1. Daˍviˆ Yaˬhoˉvaˬ htaꞈ caˉ daꞈ ve hkʼaˬ hkʼe dawˇ ve le? Chi hkʼe ve dawˇ hkʼaˇ yawˇ aˬ htoꞈ ma te tuˬ te piˇ ve le?

 Jawˇmawˇ Daˍviˆ bvuhꞈ ve, “[Yaˬhoˉvaˬ] lehˬ uiˍ jaˇ mvuh jaˇ ve pa taw, yawˇ htaꞈ gʼaˇ hteꞈ chiˇ mvuh cawˇ ve yoˬ.” (Chiˇ mvuh ve 145:3) Daˍviˆ Yaˬhoˉvaˬ htaꞈ haꞈ jaˇ leh “hpawnˬ daꞈ chehˇ kuiˬ lo” yawˇ htaꞈ chiˇ mvuh ve yoˬ. (Chiˇ mvuh ve 22:22; 40:5) Nawˬ kaꞈ Yaˬhoˉvaˬ htaꞈ haꞈ leh Daˍviˆ hkʼa shuˍ dawˇ ve yoˬ. Yawˇ kʼoˆ ve, “ngaˬ hui ve awˬ puˍ lonˉ Yaˍkoˆ ve [Yaˬhoˉvaˬ]˗oˬ, nawˬ lehˬ co co taiˍ taiˍ chiˇ mvuh keunˍ ve Gʼuiˬ sha hpehꞈ ve yoˬ.”—1 Raˍsaˍvanˍ 29:10-13.

2. (a) Ngaˬ hui Yaˬhoˉvaˬ htaꞈ hkʼaˬ hkʼe te chiˇ mvuh piˇ gʼa tuˬ le? (b) Chaw teˇ hpaˍ aˬ htoꞈ ma ve awˬ lawn cawˬ ve le? Ngaˬ hui aˬ htoꞈ ma htaꞈ chaˬ nyi tuˬ le?

² Chi beuꞈ ngaˬ hui Yaˬhoˉvaˬ htaꞈ chiˇ mvuh ve awˬ hkʼaˇ teˇ hkʼaˇ lehˬ Hkriꞈ yaˇ hpawnˬ daꞈ ve hkʼaw laꞈ sheh chiˇ leh hkʼawꞈ ve yoˬ. Yaꞈ hkʼaˇ, hkʼawꞈ ve chi haˍ jaˇ tehꞈ awˬ viˉ awˬ nyi teˇ hpaˍ dawˇ ve yoˬ. Yawˇ hui hkʼawꞈ gaˇ ve htawˇ, kawˆ ve yoˬ. Yawˇ hui kawˆ ve chi htaꞈ hkʼaˬ hkʼe te gʼaˇ tuˬ le? Ngaˬ hui hkʼawꞈ leh awˬ nu ve chaw htaꞈ awˬ gʼaˇ piˇ gʼa tuˬ, aˬ htoꞈ ma gʼa te cawˇ ve le? Ngaˬ hui na hkawˇ chi ve teˇ hpaˍ htaꞈ maˇ hkʼawꞈ sheˍ htaˇ, aˬ htoꞈ ma te ngaˬ hui hpawnˬ daꞈ kuiˬ hkʼaw hkʼawꞈ ve awˬ hkʼaˇ 4 hkʼaˇ htaꞈ teˇ geh henˇ tuˬ yoˬ.

3-5. (a) Heˍbrehˇ liꞈ 13:15 hkʼaw kʼoˆ taˍ ve hkʼe, aˬ htoꞈ ma te ngaˬ hui hpawnˬ daꞈ kuiˬ hkʼaw hkʼawꞈ ve le? (b) Teˇ gʼaˇ le le hkʼa shuˍ hkʼawꞈ cawˇ˗aw laˇ? Kʼoˆ maˍ laˇ sheˍ.

³ Yaˬhoˉvaˬ ngaˬ hui teˇ gʼaˇ le le yawˇ htaꞈ kʼa muiˬ chiˇ mvuh ve daꞈ jaˇ ve awˬ vuiˬ peꞈ laˇ ve yoˬ. (Chiˇ mvuh ve 119:108) Hpawnˬ daꞈ ve hkʼaw ngaˬ hui hkʼawꞈ ve teˇ ceuˬ lehˬ “tanˇ tuˬ” hkʼe hpehꞈ leh ngaˬ hui awˬ pon teˇ gʼaˇ kaꞈ tanˇ laˇ maˇ gʼa. (Heˍbrehˇ 13:15 gʼaw sheˍ.) Teˇ gʼaˇ le le hkʼawꞈ ve awˬ hkʼaˇ shuˍ daꞈ cawˇ ve tehꞈ Yaˬhoˉvaˬ dawˇ law˗aw laˇ? Maˇ dawˇ law!

