Ngaˬ hui daꞈ ve tehꞈ shu htaꞈ dawˇ tcuh gaˇ ve yoˬ. Yaꞈ hkʼaˇ, chi beuꞈ teˇ co˗e shu awˬ pon daꞈ ve htaꞈ te piˇ ve haˍ jaˇ. Maˇ˗awˍ ve “daꞈ ve htaꞈ canˇ ve chaw” hpehꞈ ve yoˬ. (2 Tiˆmoˉseˍ 3:3) Aˬ htoꞈ ma cawˇ ve maˇ cawˇ ve yawˇ hui hkʼaˇ yawˇ hui dawˇ cheˆ gaˇ ve yoˬ. Yaꞈ hkʼaˇ, yawˇ hui “haiˬ ve awˬ ceuˬ htaꞈ daꞈ ve tehꞈ kʼoˆ leh, daꞈ ve awˬ ceuˬ htaꞈ haiˬ ve tehꞈ kʼoˆ ve yoˬ.” (Iˉsaˍyaˆ 5:20) Chi hkʼoˆ kaꞈ, ngaˬ hui maˇ biˇ leh gʼa hpuˇ ve awˬ ceuˬ htaꞈ pa taw, daꞈ ve htaꞈ te tuˬ haˍ jaˇ. Awˬ viˉ awˬ nyi Ehn,  * Yaˬhoˉvaˬ ve kanˉ laiˉ chi hkʼawꞈ te˗oˬ ve, yawˇ kʼoˆ ve, “teˇ pawˆ pawˆ kʼo ngaˬ daꞈ ve chaw hpehꞈ maˇ gʼa tehꞈ dawˇ ve yoˬ.” Ngaˬ hui kaꞈ yawˇ hkʼe dawˇ ve yoˬ hehˉ.

Ngaˬ hui daꞈ ve htaꞈ te puiˉ tuˬ pa gʼa ve yoˬ! Daꞈ ve htaꞈ te ve lehˬ daꞈ kehˬ ve awˬ ha hpu ve awˬ shiˍ teˇ ceuˬ hpehꞈ ve yoˬ. Gʼuiˬ sha ve daꞈ kehˬ ve awˬ ha hpu ngaˬ hui gʼa hpuˇ ve teˇ ceuˬ le le aꞈ kehˉ kanˇ paˆ cawˬ jaˇ. Daꞈ ve htaꞈ te ve aˬ htoꞈ ma htaꞈ caˉ daꞈ ve le, ngaˬ hui hkʼaˬ hkʼe te maˇ maˇ te gʼa tuˬ le, teˇ geh chaˬ nyi sheˍ.

Daꞈ ve htaꞈ te ve tcuhˉ kuiˬ lehˬ daꞈ kehˬ ve leh luˬ ve maˇ cawˬ ve htaꞈ caˉ daꞈ ve yoˬ. Daꞈ ve htaꞈ te puiˉ ve chaw lehˬ shu htaꞈ ga piˇ tuˬ awˬ hkʼaˇ ca leh yawˇ htaꞈ daꞈ ve te piˇ ve yoˬ.

Yaꞈ hkʼaˇ ngaˬ hui yehˬ kʼa leh awˬ chawˇ htaꞈ daꞈ ve te piˇ ve kʼo, ngaˬ hui daꞈ ve htaꞈ te puiˉ ve chaw hpehꞈ ve tehꞈ kʼoˆ gaˇ ve laˇ? Awˬ tehˬ kʼo, chaw teˇ gʼaˇ kaꞈ hkʼaˬ htaˆ kaꞈ daꞈ ve chaw hpehꞈ maˇ gʼa. Liꞈ hpu hkʼaw kʼoˆ ve, “hkʼaˬ htaˆ kaꞈ daꞈ ve kanˉ htaꞈ tiˉ te leh, teˇ pawˆ kaꞈ maˇ te yaꞈ jaw ve chaw miˬ guiˬ hkʼoˆ teˇ gʼaˇ kaꞈ maˇ cawˬ.” (Cuˇ yiˍ piˇ ve 7:20) Tcuh yaˇ Pawˇluꞈ kʼawꞈ kʼoˆ sheˍ ve, “ngaˬ ve awˬ suhˍ awˬ shaˍ awˬ to chi awˬ hkʼaw lo, daꞈ ve teˇ ceuˬ a ciˉ kaꞈ maˇ cawˬ ve htaꞈ ngaˬ shiˍ ve yoˬ.” (Roˉmaꞈ 7:18) Hkʼe te leh daꞈ ve htaꞈ te puiˉ ve chaw hpehꞈ tuˬ, Yaˬhoˉvaˬ gʼa maˍ laˇ tcuh ve yoˬ.

