1-2. (a) Laiˉ lanˬ gʼaˇ Jawˇmawˇ mvuhˇ haˉ awˍ caˇ ve hpawnˬ daꞈ ve laˬ htaˇ, Yaˬhoˉvaˬ aˬ htoꞈ ma htaꞈ mawˬ ve le? (Awˬ htaꞈ hpawˇ ve awˬ han htaꞈ nyi sheˍ.) (b) Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

 Miˬ guiˬ chi hkʼoˆ lo laiˉ lanˬ gʼaˇ Jawˇmawˇ ve mvuhˇ haˉ awˍ caˇ ve hpawnˬ daꞈ ve laˬ htaˇ, Yaˬhoˉvaˬ aˬ htoꞈ ma mawˬ ve le dawˇ nyi sheˍ. Yawˇ chaw awˬ moˍ lonˉ htaꞈ ceh nyi ve maˇ heˆ, teˇ gʼaˇ leh teˇ gʼaˇ htaꞈ yawˇ chaˬ nyi ve yoˬ. Tawˇ pa haˉ te kʼo, teˇ hkʼawꞈ le le ka tiꞈ yeˬ leh hpawnˬ daꞈ la ve chaw htaꞈ yawˇ mawˬ ve yoˬ. Chaw teˇ hpaˍ fawˉ ve mehˍ ve gʼa hpuˇ jaˇ ve htawˇ, laˬ sheˍ ve yoˬ. Chaw teˇ hpaˍ awˬ kaˍ awˬ nu ve hpawnˬ daꞈ ve hkʼaˬ htaˆ kaꞈ maˇ laˬ ve htawˇ, Yeˍsuˆ suh ve dawˇ nawˇ tuˬ hpawnˬ daꞈ ve laˬ ve a yeˇ uiˍ jaˇ tehꞈ shawˍ ve yoˬ. Chaw teˇ hpaˍ hpaˍ hpawnˬ daꞈ ve chi hkʼaˬ hkʼe kʼai ve htaꞈ shiˍ gaˇ leh awˉ lawˉ teˇ pawˆ laˬ ve pa taw, Yaˬhoˉvaˬ kaꞈ yawˇ hui htaꞈ mawˬ ve yoˬ.

² Yeˍsuˆ suh ve dawˇ nawˇ tuˬ hpawnˬ daꞈ ve chaw maˇ maˇ laˬ ve htaꞈ Yaˬhoˉvaˬ mawˬ htaˇ ha lehˬ ve yoˬ. (Luˉkaꞈ 22:19) Yaꞈ hkʼaˇ, chaw laˬ maˇ ve htaꞈ Yaˬhoˉvaˬ a yeˇ yuˬ ve maˇ heˆ. Aˬ htoꞈ ma te yawˇ hui laˬ gaˇ ve htaꞈ yawˇ a yeˇ yuˬ ve yoˬ. Yawˇ hui nyi ma hkʼaw cawˬ ve yawˇ awˬ pon a yeˇ uiˍ jaˇ. Awˬ lawn chi ve hkʼaw a yeˇ uiˍ ve na hkawˇ htaꞈ ngaˬ hui teˇ geh jehˬ daꞈ tuˬ yoˬ. Aˬ htoꞈ ma te ngaˬ hui Yeˍsuˆ suh ve dawˇ nawˇ tuˬ hpawnˬ daꞈ ve kʼai ve ceh maˇ lawꞈ ve le, Yaˬhoˉvaˬ htaꞈ haꞈ ve chaw yawˇ gu taˍ laˇ ve awˬ kaˍ awˬ nu ve hpawnˬ daꞈ ve kaꞈ aˬ htoꞈ ma te kʼai cawˇ ve le?

3-4. (a) Aˬ htoꞈ ma te ngaˬ hui hpawnˬ daꞈ˗e ve le? (b) Hpawnˬ daꞈ˗e ve ngaˬ hui htaꞈ caˉ daꞈ ve aˬ htoꞈ ma maˍ laˇ ve le? (c) 1 Kawˇrenˍhtuˆ liꞈ 11:23-26 hkʼaw kʼoˆ taˍ ve hkʼe, aˬ htoꞈ ma te ngaˬ hui Yeˍsuˆ suh ve dawˇ nawˇ tuˬ hpawnˬ daꞈ ve maˇ haˇ tcuh cawˇ ve le?

