Ngaˬ hui “A menˬ” tehꞈ kʼoˆ ve Yaˬhoˉvaˬ awˬ pon awˬ hpfuhˇ hkʼaˆ jaˇ
Ngaˬ hui Yaˬhoˉvaˬ htaꞈ oˉ kʼoˍ pui ve yawˇ awˬ pon awˬ hpfuhˇ hkʼaˆ jaˇ. Yawˇ ve chaw teˇ gʼaˇ le le htaꞈ yawˇ hkʼa dehꞈ na leh, yawˇ hui chiˇ mvuh ve hkʼa peu˗eˬ yawˇ a yeˇ yuˬ ve yoˬ. (Maˍlaˍhkiˆ 3:16) Tawˇ teˇ hkawˇ ngaˬ hui laiˉ pawˆ yehˇ jaw˗oˬ ve htaꞈ dawˇ nyi sheˍ. Chi ve lehˬ “A menˬ” yoˬ. Tawˇ chi ve kaꞈ Yaˬhoˉvaˬ awˬ pon awˬ hpfuhˇ hkʼaˆ jaˇ! Chi ve hkʼaˬ hkʼe kʼoˆ gaˇ ve, leh Liꞈ hpu hkʼaw hkʼaˬ hkʼe yehˇ ve naˍ teˇ geh dawˇ nyi sheˍ.
“CHAW HKʼA PEU˗Eˬ ‘A MENˬ!’ TEHꞈ GʼA KʼOˆ VE YOˬ”
Heˍbrehˇ ve tawˇ hkawˇ hkʼaw A menˬ tehꞈ kʼoˆ ve lehˬ “oˇ hkʼe hpehꞈ la piˇ˗oˆ.” Tawˇ hkawˇ chi ve tcuhˉ kuiˬ lehˬ “ka tiꞈ yeˬ ve” leh “yonˍ gʼa ve” yoˬ. Teˇ pawˆ pawˆ kʼo suhˉ jehˬ piˇ htaˇ tawˇ hkawˇ chi htaꞈ yehˇ ve yoˬ. Chaw teˇ gʼaˇ hkanˍ peuˬ hkʼawꞈ nawˉ yawˇ kʼoˆ ve awˬ ceuˬ, cawˇ ve leh yawˇ kʼoˆ ve hkʼe gʼaꞈ te tuˬ yoˬ tehꞈ shu shiˍ tuˬ, yawˇ “A menˬ” tehꞈ kʼoˆ ve yoˬ. (Heh puiˉ hkʼaw 5:22) Yawˇ chi hkʼe kʼoˆ˗oˬ ve pa taw, yawˇ kʼoˆ taˍ ve hkʼe gʼaꞈ te tuˬ yoˬ.—Neˍhaˍmiˆ 5:13.
