Awˬ Lawn 1
“Ngaˬ lehˬ nawˬ hui ve Gʼuiˬ sha hpehꞈ ve yoˬ. Nawˬ hui teꞈ chiˉ kawˆ tuˬ maˇ cawˬ”
“Taˇ kawˆ. Awˬ lawn kʼo, ngaˬ nawˬ hui geh chehˇ taˍ ve yoˬ. Ngaˬ lehˬ nawˬ hui ve Gʼuiˬ sha hpehꞈ ve yoˬ. Nawˬ hui teꞈ chiˉ kawˆ tuˬ maˇ cawˬ. Ngaˬ nawˬ hui htaꞈ ga laˇ leh awˬ gʼaˇ uiˍ la piˇ tuˬ yoˬ.”—IˉSAˍYAˆ 41:10.
KʼA MUIˬ HKAWˇ 7 Yaˬhoˉvaˬ, ngaˬ hui ve awˬ gʼaˇ awˬ shaˉ
HENˇ TUˬ VE TEˇ HPAˍ *
1-2. (a) Iˉsaˍyaˆ liꞈ 41:10 hkʼaw bvuhꞈ taˍ ve awˬ viˉ awˬ nyi Yoˬshiˬkoꞈ htaꞈ hkʼaˬ hkʼe ga piˇ ve le? (b) Yaˬhoˉvaˬ bvuhꞈ tcuh taˍ ve chi a shu awˬ bon gʼa ve le?
Awˬ viˉ awˬ nyi ka tiꞈ yeˬ ve yaˇ miˇ teˇ gʼaˇ Yoˬshiˬkoꞈ yawˇ ve maˇ daꞈ ve awˬ lawn htaꞈ gʼa shiˍ ve yoˬ. Hkʼaˬ nyiˇ ha pa maˇ gʼa chehˇ˗o tehꞈ saˍ laꞈ gʼonˍ kʼoˆ piˇ ve yoˬ. Yawˇ hkʼaˬ hkʼe te ve le? Yoˬshiˬkoꞈ yawˇ dawˇ cawˇ jaˇ ve Liꞈ hpu awˬ tawn Iˉsaˍyaˆ liꞈ 41:10 htaꞈ dawˇ nawˇ ve yoˬ. (Gʼaw sheˍ.) Peuˬ hkʼawꞈ nawˉ yawˇ nyi ma gawˬ lehˍ ve hkʼaw saˍ laꞈ gʼonˍ htaꞈ kʼoˆ piˇ ve, Yaˬhoˉvaˬ ngaˬ ve laꞈ sheh htaꞈ vawˆ taˍ laˇ ve pa taw kawˆ tuˬ maˇ cawˬ. * Liꞈ hpu awˬ tawn chi yawˇ htaꞈ awˬ gʼaˇ piˇ jaˇ. Yawˇ Yaˬhoˉvaˬ htaꞈ gʼaˇ hkʼa dehꞈ va tuˬ, awˬ ceuˬ chi ga piˇ ve yoˬ. Beˬ ve lawˇ ve gʼa hpuˇ htaˇ, ngaˬ hui nyi ma gawˬ lehˍ cawˬ tuˬ kaꞈ ga laˇ ve yoˬ. Hkʼaˬ hkʼe te hpehꞈ gʼa ve le? Aˬ htoꞈ ma te Gʼuiˬ sha Iˉsaˍyaˆ htaꞈ chi hkʼe kʼoˆ piˇ ve teˇ geh chaˬ nyi sheˍ.
2 Yuˇdaꞈ chaw Baˍbuˍlonˍ mvuhˇ miˬ lo shu ceˬ te htaˇ, yawˇ hui htaꞈ awˬ gʼaˇ piˇ tuˬ Yaˬhoˉvaˬ Iˉsaˍyaˆ htaꞈ awˉ lawˉ htaˇ kaꞈ awˬ lawn chi bvuhꞈ tcuh taˍ ve yoˬ. Yaꞈ hkʼaˇ, Yaˬhoˉvaˬ liꞈ chi htaꞈ haꞈ shaˉ tcuh taˍ ve lehˬ Yuˇdaꞈ chaw awˬ pon ceh tiˉ maˇ heˆ. Chi beuꞈ teˇ co˗e hkʼa gaˬ yawˇ ve chaw kaꞈ awˬ bon gʼa sheˍ ve yoˬ. (Iˉsaˍyaˆ 40:8; Roˉmaꞈ 15:4) Chi beuꞈ teˇ co˗e ngaˬ hui “haˍ jaˇ ve awˬ yanˇ” hkʼaw chehˇ taˍ ve pa taw yoˬ. Iˉsaˍyaˆ liꞈ hkʼaw bvuhꞈ taˍ ve hkʼe ngaˬ hui awˬ gʼaˇ gʼa tuˬ loˍ ve yoˬ.—2 Tiˆmoˉseˍ 3:1.
3. (a) 2019 hkʼawꞈ a yeˇ uiˍ jaˇ ve Liꞈ hpu awˬ tawn Iˉsaˍyaˆ liꞈ 41:10 hkʼaw aˬ htoꞈ ma ve ka tiꞈ te taˍ laˇ ve le? (b) Aˬ htoꞈ ma te ngaˬ hui ka tiꞈ chi teˇ hpaˍ htaꞈ gʼa cawˇ ve le?
