1. Awˬ viˉ awˬ nyi teˇ hpaˍ awˬ pon hto toˇ˗e htaˇ, hkʼaˬ hkʼe dawˇ ve le? (Awˬ han htaꞈ nyi sheˍ.)

 Ngaˬ hui Yaˬhoˉvaˬ ve kanˉ te ve chaw hpehꞈ ve yoˬ. Ngaˬ hui Yaˬhoˉvaˬ htaꞈ haꞈ leh awˬ nu ve chaw yawˇ htaꞈ shiˍ tcuh gaˇ ve pa taw, hto toˇ˗e ve yoˬ. Awˬ viˉ awˬ nyi laiˉ gʼaˇ teˇ yehˬ peuˬ teˇ yehˬ hto toˇ ve dawˇ cawˇ jaˇ. Yaꞈ hkʼaˇ, awˬ viˉ awˬ nyi teˇ hpaˍ awˬ pon kʼo, chi hkʼe te tuˬ haˍ jaˇ tehꞈ dawˇ ve yoˬ. Aˬ htoꞈ ma pa taw le? Awˬ lawn kʼo, chaw teˇ hpaˍ yaꞈ taw puiˉ leh hkʼa dehꞈ maˇ yonˍ gʼa ve yoˬ. Chaw teˇ hpaˍ kʼo, awˬ nu ve chaw aˉ hkʼaw lo kʼai tuˬ maˇ jehˬ laˇ ve kʼo, kʼai maˇ haˆ ve yoˬ. Chaw teˇ hpaˍ kʼo, awˬ nu ve chaw maˇ haꞈ yuˬ laˇ ve htaꞈ dawˇ hkiˉ ve yoˬ. Leh chaw teˇ hpaˍ kʼo, awˬ nu ve chaw htaꞈ nyi ma maˇ sha tuˬ taˇ te piˇ kʼoˆ ve gʼa henˇ jaw ve yoˬ hehˉ. Awˬ viˉ awˬ nyi Yaˬhoˉvaˬ htaꞈ haꞈ jaˇ ve htawˇ, maˇ mawˬ daꞈ jaw ve chaw htaꞈ daꞈ ve awˬ lawn sha tanˇ hto maˍ piˇ ve, yawˇ hui awˬ pon haˍ jaˇ tehꞈ dawˇ ve yoˬ. Chi hkʼe hpehꞈ ve htawˇ, awˬ viˉ awˬ nyi chi teˇ hpaˍ awˬ pon kanˉ chi ve a yeˇ hkʼaˬ hkʼe taw uiˍ ve htaꞈ shiˍ ve yoˬ. Hkʼe te leh, yawˇ hui hkʼaˬ htaˆ kaꞈ hto toˇ˗e ve yoˬ. Chi hkʼe te ve lehˬ, Yaˬhoˉvaˬ ha lehˬ jaˇ tuˬ te piˇ ve yoˬ.

2. Nawˬ Gʼuiˬ sha ve kanˉ te ve hkʼaw ha lehˬ ve maˇ cawˬ ve kʼo, aˬ htoꞈ ma te awˬ gʼaˇ maˇ nuˇ cawˇ ve le?

² Henˇ peuˬ˗oˬ ve hkʼa shuˍ, Gʼuiˬ sha ve kanˉ te ve nawˬ awˬ pon ha lehˬ ve hkʼa dehꞈ maˇ cawˬ ve tehꞈ dawˇ˗aw laˇ? Dawˇ ve kʼo, awˬ gʼaˇ taˇ nuˇ sheˍ. Nawˬ nyi ma nuˇ nehˬ leh awˬ nu ve chaw nawˬ htaꞈ a yeˇ maˇ yuˬ laˇ tcuh gaˇ ve pa taw, nawˬ hkʼa dehꞈ maˇ yonˍ gʼa ve yoˬ hehˉ. Nawˬ htaꞈ pa taw, awˬ nu ve chaw geh deˇ daꞈ ve maˇ te tcuh gaˇ ve yoˬ hehˉ. Awˬ tehˬ kʼo, ngaˬ hui awˬ nu ve chaw htaꞈ daꞈ ve te piˇ htaˇ, maˇ haꞈ yuˬ laˇ ve maˇ te tcuh gaˇ ve yoˬ. Awˬ pa Yaˬhoˉvaˬ lehˬ nawˬ aˬ htoꞈ ma gʼa hpuˇ  ve htaꞈ shiˍ leh nawˬ htaꞈ ga laˇ gaˇ ve yoˬ. (Iˉsaˍyaˆ 41:13) Ngaˬ hui maˇ daꞈ ve awˬ lawn gʼa hpuˇ htaˇ, yeunˇ hkanˍ gʼaˇ tuˬ ga laˇ gʼa ve, awˬ lawn chi ve hkʼaw beˆ maˍ laˇ hkawˇ 5 ceuˬ htaꞈ teˇ geh henˇ tuˬ yoˬ. Leh ngaˬ hui Gʼuiˬ sha ve kanˉ te ve hkʼaw ha lehˬ gʼa tuˬ ga laˇ gʼa ve kaꞈ teˇ geh henˇ tuˬ yoˬ.

