1. Yeˍsuˆ ve te hkʼaˇ dawˇ hkʼaˇ laiˉ gʼaˇ dawˇ cawˇ ve teˇ ceuˬ lehˬ aˬ htoꞈ ma le? Tawˇ pa haˉ kʼoˆ maˍ laˇ sheˍ.

 Yeˍsuˆ ve te hkʼaˇ dawˇ hkʼaˇ laiˉ gʼaˇ dawˇ cawˇ ve teˇ ceuˬ cawˬ ve yoˬ. Oˇ ve lehˬ ngaˬ hui venˇ baˆ yaˇ hpehꞈ leh aˬ htoꞈ ma gʼa hpuˇ ve yawˇ shiˍ ve yoˬ. Yeˍsuˆ miˬ guiˬ hkʼoˆ chehˇ htaˇ, “ha lehˬ ve chaw hui geh teˇ geh ha lehˬ˗oꞈ. Hawˬ ve chaw hui geh teˇ geh haw˗oꞈ.” tehꞈ kʼoˆ ve yoˬ. (Roˉmaꞈ 12:15) Tawˇ pa haˉ te kʼo, yawˇ ve awˬ laꞈ gʼawˇ 70 gʼaˇ bon maˍ taˉ leh ha lehˬ ha kʼa kʼawꞈ la htaˇ, “Yeˍsuˆ lehˬ, daꞈ ve kehˬ ve Awˬ ha hpu awˬ hkʼaw lo ha lehˬ” ve yoˬ. (Luˉkaꞈ 10:17-21) Yaꞈ hkʼaˇ, Laˍzaˍruˆ suh˗e htaˇ yawˇ htaꞈ haꞈ ve chaw laiˉ gʼaˇ nyi ma luˬ jaˇ. Yeˍsuˆ chi hkʼe gʼa mawˬ htaˇ, “yawˇ ve nyi ma awˬ hkʼaw lo hkʼanˇ leh dawˇ haˍ jaˇ.”—Yoˇhanˬ 11:33.

2. Yeˍsuˆ shu htaꞈ hkʼaˬ htaˆ kaꞈ dawˇ nyi ve tehꞈ aˬ htoꞈ ma ga piˇ ve le?

² Yeˍsuˆ biˇ ve chaw hpehꞈ ve htawˇ, yawˇ chaw yaˇ maˇ biˇ ve htaꞈ hkʼaˬ htaˆ kaꞈ ha kʼaˉ leh dawˇ nyi chehˇ ve yoˬ. Yawˇ chi hkʼe te tuˬ aˬ htoꞈ ma ga piˇ ve le? Awˉ lawˉ teˇ ceuˬ Yeˍsuˆ chaw yaˇ htaꞈ haꞈ ve yoˬ. Peuˬ taˉ ve teˇ lawn hkʼaw gʼa henˇ peuˬ ve hkʼa shuˍ yawˇ chaw yaˇ htaꞈ haꞈ jaˇ. (Tawˇ naˉ ve 8:31) Yeˍsuˆ chaw yaˇ htaꞈ haꞈ ve pa taw, yawˇ hui aˬ htoꞈ ma dawˇ ve htaꞈ coˇ caˇ leh na gʼa ve yoˬ. Tcuh yaˇ Yoˇhanˬ kʼoˆ ve, “chaw yaˇ ve nyi ma awˬ hkʼaw lo hkʼaˬ hkʼe cawˬ ve htaꞈ yawˇ shiˍ taˍ ve” yoˬ. (Yoˇhanˬ 2:25) Yeˍsuˆ shu htaꞈ ha kʼaˉ ve yoˬ. Yeˍsuˆ yawˇ hui htaꞈ haꞈ ve tehꞈ shiˍ leh yawˇ hui Gʼuiˬ sha ve mvuhˇ miˬ awˬ lawn na gaˇ ve yoˬ. Ngaˬ hui shu htaꞈ chi hkʼe dawˇ ve kʼo, hto toˇ˗e htaˇ shu htaꞈ ga piˇ gaˇ ve yoˬ.—2 Tiˆmoˉseˍ 4:5.