 ⁴ Teˇ gʼaˇ leh teˇ gʼa puiˉ ve hpehꞈ ve maˇ shuˍ daꞈ ve tehꞈ yawˇ shiˍ ve yoˬ. Ngaˬ hui yawˇ htaꞈ tanˇ piˇ ve awˬ hpfuhˇ yawˇ shiˍ ve yoˬ. Iˉsaˍreˍlaˆ chaw ve tanˇ tuˬ yawˇ haꞈ yuˬ ve htaꞈ dawˇ nyi sheˍ. Chaw teˇ hpaˍ hpaˍ yawˬ ehˉ maˇ heˆ leh aˉ cheꞈ ehˉ tanˇ piˇ ve yoˬ. Yaꞈ hkʼaˇ, haˍ ve gʼawˇ ve chaw “aˉ pui kʼaˍ nyiˇ hkeh maˇ heˆ kʼo, guˇ nyiˇ hkeh” tanˇ piˇ ve yoˬ hehˉ. Ngaˆ 2 hkeh vuiˬ tuˬ hpu maˇ lawꞈ ve kʼo, “caˬ hkʼa meu˗e teˇ panˇ” tanˇ piˇ kaꞈ Yaˬhoˉvaˬ haꞈ yuˬ ve yoˬ. (Oˉ kʼoˍ pui ve 5:7, 11) Awˬ hpfuhˇ maˇ hkʼaˆ ve htawˇ, daꞈ jaˇ ve caˬ hkʼa meu˗e hpehꞈ ve kʼo Yaˬhoˉvaˬ awˬ hpfuhˇ shiˍ ve yoˬ.

⁵ Nyi ma daꞈ jaˇ ve Gʼuiˬ sha yawˇ ve dawˇ hkʼaˇ maˇ pa jaw. Ngaˬ hui hkʼawꞈ htaˇ, Aˍpawˇluꞈ leh Pawˇluꞈ hkʼa shuˍ kʼoˆ maˍ puiˉ ve htaꞈ yawˇ maˇ dawˇ law. (Tcuh yaˇ 18:24; 26:28) Ngaˬ hui te gʼa ve hkʼe ceh hkʼawꞈ piˇ ve htaꞈ yawˇ dawˇ law ve yoˬ. Mehˇ chawˇ ma pehꞈ shanˍ ehˉ 2 pehꞈ tanˇ ve awˬ lawn htaꞈ tawnˇ taˍ sheˍ. Yawˇ daꞈ jaˇ ve awˬ ceuˬ Yaˬhoˉvaˬ htaꞈ tanˇ piˇ ve pa taw, awˬ hpfuhˇ hkʼaˆ jaˇ tehꞈ yawˇ shawˍ ve yoˬ.—Luˉkaꞈ 21:1-4.

6. (a) Heˍbrehˇ liꞈ 10:24, 25 hkʼaw kʼoˆ taˍ ve hkʼe, awˬ viˉ awˬ nyi hkʼawꞈ laˇ ve htaꞈ gʼa kaˇ htaˇ ngaˬ hui hkʼaˬ hkʼe dawˇ ve le? (b) Nawˬ awˬ nu ve chaw hkʼawꞈ laˇ ve htaꞈ gʼa kaˇ htaˇ, hkʼaˬ hkʼe te hpeuꞈ maw piˇ tuˬ le?

⁶ Ngaˬ hui hkʼawꞈ htaˇ, teˇ gʼaˇ leh teˇ gʼaˇ awˬ gʼaˇ piˇ daꞈ ve yoˬ. (Heˍbrehˇ 10:24, 25 gʼaw sheˍ.) Laiˉ ceuˬ hkʼawꞈ ve htaꞈ ngaˬ hui dawˇ cawˇ ve yoˬ. Yaˇ ehˉ teˇ hpaˍ nyi ma hkʼaw tawˆ la leh chi suhˉ˗ehˍ hkʼawꞈ ve yoˬ. Chaw teˇ hpaˍ awˬ tehˬ ve yawˇ hui tanˬ henˇ htaˇ ve hpehꞈ la jaw ve awˬ lawn htaꞈ hkʼawꞈ htaˇ, ngaˬ hui kaꞈ awˬ gʼaˇ gʼa jaˇ. Teˇ hpaˍ yaꞈ taw puiˉ jaˇ ve maˇ heˆ leh chaw ceuˬ tawˇ hkawˇ awˬ suhˉ tanˬ henˇ chehˇ ve yawˇ hui “haꞈ hanˉ te leh” hkʼawꞈ htaˇ ngaˬ hui yawˇ hui htaꞈ chiˇ mvuh piˇ gʼa ve yoˬ. (1 Hteˇsaˍlawˇniˆ 2:2) Yawˇ hui coˇ caˇ ve chi ngaˬ hui awˬ hpfuhˇ shiˍ ve tehꞈ hkʼaˬ hkʼe te hpeuꞈ maw piˇ gʼa ve le? Hpawnˬ daꞈ ve hpehˇ htaˇ, awˬ bon uiˍ jaˇ kʼoˆ piˇ gʼa ve yoˬ. Awˬ nu ve teˇ hkʼaˇ lehˬ ngaˬ hui laꞈ sheh chiˇ leh hkʼawꞈ ve yoˬ. Ngaˬ hui awˬ gʼaˇ gʼa ve ceh maˇ heˆ. Hpawnˬ daꞈ kuiˬ hkʼaw awˬ nu ve chaw htaꞈ kaꞈ awˬ gʼaˇ piˇ chehˇ ve yoˬ.—Roˉmaꞈ 1:11, 12.