NAWˬ AWˬ GʼAˇ CAWˬ TUˬ LIꞈ HPU GA LAˇ TCUH SHEˍ

3. Tcuh kaˍ paˍ Yeˍraˍmiˆ awˬ nu ve chaw htaꞈ bon maˍ piˇ gʼa tuˬ aˬ htoꞈ ma ga piˇ gʼa ve le?

³ Oˇ htaˇ teˇ co˗e Gʼuiˬ sha ve kanˉ te ve chaw haˍ ve awˬ vuiˬ htaꞈ te gʼa tuˬ, Gʼuiˬ sha ve tawˇ hkawˇ yawˇ hui awˬ gʼaˇ gʼa tuˬ te piˇ ve yoˬ hehˉ. Tawˇ pa haˉ te kʼo, Yaˬhoˉvaˬ tcuh kaˍ paˍ Yeˍraˍmiˆ htaꞈ awˬ vuiˬ te tcuh htaˇ, awˉ lawˉ htaˇ te gʼa tuˬ yawˇ maˇ yonˍ gʼa ve yoˬ. Yawˇ kʼoˆ ve, “ngaˬ tawˇ maˇ yaw puiˉ. A shaꞈ kaꞈ i jaˇ sheˍ ve yoˬ.” (Yeˍraˍmiˆ 1:6) Leh Yeˍraˍmiˆ te gʼa tuˬ aˬ htoꞈ ma ga piˇ ve le? Yawˇ htaꞈ ga piˇ ve awˬ ceuˬ lehˬ, Yaˬhoˉvaˬ ve tawˇ hkawˇ hpehꞈ ve yoˬ. Yawˇ kʼoˆ ve, “nawˬ ve tawˇ lehˬ, aˬ miˍ hkʼa shuˍ ngaˬ ve nyi ma hkʼaw toꞈ chehˇ taˍ ve yoˬ. Ngaˬ gawˬ lehˍ ca chehˇ taˍ maˇ gʼa.” (Yeˍraˍmiˆ 20:8, 9) Yeˍraˍmiˆ lehˬ, nyi ma maˇ pfuhˇ ve chaw awˬ ti lo bon gʼa maˍ ve htawˇ, yawˇ bon maˍ ve awˬ lawn yawˇ caˉ leh kʼawꞈ maˍ kʼai tuˬ awˬ gʼaˇ gʼa tuˬ te piˇ ve yoˬ.

4. Ngaˬ hui Liꞈ hpu gʼaw leh hkʼa dehꞈ dawˇ nyi htaˇ, aˬ htoꞈ ma te gʼa tuˬ ga laˇ ve le? (Kawˇlawˇsehˇ 1:9, 10)

⁴ Ngaˬ hui kaꞈ Liꞈ hpu hkʼaw Yaˬhoˉvaˬ ve tawˇ hkawˇ htaꞈ awˬ gʼaˇ gʼa ve yoˬ. Tcuh yaˇ Pawˇluꞈ Kawˇlawˇsehˇ venˇ hkʼaw chehˇ ve awˬ viˉ awˬ nyi htaꞈ liꞈ bvuhꞈ piˇ htaˇ, cawˇ ve cuˇ yiˍ htaꞈ awˬ viˉ awˬ nyi te tuˬ ‘daꞈ ve kanˉ teˇ ceuˬ le le awˬ hkʼaw lo awˬ shiˍ nawꞈ la’ leh yawˇ hui ‘Yaˬhoˉvaˬ htaꞈ keunˍ daꞈ ve hkʼe te kʼai’ tuˬ te piˇ ve yoˬ. (Kawˇlawˇsehˇ 1:9, 10 gʼaw sheˍ.) Chi ve lehˬ ha lehˬ ve bon hkawˇ maˍ ve htaꞈ caˉ daꞈ ve tehꞈ Pawˇluꞈ kʼoˆ ve yoˬ. Chi htaꞈ pa taw, ngaˬ hui Liꞈ hpu gʼaw leh hkʼa dehꞈ dawˇ nyi htaˇ, ngaˬ hui Yaˬhoˉvaˬ htaꞈ hkʼa dehꞈ yonˍ leh aˬ htoꞈ ma te awˬ nu ve chaw htaꞈ daꞈ ve awˬ lawn sha tanˇ gʼa hto maˍ piˇ cawˇ ve, a yaˇ uiˍ jaˇ ve htaꞈ kaꞈ hkʼa dehꞈ na gʼa ve yoˬ.