Daꞈ ve htaꞈ te puiˉ ve chaw hpehꞈ tuˬ, Yaˬhoˉvaˬ Gʼuiˬ sha htaꞈ gʼa henˇ yuˬ ve yoˬ. Chiˇ mvuh ve liꞈ bvuhꞈ paˍ Yawˇ htaꞈ kʼoˆ piˇ ve, “nawˬ lehˬ hkʼaˬ ma daꞈ jaˇ leh daꞈ ve htaꞈ te puiˉ jaˇ ve le. Nawˬ ve awˬ liˇ tawˇ hkawˇ ngaˬ htaꞈ maˍ laˇ˗oˆ.” (Chiˇ mvuh ve 119:68, MGS) Liꞈ hpu chi teˇ tawn hkʼaw kʼoˆ taˍ ve Yaˬhoˉvaˬ daꞈ ve htaꞈ te puiˉ ve htaꞈ caˉ daꞈ ve 2 hpawˇ teˇ geh chaˬ nyi sheˍ.

Yaˬhoˉvaˬ daꞈ jaˇ. Yaˬhoˉvaˬ lehˬ maˇ daꞈ ve hpehꞈ kʼai maˇ gʼa. Yaˬhoˉvaˬ Moˉseˍ htaꞈ ‘ngaˬ ve awˬ meꞈ awˬ hponˇ htaꞈ nawˬ mehˆ gʼuˇ suhˍ hpanˍ kʼai tcuh tuˬ yoˬ’ tehꞈ kʼoˆ piˇ peuˬ hkʼawꞈ nawˉ, Gʼuiˬ sha ve awˬ meꞈ awˬ hponˇ yawˇ mehˆ gʼuˇ suhˍ hpanˍ kʼai htaˇ, “ngaˬ Gʼuiˬ sha lehˬ ha kʼaˉ puiˉ leh awˬ bon te piˇ puiˉ ve Gʼuiˬ sha hpehꞈ leh, nyi ma dawˇ zuhˬ gaˇ zuhˬ ve Gʼuiˬ sha, haꞈ pehnˇ uiˍ leh ka tiꞈ yeˬ ve Gʼuiˬ sha hpehꞈ ve yoˬ. Ngaˬ lehˬ, chaw awˬ hinˉ awˬ meunˍ gʼaˇ htaꞈ ka tiꞈ yeˬ leh, yawˇ hui ve venˇ baˆ teˇ hpaˍ htaꞈ hpehˇ piˇ puiˉ ve Gʼuiˬ sha hpehꞈ ve yoˬ” tehꞈ Moˉseˍ gʼa kaˇ ve yoˬ. (Tawˆ kʼai ve 33:19; 34:6, 7) Chi kʼoˆ gaˇ ve lehˬ Yaˬhoˉvaˬ teˇ ceuˬ le le hpawˇ daꞈ jaˇ ve yoˬ. Yeˍsuˆ daꞈ jaˇ ve chaw yaˇ hpehꞈ ve htawˇ, yawˇ kʼoˆ ve, “Gʼuiˬ sha maˇ heˆ kʼo, daꞈ ve teˇ gʼaˇ kaꞈ maˇ cawˬ.”—Luˉkaꞈ 18:19.

