1. 1 Peˍtruˆ liꞈ 3:8 hkʼaw kʼoˆ taˍ ve hkʼe, htoꞈ ma te ngaˬ hui awˬ pon dawˇ nyi laˇ puiˉ ve chaw geh chehˇ gaˇ ve le?

 Ngaˬ hui awˬ pon dawˇ nyi laˇ puiˉ ve chaw geh chehˇ gaˇ ve yoˬ. Yawˇ ngaˬ hui hkʼe hpehꞈ ve kʼo, hkʼaˬ hkʼe dawˇ ve yawˇ hkʼa dehꞈ dawˇ nyi tuˬ yoˬ. Ngaˬ hui aˬ htoꞈ ma loˍ ve yawˇ awˉ lawˉ dawˇ nyi leh, maˇ lawˬ ve kaꞈ yawˇ ga laˇ tuˬ yoˬ. Shu awˬ pon dawˇ nyi puiˉ ve chaw chi hkʼe ve awˬ hpfuhˇ hkʼaˆ jaˇ. *—1 Peˍtruˆ 3:8 gʼaw sheˍ.

2. Aˬ htoꞈ ma te shu awˬ pon dawˇ nyi puiˉ tuˬ maˇ sha ve le?

² Ngaˬ hui Hkriꞈ yaˇ hpehꞈ ve pa taw, shu awˬ pon dawˇ nyi gaˇ ve yoˬ. Yaꞈ hkʼaˇ, teˇ pawˆ pawˆ kʼo chi hkʼe te ve maˇ sha. Aˬ htoꞈ ma pa taw le? Ngaˬ hui maˇ biˇ ve pa taw yoˬ. (Roˉmaꞈ 3:23) Ngaˬ hui a shu yawˇ awˬ pon dawˇ nyi hkʼeh leh, shu awˬ pon kaꞈ dawˇ nyi gaˇ ve kʼo gʼa coˇ caˇ jaˇ. Chi hkʼoˆ kaꞈ teˇ gʼaˇ gʼaˇ kʼo, oˇ htaˇ yawˇ maˇ daꞈ ve gʼa hpuˇ jaw ve pa taw, shu awˬ pon dawˇ nyi tuˬ haˍ jaˇ. Leh ngaˬ hui awˬ paˇ awˬ kui chehˇ ve chaw kaꞈ heuˆ la gʼa ve yoˬ. Awˬ leh meuˇ ve awˬ yanˇ chi ve hkʼaw laiˉ gʼaˇ shu awˬ pon maˇ dawˇ nyi. Yawˇ hui “a shu yawˇ awˬ to htaꞈ haꞈ” ve yoˬ. (2 Tiˆmoˉseˍ 3:1, 2) Hkʼe kʼo, ngaˬ hui shu awˬ pon dawˇ nyi puiˉ tuˬ aˬ htoꞈ ma ga laˇ gʼa ve le?

3. (a) Shu awˬ pon dawˇ nyi puiˉ gʼa tuˬ, ngaˬ hui hkʼaˬ hkʼe te cawˇ ve le? (b) Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

³ Shu awˬ pon dawˇ nyi puiˉ tuˬ Yaˬhoˉvaˬ Gʼuiˬ sha leh yawˇ ve Yaˇ paˍ Yeˍsuˆ Hkriꞈ htaꞈ henˇ yuˬ gʼa ve yoˬ. Yaˬhoˉvaˬ lehˬ haꞈ pehnˇ ve Gʼuiˬ sha hpehꞈ leh, shu awˬ pon dawˇ nyi puiˉ ve daꞈ jaˇ ve henˇ yuˬ tuˬ hpehꞈ ve yoˬ. (1 Yoˇhanˬ 4:8) Yeˍsuˆ yawˇ ve Awˬ pa ve te hkʼaˇ dawˇ hkʼaˇ hkʼe hkʼa biˇ te gʼa ve yoˬ. (Yoˇhanˬ 14:9) Miˬ guiˬ hkʼoˆ chehˇ htaˇ, chaw yaˇ shu awˬ pon hkʼaˬ hkʼe dawˇ nyi gʼa ve yawˇ te maˍ laˇ ve yoˬ. Yaˬhoˉvaˬ leh Yeˍsuˆ shu awˬ pon hkʼaˬ hkʼe dawˇ nyi ve, awˬ lawn chi ve hkʼaw teˇ geh henˇ tuˬ yoˬ. Hkʼaˬ hkʼe te yawˇ hui htaꞈ henˇ yuˬ gʼa tuˬ kaꞈ chaˬ nyi tuˬ yoˬ.

