1-2. (a) Yeˍsuˆ suh ve dawˇ nawˇ tuˬ hpawnˬ daꞈ ve chi te tuˬ awˬ hkʼaˇ maˇ haˍ ve tehꞈ ngaˬ hui htaꞈ hkʼaˬ hkʼe maˍ laˇ ve le? (b) Yeˍsuˆ ve te hkʼaˇ dawˇ hkʼaˇ aˬ htoꞈ ma htaꞈ ngaˬ hui chaˬ nyi tuˬ le?

 Teˇ hkʼawꞈ le le Yeˍsuˆ suh ve dawˇ nawˇ tuˬ hpawnˬ daꞈ ve aˬ htoꞈ ma hpehꞈ la ve nawˬ kʼoˆ maˍ laˇ gʼa˗aw laˇ? Ngaˬ hui maˇ˗awˍ ve Jawˇmawˇ ve mvuhˇ haˉ awˍ caˇ ve htaꞈ tawnˇ gʼa ve yoˬ. Aˬ htoꞈ ma pa taw le? Chi ve maˇ haˍ ve pa taw yoˬ. Yaꞈ hkʼaˇ, hpawnˬ daꞈ ve chi a yeˇ uiˍ jaˇ. Chi htaꞈ pa taw, ngaˬ hui htawˇ dawˇ nawˬ dawˇ cawˬ ve, ‘aˬ htoꞈ ma te hpawnˬ daꞈ ve chi te gʼa ve le?’

² Yeˍsuˆ miˬ guiˬ hkʼoˆ chehˇ htaˇ, awˬ tehˬ ve a yeˇ uiˍ ve htaꞈ maˍ tuˬ yawˇ hkʼa sha sha˗ehˍ leh na sha ve awˬ hkʼaˇ yehˇ ve tehꞈ teˇ gʼaˇ le le hkʼa dehꞈ shiˍ ve yoˬ. (Maꞈhtehˍ 7:28, 29) Chi hkʼa shuˍ shuˍ, yawˇ suh ve htaꞈ ngaˬ hui dawˇ nawˇ tuˬ, te ve awˬ hkʼaˇ maˇ haˍ ve htaꞈ maˍ laˇ ve yoˬ. Yaꞈ hkʼaˇ, awˬ hkʼaˇ chi ve a yeˇ uiˍ jaˇ leh tcuhˉ kuiˬ cawˬ ve yoˬ. Jawˇmawˇ ve mvuhˇ haˉ awˍ caˇ ve chi, leh Yeˍsuˆ kʼoˆ ve te ve htaꞈ teˇ geh chaˬ nyi sheˍ. Yeˍsuˆ nyi ma nuˇ nehˬ ve, haꞈ hanˉ ve, leh haꞈ pehnˇ ve hkʼaˬ hkʼe ma cawˬ ve tehꞈ ngaˬ hui shiˍ maˇ la tuˬ yoˬ. Ngaˬ hui hkʼaˬ hkʼe te leh yawˇ htaꞈ henˇ yuˬ gʼa tuˬ kaꞈ henˇ tuˬ yoˬ.

3. Maꞈhtehˍ liꞈ 26:26-28 hkʼaw kʼoˆ taˍ ve hkʼe, Yeˍsuˆ suh ve dawˇ nawˇ tuˬ hpawnˬ daꞈ ve te ve hkʼaˬ hkʼe taw sha ve le? Awˬ heˆ chi ve 2 ceuˬ aˬ htoꞈ ma le?

³ Yeˍsuˆ yawˇ suh ve htaꞈ dawˇ nawˇ tuˬ, tcuh yaˇ 11 gʼaˇ htaꞈ te maˍ piˇ ve yoˬ. Yawˇ Paˍsaˍhkanˍ pawehˇ hkʼaw cawˬ taˍ ve awˬ ceuˬ htaˬ yehˇ leh mvuhˇ haˉ awˍ caˇ tuˬ hkʼa sha sha˗ehˍ te ve yoˬ. (Maꞈhtehˍ 26:26-28 gʼaw sheˍ.) Yawˇ hkaoˍ monˇ diˇ maˇ keu ve leh a pehˉ meuˇ gʼuiˬ cawˬ taˍ ve htaꞈ yehˇ ve yoˬ. Awˬ heˆ chi ve 2 ceuˬ lehˬ yawˇ  ve awˬ to leh awˬ suhˍ biˇ jaˇ ve awˬ tan hpehꞈ leh, maˇ maw ve awˬ yanˇ Yeˍsuˆ yawˇ hui awˬ pon tuˉ tanˇ piˇ tuˬ yoˬ tehꞈ Yeˍsuˆ tcuh yaˇ hui htaꞈ kʼoˆ piˇ ve yoˬ. Mvuhˇ haˉ awˍ caˇ ve a yeˇ uiˍ jaˇ ve chi hkʼa sha sha˗ehˍ te gʼa ve tehꞈ tcuh yaˇ hui maˇ anˇ. Aˬ htoꞈ ma pa taw le?