5. Liꞈ hpu gʼaw leh hkʼa dehꞈ hpfuhˆ nyi ve kʼo, awˬ bon gʼa jaˇ tuˬ hkʼaˬ hkʼe gʼa te cawˇ ve le?

⁵ Liꞈ hpu hkʼaw awˬ bon hkʼa dehꞈ gʼa tuˬ, awˬ yanˇ yehˇ leh gʼa gʼaw ve, gʼa hpfuhˆ nyi ve, leh hkʼa dehꞈ gʼa dawˇ nyi ve, chi ve teˇ hpaˍ te htaˇ haˆ haˆ maˇ te cawˇ ve yoˬ. Ngaˬ hui hkʼa dehꞈ maˇ na gʼa ve Liꞈ hpu awˬ tawn cawˬ ve kʼo, chi ve htaꞈ maˇ hpfuhˆ nyi ve taˇ te. Awˬ tawn oˇ ve htaꞈ hpfuhˆ nyi tuˬ, Shaw nyi kuiˬ Taꞈ yehˬ liꞈ teh kuiˬ pawehˇ yehˇ gʼa ve, (Kaˇlaˇ hkawˇ) maˇ heˆ leh Yaˬhoˉvaˬ ve Shaˉhkiˆhkanˍ ve chaw hpfuhˆ nyi tuˬ laꞈ caˉ kaꞈ yehˇ gʼa ve yoˬ. Nawˬ awˬ yanˇ yehˇ leh Liꞈ hpu gʼaw leh hkʼa dehꞈ hpfuhˆ nyi ve kʼo, chi awˬ tehˬ hpehꞈ ve tehꞈ nawˬ hkʼa dehꞈ yonˍ gʼa tuˬ yoˬ. (1 Hteˇsaˍlawˇniˆ 5:21) Nawˬ hkʼa dehꞈ yonˍ gʼa ve kʼo, Liꞈ hpu htaꞈ caˉ daꞈ ve nawˬ awˬ nu ve chaw htaꞈ kʼoˆ maˍ piˇ htaˇ, ha lehˬ jaˇ tuˬ yoˬ.

 MAˇ HTO TOˇ˗E SHEˍ HTAˇ HKʼA DEHꞈ GU VE

6. Aˬ htoꞈ ma te ngaˬ hui maˇ hto toˇ˗e sheˍ htaˇ, hkʼa dehꞈ gu hehnˇ taˍ cawˇ ve le?

⁶ Nawˬ maˇ hto toˇ˗e sheˍ htaˇ hkʼa dehꞈ gu ve kʼo, yehˬ shehˍ hpaˇ geh maˇ anˇ naˍ leh hkʼa dehꞈ yaw daꞈ gʼa tuˬ yoˬ. Yeˍsuˆ yawˇ ve awˬ laꞈ gʼawˇ bon maˇ maˍ˗e sheˍ htaˇ, awˉ lawˉ hkʼa dehꞈ gu hehnˇ taˍ tuˬ yawˇ ga piˇ ve yoˬ. (Luˉkaꞈ 10:1-11) Yawˇ hui Yeˍsuˆ maˍ piˇ ve htaꞈ hkʼa dehꞈ gʼaꞈ te htaˇ, yawˇ hui daꞈ ve laiˉ ceuˬ htaꞈ te gʼa ve yoˬ. Leh chi ve yawˇ hui ha lehˬ jaˇ tuˬ te piˇ ve yoˬ.—Luˉkaꞈ 10:17.

7. Hto toˇ˗e tuˬ awˬ pon ngaˬ hui hkʼaˬ hkʼe gu hehnˇ taˍ gʼa ve le? (Awˬ han htaꞈ nyi sheˍ.)

⁷ Ngaˬ hui hto toˇ˗e tuˬ awˬ pon hkʼaˬ hkʼe te hkʼa dehꞈ gu hehnˇ taˍ gʼa tuˬ le? Ngaˬ hui chi hkʼe te gʼa tuˬ, Liꞈ hpu hkʼaw awˬ tehˬ ve hkʼa dehꞈ kʼoˆ maˍ piˇ gʼa tuˬ, tawˇ yaw jaw muiˬ ve hkʼe yaw sheˍ. Ngaˬ hui hto toˇ kuiˬ awˬ ti lo ve chaw ngaˬ hui htaꞈ tawˇ hkʼaˬ hkʼe yaw laˇ ve, leh yawˇ hui htaꞈ hkʼaˬ hkʼe hkʼawꞈ piˇ tuˬ, 2-3 lawn htaꞈ dawˇ nyi taˍ sheˍ. Leh hto toˇ˗e htaˇ kaꞈ yehˬ shehˍ hpaˇ geh awˬ chawˇ hkʼe te yaw daꞈ leh yawˇ htaꞈ ha lehˬ ve hkʼaw te piˇ sheˍ.

