1. Aˍdanˍ leh Eˇvaꞈ aˬ htoꞈ ma luˬ kʼai ve le? Hkʼaˬ hkʼe hpehꞈ la ve le?

 Nawˬ dawˇ kʼo aˬ htoꞈ ma cawˇ maˇ cawˇ ve awˬ liˇ awˬ hkʼaˇ a shu teh ve le? Aˍdanˍ leh Eˇvaꞈ daꞈ ve leh maˇ daꞈ ve shiˍ puiˉ ve suhˆ cehˬ ve awˬ shiˍ htaꞈ caˇ htaˇ, yawˇ hui ve dawˇ hkʼaˇ hkʼa tawˍ lehˆ tawˆ la ve yoˬ. Yawˇ hui Yaˬhoˉvaˬ ve awˬ liˇ awˬ hkʼaˇ htaꞈ gʼaˇ maˇ va. Daꞈ ve leh maˇ daꞈ ve awˬ liˇ awˬ hkʼaˇ yawˇ hui hkʼaˇ yawˇ hui teh ve yoˬ. (Awˬ hkuiˉ puiˍ 3:22) Yaꞈ hkʼaˇ, yawˇ hui hkʼaˬ hkʼe kʼai ve dawˇ nyi sheˍ. Yawˇ hui Yaˬhoˉvaˬ geh meuˆ daꞈ ve luˬ kʼai ve yoˬ. Co co taiˍ taiˍ a shaꞈ gʼa tuˬ shonˇ kʼai leh yaˇ teˇ hpaˍ venˇ baˆ cawˬ leh suh˗e tuˬ te piˇ ve yoˬ. (Roˉmaꞈ 5:12) Aˍdanˍ leh Eˇvaꞈ leuˆ yuˬ ve chi nyi ma luˬ jaˇ tuˬ te piˇ ve yoˬ.

2-3. (a) Ehˇtaˍyoˇpiˆ chaw ve a maꞈ lonˉ Hpiˇliˇpuˆ bon maˍ piˇ htaˇ aˬ htoꞈ ma te ve le? (b) Ngaˬ hui Baˆtiˆsaˬ haꞈ yuˬ ve kʼo, aˬ htoꞈ ma awˬ bon gʼa tuˬ le? Aˬ htoꞈ ma ve na hkawˇ htaꞈ henˇ tuˬ le?

² Aˍdanˍ leh Eˇvaꞈ te ve awˬ ceuˬ leh Hpiˇliˇpuˆ a maꞈ lonˉ htaꞈ bon maˍ piˇ ve tehˆ daꞈ nyi sheˍ. A maꞈ lonˉ chi teˇ gʼaˇ Yaˬhoˉvaˬ leh Yeˍsuˆ yawˇ awˬ pon te ve htaꞈ awˬ hpfuhˇ shiˍ leh laꞈ haˉ Baˆtiˆsaˬ haꞈ yuˬ ve yoˬ. (Tcuh yaˇ 8:34-38) Ngaˬ hui Gʼuiˬ sha htaꞈ awˬ to chiˇ aꞈ piˇ tuˬ dawˇ cheˆ htaˇ, leh a maꞈ lonˉ chi teˇ gʼaˇ hkʼe Baˆtiˆsaˬ haꞈ yuˬ htaˇ, ngaˬ hui ve dawˇ hkʼaˇ hkʼa tawˍ lehˆ hpeuꞈ maw piˇ ve yoˬ. Yaˬhoˉvaˬ leh Yeˍsuˆ ngaˬ hui awˬ pon te laˇ ve awˬ hpfuhˇ shiˍ ve tehꞈ shu htaꞈ shiˍ tcuh piˇ gʼa ve yoˬ. Ngaˬ hui Yaˬhoˉvaˬ htaꞈ gʼaˇ va ve tehꞈ hpeuꞈ maw piˇ leh yawˇ teˇ gʼaˇ ceh tiˉ daꞈ ve maˇ daꞈ ve awˬ liˇ awˬ hkʼaˇ teh shehˍ hpaˇ hpehꞈ ve tehꞈ ngaˬ hui haꞈ yuˬ ve yoˬ.