4. Yeˍsuˆ suh ve dawˇ nawˇ tuˬ hpawnˬ daꞈ ve hkʼa sha sha˗ehˍ te ve ngaˬ hui na gʼa tuˬ, yawˇ Maˍhtaˆ htaꞈ kʼoˆ piˇ jaw ve ngaˬ hui htaꞈ aˬ htoꞈ ma maˍ laˇ ve le?

⁴ Aˬ htoꞈ ma hpehꞈ la ve le dawˇ nyi sheˍ. Yeˍsuˆ Gʼuiˬ sha ve kanˉ te ve 3 hkʼawꞈ teˇ hkʼawꞈ htaˇ yawˇ awˬ chawˇ daꞈ jaˇ ve Laˍzaˍruˆ, Maˍhtaˆ, leh Maˍriˆ ve aˉ hkʼaw lo kʼai htaˇ, yawˇ chaw yaˇ htaꞈ tanˬ maˍ piˇ ve yoˬ. Hkehˉ chaw a yeˇ uiˍ jaˇ ve htaꞈ haꞈ yuˬ tuˬ, Maˍhtaˆ te caˍ te taw ve kanˉ maˇ jaˇ ve yoˬ. Yeˍsuˆ chi htaꞈ mawˬ htaˇ, caˇ tuˬ daꞈ jaˇ ve hkʼaˬ htaˆ kaꞈ cawˬ tuˬ maˇ loˍ tehꞈ yawˇ Maˍhtaˆ htaꞈ nyi ma nuˇ nehˬ ve hkʼaw kʼoˆ piˇ ve yoˬ. (Luˉkaꞈ 10:40-42) Yeˍsuˆ yawˇ ve a shaꞈ tanˇ piˇ tuˬ gaˬ la paˇ neˇ htaˇ, yawˇ hkʼaˇ yawˇ beˆ maˍ ve hkawˇ htaꞈ gʼaꞈ te ve yoˬ. Yawˇ mvuhˇ haˉ awˍ caˇ ve hkʼa sha sha˗ehˍ te ve yoˬ. Awˬ lawn chi ve Yeˍsuˆ htaꞈ caˉ daꞈ ve aˬ htoꞈ ma maˍ laˇ ve le?

5. Mvuhˇ haˉ awˍ caˇ ve chi Yeˍsuˆ htaꞈ caˉ daꞈ ve ngaˬ hui htaꞈ aˬ htoꞈ ma maˍ laˇ ve le? Chi lehˬ Hpiˇliˇpiˆ liꞈ 2:5-8 htaꞈ hkʼaˬ hkʼe te caˉ daꞈ ve le?

⁵ Yeˍsuˆ kʼoˆ ve leh te ve teˇ ceuˬ le le nyi ma nuˇ nehˬ jaˇ. Yawˇ miˬ guiˬ hkʼoˆ chehˇ ve awˬ leh meuˇ teˇ haˉ htaˇ hkʼa gaˬ chi hkʼe te ve yoˬ. (Maꞈhtehˍ 11:29) Chaw yaˇ tuˉ tanˇ jaw ve hkʼa peu˗eˬ aꞈ kehˉ biˇ jaˇ ve htaꞈ Yeˍsuˆ tuˉ tanˇ˗a te leh, Yaˬhoˉvaˬ yawˇ htaꞈ mvuhˇ naw ma hkʼoˆ awˬ meꞈ awˬ hponˇ cawˬ ve hkʼaw kʼawꞈ teꞈ tu la piˇ tuˬ tehꞈ yawˇ shiˍ ve yoˬ. Yaꞈ hkʼaˇ, hti caˇ hti daw ve daꞈ jaˇ ve te laˇ tuˬ ve htaꞈ yawˇ maˇ loˍ. Yawˇ suh ve htaꞈ dawˇ nawˇ tuˬ teˇ hkʼawꞈ teˇ pawˆ mvuhˇ haˉ awˍ caˇ ve hkʼa sha sha˗ehˍ te˗o tehꞈ tcuh yaˇ htaꞈ kʼoˆ piˇ ve yoˬ. (Yoˇhanˬ 13:15; 1 Kawˇrenˍhtuˆ 11:23-25) Mvuhˇ haˉ awˍ caˇ ve chi Yeˍsuˆ uiˍ muiˬ caˆ muiˬ ve maˇ heˆ tehꞈ hpeuꞈ maw laˇ ve yoˬ. Mvuhˇ naw ma hkʼoˆ chehˇ ve Jawˇmawˇ nyi ma nuˇ nehˬ jaˇ ve tehꞈ ngaˬ hui shiˍ htaˇ ha lehˬ jaˇ. Liꞈ hpu hkʼaw kʼoˆ ve, “Yeˍsuˆ Hkriꞈ nyi ma taˍ ve hkʼe, nawˬ hui htawˇ taˍ˗oꞈ.  . . Yaꞈ hkʼaˇ, yawˇ ve awˬ meꞈ awˬ hponˇ htaꞈ kʼehˆ teh taˉ leh, awˬ ceˬ ve awˬ hoꞈ awˬ han htaꞈ deh leh, chaw yaˇ hkʼa shuˍ shuˍ hpehꞈ la ve yoˬ. Chi hkʼoˆ kaꞈ, yawˇ chaw yaˇ hpehꞈ tehꞈ ve htaꞈ shu gʼa mawˬ ve yoˬ. Yawˇ awˬ to htaꞈ yawˇ taˍ nehˬ leh, suh htaˇ hkʼa gaˬ na yuˬ ve yoˬ. Suh ve oˇ ve lehˬ suhˆ hkuiˉ daw hkʼoˆ lo hkanˍ suh ve teˇ ceuˬ yoˬ.”—Hpiˇliˇpiˆ 2:5-8, MGS.