3 Ngaˬ hui ve yonˍ hkʼaˇ uiˍ la mvuh la tuˬ, Iˉsaˍyaˆ liꞈ 41:10 hkʼaw Yaˬhoˉvaˬ ka tiꞈ te taˍ laˇ ve 3 maˬ cawˬ ve yoˬ. Awˬ lawn chi hkʼaw teˇ geh jehˬ daꞈ tuˬ yoˬ. (1) Yaˬhoˉvaˬ ngaˬ hui geh chehˇ ve, (2) Yaˬhoˉvaˬ ngaˬ hui ve Gʼuiˬ sha hpehꞈ ve, leh (3) yawˇ ngaˬ hui htaꞈ ga laˇ tuˬ yoˬ. Ka tiꞈ chi * ngaˬ hui htaꞈ ga laˇ gʼa ve yoˬ. Yoˬshiˬkoꞈ hkʼa shuˍ ngaˬ hui kaꞈ shoꞈ shaꞈ ve gʼa hpuˇ ve pa taw yoˬ. Miˬ guiˬ chi hkʼoˆ lo maˇ daꞈ ve awˬ ceuˬ hpehꞈ la ve pa taw, ngaˬ hui kaꞈ nyiˉ laˇ ve laiˉ ceuˬ gʼa hpuˇ ve yoˬ. Chaw teˇ hpaˍ kʼo, mvuhˇ miˬ uˉ peunˍ ve kanˇ paˆ cawˬ jaˇ ve fawˉ mehˍ piˇ ve htaꞈ gʼa hkanˍ jaˇ. Ngaˬ hui ka tiꞈ chi ve htaꞈ teˇ maˬ peuˬ teˇ maˬ teˇ geh chaˬ nyi shaˍ.
“NGAˬ NAWˬ HUI GEH CHEHˇ TAˍ VE”
4. (a) Ka tiꞈ te taˍ laˇ ve awˉ lawˉ teˇ maˬ teˇ geh henˇ tuˬ aˬ htoꞈ ma le? (Awˬ maiˉ htaꞈ nyi sheˍ.) (b) Yaˬhoˉvaˬ ngaˬ hui htaꞈ hkʼaˬ hkʼe dawˇ ve le? (c) Gʼuiˬ sha ve tawˇ hkawˇ htaꞈ nawˬ hkʼaˬ hkʼe dawˇ ve le?
4 Awˉ lawˉ htaˇ Yaˬhoˉvaˬ ngaˬ hui htaꞈ awˬ gʼaˇ peꞈ laˇ leh kʼoˆ ve, “taˇ kawˆ. Awˬ lawn kʼo, ngaˬ nawˬ hui geh chehˇ taˍ ve yoˬ.” Yawˇ ngaˬ hui geh chehˇ ve tehꞈ hpeuꞈ maw laˇ tuˬ, yawˇ ngaˬ hui htaꞈ haꞈ leh a yeˇ yuˬ laˇ ve yoˬ. Yaˬhoˉvaˬ kʼoˆ taˍ ve yoˬ. Yawˇ kʼoˆ ve, “nawˬ hui lehˬ ngaˬ mehˆ gʼuˇ suhˍ lo awˬ hpfuhˇ hkʼaˆ jaˇ leh, ngaˬ awˬ meꞈ awˬ hponˇ piˇ taˍ ve chaw hpehꞈ” ve yoˬ. (Iˉsaˍyaˆ 43:4) Yaˬhoˉvaˬ yawˇ ve chaw htaꞈ maˇ haꞈ tuˬ mvuhˇ naw ma miˬ naˆ ma kaꞈ te piˇ maˇ gʼa. Yawˇ ngaˬ hui htaꞈ haꞈ ve maˇ pa jaw. (Iˉsaˍyaˆ 54:10) Yaˬhoˉvaˬ ngaˬ hui htaꞈ haꞈ leh awˬ chawˇ te laˇ ve pa taw, ngaˬ hui haꞈ hanˉ ve yoˬ. Yawˇ ve awˬ chawˇ Aˍbranˍ (Aˍbraˍhanˍ) htaꞈ ponˬ piˇ jaw ve hkʼe, ngaˬ hui htaꞈ kaꞈ ponˬ laˇ tuˬ yoˬ. Yaˬhoˉvaˬ yawˇ htaꞈ kʼoˆ piˇ ve, “Aˍbranˍ˗oˬ, taˇ kawˆ. Ngaˬ nawˬ htaꞈ haꞈ shaˉ taˍ” ve yoˬ. *—Awˬ hkuiˉ puiˍ 15:1.
Yaˬhoˉvaˬ ga laˇ ve kʼo, beˬ ve lawˇ ve iˉ kaˆ leh aˬ miˍ hkʼe gʼa hpuˇ ve htawˇ, ngaˬ hui haꞈ hanˉ leh yeunˇ hkanˍ gʼaˇ ve (Awˬ tawn 5-6 nyi sheˍ) *
5-6. (a) Ngaˬ hui a shaꞈ teꞈ kuiˬ hkʼaw beˬ ve lawˇ ve gʼa hpuˇ htaˇ, Yaˬhoˉvaˬ ga laˇ gaˇ ve tehꞈ hkʼaˬ hkʼe te shiˍ gʼa ve le? (b) Yoˬshiˬkoꞈ ve awˬ lawn htaꞈ ngaˬ hui aˬ htoꞈ ma henˇ yuˬ gʼa ve le?