Yaˬhoˉvaˬ daꞈ ve htaꞈ te puiˉ jaˇ. Gʼuiˬ sha te ve awˬ ceuˬ hkʼa peu˗eˬ yawˇ daꞈ jaˇ ve tehꞈ hpeuꞈ maw laˇ ve yoˬ. “Yawˇ lehˬ chaw teˇ gʼaˇ le le htaꞈ daꞈ ve te  piˇ leh, yawˇ te hpanˍ taˍ ve awˬ ceuˬ hkʼa peu˗eˬ htaꞈ ha kʼaˉ puiˉ ve nyi ma cawˬ ve yoˬ.” (Chiˇ mvuh ve 145:9, MGS) Yaˬhoˉvaˬ lehˬ teˇ chaw ceuˬ le le htaꞈ daꞈ ve te piˇ leh, a shaꞈ leh loˍ ve awˬ ceuˬ teˇ gʼaˇ le le htaꞈ piˇ ve yoˬ. (Tcuh yaˇ 14:17) Yawˇ ngaˬ hui htaꞈ venˇ baˆ hpehˇ laˇ htaˇ kaꞈ yawˇ daꞈ jaˇ ve tehꞈ hpeuꞈ maw laˇ ve yoˬ. Chiˇ mvuh ve liꞈ bvuhꞈ paˍ kʼoˆ ve, “nawˬ geh bon lawˬ ve chaw hui htaꞈ nawˬ venˇ baˆ hpehˇ piˇ leh, daꞈ ve awˬ bon naꞈ piˇ ve yoˬ.” (Chiˇ mvuh ve 86:5) “Hteˇ ve cawˇ ve htaꞈ te ve chaw hui awˬ hkʼoˆ yawˇ daꞈ ve awˬ bon naꞈ piˇ ve” tehꞈ ngaˬ hui hkʼa dehꞈ yonˍ gʼa ve yoˬ.—Chiˇ mvuh ve 84:11.

Ngaˬ hui htaꞈ yawˇ ve awˬ hoꞈ awˬ han hkʼa shuˍ hpanˍ taˍ ve pa taw, daꞈ ve htaꞈ te gʼa ve yoˬ. (Awˬ hkuiˉ puiˍ 1:27) Yaꞈ hkʼaˇ, Gʼuiˬ sha yawˇ ve tawˇ hkawˇ kʼoˆ laˇ ve, “daꞈ ve cawˇ ve htaꞈ te puiˉ la tuˬ henˇ yuˬ˗oꞈ.” (Iˉsaˍyaˆ 1:17) Chi kʼoˆ gaˇ ve lehˬ ngaˬ hui paw la htaˇ kaꞈ te puiˉ ve maˇ heˆ. Ngaˬ hui te puiˉ la tuˬ hkʼaˬ hkʼe te henˇ yuˬ gʼa tuˬ le? Awˬ hkʼaˇ 3 hkʼaˇ htaꞈ dawˇ nyi sheˍ.

Awˉ lawˉ teˇ hkʼaˇ lehˬ Gʼuiˬ sha ve daꞈ kehˬ ve awˬ ha hpu gʼa tuˬ bon gʼa lawˬ ve yoˬ. Chi ngaˬ hui Gʼuiˬ sha mehˆ gʼuˇ suhˍ daꞈ ve Hkriꞈ yaˇ hpehꞈ tuˬ ga laˇ ve yoˬ. (Gaˍlaˍtiˆ 5:22) Ngaˬ hui daꞈ ve htaꞈ haꞈ leh haiˬ ve htaꞈ canˇ tuˬ daꞈ kehˬ ve awˬ ha hpu ga laˇ gʼa ve yoˬ. (Roˉmaꞈ 12:9) Liꞈ hpu hkʼaw kʼoˆ ve, daꞈ ve kanˉ leh daꞈ ve tawˇ teˇ ceuˬ le le hkʼaw Yaˬhoˉvaˬ ngaˬ hui htaꞈ yeˬ la tcuh laˇ ve yoˬ.—2 Hteˇsaˍlawˇniˆ 2:16, 17.

Nyiˇ hkʼaˇ teˇ hkʼaˇ lehˬ Gʼuiˬ sha ve awˬ ha hpu dawˇ pawnˍ piˇ ve tawˇ hkawˇ htaꞈ ngaˬ hui gʼaw cawˇ ve yoˬ. Chi hkʼe te kʼo, ngaˬ hui ‘daꞈ ve awˬ ceuˬ htaꞈ shiˍ la’ leh, “daꞈ ve kanˉ teˇ ceuˬ le le awˬ pon gu taˍ ve chaw hpehꞈ la tuˬ” Yaˬhoˉvaˬ maˍ laˇ gʼa ve yoˬ. (Tawˇ naˉ ve 2:9; 2 Tiˆmoˉseˍ 3:17) Gʼaw leh hkʼa dehꞈ dawˇ nyi htaˇ, ngaˬ hui nyi ma hkʼaw Gʼuiˬ sha ve a loˍ leh yawˇ te ve daꞈ ve awˬ ceuˬ hkʼa biˇ cawˬ la tuˬ yoˬ. Ngaˬ hui nyi ma hkʼaw chi hkʼe doˆ taˍ ve kʼo, yuˬ yehˇ gʼa ve yoˬ.—Luˉkaꞈ 6:45; Eˇfeˇsuꞈ 5:9.