³ Ngaˬ hui hpawnˬ daꞈ˗e htaˇ Yaˬhoˉvaˬ htaꞈ oˉ kʼoˍ pui ve teˇ ceuˬ  hpehꞈ ve yoˬ. Chi hkʼoˆ kaꞈ hpawnˬ daꞈ ve hkʼaw Yaˬhoˉvaˬ maˍ laˇ ve htaꞈ ngaˬ hui gʼa ve yoˬ. Uiˍ muiˬ caˆ muiˬ ve chaw maˍ piˇ ve htaꞈ loˍ ve tehꞈ yawˇ hui maˇ dawˇ. (3 Yoˇhanˬ 9) Yaꞈ hkʼaˇ, Yaˬhoˉvaˬ leh yawˇ ve kanˉ hkʼaˇ maˍ laˇ ve htaꞈ ngaˬ hui gʼa gaˇ ve yoˬ.—Iˉsaˍyaˆ 30:20; Yoˇhanˬ 6:45.

⁴ Ngaˬ hui hpawnˬ daꞈ˗e htaˇ nyi ma nuˇ nehˬ ve leh maˍ laˇ ve htaꞈ haꞈ yuˬ gaˇ ve tehꞈ hpeuꞈ maw piˇ ve yoˬ. Yeˍsuˆ suh ve dawˇ nawˇ tuˬ hpawnˬ daꞈ ve a yeˇ uiˍ jaˇ tehꞈ ngaˬ hui shiˍ ve pa taw kʼai ve yoˬ. Ngaˬ hui nyi ma nuˇ nehˬ ve hkʼaw Yeˍsuˆ ve tawˇ hkawˇ htaꞈ na yuˬ ve yoˬ. Yawˇ kʼoˆ ve, “ngaˬ htaꞈ dawˇ nawˇ tuˬ chi htaꞈ te˗o.” (1 Kawˇrenˍhtuˆ 11:23-26 gʼaw sheˍ.) Hpawnˬ daꞈ ve chi ngaˬ hui ve dawˇ law kuiˬ htaꞈ hkʼa tawˍ lehˆ mawˬ tuˬ ga laˇ leh Yaˬhoˉvaˬ ngaˬ hui htaꞈ hkʼaˬ hkʼe tawˍ haꞈ ve hpeuꞈ maw laˇ ve yoˬ. Yaꞈ hkʼaˇ, ngaˬ hui teˇ hkʼawꞈ ve hkʼaw teˇ pawˆ aꞈ kehˉ awˬ gʼaˇ gʼa tuˬ loˍ ve tehꞈ Yaˬhoˉvaˬ shiˍ ve yoˬ. Hkʼe te leh, teˇ shinˉ le le hpawnˬ daꞈ˗e tuˬ yawˇ gu taˍ laˇ leh ngaˬ hui htaꞈ kʼai tcuh gaˇ ve yoˬ. Nyi ma nuˇ nehˬ ve ngaˬ hui na yuˬ tuˬ te laˇ ve yoˬ. Hpawnˬ daꞈ˗e ve gu leh kʼai tuˬ ngaˬ hui teˇ shinˉ ve hkʼaw laiˉ naˍ riˍ yehˇ ve yoˬ.

5. Nyi ma nuˇ nehˬ ve chaw Yaˬhoˉvaˬ kuˬ piˇ ve htaꞈ aˬ htoꞈ ma te haꞈ yuˬ ve le?

⁵ Teˇ hkʼawꞈ le le nyi ma nuˇ nehˬ ve chaw laiˉ gʼaˇ Yaˬhoˉvaˬ kuˬ piˇ ve htaꞈ haꞈ yuˬ leh yawˇ htaꞈ maˍ tcuh ve yoˬ. (Iˉsaˍyaˆ 50:4) Yawˇ hui Yeˍsuˆ suh ve dawˇ nawˇ tuˬ hpawnˬ daꞈ ve kʼai htaˇ ha lehˬ ve pa taw, awˬ kaˍ awˬ na ve hpawnˬ daꞈ˗e ve kaꞈ tanˬ kʼai ve yoˬ. (Zaˍhkaˍriˆ 8:20-23) Yaˬhoˉvaˬ maˍ laˇ leh sheh kʼai laˇ ve pa taw, ngaˬ hui ha lehˬ jaˇ. Yawˇ lehˬ ‘ngaˬ hui ve ga laˇ shehˍ hpaˇ leh htaiˍ hkʼawꞈ paˍ hpehꞈ ve yoˬ.’ (Chiˇ mvuh ve 40:17) Yeˍsuˆ Yaˬhoˉvaˬ haꞈ jaˇ ve Yaˇ paˍ hpehꞈ leh yawˇ maˍ laˇ ve htaꞈ ngaˬ hui gʼa ve yoˬ. Ngaˬ hui htaꞈ ha lehˬ tuˬ te laˇ ve chi ve aꞈ kehˉ a yeˇ uiˍ ve awˬ nu ve teˇ ceuˬ kaꞈ maˇ cawˬ.—Maꞈhtehˍ 17:5; 18:20; 28:20.

6. Nyi ma nuˇ nehˬ ve hawˉ hkʼaˆ teˇ gʼaˇ hpawnˬ daꞈ la tuˬ aˬ htoꞈ ma ga piˇ ve le?

⁶ Teˇ hkʼawꞈ le le Yeˍsuˆ suh ve dawˇ nawˇ tuˬ hpawnˬ daꞈ ve ngaˬ hui te gʼa ve hkʼe chaw maˇ maˇ laˬ tuˬ coˇ caˇ leh kuˬ piˇ ve yoˬ. Nyi ma nuˇ nehˬ ve chaw laiˉ gʼaˇ kuˬ piˇ ve htaꞈ haꞈ yuˬ leh awˬ bon gʼa ve yoˬ. Tawˇ pa haˉ teˇ maˬ htaꞈ dawˇ nyi sheˍ. Ponˬ laˬ ve laiˉ hkʼawꞈ htaˇ, hawˉ hkʼaˆ teˇ gʼaˇ Yeˍsuˆ suh ve dawˇ nawˇ tuˬ hpawnˬ daꞈ ve kuˬ piˇ ve liꞈ gʼa ve yoˬ. Yaꞈ hkʼaˇ, yawˇ awˬ viˉ awˬ nyi liꞈ kʼoˆ ehˉ peꞈ laˇ ve oˇ ve teˇ gʼaˇ htaꞈ kʼai maˇ gʼa tehꞈ kʼoˆ piˇ ve yoˬ. Yaꞈ hkʼaˇ, oˇ ve teˇ haˉ htaˇ, hawˉ hkʼaˆ chi teˇ gʼaˇ hpawnˬ daꞈ la leh awˬ viˉ awˬ nyi mawˬ htaˇ anˇ jaˇ ve yoˬ. Awˬ viˉ awˬ nyi yawˇ htaꞈ haꞈ yuˬ piˇ daꞈ jaˇ ve pa taw, yawˇ ha lehˬ jaˇ leh teˇ shinˉ le le hpawnˬ daꞈ˗e ve yoˬ. Oˇ ve teˇ hkʼawꞈ hkʼaw yawˇ hpawnˬ daꞈ˗e ve 3 pawˆ ceh maˇ kʼai ve yoˬ. Yawˇ chi hkʼe taw haꞈ yuˬ ve aˬ htoꞈ ma ga piˇ ve le? Yawˇ nyi ma nuˇ nehˬ leh pa ve yoˬ. Awˬ viˉ awˬ nyi yawˇ htaꞈ kuˬ piˇ ve kʼoˆ ve, “yawˇ nyi ma nuˇ nehˬ jaˇ.” Yaˬhoˉvaˬ hawˉ hkʼaˆ chi ve teˇ gʼaˇ htaꞈ gʼawˬ veu laˇ leh yawˇ htaꞈ oˉ kʼoˍ pui la ve tehꞈ ngaˬ hui awˬ tehˬ awˬ na yonˍ ve yoˬ. Chi teˇ hkui yawˇ Baˆtiˆsaˬ haꞈ yuˬ˗oˬ ve yoˬ.—2 Saˍmo˗eˍlaˆ 22:28; Yoˇhanˬ 6:44.

7. Hpawnˬ daꞈ ve hkʼaw gʼa henˇ ve awˬ ceuˬ leh Liꞈ hpu hkʼaw gʼa gʼaw ve awˬ ceuˬ ngaˬ hui nyi ma nuˇ nehˬ ve cawˬ tuˬ hkʼaˬ hkʼe ga laˇ ve le?