3-4. (a) Ngaˬ hui shu awˬ pon dawˇ nyi ve kʼo, Gʼuiˬ sha ve kanˉ te ve hkʼaw hkʼaˬ hkʼe dawˇ tuˬ le? (b) Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

³ Tcuh yaˇ Pawˇluꞈ yawˇ shu htaꞈ bon gʼa maˍ piˇ cawˇ ve tehꞈ hkʼa dehꞈ shiˍ ve yoˬ. Ngaˬ hui kaꞈ awˬ lawn chi htaꞈ shiˍ ve yoˬ.  (1 Kawˇrenˍhtuˆ 9:16) Yaꞈ hkʼaˇ, ngaˬ hui shu awˬ pon dawˇ nyi ve kʼo, hto toˇ ve chi awˬ vuiˬ ceh hpehꞈ ve tehꞈ maˇ dawˇ. Ngaˬ hui shu awˬ pon dawˇ haˍ leh ga piˇ gaˇ ve pa taw, hto toˇ˗e ve yoˬ. “Piˇ ve lehˬ gʼa ve aꞈ kehˉ awˬ bon uiˍ ve” tehꞈ ngaˬ hui shiˍ ve yoˬ. (Tcuh yaˇ 20:35) Ngaˬ hui Gʼuiˬ sha ve kanˉ te ve htaꞈ dawˇ nyi htaˇ, kanˉ te ve hkʼaw ha lehˬ jaˇ tuˬ yoˬ.

⁴ Ngaˬ hui hto toˇ˗e htaˇ shu awˬ pon hkʼaˬ hkʼe dawˇ nyi gʼa tuˬ ve awˬ lawn chi ve hkʼaw teˇ geh chaˬ nyi tuˬ yoˬ. Awˉ lawˉ htaˇ, Yeˍsuˆ bon lawˬ ve ngaˬ hui htaꞈ aˬ htoꞈ ma maˍ laˇ ve teˇ geh chaˬ nyi tuˬ yoˬ. Peuˬ hkʼawꞈ nawˉ Yeˍsuˆ ve awˬ lawn htaꞈ henˇ yuˬ tuˬ ve 4 hkʼaˇ htaꞈ teˇ geh chaˬ nyi tuˬ yoˬ.—1 Peˍtruˆ 2:21.

5-6. (a) Yeˍsuˆ a shu awˬ pon dawˇ nyi ve le? (b) Iˉsaˍyaˆ liꞈ 61:1, 2 hkʼaw awˬ gʼuˇ suhˍ htaˇ kaꞈ kʼoˆ taˍ ve hkʼe, Yeˍsuˆ bon maˍ piˇ ve chaw htaꞈ aˬ htoꞈ ma te ha kʼaˉ ve le?

⁵ Yeˍsuˆ shu awˬ pon dawˇ nyi ve awˬ hkʼaˇ htaꞈ dawˇ nyi sheˍ. Teˇ pawˆ htaˇ, yawˇ leh awˬ laꞈ gʼawˇ bon maˍ ve maˇ gʼa jehˇ ve pa taw yawˇ hui heuˬ jaˇ. “Yawˇ hui awˍ kaꞈ caˇ maˇ tanˇ ve yoˬ.” Chi htaꞈ pa taw Yeˍsuˆ leh awˬ laꞈ gʼawˇ “heh puiˉ hkʼaw chaw gawˬ kuiˬ teˇ kaˬ lo kʼai” leh “gʼaˇ a ciˉ ca jehˇ” ve yoˬ. Yaꞈ hkʼaˇ, chaw awˬ moˍ lonˉ yawˇ leh awˬ laꞈ gʼawˇ htaꞈ gʼuˇ suhˍ lo lawˬ taˍ piˇ ve yoˬ. Yeˍsuˆ oˇ kaˬ lo gaˬ leh chaw awˬ moˍ lonˉ htaꞈ gʼa mawˬ htaˇ hkʼaˬ hkʼe te ve le? “Yawˇ hui lehˬ, yawˬ hawˉ paˍ maˇ cawˬ ve yawˬ teˇ hpaˍ htaꞈ shuˍ ve pa taw, yawˇ yawˇ hui htaꞈ ha kʼaˉ * leh awˬ lawn laiˉ ceuˬ maˍ piˇ ve yoˬ.”—Maˍkuˆ 6:30-34.