4. Yaˬhoˉvaˬ yawˇ ve chaw awˬ pon dawˇ nyi piˇ ve tehꞈ Iˉsaˍyaˆ liꞈ 63:7-9 hkʼaw hkʼaˬ hkʼe maˍ laˇ ve le?

⁴ Liꞈ hpu hkʼaw maˍ laˇ ve, Yaˬhoˉvaˬ yawˇ ve chaw awˬ pon dawˇ nyi piˇ ve yoˬ. Tawˇ pa haˉ te kʼo, Iˉsaˍreˍlaˆ chaw tuꞈ ve hkanˍ ve gʼa hpuˇ htaˇ Yaˬhoˉvaˬ hkʼaˬ hkʼe dawˇ ve htaꞈ dawˇ nyi sheˍ. Liꞈ hpu hkʼaw kʼoˆ ve, yawˇ hui tuꞈ hkanˍ ve teˇ yanˇ, Yaˬhoˉvaˬ kaꞈ tuꞈ hkanˍ ve yoˬ. (Iˉsaˍyaˆ 63:7-9 gʼaw sheˍ.) Peuˬ hkʼawꞈ nawˉ Yaˬhoˉvaˬ tcuh kaˍ paˍ Zaˍhkaˍriˆ htaꞈ cuˇ leh kʼoˆ ve, shu yawˇ ve chaw htaꞈ ca yaꞈ la htaˇ, yawˇ htaꞈ yaꞈ laˇ ve hkʼe hpehꞈ ve yoˬ. Yawˇ kʼoˆ ve, “Gʼuiˬ sha ve chaw htaꞈ ca yaꞈ ve chaw lehˬ, Gʼuiˬ sha ve awˬ hpfuhˇ hkʼaˆ jaˇ ve mawˇ [mehˆ shiˍ, MGS] htaꞈ yaꞈ ve chaw hpehꞈ ve yoˬ.” (Zaˍhkaˍriˆ 2:8) Yaˬhoˉvaˬ yawˇ ve chaw awˬ pon dawˇ nyi piˇ ve tehꞈ hkʼa tawˍ lehˆ gʼa mawˬ ve yoˬ!