8. Tcuh yaˇ Pawˇluꞈ tehˆ maˍ laˇ ve hkʼaw Hkriꞈ yaˇ lehˬ jeꞈ muꞈ hkʼu htaꞈ hkʼaˬ hkʼe shuˍ ve le?

⁸ Tcuh yaˇ Pawˇluꞈ ngaˬ hui hto toˇ ve kanˉ htaꞈ “awˬ hpfuhˇ hkʼaˆ jaˇ ve mawˇ chi lehˬ, jeꞈ muꞈ hkʼu awˬ hkʼaw lo ngaˬ hui cawˬ taˍ ve” hkʼa shuˍ hpehꞈ ve tehꞈ tehˆ taˍ ve yoˬ. (2 Kawˇrenˍhtuˆ 4:7) Awˬ hpfuhˇ hkʼaˆ jaˇ ve mawˇ chi aˬ htoꞈ ma le? Chi ve lehˬ chaw yaˇ ve a shaꞈ gʼa ponˬ tuˬ ga piˇ ve, Gʼuiˬ sha ve mvuhˇ miˬ daꞈ ve awˬ lawn sha tanˇ hto toˇ ve yoˬ. (2 Kawˇrenˍhtuˆ 4:1) Jeꞈ muꞈ hkʼu lehˬ aˬ htoꞈ ma le? Chi ve lehˬ Gʼuiˬ sha ve kanˉ te ve chaw, awˬ nu ve chaw htaꞈ daꞈ ve awˬ lawn sha tanˇ maˍ piˇ ve yoˬ. Pawˇluꞈ ve awˬ co˗e htaˇ, tanˇ kaˬ paˍ caˇ tuˬ, a pehˉ meuˇ gʼuiˬ, hpu, awˬ nu ve teˇ kaˬ lo feu piˇ tuˬ, jeꞈ muꞈ hkʼu neˉ ve htaꞈ yehˇ ve yoˬ. Chi ve hkʼa shuˍ shuˍ, awˬ nu ve chaw awˬ pon awˬ hpfuhˇ hkʼaˆ ve daꞈ ve awˬ lawn sha tanˇ maˍ piˇ tuˬ, Yaˬhoˉvaˬ ngaˬ hui htaꞈ awˬ vuiˬ peꞈ laˇ ve yoˬ. Yaˬhoˉvaˬ ngaˬ hui htaꞈ ga laˇ ve kʼo, ngaˬ hui ka tiꞈ yeˬ ve hkʼaw caˉ leh hto toˇ gʼa tuˬ, awˬ gʼaˇ leh yonˍ yeˬ ve cawˬ tuˬ yawˇ ga laˇ tuˬ yoˬ.

HAꞈ HANˉ VE CAWˬ TUˬ BON LAWˬ SHEˍ

9. Ngaˬ hui chaw htaꞈ kawˆ ve maˇ heˆ leh ngaˬ hui hto maˍ piˇ ve htaꞈ maˇ na laˇ ve kʼo hkʼaˬ hkʼe te tuˬ le? (Awˬ han htaꞈ nyi sheˍ.)

⁹ Teˇ pawˆ pawˆ kʼo ngaˬ hui chaw htaꞈ kawˆ ve, maˇ heˆ leh ngaˬ hui hto maˍ piˇ ve maˇ na la ve htaꞈ dawˇ haˍ ve yoˬ. Chi ve htaꞈ ngaˬ hui hkʼaˬ hkʼe te gʼaˇ hpehꞈ tuˬ le? Tcuh yaˇ hui bon maˇ maˍ toˇ tuˬ tawˍ piˇ htaˇ, yawˇ hui bon lawˬ ve htaꞈ teˇ geh nyi sheˍ. Yawˇ hui kawˆ jaˇ leh bon maˇ maˍ˗o ve maˇ te. Yaꞈ hkʼaˇ, yawˇ hui Yaˬhoˉvaˬ geh bon lawˬ ve, “nawˬ ve tawˇ hkawˇ htaꞈ maˍ piˇ hpehꞈ tuˬ ga laˇ sheˍ.” Leh yawˇ hui ve bon lawˬ hkawˇ htaꞈ Yaˬhoˉvaˬ laꞈ haˉ hkʼawꞈ piˇ ve yoˬ.  (Tcuh yaˇ 4:18, 29, 31) Teˇ pawˆ pawˆ kʼo, ngaˬ hui chaw htaꞈ kawˆ leh hto toˇ maˇ haˆ ve kʼo, Yaˬhoˉvaˬ ga laˇ tuˬ ngaˬ hui bon lawˬ cawˇ ve yoˬ. Nawˬ chaw yaˇ htaꞈ haꞈ ve pa taw, maˇ kawˆ leh daꞈ ve awˬ lawn sha tanˇ hto maˍ piˇ gʼa tuˬ Gʼuiˬ sha ga laˇ tuˬ lawˬ sheˍ.