⁶ Aˬ htoꞈ ma te Yeˍsuˆ chaw oˇ ve teˇ hpaˍ htaꞈ ha kʼaˉ leh dawˇ nyi ve le? Yeˍsuˆ kʼoˆ ve, yawˇ hui “yawˬ hawˉ paˍ maˇ cawˬ ve yawˬ teˇ hpaˍ htaꞈ shuˍ ve” yoˬ. Yeˍsuˆ dawˇ ve yawˇ hui ve yehˬ kʼa htaꞈ hu gʼa tuˬ kanˉ laiˉ naˍ riˍ gʼa te ve yoˬ. Teˇ hpaˍ hpaˍ yawˇ hui haꞈ ve chaw suh˗e ve yoˬ. Chi hkʼe hpehꞈ ve kʼo, yawˇ hui hkʼaˬ hkʼe dawˇ ve Yeˍsuˆ na gʼa tuˬ yoˬ. Peuˬ taˉ ve teˇ lawn hkʼaw gʼa henˇ peuˬ ve  hkʼa shuˍ, Yeˍsuˆ kaꞈ awˬ lawn chi hkʼe ve gʼa hpuˇ jaw˗oˬ. Yeˍsuˆ shu htaꞈ ha kʼaˉ ve pa taw, awˬ gʼaˇ piˇ leh daꞈ ve awˬ lawn sha tanˇ maˍ ve yoˬ.—Iˉsaˍyaˆ 61:1, 2 gʼaw sheˍ.

7. Ngaˬ hui hkʼaˬ hkʼe te Yeˍsuˆ ve awˬ lawn htaꞈ henˇ yuˬ gʼa tuˬ le?

⁷ Yeˍsuˆ ve awˬ lawn aˬ htoꞈ ma maˍ laˇ ve le? Yeˍsuˆ hkʼe ngaˬ hui awˬ paˇ awˬ kui lo ve chaw “yawˬ hawˉ paˍ maˇ cawˬ ve yawˬ teˇ hpaˍ htaꞈ shuˍ” ve yoˬ. Yawˇ hui shoꞈ shaꞈ ve laiˉ ceuˬ gʼa hpuˇ ve yoˬ. Yawˇ hui loˍ ve ngaˬ hui cawˬ ve lehˬ Gʼuiˬ sha ve mvuhˇ miˬ ha lehˬ ve bon hkawˇ yoˬ. (Hpeuꞈ maˍ ve 14:6) Hkʼe te leh, ngaˬ hui ve Jawˇmawˇ htaꞈ henˇ yuˬ tuˬ daꞈ ve awˬ lawn sha tanˇ gʼa hto toˇ ve yoˬ. “Gʼaˇ nuˇ shaˉ nuˇ ve chaw leh haˍ gʼawˇ ve chaw hui htaꞈ” ngaˬ hui ha kʼaˉ ve pa taw yoˬ. (Chiˇ mvuh ve 72:13) Ngaˬ hui shu htaꞈ dawˇ nyi leh ga piˇ gʼa tuˬ teˇ ceuˬ ceuˬ te ve yoˬ.

8. Ngaˬ hui hto toˇ htaˇ shu awˬ pon dawˇ nyi piˇ ve tehꞈ hpeuꞈ maw piˇ gʼa ve awˬ hkʼaˇ teˇ maˬ lehˬ aˬ htoꞈ ma le? Tawˇ pa haˉ kʼoˆ maˍ laˇ sheˍ.

⁸ Ngaˬ hui hto toˇ˗e htaˇ shu awˬ pon dawˇ nyi ve tehꞈ hkʼaˬ hkʼe hpeuꞈ maw piˇ gʼa tuˬ le? Yawˇ hui nyi ma hkʼaw hkʼaˬ hkʼe dawˇ ve ngaˬ hui coˇ caˇ leh dawˇ nyi sheˍ. Ngaˬ hui yawˇ hkʼe hpehꞈ ve kʼo, shu ngaˬ hui htaꞈ hkʼaˬ hkʼe te laˇ tcuh gaˇ ve kaꞈ dawˇ nyi leh awˬ tehˬ awˬ na oˇ hkʼe gʼa te ve yoˬ. * (Maꞈhtehˍ 7:12) Ngaˬ hui te gʼa ve awˬ hkʼaˇ 4 maˬ htaꞈ teˇ geh dawˇ nyi sheˍ. Awˉ lawˉ teˇ maˬ teˇ gʼaˇ leh teˇ gʼaˇ loˍ ve awˬ ceuˬ htaꞈ dawˇ nyi sheˍ. Ngaˬ hui hto toˇ htaˇ saˍ laꞈ gʼonˍ hkʼe hpehꞈ ve yoˬ. Daꞈ ve saˍ laꞈ gʼonˍ leh chaw naˬ htaꞈ dawˇ nyi piˇ ve yoˬ. Chaw naˬ hkʼaˬ hkʼe te naˍ ve htaꞈ kʼoˆ maˍ piˇ htaˇ hkʼa dehꞈ na taˍ ve yoˬ. Saˍ laꞈ gʼonˍ laꞈ haˉ dawˇ gʼa leh haꞈ shaˉ piˇ ve maˇ heˆ. Awˬ yanˇ gʼa yehˇ ve yoˬ. Chaw naˬ htaꞈ cawˇ ve awˬ hkʼaˇ haꞈ shaˉ piˇ gʼa tuˬ a ciˉ law nyi sheˍ ve yoˬ. Chi ve kaꞈ hkʼa shuˍ shuˍ ngaˬ hui hto toˇ˗e htaˇ teˇ gʼaˇ le le geh awˬ hkʼaˇ hkʼa shuˍ yaw ve maˇ te cawˇ. Yaꞈ hkʼaˇ, teˇ gʼaˇ leh teˇ gʼaˇ gʼa hpuˇ ve htaꞈ dawˇ nyi cawˇ ve yoˬ.