5 Ngaˬ hui shoꞈ shaꞈ ve gʼa hpuˇ htaˇ, Yaˬhoˉvaˬ ga laˇ gaˇ ve tehꞈ shiˍ ve yoˬ. Yaˬhoˉvaˬ yawˇ ve chaw htaꞈ ka tiꞈ te piˇ ve, “nawˬ hui lehˬ naˉ jaˇ ve iˉ kaˆ htaꞈ gʼa hpanˍ kʼai ve htawˇ, ngaˬ nawˬ hui geh chehˇ taˍ tuˬ yoˬ. Kawˆ tuˬ dawˇ haˍ tuˬ awˬ ceuˬ teˇ hpaˍ, nawˬ hui htaꞈ te luˬ laˇ gʼa tuˬ ve maˇ heˆ. Nawˬ hui aˬ miˍ hkʼaw gʼa hpanˍ kʼai ve htawˇ, nawˬ hui htaꞈ toꞈ baˬ laˇ gʼa tuˬ ve maˇ heˆ. Hehnˇ jaˇ ve beˬ tuˬ lawˇ tuˬ teˇ hpaˍ nawˬ hui htaꞈ te luˬ laˇ gʼa tuˬ ve maˇ heˆ.” (Iˉsaˍyaˆ 43:2) Chi hkʼaˬ hkʼe kʼoˆ gaˇ ve le?
6 A shaꞈ teꞈ kuiˬ hkʼaw shoꞈ shaꞈ ve awˬ lawn Yaˬhoˉvaˬ yuˬ baˬ laˇ tuˬ yoˬ tehꞈ ka tiꞈ te taˍ laˇ ve maˇ heˆ. Yaꞈ hkʼaˇ, shoꞈ shaꞈ ve leh beˬ ve lawˇ ve “iˉ kaˆ” leh “aˬ miˍ” hkʼe hpehꞈ ve htawˇ, co co taiˍ taiˍ te luˬ laˇ maˇ gʼa. Yawˇ ngaˬ hui geh chehˇ leh shoꞈ shaꞈ ve awˬ lawn htaꞈ “hpanˍ kʼai” gʼa tuˬ ga laˇ ve yoˬ tehꞈ yawˇ ka tiꞈ te laˇ ve yoˬ. Yawˇ aˬ htoꞈ ma te tuˬ le? Ngaˬ hui maˇ gʼa kawˆ jaˇ tuˬ yawˇ ga laˇ tuˬ yoˬ. Ngaˬ hui suh ve gʼa hpuˇ ve htawˇ, ka tiꞈ yeˬ gʼa tuˬ yoˬ. (Iˉsaˍyaˆ 41:13) Awˬ lawn chi awˬ tehˬ hpehꞈ ve tehꞈ Yoˬshiˬkoꞈ shiˍ ve yoˬ. Yawˇ ve yaˇ miˇ kʼoˆ ve, “ngaˬ e nyi ma gawˬ lehˍ cawˬ tuˬ, Yaˬhoˉvaˬ yawˇ htaꞈ ga piˇ chehˇ ve tehꞈ ngaˬ hui hkʼa tawˍ lehˆ gʼa mawˬ leh ha lehˬ jaˇ. Ngaˬ e yawˇ suh ve teˇ nyi hkʼa gaˬ saˍ laꞈ gʼonˍ leh chaw naˬ teˇ hpaˍ htaꞈ Yaˬhoˉvaˬ htaꞈ caˉ daꞈ ve leh yawˇ ka tiꞈ te taˍ laˇ ve kʼoˆ maˍ piˇ ve yoˬ.” Yoˬshiˬkoꞈ ve awˬ lawn ngaˬ hui htaꞈ aˬ htoꞈ ma maˍ laˇ ve le? Gʼuiˬ sha ka tiꞈ te taˍ laˇ ve, “ngaˬ nawˬ hui geh chehˇ taˍ ve yoˬ.” Ngaˬ hui ka tiꞈ chi htaꞈ gʼaˇ va ve kʼo, haꞈ hanˉ ve cawˬ leh beˬ ve lawˇ ve htaꞈ yeunˇ hkanˍ gʼaˇ tuˬ yoˬ.
“NGAˬ LEHˬ NAWˬ HUI VE GʼUIˬ SHA HPEHꞈ VE”
7-8. (a) Ka tiꞈ te taˍ laˇ ve nyiˇ maˬ teˇ maˬ ngaˬ hui chaˬ nyi peuˬ ve aˬ htoꞈ ma le? Ka tiꞈ chi ve tcuhˉ kuiˬ hkʼaˬ hkʼe kʼoˆ gaˇ ve le? (b) Aˬ htoꞈ ma te Yaˬhoˉvaˬ Yuˇdaꞈ chaw shu ceˬ te ve htaꞈ “teꞈ chiˉ kawˆ tuˬ maˇ cawˬ” tehꞈ kʼoˆ piˇ ve le? (c) Gʼuiˬ sha ve chaw nyi ma gawˬ lehˍ cawˬ tuˬ Iˉsaˍyaˆ liꞈ 46:3, 4 hkʼaw hkʼaˬ hkʼe kʼoˆ taˍ laˇ ve le?
7 Iˉsaˍyaˆ bvuhꞈ taˍ ve ka tiꞈ nyiˇ maˬ teˇ maˬ lehˬ “ngaˬ lehˬ nawˬ hui ve Gʼuiˬ sha hpehꞈ ve yoˬ. Nawˬ hui teꞈ chiˉ kawˆ tuˬ maˇ cawˬ.” Awˬ lawn chi hkʼaˬ hkʼe kʼoˆ gaˇ ve le? Heˍbrehˇ tawˇ hkawˇ hkʼaw “dawˇ haˍ ve” kʼoˆ ve htaꞈ yehˇ ve yoˬ. Chi lehˬ “teˇ ceuˬ ceuˬ leh chaw teˇ hpaˍ hpaˍ te luˬ laˇ ve htaꞈ kawˆ ve pa taw, nawˬ hkʼawꞈ nawˉ lo hpfuhˆ nyi ve” maˇ heˆ leh “kawˆ kuiˬ hkʼaw chehˇ leh cheˆ˗ehꞈ kʼai ve” htaꞈ kʼoˆ gaˇ ve yoˬ.
