AWˬ LAWN 17
KʼA MUIˬ HKAWˇ 111 Ngaˬ hui ha lehˬ chehˇ ve
Co ha hpawˇ ve hko hkʼaw caˉ leh chehˇ sheˍ
“Ngaˬ te hpanˍ taˍ ve awˬ ceuˬ teˇ hpaˍ awˬ hkʼaw lo ha lehˬ chehˇ˗oˆ.”—IˉSAˍYAˆ 65:18.
HENˇ TUˬ VE TEˇ HPAˍ
Co ha hpawˇ ve hko hkʼaw chehˇ htaˇ, ngaˬ hui aˬ htoꞈ ma awˬ bon gʼa ve teˇ geh henˇ tuˬ yoˬ. Leh co ha hpawˇ ve hko hkʼaw awˬ nu ve chaw chehˇ la tuˬ, ngaˬ hui hkʼaˬ hkʼe ga piˇ gʼa ve awˬ lawn kaꞈ teˇ geh henˇ tuˬ yoˬ.
1. Co ha hpawˇ ve hko aˬ htoꞈ ma le? Leh ngaˬ hui aˬ htoꞈ ma te tuˬ dawˇ teh taˍ cawˇ ve le?
Chi beuꞈ teˇ co˗e miˬ guiˬ chi hkʼoˆ lo daꞈ jaˇ ve hko teˇ kaˬ cawˬ leh dawˇ sha gawˬ lehˍ ve ceh tiˉ cawˬ ve yoˬ. Choˬ kaˬ lo chaw laiˉ lanˬ gʼaˇ chehˇ leh yawˇ hui anˇ lawꞈ lawꞈ ve laiˉ ceuˬ te chehˇ ve yoˬ. Yawˇ hui hko chi ve hkʼaw caˉ leh chehˇ kʼai tuˬ dawˇ teh taˍ leh oˇ kaˬ lo maˇ tawˆ˗e tuˬ kaꞈ dawˇ teh taˍ ve yoˬ. Chi hkʼoˆ kaꞈ, hko chi ve hkʼaw awˬ nu ve chaw kaꞈ yawˇ hui geh teˇ geh chehˇ la tuˬ, te gʼa ve hkʼe yawˇ hui awˬ nu ve chaw htaꞈ jehˬ piˇ ve yoˬ. Hko chi ve aˬ htoꞈ ma htaꞈ kʼoˆ gaˇ ve le? Co ha hpawˇ ve hko htaꞈ kʼoˆ gaˇ ve yoˬ! a
2. Co ha hpawˇ ve hko anˇ tuˬ hkʼaˬ hkʼe cawˬ ve le?
2 Saˍtanˍ ve miˬ guiˬ hkʼoˆ lo nyi bawˬ daꞈ ve, haiˬ jaˇ ve, leh kawˆ tuˬ cawˬ jaˇ ve htawˇ, Yaˬhoˉvaˬ anˇ tuˬ uiˍ jaˇ ve awˬ ceuˬ te ve lehˬ, yawˇ ve chaw teˇ moˍ tiˉ hpehꞈ leh dawˇ sha gawˬ lehˍ ve cawˬ tuˬ te ve yoˬ. (1 Yoˇhanˬ 5:19; Hpeuꞈ maˍ ve 12:12) Saˍtanˍ ve miˬ guiˬ hkʼoˆ lo luˬ ve awˬ ceuˬ ngaˬ hui htaꞈ hkʼaˬ hkʼe taw heuˆ la kuiˬ cawˬ ve Yaˬhoˉvaˬ mawˬ ve pa taw, ngaˬ hui yawˇ ve kanˉ ha lehˬ ha kʼa ve hkʼaw te gʼa tuˬ ngaˬ hui htaꞈ ga laˇ tuˬ yoˬ tehꞈ yonˍ gʼa ve yoˬ. Liꞈ hpu hkʼaw co ha hpawˇ ve hko htaꞈ kʼoˆ taˍ ve, oˇ kaˬ lo chehˇ taˍ ve chaw lehˬ ‘haꞈ shaˉ piˇ ve’ htaꞈ gʼa leh “iˉ kaˆ hkʼa biˇ cawˬ ve hko leh, teˇ pawˆ kaꞈ maˇ fiˍ kʼai puiˉ ve” hkʼe hpehꞈ ve yoˬ. (Iˉsaˍyaˆ 4:6; 58:11) Co ha hpawˇ ve hko hkʼaw chehˇ ve chaw htaꞈ Yaˬhoˉvaˬ awˬ bon naꞈ piˇ ve lehˬ, ha lehˬ ve cawˬ tcuh leh awˬ leh meuˇ ve awˬ yanˇ tuꞈ ve hkanˍ ve gʼa hpuˇ ve htawˇ, haꞈ shaˉ laˇ ve htaꞈ gʼa ve tehꞈ dawˇ ve yoˬ.—Iˉsaˍyaˆ 54:14; 2 Tiˆmoˉseˍ 3:1.