6. Ngaˬ hui tuꞈ ve hkanˍ ve gʼa hpuˇ htaˇ, hkʼaˬ hkʼe te Yeˍsuˆ nyi ma nuˇ nehˬ ve htaꞈ henˇ yuˬ gʼa tuˬ le?

⁶ Yeˍsuˆ nyi ma nuˇ nehˬ ve htaꞈ hkʼaˬ hkʼe te henˇ yuˬ gʼa tuˬ le?  Ngaˬ hui aꞈ kehˉ shu htaꞈ a yeˇ gʼa yuˬ ve yoˬ. (Hpiˇliˇpiˆ 2:3, 4) Yeˍsuˆ miˬ guiˬ hkʼoˆ chehˇ ve awˬ leh meuˇ teˇ haˉ htaˇ ve htaꞈ dawˇ nyi sheˍ. Maˇ maw kʼo, tuꞈ jaˇ hkanˍ jaˇ ve hkʼaw gʼa suh tuˬ yoˬ tehꞈ yawˇ shiˍ ve htawˇ, yawˇ ve tcuh yaˇ hui ka tiꞈ yeˬ ve htaꞈ awˬ tehˬ dawˇ haˍ ve yoˬ. Yawˇ suh ve htaꞈ yawˇ hui nyi ma luˬ jaˇ ve yoˬ. Chi htaꞈ pa taw, Yeˍsuˆ awˬ leh meuˇ teˇ haˉ htaˇ yawˇ hui htaꞈ maˍ piˇ leh awˬ gʼaˇ piˇ ve yoˬ. (Yoˇhanˬ 14:25-31) Yeˍsuˆ nyi ma nuˇ nehˬ leh yawˇ aꞈ kehˉ awˬ nu ve chaw htaꞈ dawˇ haˍ ve yoˬ. Yawˇ ngaˬ hui awˬ pon daꞈ jaˇ ve henˇ yuˬ tuˬ te maˍ laˇ taˍ peuˬ!