8 Yuˇdaꞈ chaw Baˍbuˍlonˍ mvuhˇ miˬ lo shu ceˬ gʼa te tuˬ yoˬ. Yaꞈ hkʼaˇ, aˬ htoꞈ ma te Yaˬhoˉvaˬ “teꞈ chiˉ kawˆ tuˬ maˇ cawˬ” tehꞈ kʼoˆ piˇ ve le? Yawˇ hui kawˆ ve nyi ma cawˬ ve htaꞈ Yaˬhoˉvaˬ shiˍ ve pa taw yoˬ. Yawˇ hui kawˆ tuˬ aˬ htoꞈ ma te piˇ ve le? Yuˇdaꞈ chaw shu ceˬ te ve 70 hkʼawꞈ awˬ leh meuˇ teˇ hkʼawꞈ htaˇ, Meˍdiˆ leh Paˇshaˇ maꞈ moˍ awˬ gʼaˇ hehnˇ jaˇ ve Baˍbuˍlonˍ mvuhˇ miˬ htaꞈ ca bawˆ la ve yoˬ. Yaˬhoˉvaˬ maꞈ moˍ chi htaꞈ cuˇ leh yawˇ ve chaw Baˍbuˍlonˍ mvuhˇ miˬ lo hpehˇ piˇ tcuh ve yoˬ. (Iˉsaˍyaˆ 41:2-4) Oˇ htaˇ, Baˍbuˍlonˍ mvuhˇ miˬ hkʼaw ve chaw leh awˬ nu ve mvuhˇ miˬ hkʼaw chehˇ ve chaw canˇ paˍ laˬ chehˇ ve htaꞈ shiˍ htaˇ, yawˇ hui haꞈ hanˉ ve cawˬ tuˬ coˇ caˇ leh “awˬ gʼaˇ piˇ daꞈ chehˇ ve yoˬ.” Shaˉ hoꞈ ga piˇ tuˬ yoˬ tehꞈ dawˇ leh shaˉ hoꞈ maˇ maˇ te ve yoˬ. (Iˉsaˍyaˆ 41:5-7) Yaꞈ hkʼaˇ, Yuˇdaꞈ chaw nyi ma gawˬ lehˍ cawˬ tuˬ Yaˬhoˉvaˬ ga piˇ leh kʼoˆ ve, “ngaˬ ve awˬ ceˬ Iˉsaˍreˍlaˆ chaw teˇ hpaˍ˗oˬ, . . . ngaˬ lehˬ nawˬ hui ve Gʼuiˬ sha hpehꞈ ve yoˬ. Nawˬ hui teꞈ chiˉ kawˆ tuˬ maˇ cawˬ.” (Iˉsaˍyaˆ 41:8-10) Yawˇ kʼoˆ ve, “ngaˬ lehˬ nawˬ hui ve Gʼuiˬ sha hpehꞈ ve yoˬ.” Yawˇ ve chaw dawˇ haˍ ve maˇ cawˬ tuˬ Yaˬhoˉvaˬ ga piˇ ve yoˬ. Yawˇ yawˇ hui ve Gʼuiˬ sha hpehꞈ leh yawˇ hui yawˇ ve kanˉ te ve chaw hpehꞈ ve tehꞈ kʼoˆ piˇ ve yoˬ. Yawˇ kʼawꞈ kʼoˆ ve, ‘ngaˬ nawˬ hui htaꞈ haꞈ shaˉ laˇ leh nawˬ hui htaꞈ ga laˇ tuˬ yoˬ.’ Tawˇ hkawˇ chi htaꞈ pa taw, Yuˇdaꞈ chaw awˬ gʼaˇ gʼa jaˇ.—Iˉsaˍyaˆ 46:3, 4 gʼaw sheˍ.
9-10. Aˬ htoꞈ ma te ngaˬ hui kawˆ tuˬ maˇ loˍ ve le? Tawˇ pa haˉ kʼo maˍ laˇ sheˍ.
9 Miˬ guiˬ chi teˇ nyi aꞈ kehˉ teˇ nyi luˬ kʼai chehˇ ve pa taw, chi beuꞈ ve chaw oˇ htaˇ aꞈ kehˉ gʼaˇ hteꞈ dawˇ haˍ ve yoˬ. Ngaˬ hui kaꞈ shoꞈ shaꞈ ve gʼa hpuˇ ve yoˬ. Yaꞈ hkʼaˇ, ngaˬ hui dawˇ haˍ tuˬ maˇ loˍ. Yaˬhoˉvaˬ kʼoˆ ve, “ngaˬ lehˬ nawˬ hui ve Gʼuiˬ sha hpehꞈ ve yoˬ.” Ngaˬ hui nyi ma gawˬ lehˍ cawˬ tuˬ tawˇ hkawˇ chi ga laˇ ve yoˬ. Aˬ htoꞈ ma pa taw le?