3. Iˉsaˍyaˆ liꞈ kaˇ nanˉ uiˍ 65 hkʼaw tcuh kaˍ paˍ ve tawˇ hkawˇ oˇ htaˇ teˇ co˗e awˬ tehˬ hkʼaˬ hkʼe hpehꞈ la ve le?
3 Yaˬhoˉvaˬ tcuh kaˍ paˍ Iˉsaˍyaˆ htaꞈ bvuhꞈ tcuh ve, co ha hpawˇ ve hko hkʼaw chehˇ ve chaw a shaꞈ teꞈ hkʼaˇ hkʼaˬ hkʼe hpehꞈ tuˬ ve htaꞈ dawˇ nyi sheˍ. Awˬ lawn chi htaꞈ caˉ daꞈ ve, Iˉsaˍyaˆ liꞈ kaˇ nanˉ uiˍ 65 hkʼaw nawˬ gʼaw nyi gʼa ve yoˬ. Tcuh kaˍ paˍ Iˉsaˍyaˆ ve tawˇ hkawˇ chi, awˬ tehˬ hpehꞈ la ve awˉ lawˉ teˇ pawˆ lehˬ 537 hkʼawꞈ B.C.E htaˇ hpehꞈ ve yoˬ. Oˇ ve teˇ yanˇ Yuˇdaꞈ chaw Baˍbuˍlonˍ mvuhˇ miˬ lo shu ceˬ te chehˇ ve hpehˇ piˇ ve htaꞈ gʼa ve yoˬ. Leh Yeˍruˆsaˍlehnˍ venˇ lo kʼawꞈ la ve yoˬ. Yaˬhoˉvaˬ Yuˇdaꞈ chaw chi teˇ hpaˍ htaꞈ awˬ bon naꞈ piˇ leh Yeˍruˆsaˍlehnˍ venˇ teˇ pawˆ kʼawꞈ gu te tuˬ ga piˇ ve yoˬ. Iˉsaˍreˍlaˆ chaw awˬ tehˬ oˉ kʼoˍ pui kuiˬ bon yehˬ lonˉ kʼawꞈ gu te tuˬ kaꞈ ga piˇ ve yoˬ.—Iˉsaˍyaˆ 51:11; Zaˍhkaˍriˆ 8:3.
4. Iˉsaˍyaˆ liꞈ kaˇ nanˉ uiˍ 65 hkʼaw tcuh kaˍ paˍ ve tawˇ hkawˇ chi beuꞈ teˇ co˗e awˬ tehˬ hkʼaˬ hkʼe hpehꞈ la ve le?
4 Yaˬhoˉvaˬ ve chaw Baˍbuˍlonˍ mvuhˇ miˬ lo awˬ ceˬ te ve hpehˇ piˇ htaˇ, Iˉsaˍyaˆ liꞈ hkʼaw tcuh kaˍ paˍ ve tawˇ hkawˇ 2 pawˆ teˇ pawˆ biˇ la ve lehˬ, 1919 hkʼawꞈ C.E htaˇ hpehꞈ ve yoˬ. Oˇ htaˇ tanˬ leh co ha hpawˇ ve hko miˬ guiˬ hkʼoˆ teˇ kaˬ le le lo zuhˇ kʼai ve yoˬ. Ha lehˬ ha kʼa Gʼuiˬ sha ve mvuhˇ miˬ daꞈ ve awˬ lawn sha tanˇ hto toˇ leh laiˉ kaˬ lo Hkriꞈ yaˇ awˬ moˍ teh ve yoˬ. Chaw chi hkʼaw ve teˇ hpaˍ lehˬ, oˇ htaˇ haiˬ ve awˬ ceuˬ htaꞈ te leh daꞈ ve awˬ liˇ awˬ hkʼaˇ htaꞈ kaꞈ maˇ te ve yoˬ. Yaꞈ hkʼaˇ, yawˇ hui a shu yawˇ ve te hkʼaˇ dawˇ hkʼaˇ pa ve lehˬ, “Gʼuiˬ sha hpanˍ taˍ ve nyi ma awˬ suhˉ htaꞈ veuꞈ deh” ve yoˬ. (Eˇfeˇsuꞈ 4:24) Iˉsaˍyaˆ kʼoˆ taˍ ve daꞈ ve laiˉ ceuˬ co ha hpawˇ ve hko hkʼaw awˬ tehˬ hpehꞈ la ve yoˬ. Chi hkʼe hpehꞈ ve htawˇ, chi teˇ hkui kaꞈ co ha hpawˇ ve hko hkʼaw chehˇ ve ngaˬ hui awˬ bon laiˉ ceuˬ gʼa ve yoˬ. Hko chi ve ngaˬ hui awˬ bon gʼa tuˬ aˬ htoꞈ ma te laˇ ve, leh aˬ htoꞈ ma te ngaˬ hui hko chi ve hkʼaw maˇ tawˆ˗e tuˬ teˇ geh henˇ tuˬ yoˬ.
CO HA HPAWˇ VE HKO HKʼAW CHEHˇ VE CHAW Aˬ HTOꞈ MA AWˬ BON GʼA VE LE?
5. Iˉsaˍyaˆ liꞈ 65:13 hkʼaw kʼoˆ taˍ ve hkʼe, ngaˬ hui co ha hpawˇ ve hko hkʼaw chehˇ htaˇ aˬ htoꞈ ma awˬ bon gʼa ve le?
5 Hkʼa dehꞈ haꞈ shaˉ laˇ ve htaꞈ gʼa leh nyi ma sha jaˇ ve. Co ha hpawˇ ve hko hkʼaw chehˇ ve chaw leh maˇ chehˇ ve chaw hkʼaˬ hkʼe taw peun daꞈ ve, Iˉsaˍyaˆ lehˬ ngaˬ hui awˬ han dawˇ mawˬ tuˬ te laˇ ve yoˬ. (Iˉsaˍyaˆ 65:13 gʼaw sheˍ.) Yaˬhoˉvaˬ lehˬ co ha hpawˇ ve hko hkʼaw chehˇ ve yawˇ ve chaw htaꞈ hkʼa dehꞈ nyi haꞈ shaˉ piˇ ve yoˬ. Tawˇ pa haˉ te kʼo, ngaˬ hui Gʼuiˬ sha geh daꞈ kehˬ ve awˬ ha hpu gʼa ve, Liꞈ hpu cawˬ ve, Liꞈ hpu hkʼaw yuˬ laˬ taˍ ve liꞈ kʼoˆ teˇ hpaˍ kaꞈ cawˬ ve pa taw, ‘caˇ tuˬ dawˬ tuˬ hkʼa biˇ cawˬ leh gʼa ha lehˬ chehˇ ve yoˬ.’ (Hpeuꞈ maˍ ve 22:17 htaꞈ tehˆ daꞈ sheˍ.) Co ha hpawˇ ve hko hkʼaw maˇ chehˇ ve chaw htaꞈ peun daꞈ jaˇ ve yoˬ. Yawˇ hui Yaˬhoˉvaˬ htaꞈ maˇ shiˍ ve pa taw ‘gʼa meuꞈ gʼa kaˆ leh gʼa yaꞈ taw tuˬ yoˬ.’—Aˍmoˆ 8:11.
6. Yawˇlaˆ liꞈ 2:21-24 hkʼaw Yaˬhoˉvaˬ ngaˬ hui htaꞈ peꞈ laˇ ve daꞈ ve awˬ ceuˬ aˬ htoꞈ ma htaꞈ kʼoˆ taˍ ve le? Leh awˬ ceuˬ chi ve teˇ hpaˍ ngaˬ hui awˬ pon awˬ bon hkʼaˬ hkʼe cawˬ ve le?
6 Yawˇlaˆ ve tcuh kaˍ paˍ tawˇ hkawˇ hkʼaw caˇ tuˬ teˇ hpaˍ htaꞈ kʼoˆ taˍ ve yoˬ. Tawˇ pa haˉ te kʼo, Yaˬhoˉvaˬ yawˇ ve chaw htaꞈ loˍ ve awˬ ceuˬ peꞈ laˇ ve tehꞈ hpeuꞈ maw laˇ tuˬ, awˍ, a pehˉ meuˇ gʼuiˬ, leh shaˍ lonˍ chu cawˬ tcuh laˇ ve yoˬ. Yonˍ hkʼaˇ hpawˇ yonˍ yeˬ tuˬ cuˇ yiˍ kaꞈ peꞈ laˇ ve yoˬ. (Yawˇlaˆ 2:21-24) Chi beuꞈ teˇ co˗e Yaˬhoˉvaˬ ngaˬ hui htaꞈ Liꞈ hpu, liꞈ kʼoˆ, leh maˍ laˇ ve awˬ ceuˬ teˇ hpaˍ, vehˆsaiˉ jw.org, Hkriꞈ yaˇ awˬ moˍ hkʼaw hpawnˬ daꞈ ve, leh hpawnˬ daꞈ lonˉ teˇ hpaˍ, chi ve teˇ hpaˍ hkʼaw ngaˬ hui awˬ bon gʼa ve pa taw, chi beuꞈ teˇ co˗e hkʼa dehꞈ nyi haꞈ shaˉ laˇ ve htaꞈ gʼa leh nyi ma sha ve yoˬ.
7. Ngaˬ hui “ha lehˬ ha kʼa” cawˬ tuˬ aˬ htoꞈ ma te laˇ ve le? (Iˉsaˍyaˆ 65:14)
7 Ha lehˬ ve cawˬ leh nyi hkʼaˇ suh jaˇ ve. Yaˬhoˉvaˬ ve chaw lehˬ yawˇ hui yawˇ htaꞈ awˬ bon uiˍ jaˇ tehꞈ kʼoˆ piˇ ve pa taw, “yawˇ hui ha lehˬ ha kʼa ve awˬ hkʼaw lo, kʼa muiˬ hkawˇ” kʼa ve yoˬ. (Iˉsaˍyaˆ 65:14 gʼaw sheˍ.) Ngaˬ hui awˬ tehˬ ve htaꞈ gʼa shiˍ leh Liꞈ hpu hkʼaw awˬ gʼaˇ peꞈ laˇ ve ka tiꞈ htaꞈ gʼa mawˬ htaˇ, Yeˍsuˆ htaiˍ hkʼawꞈ laˇ ve pa taw, ngaˬ hui dawˇ law kuiˬ cawˬ gʼa ve htaꞈ yonˍ gʼa ve yoˬ. Awˬ lawn chi ve teˇ hpaˍ ngaˬ hui awˬ viˉ awˬ nyi geh yaw daꞈ htaˇ, “ha lehˬ ha kʼa” cawˬ ve yoˬ.—Chiˇ mvuh ve 34:8; 133:1-3.