Bon maˍ ve liꞈ kaˇ nanˉ uiˍ 27 hkʼaw “A menˬ” tehꞈ kʼoˆ ve laiˉ pawˆ cawˬ ve yoˬ. Iˉsaˍreˍlaˆ chaw ka tiꞈ te taˍ ve mvuhˇ miˬ hkʼaw loꞈ˗e peuˬ hkʼawꞈ nawˉ, Gʼuiˬ sha ve awˬ liˇ tawˇ hkawˇ htaꞈ na tuˬ, Eˇbaˍlaˆ leh Geˍraˍzenˍ hkʼaw awˬ kaˍ lo Gʼuiˬ sha huˉ tcuh taˍ ve yoˬ. Yawˇ hui awˬ liˇ tawˇ hkawˇ na ve ceh maˇ heˆ, haꞈ yuˬ ve htaꞈ gʼa kʼoˆ ve yoˬ. Awˬ liˇ tawˇ hkawˇ gʼa kaˇ peuˬ hkʼawꞈ nawˉ, yawˇ hui “A menˬ!” tehꞈ gʼa kʼoˆ ve yoˬ. (Bon maˍ ve 27:15-26) Chaw mawˇ leh yaˇ ehˉ hkʼa gaˬ laiˉ hinˉ gʼaˇ awˬ hkawˇ hkʼaˬ hkʼe taw bvuhˬ ve dawˇ nyi sheˍ! (Yawˇsuˆ 8:30-35) Yawˇ hui oˇ hkʼe kʼoˆ jaw ve htaꞈ hkʼaˬ htaˆ kaꞈ tawnˇ taˍ gʼa ve yoˬ. Yawˇ hui kʼoˆ taˍ ve hkʼe gʼaꞈ te ve yoˬ. “Yawˇsuˆ a shaꞈ teꞈ chehˇ sheˍ ve awˬ yanˇ leh, Gʼuiˬ sha Iˉsaˍreˍlaˆ chaw hui htaꞈ hkʼaˬ hkʼe te piˇ taˍ ve htaꞈ hkʼa dehꞈ shiˍ ve chaw teˇ hpaˍ a shaꞈ teꞈ chehˇ sheˍ ve teˇ co˗e, awˬ hkʼaw lo, Iˉsaˍreˍlaˆ chaw teˇ hpaˍ Gʼuiˬ sha htaꞈ ceh tiˉ oˉ kʼoˍ pui chehˇ ve yoˬ.”—Yawˇsuˆ 24:31.
Kʼoˆ˗oˬ ve tawˇ awˬ tehˬ cawˇ ve tehꞈ shu yonˍ gʼa tuˬ, Yeˍsuˆ kaꞈ “A menˬ” tehꞈ kʼoˆ ve yoˬ. Yaꞈ hkʼaˇ, Yeˍsuˆ shu htaꞈ kʼoˆ piˇ htaˇ “A menˬ” tehꞈ maˇ kʼoˆ, yawˇ hkʼaˇ yawˇ kʼoˆ maˍ piˇ htaˇ kʼoˆ ve yoˬ. Teˇ pawˆ pawˆ kʼo yawˇ “A menˬ A menˬ” tehꞈ kʼoˆ ve yoˬ. (Maꞈhtehˍ 5:18; Yoˇhanˬ 1:51) Na chehˇ ve chaw hkʼa dehꞈ yonˍ gʼa tuˬ, yawˇ chi hkʼe kʼoˆ ve yoˬ. Gʼuiˬ sha ve ka tiꞈ te biˇ tuˬ a hkaw˗anˬ gʼa ve pa taw, yawˇ hkʼa dehꞈ kʼoˆ gʼa ve yoˬ.—2 Kawˇrenˍhtuˆ 1:20; Hpeuꞈ maˍ ve 3:14.
“CHAW HKʼA PEU˗Eˬ ‘A MENˬ!’ TEHꞈ KʼOˆ LEH GʼUIˬ SHA HTAꞈ CHIˇ MVUH VE”
Chi hkʼoˆ kaꞈ, Yaˬhoˉvaˬ htaꞈ chiˇ mvuh leh bon lawˬ htaˇ Iˉsaˍreˍlaˆ chaw kaꞈ “A menˬ” tehꞈ kʼoˆ ve yoˬ. (Neˍhaˍmiˆ 8:6; Chiˇ mvuh ve 41:13) Shu bon lawˬ peuˬ hkʼawꞈ nawˉ, na ve chaw chi hkʼe kʼoˆ ve kʼo, bon lawˬ hkawˇ oˇ ve htaꞈ yawˇ haꞈ yuˬ ve tehꞈ kʼoˆ gaˇ ve yoˬ. Chi kʼoˆ gaˇ ve lehˬ oˇ kaˬ lo chehˇ ve hkʼa peu˗eˬ Yaˬhoˉvaˬ htaꞈ oˉ kʼoˍ pui gʼa ve yoˬ. Jawˇmawˇ Daˍviˆ ka tiꞈ shaˉ caˆ ta kʼoˍ Yeˍruˆsaˍlehnˍ venˇ lo yuˬ laˬ htaˇ kaꞈ chi hkʼe hpehꞈ ve yoˬ. Hti caˇ hti dawˬ htaˇ, yawˇ bon lawˬ ve yoˬ. A yeˇ uiˍ ve bon lawˬ hkawˇ chi liꞈ hkawˇ htaꞈ shuˍ ve 1 Raˍsaˍvanˍ liꞈ 16:8-36 hkʼaw cawˬ ve yoˬ. Bon lawˬ hkawˇ chi na ve chaw nyi ma hkʼaw gaˬ jaˇ leh “chaw hkʼa peu˗eˬ ‘A menˬ!’ tehꞈ kʼoˆ leh Gʼuiˬ sha htaꞈ chiˇ mvuh ve yoˬ.” Yawˇ hui teˇ geh hkʼawꞈ htaˇ ha lehˬ jaˇ.