9. Ngaˬ hui hkʼaˬ hkʼe maˇ dawˇ cawˇ ve le? Kʼoˆ maˍ laˇ sheˍ.

⁹ Nawˬ hto toˇ kuiˬ lo chaw teˇ gʼaˇ htaꞈ mawˬ daꞈ htaˇ yawˇ hkʼaˬ hkʼe hpehꞈ ve, yawˇ aˬ htoꞈ ma yonˍ ve, yawˇ aˬ htoꞈ ma te chi hkʼe yonˍ ve, chi ve hkʼa peu˗eˬ nawˬ shiˍ˗oˬ ve tehꞈ taˇ dawˇ. (Tawˇ naˉ ve 18:13) Yaꞈ hkʼaˇ, yawˇ nawˬ htaꞈ hkʼawꞈ laˇ gʼa tuˬ nawˬ hkʼa dehꞈ gu˗oˬ ve na hkawˇ htaꞈ yehˇ sheˍ. (Tawˇ naˉ ve 20:5) Nawˬ ve chaw liˇ vaˇ liˇ na hpehꞈ ve kʼo, kanˉ te ve, yehˬ kʼa, hpehꞈ laˬ jaw ve awˬ lawn, leh yawˇ dawˇ ve htaꞈ na piˇ cawˇ ve yoˬ. Ngaˬ hui na piˇ htaˇ, aˬ htoꞈ ma te yawˇ daꞈ ve awˬ lawn sha tanˇ gʼa kaˇ cawˇ ve kʼoˆ piˇ gʼa ve yoˬ. Chi ve ngaˬ hui shiˍ˗oˬ htaˇ, yawˇ aˬ htoꞈ ma loˍ ve ngaˬ hui na gʼa leh, Yeˍsuˆ te ve hkʼe te piˇ gʼa ve yoˬ.—1 Kawˇrenˍhtuˆ 9:19-23 htaꞈ tehˆ nyi sheˍ.

10-11. 2 Kawˇrenˍhtuˆ liꞈ 4:7, 8 hkʼaw kʼoˆ taˍ ve hkʼe, nyiˇ maˬ teˇ maˬ ngaˬ hui shu awˬ pon dawˇ nyi gʼa ve aˬ htoꞈ ma le? Tawˇ pa haˉ kʼoˆ maˍ laˇ sheˍ.

 ¹⁰ Nyiˇ maˬ teˇ maˬ yawˇ ve a shaꞈ teꞈ hkʼaˇ hkʼaˬ hkʼe hpehꞈ ve dawˇ nyi sheˍ. Ngaˬ hui yawˇ htaꞈ na gʼa tuˬ yoˬ hehˉ. Ngaˬ hui maˇ biˇ ve chaw hpehꞈ ve pa taw, shoꞈ shaꞈ ve hkʼa shuˍ gʼa hpuˇ ve yoˬ. (1 Kawˇrenˍhtuˆ 10:13) Chi beuꞈ teˇ co˗e ve a shaꞈ teꞈ hkʼaˇ haˍ jaˇ tehꞈ ngaˬ hui shiˍ ve yoˬ. Yaˬhoˉvaˬ ga laˇ ve pa taw, ngaˬ hui yeunˇ hkanˍ gʼaˇ ve yoˬ. (2 Kawˇrenˍhtuˆ 4:7, 8 gʼaw sheˍ.) Yawˇ hui Yaˬhoˉvaˬ geh maˇ meuˆ daꞈ ve pa taw, miˬ guiˬ chi hkʼoˆ shoꞈ shaꞈ ve gʼa tawˍ daꞈ ve chaw htaꞈ dawˇ nyi sheˍ. Yeˍsuˆ hkʼa shuˍ ngaˬ hui yawˇ hui htaꞈ dawˇ haˍ leh “daꞈ ve awˬ lawn sha tanˇ” hto piˇ gaˇ ve yoˬ.—Iˉsaˍyaˆ 52:7.