10. Ngaˬ hui Yaˬhoˉvaˬ ve Shaˉhkiˆhkanˍ ve chaw hpehꞈ ve awˬ vuiˬ htaꞈ te gʼa tuˬ yawˇ hkʼaˬ hkʼe ga laˇ ve le? (Iˉsaˍyaˆ 43:10-12)

¹⁰ Yaˬhoˉvaˬ ngaˬ hui htaꞈ yawˇ ve Shaˉhkiˆhkanˍ ve chaw hpehꞈ tuˬ leuˆ yuˬ laˇ leh ngaˬ hui haꞈ hanˉ ve cawˬ tuˬ yawˇ ga laˇ tuˬ yoˬ tehꞈ ka tiꞈ te taˍ laˇ ve yoˬ. (Iˉsaˍyaˆ 43:10-12 gʼaw sheˍ.) Yaˬhoˉvaˬ chi hkʼe te tuˬ hpeuꞈ maw laˇ ve 4 hkʼaˇ htaꞈ teˇ geh nyi sheˍ. Awˉ lawˉ teˇ hkʼaˇ lehˬ, ngaˬ hui daꞈ ve awˬ lawn sha tanˇ hkʼaˬ kaˬ lo hto toˇ ve htawˇ maˇ kʼoˆ, Yeˍsuˆ ngaˬ hui geh hkʼaˬ htaˆ kaꞈ chehˇ ve yoˬ. (Maꞈhtehˍ 28:18-20) 2 hkʼaˇ teˇ hkʼaˇ lehˬ, Yaˬhoˉvaˬ mvuhˇ naw ma tcuh yaˇ htaꞈ peu laˇ leh ngaˬ hui htaꞈ ga laˇ tcuh ve yoˬ. (Hpeuꞈ maˍ ve 14:6) 3 hkʼaˇ teˇ hkʼaˇ lehˬ, ngaˬ hui awˬ nu ve chaw htaꞈ hto maˍ piˇ htaˇ, ngaˬ hui henˇ taˍ ve htaꞈ dawˇ nawˇ tuˬ Yaˬhoˉvaˬ daꞈ kehˬ ve awˬ ha hpu htaꞈ cuˇ leh ga laˇ ve yoˬ. (Yoˇhanˬ 14:25, 26) 4 hkʼaˇ teˇ hkʼaˇ lehˬ, kanˉ chi ve ngaˬ hui te gʼa tuˬ Yaˬhoˉvaˬ awˬ viˉ awˬ nyi htaꞈ cuˇ leh ga laˇ ve yoˬ. Yaˬhoˉvaˬ leh ngaˬ hui htaꞈ haꞈ ve awˬ viˉ awˬ nyi ga laˇ ve pa taw, ngaˬ hui haꞈ hanˉ ve hkʼaw caˉ leh hto toˇ gʼa tuˬ loˍ ve awˬ ceuˬ cawˬ ve tehꞈ hkʼa tawˍ lehˆ gʼa mawˬ ve yoˬ.

NAWˬ YAˬHOˉVAˬ LEH AWˬ NU VE CHAW HTAꞈ HAꞈ TUˬ DAWˇ NYI VE

11. Nawˬ awˬ nu ve chaw htaꞈ maˇ maˇ mawˬ daꞈ tuˬ hkʼaˬ hkʼe htaˇ hto toˇ˗e cawˇ ve le? (Awˬ han htaꞈ nyi sheˍ.)

¹¹ Nawˬ hto toˇ˗e leh aˉ hkʼaw lo chaw chehˇ ve htaꞈ hkʼa dehꞈ maˇ mawˬ htaˇ, nawˬ awˬ gʼaˇ nuˇ˗aw laˇ? Awˬ gʼaˇ nuˇ ve kʼo, a shu yawˇ awˬ to htaꞈ na nyi cawˇ ve, ‘chi teˇ hkui hto toˇ kuiˬ awˬ ti lo ve chaw hkʼaˬ kaˬ lo chehˇ ve le?’ (Tcuh yaˇ 16:13) ‘Yawˇ hui kanˉ ca te˗e ve, maˇ heˆ leh mawˇ ca vuiˬ˗e ve laˇ?’ Mawˇ ca vuiˬ˗e ve kʼo, chaw guiˇ kuiˬ lo nawˬ ca hto toˇ˗e htaˇ, chaw maˇ maˇ htaꞈ gʼa mawˬ daꞈ tuˬ yoˬ. Awˬ viˉ awˬ nyi hawˉ hkʼaˆ Yawˇsuˆ kʼoˆ ve, “mawˇ hawˇ kuiˬ sainˍ lonˉ hkʼaw maˇ heˆ leh chaw maˇ jaˇ kuiˬ lo ngaˬ kʼai htaˇ, awˬ nu ve chaw htaꞈ hto maˍ piˇ tuˬ awˬ yanˇ cawˬ maˇ ve yoˬ.” Yawˇsuˆ leh yawˇ ve awˬ miˇ ma Vinˆcehꞈ mvuhˇ hpeuꞈ la htaˇ maˇ heˆ leh shinˉ nyi sha gʼuˇ hkʼawꞈ nawˉ hto toˇ htaˇ, laiˉ gʼaˇ aˉ hkʼaw chehˇ˗a ve htaꞈ gʼa mawˬ daꞈ ve yoˬ.—Eˇfeˇsuꞈ 5:15, 16.