³ Ngaˬ hui Yaˬhoˉvaˬ ve kanˉ te htaˇ, awˬ bon gʼa ve htaꞈ dawˇ nyi sheˍ! Teˇ ceuˬ lehˬ Aˍdanˍ leh Eˇvaꞈ te luˬ kʼai taˍ ve htaꞈ ngaˬ hui gʼa tuˬ a hkʼaw˗anˬ cawˬ ve yoˬ. Chi co co taiˍ taiˍ a shaꞈ gʼa tuˬ ve htaꞈ kaꞈ kʼoˆ gaˇ ve yoˬ. Ngaˬ hui Yeˍsuˆ Hkriꞈ htaꞈ yonˍ ve pa taw, te yaꞈ  ve venˇ baˆ htaꞈ Yaˬhoˉvaˬ hpehˇ laˇ leh ngaˬ hui ve dawˇ shiˍ puiˉ ve nyi ma daꞈ kehˬ tuˬ te laˇ ve yoˬ. (Maꞈhtehˍ 20:28; Tcuh yaˇ 10:43) Chi hkʼoˆ kaꞈ ngaˬ hui Yaˬhoˉvaˬ htaꞈ oˉ kʼoˍ pui ve yehˬ kʼa hkʼaw ve teˇ gʼaˇ hpehꞈ ve yoˬ. Ngaˬ hui awˬ gʼuˇ suhˍ hpawˇ awˬ bon gʼa tuˬ yoˬ. (Yoˇhanˬ 10:14-16; Roˉmaꞈ 8:20, 21) Yaꞈ hkʼaˇ, Yaˬhoˉvaˬ htaꞈ shiˍ la ve chaw teˇ hpaˍ hpaˍ lehˬ awˬ bon hkʼa tawˍ lehˆ gʼa tuˬ mawˬ ve htawˇ, Ehˇtaˍyoˇpiˆ chaw ve a maꞈ lonˉ ve awˬ lawn hkʼe yawˇ hui maˇ gʼaꞈ te gaˇ. Yawˇ hui Baˆtiˆsaˬ maˇ gʼa haꞈ yuˬ tuˬ aˬ htoꞈ ma tawˍ piˇ ve le? Hkʼaˬ hkʼe te leh tawˍ piˇ ve chi htaꞈ gʼaˇ tuˬ le?

4-5. Ehˇvaˬriˆ leh Haˍnaˆ gʼa hpuˇ ve aˬ htoꞈ ma le?

⁴ Hkʼa dehꞈ maˇ te gʼa tehꞈ dawˇ ve. Ehˇvaˬriˆ ve awˬ pa awˬ e Yaˬhoˉvaˬ ve Shaˉhkiˆhkanˍ ve chaw hpehꞈ ve yoˬ. Yawˇ ve awˬ pa lehˬ shu htaꞈ ha kʼaˉ puiˉ leh nyi haꞈ shaˉ paˍ ve kanˉ hkʼa dehꞈ te gʼa leh awˬ meh bvuhˬ ve yoˬ. Yaꞈ hkʼaˇ, Ehˇvaˬriˆ Baˆtiˆsaˬ haꞈ yuˬ tuˬ htawˇ dawˇ nawˬ dawˇ cawˬ sheˍ. Aˬ htoꞈ ma pa taw le? Yawˇ kʼoˆ ve, “ngaˬ dawˇ ve ngaˬ pa hkʼe leˇ te maˇ gʼa taˬ.” Ehˇvaˬriˆ awˬ gʼuˇ suhˍ hpawˇ awˬ vuiˬ gʼa leh te maˇ gʼa ve htaꞈ kaꞈ kawˆ ve yoˬ. “Chaw awˬ moˍ lonˉ gʼuˇ suhˍ lo bon lawˬ ve, bon maˍ ve, maˇ heˆ leh hto toˇ kuiˬ hkʼaw sheh kʼai tcuh laˇ ve htaꞈ ngaˬ kawˆ ve yoˬ.”

⁵ Haˍnaˆ 18 hkʼawꞈ ve yawˇ hkʼa dehꞈ maˇ te gʼa tehꞈ dawˇ leh hpehꞈ bawˬ jaˇ. Yawˇ ve awˬ pa awˬ e Yaˬhoˉvaˬ ve kanˉ te ve yoˬ. Yaꞈ hkʼaˇ, yawˇ htawˇ dawˇ nawˬ dawˇ cawˬ ve, yawˇ Gʼuiˬ sha ve awˬ liˇ awˬ hkʼaˇ htaꞈ gʼaꞈ te gʼa˗aw laˇ? Aˬ htoꞈ ma pa taw le? Haˍnaˆ yawˇ awˬ to htaꞈ caˉ daꞈ ve maˇ daꞈ ve dawˇ hkʼaˇ cawˬ ve yoˬ. Teˇ pawˆ pawˆ kʼo, yawˇ maˇ daꞈ ve dawˇ hkʼaˇ tiˉ cawˬ leh awˬ to htaꞈ te luˬ ve yoˬ. Awˬ ceuˬ chi hkʼa peu˗eˬ luˬ kʼai tuˬ te piˇ ve yoˬ. Yawˇ kʼoˆ ve, “ngaˬ aˬ htoꞈ ma te ve teˇ gʼaˇ˗ehˬ kaꞈ maˇ kʼoˆ piˇ jaw. Ngaˬ pa ngaˬ e htaꞈ htawˇ maˇ kʼoˆ piˇ. Ngaˬ te ve awˬ ceuˬ htaꞈ pa taw, Yaˬhoˉvaˬ ngaˬ htaꞈ yawˇ ve kanˉ maˇ te tcuh gaˇ tehꞈ dawˇ ve yoˬ.”