5. Yaˬhoˉvaˬ yawˇ ve chaw tuꞈ ve hkanˍ ve gʼa hpuˇ ve htaꞈ hkʼaˬ hkʼe ga piˇ jaw ve le?

⁵ Yaˬhoˉvaˬ yawˇ ve chaw awˬ pon dawˇ nyi ve ceh maˇ heˆ. Yawˇ hui htaꞈ hkʼa dehꞈ ga piˇ ve yoˬ. Tawˇ pa haˉ te kʼo, Iˉsaˍreˍlaˆ chaw Eˇjiˇtuꞈ mvuhˇ miˬ ve awˬ ceˬ te htaˇ, Yaˬhoˉvaˬ yawˇ hui ve dawˇ hkʼaˇ htaꞈ shiˍ leh ga piˇ gaˇ ve yoˬ. Yaˬhoˉvaˬ Moˉseˍ htaꞈ kʼoˆ piˇ ve, “ngaˬ ve chaw teˇ hpaˍ hkʼaˬ ma gʼa tuꞈ gʼa hkanˍ chehˇ ve htaꞈ ngaˬ gʼa mawˬ peuˬ. Yawˇ hui htaꞈ ponˬ laˇ tuˬ kuˬ chehˇ ve awˬ hkawˇ htaꞈ htawˇ ngaˬ gʼa kaˇ peuˬ. Ngaˬ yawˇ hui htaꞈ Eˇjiˇtuꞈ chaw hui ve laꞈ sheh hkʼaw ponˬ piˇ . . . gaˇ ve yoˬ.” (Tawˆ kʼai ve 3:7, 8) Yaˬhoˉvaˬ yawˇ ve chaw awˬ pon dawˇ nyi ve pa taw, shu ceˬ te ve htaꞈ hpehˇ piˇ ve yoˬ. Laiˉ ha hkʼawꞈ peuˬ hkʼawꞈ nawˉ, Iˉsaˍreˍlaˆ chaw ka tiꞈ te taˍ ve mvuhˇ miˬ lo gaˬ htaˇ canˇ paˍ yawˇ hui htaꞈ ca te luˬ la ve yoˬ. Yaˬhoˉvaˬ hkʼaˬ hkʼe te ve le? “fawˉ ve mehˍ ve leh tuꞈ ve hkanˍ ve htaꞈ gʼa hkanˍ leh yawˇ hui hkʼanˇ chehˇ ve teˇ yanˇ, Gʼuiˬ sha yawˇ hui htaꞈ ha kʼaˉ piˇ ve yoˬ.” Hkʼe te leh, Yaˬhoˉvaˬ yawˇ hui htaꞈ kʼawꞈ ga piˇ leh suhˉ jehˬ piˇ paˍ teˇ hpaˍ htaꞈ leuˆ teh piˇ ve yoˬ.—Suhˉ jehˬ ve 2:16, 18.

6. Chaw teˇ gʼaˇ dawˇ ve maˇ cawˇ ve htawˇ, Yaˬhoˉvaˬ yawˇ hui awˬ pon dawˇ nyi sheˍ ve laˇ? Tawˇ pa haˉ kʼoˆ maˍ laˇ sheˍ.

⁶ Gʼuiˬ sha ve chaw dawˇ ve maˇ cawˇ ve htawˇ, yawˇ yawˇ hui awˬ pon dawˇ nyi sheˍ ve yoˬ. Yoˇnaˆ htaꞈ dawˇ nyi sheˍ. Niˇnaˍveˍ chaw htaꞈ suhˉ jehˬ piˇ tuˬ tcuh kaˍ paˍ chi teˇ gʼaˇ htaꞈ kʼai tcuh ve yoˬ.  Yawˇ hui dawˇ hpfuhˆ htaˇ, maˇ te luˬ piˇ tuˬ Gʼuiˬ sha dawˇ cheˆ ve yoˬ. Yaꞈ hkʼaˇ, Gʼuiˬ sha chi hkʼe te ve Yoˇnaˆ maˇ dawˇ cawˇ. Yawˇ kʼoˆ ve hkʼe awˬ tehˬ maˇ hpehꞈ la ve pa taw, “yawˇ nyi ma zuhˆ jaˇ.” Yaꞈ hkʼaˇ, Yaˬhoˉvaˬ Yoˇnaˆ htaꞈ yeunˇ hkanˍ leh yawˇ ve dawˇ hkʼaˇ htaꞈ pa tuˬ ga piˇ ve yoˬ. (Yoˇnaˆ 3:10–4:11) Awˬ yanˇ ponˬ kʼai htaˇ Yoˇnaˆ na gʼa la leh, ngaˬ hui awˬ bon gʼa tuˬ Yaˬhoˉvaˬ Yoˇnaˆ htaꞈ yawˇ hkʼaˇ yawˇ ve awˬ lawn bvuhꞈ tcuh ve yoˬ.—Roˉmaꞈ 15:4. *