⁷ Ngaˬ hui nyi ma nuˇ nehˬ ve chaw hpehꞈ tuˬ, hpawnˬ daꞈ ve hkʼaw gʼa henˇ ve awˬ ceuˬ leh Liꞈ hpu hkʼaw gʼa gʼaw ve awˬ ceuˬ ga laˇ ve yoˬ. Yeˍsuˆ suh ve dawˇ nawˇ tuˬ hpawnˬ daꞈ ve maˇ gaˬ sheˍ laiˉ shinˉ htaˇ, hpawnˬ daꞈ ve hkʼaw Yeˍsuˆ nyi ma nuˇ nehˬ ve leh yawˇ htaiˍ hkʼawꞈ laˇ ve awˬ lawn htaꞈ kʼoˆ ve yoˬ. Yeˍsuˆ suh ve dawˇ nawˇ tuˬ hpawnˬ daꞈ ve maˇ gaˬ sheˍ laiˉ nyi htaˇ, Yeˍsuˆ maˇ suh sheˍ ve awˬ lawn leh yawˇ kʼawꞈ teꞈ tu la ve htaꞈ caˉ daꞈ ve ngaˬ hui Liꞈ hpu hkʼaw gʼaw ve yoˬ. Hpawnˬ daꞈ ve hkʼaw gʼa henˇ ve awˬ ceuˬ leh Liꞈ hpu hkʼaw gʼa gʼaw ve awˬ ceuˬ, ngaˬ hui Yeˍsuˆ htaiˍ hkʼawꞈ laˇ ve  awˬ hpfuhˇ htaꞈ hkʼa dehꞈ shiˍ ve yoˬ. Yeˍsuˆ nyi ma nuˇ nehˬ ve htaꞈ henˇ yuˬ leh Yaˬhoˉvaˬ ve a loˍ htaꞈ gʼaꞈ te tuˬ haˍ jaˇ ve htawˇ, ngaˬ hui te gaˇ tuˬ chi hkʼa peu˗eˬ ga laˇ ve yoˬ.—Luˉkaꞈ 22:41, 42.

8. Yeˍsuˆ haꞈ hanˇ ve hkʼaˬ hkʼe hpeuꞈ maw laˇ ve le?

⁸ Yeˍsuˆ haꞈ hanˉ ve htaꞈ ngaˬ hui coˇ caˇ leh henˇ yuˬ gaˇ ve yoˬ. Yawˇ maˇ suh sheˍ ve laiˉ nyi htaˇ, yawˇ hkʼaˬ hkʼe haꞈ hanˉ ve teˇ geh dawˇ nyi sheˍ. Maˇ maw ve awˬ yanˇ, canˇ paˍ Yeˍsuˆ htaꞈ jawꞈ piˇ leh yaꞈ taw tuˬ te piˇ ve, leh tiˇ pehˍ piˇ tuˬ yoˬ tehꞈ yawˇ hkʼa dehꞈ shiˍ ve yoˬ. (Maꞈhtehˍ 20:17-19) Yaꞈ hkʼaˇ, yawˇ ha lehˬ ve hkʼaw hkanˍ suh ve yoˬ. Awˬ yanˇ gaˬ la htaˇ, Geˍseˍmaˍniˆ hko hkʼaw yawˇ tcuh yaˇ hui htaꞈ kʼoˆ piˇ ve, “tu, kʼai˗a veuˬ. Nyi loˬ, ngaˬ htaꞈ chiˇ aꞈ shehˍ hpaˇ awˬ paˇ lo gaˬ la peuˬ.” (Maꞈhtehˍ 26:36, 46) Chaw awˬ moˍ lonˉ laꞈ caˉ ka leh yawˇ htaꞈ ca yuˬ la htaˇ, Yeˍsuˆ gʼuˇ suhˍ lo tawˆ˗e leh yawˇ a shu hpehꞈ ve kʼoˆ piˇ leh, maꞈ yaˇ tcuh yaˇ hui htaꞈ hpehˇ piˇ˗oˆ tehꞈ kʼoˆ piˇ ve yoˬ. (Yoˇhanˬ 18:3-8) Yeˍsuˆ haꞈ hanˉ ve shu htaꞈ maˇ shuˍ. Chi beuꞈ teˇ co˗e leuˆ yuˬ taˍ ve Hkriꞈ yaˇ leh awˬ kaˍ awˬ nu ve yawˬ Yeˍsuˆ haꞈ hanˇ ve htaꞈ coˇ caˇ leh henˇ yuˬ ve yoˬ. Yawˇ hui hkʼaˬ hkʼe te ve le?