7. Jawˇmawˇ ve mvuhˇ haˉ awˍ caˇ ve te peuˬ hkʼawꞈ nawˉ, yawˇ haꞈ hanˉ ve hkʼaˬ hkʼe hpeuꞈ maw laˇ ve le?

⁷ Jawˇmawˇ ve mvuhˇ haˉ awˍ caˇ ve tanˬ te peuˬ hkʼawꞈ nawˉ, Yeˍsuˆ haꞈ hanˉ jaˇ. Yawˇ aˬ htoꞈ ma te ve le? Yeˍsuˆ yawˇ Awˬ pa ve hkawˇ na yuˬ leh Awˬ pa ve a loˍ htaꞈ gʼaꞈ te ve yoˬ. Chi hkʼe te htaˇ Gʼuiˬ sha htaꞈ nyi cha ve chaw teˇ hpaˍ Yeˍsuˆ htaꞈ chaw haiˬ teˇ gʼaˇ hkʼe shawˍ leh tiˇ pehˍ piˇ tuˬ yawˇ shiˍ ve htawˇ, gʼaꞈ te ve yoˬ. (Maꞈhtehˍ 26:65, 66; Luˉkaꞈ 22:41, 42) Yaˬhoˉvaˬ ve awˬ meh htaꞈ yawˆ yan tuˬ, yawˇ uˉ peunˍ ve hpawˇ chehˇ gʼa tuˬ, leh venˇ baˆ dawˇ hpfuhˆ ve chaw teˇ hpaˍ co co taiˍ taiˍ ve a shaꞈ gʼa tuˬ, Yeˍsuˆ ka tiꞈ yeˬ ve yoˬ. Awˬ laꞈ gʼawˇ maˇ maw ve awˬ yanˇ hkʼaw gʼa hpuˇ tuˬ ve awˬ ceuˬ htaꞈ haꞈ yuˬ gʼa tuˬ kaꞈ yawˇ gu piˇ ve yoˬ.

8. (a) Yeˍsuˆ yawˇ ve tcuh yaˇ hui htaꞈ aˬ htoꞈ ma kʼoˆ piˇ ve le? (b) Yeˍsuˆ suh peuˬ hkʼawꞈ nawˉ laiˉ hkʼawꞈ htaˇ, awˬ laꞈ gʼawˇ yawˇ haꞈ hanˉ ve htaꞈ hkʼaˬ hkʼe henˇ yuˬ ve le?

⁸ Yeˍsuˆ haꞈ hanˉ ve awˬ nu ve teˇ hkʼaˇ kaꞈ hpeuꞈ maw piˇ sheˍ ve yoˬ. Yawˇ laiˉ ceuˬ dawˇ haˍ dawˇ hkiˉ ve htawˇ, tcuh yaˇ hui loˍ ve awˬ ceuˬ htaꞈ yawˇ a yeˇ yuˬ ve yoˬ. Yawˇ Yuˇdaꞈ htaꞈ tawˆ˗e tcuh peuˬ hkʼawꞈ nawˉ, yawˇ hkʼa sha sha˗ehˍ ve pawehˇ caˇ tuˬ te maˍ piˇ ve yoˬ. Yeˍsuˆ ve awˬ suhˍ leh ka tiꞈ shaˉ caˆ awˬ suhˉ htaꞈ pa taw, leuˆ yuˬ taˍ ve awˬ laꞈ gʼawˇ awˬ bon gʼa ve tehꞈ tawnˇ gʼa tuˬ, mvuhˇ haˉ awˍ caˇ ve chi ga piˇ ve yoˬ. (1 Kawˇrenˍhtuˆ 10:16, 17) Yawˇ hui mvuhˇ naw ma hkʼoˆ taˆ˗e  keunˍ ve tehꞈ yawˇ hui hpeuꞈ maw piˇ tuˬ, Yeˍsuˆ leh yawˇ ve Awˬ pa yawˇ hui htaꞈ aˬ htoꞈ ma te tcuh gaˇ ve, yawˇ ve awˬ laꞈ gʼawˇ htaꞈ kʼoˆ piˇ ve yoˬ. (Yoˇhanˬ 15:12-15) Tcuh yaˇ hui awˬ gʼuˇ suhˍ hpawˇ tuꞈ ve hkanˍ ve aˬ htoꞈ ma gʼa hpuˇ tuˬ ve kaꞈ kʼoˆ piˇ ve yoˬ. Peuˬ hkʼawꞈ nawˉ Yeˍsuˆ yawˇ ve awˬ lawn htaꞈ cuˇ leh awˬ gʼaˇ piˇ ve “nyi ma haꞈ hanˉ te chehˇ˗oˆ” tehꞈ kʼoˆ ve piˇ ve yoˬ! (Yoˇhanˬ 16:1-4, 33, MGS) Laiˉ hkʼawꞈ peuˬ hkʼawꞈ nawˉ Yeˍsuˆ ve awˬ laꞈ gʼawˇ yawˇ awˬ yanˇ yuˬ tanˇ ve htaꞈ henˇ yuˬ leh haꞈ hanˉ ve yoˬ. Yawˇ hui tuꞈ ve hkanˍ ve gʼa hpuˇ htaˇ, laiˉ ceuˬ yuˬ tanˇ leh ga daꞈ ve yoˬ.—Heˍbrehˇ 10:33, 34.