¹¹ Awˬ viˉ awˬ nyi Seuˬgeˬ ve awˬ lawn htaꞈ dawˇ nyi sheˍ. Yawˇ awˬ tehˬ ve maˇ henˇ sheˍ htaˇ, Seuˬgeˬ yaꞈ taw puiˉ jaˇ. Yawˇ awˬ pon kʼo, shu geh tawˇ yaw daꞈ tuˬ haˍ jaˇ. Teˇ nyi htaˇ, Seuˬgeˬ Liꞈ hpu tanˬ henˇ leh kʼoˆ ve, “ngaˬ Liꞈ hpu henˇ htaˇ Hkriꞈ yaˇ yonˍ hkʼaˇ shu htaꞈ gʼa kʼoˆ maˍ piˇ ve shiˍ la ve yoˬ. Ngaˬ chi hkʼe te maˇ gʼa taˍ tehꞈ dawˇ ve yoˬ.” Yaꞈ hkʼaˇ, awˬ tehˬ ve maˇ gʼa kaˇ jaw ve chaw htaꞈ yawˇ dawˇ nyi leh Yaˬhoˉvaˬ htaꞈ maˇ shiˍ ve a shaꞈ teꞈ hkʼaˇ hkʼaˬ hkʼe hpehꞈ ve yawˇ coˇ caˇ leh dawˇ nyi ve yoˬ. Yawˇ kʼoˆ ve, “ngaˬ gʼa henˇ ve awˬ suhˉ awˬ suhˉ ngaˬ ha lehˬ leh nyi ma sha jaˇ. Shu kaꞈ awˬ tehˬ ve chi gʼa henˇ cawˇ ve tehꞈ ngaˬ shiˍ la ve yoˬ.” Seuˬgeˬ shu awˬ pon maˇ maˇ dawˇ nyi htaˇ, yawˇ gʼa hto toˇ ve tehꞈ shiˍ la ve yoˬ. Yawˇ kʼoˆ ve “ngaˬ anˇ jaˇ. Yaꞈ hkʼaˇ, Liꞈ hpu hkʼaw ve awˬ lawn shu htaꞈ gʼa kʼoˆ piˇ htaˇ, ngaˬ awˬ to htaꞈ yonˍ maˇ la ve yoˬ. Chi ve ngaˬ ve yonˍ hkʼaˇ kaꞈ uiˍ la mvuh la ve yoˬ.” *

12-13. Aˬ htoꞈ ma te ngaˬ hui hto maˍ piˇ ve chaw geh gʼa yeunˇ hkanˍ ve le? Tawˇ pa haˉ kʼoˆ maˍ laˇ sheˍ.

¹² Shehˆ maˬ teˇ maˬ nawˬ hto maˍ piˇ chehˇ ve chaw geh gʼa yeunˇ hkanˍ ve yoˬ. Ngaˬ hui Liꞈ hpu hkʼaw awˬ tehˬ ve htaꞈ hkʼa dehꞈ shiˍ˗oˬ ve yoˬ hehˉ. Yaꞈ hkʼaˇ, chaw teˇ hpaˍ hpaˍ chi ve htaꞈ maˇ dawˇ nyi ve tehꞈ tawnˇ taˍ sheˍ. Laiˉ gʼaˇ yawˇ hui ve yonˍ hkʼaˇ htaꞈ haꞈ jaˇ. Yonˍ hkʼaˇ, chaw liˇ vaˇ liˇ,  leh oˇ kaˬ lo ve chaw yawˇ hui ve yehˬ kʼa hkʼaw meuˆ daꞈ tuˬ te laˇ ve tehꞈ dawˇ ve yoˬ. Ngaˬ hui hkʼaˬ hkʼe te leh yawˇ hui htaꞈ ga piˇ gʼa tuˬ le?