7. Ngaˬ hui hkʼawꞈ htaˇ aˬ htoꞈ ma awˬ bon gʼa ve le?

⁷ Ngaˬ hui hkʼawꞈ htaˇ awˬ bon gʼa ve yoˬ. (Iˉsaˍyaˆ 48:17) Aˬ htoꞈ ma pa taw le? Awˉ lawˉ teˇ maˬ ngaˬ hui hkʼawꞈ gaˇ ve kʼo, ngaˬ hui kaꞈ hpawnˬ daꞈ tuˬ coˇ caˇ leh hkʼa dehꞈ gu taˍ ve yoˬ. Chi hkʼe te ve kʼo, Liꞈ hpu hkʼaw awˬ hpfuhˇ hkʼaˆ jaˇ ve htaꞈ na gʼa tuˬ yoˬ. Leh ngaˬ hui hkʼa dehꞈ na gʼa ve kʼo, henˇ taˍ ve htaꞈ a shaꞈ teꞈ kuiˬ hkʼaw hkʼa dehꞈ yuˬ  yehˇ gʼa ve yoˬ. Nyiˇ maˬ teˇ maˬ ngaˬ hui hkʼawꞈ htaˇ, ngaˬ hui kaꞈ ha lehˬ ve yoˬ. Shehˆ maˬ teˇ maˬ hkʼawꞈ tuˬ gu ve gʼa coˇ caˇ jaˇ ve pa taw, hpawnˬ daꞈ ve chi ponˬ kʼai maw˗oˬ ve htawˇ, ngaˬ hui hkʼawꞈ ve htaꞈ tawnˇ gʼa sheˍ ve yoˬ.

8-9. (a) Maˍlaˍhkiˆ liꞈ 3:16 hkʼaw kʼoˆ taˍ ve hkʼe, ngaˬ hui hkʼawꞈ htaˇ Yaˬhoˉvaˬ hkʼaˬ hkʼe dawˇ ve le? (b) Chaw teˇ hpaˍ hpaˍ aˬ htoꞈ ma awˬ lawn gʼa hpuˇ ve le?

⁸ Ngaˬ hui ve yonˍ hkʼaˇ htaꞈ kʼoˆ htaˇ, Yaˬhoˉvaˬ nyi hkʼaˇ suh tuˬ te piˇ ve yoˬ. Ngaˬ hui hpawnˬ daꞈ ve hkʼaw hkʼawꞈ htaˇ, Yaˬhoˉvaˬ na taˍ leh ngaˬ hui coˇ caˇ ve htaꞈ yawˇ awˬ hpfuhˇ shiˍ ve tehꞈ ngaˬ hui yonˍ gʼa ve yoˬ. (Maˍlaˍhkiˆ 3:16 gʼaw sheˍ.) Yawˇ nyi hkʼaˇ suh tuˬ coˇ caˇ leh te piˇ htaˇ, yawˇ awˬ hpfuhˇ shiˍ ve tehꞈ ngaˬ hui htaꞈ awˬ bon naꞈ laˇ ve hkʼaw hpeuꞈ maw laˇ ve yoˬ.—Maˍlaˍhkiˆ 3:10.

⁹ Hpawnˬ daꞈ ve hkʼaw ngaˬ hui laꞈ sheh chiˇ leh hkʼawꞈ cawˇ ve yoˬ. Yaꞈ hkʼaˇ, chaw teˇ hpaˍ hpaˍ kawˆ ve yoˬ. Nawˬ chi hkʼe dawˇ ve kʼo, awˬ gʼaˇ taˇ nuˇ sheˍ. Liꞈ hpu hkʼaw ve awˬ liˇ awˬ hkʼaˇ teˇ tawn tawn, awˬ lawn teˇ lawn lawn, leh ga piˇ tuˬ ve awˬ nu ve awˬ hkʼaˇ teˇ hpaˍ teˇ geh jehˬ daꞈ sheˍ. Hpawnˬ daꞈ ve hkʼaw ngaˬ hui maˇ maˇ hkʼawꞈ tuˬ awˬ ceuˬ chi ve teˇ hpaˍ ga laˇ ve yoˬ.