9. (a) Hkʼaˬ htaˆ kaꞈ hpawnˬ daꞈ˗e gʼa tuˬ aˬ htoꞈ ma te ngaˬ hui haꞈ hanˉ ve gʼa cawˬ cawˇ ve le? (b) Ngaˬ hui ve awˬ lawn awˬ viˉ awˬ nyi yawˇ hui yonˍ ve htaꞈ pa taw htawnˍ hkʼaw lo gʼa chehˇ ve htaꞈ hkʼaˬ hkʼe heuˆ la kuiˬ cawˬ ve le?

⁹ Tuꞈ ve hkanˍ ve gʼa hpuˇ htaˇ, hkʼaˬ htaˆ kaꞈ hpawnˬ daꞈ˗e gʼa tuˬ ngaˬ hui haꞈ hanˉ ve gʼa hpeuꞈ maw piˇ ve yoˬ. Awˬ viˉ awˬ nyi teˇ hpaˍ nyi ma luˬ ve, awˬ gʼaˇ nuˇ ve, maˇ heˆ leh maˇ chehˇ sha ve htawˇ kaꞈ hpawnˬ daꞈ˗e gʼa ve yoˬ. Teˇ hpaˍ hpaˍ yawˇ hui ve yehˬ hkʼaw ve chaw maˇ heˆ leh mvuhˇ miˬ uˉ peunˍ paˍ tawˍ piˇ ve htawˇ, yawˇ hui haꞈ hanˉ leh hpawnˬ daꞈ˗e ve yoˬ. Awˬ viˉ awˬ nyi yawˇ hui yonˍ ve htaꞈ pa taw htawnˍ hkʼaw lo gʼa chehˇ ve ngaˬ hui ve awˬ lawn gʼa kaˇ htaˇ, yawˇ hui hkʼaˬ hkʼe dawˇ tuˬ le? (Heˍbrehˇ 13:3) Ngaˬ hui tuꞈ ve hkanˍ ve gʼa hpuˇ ve htawˇ Yaˬhoˉvaˬ ve kanˉ te sheˍ ve tehꞈ yawˇ hui gʼa kaˇ htaˇ, yawˇ hui awˬ gʼaˇ gʼa leh yonˍ ve, haꞈ hanˉ ve, leh ka tiꞈ yeˬ ve htaꞈ haꞈ shaˉ gʼa tuˬ yoˬ. Pawˇluꞈ kaꞈ gʼa hpuˇ jaw ve yoˬ. Yawˇ Roˉmaꞈ ve htawnˍ hkʼaw lo chehˇ htaˇ, awˬ viˉ awˬ nyi ka tiꞈ yeˬ ve hkʼaw Gʼuiˬ sha ve kanˉ te ve htaꞈ gʼa kaˇ htaˇ, yawˇ ha lehˬ ve yoˬ. (Hpiˇliˇpiˆ 1:3-5, 12-14) Yawˇ htaꞈ maˇ hpehˇ piˇ sheˍ htaˇ maˇ heˆ leh hpehˇ piˇ peuˬ hkʼawꞈ nawˉ, Pawˇluꞈ awˬ viˉ awˬ nyi Heˍbrehˇ chaw htaꞈ liꞈ bvuhꞈ feu piˇ ve yoˬ. Liꞈ oˇ ve hkʼaw ka tiꞈ yeˬ ve Hkriꞈ yaˇ htaꞈ kʼoˆ piˇ ve, “awˬ viˉ awˬ nyi haꞈ daꞈ ve teˇ ceuˬ nawˬ hui hkʼaˬ htaˆ kaꞈ cawˬ piˇ˗oˆ.” Leh hpawnˬ daꞈ ve teˇ ceuˬ htaꞈ taˇ baˬ taˉ. —Heˍbrehˇ 10:24, 25; 13:1.