¹³ Awˬ lawn chi htaꞈ dawˇ nyi sheˍ. Coˬ teˇ maˬ piˍ jaˇ˗oˬ leh hkʼa dehꞈ yehˇ maˇ gʼa˗o ve kʼo, hkʼaˬ hkʼe hpehꞈ tuˬ le? Awˬ tehˬ kʼo, coˬ awˬ piˍ yehˇ sheˍ ve htawˇ coˬ awˬ suhˉ te chehˇ ve yoˬ. Yaꞈ hkʼaˇ, coˬ “awˬ suhˉ” peuˬ˗oˬ htaˇ coˬ awˬ piˍ hpaˆ baˬ ve yoˬ. Chi ve kaꞈ hkʼa shuˍ shuˍ yawˇ hui awˬ pon awˬ hpfuhˇ hkʼaˆ jaˇ ve yonˍ hkʼaˇ “awˬ piˍ” htaꞈ baˬ taˉ tuˬ Liꞈ hpu hkʼaw awˬ tehˬ ve htaꞈ shiˍ leh haꞈ tuˬ ngaˬ hui awˉ lawˉ gʼa ga piˇ cawˇ ve yoˬ. Awˉ lawˉ tanˬ henˇ htaˇ yawˇ chi htaꞈ hkʼa dehꞈ maˇ na gʼa. Yaꞈ hkʼaˇ, yawˇ shiˍ˗oˬ htaˇ, yawˇ ve yonˍ hkʼaˇ awˬ piˍ htaꞈ baˬ taˉ gʼa ve yoˬ. Chaw yaˇ chi hkʼe ve pa gʼa tuˬ awˬ yanˇ gʼa yehˇ ve yoˬ.—Roˉmaꞈ 12:2.

14-15. Miˬ guiˬ awˬ suhˉ hkʼaw co co taiˍ taiˍ ve a shaꞈ gʼa tuˬ hkʼa dehꞈ maˇ shiˍ leh maˇ shiˍ˗oˬ ve chaw htaꞈ ngaˬ hui hkʼaˬ hkʼe ga piˇ gʼa tuˬ le? Tawˇ pa haˉ kʼoˆ maˍ laˇ sheˍ.

¹⁴ Ngaˬ hui hto toˇ˗e htaˇ yawˇ hui htaꞈ yeunˇ hkanˍ ve kʼo, Liꞈ hpu hkʼaw awˬ tehˬ ve htaꞈ yawˇ hui awˉ lawˉ teˇ pawˆ gʼa kaˇ ve htaꞈ yonˍ la tuˬ maˇ dawˇ law cawˇ. Yaꞈ hkʼaˇ, yawˇ hui htaꞈ dawˇ nyi ve kʼo, Liꞈ hpu hkʼaw awˬ tehˬ maˍ ve htaꞈ yawˇ hui dawˇ nyi gʼa tuˬ ngaˬ hui ga piˇ tuˬ yoˬ. Miˬ guiˬ awˬ suhˉ hkʼaw co co taiˍ taiˍ ve a shaꞈ, chaw teˇ gʼaˇ na gʼa tuˬ ga piˇ gʼa ve awˬ hkʼaˇ htaꞈ dawˇ nyi sheˍ. Laiˉ gʼa chi htaꞈ hkʼa dehꞈ maˇ shiˍ leh teˇ hpaˍ kʼo maˇ shiˍ˗oˬ ve yoˬ. Suh˗e ve kʼo teˇ ceuˬ le le peuˬ˗e ve tehꞈ yawˇ hui yonˍ ve yoˬ hehˉ. Maˇ heˆ leh daꞈ ve chaw teˇ gʼaˇ le le mvuhˇ naw ma hkʼoˆ gʼa taˆ˗e ve tehꞈ yawˇ hui dawˇ ve yoˬ hehˉ. Hkʼaˬ hkʼe te yawˇ hui htaꞈ ga piˇ gʼa tuˬ le?