6. Vaˬnehˇsaˍ Baˆtiˆsaˬ maˇ haꞈ yuˬ tuˬ aˬ htoꞈ ma tawˍ piˇ ve le?

⁶ Awˬ chawˇ geh laˬ ve maˇ daꞈ ve dawˇ hkʼaˇ. Vaˬnehˇsaˍ 22 hkʼawꞈ gaˬ˗oˬ ve kʼoˆ ve, “ngaˬ shiˍ daꞈ ve awˬ chawˇ aˬ laˬ hkʼe 10 hkʼawꞈ gaˬ˗oˬ ve teˇ gʼaˇ cawˬ ve yoˬ.” Yaꞈ hkʼaˇ, Vaˬnehˇsaˍ Baˆtiˆsaˬ haꞈ yuˬ tuˬ ve dawˇ teh taˍ ve htaꞈ awˬ chawˇ awˬ gʼaˇ maˇ piˇ. Chi yawˇ nyi ma luˬ leh kʼoˆ ve, “ngaˬ awˬ chawˇ tcuhˇ tcuhˬ maˇ cawˬ leh chi teˇ gʼaˇ htaꞈ awˬ chawˇ maˇ te ve kʼo, ngaˬ meuˆ daꞈ ve chaw maˇ kʼawꞈ cawˬ˗oˬ tehꞈ kawˆ ve yoˬ.”

7. Maˬhkehˬlaˆ aˬ htoꞈ ma htaꞈ kawˆ ve le? Aˬ htoꞈ ma pa taw le?

⁷ Te yaꞈ la tuˬ htaꞈ kawˆ ve. Maˬhkehˬlaˆ 5 hkʼawꞈ htaˇ awˬ viˉ paˍ htaꞈ Hkriꞈ yaˇ awˬ moˍ hkʼaw tawˆ cheˆ piˇ ve yoˬ. Yawˇ uiˍ la htaˇ, awˬ viˉ paˍ te  ve awˬ pa awˬ e htaꞈ hkʼaˬ hkʼe leuˆ la kuiˬ cawˬ ve yawˇ gʼa mawˬ ve yoˬ. Maˬhkehˬlaˆ kʼoˆ ve, “ngaˬ Baˆtiˆsaˬ haꞈ yuˬ ve kʼo, te yaꞈ la ve, Hkriꞈ yaˇ awˬ moˍ hkʼaw tawˆ cheˆ la ve, leh awˬ pa awˬ e nyi ma naˬ jaˇ tuˬ te piˇ la ve htaꞈ kawˆ ve yoˬ.”

8. Awˬ viˉ awˬ nyi yaˇ nehˬ Maiˍ aˬ htoꞈ ma htaꞈ kawˆ ve le?

⁸ Tawˍ laˇ ve htaꞈ kawˆ ve. Maiˍ awˬ pa leh awˬ e caˉ Yaˬhoˉvaˬ ve kanˉ te ve yoˬ. Yaꞈ hkʼaˇ, yawˇ awˬ e Yaˬhoˉvaˬ ve Shaˉhkiˆhkanˍ ve chaw maˇ hpehꞈ. Maiˍ kʼoˆ ve, “ngaˬ e geh 18 hkʼawꞈ chehˇ leh Baˆtiˆsaˬ haꞈ yuˬ tuˬ yawˇ htaꞈ maˇ kʼoˆ piˇ haˆ. Ngaˬ pa Shaˉhkiˆhkanˍ ve chaw hpehꞈ htaˇ ngaˬ e aˬ htoꞈ ma te piˇ ve ngaˬ kaꞈ shiˍ ve yoˬ. Ngaˬ e ngaˬ htaꞈ shoꞈ shaꞈ tuˬ te laˇ ve htaꞈ kawˆ ve yoˬ.”