9. Yeˍsuˆ haꞈ hanˉ ve htaꞈ ngaˬ hui hkʼaˬ hkʼe te henˇ yuˬ gʼa tuˬ le?

⁹ Yeˍsuˆ haꞈ hanˉ ve htaꞈ ngaˬ hui kaꞈ henˇ yuˬ ve yoˬ. Tawˇ pa haˉ te kʼo, awˬ viˉ awˬ nyi yawˇ hui yonˍ ve htaꞈ pa taw tuꞈ ve hkanˍ ve gʼa hpuˇ leh yawˇ hui htaꞈ ga piˇ gʼa tuˬ ngaˬ hui haꞈ hanˉ ve gʼa cawˬ cawˇ ve yoˬ. Teˇ pawˆ pawˆ kʼo, awˬ viˉ awˬ nyi htaꞈ maˇ hteˇ maˇ cawˇ ve hkʼaw htawnˍ hkʼaw lo yuˬ haw piˇ ve yoˬ. Awˬ lawn chi hkʼe ve hpehꞈ la htaˇ, ngaˬ hui te gʼa ve hkʼe te piˇ ve yoˬ. Yawˇ hui awˬ tan tawˇ kaꞈ yaw ve yoˬ. (Hpiˇliˇpiˆ 1:14; Heˍbrehˇ 13:19) Awˬ nu ve teˇ ceuˬ ngaˬ hui te gʼa ve lehˬ “haꞈ hanˉ” leh hto toˇ ve yoˬ. (Tcuh yaˇ 14:3) Fawˉ mehˍ laˇ ve gʼa hpuˇ ve htawˇ, Yeˍsuˆ hkʼe ngaˬ hui kaꞈ Gʼuiˬ sha ve mvuhˇ miˬ hto toˇ ve yoˬ. Yaꞈ hkʼaˇ, ngaˬ hui haꞈ hanˉ ve maˇ cawˬ kʼo aˬ htoꞈ ma te gʼa tuˬ le?

10. Yeˍsuˆ suh ve dawˇ nawˇ tuˬ hpawnˬ daꞈ ve maˇ gaˬ sheˍ htaˇ, ngaˬ hui aˬ htoꞈ ma te cawˇ ve le? Aˬ htoꞈ ma pa taw le?

¹⁰ Yeˍsuˆ htaiˍ hkʼaw laˇ ve pa taw dawˇ law kuiˬ cawˬ gʼa ve htaꞈ ngaˬ hui dawˇ nyi htaˇ, haꞈ hanˉ ve kʼawꞈ cawˬ gʼa ve yoˬ. (Yoˇhanˬ 3:16; Eˇfeˇsuꞈ 1:7) Yeˍsuˆ suh ve dawˇ nawˇ tuˬ hpawnˬ daꞈ ve maˇ gaˬ sheˍ htaˇ, htaiˍ hkʼawꞈ ve gu teh taˍ laˇ ve htaꞈ ngaˬ hui dawˇ nyi leh awˬ bon uiˍ jaˇ kʼoˆ piˇ gaˇ ve yoˬ. Hkʼe te leh, Yeˍsuˆ suh ve dawˇ nawˇ tuˬ hpawnˬ daꞈ ve Liꞈ hpu awˬ tawn gu taˍ ve htaꞈ gʼaw leh, hkʼa dehꞈ dawˇ nyi leh bon lawˬ sheˍ. Chi hkʼe te htaˇ, awˬ heˆ leh oˇ ve htaꞈ caˉ daꞈ ve tuˉ tanˇ tuˬ awˬ hpfuhˇ hkʼaˬ hkʼe taw hkʼaˆ ve ngaˬ hui hkʼa dehꞈ na gʼa tuˬ yoˬ. Yeˍsuˆ leh Yaˬhoˉvaˬ ngaˬ hui awˬ pon te ve awˬ hpfuhˇ shiˍ htaˇ, ngaˬ hui leh ngaˬ hui haꞈ ve chaw awˬ bon hkʼaˬ hkʼe gʼa tuˬ ve htaꞈ na gʼa leh dawˇ law kuiˬ hkʼa tawˍ lehˆ mawˬ ve yoˬ. Chi ngaˬ hui haꞈ hanˉ leh awˬ leh hkʼa gaˬ yeunˇ hkanˍ gʼaˇ tuˬ ga laˇ ve yoˬ.—Heˍbrehˇ 12:3.

11-12. Ngaˬ hui aˬ htoꞈ ma gʼa henˇ˗oˬ ve le?