8. Co ha hpawˇ ve hko hkʼaw cawˬ ve daꞈ jaˇ ve 2 ceuˬ lehˬ aˬ htoꞈ ma le?
8 Co ha hpawˇ ve hko daꞈ jaˇ ve 2 ceuˬ cawˬ ve lehˬ, Yaˬhoˉvaˬ ve kanˉ te ve chaw haꞈ daꞈ ve leh teˇ moˍ tiˉ hpehꞈ ve yoˬ. Teˇ moˍ tiˉ hpehꞈ ve chi lehˬ, miˬ guiˬ awˬ suhˉ awˬ hkʼaw lo ngaˬ hui ve a shaꞈ teꞈ hkʼaˇ hkʼaˬ hkʼe hpehꞈ tuˬ dawˇ mawˬ tuˬ te laˇ ve yoˬ. Chi teˇ hkui aꞈ kehˉ oˇ ve teˇ yanˇ gaˬ kʼo, Yaˬhoˉvaˬ ve kanˉ te ve chaw gʼaˇ hteꞈ haꞈ daꞈ leh teˇ moˍ tiˉ hpehꞈ tuˬ yoˬ. (Kawˇlawˇsehˇ 3:14) Awˬ viˉ awˬ nyi yaˇ miˇ teˇ gʼaˇ yawˇ Yaˬhoˉvaˬ ve Shaˉhkiˆhkanˍ ve chaw htaꞈ awˉ lawˉ teˇ pawˆ mawˬ daꞈ htaˇ ve awˬ lawn kʼoˆ maˍ laˇ ve yoˬ. Yawˇ kʼoˆ ve, “ngaˬ ve yehˬ kʼa hkʼaw ha lehˬ ve maˇ cawˬ ve pa taw, oˇ ve teˇ yanˇ ha lehˬ ve hkʼaˬ hkʼe hpehꞈ ve ngaˬ maˇ shiˍ. Yaꞈ hkʼaˇ, Shaˉhkiˆhkanˍ ve chaw haꞈ daꞈ ve htaꞈ ngaˬ awˉ lawˉ teˇ pawˆ gʼa mawˬ htaˇ, awˬ tehˬ haꞈ daꞈ ve hkʼaˬ hkʼe hpehꞈ ve htaꞈ ngaˬ shiˍ la ve yoˬ.” A shu kaꞈ maˇ kʼoˆ, ha lehˬ ve leh nyi hkʼaˇ suh ve cawˬ gaˇ ve kʼo, co ha hpawˇ ve hko hkʼaw gʼa chehˇ la cawˇ ve yoˬ. Miˬ guiˬ hkʼoˆ lo ve chaw yaˇ Yaˬhoˉvaˬ ve kanˉ te ve chaw htaꞈ hkʼaˬ hkʼe dawˇ ve htawˇ maˇ kʼoˆ, yawˇ hui lehˬ Yaˬhoˉvaˬ awˬ pon leh awˬ viˉ awˬ nyi awˬ pon kaꞈ daꞈ ve awˬ meh cawˬ ve yoˬ.—Iˉsaˍyaˆ 65:15.
9. Iˉsaˍyaˆ liꞈ 65:16, 17 hkʼaw ngaˬ hui a shaꞈ teꞈ kuiˬ lo tuꞈ ve hkanˍ ve htaꞈ caˉ daꞈ ve hkʼaˬ hkʼe kʼoˆ taˍ ve le?
9 Nyi ma sha ve leh dawˇ sha gawˬ lehˍ ve cawˬ ve. Iˉsaˍyaˆ liꞈ 65:14 hkʼaw kʼoˆ ve, co ha hpawˇ ve hko hkʼaw maˇ chehˇ tuˬ leuˆ yuˬ ve chaw lehˬ “nyi ma luˬ jaˇ leh gʼa hawˬ tuˬ yoˬ.” Yaꞈ hkʼaˇ, chi teˇ hkui Gʼuiˬ sha ve kanˉ te ve chaw nyi ma luˬ leh dawˇ haˍ ve awˬ ceuˬ chi teˇ hpaˍ hkʼaˬ hkʼe hpehꞈ tuˬ le? Liꞈ hpu hkʼaw kʼoˆ ve, “peuˬ taˉ ve awˬ yanˇ awˬ hkʼaw lo ve dawˇ haˍ tuˬ teˇ hpaˍ mehˉ kʼai tuˬ yoˬ, tehꞈ Gʼuiˬ sha kʼoˆ ve yoˬ.” (Iˉsaˍyaˆ 65:16, 17 gʼaw sheˍ.) Ngaˬ hui gʼa hpuˇ chehˇ ve shoꞈ shaꞈ ve hkʼa peu˗eˬ htaꞈ Yaˬhoˉvaˬ te mehˉ leh ngaˬ hui nyi ma luˬ tuˬ te laˇ ve awˬ ceuˬ htaꞈ kʼawꞈ dawˇ nawˇ tuˬ ve maˇ heˆ.
10. Aˬ htoꞈ ma te nawˬ awˬ viˉ awˬ nyi geh teˇ geh gʼa chehˇ ve lehˬ daꞈ jaˇ ve awˬ bon gʼa ve htaꞈ shuˍ ve le? (Awˬ han htaꞈ nyi sheˍ.)
10 Chi teˇ hkui ngaˬ hui Saˍtanˍ ve miˬ guiˬ hkʼoˆ chehˇ ve htawˇ, awˬ viˉ awˬ nyi geh teˇ geh gʼa hpawnˬ daꞈ ve, nyi ma sha jaˇ leh dawˇ haˍ dawˇ hkiˉ ve maˇ cawˬ maˇ ve yoˬ. Gʼuiˬ sha ve awˬ ha hpu ve awˬ shiˍ nawꞈ ve lehˬ, haꞈ pehnˇ ve, ha lehˬ ve, dawˇ sha ve, ha kʼaˉ puiˉ ve, leh nyi ma nuˇ nehˬ ve, chi ve teˇ hpaˍ ngaˬ hui hpeuꞈ maw piˇ htaˇ, awˬ viˉ awˬ nyi htaꞈ nyi ma sha tuˬ ngaˬ hui te piˇ chehˇ ve yoˬ. (Gaˍlaˍtiˆ 5:22, 23) Yaˬhoˉvaˬ ve kanˉ hkʼaˇ hkʼaw ngaˬ hui gʼa chehˇ ve chi lehˬ daꞈ jaˇ ve awˬ bon gʼa ve yoˬ. Gʼuiˬ sha “miˬ guiˬ awˬ suhˉ leh mvuhˇ naw ma awˬ suhˉ htaꞈ kʼawꞈ te hpanˍ” htaˇ, co ha hpawˇ ve hko hkʼaw chehˇ ve chaw lehˬ, Gʼuiˬ sha ka tiꞈ te taˍ laˇ ve chi htaꞈ gʼa mawˬ tuˬ yoˬ.