10. (a) Laiˉ gʼaˇ aˬ htoꞈ ma htaꞈ kawˆ ve le? (b) Nawˬ hpawnˬ daꞈ kuiˬ hkʼaw hkʼawꞈ ve htaꞈ kawˆ ve kʼo te hkʼaˇ dawˇ hkʼaˇ daꞈ ve aˬ htoꞈ ma cawˬ ve le?

¹⁰ Teˇ pawˆ le le nawˬ laꞈ sheh chiˇ˗a te htaˇ kawˆ˗aw laˇ? Chi hkʼe hpehꞈ ve kʼo, nawˬ teˇ gʼaˇ ceh tiˉ maˇ heˆ. Awˬ tehˬ kʼo, ngaˬ hui maˇ˗awˍ ve hkʼawꞈ htaˇ, kawˆ ve yoˬ. Kawˆ ve chi htaꞈ tawˍ daꞈ gʼaˇ tuˬ awˉ lawˉ htaˇ aˬ htoꞈ ma htaꞈ kawˆ ve gʼa shiˍ ve yoˬ. Nawˬ hkʼawꞈ tuˬ ve htaꞈ leunˇ˗e ve maˇ heˆ leh kʼoˆ yaꞈ la ve htaꞈ kawˆ ve laˇ? Nawˬ hkʼawꞈ ve shu hkʼe taw maˇ daꞈ tehꞈ nawˬ kawˆ ve laˇ? Awˬ tehˬ kʼo, chi hkʼe kawˆ ve lehˬ daꞈ ve yoˬ. Chi nawˬ nyi ma nuˇ nehˬ ve chaw hpehꞈ leh shu nawˬ aꞈ kehˉ daꞈ ve tehꞈ dawˇ ve hpeuꞈ maw piˇ ve yoˬ. Yaˬhoˉvaˬ nyi ma nuˇ nehˬ ve chaw htaꞈ haꞈ ve yoˬ. (Chiˇ mvuh ve 138:6; Hpiˇliˇpiˆ 2:3) Yaꞈ hkʼaˇ, Yaˬhoˉvaˬ nawˬ yawˇ htaꞈ chiˇ mvuh tcuh gaˇ leh hpawnˬ daꞈ ve hkʼaw awˬ viˉ awˬ nyi htaꞈ kaꞈ awˬ gʼaˇ piˇ daꞈ tcuh gaˇ ve yoˬ. (1 Hteˇsaˍlawˇniˆ 5:11) Yawˇ nawˬ htaꞈ haꞈ leh haꞈ hanˉ ve peꞈ laˇ tuˬ yoˬ.

11. Liꞈ hpu hkʼaw shaˍ tiꞈ peꞈ laˇ ve ngaˬ hui htaꞈ ga laˇ gʼa ve aˬ htoꞈ ma cawˬ ve le?

 ¹¹ Liꞈ hpu hkʼaw shaˍ tiꞈ peꞈ laˇ ve htaꞈ dawˇ nyi sheˍ. Liꞈ hpu hkʼaw kʼoˆ ve, teˇ gʼaˇ le le laiˉ pawˆ kʼoˆ yaꞈ ve yoˬ. (Yaˍkoˆ 3:2) Ngaˬ hui leh awˬ viˉ awˬ nyi kaꞈ biˇ ve chaw hpehꞈ ve tehꞈ Yaˬhoˉvaˬ maˇ dawˇ law. (Chiˇ mvuh ve 103:12-14) Awˬ viˉ awˬ nyi lehˬ ngaˬ hui ve co ha hpawˇ ve yehˬ kʼa hkʼaw ve chaw hpehꞈ leh ngaˬ hui htaꞈ kaꞈ haꞈ ve yoˬ. (Maˍkuˆ 10:29, 30; Yoˇhanˬ 13:35) Teˇ pawˆ pawˆ kʼo, ngaˬ hui na gʼa ve hkʼe leˇ maˇ kʼoˆ tawˆ la gʼa ve tehꞈ yawˇ hui shiˍ ve yoˬ.

12-13. Neˍhaˍmiˆ leh Yoˇnaˆ ve aw lawn ngaˬ hui htaꞈ aˬ htoꞈ ma maˍ laˇ ve le?