 ¹¹ Jawˇmawˇ ve mvuhˇ haˉ awˍ caˇ ve chi Yeˍsuˆ htaiˍ hkʼawꞈ laˇ ve awˬ hpfuhˇ leh yawˇ nyi ma nuˇ nehˬ leh haꞈ hanˉ ve ngaˬ hui tawnˇ gʼa tuˬ ga laˇ ve yoˬ. Yeˍsuˆ paw hkuˇ lonˉ hpehꞈ leh ngaˬ hui awˬ pon venˇ baˆ lawˬ hpehˇ laˇ ve, yawˇ nyi ma nuˇ nehˬ leh haꞈ hanˉ ve hkʼaˬ htaˆ kaꞈ cawˬ ve pa taw ngaˬ hui ha lehˬ jaˇ! (Heˍbrehˇ 7:24, 25) Ngaˬ hui awˬ bon uiˍ ve tehꞈ hpeuꞈ maw piˇ tuˬ, Yeˍsuˆ suh ve dawˇ nawˇ tuˬ hpawnˬ daꞈ ve yawˇ kʼoˆ taˉ laˇ ve hkʼe gʼaꞈ te cawˇ ve yoˬ. (Luˉkaꞈ 22:19, 20) Ngaˬ hui teˇ hkʼawꞈ le le chi hkʼe te ve lehˬ Niˆ sanˇ ha pa 14 nyi a yeˇ uiˍ jaˇ ve teˇ nyi htaꞈ cawˇ daꞈ ve yoˬ.

¹² Yeˍsuˆ hkanˍ suh laˇ tuˬ, te hkʼaˇ dawˇ hkʼaˇ teˇ ceuˬ yawˇ htaꞈ ga piˇ ve yoˬ. Awˬ lawn chi ngaˬ hui na gʼa tuˬ Jawˇmawˇ ve mvuhˇ haˉ awˍ caˇ ve hkʼa sha sha˗ehˍ te gʼa ve chi ga laˇ ve yoˬ. Yawˇ miˬ guiˬ hkʼoˆ chehˇ htaˇ, te hkʼaˇ dawˇ hkʼaˇ chi hkʼe ve cawˬ ve tehꞈ laiˉ gʼaˇ shiˍ ve yoˬ. Chi aˬ htoꞈ ma le?

13. Yaˬhoˉvaˬ leh Yeˍsuˆ haꞈ pehnˇ ve htaꞈ Yoˇhanˬ liꞈ 15:9 leh 1 Yoˇhanˬ liꞈ 4:8-10 hkʼaw hkʼaˬ hkʼe kʼoˆ ve le? Haꞈ pehnˇ ve chi a shu awˬ bon gʼa ve le?

¹³ Yeˍsuˆ te ve teˇ ceuˬ le le Yaˬhoˉvaˬ haꞈ pehnˇ ve ngaˬ hui htaꞈ hpeuꞈ maw laˇ ve yoˬ. (Yoˇhanˬ 15:9; 1 Yoˇhanˬ 4:8-10 gʼaw sheˍ.) A yeˇ uiˍ jaˇ ve lehˬ Yeˍsuˆ yawˇ ve a shaꞈ tanˇ laˇ ve yoˬ. Yaˬhoˉvaˬ leh yawˇ ve Yaˇ paˍ haꞈ pehnˇ ve hkʼaw htaiˍ hkʼawꞈ ve gu taˍ laˇ ve pa taw, leuˆ yuˬ taˍ ve chaw leh “awˬ kaˍ awˬ nu yawˬ” awˬ bon gʼa ve yoˬ. (Yoˇhanˬ 10:16; 1 Yoˇhanˬ 2:2) Mvuhˇ haˉ awˍ caˇ ve Yeˍsuˆ gu taˍ ve htaꞈ dawˇ nyi htaˇ, yawˇ awˬ laꞈ gʼawˇ htaꞈ haꞈ leh dawˇ haˍ ve tehꞈ ngaˬ hui shiˍ ve yoˬ. Ngaˬ hui hkʼaˬ hkʼe te shiˍ gʼa ve le?

14. Yeˍsuˆ yawˇ ve awˬ laꞈ gʼawˇ htaꞈ haꞈ pehnˇ ve hkʼaˬ hkʼe hpeuꞈ maw piˇ ve le?

¹⁴ Yeˍsuˆ lehˬ leuˆ yuˬ taˍ ve awˬ laꞈ gʼawˇ htaꞈ haꞈ pehnˇ ve hpeuꞈ maw piˇ ve yoˬ. Yawˇ mvuhˇ haˉ awˍ caˇ ve yawˇ hui hkʼa sha sha˗ehˍ gʼaꞈ te tuˬ gu piˇ ve, shoꞈ shaꞈ tuˬ te piˇ ve maˇ heˆ. Ponˬ kʼai ve awˬ yanˇ yawˇ hui teˇ hkʼawꞈ le le Yeˍsuˆ suh ve dawˇ nawˇ tuˬ hpawnˬ daꞈ ve gʼa te ve yoˬ. Yawˇ hui awˬ ti leh awˬ yanˇ maˇ shuˍ daꞈ ve htawˇ, htawnˍ hkʼaw lo chehˇ ve htawˇ kaꞈ gʼa te ve yoˬ. (Hpeuꞈ maˍ ve 2:10) Yawˇ hui Yeˍsuˆ kʼoˆ taˍ ve tawˇ hkawˇ htaꞈ gʼaꞈ te gʼa˗aw laˇ? Te gʼa ve yoˬ!