9. Yaˬhoˉvaˬ yeunˇ hkanˍ leh ngaˬ hui htaꞈ hkʼaˬ hkʼe taw haꞈ ve nawˬ shiˍ htaˇ aˬ htoꞈ ma te tuˬ le?

⁹ Aˍdanˍ leh Eˇvaꞈ Yaˬhoˉvaˬ htaꞈ haꞈ ve maˇ yeˬ ve pa taw, yawˇ hui yawˇ ve kanˉ maˇ te tuˬ leuˆ yuˬ ve yoˬ. Yaꞈ hkʼaˇ, Yaˬhoˉvaˬ yawˇ hui htaꞈ yaˇ cawˬ la tuˬ awˬ yanˇ piˇ leh yaˇ hu tuˬ ve awˬ hkʼaˇ yawˇ hui hkʼaˇ yawˇ hui teh tcuh ve yoˬ. Hkʼawꞈ nawˉ htaˇ, Yaˬhoˉvaˬ htaꞈ gʼaˇ maˇ va ve lehˬ cuˇ yiˍ maˇ cawˬ tehꞈ Aˍdanˍ leh Eˇvaꞈ hkʼa dehꞈ gʼa shiˍ ve yoˬ. Yawˇ hui ve yaˇ paˍ uiˍ awˬ nyi paˍ yaꞈ kuiˬ maˇ cawˬ ve htaꞈ tiˇ pehˍ piˇ ve yoˬ. Peuˬ leh chaw yaˇ ve yehˬ kʼa hkʼaw a shu yawˇ awˬ pon tiˉ dawˇ nyi ve leh hehnˇ ve cawˬ la ve yoˬ. (Awˬ hkuiˉ puiˍ 4:8; 6:11-13) Yaꞈ hkʼaˇ, Aˍdanˍ ve awˬ yaˇ awˬ duˬ Yaˬhoˉvaˬ ve kanˉ te gaˇ ve chaw htaꞈ ga piˇ tuˬ awˬ hkʼaˇ cawˬ ve yoˬ. (Yoˇhanˬ 6:38-40, 57, 58) Yaˬhoˉvaˬ yeunˇ hkanˍ leh ngaˬ hui htaꞈ hkʼaˬ hkʼe taw haꞈ ve nawˬ gʼa henˇ htaˇ, yawˇ htaꞈ haꞈ maˇ la tuˬ yoˬ. Aˍdanˍ leh Eˇvaꞈ hkʼe nawˬ maˇ dawˇ cheˆ gaˇ taˬ. Yaˬhoˉvaˬ htaꞈ awˬ to chiˇ aꞈ piˇ gaˇ tuˬ yoˬ.

10. Chiˇ mvuh ve liꞈ 19:7 hkʼaw dawˇ nyi htaˇ, Yaˬhoˉvaˬ ve kanˉ te gaˇ tuˬ aˬ htoꞈ ma ga laˇ ve le?

¹⁰ Yaˬhoˉvaˬ ve awˬ lawn caˉ leh henˇ sheˍ. Yaˬhoˉvaˬ htaꞈ caˉ daꞈ ve nawˬ gʼaˇ hteꞈ henˇ ve kʼo, nawˬ yawˇ ve kanˉ hkʼa dehꞈ te gʼa tuˬ tehꞈ yonˍ gʼa ve yoˬ. Ehˇvaˬriˆ kʼawꞈ kʼoˆ ve, “Chiˇ mvuh ve liꞈ 19:7 hkʼaw ka tiꞈ te taˍ laˇ ve htaꞈ ngaˬ gʼaw leh dawˇ nyi htaˇ yonˍ gʼa ve yoˬ.” (Gʼaw sheˍ.) Yaˬhoˉvaˬ ka tiꞈ chi ve htaꞈ biˇ la tuˬ te ve awˬ hkʼaˇ Ehˇvaˬriˆ gʼa mawˬ htaˇ, yawˇ htaꞈ haꞈ maˇ la ve yoˬ. Haꞈ pehnˇ ve lehˬ ngaˬ hui yonˍ ve cawˬ tuˬ leh Yaˬhoˉvaˬ loˍ ve awˬ ceuˬ htaꞈ hkʼaˬ htaˆ kaꞈ dawˇ  nyi tuˬ ga laˇ ve yoˬ. Haˍnaˆ kʼawꞈ kʼoˆ ve, “ngaˬ Liꞈ hpu gʼaw leh hkʼa dehꞈ dawˇ nyi htaˇ, ngaˬ awˬ to htaꞈ te luˬ ve kʼo Yaˬhoˉvaˬ htaꞈ kaꞈ te luˬ ve tehꞈ shiˍ la ve yoˬ.” (1 Peˍtruˆ 5:7) Haˍnaˆ lehˬ Gʼuiˬ sha maˍ ve htaꞈ “na yuˬ leh te ve chaw” hpehꞈ la ve yoˬ. (Yaˍkoˆ 1:22) Aˬ htoꞈ ma awˬ bon gʼa ve le? Yawˇ kʼoˆ ve, “ngaˬ Yaˬhoˉvaˬ hkawˇ na yuˬ leh awˬ bon gʼa ve htaꞈ mawˬ htaˇ yawˇ htaꞈ haꞈ maˇ la ve yoˬ. Chi teˇ hkui ngaˬ htaꞈ ga laˇ tuˬ loˍ htaˇ, Yaˬhoˉvaˬ beˆ maˍ laˇ tuˬ yoˬ tehꞈ yonˍ gʼa ve yoˬ.” Haˍnaˆ yawˇ awˬ to te luˬ gaˇ ve htaꞈ gʼaˇ ve yoˬ. Yawˇ Yaˬhoˉvaˬ htaꞈ awˬ to chiˇ aꞈ piˇ leh Baˆtiˆsaˬ haꞈ yuˬ ve yoˬ.

11. Vaˬnehˇsaˍ daꞈ ve awˬ chawˇ cawˬ tuˬ aˬ htoꞈ ma te ve le? Awˬ lawn chi ngaˬ hui htaꞈ aˬ htoꞈ ma maˍ laˇ ve le?

¹¹ Nawˬ cuˇ yiˍ cawˬ ve hkʼaw awˬ chawˇ leuˆ sheˍ. Vaˬnehˇsaˍ Yaˬhoˉvaˬ ve kanˉ maˇ te tuˬ awˬ chawˇ tawˍ ve tehꞈ awˬ leh meuˇ htaˇ yawˇ shiˍ la ve yoˬ. Chi teˇ gʼaˇ htaꞈ yawˇ awˬ chawˇ maˇ te˗oˬ. Yaꞈ hkʼaˇ, yawˇ Hkriꞈ yaˇ moˍ hkaw awˬ chawˇ awˬ suhˉ cawˬ tuˬ coˇ caˇ jaˇ. Yawˇ kʼoˆ ve Noˉaꞈ leh yawˇ ve yehˬ kʼa yawˇ htaꞈ ga laˇ ve yoˬ. Yawˇ kʼawꞈ kʼoˆ ve, “yawˇ hui awˬ paˇ awˬ kui chehˇ ve chaw Yaˬhoˉvaˬ htaꞈ maˇ haꞈ. Yaꞈ hkʼaˇ, yawˇ hui meuˆ daꞈ leh awˬ chawˇ te daꞈ ve yoˬ.” Vaˬnehˇsaˍ Baˆtiˆsaˬ haꞈ yuˬ peuˬ hkʼawꞈ nawˉ gʼuˇ suhˍ peuˍ ve te ve yoˬ. Chi teˇ hkui yawˇ kʼoˆ ve, “kanˉ chi ve ngaˬ Hkriꞈ yaˇ awˬ moˍ hkʼaw leh awˬ nu ve Hkriꞈ yaˇ awˬ moˍ hkʼaw kaꞈ daꞈ ve awˬ chawˇ cawˬ tuˬ te laˇ ve yoˬ.” Yaˬhoˉvaˬ ngaˬ hui htaꞈ kanˉ peꞈ laˇ taˍ ve htaꞈ nawˬ kaꞈ hkʼa dehꞈ te ve kʼo, daꞈ ve awˬ chawˇ cawˬ gʼa tuˬ ve yoˬ.—Maꞈhtehˍ 24:14.