Shehˆ hkʼaˇ teˇ hkʼaˇ lehˬ ngaˬ hui “daꞈ ve awˬ hkʼaˇ suh kʼai” tuˬ coˇ caˇ ve yoˬ. (3 Yoˇhanˬ 11) Liꞈ hpu hkʼaw daꞈ jaˇ ve henˇ yuˬ tuˬ laiˉ gʼaˇ cawˬ ve yoˬ. Awˬ nu ve aꞈ kehˉ daꞈ leuˉ ve lehˬ Yaˬhoˉvaˬ leh Yeˍsuˆ yoˬ. Yaꞈ hkʼaˇ, awˬ nu ve chaw awˬ lawn kaꞈ cawˬ sheˍ ve yoˬ. Taˍbiˉtaˆ leh Baˍnaˍbaˆ kaꞈ daꞈ ve henˇ yuˬ tuˬ hpehꞈ ve yoˬ. (Tcuh yaˇ 9:36; 11:22-24) Nawˬ Liꞈ hpu hkʼaw yawˇ hui ve awˬ lawn henˇ ve kʼo, awˬ bon gʼa tuˬ yoˬ. Yawˇ hui shu htaꞈ hkʼaˬ hkʼe ga piˇ ve, hkʼa dehꞈ chaˬ nyi sheˍ. Nawˬ yehˬ kʼa leh Hkriꞈ yaˇ awˬ moˍ hkʼaw ve chaw htaꞈ hkʼaˬ hkʼe te tanˬ ga piˇ gʼa tuˬ le, hkʼa dehꞈ dawˇ nyi sheˍ. Yawˇ huiˉ maˬ shu htaꞈ daꞈ ve te piˇ ve pa taw, aˬ htoꞈ ma awˬ bon gʼa ve kaꞈ dawˇ nyi sheˍ. Nawˬ kaꞈ yawˇ hui hkʼa shuˍ te gʼa ve yoˬ.

Chi beuꞈ teˇ co˗e daꞈ ve htaꞈ te ve chaw kaꞈ ngaˬ hui dawˇ nyi gʼa ve yoˬ. Tawˇ pa haˉ te kʼo, Hkriꞈ yaˇ  awˬ moˍ hkʼaw nyi haꞈ shaˉ paˍ kanˉ te hkeuꞈ jaˇ ve yawˇ hui “daꞈ ve htaꞈ nyi ma cawˇ ve chaw” hpehꞈ ve yoˬ. Ka tiꞈ yeˬ ve awˬ viˉ awˬ nyi yaˇ miˇ kaꞈ kʼoˆ ve leh te ve awˬ hkʼaw lo ‘daꞈ ve htaꞈ maˍ piˇ puiˉ ve chaw’ hpehꞈ ve yoˬ. (Tiˇtuˆ 1:8; 2:3) Awˬ viˉ awˬ nyi yaˇ miˇ Roˉsaꞈlinˍ kʼoˆ ve, “ngaˬ ve awˬ chawˇ teˇ gʼaˇ Hkriꞈ yaˇ awˬ moˍ hkʼaw ve chaw htaꞈ ga leh awˬ gʼaˇ piˇ tuˬ laiˉ ceuˬ te ve yoˬ. Yawˇ hui gʼa hpuˇ chehˇ ve htaꞈ yawˇ dawˇ nyi leh, yawˇ hui htaꞈ ga piˇ leh laꞈ shawnˍ kaꞈ a ciˉ piˇ ve yoˬ. Ngaˬ dawˇ ve yawˇ daꞈ ve chaw hpehꞈ ve yoˬ.”

Yaˬhoˉvaˬ yawˇ ve chaw “daꞈ ve kanˉ htaꞈ te” tuˬ awˬ gʼaˇ piˇ ve yoˬ. (Aˍmoˆ 5:14) Ngaˬ hui chi hkʼe te ve kʼo, Yaˬhoˉvaˬ daꞈ ve tehꞈ kʼoˆ laˇ ve htaꞈ ngaˬ hui haꞈ leh, daꞈ ve te gaˇ tuˬ yoˬ.