¹⁵ Awˬ viˉ awˬ nyi hawˉ hkʼaˆ teˇ gʼaˇ yawˇ te leh awˬ bon gʼa ve htaꞈ kʼoˆ taˍ ve yoˬ. Awˉ lawˉ htaˇ yawˇ Awˬ hkuiˉ puiˍ liꞈ 1:28 htaꞈ gʼaw ve yoˬ. Peuˬ hkʼawꞈ nawˉ yawˇ yehˬ shehˍ hpaˇ htaꞈ na piˇ ve Gʼuiˬ sha chaw yaˇ htaꞈ hkʼaˬ kaˬ lo chehˇ tcuh gaˇ ve le, leh hkʼaˬ hkʼe ve awˬ ti lo le, laiˉ gʼaˇ hkʼawꞈ laˇ ve, “miˬ guiˬ hkʼoˆ daꞈ ve awˬ ti lo yoˬ.” Peuˬ leh yawˇ Iˉsaˍyaˆ liꞈ 55:11 gʼaw leh na piˇ ve Gʼuiˬ sha ve dawˇ hkʼaˇ pa˗aw laˇ? Laiˉ pawˆ kʼo, maˇ pa tehꞈ yehˬ shehˍ hpaˇ hkʼawꞈ laˇ ve yoˬ. Awˬ leh meuˇ htaˇ yawˇ Chiˇ mvuh ve liꞈ 37:10, 11 gʼaw leh na piˇ ve awˬ gʼuˇ suhˍ hpawˇ chaw yaˇ hkʼaˬ hkʼe hpehꞈ tuˬ le? Laiˉ gʼa na gʼa tuˬ Liꞈ hpu awˬ tawn chi hkʼe yehˇ ve lehˬ, Gʼuiˬ sha daꞈ ve chaw htaꞈ miˬ guiˬ awˬ suhˉ hkʼaw co co taiˍ taiˍ chehˇ tcuh gaˇ ve yoˬ.

16-17. Tawˇ naˉ ve liꞈ 3:27 hkʼaw kʼoˆ taˍ ve hkʼe, ngaˬ hui shu awˬ pon dawˇ nyi ve kʼo hkʼaˬ hkʼe hpeuꞈ maw piˇ gʼa tuˬ le? Tawˇ pa haˉ kʼoˆ maˍ laˇ sheˍ.

¹⁶ Awˇ maˬ teˇ maˬ nawˬ shu awˬ pon dawˇ nyi ve tehꞈ hpeuꞈ maw piˇ gʼa tuˬ yoˬ. Tawˇ pa haˉ te kʼo, chaw teˇ gʼaˇ kanˉ maˇ jaˇ htaˇ ngaˬ hui ca guiˇ˗e jaw˗aw laˇ? Gʼuˇ suhˍ teˇ pawˆ kʼawꞈ laˬ˗a tehꞈ kʼoˆ leh lawˬ hkawˉ piˇ cawˇ ve yoˬ. Yaꞈ hkʼaˇ, yehˬ shehˍ hpaˇ ga laˇ tuˬ loˍ ve kʼo˗ehꞈ? Chaw teˇ gʼaˇ teˇ kaˬ kaꞈ kʼai maˇ gaˬ leh nawˬ htaꞈ yawˇ ve awˬ lawn ca te tcuh laˇ ve kʼo˗ehꞈ? Chi hkʼe ve gʼa hpuˇ ve chaw htaꞈ ngaˬ hui mawˬ ve kʼo ga piˇ gʼa ve yoˬ.—Tawˇ naˉ ve 3:27 gʼaw sheˍ.

 ¹⁷ Awˬ viˉ awˬ nyi yaˇ miˇ teˇ gʼaˇ shu htaꞈ ha kʼaˉ ve yoˬ. Nyi˗a kʼo chi a yeˇ maˇ uiˍ ve htawˇ yawˇ awˬ bon gʼa ve yoˬ. Yehˬ kʼa teˇ yehˬ kʼa yaˇ suh˗e ve htaꞈ yawˇ dawˇ nawˇ leh liꞈ bvuhꞈ feu piˇ ve yoˬ. Liꞈ chi ve hkʼaw Liꞈ hpu awˬ tawn awˬ gʼaˇ piˇ tuˬ teˇ tawn tawn bvuhꞈ taˍ ve yoˬ. Yehˬ kʼa chi ve hkʼaˬ hkʼe te ve le? Awˬ e nyi ma luˬ chehˇ ve kʼoˆ ve, “ngaˬ teꞈ chiˉ te maˇ gʼa tehꞈ dawˇ ve yoˬ. Nawˬ ve liꞈ ngaˬ awˬ pon awˬ bon hkʼaˬ hkʼe cawˬ ve nawˬ maˇ na gʼa taˬ. Ngaˬ nawˬ htaꞈ awˬ bon uiˍ jaˇ kʼoˆ laˇ gaˇ jaˇ ve yoˬ. Liꞈ chi ve ngaˬ hui awˬ pon awˬ hpfuhˇ hkʼaˬ hkʼe taw hkʼaˆ ve kʼoˆ maˍ laˇ maˇ gʼa. Nawˬ ve liꞈ aˉ nyi htaˇ ngaˬ 20 pawˆ gʼaw ve yoˬ. Liꞈ chi ve hkʼaw ha kʼaˉ ve, dawˇ haˍ ve, leh ngaˬ htaꞈ awˬ gʼaˇ peꞈ laˇ jaˇ. Ngaˬ nawˬ htaꞈ awˬ bon uiˍ jaˇ kʼoˆ laˇ gaˇ jaˇ.” Nyi ma luˬ chehˇ ve chaw awˬ pon hkʼaˬ hkʼe hpehꞈ ve ngaˬ hui dawˇ nyi htaˇ, coˇ caˇ leh yawˇ htaꞈ ga piˇ gʼa tuˬ teˇ ceuˬ ceuˬ te ve yoˬ. Chi hkʼe te ve kʼo, ngaˬ hui kaꞈ awˬ bon gʼa tuˬ yoˬ.