10 Tawˇ pa haˉ chi htaꞈ dawˇ nyi sheˍ. Caˬshawˇ leh Caˬhteˇ caꞈ poˬ ciˇ chehˇ htaˇ, mvuhˇ haw hehnˇ jaˇ ve pa taw, caꞈ poˬ diˆ diˆ kʼai ve yoˬ. “Haˍ pi hkʼa dehꞈ tsuhꞈ taˍ˗oꞈ. Ngaˬ hui mvuhˇ haw hehnˇ jaˇ ve htaꞈ hpanˍ kʼai chehˇ ve yoˬ” tehꞈ caꞈ poˬ hkʼaw kʼoˆ ve yoˬ. Caˬshawˇ dawˇ haˍ la ve yoˬ. Yaꞈ hkʼaˇ, yawˇ kʼawꞈ kʼoˆ ve, “taˇ dawˇ haˍ. Ngaˬ caꞈ poˬ gʼaꞈ paˍ hpehꞈ ve yoˬ. Teˇ ceuˬ le le daꞈ˗aˬ.” Caˬshawˇ oˉ kʼoˍ heˆ leh kʼoˆ ve, “yawˇ ve tawˇ hkawˇ hkʼaˬ hkʼe ga laˇ gʼa tuˬ le?” Yaˬ hkʼaˇ, Caˬhteˇ teꞈ chiˉ maˇ dawˇ haˍ ve htaꞈ Caˬshawˇ gʼa mawˬ ve yoˬ. Caˬshawˇ yawˇ htaꞈ na nyi piˇ ve, “aˬ htoꞈ ma te nawˬ maˇ dawˇ haˍ ve le?” Caˬhteˇ gʼuiˬ leh kʼoˆ ve, “caꞈ poˬ gʼaꞈ paˍ htaꞈ ngaˬ shiˍ daꞈ jaˇ ve pa taw yoˬ. Yawˇ ngaˬ pa hpehꞈ ve yoˬ!” Leh Caˬhteˇ kʼawꞈ kʼoˆ ve, “ngaˬ pa ve awˬ lawn kʼoˆ maˍ laˇ, nawˬ yawˇ htaꞈ shiˍ leh yawˇ caꞈ poˬ hkʼaˬ hkʼe taw gʼaꞈ cheuˬ ve htaꞈ nawˬ shiˍ la htaˇ maˇ kawˆ˗o tehꞈ ngaˬ shiˍ ve yoˬ.”
11. Caꞈ poˬ hkʼaw ve chaw 2 gʼaˇ htaꞈ ngaˬ hui aˬ htoꞈ ma henˇ yuˬ gʼa ve le?
11 Ngaˬ hui aˬ htoꞈ ma henˇ yuˬ gʼa ve le? Caˬhteˇ hkʼa shuˍ ngaˬ hui ve Awˬ pa Yaˬhoˉvaˬ htaꞈ hkʼa dehꞈ shiˍ daꞈ ve pa taw, nyi ma gawˬ lehˍ cawˬ ve yoˬ. Awˬ leh meuˇ ve awˬ yanˇ ngaˬ hui shoꞈ shaꞈ ve mvuhˇ haw hkʼa shuˍ gʼa hpuˇ ve htawˇ, yawˇ ga laˇ leh ponˬ gʼa ve tehꞈ shiˍ ve yoˬ. (Iˉsaˍyaˆ 35:4) Ngaˬ hui Yaˬhoˉvaˬ htaꞈ gʼaˇ va ve yoˬ. Chi htaꞈ pa taw, chaw yaˇ kawˆ jaˇ ve htawˇ, ngaˬ hui nyi ma gawˬ lehˍ cawˬ gʼa ve yoˬ. (Iˉsaˍyaˆ 30:15) Caˬhteˇ hkʼa shuˍ, ngaˬ hui Gʼuiˬ sha htaꞈ gʼaˇ va gʼa ve tehꞈ shu htaꞈ kʼoˆ piˇ gʼa yoˬ. Ngaˬ hui chi hkʼe te ve kʼo, aˬ htoꞈ ma gʼa hpuˇ ve htawˇ, Yaˬhoˉvaˬ ga piˇ tuˬ yoˬ tehꞈ yawˇ hui kaꞈ yonˍ gʼa ve yoˬ.
“NGAˬ NAWˬ HUI HTAꞈ GA LAˇ LEH AWˬ GʼAˇ UIˍ LA PIˇ TUˬ YOˬ”
12. (a) Ka tiꞈ shehˆ maˬ teˇ maˬ aˬ htoꞈ ma le? (b) Yaˬhoˉvaˬ ve kanˇ paˆ hkʼaˬ hkʼe hpehꞈ ve le?
12 Ka tiꞈ shehˆ maˬ teˇ maˬ htaꞈ dawˇ nyi sheˍ. “Ngaˬ nawˬ hui htaꞈ ga laˇ leh awˬ gʼaˇ uiˍ la piˇ tuˬ yoˬ.” Yaˬhoˉvaˬ yawˇ ve chaw htaꞈ hkʼaˬ hkʼe te awˬ gʼaˇ uiˍ la piˇ gʼa ve Iˉsaˍyaˆ kʼoˆ peuˬ ve yoˬ. Yawˇ bvuhꞈ ve, “[Yaˬhoˉvaˬ] lehˬ kanˇ paˆ htaꞈ yehˇ leh uˉ peunˍ tuˬ laˬ chehˇ taˍ ve yoˬ.” (Iˉsaˍyaˆ 40:10) Oˇ htaˇ teˇ co˗e yawˇ htaꞈ oˉ kʼoˍ pui ve chaw htaꞈ ga piˇ leh haꞈ shaˉ piˇ tuˬ, yawˇ kanˇ paˆ uiˍ jaˇ ve htaꞈ yehˇ ve yoˬ. Chi beuꞈ teˇ co˗e kaꞈ yawˇ ve kanˉ te ve chaw htaꞈ awˬ gʼaˇ uiˍ la piˇ leh haꞈ shaˉ piˇ chehˇ sheˍ ve yoˬ.—Bon maˍ ve 1:30, 31; Iˉsaˍyaˆ 43:10.