¹² Nawˬ kawˆ ve htaꞈ tawˍ daꞈ gʼaˇ tuˬ Liꞈ hpu hkʼaw ve awˬ lawn teˇ hpaˍ htaꞈ dawˇ nyi sheˍ. Neˍhaˍmiˆ ve awˬ lawn htaꞈ tawnˇ taˍ sheˍ. Jawˇmawˇ kanˇ paˆ cawˬ jaˇ ve teˇ gʼaˇ ve hawˉ yehˬ hkʼaw yawˇ kanˉ te ve yoˬ. Yeˍruˆsaˍlehnˍ lanˇ venˇ paˆ kʼai leh venˇ taˍ meuꞈ hpeꞈ kaꞈ aˬ miˍ toˇ baˬ ve htaꞈ Neˍhaˍmiˆ gʼa kaˇ htaˇ nyi ma luˬ jaˇ. (Neˍhaˍmiˆ 1:1-4) Jawˇmawˇ yawˇ htaꞈ nyi ma maˇ sha ve shuˍ˗a kʼoˆ piˇ htaˇ, Neˍhaˍmiˆ hkʼaˬ hkʼe taw kawˆ ve htaꞈ dawˇ nyi sheˍ. Yawˇ nyi ma hkʼaw bon laꞈ haˉ lawˬ leh Jawˇmawˇ htaꞈ hkʼawꞈ piˇ ve yoˬ. Oˇ ve teˇ yanˇ, Gʼuiˬ sha ve chaw htaꞈ ga piˇ gʼa tuˬ Jawˇmawˇ laiˉ ceuˬ te ve yoˬ. (Neˍhaˍmiˆ 2:1-8) Yoˇnaˆ htaꞈ kaꞈ dawˇ nyi sheˍ. Yoˇnaˆ Niˇnaˍveˍ chaw htaꞈ ca hto piˇ tuˬ Yaˬhoˉvaˬ kʼoˆ piˇ htaˇ, yawˇ kawˆ jaˇ leh hpaw˗e ve yoˬ. (Yoˇnaˆ 1:1-3) Yaꞈ hkʼaˇ, Yaˬhoˉvaˬ ga piˇ ve pa taw, Yoˇnaˆ kanˉ chi htaꞈ te gʼa ve yoˬ. Leh yawˇ tcuh kaˍ paˍ ve tawˇ hkawˇ Niˇnaˍveˍ chaw htaꞈ hto piˇ ve lehˬ oˇ kaˬ lo chehˇ taˍ ve chaw awˬ pon awˬ bon gʼa jaˇ. (Yoˇnaˆ 3:5-10) Maˇ hkʼawꞈ sheˍ htaˇ, bon lawˬ ve lehˬ a yeˇ uiˍ jaˇ ve tehꞈ Neˍhaˍmiˆ ve awˬ lawn htaꞈ ngaˬ hui gʼa henˇ ve yoˬ. Ngaˬ hui hkʼaˬ hkʼe tawˍ kawˆ ve htawˇ, Yaˬhoˉvaˬ ve kanˉ te gʼa tuˬ yawˇ ga laˇ gʼa ve tehꞈ Yoˇnaˆ ve aw lawn htaꞈ ngaˬ hui gʼa henˇ ve yoˬ. Nawˬ dawˇ kʼo, Hkriꞈ yaˇ awˬ moˍ hkʼaw Niˇnaˍveˍ chaw hkʼe kawˆ lawꞈ lawꞈ ve chaw cawˬ˗aw laˇ?

¹³ Hpawnˬ daꞈ ve hkʼaw nawˬ hkʼawꞈ leh shu htaꞈ awˬ gʼaˇ piˇ gʼa tuˬ, nawˬ htaꞈ ga laˇ gʼa ve aˬ htoꞈ ma awˬ hkʼaˇ cawˬ ve le? Teˇ geh dawˇ nyi sheˍ.