15-16. Chaw teˇ hpaˍ hpaˍ tuꞈ ve hkanˍ ve gʼa hpuˇ ve htawˇ, yawˇ hui Jawˇmawˇ ve mvuhˇ haˉ awˍ caˇ ve hkʼaˬ hkʼe te gʼa ve le?

¹⁵ Oˇ htaˇ teˇ co˗e te leh chi beuꞈ teˇ co˗e hkʼa gaˬ awˬ tehˬ ve Hkriꞈ yaˇ lehˬ Yeˍsuˆ suh ve dawˇ nawˇ tuˬ hpawnˬ daꞈ ve te gʼa tuˬ awˬ hkʼaˇ ca ve yoˬ. Teˇ pawˆ pawˆ kʼo haˍ ve awˬ ti lo chehˇ ve htawˇ, yawˇ hui te gʼa ve hkʼe te ve yoˬ. Chi htaꞈ dawˇ nyi sheˍ. Hehˆ paˍ mvuhˇ miˬ lo awˬ viˉ awˬ nyi Heh˗raw Hkin htawnˍ hkʼaw lo teˇ gʼaˇ tiˉ haw piˇ kuiˬ chehˇ htaˇ, awˬ hkʼaˇ awˬ suhˉ ca ve yoˬ. Yeˍsuˆ suh ve dawˇ nawˇ tuˬ hpawnˬ daꞈ ve awˬ heˆ htaꞈ gu tuˬ, yawˇ cawˬ taˍ ve awˬ ceuˬ htaꞈ cuˇ yiˍ cawˬ ve hkʼaw yehˇ ve yoˬ. Yawˇ awˬ nyi chi htaꞈ hkʼa dehꞈ shawˍ nyi ve yoˬ. Awˬ yanˇ gaˬ la htaˇ, Yeˍsuˆ suh ve dawˇ nawˇ tuˬ hpawnˬ daꞈ ve yawˇ teˇ gʼaˇ tiˉ haw piˇ kuiˬ hkʼaw te ve yoˬ. Yawˇ kʼa muiˬ hkawˇ kʼa ve, bon lawˬ ve, leh Liꞈ hpu htaꞈ cuˇ leh bon maˍ ve yoˬ.

¹⁶ Maꞈ lonˉ 2 pawˆ teˇ pawˆ htaˇ, haw tiˍ taˍ ve awˬ viˉ awˬ nyi yaˇ miˇ teˇ moˍ Jawˇmawˇ ve mvuhˇ haˉ awˍ caˇ ve te ve pa taw, yawˇ hui kawˆ tuˬ cawˬ ve yoˬ. Yaꞈ hkʼaˇ, chi hkʼe te tuˬ hkʼa sha sha˗ehˍ gu gʼa ve pa taw, yawˇ hui hkʼa dehꞈ hpawnˬ daꞈ gʼa ve yoˬ. Yawˇ hui kʼoˆ ve, “yawˇ hui piˉ htawˆ hkʼoˆ hpa hpuˉ˗ehˬ ve leh awˬ heˆ teh taˍ ve awˬ jaˇ lo gʼawˉ˗ehˍ te huˉ taˍ ve yoˬ. Daˆ aˬ miˍ baˬ ve kʼo shu yuˬ gʼa la ve htaꞈ kawˆ ve pa taw, bawehˇ hkʼaw ngaˇ chu taˬ tuˉ ve yoˬ. . . . Ngaˬ hui cawˬ taˍ ve awˬ gʼaˇ awˬ shaˉ hkʼa peu˗eˬ htaꞈ yehˇ leh yawˇ ve awˬ meh daꞈ kehˬ ve htaꞈ shu chiˇ mvuh leh yawˆ yan  tuˬ mvuhˇ naw ma hkʼoˆ chehˇ ve ngaˬ hui ve Awˬ pa geh ka tiꞈ te taˍ peuˬ ve yoˬ.” Yawˇ hui yonˍ ve daꞈ ve henˇ yuˬ tuˬ awˬ tehˬ hpehꞈ ve yoˬ! Tuꞈ ve hkanˍ ve hkʼaw gʼa chehˇ ve htawˇ, ngaˬ hui Yeˍsuˆ suh ve dawˇ nawˇ tuˬ hpawnˬ daꞈ ve te gʼa ve yoˬ! Chi Yeˍsuˆ haꞈ pehnˇ ve hpeuꞈ maw laˇ ve yoˬ.