7. Yaˬhoˉvaˬ yawˇ ve chaw htaꞈ ga piˇ jaw ve chi ngaˬ hui htaꞈ aˬ htoꞈ ma maˍ laˇ ve le?

⁷ Yaˬhoˉvaˬ yawˇ ve chaw htaꞈ ga piˇ jaw ve chi, yawˇ ngaˬ hui awˬ pon kaꞈ dawˇ nyi laˇ ve tehꞈ yonˍ gʼa ve yoˬ. Ngaˬ hui teˇ gʼaˇ leh teˇ gʼaˇ tuꞈ ve hkanˍ ve aˬ htoꞈ ma gʼa hpuˇ chehˇ ve yawˇ shiˍ ve yoˬ. Yaˬhoˉvaˬ lehˬ “chaw yaˇ ve dawˇ hkʼaˇ htaꞈ shiˍ shehˍ hpaˇ” hpehꞈ ve yoˬ. (2 Raˍsaˍvanˍ 6:30) Ngaˬ hui ve dawˇ hkʼaˇ hkʼa peu˗eˬ leh ngaˬ hui te gʼa ve te maˇ gʼa ve hkʼa peu˗eˬ yawˇ hkʼa dehꞈ shiˍ ve yoˬ. ‘Ngaˬ hui hkanˍ maˇ gʼa ve beˬ ve lawˇ ve htaꞈ gʼa hpuˇ tuˬ, yawˇ a hkaw˗anˬ maˇ piˇ.’ (1 Kawˇrenˍhtuˆ 10:13) Ka tiꞈ chi ngaˬ hui htaꞈ awˬ gʼaˇ peꞈ laˇ jaˇ!

8-10. Aˬ htoꞈ ma te Yeˍsuˆ shu awˬ pon dawˇ nyi puiˉ ve le?

⁸ Yeˍsuˆ miˬ guiˬ hkʼoˆ chehˇ leh chaw yaˇ hpehꞈ htaˇ, yawˇ kaꞈ shu awˬ pon dawˇ nyi ve yoˬ. Aˬ htoꞈ ma te yawˇ chi hkʼe te gʼa ve le? Awˉ lawˉ teˇ hkʼaˇ, Yeˍsuˆ yawˇ ve Awˬ pa ve te hkʼaˇ dawˇ hkʼaˇ hkʼe hkʼa biˇ te gʼa ve pa taw yoˬ. Awˬ pa hkʼa shuˍ Yeˍsuˆ kaꞈ chaw yaˇ htaꞈ haꞈ ve yoˬ. Yaˬhoˉvaˬ hkʼa peu˗eˬ htaꞈ hpanˍ htaˇ Yeˍsuˆ gʼa ga leh tawˆ la ve awˬ ceuˬ htaꞈ yawˇ ha lehˬ ve htawˇ, chi aꞈ kehˉ yawˇ ‘chaw yaˇ teˇ hpaˍ geh ha lehˬ ve yoˬ.’ (Tawˇ naˉ ve 8:31) Haꞈ pehnˇ ve htaꞈ pa taw Yeˍsuˆ shu awˬ pon dawˇ nyi ve yoˬ.

⁹ Nyiˇ hkʼaˇ teˇ hkʼaˇ, Yaˬhoˉvaˬ hkʼa shuˍ, Yeˍsuˆ kaꞈ chaw yaˇ ve nyi ma htaꞈ shiˍ ve pa taw yoˬ. Shu hkʼaˬ hkʼe dawˇ ve, aˬ htoꞈ ma pa taw chi hkʼe dawˇ ve Yeˍsuˆ shiˍ ve yoˬ. (Maꞈhtehˍ 9:4; Yoˇhanˬ 13:10, 11) Shu nyi ma naˬ chehˇ ve Yeˍsuˆ shiˍ htaˇ, yawˇ hui htaꞈ ha kʼaˉ leh awˬ gʼaˇ peꞈ piˇ gaˇ ve yoˬ.—Iˉsaˍyaˆ 61:1, 2; Luˉkaꞈ 4:17-21.