14. Aˬ htoꞈ ma te hpawnˬ daꞈ ve ngaˬ hui hkʼa dehꞈ gu cawˇ ve le? Hkʼaˬ hkʼe te ngaˬ hui chi hkʼe te gʼa tuˬ le?

¹⁴ Hpawnˬ daꞈ ve teˇ pawˆ le le gu ve yoˬ. Nawˬ hkʼawꞈ tuˬ ve htaꞈ awˉ lawˉ htaˇ kaꞈ hkʼa dehꞈ gu teh taˍ ve kʼo, hkʼa dehꞈ hkʼawꞈ gʼa tuˬ yoˬ. (Tawˇ naˉ ve 21:5) Hpawnˬ daꞈ tuˬ gu ve awˬ hkʼaˇ ngaˬ hui awˬ yanˇ shawˍ teh taˍ ve maˇ shuˍ daꞈ. Mehˇ chawˇ ma teˇ gʼaˇ Eh˗law˗iˆ meh ve a shaꞈ 80 hkʼawꞈ hpaˆ gʼaˬ˗oˬ ve yoˬ. Yawˇ Shaw nyi kuiˬ Taꞈ yehˬ shinˉ peuˬ teˇ nyi htaˇ kaꞈ tanˬ gu ve yoˬ. Yawˇ kʼoˆ ve, “ngaˬ awˉ lawˉ htaˇ kaꞈ gʼaw leh gu taˍ ve kʼo hpawnˬ daꞈ ve hkʼaw ha lehˬ jaˇ.” Caweh kaꞈ teˇ gʼaˇ kanˉ awˬ yanˇ hkʼa biˇ te chehˇ ve yoˬ. Chi htaꞈ pa taw, yawˇ Shaw nyi kuiˬ Taꞈ yehˬ gʼaw leh gu tuˬ hkawꞈ nyi htaˇ shawˍ teh taˍ ve yoˬ. Yawˇ kʼoˆ ve, “hpawnˬ daꞈ ve  maˇ gaˬ sheˍ htaˇ ngaˬ awˉ lawˉ gu teh taˍ ve kʼo awˬ lawn htaꞈ hkʼa dehꞈ tawnˇ gʼa ve yoˬ.” Aiˬ nyi haꞈ shaˉ paˍ ve kanˉ cawˬ maˇ jaˇ leh gʼuˇ suhˍ peuˍ ve kaꞈ te ve yawˇ kʼoˆ ve, “ngaˬ awˬ pon daꞈ jaˇ ve teˇ hkʼaˇ lehˬ teˇ shinˉ ve hkʼaw a yehˉ yehˉ gu ve yoˬ. Teˇ pawˆ tiˉ hkʼa peu˗eˬ gu ve aꞈ kehˉ daꞈ ve yoˬ.”

15. Hpawnˬ daꞈ˗e tuˬ awˬ pon nawˬ hkʼaˬ hkʼe te hkʼa dehꞈ gu gʼa tuˬ le?

¹⁵ Hpawnˬ daꞈ tuˬ hkʼa dehꞈ gu ve aˬ htoꞈ ma gʼa te cawˇ sheˍ ve le? Teˇ pawˆ le le maˇ henˇ sheˍ htaˇ, Yaˬhoˉvaˬ nawˬ htaꞈ daꞈ kehˬ ve awˬ ha hpu peꞈ laˇ tuˬ lawˬ sheˍ. (Luˉkaꞈ 11:13; 1 Yoˇhanˬ 5:14) Peuˬ hkʼawꞈ nawˉ henˇ tuˬ ve awˬ lawn htaꞈ chaˬ nyi tuˬ awˬ yanˇ chi suhˉ˗ehˍ yehˇ sheˍ. Awˬ lawn lonˉ ma, awˬ tawn ehˉ, awˬ han, awˇ ceˍ awˇ fa teˇ hpaˍ htaꞈ gʼaw nyi sheˍ. Nawˬ teˇ tawn leh teˇ tawn tanˬ gʼaw nyi htaˇ, nawˬ te gʼa ve hkʼe Liꞈ hpu awˬ tawn teˇ tawn le le htaꞈ gʼaw nyi sheˍ. Nawˬ gʼaw ve htaꞈ caˉ daꞈ ve dawˇ nyi leh nawˬ hkʼawꞈ tuˬ ve htaꞈ a yeˇ yuˬ sheˍ. Nawˬ hkʼa dehꞈ gu taˍ ve kʼo, nawˬ kaꞈ awˬ bon gʼa jaˇ leh hkʼawꞈ ve kaꞈ sha ve tehꞈ dawˇ ve yoˬ.—2 Kawˇrenˍhtuˆ 9:6.

16. Nawˬ yehˇ gʼa ve awˬ hkʼeun hkʼaw loꞈ˗e gʼa ve teˇ hpaˍ aˬ htoꞈ ma cawˬ ve le? Awˬ hkʼeun chi teˇ hpaˍ htaꞈ nawˬ hkʼaˬ hkʼe yehˇ gʼa ve le?