12. Ngaˬ hui yaw daꞈ ve chaw aˬ htoꞈ ma htaꞈ yonˍ ve maˇ heˆ leh aˬ htoꞈ ma ve awˬ lawn htaꞈ dawˇ haˍ ve tehꞈ ngaˬ hui hkʼaˬ hkʼe te shiˍ gʼa ve le?

¹² Ngaˬ hui tawˇ yaw daꞈ ve chaw ngaˬ hui hto toˇ ve htaꞈ nyi ma hkʼa dehꞈ maˇ pfuhˇ ve kʼo, yawˇ hui aˬ htoꞈ ma htaꞈ yonˍ ve, maˇ heˆ leh aˬ htoꞈ ma htaꞈ dawˇ haˍ ve na nyi piˇ sheˍ. Yawˇsuˆ leh Vinˆcehꞈ awˬ nu ve chaw geh tawˇ yaw daꞈ htaˇ, Liꞈ kʼoˆ ehˉ awˉ  lawˉ htaˇ cawˬ ve na hkawˇ htaꞈ yehˇ ve yoˬ. Tawˇ pa haˉ te kʼo, Nawˬ Liꞈ hpu htaꞈ hkʼaˬ hkʼe dawˇ ve le? Liꞈ kʼoˆ ehˉ yehˇ leh hto maˍ piˇ htaˇ, yawˇ hui na laˇ ve, “Liꞈ hpu lehˬ Gʼuiˬ sha geh laˬ ve liꞈ kʼoˆ hpehꞈ ve tehꞈ laiˉ gʼaˇ dawˇ ve yoˬ. Yaꞈ hkʼaˇ, chaw teˇ hpaˍ chi hkʼe maˇ dawˇ. Nawˬ hkʼaˬ hkʼe dawˇ ve le?” Chi hkʼe na piˇ ve lehˬ, yawˇ hui geh tawˇ kʼawꞈ caˉ yaw daꞈ tuˬ te laˇ ve yoˬ.

13. Ngaˬ hui maˍ piˇ ve htaꞈ na ve chaw hkʼa dehꞈ maˇ cawˬ ve htawˇ, ngaˬ hui Gʼuiˬ sha ve kanˉ hkʼa dehꞈ te gʼa˗oˬ ve tehꞈ hkʼaˬ hkʼe te shawˍ gʼa ve le? (Tawˇ naˉ ve 27:11)

¹³ Ngaˬ hui Gʼuiˬ sha ve kanˉ hkʼa dehꞈ te gʼa ve lehˬ, awˬ nu ve chaw hkʼaˬ hkʼe taw na gaˇ ve htaꞈ cawˬ ve maˇ heˆ. Aˬ htoꞈ ma pa taw le? Awˬ lawn kʼo, ngaˬ hui Yaˬhoˉvaˬ leh Yeˍsuˆ kʼoˆ laˇ ve awˬ ceuˬ htaꞈ gʼaꞈ te ve yoˬ. Chi ve lehˬ daꞈ ve awˬ lawn sha tanˇ hto toˇ ve yoˬ. (Tcuh yaˇ 10:42) Ngaˬ hui awˬ nu ve chaw htaꞈ hkʼa dehꞈ maˇ gʼa yaw daꞈ ve, maˇ heˆ leh na gaˇ ve chaw hkʼa dehꞈ maˇ cawˬ ve htawˇ, ngaˬ hui Yaˬhoˉvaˬ ha lehˬ tuˬ te piˇ ve tehꞈ shiˍ ve pa taw ha lehˬ ve cawˬ ve yoˬ.—Tawˇ naˉ ve 27:11 gʼaw sheˍ.

14. Awˬ viˉ awˬ nyi teˇ gʼaˇ nyi ma pfuhˇ ve chaw htaꞈ ca mawˬ htaˇ, aˬ htoꞈ ma te ngaˬ hui teˇ gʼaˇ le le kaꞈ ha lehˬ jaˇ ve le?