¹⁰ Shehˆ hkʼaˇ teˇ hkʼaˇ, shu shoꞈ shaꞈ ve gʼa hpuˇ jaw ve hkʼe Yeˍsuˆ kaꞈ gʼa hpuˇ jaw ve pa taw yoˬ. Tawˇ pa haˉ te kʼo, Yeˍsuˆ haˍ ve yehˬ kʼa hkʼaw paw la ve yoˬ. Yawˇ ve awˬ pa caˉ Yoˇsehꞈ yawˇ htaꞈ kaiˬ ve hkʼaw kanˉ te tuˬ ve awˬ hkʼaˇ maˍ piˇ ve yoˬ. (Maꞈhtehˍ 13:55; Maˍkuˆ 6:3) Yoˇsehꞈ Yeˍsuˆ maˇ suh sheˍ htaˇ kaꞈ suh˗oˬ ve yoˬ hehˉ. Hkʼe te leh, haꞈ ve chaw suh˗e htaˇ hkʼaˬ hkʼe dawˇ ve yawˇ kaꞈ shiˍ ve yoˬ. Yehˬ kʼa hkʼaw yonˍ hkʼaˇ maˇ shuˍ daꞈ ve chaw geh yawˇ chehˇ jaw ve pa taw, hkʼaˬ hkʼe kʼai ve kaꞈ Yeˍsuˆ shiˍ ve yoˬ. (Yoˇhanˬ 7:5) Yeˍsuˆ chi hkʼe gʼa hpuˇ jaw ve pa taw, shu aˬ htoꞈ ma gʼa hpuˇ chehˇ ve, hkʼaˬ hkʼe dawˇ ve yawˇ hkʼa dehꞈ shiˍ ve yoˬ.

11. Yeˍsuˆ shu awˬ pon dawˇ nyi puiˉ ve tehꞈ hkʼaˬ hkʼe te hkʼa tawˍ lehˆ hpeuꞈ maw laˇ ve le? (Awˬ htaꞈ hpawˇ ve awˬ han htaꞈ nyi sheˍ.)

¹¹ Yeˍsuˆ anˇ tuˬ te htaˇ, yawˇ shu awˬ pon dawˇ nyi puiˉ ve tehꞈ hkʼa tawˍ lehˆ hpeuꞈ maw laˇ ve yoˬ. Shu htaꞈ gʼa ga cawˇ ve pa taw yawˇ anˇ tuˬ te ve maˇ heˆ. Tuꞈ hkanˍ ve gʼa hpuˇ ve chaw htaꞈ yawˇ “ha kʼaˉ” ve pa taw te ve yoˬ. (Maꞈhtehˍ 20:29-34; Maˍkuˆ 1:40-42) Naˍ paw pawˇ ve teˇ gʼaˇ htaꞈ Yeˍsuˆ chaw awˬ moˍ lonˉ htaꞈ vuiˇ daꞈ tcuh leh yawˇ htaꞈ gu na˗e piˇ htaˇ, leh mehˇ chawˇ ma ve yaˇ paˍ teˇ gʼaˇ tiˉ ve htaꞈ kʼawꞈ teꞈ tu laˇ piˇ htaˇ, Yeˍsuˆ hkʼaˬ hkʼe dawˇ ve htaꞈ dawˇ nyi sheˍ.  (Maˍkuˆ 7:32-35; Luˉkaꞈ 7:12-15) Yeˍsuˆ yawˇ hui htaꞈ ha kʼaˉ leh ga piˇ gaˇ ve yoˬ.

12. Yoˇhanˬ liꞈ 11:32-35 hkʼaw kʼoˆ taˍ ve hkʼe, Yeˍsuˆ Maˍriˆ leh Maˍhtaˆ awˬ pon kaꞈ hkʼaˬ hkʼe dawˇ nyi piˇ ve le?

¹² Yeˍsuˆ Maˍriˆ leh Maˍhtaˆ awˬ pon kaꞈ dawˇ nyi piˇ ve yoˬ. Laˍzaˍruˆ suh˗e leh Maˍriˆ leh Maˍhtaˆ nyi ma luˬ jaˇ htaˇ, ‘Yeˍsuˆ kaꞈ mehˆ gʼuiˬ yaꞈ la ve yoˬ.’ (Yoˇhanˬ 11:32-35 gʼaw sheˍ.) Yawˇ awˬ chawˇ meuˆ daꞈ jaˇ ve geh maˇ gʼa chehˇ˗o ve pa taw hawˬ ve maˇ heˆ. Awˬ tehˬ tehˬ kʼo, yawˇ Laˍzaˍruˆ htaꞈ kʼawꞈ teꞈ tu la piˇ˗a te ve yoˬ. Yaꞈ hkʼaˇ, awˬ nu ve awˬ chawˇ nyi ma luˬ ve htaꞈ dawˇ nyi leh yawˇ kaꞈ hawˬ ve yoˬ.