Ngaˬ hui daꞈ ve htaꞈ te ve chi awˬ hpfuhˇ hkʼaˆ ve laꞈ shawnˍ piˇ ve maˇ heˆ leh uiˍ ve awˬ ceuˬ htaꞈ te ve tehꞈ kʼoˆ gaˇ ve maˇ heˆ. Dawˇ nyi sheˍ. Awˬ han shawehˇ paˍ hkehˉ tanˬ uiˍ ve htaꞈ yehˇ leh 1-2 pawˆ ceh shawehˇ ve maˇ heˆ. Yawˇ hkehˉ tanˬ i ve htaꞈ laiˉ pawˆ yehˇ leh shawehˇ ve yoˬ. Chi hkʼa shuˍ shuˍ, i ve awˬ ceuˬ hpehꞈ ve htawˇ, ngaˬ hui shu htaꞈ laiˉ pawˆ ga piˇ ve kʼo, ngaˬ hui daꞈ ve chaw hpehꞈ ve tehꞈ hpeuꞈ maw piˇ ve yoˬ.

Liꞈ hpu hkʼaw kʼoˆ sheˍ ve, daꞈ ve kanˉ htaꞈ te tuˬ awˬ pon ngaˬ hui “gu taˍ hehnˇ taˍ” cawˇ ve yoˬ. (2 Tiˆmoˉseˍ 2:21; Tiˇtuˆ 3:1) Shu aˬ htoꞈ ma gʼa hpuˇ chehˇ ve ngaˬ hui awˉ lawˉ chaˬ nyi ve kʼo, yawˇ hui htaꞈ “daꞈ la uiˍ la tuˬ awˬ pon” ga piˇ gʼa ve yoˬ. (Roˉmaꞈ 15:2) Ngaˬ hui cawˬ taˍ ve mawˇ yawˇ hui htaꞈ pehˬ piˇ gʼa ve yoˬ. (Tawˇ naˉ ve 3:27) Ngaˬ hui aˉ hkʼaw lo awˍ chiˇ hkʼaˬ nyiˇ ceuˬ maˇ cawˬ ve kaꞈ awˍ kuˬ caˍ piˇ leh awˬ gʼaˇ piˇ gʼa ve yoˬ. Yawˇ hui maˇ chehˇ sha ve kʼo, ca guiˇ˗e ve, maˇ heˆ leh liꞈ bvuhꞈ piˇ gʼa ve yoˬ. Awˬ tehˬ yoˬ, “gʼa kaˇ ve chaw hui awˬ pon awˬ bon cawˬ tuˬ, shu loˍ chehˇ ve awˬ ceuˬ htaꞈ cawˇ daꞈ ve tawˇ ceh tiˉ yaw leh, shu htaꞈ uiˍ la yeˬ la piˇ puiˉ ve daꞈ ve tawˇ htaꞈ ceh tiˉ yaw” tuˬ ngaˬ hui laiˉ ceuˬ te gʼa ve yoˬ.—Eˇfeˇsuꞈ 4:29.

Yaˬhoˉvaˬ hkʼe, ngaˬ hui shu htaꞈ daꞈ ve te piˇ gaˇ ve yoˬ. Chaw teˇ gʼaˇ gʼaˇ htaꞈ leuˆ leh ga piˇ ve maˇ te. Chi hkʼe te tuˬ daꞈ ve awˬ hkʼaˇ teˇ hkʼaˇ lehˬ Gʼuiˬ sha ve mvuhˇ miˬ daꞈ ve awˬ lawn sha tanˇ teˇ gʼaˇ le le htaꞈ hto maˍ piˇ ve yoˬ. Yeˍsuˆ kʼoˆ ve hkʼe, ngaˬ hui htaꞈ nyi bawˬ ve chaw kaꞈ daꞈ ve te piˇ ve yoˬ. (Luˉkaꞈ 6:27) Ha kʼaˉ puiˉ leh shu htaꞈ daꞈ ve te piˇ ve lehˬ hkʼaˬ htaˆ kaꞈ cawˇ ve yoˬ. “Chi teˇ hpaˍ htaꞈ maˇ gʼa te tehꞈ kʼoˆ taˍ ve awˬ liˇ tawˇ hkawˇ teˇ maˬ kaꞈ maˇ cawˬ.” (Gaˍlaˍtiˆ 5:22, 23) Ngaˬ hui htaꞈ tawˍ laˇ ve leh beˬ ve lawˇ ve gʼa hpuˇ ve htawˇ, daꞈ ve htaꞈ te ve kʼo, shu awˬ tehˬ ve htaꞈ shiˍ leh Gʼuiˬ sha htaꞈ chiˇ mvuh gaˇ tuˬ ga piˇ gʼa ve yoˬ hehˉ.—1 Peˍtruˆ 3:16, 17.