17. Ngaˬ hui a shu yawˇ awˬ to htaꞈ hkʼaˬ hkʼe na nyi cawˇ ve le?

¹⁷ Yeˍsuˆ suh ve dawˇ nawˇ tuˬ hpawnˬ daꞈ ve gaˬ la paˇ neˇ htaˇ, ngaˬ hui a shu yawˇ awˬ to htaꞈ na nyi cawˇ ve, ‘ngaˬ hkʼaˬ hkʼe te Yeˍsuˆ htaꞈ henˇ yuˬ leh awˬ nu ve chaw htaꞈ haꞈ maˇ la gʼa tuˬ le? Ngaˬ loˍ ve aꞈ kehˉ awˬ viˉ awˬ nyi loˍ ve htaꞈ dawˇ nyi˗aw laˇ? Yawˇ hui piˇ gʼa ve aꞈ kehˉ ngaˬ awˬ viˉ awˬ nyi geh dawˇ law ve laˇ? Maˇ heˆ leh yawˇ hui piˇ maˇ gʼa ve htaꞈ dawˇ nyi˗aw laˇ?’ Ngaˬ hui Yeˍsuˆ htaꞈ henˇ yuˬ leh “teˇ gʼaˇ leh teˇ gʼaˇ ha kʼaˉ daꞈ leh haꞈ daꞈ˗oꞈ.”—1 Peˍtruˆ 3:8.

18-19. (a) Aˬ htoꞈ ma ve awˬ lawn htaꞈ ngaˬ hui yonˍ gʼa ve le? (b) Nawˬ aˬ htoꞈ ma te tuˬ dawˇ teh taˍ ve le?

¹⁸ Yeˍsuˆ suh ve dawˇ nawˇ tuˬ hpawnˬ daꞈ ve te tcuh laˇ ve cawˬ tuˬ ve chi maˇ maw˗o. Tuꞈ jaˇ hkanˍ jaˇ ve awˬ yanˇ Yeˍsuˆ kʼawꞈ yaꞈ “la htaˇ” miˬ guiˬ hkʼoˆ “[Gʼuiˬ sha] leuˆ yuˬ taˍ ve chaw hui” htaꞈ mvuhˇ naw ma hkʼoˆ Yeˍsuˆ shiˍ taˆ˗e tuˬ yoˬ. Oˇ ve teˇ yanˇ, Yeˍsuˆ suh ve dawˇ nawˇ tuˬ hpawnˬ daꞈ ve maˇ kʼawꞈ cawˬ˗o.—1 Kawˇrenˍhtuˆ 11:26; Maꞈhtehˍ 24:31.

¹⁹ Yeˍsuˆ suh ve dawˇ nawˇ tuˬ hpawnˬ daꞈ ve hkʼa sha sha˗ehˍ te ve lehˬ nyi ma nuˇ nehˬ ve, haꞈ hanˉ ve, haꞈ pehnˇ uiˍ jaˇ ve chi teˇ hpaˍ lehˬ chaw teˇ gʼaˇ hpeuꞈ maw laˇ jaw ve yoˬ. Hpawnˬ daꞈ ve chi maˇ cawˬ˗o ve htawˇ, Yaˬhoˉvaˬ ve chaw awˬ lawn chi htaꞈ tawnˇ gʼa sheˍ ve yoˬ. Oˇ ve teˇ yanˇ, hpawnˬ daꞈ ve te jaw ve chaw lehˬ kʼawꞈ teꞈ tu la ve chaw htaꞈ kʼoˆ maˍ piˇ tuˬ yoˬ. Yaꞈ hkʼaˇ, chi teˇ hkui ngaˬ hui hpawnˬ daꞈ ve htaꞈ awˬ bon gʼa tuˬ, Yeˍsuˆ nyi ma nuˇ nehˬ ve, haꞈ hanˉ ve, leh haꞈ pehnˇ ve chi teˇ hpaˍ htaꞈ ngaˬ hui hkʼa dehꞈ henˇ yuˬ cawˇ ve yoˬ. Chi hkʼe te ve kʼo, Yaˬhoˉvaˬ geh laꞈ shawnˍ gʼa tuˬ tehꞈ ngaˬ hui hkʼa dehꞈ yonˍ gʼa ve yoˬ.—2 Peˍtruˆ 1:10, 11.