10-11. (a) Yeˍsuˆ suh ve dawˇ nawˇ tuˬ hpawnˬ daꞈ ve ngaˬ hui a shu htaꞈ kuˬ piˇ cawˇ ve le? (b) Eˇfeˇsuꞈ liꞈ 1:7 hkʼaw aˬ htoꞈ ma te ngaˬ hui chi hkʼe te cawˇ ve le?

¹⁰ Ngaˬ viˉ ngaˬ nyi, kanˉ teˇ geh te ve chaw, leh awˬ paˇ awˬ kui chehˇ ve chaw htaꞈ Yeˍsuˆ suh ve dawˇ nawˇ tuˬ hpawnˬ daꞈ ve laˬ tuˬ kuˬ piˇ htaˇ, ngaˬ hui kaꞈ haꞈ hanˉ ve cawˬ ve yoˬ. Aˬ htoꞈ ma te yawˇ hui htaꞈ kuˬ piˇ ve le? Yaˬhoˉvaˬ leh Yeˍsuˆ ngaˬ hui awˬ pon te laˇ ve htaꞈ awˬ hpfuhˇ shiˍ ve yoˬ. Chi htaꞈ pa taw, awˬ nu ve chaw htaꞈ laˬ tcuh gaˇ ve yoˬ. Yaˬhoˉvaˬ ha kʼaˉ ve leh htaiˍ hkʼawꞈ ve yawˇ hui kaꞈ  awˬ bon gʼa ve tehꞈ shiˍ tcuh gaˇ ve yoˬ.—Eˇfeˇsuꞈ 1:7 gʼaw sheˍ; Hpeuꞈ maˍ ve 22:17.

¹¹ Ngaˬ hui haꞈ hanˉ leh hpawnˬ daꞈ˗e htaˇ, te hkʼaˇ dawˇ hkʼaˇ awˬ hpfuhˇ hkʼaˆ jaˇ ve teˇ ceuˬ cawˬ sheˍ ve yoˬ. Gʼuiˬ sha leh yawˇ ve Yaˇ paˍ chi ve htaꞈ hpeuꞈ maw laˇ ve teˇ gʼaˇ kaꞈ tehˆ maˇ gʼa.

12. (a) Yaˬhoˉvaˬ leh Yeˍsuˆ htaꞈ haꞈ maˇ la tuˬ hpawnˬ daꞈ ve hkʼaˬ hkʼe ga laˇ ve le? (b) 2 Kawˇrenˍhtuˆ liꞈ 5:14, 15 hkʼaw kʼoˆ ve hkʼaˬ hkʼe te Yeˍsuˆ htaꞈ henˇ yuˬ cawˇ ve le?

¹² Ngaˬ hui Yaˬhoˉvaˬ leh Yeˍsuˆ htaꞈ haꞈ ve pa taw, hpawnˬ daꞈ˗e gaˇ ve yoˬ. Hpawnˬ daꞈ ve hkʼaw gʼa henˇ ve awˬ ceuˬ teˇ hpaˍ ngaˬ hui Yaˬhoˉvaˬ leh yawˇ ve Yaˇ paˍ htaꞈ haꞈ tuˬ te laˇ ve yoˬ. Yawˇ huiˉ maˬ ngaˬ hui awˬ pon aˬ htoꞈ ma te laˇ peuˬ ve, hpawnˬ daꞈ ve hkʼaw hkʼaˬ htaˆ kaꞈ tawnˇ taˍ tcuh laˇ ve yoˬ. (Roˉmaꞈ 5:8) Yeˍsuˆ suh ve dawˇ nawˇ tuˬ hpawnˬ daꞈ ve yawˇ huiˉ maˬ ngaˬ hui htaꞈ hkʼaˬ hkʼe taw haꞈ ve tehꞈ maˍ laˇ leh htaiˍ hkʼawꞈ ve htaꞈ awˬ hpfuhˇ maˇ shiˍ sheˍ ve chaw htaꞈ kaꞈ shiˍ tcuh piˇ ve yoˬ. Awˬ ceuˬ chi ve htaꞈ ngaˬ hui awˬ hpfuhˇ shiˍ ve pa taw, ngaˬ hui a shaꞈ teꞈ kuiˬ hkʼaw teˇ nyi le le coˇ caˇ leh Yeˍsuˆ htaꞈ henˇ yuˬ ve yoˬ. (2 Kawˇrenˍhtuˆ 5:14, 15 gʼaw sheˍ.) Chi hkʼoˆ kaꞈ, Yaˬhoˉvaˬ htaiˍ hkʼawꞈ ve gu taˍ laˇ ve pa taw, yawˇ htaꞈ chiˇ mvuh gaˇ ve yoˬ. Ngaˬ hui te gʼa ve teˇ ceuˬ lehˬ hpawnˬ daꞈ htaˇ nyi ma hkʼaw cawˬ ve htaꞈ hkʼawꞈ ve yoˬ.