¹⁴ Awˬ viˉ awˬ nyi hto toˇ leh nyi ma pfuhˇ ve chaw htaꞈ gʼa mawˬ daꞈ htaˇ, ngaˬ hui teˇ gʼaˇ le le kaꞈ ha lehˬ jaˇ. Shaw nyi kuiˬ Taꞈ yehˬ hkʼaw ngaˬ hui hto toˇ ve lehˬ, yaˇ ehˉ mehˉ˗e ve gʼaꞈ ca ve htaꞈ tehˆ taˍ ve yoˬ. Yaˇ ehˉ htaꞈ gʼaꞈ ca ve chaw teˇ gʼaˇ le le teˇ moˍ tiˉ gʼa hpehꞈ ve yoˬ. Laiˉ kaˬ lo gʼaꞈ ca hpfuhˆ ve pa taw, yaˇ ehˉ htaꞈ mawˬ ve yoˬ. Ca mawˬ ve chaw ceh tiˉ maˇ heˆ. Teˇ gʼaˇ le le kaꞈ ha lehˬ jaˇ ve yoˬ. Chi ve hkʼa shuˍ shuˍ, shu awˬ laꞈ gʼawˇ hpehꞈ la tuˬ maˍ piˇ ve kanˉ kaꞈ ngaˬ hui teˇ moˍ tiˉ gʼa te cawˇ ve yoˬ. Hto toˇ kuiˬ awˬ ti lo ngaˬ hui teˇ gʼaˇ le le kaꞈ chaw htaꞈ gʼaꞈ ca hpfuhˆ leh hpawnˬ daꞈ la gehˇ sheˍ ve chaw awˬ suhˉ cawˬ htaˇ, ngaˬ hui teˇ gʼaˇ le le kaꞈ ha lehˬ jaˇ ve yoˬ.

NAWˬ YAˬHOˉVAˬ LEH AWˬ NU VE CHAW HTAꞈ HAꞈ TUˬ DAWˇ NYI VE

15. Maꞈhtehˍ liꞈ 22:37-39 hkʼaw gʼaꞈ te ve lehˬ, ngaˬ hui nyi ma pfuhˇ ve hkʼaw Gʼuiˬ sha ve kanˉ hkʼa dehꞈ te gʼa tuˬ hkʼaˬ hkʼe ga laˇ ve le? (Awˬ htaꞈ hpawˇ ve awˬ han htaꞈ nyi sheˍ.)

¹⁵ Ngaˬ hui Yaˬhoˉvaˬ leh awˬ nu ve chaw htaꞈ haꞈ ve dawˇ nyi ve lehˬ, hto toˇ ve hkʼaw nyi ma pfuhˇ tuˬ te laˇ ve yoˬ. (Maꞈhtehˍ 22:37-39 gʼaw sheˍ.) Yaˬhoˉvaˬ ngaˬ hui htaꞈ awˬ vuiˬ te tcuh laˇ ve te ve htaꞈ yawˇ mawˬ htaˇ, hkʼaˬ hkʼe taw ha lehˬ jaˇ ve htaꞈ dawˇ nyi sheˍ. Awˬ nu ve chaw htaꞈ Liꞈ hpu tanˬ maˍ piˇ htaˇ, hkʼaˬ hkʼe taw ha lehˬ ve htaꞈ dawˇ nyi sheˍ. Ngaˬ hui hto maˍ piˇ ve htaꞈ na ve chaw Yaˬhoˉvaˬ ve kanˉ te tuˬ dawˇ cheˆ htaˇ, yawˇ hui co co taiˍ taiˍ a shaꞈ gʼa tuˬ awˬ hkʼaˇ cawˬ ve htaꞈ tawnˇ taˍ sheˍ.—Yoˇhanˬ 6:40; 1 Tiˆmoˉseˍ 4:16.

16. Aˉ hkʼaw lo tiˉ gʼa chehˇ ve kʼo ngaˬ hui Gʼuiˬ sha ve kanˉ te ve hkʼaw hkʼaˬ hkʼe te ha lehˬ gʼa sheˍ ve le? Tawˇ pa haˉ kʼoˆ maˍ laˇ sheˍ.