Haꞈ ve awˬ viˉ awˬ nyi geh teˇ geh co ha hpawˇ ve hko hkʼaw gʼa chehˇ ve ha lehˬ jaˇ (Awˬ tawn 10 nyi sheˍ) c
11. Iˉsaˍyaˆ liꞈ 65:18, 19 hkʼaw kʼoˆ taˍ ve hkʼe, co ha hpawˇ ve hko Yaˬhoˉvaˬ hpanˍ taˍ ve ngaˬ hui hkʼaˬ hkʼe dawˇ tuˬ te laˇ ve le?
11 Ha lehˬ jaˇ leh awˬ hpfuhˇ shiˍ ve. Iˉsaˍyaˆ kʼawꞈ kʼoˆ sheˍ ve, co ha hpawˇ ve hko hkʼaw gʼa chehˇ leh ‘ha lehˬ chehˇ cawˇ ve yoˬ.’ Awˬ lawn kʼo, co ha hpawˇ ve hko lehˬ Yaˬhoˉvaˬ hpanˍ taˍ ve awˬ ceuˬ hpehꞈ ve yoˬ. (Iˉsaˍyaˆ 65:18, 19 gʼaw sheˍ.) Miˬ guiˬ hkʼoˆ lo ve kanˉ hkʼaˇ teˇ hpaˍ Yaˬhoˉvaˬ htaꞈ caˉ daꞈ ve awˬ tehˬ ve maˇ maˍ ve pa taw, ngaˬ hui yawˇ hui htaꞈ ga piˇ cawˇ ve yoˬ. Leh yawˇ hui co ha hpawˇ ve hko daꞈ jaˇ ve hkʼaw chehˇ la tuˬ ngaˬ hui ga piˇ cawˇ ve yoˬ. Awˬ tehˬ ve htaꞈ shiˍ ve lehˬ ngaˬ hui awˬ bon maˇ maˇ gʼa ve pa taw, ha lehˬ jaˇ ve awˬ lawn chi ve awˬ nu ve chaw htaꞈ kʼoˆ piˇ gaˇ ve yoˬ.—Yeˍraˍmiˆ 31:12.
12. Iˉsaˍyaˆ liꞈ 65:20-24 hkʼaw ka tiꞈ te taˍ laˇ ve nawˬ hkʼaˬ hkʼe dawˇ tuˬ te laˇ ve le? Leh aˬ htoꞈ ma pa taw le?
12 Chi hkʼoˆ kaꞈ, ngaˬ hui co ha hpawˇ ve hko hkʼaw gʼa chehˇ ve pa taw, ngaˬ hui ve dawˇ law kuiˬ htaꞈ ha lehˬ jaˇ leh awˬ hpfuhˇ shiˍ ve yoˬ. Miˬ guiˬ awˬ suhˉ hkʼaw ngaˬ hui aˬ htoꞈ ma htaꞈ gʼa mawˬ leh aˬ htoꞈ ma htaꞈ te tuˬ dawˇ nyi sheˍ. Liꞈ hpu hkʼaw ka tiꞈ te taˍ laˇ ve, “yaˇ ehˉ teˇ gʼaˇ kaꞈ suh˗e tuˬ ve maˇ heˆ. Chaw teˇ gʼaˇ le le mawˇ la htaˇ hkʼa gaˬ a shaꞈ gʼa teꞈ chehˇ tuˬ yoˬ.” Ngaˬ hui “a shu yawˇ ve yehˬ htaꞈ te chehˇ leh a shu yawˇ ve a pehˉ meuˇ hko te caˇ tuˬ yoˬ.” Ngaˬ hui ‘te ve kanˉ teˇ ceuˬ le le uiˍ la daꞈ la leh Yaˬhoˉvaˬ awˬ bon naꞈ laˇ tuˬ yoˬ.’ Ngaˬ hui a shaꞈ teꞈ kuiˬ hkʼaw ha lehˬ jaˇ ve, kawˆ tuˬ maˇ cawˬ ve, leh dawˇ law kuiˬ cawˬ tuˬ Yaˬhoˉvaˬ ka tiꞈ te taˍ laˇ ve yoˬ. Ngaˬ hui teˇ gʼaˇ le le loˍ ve awˬ ceuˬ aˬ htoꞈ ma cawˬ cawˇ ve Yaˬhoˉvaˬ shiˍ leh, ‘yawˇ hui ngaˬ geh maˇ lawˬ sheˍ htaˇ kaꞈ yawˇ hui ve bon lawˬ hkawˇ htaꞈ ngaˬ hkʼawꞈ piˇ tuˬ yoˬ.’ Leh “yawˇ hui nyi hkʼaˇ suh htaˇ hkʼa gaˬ” Gʼuiˬ sha piˇ tuˬ yoˬ.—Iˉsaˍyaˆ 65:20-24; Chiˇ mvuh ve 145:16.