Yaˬhoˉvaˬ ngaˬ hui htaꞈ haꞈ shaˉ laˇ ve pa taw, laꞈ caˉ teˇ ceuˬ kaꞈ ngaˬ hui htaꞈ te luˬ laˇ maˇ gʼa (Awˬ tawn 12-16 nyi sheˍ) *
13. (a) Yaˬhoˉvaˬ ka tiꞈ te taˍ laˇ ve ngaˬ hui awˬ gʼaˇ uiˍ la tuˬ hkʼaˬ hkʼe htaˇ le? (b) Aˬ htoꞈ ma ve ka tiꞈ ngaˬ hui awˬ gʼaˇ gʼa leh yonˍ gʼa jaˇ tuˬ te laˇ le?
13 Canˇ paˍ ngaˬ hui htaꞈ fawˉ mehˍ laˇ htaˇ, Yaˬhoˉvaˬ yawˇ ve ka tiꞈ htaꞈ gʼaꞈ te tuˬ yoˬ. Yawˇ kʼoˆ ve, “ngaˬ nawˬ hui htaꞈ . . . awˬ gʼaˇ uiˍ la piˇ tuˬ yoˬ.” Chi beuꞈ teˇ co˗e teˇ kaˬ kaˬ kʼo, Gʼuiˬ sha ve kanˉ hkʼaˇ leh ngaˬ hui hto toˇ ve kanˉ maˇ gʼa te tuˬ canˇ paˍ tawˍ laˇ jaˇ. Yaˬhoˉvaˬ ve ka tiꞈ ngaˬ hui awˬ gʼaˇ peꞈ laˇ leh yonˍ gʼa jaˇ tuˬ te laˇ ve yoˬ. Yawˇ kʼoˆ ve, “hkʼa te tawˆ taˍ ve laꞈ caˉ chi teˇ hpaˍ lehˬ nawˬ hui htaꞈ te luˬ laˇ gʼa tuˬ ve maˇ heˆ.” (Iˉsaˍyaˆ 54:17) Awˬ lawn chi ve ngaˬ hui htaꞈ awˬ tehˬ ve a yeˇ uiˍ ve 3 tawn htaꞈ dawˇ nyi tuˬ te laˇ ve yoˬ.
14. Gʼuiˬ sha ve canˇ paˍ ngaˬ hui htaꞈ tawˍ laˇ htaˇ aˬ htoꞈ ma te ngaˬ hui maˇ kawˆ cawˇ ve le?
14 Awˉ lawˉ teˇ tawn ngaˬ hui Yeˍsuˆ Hkriꞈ ve awˬ laꞈ gʼawˇ hpehꞈ ve pa taw, chaw yaˇ ngaˬ hui htaꞈ nyi bawˬ tuˬ yoˬ tehꞈ shiˍ taˍ˗oꞈ. (Maꞈhtehˍ 10:22) Yeˍsuˆ kʼoˆ taˍ ve, yawˇ ve awˬ laꞈ gʼawˇ awˬ leh meuˇ ve awˬ yanˇ hkʼaw fawˉ ve mehˍ ve gʼa hpuˇ tuˬ yoˬ. (Maꞈhtehˍ 24:9; Yoˇhanˬ 15:20) Nyiˇ tawn teˇ tawn tcuh kaˍ paˍ Iˉsaˍyaˆ shaˍ tiꞈ peꞈ laˇ ve, canˇ paˍ nyi bawˬ ve aꞈ kehˉ te laˇ tuˬ yoˬ. Yawˇ hui laꞈ caˉ laiˉ ceuˬ htaꞈ yehˇ leh tawˍ laˇ tuˬ yoˬ. Chi teˇ hpaˍ lehˬ awˬ tehˬ ve htaꞈ nyiˉ laˇ ve, heˍ laˇ ve, maˇ heˆ leh fawˉ mehˍ laˇ ve hehnˇ jaˇ ve yoˬ. (Maꞈhtehˍ 5:11) Canˇ paˍ ngaˬ hui htaꞈ tawˍ laˇ htaˇ, Yaˬhoˉvaˬ yawˇ hui htaꞈ maˇ tawˍ piˇ. (Eˇfeˇsuꞈ 6:12; Hpeuꞈ maˍ ve 12:17) Yaꞈ hkʼaˇ, ngaˬ hui kawˆ tuˬ maˇ loˍ. Aˬ htoꞈ ma pa taw le?
15-16. (a) Awˬ tehˬ ve shehˆ maˬ teˇ maˬ ngaˬ hui tawnˇ taˍ cawˇ ve aˬ htoꞈ ma le? Iˉsaˍyaˆ liꞈ 25:4, 5 awˬ lawn chi htaꞈ hkʼaˬ hkʼe te caˉ daꞈ ve le? (b) Iˉsaˍyaˆ liꞈ 41:11, 12 hkʼaw kʼoˆ taˍ ve hkʼe, ngaˬ hui htaꞈ ca tawˍ daꞈ la ve chaw aˬ htoꞈ ma hpehꞈ la tuˬ ve le?