13. Ngaˬ hui Yaˬhoˉvaˬ leh yawˇ ve Yaˇ paˍ htaꞈ haꞈ ve hkʼaˬ hkʼe hpeuꞈ maw piˇ gʼa tuˬ le? Kʼoˆ maˍ laˇ sheˍ.

¹³ Ngaˬ hui Yaˬhoˉvaˬ leh yawˇ ve Yaˇ paˍ htaꞈ haꞈ ve tehꞈ hpeuꞈ maw piˇ gaˇ ve kʼo, yawˇ huiˉ maˬ awˬ pon awˬ yanˇ gʼa yuˬ tanˇ cawˇ ve yoˬ. Laiˉ pawˆ kʼo ngaˬ hui hpawnˬ daꞈ˗e gʼa tuˬ teˇ ceuˬ ceuˬ htaꞈ yuˬ tanˇ ve yoˬ. Hkriꞈ yaˇ awˬ moˍ laiˉ kaˬ kʼo kanˉ te peuˬ hkʼawꞈ nawˉ, maˇ˗awˍ ve kʼo heuˬ jaˇ ve htawˇ hpawnˬ daꞈ˗e ve yoˬ. Awˬ nu ve hpawnˬ daꞈ ve teˇ pawˆ lehˬ hkawꞈ nyi shinˉ nyi shu gʼaˇ jehˇ htaˇ yoˬ. Ngaˬ hui heuˬ jaˇ ve htawˇ hpawnˬ daꞈ˗e ve Yaˬhoˉvaˬ mawˬ˗aw laˇ? Mawˬ ve yoˬ! Ngaˬ hui coˇ caˇ leh Yaˬhoˉvaˬ htaꞈ hkʼaˬ hkʼe taw haꞈ ve yawˇ mawˬ htaˇ ha lehˬ ve yoˬ.—Maˍkuˆ 12:41-44.

14. Ngaˬ hui haꞈ pehnˇ ve a shu yawˇ awˬ to yuˬ tanˇ ve chi Yeˍsuˆ hkʼaˬ hkʼe te maˍ laˇ ve le?

¹⁴ Haꞈ pehnˇ ve awˬ yanˇ yuˬ tanˇ ve Yeˍsuˆ ngaˬ hui htaꞈ te maˍ laˇ taˍ peuˬ. Yawˇ ve awˬ laꞈ gʼawˇ awˬ pon hkanˍ suh ve yoˬ. A shaꞈ teꞈ kuiˬ hkʼaw yawˇ awˬ to aꞈ kehˉ shu htaꞈ a yeˇ yuˬ ve yoˬ. Tawˇ pa haˉ te kʼo, yawˇ heuˬ jaˇ leh dawˇ maˇ ve htawˇ, awˬ laꞈ gʼawˇ geh maˇ maˇ chehˇ ve yoˬ. (Luˉkaꞈ 22:39-46) Yawˇ shu htaꞈ aˬ htoꞈ ma piˇ gʼa ve hkʼaˬ htaˆ kaꞈ  dawˇ nyi ve yoˬ. Yawˇ shu geh gʼa tuˬ ve awˬ ceuˬ htaꞈ maˇ dawˇ nyi. (Maꞈhtehˍ 20:28) Ngaˬ hui Yaˬhoˉvaˬ leh awˬ viˉ awˬ nyi htaꞈ haꞈ ve oˇ ve yeˬ ve kʼo, Yeˍsuˆ suh ve dawˇ nawˇ tuˬ hpawnˬ daꞈ ve leh awˬ kaˍ awˬ nu ve hpawnˬ daꞈ˗e gʼa tuˬ ngaˬ hui te gʼa ve hkʼe te ve yoˬ.