13. Yeˍsuˆ shu awˬ pon dawˇ nyi puiˉ ve aˬ htoꞈ ma te ngaˬ hui ha lehˬ ve le?

¹³ Yeˍsuˆ shu awˬ pon dawˇ nyi puiˉ ve lehˬ ngaˬ hui htaꞈ maˍ laˇ gʼa ve yoˬ. Ngaˬ hui yawˇ hkʼe leˇ biˇ jaˇ ve maˇ hpehꞈ. Yaꞈ hkʼaˇ, yawˇ chi hkʼe ve nyi ma cawˬ ve pa taw ngaˬ hui yawˇ htaꞈ haꞈ jaˇ. (1 Peˍtruˆ 1:8) Chi teˇ hkui yawˇ Gʼuiˬ sha ve mvuhˇ miˬ hkʼaw Jawˇmawˇ te chehˇ ve ngaˬ hui ha lehˬ jaˇ. Maˇ maw ve awˬ yanˇ yawˇ tuꞈ ve hkanˍ ve hkʼa peu˗eˬ te luˬ tuˬ yoˬ. Saˍtanˍ uˉ peunˍ ve chaw yaˇ naˬ tuˬ te laˇ ve, Yeˍsuˆ hkʼa dehꞈ gu laˇ tuˬ yoˬ. Awˬ lawn kʼo yawˇ chaw yaˇ hpehꞈ jaw ve pa taw ngaˬ hui htaꞈ hkʼa dehꞈ na gʼa ve yoˬ. Ngaˬ hui ve Uˉ peunˍ paˍ “ha kʼaˉ puiˉ jaˇ” ve pa taw ha lehˬ jaˇ.—Heˍbrehˇ 2:17, 18; 4:15, 16.

14. Eˇfeˇsuꞈ liꞈ 5:1, 2 hkʼaw kʼoˆ taˍ ve hkʼe, Yaˬhoˉvaˬ leh Yeˍsuˆ shu awˬ pon dawˇ nyi puiˉ ve htaꞈ ngaˬ hui henˇ htaˇ, ngaˬ hui aˬ htoꞈ ma te gaˇ ve le?

¹⁴ Yaˬhoˉvaˬ leh Yeˍsuˆ shu awˬ pon dawˇ nyi puiˉ ve htaꞈ ngaˬ hui henˇ htaˇ, ngaˬ hui kaꞈ maˇ maˇ te gaˇ ve yoˬ. (Eˇfeˇsuꞈ 5:1, 2 gʼaw sheˍ.) Yawˇ hui hkʼe leˇ ngaˬ hui chaw yaˇ ve nyi ma htaꞈ maˇ shiˍ. Yaꞈ hkʼaˇ, ngaˬ hui kaꞈ shu ve dawˇ hkʼaˇ leh loˍ ve htaꞈ shiˍ tuˬ coˇ caˇ gʼa ve yoˬ. (2 Kawˇrenˍhtuˆ 11:29) Miˬ guiˬ chi hkʼoˆ lo chehˇ ve chaw a shu yawˇ awˬ pon tiˉ dawˇ nyi chehˇ ve yoˬ. Yaꞈ hkʼaˇ, ‘a shu yawˇ awˬ to htaꞈ caˉ daꞈ ve awˬ lawn teˇ hpaˍ htaꞈ ceh tiˉ ngaˬ hui maˇ dawˇ nyi. Shu htaꞈ caˉ daꞈ ve awˬ lawn teˇ hpaˍ htaꞈ htawˇ ngaˬ hui dawˇ nyi ve yoˬ.’—Hpiˇliˇpiˆ 2:4.