Awˉ lawˉ peuˇ ve Hkriꞈ yaˇ kaꞈ Yaˬhoˉvaˬ htaꞈ chiˇ mvuh tuˬ “A menˬ” tehꞈ kʼoˆ ve yoˬ. Liꞈ hpu bvuhꞈ paˍ laiˉ gʼaˇ kaꞈ tawˇ hkawˇ chi htaꞈ yehˇ ve yoˬ. (Roˉmaꞈ 1:25; 16:27; 1 Peˍtruˆ 4:11) Hpeuꞈ maˍ ve liꞈ hkʼaw mvuhˇ naw ma tcuh yaˇ kaꞈ “A menˬ! Haˍleˍluˇyaˬ!” tehꞈ kʼoˆ leh Yaˬhoˉvaˬ htaꞈ chiˇ mvuh ve yoˬ. (Hpeuꞈ maˍ ve 19:1, 4) Awˉ lawˉ peuˇ ve Hkriꞈ yaˇ awˬ co˗e htaˇ, yawˇ hui hpawnˬ daꞈ ve hkʼaw bon lawˬ htaˇ, awˬ leh meuˇ gaˬ kʼo teˇ gʼaˇ le le kaꞈ “A menˬ” kʼoˆ ve yoˬ. (1 Kawˇrenˍhtuˆ 14:16) Yaꞈ hkʼaˇ yawˇ kʼoˆ gaˇ leh kʼoˆ ve maˇ heˆ.
NAWˬ “A MENˬ” KʼOˆ VE A YEˇ UIˍ˗AW LAˇ?
Hkʼe te leh bon lawˬ ve awˬ leh meuˇ htaˇ ngaˬ hui “A menˬ” tehꞈ kʼoˆ ve a yeˇ uiˍ jaˇ ve gʼa henˇ ve yoˬ. Ngaˬ hui hkʼaˇ ngaˬ hui bon lawˬ htaˇ, “A menˬ” tehꞈ kʼoˆ ve kʼo, ngaˬ hui bon lawˬ ve hkʼe awˬ tehˬ gʼaꞈ te tuˬ yoˬ tehꞈ kʼoˆ gaˇ ve yoˬ. Shu ngaˬ hui awˬ pon bon lawˬ laˇ htaˇ, kʼoˆ tawˆ la ve maˇ kʼoˆ nyi ma hkʼaw ceh dawˇ ve maˇ kʼoˆ ngaˬ hui “A menˬ” tehꞈ kʼoˆ ve kʼo, yawˇ hkʼe dawˇ ve tehꞈ hpeuꞈ maw piˇ ve yoˬ. Awˬ hkʼoˆ kaꞈ aˬ htoꞈ ma pa taw ngaˬ hui “A menˬ” tehꞈ kʼoˆ ve le?