¹⁶ Awˬ hkʼaˇ teˇ ceuˬ ceuˬ htaꞈ pa taw, nawˬ aˉ hkʼaw  tiˉ gʼa chehˇ ve laˇ? Gʼa chehˇ ve kʼo, nawˬ Yaˬhoˉvaˬ leh awˬ nu ve chaw htaꞈ haꞈ ve tehꞈ hpeuꞈ maw piˇ tuˬ, te gʼa ve awˬ ceuˬ htaꞈ dawˇ nyi sheˍ. A naˍ 19 ve awˬ yanˇ htaˇ, Saˍmo˗eˍlaˆ leh Deh˗nin aˉ hkʼaw lo tiˉ gʼa chehˇ ve yoˬ. Oˇ ve teˇ yanˇ yawˇ hui awˬ pon haˍ jaˇ. Yaꞈ hkʼaˇ, yawˇ hui tawˇ yaw tuˬ awˬ hkʼeun hkʼaw hkʼaˬ htaˆ kaꞈ hto toˇ ve, liꞈ bvuhꞈ ve, Zoom yehˇ leh laiˉ gʼaˇ htaꞈ Liꞈ hpu maˍ piˇ ve yoˬ. Saˍmoˍlaˆ yawˇ mvuhˇ haˉ caˇ ve a naˍ ca haꞈ shaˉ˗e kuiˬ naˆ tsuhˇ yehˬ ehˉ lo mawˬ daꞈ ve chaw htaꞈ kaꞈ hto maˍ piˇ ve yoˬ. Yawˇ kʼoˆ ve, “ngaˬ hui tuꞈ ve hkanˍ ve gʼa hpuˇ htaˇ, ngaˬ hui dawˇ haˍ jaˇ ve pa taw heuˬ jaˇ tuˬ te laˇ leh, yonˍ hkʼaˇ htaꞈ kaꞈ lawˇ nyi laˇ ve yoˬ. Yaꞈ hkʼaˇ, ngaˬ hui Yaˬhoˉvaˬ ve kanˉ te ve hkʼaw ha lehˬ ve cawˬ tuˬ awˬ hkʼaˇ htaꞈ coˇ caˇ leh gʼaꞈ ca ve yoˬ.” Awˬ lawn chi ve hkʼa peu˗eˬ gʼa hpuˇ ve awˬ yanˇ htaˇ, Deh˗nin maˇ dawˇ maˇ gaˇ ve hkʼaw pu˗e leh, ku˗iˍ hkʼoˆ lo 3 ha pa gʼa zuhꞈ ve yoˬ. Peuˬ hkʼawꞈ nawˉ, yawˇ mui kuiˬ caꞈ tuˬ hkʼoˆ lo 6 ha pa gʼa mui ve yoˬ. Chi hkʼe hpehꞈ ve htawˇ yawˇ kʼoˆ ve, “ngaˬ te gʼa ve hkʼe teˇ ceuˬ le le coˇ caˇ leh te ve yoˬ. Saˍ laꞈ gʼonˍ htaꞈ hto maˍ piˇ ve, aˉ hkʼaw lo mawˇ ca yuˬ kʼoˬ la ve chaw htaꞈ kaꞈ hto maˍ piˇ leh, naˆ tsuhˇ yehˬ hpawˇ caˉ daꞈ paˍ awˬ tan te ve chaw htaꞈ kaꞈ tawˇ yaw tuˬ awˬ hkʼeun yehˇ leh hto maˍ piˇ ve yoˬ.” Saˍmo˗eˍlaˆ leh Deh˗nin peuˬ laˬ htaˇ hkʼe leˇ hkʼa dehꞈ te maˇ gʼa ve yoˬ. Yaꞈ hkʼaˇ, yawˇ hui te gʼa ve hkʼe teˇ ceuˬ le le te leh ha lehˬ gʼa sheˍ ve yoˬ.

17. Awˬ lawn chi ve hkʼaw beˆ maˍ laˇ taˍ ve htaꞈ nawˬ hkʼaˬ hkʼe te awˬ bon gʼa jaˇ tuˬ ve le?

¹⁷ Awˬ lawn chi ve hkʼaw beˆ maˍ laˇ taˍ ve 5 ceuˬ htaꞈ nawˬ gʼaꞈ te ve kʼo, awˬ bon gʼa jaˇ tuˬ yoˬ. Beˆ maˍ laˇ taˍ ve teˇ ceuˬ leh teˇ ceuˬ awˬ chiˇ te ve hkʼaw hkʼawꞈ tuˬ ve awˬ hkʼeun htaꞈ shuˍ ve yoˬ. Awˬ chiˇ mehˬ tuˬ teˇ ceuˬ le le hkʼawꞈ htaˇ, nawˬ awˬ chiˇ mehˬ mehˬ ve gʼa caˇ tuˬ yoˬ. Chi ve hkʼa shuˍ shuˍ, beˆ maˍ laˇ taˍ ve 5 ceuˬ htaꞈ nawˬ gʼaꞈ te ve kʼo, maˇ daꞈ ve dawˇ hkʼaˇ htaꞈ pa tuˬ nawˬ te gʼa leh Gʼuiˬ sha ve kanˉ te ve hkʼaw ha lehˬ gʼa ve yoˬ.