15. A shu teˇ gʼaˇ shu awˬ pon dawˇ nyi puiˉ ve gʼa hpehꞈ cawˇ ve le?

¹⁵ Hkriꞈ yaˇ awˬ moˍ hkʼaw ve nyi haꞈ shaˉ paˍ shu awˬ pon dawˇ nyi puiˉ ve gʼa hpehꞈ cawˇ ve yoˬ. Yawˇ hui Yaˬhoˉvaˬ ve yawˬ htaꞈ hkʼa dehꞈ haꞈ shaˉ tuˬ awˬ vuiˬ cawˬ ve yoˬ. (Heˍbrehˇ 13:17) Nyi haꞈ shaˉ paˍ awˬ viˉ awˬ nyi htaꞈ na gʼa leh ga piˇ tuˬ hkʼaˬ hkʼe te gʼa tuˬ le?

16. Nyi haꞈ shaˉ paˍ ha kʼaˉ puiˉ ve kʼo, hkʼaˬ hkʼe te tuˬ le? Aˬ htoꞈ ma te chi hkʼe te ve a yeˇ uiˍ jaˇ ve le?

¹⁶ Nyi haꞈ shaˉ paˍ ha kʼaˉ puiˉ ve kʼo, awˬ yanˇ yehˇ leh awˬ viˉ awˬ nyi geh chehˇ ve yoˬ. Yawˇ na piˇ leh yeunˇ hkanˍ ve hkʼaw hkʼa dehꞈ gʼa na taˍ ve yoˬ. Yawˬ ehˉ nyi ma hkʼaw ve awˬ ceuˬ kʼoˆ maˍ laˇ gaˇ ve htawˇ kʼoˆ maˇ haˆ ve kʼo, nyi haꞈ shaˉ paˍ gʼa yeunˇ hkanˍ jaˇ. (Tawˇ naˉ ve 20:5) Nyi haꞈ shaˉ paˍ yawˇ hui geh awˬ yanˇ hkʼa dehꞈ yehˇ ve kʼo, awˬ chawˇ meuˆ daꞈ gʼa ve, yonˍ gʼa daꞈ ve, leh haꞈ pehnˇ ve cawˬ gʼa ve yoˬ.—Tcuh yaˇ 20:37.

17. A yeˇ uiˍ jaˇ tehꞈ awˬ viˉ awˬ nyi laiˉ gʼaˇ dawˇ ve aˬ htoꞈ ma le?

¹⁷ Awˬ viˉ awˬ nyi laiˉ gʼaˇ dawˇ ve, a yeˇ uiˍ jaˇ ve lehˬ nyi haꞈ shaˉ paˍ shu awˬ pon dawˇ nyi puiˉ ve yoˬ. Aˬ htoꞈ ma pa taw le? Awˬ viˉ awˬ nyi yaˇ miˇ Aˍdeˍleˍ kʼoˆ ve, “yawˇ hui ngaˬ htaꞈ na gʼa ve tehꞈ ngaˬ shiˍ htaˇ, yawˇ hui geh yaw daꞈ sha jaˇ. Yawˇ hui geh yaw daꞈ htaˇ, ngaˬ hui awˬ pon dawˇ nyi chehˇ ve tehꞈ shiˍ la ve yoˬ.” Awˬ viˉ awˬ nyi hawˉ hkʼaˆ teˇ gʼaˇ kʼoˆ ve, “ngaˬ gʼa hpuˇ ve awˬ ceuˬ nyi haꞈ shaˉ paˍ teˇ gʼaˇ htaꞈ kʼoˆ maˍ piˇ htaˇ, yawˇ mehˆ gʼuiˬ yaꞈ la ve ngaˬ hkʼaˬ htaˆ kaꞈ tawnˇ gʼa ve yoˬ.”—Roˉmaꞈ 12:15.

