AWˬ LAWN 14
KʼA MUIˬ HKAWˇ 56 Awˬ tehˬ ve leuˆ yuˬ tuˬ, nawˬ hkʼaˇ nawˬ te˗o
“Uiˍ la biˇ la tuˬ awˬ gʼuˇ suhˍ kʼai˗a veuˬ”
‘Ngaˬ hui coˇ caˇ leh uiˍ la biˇ la tuˬ awˬ gʼuˇ suhˍ kʼai˗a veuˬ.’—HEˍBREHˇ 6:1.
HENˇ TUˬ VE TEˇ HPAˍ
Co ha hpawˇ ve chaw mawˇ hpehꞈ ve chaw lehˬ, cuˇ yiˍ cawˬ ve hkʼaw dawˇ cheˆ gʼa ve yoˬ. Yawˇ dawˇ ve leh te ve awˬ ceuˬ hkʼaˬ htaˆ kaꞈ Gʼuiˬ sha nyi hkʼaˇ suh tuˬ te piˇ gʼa ve yoˬ. Ngaˬ hui hkʼaˬ hkʼe te leh co ha hpawˇ ve chaw mawˇ hpehꞈ gʼa tuˬ teˇ geh henˇ tuˬ yoˬ.
1. Yaˬhoˉvaˬ ngaˬ hui htaꞈ aˬ htoꞈ ma te tcuh gaˇ ve le?
Awˬ pa awˬ e ha lehˬ jaˇ tuˬ te piˇ gʼa ve teˇ ceuˬ lehˬ, yawˇ hui ve yaˇ paw la htaˇ hpehꞈ ve yoˬ. Awˬ pa awˬ e yawˇ hui ve yaˇ ehˉ htaꞈ haꞈ jaˇ ve htawˇ, yawˇ hui ve yaˇ hkʼaˬ htaˆ kaꞈ yaˇ ehˉ ceh tiˉ hpehꞈ tcuh gaˇ ve maˇ heˆ. Yawˇ hui ve yaˇ maˇ uiˍ la ve kʼo, dawˇ haˍ ve yoˬ hehˉ. Chi ve hkʼa shuˍ shuˍ, ngaˬ hui Yeˍsuˆ ve awˬ laꞈ gʼawˇ hpehꞈ la ve htaꞈ Yaˬhoˉvaˬ gʼa mawˬ htaˇ ha lehˬ jaˇ ve yoˬ. Yaꞈ hkʼaˇ, Yaˬhoˉvaˬ lehˬ ngaˬ hui htaꞈ chi hkʼe ceh tiˉ hpehꞈ tcuh gaˇ ve maˇ heˆ. Leh co ha hpawˇ ve yaˇ ehˉ ceh tiˉ kaꞈ hpehꞈ tcuh gaˇ ve maˇ heˆ. (1 Kawˇrenˍhtuˆ 3:1) Yaˬhoˉvaˬ lehˬ ngaˬ hui htaꞈ co ha hpawˇ ve “chaw mawˇ hkʼe hpehꞈ” tcuh gaˇ ve yoˬ.—1 Kawˇrenˍhtuˆ 14:20.
2. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?
2 Co ha hpawˇ ve chaw mawˇ hpehꞈ ve lehˬ aˬ htoꞈ ma htaꞈ kʼoˆ gaˇ ve le? Ngaˬ hui co ha hpawˇ ve chaw mawˇ hpehꞈ tuˬ aˬ htoꞈ ma gʼa te cawˇ ve le? Liꞈ hpu hkʼaw awˬ tehