawnˬ daꞈ kuiˬ lo kʼai ve pa taw, Pawˇluꞈ teˇ venˇ lo gaˬ la htaˇ hpawnˬ daꞈ kuiˬ chi hkʼe ve hkʼaw awˉ lawˉ maˍ sheˍ ve yoˬ.—Tcuh yaˇ 17:1, 2; 18:4.