12. Aˍdanˍ leh Eˇvaꞈ hkʼaˬ hkʼe ve htaꞈ maˇ kawˆ ve le? Hkʼaˬ hkʼe hpehꞈ la ve le?

¹² Kawˆ cawˇ ve awˬ ceuˬ ceh kawˆ sheˍ. Kawˆ ve teˇ ceuˬ ceuˬ kʼo ngaˬ hui awˬ pon daꞈ ve yoˬ. Tawˇ pa haˉ te kʼo, ngaˬ hui Yaˬhoˉvaˬ nyi hkʼaˇ maˇ suh tuˬ te piˇ la ve htaꞈ kawˆ cawˇ ve yoˬ. (Chiˇ mvuh ve 111:10) Aˍdanˍ leh Eˇvaꞈ chi hkʼe kawˆ ve kʼo, Yaˬhoˉvaˬ htaꞈ maˇ hpfuhˆ taˬ. Yaꞈ hkʼaˇ, yawˇ hui hpfuhˆ ve yoˬ. Peuˬ hkʼawꞈ nawˉ yawˇ hui ve mehˆ shiˍ teˇ cawˬ haˉ mawˬ la leh venˇ baˆ yaˇ hpehꞈ ve tehꞈ hkʼa tawˍ lehˆ shiˍ la ve yoˬ. Yawˇ hui venˆ baˆ leh suh ve teˇ ceuˬ ceh awˬ yaˇ htaꞈ piˇ gʼa ve yoˬ. Awˬ lawn kʼo, yawˇ hui awˬ ku nyi hpehꞈ chehˇ ve htaꞈ shiˍ la leh, yaꞈ tawˍ jaˇ leh awˬ nu ve awˬ ceuˬ htaꞈ ca leh awˬ to htaꞈ beh ve yoˬ.—Awˬ hkuiˉ puiˍ 3:7, 21.

13-14. (a) 1 Peˍtruˆ liꞈ 3:21 hkʼaw kʼoˆ taˍ ve hkʼe, aˬ htoꞈ ma te ngaˬ hui suh ve htaꞈ hkʼe taw taw kawˆ tuˬ maˇ loˍ ve le? (b) Aˬ htoꞈ ma te ngaˬ hui Yaˬhoˉvaˬ htaꞈ haꞈ ve le?

 ¹³ Ngaˬ hui Yaˬhoˉvaˬ htaꞈ yawˆ yan ve hkʼaw kawˆ ve yoˬ. Yaꞈ hkʼaˇ, ngaˬ hui suh ve htaꞈ hkʼe taw taw kawˆ tuˬ maˇ loˍ. Yaˬhoˉvaˬ ngaˬ hui htaꞈ co co taiˍ taiˍ ve a shaꞈ cawˬ tuˬ te laˇ gʼa ve yoˬ. Ngaˬ hui venˇ baˆ uiˍ jaˇ ve htaꞈ te yaꞈ leh awˬ tehˬ dawˇ hpfuhˆ ve kʼo, te yaꞈ ve venˇ baˆ htaꞈ yawˇ hpehˇ laˇ tuˬ yoˬ. Yawˇ ve Yaˇ paˍ htaiˍ hkʼawꞈ laˇ ve htaꞈ ngaˬ hui yonˍ ve kʼo, venˇ baˆ hpehˇ laˇ tuˬ yoˬ. Ngaˬ hui yonˍ ve tehꞈ hpeuꞈ maw piˇ gʼa ve teˇ hkʼaˇ lehˬ, Yaˬhoˉvaˬ htaꞈ awˬ to chiˇ aꞈ piˇ leh Baˆtiˆsaˬ haꞈ yuˬ ve yoˬ.—1 Peˍtruˆ 3:21 gʼaw sheˍ.

¹⁴ Ngaˬ hui Yaˬhoˉvaˬ htaꞈ haꞈ tuˬ te laˇ ve laiˉ ceuˬ cawˬ ve yoˬ. Teˇ nyi le le ha lehˬ tuˬ yawˇ laiˉ ceuˬ peꞈ laˇ ve yoˬ. Yawˇ htaꞈ caˉ daꞈ ve awˬ tehˬ ve leh yawˇ ve a loˍ maˍ laˇ ve yoˬ. (Yoˇhanˬ 8:31, 32) Chi hkʼoˆ kaꞈ ngaˬ hui htaꞈ beˆ maˍ leh awˬ gʼaˇ peꞈ laˇ tuˬ Hkriꞈ yaˇ awˬ moˍ cawˬ tcuh laˇ ve yoˬ. Chi teˇ hkui yawˇ ngaˬ hui ve awˬ vuiˬ htaꞈ ga laˇ leh biˇ ve chaw hpehꞈ tuˬ dawˇ law kuiˬ yawˇ cawˬ tcuh laˇ leh co co taiˍ taiˍ a shaꞈ gʼa teꞈ chehˇ tuˬ yoˬ. (Chiˇ mvuh ve 68:19; Hpeuꞈ maˍ ve 21:3, 4) Yaˬhoˉvaˬ ngaˬ hui awˬ pon laiˉ ceuˬ te laˇ ve htaꞈ dawˇ nyi htaˇ, yawˇ haꞈ ve tehꞈ hpeuꞈ maw laˇ leh ngaˬ hui kaꞈ yawˇ htaꞈ haꞈ gaˇ ve yoˬ. Ngaˬ hui Yaˬhoˉvaˬ htaꞈ haꞈ ve kʼo, yawˇ htaꞈ yawˆ yan ve hkʼaw kawˆ ve yoˬ. Ngaˬ hui haꞈ jaˇ ve Yaˬhoˉvaˬ nyi ma luˬ tuˬ te piˇ la ve htaꞈ kawˆ ve yoˬ.