18. Ngaˬ hui hkʼaˬ hkʼe te shu awˬ pon dawˇ nyi gʼa ve le?

 ¹⁸ Shu awˬ pon dawˇ nyi ve chi nyi haꞈ shaˉ paˍ ceh te gʼa ve maˇ heˆ, teˇ gʼaˇ le le te cawˇ ve yoˬ. Hkʼaˬ hkʼe te gʼa tuˬ le? Yehˬ kʼa hkʼaw ve chaw leh awˬ viˉ awˬ nyi aˬ htoꞈ ma gʼa hpuˇ ve coˇ caˇ leh dawˇ nyi sheˍ. Hkriꞈ yaˇ awˬ moˍ hkʼaw yaˇ nehˬ, chaw naˬ, chaw mawˇ, leh haꞈ ve chaw suh˗e ve chaw htaꞈ a yeˇ te sheˍ. Yawˇ hui hkʼaˬ hkʼe kʼai ve le na piˇ sheˍ. Yawˇ hui hkʼawꞈ laˇ htaˇ hkʼa dehꞈ na taˍ sheˍ. Yawˇ hui ve dawˇ hkʼaˇ htaꞈ na gʼa ve tehꞈ hkʼa tawˍ lehˆ hpeuꞈ maw piˇ sheˍ. Coˇ caˇ leh yawˇ hui htaꞈ ga piˇ sheˍ. Ngaˬ hui chi hkʼe te ve kʼo, kanˉ te ve awˬ hkʼaw lo haꞈ ve tehꞈ yawˇ hui shiˍ gʼa ve yoˬ.—1 Yoˇhanˬ 3:18.

19. Ngaˬ hui shu htaꞈ ga piˇ htaˇ, teˇ gʼaˇ leh teˇ gʼaˇ maˇ shuˍ daꞈ ve tehꞈ aˬ htoꞈ ma te tawnˇ taˍ cawˇ ve le?

¹⁹ Ngaˬ hui shu htaꞈ ga piˇ htaˇ, teˇ gʼaˇ leh teˇ gʼaˇ maˇ shuˍ daꞈ ve tehꞈ tawnˇ taˍ cawˇ ve yoˬ. Tuꞈ ve hkanˍ ve gʼa hpuˇ htaˇ, teˇ hpaˍ hpaˍ kʼo kʼoˆ maˍ laˇ gaˇ ve, teˇ hpaˍ hpaˍ kʼo maˇ kʼoˆ maˍ laˇ gaˇ. Hkʼe te leh, ngaˬ hui ga piˇ gaˇ ve htawˇ, yawˇ hui maˇ hkʼawꞈ laˇ gaˇ ve htaꞈ taˇ na piˇ. (1 Hteˇsaˍlawˇniˆ 4:11) Yawˇ hui nyi ma hkʼaw cawˬ ve kʼoˆ maˍ laˇ ve htawˇ, teˇ pawˆ pawˆ kʼo ngaˬ hui yawˇ hui hkʼe maˇ dawˇ. Yaꞈ hkʼaˇ, yawˇ hui kʼoˆ maˍ laˇ ve lehˬ chi teˇ hkui yawˇ hui dawˇ chehˇ ve yoˬ. Yawˇ hui tawˇ yaw ve htaꞈ hkʼa dehꞈ na leh tawˇ haˆ haˆ taˇ yaw.—Maꞈhtehˍ 7:1; Yaˍkoˆ 1:19.

20. Gʼuˇ suhˍ teˇ lawn hkʼaw ngaˬ hui aˬ htoꞈ ma gʼa henˇ tuˬ le?

²⁰ Ngaˬ hui Hkriꞈ yaˇ awˬ moˍ hkʼaw ceh shu awˬ pon dawˇ nyi ve maˇ lawꞈ. Ngaˬ hui Gʼuiˬ sha ve kanˉ te htaˇ kaꞈ chi hkʼe te gaˇ ve yoˬ. Shu awˬ laꞈ gʼawˇ hpehꞈ la tuˬ te htaˇ, yawˇ hui awˬ pon hkʼaˬ hkʼe te dawˇ nyi gʼa ve le? Gʼuˇ suhˍ teˇ lawn hkʼaw teˇ geh henˇ tuˬ yoˬ.