13. Iˉsaˍyaˆ liꞈ 65:25 hkʼaw te hkʼaˇ dawˇ hkʼaˇ pa leh Yaˬhoˉvaˬ ve kanˉ te la ve chaw htaꞈ hkʼaˬ hkʼe kʼoˆ taˍ ve le?
13 Dawˇ sha gawˬ lehˍ ve leh kawˆ tuˬ maˇ cawˬ ve. Daꞈ kehˬ ve awˬ ha hpu chaw laiˉ gʼaˇ htaꞈ ga piˇ leh to nuˇ to shaˆ hkʼa shuˍ haiˬ jaˇ ve htawˇ pa gʼa ve yoˬ. (Iˉsaˍyaˆ 65:25 gʼaw sheˍ.) Yawˇ hui te hkʼaˇ dawˇ hkʼaˇ maˇ daꞈ ve htaꞈ baˬ taˉ gʼa ve yoˬ. (Roˉmaꞈ 12:2; Eˇfeˇsuꞈ 4:22-24) Gʼuiˬ sha ve chaw maˇ biˇ ve chaw hpehꞈ ve pa taw te yaꞈ sheˍ ve yoˬ. Yaꞈ hkʼaˇ, Yaˬhoˉvaˬ lehˬ yawˇ htaꞈ haꞈ ve “chaw hkʼa peu˗eˬ” htaꞈ shaw hpoˆ leh teˇ geh chehˇ tcuh ve yoˬ. Awˬ bon gʼa ve lehˬ, ngaˬ hui dawˇ sha gawˬ lehˍ ve cawˬ leh teˇ moˍ tiˉ hpehꞈ ve yoˬ. (Tiˇtuˆ 2:11) Kanˇ paˆ uiˍ jaˇ ve Gʼuiˬ sha teˇ gʼaˇ ceh tiˉ chi hkʼe te gʼa ve anˇ tuˬ uiˍ jaˇ ve yoˬ!
14. Iˉsaˍyaˆ liꞈ 65:25 hkʼaw awˬ viˉ awˬ nyi hawˉ hkʼaˆ teˇ gʼaˇ htaꞈ hkʼaˬ hkʼe hpehꞈ la ve le?
14 Chaw yaˇ a shu yawˇ ve te hkʼaˇ dawˇ hkʼaˇ awˬ tehˬ pa gʼa ve laˇ? Yaˇ nehˬ hawˉ hkʼaˆ teˇ gʼaˇ aˬ laˬ hkʼe 20 hkʼawꞈ ve, htawnˍ hkʼaw lo laiˉ pawˆ tawˆ la ve awˬ lawn htaꞈ teˇ geh nyi sheˍ. Yawˇ pehꞈ ve tzuhˆ ve awˬ ceuˬ htaꞈ te leh haiˬ ve awˬ ceuˬ htaꞈ kaꞈ te ve yoˬ. Yawˇ shu ve kaˇ hkʼawˇ ve, mawˇ hkʼawˇ ve, leh haiˬ ve awˬ ceuˬ laiˉ ceuˬ te ve pa taw, yawˇ htawnˍ hkʼaw lo gʼa chehˇ ve yoˬ. Yawˇ teˇ gʼaˇ le le geh shoꞈ shaꞈ ve awˬ lawn cawˬ daꞈ gʼa ve yoˬ. Yawˇ Liꞈ hpu hkʼaw awˬ tehˬ ve htaꞈ awˉ lawˉ teˇ pawˆ gʼa henˇ leh Yaˬhoˉvaˬ ve Shaˉhkiˆhkanˍ ve chaw geh awˉ lawˉ teˇ pawˆ hpawnˬ daꞈ˗e htaˇ, yawˇ a shaꞈ teꞈ kuiˬ hkʼaw awˬ tehˬ awˬ na ve dawˇ law kuiˬ ca mawˬ ve tehꞈ yonˍ gʼa ve yoˬ. Chi ve lehˬ co ha hpawˇ ve hko hkʼaw Yaˬhoˉvaˬ htaꞈ oˉ kʼoˍ pui la ve yoˬ. Yawˇ Baˆtiˆsaˬ haꞈ yuˬ leh Yaˬhoˉvaˬ ve Shaˉhkiˆhkanˍ ve chaw hpehꞈ peuˬ hkʼawꞈ nawˉ, Iˉsaˍyaˆ liꞈ 65:25 hkʼaw yawˇ ve a shaꞈ teꞈ hkʼaˇ htaꞈ hawˍ daꞈ jaˇ tehꞈ teˇ hkui teˇ hkui dawˇ nyi ve yoˬ. Yawˇ haiˬ jaˇ ve awˬ ceuˬ htaꞈ te leh laˇ caˬ shiˉ hkʼe hpehꞈ ve htawˇ pa gʼa ve yoˬ. Yawˬ ehˉ hkʼa shuˍ gawˬ lehˍ chehˇ ve htaꞈ dawˇ cawˇ la ve yoˬ.
15. Aˬ htoꞈ ma te ngaˬ hui awˬ nu ve chaw co ha hpawˇ ve hko hkʼaw chehˇ la tuˬ jehˬ piˇ gaˇ ve le? Leh chi ve ngaˬ hui hkʼaˬ hkʼe te gʼa tuˬ le?
15 Iˉsaˍyaˆ liꞈ 65:13 awˉ lawˉ teˇ tawn hkʼaw kʼoˆ ve, “ngaˬ nawˬ hui htaꞈ chi hkʼe kʼoˆ laˇ ve yoˬ.” Leh ehˉ 25 awˬ leh meuˇ teˇ tawn hkʼaw kʼoˆ ve, ‘Gʼuiˬ sha chi hkʼe kʼoˆ taˍ ve yoˬ.’ Yawˇ ve tawˇ hkawˇ lehˬ hkʼaˬ htaˆ kaꞈ awˬ tehˬ cawˇ ve yoˬ. (Iˉsaˍyaˆ 55:10, 11) Chi beuꞈ teˇ co˗e co ha hpawˇ ve hko awˬ tehˬ cawˬ˗oˬ ve yoˬ. Yaˬhoˉvaˬ yawˇ htaꞈ oˉ kʼoˍ pui ve yehˬ kʼa cawˬ tcuh ve daꞈ jaˇ ve yoˬ. Miˬ guiˬ chi hkʼoˆ lo haiˬ jaˇ ve awˬ ceuˬ te daꞈ ve hkʼaw ngaˬ hui chehˇ ve htawˇ, yehˬ kʼa chi hkʼe ve hkʼaw ngaˬ hui gʼa chehˇ ve ha lehˬ jaˇ leh kawˆ tuˬ maˇ cawˬ ve tehꞈ dawˇ ve yoˬ. (Chiˇ mvuh ve 72:7) Awˬ nu ve chaw kaꞈ yehˬ kʼa chi hkʼe ve hkʼaw chehˇ la tuˬ ngaˬ hui ga gʼa ve hkʼe ga piˇ gaˇ ve yoˬ. Chi hkʼe ve yehˬ kʼa hkʼaw chehˇ la leh awˬ laꞈ gʼawˇ hpehꞈ la tuˬ ngaˬ hui coˇ caˇ leh te chehˇ ve yoˬ.—Maꞈhtehˍ 28:19, 20.