“Daꞈ ve chaw lehˬ, yawˇ hui te taˍ ve hkʼe daꞈ ve awˬ bon gʼa tuˬ yoˬ.” (Tawˇ naˉ ve 14:14) Aˬ htoꞈ ma awˬ bon gʼa ve le? Shu htaꞈ daꞈ ve te piˇ htaˇ, yawˇ hui kaꞈ ngaˬ hui htaꞈ daꞈ ve te laˇ tuˬ yoˬ hehˉ. (Tawˇ naˉ ve 14:22) Yawˇ hui chi hkʼe maˇ te laˇ ve kaꞈ ngaˬ hui caˉ leh daꞈ ve htaꞈ te ve kʼo, hkʼe taw maˇ nyi bawˬ tuˬ yoˬ hehˉ.—Roˉmaꞈ 12:20.

Ngaˬ hui haiˬ ve htaꞈ maˇ te˗o leh daꞈ ve htaꞈ te htaˇ, awˬ bon gʼa ve yoˬ. Awˬ viˉ awˬ nyi laiˉ gʼaˇ chi hkʼe hpehꞈ jaw ve tehꞈ kʼoˆ ve yoˬ. Nehnˉsiˍ ve awˬ lawn htaꞈ dawˇ nyi sheˍ. Yawˇ kʼoˆ ve, “oˇ htaˇ ngaˬ shu htaꞈ maˇ yawˆ yan. Pehꞈ ve tzuhˆ ve leh haiˬ ve laiˉ ceuˬ te ve yoˬ. Yaꞈ hkʼaˇ, Yaˬhoˉvaˬ daꞈ maˇ daꞈ ve kʼoˆ laˇ ve htaꞈ ngaˬ gʼa henˇ leh gʼaꞈ te htaˇ, nyi ma sha la ve yoˬ. Chi teˇ hkui ngaˬ ha lehˬ jaˇ.”

A yeˇ uiˍ jaˇ ve lehˬ ngaˬ hui daꞈ ve htaꞈ te htaˇ, Yaˬhoˉvaˬ ha lehˬ jaˇ. Ngaˬ hui te ve awˬ ceuˬ htaꞈ laiˉ gʼaˇ maˇ mawˬ ve htawˇ, Yaˬhoˉvaˬ mawˬ ve yoˬ. Ngaˬ hui daꞈ ve htaꞈ te leh dawˇ ve ceh kaꞈ teˇ pawˆ le le yawˇ shiˍ ve yoˬ. (Eˇfeˇsuꞈ 6:7, 8) Yawˇ ngaˬ hui htaꞈ awˬ bon hkʼaˬ hkʼe naꞈ laˇ ve le? “Gʼuiˬ sha lehˬ daꞈ ve chaw htaꞈ nyi ma cawˇ ve yoˬ.” (Tawˇ naˉ ve 12:2) Daꞈ ve htaꞈ te puiˉ ve chaw hpehꞈ tuˬ coˇ caˇ sheˍ. “Daꞈ ve htaꞈ te ve chaw hkʼa peu˗eˬ lehˬ, awˬ meꞈ awˬ hponˇ htaꞈ maˇ kʼoˆ, daꞈ ve awˬ meh htaꞈ maˇ kʼoˆ, dawˇ sha gaˇ sha ve teˇ ceuˬ htaꞈ maˇ kʼoˆ, chi teˇ hpaˍ htaꞈ gʼa tuˬ yoˬ” tehꞈ Yaˬhoˉvaˬ ka tiꞈ te taˍ laˇ ve yoˬ.—Roˉmaꞈ 2:10.