15 Awˬ tehˬ ve shehˆ maˬ teˇ maˬ ngaˬ hui maˇ leunˇ cawˇ. Yaˬhoˉvaˬ kʼoˆ ve, “laꞈ caˉ chi teˇ hpaˍ lehˬ nawˬ hui htaꞈ te luˬ laˇ gʼa tuˬ ve maˇ heˆ.” Mvuhˇ haw mvuhˇ yeˬ lonˉ laˬ htaˇ lanˇ vanˇ ngaˬ hui htaꞈ htaˬ laˇ ve hkʼa shuˍ, “mvuhˇ haw mvuhˇ yeˬ lonˉ” laˬ htaˇ Yaˬhoˉvaˬ kaꞈ ngaˬ hui htaꞈ haꞈ shaˉ laˇ tuˬ yoˬ. (Iˉsaˍyaˆ 25:4, 5 gʼaw sheˍ.) Canˇ paˍ ngaˬ hui htaꞈ te luˬ gaˇ ve htawˇ, yawˇ hui dawˇ taˍ ve hkʼe te luˬ laˇ maˇ gʼa.—Iˉsaˍyaˆ 65:17.
16 Ngaˬ hui Yaˬhoˉvaˬ htaꞈ gʼaˇ hkʼa dehꞈ va tuˬ, ngaˬ hui htaꞈ “nyi ma zuhˆ ve chaw hui” aˬ htoꞈ ma gʼa hpuˇ tuˬ Yaˬhoˉvaˬ kʼoˆ laˇ taˍ ve yoˬ. (Iˉsaˍyaˆ 41:11, 12 gʼaw sheˍ.) Canˇ paˍ ngaˬ hui htaꞈ coˇ caˇ leh hkʼaˬ hkʼe taw tawˍ laˇ ve htawˇ, maˇ heˆ leh maꞈ te ve hkʼaˬ hkʼe taw hehnˇ ve htawˇ, hpehꞈ la ve awˬ ceuˬ shuˍ daꞈ ve yoˬ. Gʼuiˬ sha ve chaw ve canˇ paˍ hkʼa peu˗eˬ ‘luˬ kʼai leh mehˉ kʼai tuˬ yoˬ.’
NGAˬ HUI YAˬHOˉVAˬ HTAꞈ GʼAˇ HKʼA DEHꞈ VA TUˬ VE AWˬ HKʼAˇ
Ngaˬ hui Yaˬhoˉvaˬ htaꞈ gʼaˇ hkʼa dehꞈ va gʼa tuˬ Liꞈ hpu hkʼaw yawˇ ve awˬ lawn hkʼaˬ htaˆ kaꞈ gʼa gʼaw ve (Awˬ tawn 17-18 nyi sheˍ) *
17-18. (a) Liꞈ hpu gʼaw ve ngaˬ hui Gʼuiˬ sha htaꞈ hkʼaˬ hkʼe yonˍ maˇ la tuˬ ga laˇ ve le? Tawˇ pa haˉ kʼoˆ maˍ laˇ sheˍ. (b) 2019 hkʼawꞈ a yeˇ uiˍ jaˇ ve Liꞈ hpu awˬ tawn htaꞈ ngaˬ hui dawˇ nyi htaˇ hkʼaˬ hkʼe ga laˇ ve le?
17 Yaˬhoˉvaˬ htaꞈ gʼaˇ hkʼa dehꞈ va tuˬ yawˇ htaꞈ gʼa shiˍ daꞈ ve yoˬ. Yawˇ htaꞈ shiˍ daꞈ tuˬ awˬ hkʼaˇ teˇ hkʼaˇ lehˬ Liꞈ hpu gʼaw leh dawˇ nyi ve yoˬ. Oˇ htaˇ teˇ co˗e Yaˬhoˉvaˬ yawˇ ve chaw htaꞈ haꞈ shaˉ piˇ ve awˬ hkʼaˇ htaꞈ caˉ daꞈ ve Liꞈ hpu hkʼaw cawˬ ve yoˬ. Yawˇ ngaˬ hui htaꞈ kaꞈ haꞈ shaˉ laˇ tuˬ yoˬ tehꞈ ngaˬ hui yonˍ gʼa tuˬ awˬ lawn chi teˇ hpaˍ ga laˇ ve yoˬ.
18 Yaˬhoˉvaˬ haꞈ shaˉ laˇ tuˬ ve awˬ hkʼaˇ Iˉsaˍyaˆ bvuhꞈ taˍ ve htaꞈ dawˇ nyi sheˍ. Yaˬhoˉvaˬ yawˬ hawˉ shehˍ hpaˇ hpehꞈ leh yawˇ ve chaw yawˬ ehˉ hpehꞈ ve tehꞈ Iˉsaˍyaˆ kʼoˆ ve yoˬ. Iˉsaˍyaˆ Yaˬhoˉvaˬ htaꞈ kʼoˆ htaˇ yawˇ kʼoˆ ve, “yawˇ ve yawˬ teˇ hpaˍ htaꞈ teˇ geh gʼaꞈ hpoˆ piˇ tuˬ yoˬ. Yawˇ ve laꞈ sheh hkʼaw lo yawˇ hui htaꞈ chiˇ taˆ piˇ” tuˬ yoˬ. (Iˉsaˍyaˆ 40:11) Yaˬhoˉvaˬ ve laꞈ sheh vawˆ taˍ laˇ ve htaꞈ ngaˬ hui shiˍ htaˇ, maˇ kawˆ leh nyi ma gawˬ lehˍ cawˬ ve yoˬ. Shoꞈ shaꞈ ve gʼa hpuˇ ve htawˇ nyi ma gawˬ lehˍ cawˬ tuˬ, ka tiꞈ yeˬ leh cuˇ yiˍ cawˬ ve awˬ ceˬ 2019 hkʼawꞈ a yeˇ uiˍ jaˇ ve Liꞈ hpu awˬ tawn Iˉsaˍyaˆ liꞈ 41:10 htaꞈ leuˆ yuˬ taˍ ve yoˬ. “Ngaˬ lehˬ nawˬ hui ve Gʼuiˬ sha hpehꞈ ve yoˬ. Nawˬ hui teꞈ chiˉ kawˆ tuˬ maˇ cawˬ.” Awˬ tawn chi htaꞈ dawˇ nyi ve kʼo, awˬ gʼuˇ suhˍ hpawˇ hpehꞈ la tuˬ ve awˬ ceuˬ nawˬ gʼa hpuˇ htaˇ, awˬ gʼaˇ cawˬ tuˬ yoˬ.