15. Ngaˬ hui a shu htaꞈ a yeˇ yuˬ leh ga piˇ gaˇ ve le?

¹⁵ Awˬ tehˬ haꞈ daꞈ ve Hkriꞈ yaˇ awˬ moˍ hkʼaw chehˇ leh Yeˍsuˆ suh ve dawˇ nawˇ tuˬ hpawnˬ daꞈ ve maˇ laˬ jaw sheˍ ve chaw htaꞈ gʼa kuˬ piˇ ve ha lehˬ jaˇ. Yaꞈ hkʼaˇ, “yehˬ yaˇ kʼa yaˇ tehꞈ kʼoˆ ve yonˍ ve chaw teˇ hpaˍ” htaꞈ, Gʼuiˬ sha ve kanˉ maˇ te˗o ve chaw htaꞈ ngaˬ hui a yeˇ hkʼa dehꞈ yuˬ leh ga piˇ gaˇ ve yoˬ. (Gaˍlaˍtiˆ 6:10) Yawˇ hui hpawnˬ daꞈ la tuˬ, a yeˇ uiˍ jaˇ ve Yeˍsuˆ suh ve dawˇ nawˇ tuˬ hpawnˬ daꞈ ve laˬ tuˬ, ngaˬ hui haꞈ pehnˇ ve hkʼaw awˬ gʼaˇ piˇ ve yoˬ. Yaˬhoˉvaˬ leh Yeˍsuˆ hkʼe chaw chi ve teˇ hpaˍ kʼawꞈ la htaˇ, ngaˬ hui ha lehˬ jaˇ. Ngaˬ hui haꞈ jaˇ ve Awˬ pa leh yawˬ hawˉ shehˍ hpaˇ geh yawˇ hui kʼawꞈ la ve yoˬ.—Maꞈhtehˍ 18:14.

16. (a) Ngaˬ hui hkʼaˬ hkʼe te awˬ gʼaˇ piˇ daꞈ gʼa tuˬ le? Hpawnˬ daꞈ ve chi hkʼaˬ hkʼe ga laˇ gʼa tuˬ le? (b) Aˬ htoꞈ ma te Yoˇhanˬ liꞈ 3:16 hkʼaw Yeˍsuˆ ve tawˇ hkawˇ htaꞈ ngaˬ hui chi teˇ tcuhˉ dawˇ nyi cawˇ ve le?

¹⁶ Shinˉ peuˬ 5 nyi mvuhˇ hpeuꞈ, ha pa 4 maˬ 19 nyi 2019 hkʼawꞈ htaˇ, Yeˍsuˆ suh ve dawˇ nawˇ tuˬ hpawnˬ daꞈ ve te tuˬ yoˬ. Oˇ ve teˇ nyi maˇ gaˬ sheˍ htaˇ, te gʼa ve hkʼe teˇ gʼaˇ le le htaꞈ kuˬ piˇ sheˍ. (Awˇ ceˍ awˇ fa “ Nawˬ yawˇ hui htaꞈ kuˬ piˇ cawˇ˗aw laˇ?” htaꞈ nyi sheˍ.) Ngaˬ hui teˇ gʼaˇ leh teˇ gʼaˇ awˬ gʼaˇ piˇ daꞈ tuˬ, Yaˬhoˉvaˬ gu taˍ laˇ ve hpawnˬ daꞈ ve hkʼaˬ htaˆ kaꞈ kʼai sheˍ. Miˬ guiˬ chi ve awˬ leh meuˇ gaˬ la paˇ neˇ htaˇ, ngaˬ hui hkʼaˬ htaˆ kaꞈ nyi ma nuˇ nehˬ tuˬ, haꞈ hanˉ tuˬ, leh haꞈ daꞈ tuˬ, hpawnˬ daꞈ ve ga laˇ ve yoˬ. (1 Hteˇsaˍlawˇniˆ 5:8-11) Yaˬhoˉvaˬ leh yawˇ ve Yaˇ paˍ ve haꞈ pehnˇ ve htaꞈ gʼa htaˇ, ngaˬ hui hkʼaˬ hkʼe dawˇ ve nyi ma hkʼaw te tawˆ la sheˍ!—Yoˇhanˬ 3:16 gʼaw sheˍ.