Ngaˬ hui oˉ kʼoˍ pui htaˇ hkʼa dehꞈ na leh dawˇ nyi ve. Bon lawˬ ve kaꞈ Yaˬhoˉvaˬ htaꞈ oˉ kʼoˍ pui ve teˇ ceuˬ hpehꞈ ve yoˬ. Chi htaꞈ pa taw, bon lawˬ hkawˇ oˇ ve a yeˇ uiˍ ve ceh maˇ heˆ, ngaˬ hui na htaˇ te chehˇ ve kaꞈ a yeˇ uiˍ ve yoˬ. Ngaˬ hui “A menˬ” tehꞈ kʼoˆ ve awˬ tehˬ awˬ na awˬ bon cawˬ tcuh gaˇ ve kʼo, ngaˬ hui hkʼa dehꞈ na leh awˬ nu ve awˬ ceuˬ maˇ te tuˬ yoˬ.
Gʼuiˬ sha htaꞈ oˉ kʼoˍ pui chehˇ ve chaw geh teˇ moˍ tiˉ hpehꞈ ve. Hpawnˬ daꞈ ve hkʼaw ngaˬ hui awˬ viˉ awˬ nyi geh bon lawˬ ve yoˬ. (Tcuh yaˇ 1:14; 12:5) Awˬ viˉ awˬ nyi geh “A menˬ” teˇ geh kʼoˆ htaˇ, teˇ moˍ tiˉ hpehꞈ gʼa ve yoˬ. Kʼoˆ tawˆ la ve maˇ kʼoˆ nyi ma hkʼaw ceh dawˇ ve maˇ kʼoˆ ngaˬ hui “A menˬ” tehꞈ kʼoˆ ve kʼo, ngaˬ hui lawˬ ve awˬ ceuˬ htaꞈ Yaˬhoˉvaˬ hkʼawꞈ laˇ gʼa ve yoˬ.
Ngaˬ hui “A menˬ” tehꞈ kʼoˆ ve Yaˬhoˉvaˬ htaꞈ chiˇ mvuh ve teˇ ceuˬ hpehꞈ ve
Ngaˬ hui Yaˬhoˉvaˬ htaꞈ chiˇ mvuh ve. Awˬ lawn a ciˉ ceh tiˉ ve htawˇ, Yaˬhoˉvaˬ ngaˬ hui oˉ kʼoˍ pui ve htaꞈ mawˬ ve yoˬ. (Luˉkaꞈ 21:2, 3) Yawˇ ngaˬ hui ve nyi ma htaꞈ shiˍ leh aˬ htoꞈ ma te ngaˬ hui chi hkʼe te ve kaꞈ shiˍ ve yoˬ. Ngaˬ hui tawˇ yaw tuˬ awˬ hkʼeun hkʼaw hpawnˬ daꞈ ve na ve htawˇ, ngaˬ hui “A menˬ” kʼoˆ htaˇ Yaˬhoˉvaˬ kaˇ ve yoˬ. Chi ve kaꞈ Yaˬhoˉvaˬ htaꞈ chiˇ mvuh ve teˇ ceuˬ hpehꞈ ve yoˬ.
Ngaˬ hui “A menˬ” tehꞈ kʼoˆ ve nyi˗a kʼo awˬ hpfuhˇ maˇ cawˬ ve htawˇ, awˬ tehˬ tehˬ kʼo a yeˇ uiˍ jaˇ. Liꞈ kʼoˆ teˇ kʼoˆ hkʼaw kʼoˆ ve, tawˇ chi teˇ hkawˇ kʼoˆ htaˇ, “Gʼuiˬ sha htaꞈ oˉ kʼoˍ pui ve chaw nyi ma hkʼaw, dawˇ law kuiˬ leh yonˍ hkʼaˇ cawˬ leh, Gʼuiˬ sha htaꞈ gʼaˇ hkʼa dehꞈ va ve” tehꞈ kʼoˆ gaˇ ve yoˬ. Ngaˬ hui “A menˬ” tehꞈ kʼoˆ ve teˇ pawˆ le le Yaˬhoˉvaˬ haꞈ yuˬ tcuh gaˇ ve yoˬ.—Chiˇ mvuh ve 19:14.