KʼA MUIˬ HKAWˇ 38 Yawˇ nawˬ htaꞈ awˬ gʼaˇ cawˬ la piˇ tuˬ yoˬ
^ Miˬ guiˬ chi hkʼoˆ lo leh ngaˬ hui ve a shaꞈ teꞈ kuiˬ hkʼaw haiˬ ve gʼa hpuˇ htaˇ, aˬ htoꞈ ma te nyi ma gawˬ lehˍ ve cawˬ gʼa ve le? Chi htaꞈ caˉ daꞈ ve 3 hkʼaˇ 2019 hkʼawꞈ ve Liꞈ hpu awˬ tawn maˍ laˇ tuˬ yoˬ. Chi ve 3 hkʼaˇ leh, ngaˬ hui Yaˬhoˉvaˬ htaꞈ gʼaˇ hkʼa dehꞈ va leh dawˇ haˍ ve maˇ cawˬ maˇ tuˬ ve awˬ hkʼaˇ, awˬ lawn chi hkʼaw maˍ laˇ tuˬ yoˬ. 2019 hkʼawꞈ a yeˇ uiˍ jaˇ ve Liꞈ hpu awˬ tawn htaꞈ hkʼa dehꞈ dawˇ nyi sheˍ. Coˇ caˇ leh chi teˇ tawn htaꞈ tawnˇ taˍ sheˍ. Awˬ ceuˬ chi ve awˬ gʼuˇ suhˍ hpawˇ hpehꞈ la tuˬ ve htaꞈ gu hehnˇ taˍ tuˬ ga laˇ ve yoˬ.
^ Shaw nyi kuiˬ Taꞈ yehˬ ha pa 7 maˬ 2016 hkʼawꞈ liꞈ mehˆ hpfuhˇ 18 htaꞈ nyi sheˍ.
^ KʼAWꞈ KʼOˆ MAˍ TAˍ VE: Ka tiꞈ te taˍ ve lehˬ kʼoˆ taˍ ve tawˇ awˬ tehˬ hpehꞈ la leh teˇ ceuˬ ceuˬ awˬ tehˬ awˬ na hpehꞈ la ve yoˬ. Yaˬhoˉvaˬ ka tiꞈ te taˍ laˇ ve ngaˬ hui a shaꞈ teꞈ kuiˬ hkʼaw shoꞈ shaꞈ ve awˬ lawn gʼa hpuˇ ve maˇ maˇ ve yoˬ.
^ AWˬ MAIˉ: “Taˇ kawˆ” kʼoˆ ve tawˇ hkawˇ lehˬ Iˉsaˍyaˆ liꞈ 41:10, 13 leh 14 hkʼaw 3 pawˆ ceh cawˬ ve yoˬ. Teˇ tawn hkʼaw ceh kaꞈ “ngaˬ” kʼoˆ ve tawˇ laiˉ pawˆ cawˬ leh (Yaˬhoˉvaˬ htaꞈ kʼoˆ gaˇ ve yoˬ). Aˬ htoꞈ ma te Yaˬhoˉvaˬ Iˉsaˍyaˆ htaꞈ “ngaˬ” kʼoˆ ve laiˉ pawˆ bvuhꞈ tcuh ve le? A yeˇ uiˍ ve awˬ tawn htaꞈ kʼoˆ gaˇ ve yoˬ. Ngaˬ hui kawˆ ve cawˬ htaˇ, nyi ma gawˬ lehˍ cawˬ tuˬ ga laˇ gʼa ve teˇ ceuˬ Yaˬhoˉvaˬ htaꞈ gʼaˇ va ve yoˬ.
^ AWˬ HAN HTAꞈ KʼOˆ MAˍ TAˍ VE: Yehˬ kʼa hkʼaw ve chaw kanˉ te kuiˬ hkʼaw, chehˇ sha cawˬ sha ve awˬ lawn, Gʼuiˬ sha ve kanˉ te ve, leh liꞈ henˇ yehˬ lo beˬ ve lawˇ ve gʼa hpuˇ ve.
^ AWˬ HAN HTAꞈ KʼOˆ MAˍ TAˍ VE: Yaˬhoˉvaˬ ve Shaˉhkiˆhkanˍ ve chaw teˇ gʼaˇ ve aˉ hkʼaw hpawnˬ daꞈ chehˇ htaˇ maꞈ yaˇ loꞈ˗e leh hpfuhˆ piˇ ve. Yaꞈ hkʼaˇ, awˬ viˉ awˬ nyi maˇ kawˆ.
^ AWˬ HAN HTAꞈ KʼOˆ MAˍ TAˍ VE: Yehˬ kʼa hkʼaw oˉ kʼoˍ pui ve hkʼaˬ htaˆ kaꞈ te chehˇ ve kʼo, ngaˬ hui awˬ gʼaˇ gʼa leh yeunˇ hkanˍ gʼaˇ tuˬ ga laˇ ve.