¹⁶ Te gʼa ve kʼo, nawˬ na gʼa ve chaw ceuˬ tawˇ hkawˇ hkʼaw cawˬ ve awˬ hkʼeun htaꞈ yehˇ sheˍ. Yaˬhoˉvaˬ yawˇ ve kanˉ hkʼaˇ htaꞈ cuˇ leh awˬ hkʼeun teˇ hpaˍ htaꞈ peꞈ laˇ ve yoˬ. Ngaˬ hui hpawnˬ daꞈ˗e tuˬ awˬ pon gu ve ga laˇ gʼa ve yoˬ. Ngaˬ hui ve awˬ hkʼeun hkʼaw liꞈ kʼoˆ henˇ tuˬ ve dao˗lonꞈ gʼa tuˬ, JW laiˉbraˍliˍ ehˉ (JW Library^®) yehˇ gʼa ve yoˬ. Ngaˬ hui henˇ gʼa ve, hkʼaˬ teˇ hkʼaˇ lo chehˇ kaꞈ gʼaw leh na hpehꞈ ve yoˬ. Chaw teˇ hpaˍ awˬ hkʼeun chi ve teˇ hpaˍ htaꞈ yehˇ leh sha gʼuˇ kanˉ jehˇ htaˇ, liꞈ henˇ yehˬ lo chehˇ htaˇ, yaꞈ kʼaw te toˇ htaˇ henˇ gʼa ve yoˬ. Shaw nyi kuiˬ Taꞈ yehˬ liꞈ teh kuiˬ bawehˇ leh Shaw nyi kuiˬ Taꞈ yehˬ liꞈ teh kuiˬ bawehˇ in˗teu˗neꞈ hkʼaw (Watchtower ONLINE LIBRARY^™) henˇ tuˬ ve awˬ lawn teˇ hpaˍ ca sha ve yoˬ. Ngaˬ hui shiˍ gaˇ ve awˬ lawn teˇ hpaˍ htaꞈ hpfuhˆ leh hkʼa dehꞈ gʼaw gʼa ve yoˬ.

17. (a) Aˬ htoꞈ ma te hkʼawꞈ tuˬ laiˉ maˬ gu taˍ ve lehˬ daꞈ ve le? (b) VDO Yaˬhoˉvaˬ htaꞈ awˬ chawˇ te la˗o kʼoˆ ve nyi leh hkʼawꞈ tuˬ gu ve aˬ htoꞈ ma awˬ bon gʼa le?

¹⁷ Te gʼa ve kʼo, teˇ tawn leh teˇ tawn hkʼaw hkʼawꞈ tuˬ ve laiˉ maˬ gu taˍ sheˍ. Aˬ htoꞈ ma pa taw le? Awˬ lawn kʼo, nawˬ laꞈ sheh chiˇ ve teˇ pawˆ le le sheh kʼai paˍ nawˬ htaꞈ kuˬ laˇ ve maˇ heˆ. Awˬ nu ve awˬ viˉ awˬ nyi nawˬ geh teˇ geh laꞈ sheh chiˇ ve leh sheh kʼai paˍ yawˇ htaꞈ kuˬ ve yoˬ hehˉ. Hpawnˬ daꞈ ve awˬ yanˇ cawˇ cawˇ hpehˇ tuˬ teˇ pawˆ pawˆ kʼo sheh kʼai paˍ teˇ gʼaˇ gʼaˇ htaꞈ leuˆ leh hkʼawꞈ tcuh ve yoˬ. Chi htaꞈ pa taw, laiˉ tawn henˇ˗oˬ htaˇ kaꞈ yawˇ nawˬ htaꞈ maˇ kuˬ laˇ ve kʼo, awˬ gʼaˇ taˇ nuˇ leh nyi ma zuhˆ ve taˇ cawˬ piˇ. Nawˬ hkʼawꞈ tuˬ laiˉ maˬ gu taˍ ve kʼo, laꞈ sheh chiˇ leh hkʼawꞈ tuˬ awˬ yanˇ cawˬ sheˍ ve yoˬ. Nawˬ Liꞈ hpu teˇ tawn gʼaw tuˬ gu kaꞈ gʼa ve yoˬ hehˉ. Yaꞈ hkʼaˇ,  nawˬ te gʼa ve kʼo nawˬ ve dawˇ hkʼaˇ hkʼe hkʼawꞈ tuˬ coˇ caˇ leh gu taˍ sheˍ. *