18. 1 Kawˇrenˍhtuˆ liꞈ 3:6, 7 hkʼaw kʼoˆ taˍ ve hkʼe, ngaˬ hui awˬ to htaꞈ keunˍ lawꞈ cawˇ lawꞈ ve hkʼaw hkʼaˬ hkʼe te gaˇ ve le?

¹⁸ Ngaˬ hui hto toˇ˗e htaˇ, keunˍ lawꞈ cawˇ lawꞈ te gaˇ ve yoˬ. Shu Gʼuiˬ sha htaꞈ shiˍ la tuˬ ngaˬ hui ve awˬ vuiˬ te gʼa ve yoˬ. Yaꞈ hkʼaˇ, ngaˬ hui te ve lehˬ a yeˇ uiˍ jaˇ ve maˇ heˆ. (1 Kawˇrenˍhtuˆ 3:6, 7 gʼaw sheˍ.) Yaˬhoˉvaˬ yawˇ hui htaꞈ gʼawˬ veu laˇ ve yoˬ. (Yoˇhanˬ 6:44) Awˬ leh meuˇ htaˇ, chaw teˇ gʼaˇ daꞈ ve awˬ lawn sha tanˇ haꞈ yuˬ maˇ haꞈ yuˬ tuˬ yawˇ ve nyi ma htaꞈ cawˬ ve yoˬ. (Maꞈhtehˍ 13:4-8) Yeˍsuˆ miˬ guiˬ hkʼoˆ chehˇ htaˇ yawˇ daꞈ ve saˍ laꞈ lonˉ hpehꞈ ve htawˇ, daꞈ ve awˬ lawn sha tanˇ maˍ ve htaꞈ shu maˇ haꞈ yuˬ ve tehꞈ tawnˇ taˍ sheˍ. Chi htaꞈ pa taw, ngaˬ hui maˍ piˇ ve htaꞈ laiˉ gʼaˇ yawˇ hui maˇ haꞈ yuˬ ve htawˇ ngaˬ hui awˬ gʼaˇ taˇ nuˇ sheˍ.

19. Ngaˬ hui hto toˇ kuiˬ lo shu awˬ pon dawˇ nyi ve kʼo, aˬ htoꞈ ma awˬ bon gʼa tuˬ le?

¹⁹ Ngaˬ hui hto toˇ kuiˬ lo shu awˬ pon dawˇ nyi htaˇ awˬ bon gʼa ve yoˬ. Ngaˬ hui Gʼuiˬ sha ve kanˉ te ve hkʼaw ha lehˬ jaˇ. Ngaˬ hui piˇ ve htaꞈ ha lehˬ ve yoˬ. “Co tiꞈ ha tiꞈ htaꞈ gʼa tuˬ awˬ pon” haꞈ yuˬ laˇ ve chaw htaꞈ ngaˬ hui kaꞈ ga piˇ sha ve yoˬ. (Tcuh yaˇ 13:48) Chi htaꞈ pa taw, “chaw hkʼa peu˗eˬ awˬ pon daꞈ ve htaꞈ te˗a veuˬ.” (Gaˍlaˍtiˆ 6:10) Ngaˬ hui chi hkʼe te ve kʼo, mvuhˇ naw ma hkʼoˆ chehˇ ve ngaˬ hui ve Awˬ pa awˬ meꞈ awˬ hponˇ gʼa leh ngaˬ hui ha lehˬ jaˇ tuˬ yoˬ.—Maꞈhtehˍ 5:16.