CO HA HPAWˇ VE HKO HKʼAW CHEHˇ LA TUˬ AWˬ NU VE CHAW HTAꞈ GA PIˇ VE AWˬ HKʼAˇ
16. Awˬ nu ve chaw co ha hpawˇ ve hko hkʼaw chehˇ la gaˇ tuˬ aˬ htoꞈ ma te piˇ ve le?
16 Ngaˬ hui teˇ gʼaˇ leh teˇ gʼaˇ awˬ nu ve chaw co ha hpawˇ ve hko hkʼaw chehˇ la tcuh gaˇ ve pa taw, teˇ ceuˬ ceuˬ te ve yoˬ. Teˇ ceuˬ lehˬ, Yaˬhoˉvaˬ htaꞈ henˇ yuˬ ve yoˬ. Yaˬhoˉvaˬ lehˬ awˬ nu ve chaw yawˇ ve kanˉ hkʼaˇ hkʼaw chehˇ la tuˬ maˇ nyiˉ piˇ. Yaꞈ hkʼaˇ, yawˇ hui yawˇ geh nuˇ nehˬ ve hkʼaw laˬ tuˬ “gʼawˬ veu” laˇ ve yoˬ. (Yoˇhanˬ 6:44; Yeˍraˍmiˆ 31:3) Nyi ma nuˇ nehˬ ve chaw Yaˬhoˉvaˬ htaꞈ caˉ daꞈ ve haꞈ pehnˇ ve leh daꞈ jaˇ ve te hkʼaˇ dawˇ hkʼaˇ gʼa henˇ htaˇ, yawˇ hui a shu yawˇ hkʼaˇ yawˇ Yaˬhoˉvaˬ geh jiˆ laˬ gaˇ ve yoˬ. Hkʼe kʼo, ngaˬ hui awˬ nu ve chaw co ha hpawˇ ve hko hkʼaw chehˇ la tuˬ hkʼaˬ hkʼe ga piˇ gʼa ve le?
17. Awˬ nu ve chaw co ha hpawˇ ve hko hkʼaw chehˇ la tuˬ ngaˬ hui hkʼaˬ hkʼe ga piˇ gʼa ve le?
17 Awˬ nu ve chaw co ha hpawˇ ve hko hkʼaw chehˇ la tuˬ ga piˇ gʼa ve awˬ hkʼaˇ lehˬ, awˬ viˉ awˬ nyi teˇ gʼaˇ leh teˇ gʼaˇ haꞈ daꞈ leh yawˆ yan daꞈ ve tehꞈ hpeuꞈ maw piˇ ve yoˬ. Ngaˬ hui geh awˬ nu ve chaw hpawnˬ daꞈ la gehˇ sheˍ htaˇ, oˇ htaˇ teˇ co˗e Kawˇrenˍhtuˆ venˇ hkʼaw hpawnˬ daꞈ kuiˬ lo laˬ ve chaw hkʼa shuˍ, ngaˬ hui kaꞈ yawˇ hui htaꞈ chi hkʼe dawˇ tcuh gaˇ ve yoˬ. Chaw oˇ ve teˇ hpaˍ kʼoˆ ve, “Gʼuiˬ sha nawˬ hui geh awˬ tehˬ awˬ na chehˇ ve yoˬ.” (1 Kawˇrenˍhtuˆ 14:24, 25; Zaˍhkaˍriˆ 8:23) Chi htaꞈ pa taw, “teˇ gʼaˇ leh teˇ gʼaˇ cawˇ daꞈ hui daꞈ chehˇ˗oˆ” tehꞈ beˆ maˍ laˇ ve htaꞈ ngaˬ hui gʼaꞈ te cawˇ ve yoˬ.—1 Hteˇsaˍlawˇniˆ 5:13.
18. Awˬ nu ve chaw Gʼuiˬ sha ve kanˉ hkʼaˇ hkʼaw chehˇ la gaˇ tuˬ aˬ htoꞈ ma te piˇ ve le?
18 Ngaˬ hui awˬ viˉ awˬ nyi htaꞈ Yaˬhoˉvaˬ nyi ve hkʼe nyi cawˇ ve yoˬ. Chi hkʼe te gʼa tuˬ yawˇ hui htaꞈ daꞈ ve hpawˇ nyi ve yoˬ. Maˇ maw ve awˬ yanˇ maˇ biˇ ve awˬ ceuˬ mehˉ kʼai tuˬ ve pa taw, yawˇ hui maˇ biˇ ve htaꞈ ngaˬ hui maˇ nyi. Ngaˬ hui awˬ viˉ awˬ nyi geh maˇ na gʼa daꞈ ve awˬ lawn cawˬ htaˇ, ngaˬ hui haꞈ pehnˇ ve tehꞈ hpeuꞈ maw piˇ ve lehˬ, ‘teˇ gʼaˇ leh teˇ gʼaˇ haꞈ daꞈ ve, teˇ gʼaˇ leh teˇ gʼaˇ ha kʼaˉ daꞈ ve, leh teˇ gʼaˇ leh teˇ gʼaˇ venˇ baˆ hpehˇ daꞈ ve yoˬ.’ (Eˇfeˇsuꞈ 4:32) Ngaˬ hui chi hkʼe te ve kʼo, gʼa kaˇ ve chaw lehˬ co ha hpawˇ ve hko hkʼaw chehˇ la gaˇ ve yoˬ. b
CO HA HPAWˇ VE HKO HKʼAW CAˉ LEH CHEHˇ SHEˍ
19. (a) Awˇ ceˍ awˇ fa hkʼaw kʼoˆ taˍ ve hkʼa shuˍ, “ Yawˇ hui tawˆ˗e leh kʼawꞈ kʼawꞈ la ve” chi ve lehˬ chaw teˇ hpaˍ co ha hpawˇ ve hko hkʼaw kʼawꞈ kʼawꞈ la ve aˬ htoꞈ ma kʼoˆ gaˇ ve le? (b) Ngaˬ hui caˉ leh aˬ htoꞈ ma te tuˬ dawˇ teh taˍ cawˇ ve le? (Awˬ han htaꞈ nyi sheˍ.)