18. Aˬ htoꞈ ma te ngaˬ hui chi suhˉ˗ehˍ hkʼawꞈ cawˇ ve le?

¹⁸ Chi suhˉ˗ehˍ hkʼawꞈ sheˍ. Laiˉ pawˆ kʼo, na sha ve leh chi suhˉ˗ehˍ hkʼawꞈ ve lehˬ awˬ gʼaˇ peꞈ laˇ jaˇ. Chi htaꞈ pa taw, nawˬ chi suhˉ˗ehˍ hkʼawꞈ tuˬ dawˇ teh taˍ sheˍ. Coˇ caˇ leh 30 miꞈ niꞈ ehˉ taˇ ponˬ tcuh. (Tawˇ naˉ ve 10:19; 15:23) Nawˬ hpawnˬ daꞈ ve hkʼaw laiˉ hkʼawꞈ hkʼawꞈ˗oˬ ve kʼo, awˬ nu ve chaw henˇ yuˬ gʼa tuˬ awˬ pon nawˬ chi suhˉ˗ehˍ hkʼawꞈ sheˍ. Nawˬ hkʼawꞈ ve laiˉ miꞈ niꞈ yehˇ leh laiˉ lawn htaꞈ kʼoˆ ve kʼo, awˬ nu ve chaw kaꞈ nawˬ hkʼe leˇ maˇ hkʼawꞈ gʼa tehꞈ dawˇ leh kawˆ ve yoˬ hehˉ. Chi hkʼoˆ kaꞈ nawˬ chi suhˉ˗ehˍ hkʼawꞈ ve kʼo, awˬ nu ve chaw kaꞈ hkʼawꞈ tuˬ awˬ yanˇ cawˬ ve yoˬ. Nawˬ htaꞈ awˉ lawˉ teˇ gʼaˇ kuˬ laˇ ve kʼo, na hkawˇ htaꞈ hawˍ daꞈ leh chi suhˉ˗ehˍ hkʼawꞈ sheˍ. Oˇ ve teˇ tawn hkʼaw cawˬ ve teˇ lawn le le htaꞈ taˇ hkʼawꞈ. Shu a yeˇ uiˍ ve htaꞈ hkʼawꞈ˗oˬ ve kʼo, nawˬ kaꞈ caˉ daꞈ ve awˬ ceuˬ awˬ nu ve htaꞈ hkʼawꞈ gʼa ve yoˬ. Awˇ ceˍ awˇ fa “ Ngaˬ aˬ htoꞈ ma ve awˬ lawn htaꞈ hkʼawꞈ gʼa tuˬ le?” htaꞈ nyi sheˍ.

19. Sheh kʼai paˍ nawˬ htaꞈ hkʼaˬ hkʼe ga laˇ gʼa ve le? Yaꞈ hkʼaˇ, nawˬ aˬ htoꞈ ma gʼa te cawˇ ve le?

¹⁹ Nawˬ hkʼawꞈ gaˇ ve teˇ tawn shehˍ kʼai paˍ shiˍ tuˬ kʼoˆ piˇ sheˍ. Chi hkʼe te gaˇ ve kʼo, hpawnˬ daꞈ ve maˇ tanˬ sheˍ htaˇ sheh kʼai paˍ htaꞈ kʼoˆ piˇ sheˍ. Nawˬ hkʼawꞈ tuˬ ve teˇ tawn gaˬ˗oˬ htaˇ, sheh kʼai paˍ mawˬ tuˬ laꞈ shehˍ chi mvuh mvuh chiˇ sheˍ.

20. Aˬ htoꞈ ma te Hkriꞈ yaˇ awˬ moˍ hkʼaw hpawnˬ daꞈ˗e ve lehˬ awˬ chawˇ geh awˍ caˇ˗e ve hkʼe hpehꞈ ve tehꞈ kʼoˆ gʼa ve le?

²⁰ Hkriꞈ yaˇ awˬ moˍ hkʼaw hpawnˬ daꞈ˗e ve lehˬ awˬ chawˇ geh awˍ caˇ˗e ve htaꞈ shuˍ ve yoˬ. Awˬ viˉ awˬ nyi teˇ geh awˍ caˇ tuˬ jehˬ laˇ leh awˍ chiˇ teˇ ceuˬ ceuˬ gʼa yuˬ kʼai htaˇ, nawˬ hkʼaˬ hkʼe te tuˬ le? Nawˬ kaꞈ a ciˉ dawˇ haˍ ve yoˬ hehˉ. Yaꞈ hkʼaˇ, teˇ gʼaˇ le le dawˇ cawˇ ve awˍ chiˇ nawˬ kaꞈ coˇ caˇ leh te ve yoˬ. Yaˬhoˉvaˬ yehˬ shehˍ hpaˇ hkʼe hpehꞈ leh hpawnˬ daꞈ ve hkʼaw yawˇ daꞈ jaˇ ve teˇ ceuˬ le le gu laˇ ve yoˬ. (Chiˇ mvuh ve 23:5; Maꞈhtehˍ 24:45) Ngaˬ hui daꞈ jaˇ ve awˬ ceuˬ gu leh yuˬ kʼai ve kʼo, yawˇ nyi hkʼaˇ suh tuˬ yoˬ. Chi htaꞈ pa taw, nawˬ te gʼa ve hkʼe gu leh maˇ maˇ hkʼawꞈ sheˍ. Chi hkʼe te htaˇ nawˬ Yaˬhoˉvaˬ gu laˇ ve caˇ tuˬ htaꞈ ca caˇ˗e ve ceh tiˉ maˇ heˆ. Hkriꞈ yaˇ awˬ moˍ hkʼaw awˬ nu ve chaw htaꞈ kaꞈ awˬ bon pehˬ piˇ tuˬ yoˬ.