15. Maˬhkehˬlaˆ te yaꞈ la ve kawˆ ve htaꞈ hkʼaˬ hkʼe te gʼaˇ ve le?

¹⁵ Maˬhkehˬlaˆ te yaꞈ la ve kawˆ ve htaꞈ gʼaˇ ve yoˬ. Yaˬhoˉvaˬ hkʼaˬ htaˆ kaꞈ venˇ baˆ hpehˇ laˇ tuˬ ve htaꞈ yawˇ shiˍ ve pa taw yoˬ. “Ngaˬ hui teˇ gʼaˇ le le maˇ biˇ leh te yaꞈ ve tehꞈ ngaˬ shiˍ ve yoˬ. Yaꞈ hkʼaˇ, Yaˬhoˉvaˬ ngaˬ hui htaꞈ haꞈ leh Yeˍsuˆ htaiˍ hkʼawꞈ laˇ ve htaꞈ pa taw, yawˇ ngaˬ hui htaꞈ venˇ baˆ hpehˇ laˇ gʼa ve tehꞈ ngaˬ shiˍ ve yoˬ.” Yawˇ Yaˬhoˉvaˬ htaꞈ haꞈ ve pa taw, awˬ to chiˇ aꞈ piˇ leh Baˆtiˆsaˬ haꞈ yuˬ ve yoˬ.

16. Maiˍ tawˍ piˇ ve kawˆ ve htaꞈ gʼaˇ tuˬ aˬ htoꞈ ma ga piˇ ve le?

¹⁶ Maiˍ Baˆtiˆsaˬ haꞈ yuˬ tuˬ awˬ e tawˍ laˇ ve htaꞈ kawˆ ve htawˇ, toˇ nyi shehˍ hpaˇ ga laˇ tuˬ lawˬ ve yoˬ. Yawˇ kʼoˆ ve, “toˇ nyi shehˍ hpaˇ kaꞈ yehˬ kʼa hkʼaw yonˍ hkʼaˇ maˇ shuˍ daꞈ ve hkʼaw uiˍ la ve yoˬ. Baˆtiˆsaˬ haꞈ yuˬ tuˬ ngaˬ hkʼaˇ ngaˬ dawˇ cheˆ leh ngaˬ pa ngaˬ chi hkʼe te tuˬ maˇ nyiˉ laˇ, ngaˬ e na gʼa tuˬ toˇ nyi shehˍ hpaˇ awˬ hkʼaˇ ca leh kʼoˆ maˍ laˇ ve yoˬ.” Maiˍ ve awˬ e maˇ dawˇ cawˇ. Awˬ leh meuˇ htaˇ yawˇ yehˬ hkʼaw lo tawˆ˗e ve yoˬ. Yaꞈ hkʼaˇ, yawˇ hkʼa shuˍ kʼawꞈ dawˇ cheˆ sheˍ ve yoˬ. Yawˇ kʼoˆ ve, “Yaˬhoˉvaˬ ngaˬ awˬ pon daꞈ ve laiˉ ceuˬ te laˇ ve ngaˬ gʼa henˇ ve ha lehˬ jaˇ. Yeˍsuˆ htaiˍ hkʼawꞈ laˇ ve htaꞈ ngaˬ dawˇ nyi htaˇ, Yaˬhoˉvaˬ ngaˬ htaꞈ hkʼaˬ hkʼe taw haꞈ ve ngaˬ shiˍ la ve yoˬ. Dawˇ hkʼaˇ chi ve ngaˬ Yaˬhoˉvaˬ htaꞈ awˬ to chiˇ aꞈ piˇ leh Baˆtiˆsaˬ haꞈ yuˬ gaˇ ve yoˬ.”