19 Co ha hpawˇ ve hko htaꞈ ngaˬ hui awˬ hpfuhˇ shiˍ jaˇ ve yoˬ. Co ha hpawˇ ve hko chi lehˬ, oˇ htaˇ aꞈ kehˉ daꞈ jaˇ leh chehˇ la ve chaw kaꞈ gʼaˇ hteꞈ maˇ la ve yoˬ. Co ha hpawˇ ve hko Yaˬhoˉvaˬ ngaˬ hui awˬ pon hpanˍ taˍ laˇ ve htaꞈ awˬ hpfuhˇ shiˍ sheˍ. Nyi ma sha gaˇ ve, ha lehˬ ve, dawˇ sha gawˬ lehˍ ve, leh kawˆ ve maˇ cawˬ ve, chi hkʼe ve cawˬ gaˇ ve kʼo, co ha hpawˇ ve hko hkʼaw gʼa chehˇ la leh hko chi ve hkʼaw maˇ gʼa tawˆ˗e. Yaꞈ hkʼaˇ, ngaˬ hui shaˍ tiꞈ kaꞈ gʼa te ve yoˬ. Awˬ lawn kʼo, ngaˬ hui co ha hpawˇ ve hko hkʼaw tawˆ˗e tuˬ Saˍtanˍ coˇ caˇ leh gʼaˇ hteꞈ te laˇ chehˇ ve yoˬ. (1 Peˍtruˆ 5:8; Hpeuꞈ maˍ ve 12:9) Saˍtanˍ ngaˬ hui htaꞈ taˇ gʼaˇ tcuh. Chi htaꞈ pa taw, co ha hpawˇ ve hko daꞈ jaˇ ve, daꞈ kehˬ jaˇ ve, caˉ leh ha lehˬ ve cawˬ tuˬ coˇ caˇ leh haꞈ shaˉ sheˍ.
Co ha hpawˇ ve hko hkʼaw chehˇ ve chaw lehˬ miˬ guiˬ awˬ suhˉ hkʼaw awˬ tehˬ awˬ na gʼa chehˇ tuˬ awˬ hkʼaˇ cawˬ ve (Awˬ tawn 19 nyi sheˍ)
NAWˬ HKʼAˬ HKʼE HKʼAWꞈ TUˬ LE?
-
Co ha hpawˇ ve hko aˬ htoꞈ ma htaꞈ kʼoˆ gaˇ ve le?
-
Co ha hpawˇ ve hko hkʼaw awˬ bon gʼa ve htaꞈ ngaˬ hui aˬ htoꞈ ma te ha lehˬ ve le?
-
Awˬ nu ve chaw co ha hpawˇ ve hko hkʼaw chehˇ la tuˬ ngaˬ hui hkʼaˬ hkʼe ga piˇ gʼa tuˬ le?
KʼA MUIˬ HKAWˇ 144 Caˉ leh laꞈ shawnˍ chi nyi taˍ sheˍ!
a KʼAWꞈ KʼOˆ MAˍ TAˍ VE: “Co ha hpawˇ ve hko” kʼoˆ gaˇ ve lehˬ, Yaˬhoˉvaˬ htaꞈ oˉ kʼoˍ pui ve pa taw dawˇ sha gawˬ lehˍ ve cawˬ ve. Ngaˬ hui co ha hpawˇ ve hko hkʼaw gʼa chehˇ htaˇ, Yaˬhoˉvaˬ leh awˬ viˉ awˬ nyi geh gʼa meuˆ daꞈ ve ha lehˬ jaˇ.
b Chi teˇ hkui yawˇ hui hkʼaˬ hkʼe hpehꞈ ve VDO htaꞈ nyi sheˍ. A˗leh˗na Seˇne˗ko˗va: Ngaˬ ve zuhꞈ maˆ awˬ tehˬ hpehꞈ la ve vehˆsaiˉ jw.org hkʼaw nyi leh awˬ viˉ awˬ nyi A˗leh˗na co ha hpawˇ ve hko hkʼaw chehˇ la htaˇ aˬ htoꞈ ma awˬ bon gʼa ve htaꞈ kaꞈ nyi sheˍ.
c AWˬ HAN HTAꞈ KʼOˆ MAˍ TAˍ VE: Awˬ viˉ awˬ nyi laiˉ gʼaˇ hpawnˬ daꞈ kuiˬ yehˬ hkʼaw tawˇ gʼa yaw daꞈ ve ha lehˬ jaˇ ve. Yaꞈ hkʼaˇ, awˬ viˉ awˬ nyi hawˉ hkʼaˆ teˇ gʼaˇ yawˇ teˇ gʼaˇ tiˉ chehˇ taˍ ve.