17. Ngaˬ hui teˇ gʼaˇ le le aˬ htoꞈ ma te gʼa ve le?

¹⁷ Eˍdenˍ hko hkʼaw suhˆ cehˬ ve awˬ shiˍ Eˇvaꞈ  caˇ htaˇ, yawˇ Awˬ pa htaꞈ hpfuhˆ ve yoˬ. Aˍdanˍ Eˇvaꞈ hkʼe te htaˇ, Yaˬhoˉvaˬ Aˍdanˍ awˬ pon daꞈ ve te piˇ ve htaꞈ awˬ hpfuhˇ maˇ shiˍ ve yoˬ. Aˍdanˍ leh Eˇvaꞈ dawˇ cheˆ ve maˇ cawˇ ve tehꞈ ngaˬ hui teˇ gʼaˇ le le te tawˆ la gʼa ve yoˬ. Yaˬhoˉvaˬ kanˇ paˆ cawˬ leh daꞈ ve maˇ daꞈ ve awˬ liˇ awˬ hkʼaˇ teh shehˍ hpaˇ hpehꞈ ve tehꞈ ngaˬ hui yonˍ leh Baˆtiˆsaˬ haꞈ yuˬ htaˇ hpeuꞈ maw piˇ gʼa ve yoˬ. Ngaˬ hui ve Awˬ pa htaꞈ haꞈ leh gʼaˇ va ve tehꞈ hpeuꞈ maw piˇ gʼa ve yoˬ.

18. Nawˬ Yaˬhoˉvaˬ ve kanˉ te ve hkʼaˬ hkʼe te awˬ bon cawˬ tuˬ le?

¹⁸ Baˆtiˆsaˬ haꞈ yuˬ peuˬ hkʼawꞈ nawˉ teˇ nyi le le ngaˬ hui ve a loˍ htaꞈ maˇ gʼaꞈ te gaˇ, Yaˬhoˉvaˬ ve awˬ liˇ awˬ hkʼaˇ htaꞈ gʼaꞈ te gaˇ ve yoˬ. Teˇ hkʼawꞈ le le laiˉ lanˬ gʼaˇ a shaꞈ teꞈ hkʼaˇ chi hkʼe te ve yoˬ. Liꞈ hpu hkʼaw ve hkʼa dehꞈ na gʼa tuˬ nawˬ coˇ caˇ ve kʼo, awˬ viˉ awˬ nyi geh hkʼaˬ htaˆ kaꞈ awˬ chawˇ te ve kʼo, haꞈ pehnˇ uiˍ jaˇ ve Awˬ pa ve awˬ lawn nawˬ gʼa henˇ taˍ ve hkʼe coˇ caˇ leh shu htaꞈ maˍ piˇ ve kʼo, nawˬ kaꞈ yawˇ hui hkʼe te gʼa ve yoˬ. (Heˍbrehˇ 10:24, 25) Nawˬ dawˇ cehˆ htaˇ, Yaˬhoˉvaˬ Liꞈ hpu leh yawˇ ve kanˉ hkʼaˇ htaꞈ cuˇ leh beˆ maˍ laˇ ve htaꞈ dawˇ nyi sheˍ. (Iˉsaˍyaˆ 30:21) Nawˬ chi hkʼe te ve kʼo, teˇ ceuˬ le le awˬ bon cawˬ tuˬ yoˬ.—Tawˇ naˉ ve 16:3, 20.

19. Nawˬ caˉ leh aˬ htoꞈ ma te cawˇ ve le? Aˬ htoꞈ ma pa taw le?

¹⁹ Yaˬhoˉvaˬ nawˬ htaꞈ beˆ maˍ laˇ htaˇ, nawˬ awˬ bon hkʼaˬ hkʼe taw gʼa ve shiˍ maˇ la ve kʼo, nawˬ Yaˬhoˉvaˬ leh yawˇ ve awˬ liˇ awˬ hkʼaˇ htaꞈ haꞈ ve kaꞈ maˇ la tuˬ yoˬ. Nawˬ chi hkʼe te ve kʼo Saˍtanˍ aˬ htoꞈ ma te tcuh laˇ ve htawˇ, Yaˬhoˉvaˬ ve kanˉ htaꞈ maˇ chiˇ baˬ taˬ. Awˬ gʼuˇ suhˍ hpawˇ nawˬ ve a shaꞈ teˇ hinˉ hkʼawꞈ ve htaꞈ dawˇ nyi sheˍ. Ponˬ laˬ htaˇ ve htaꞈ nawˬ kʼawꞈ dawˇ nyi leh nawˬ Baˆtiˆsaˬ haꞈ yuˬ tuˬ dawˇ cheˆ ve lehˬ teˇ ceuˬ le le aꞈ kehˉ daꞈ jaˇ!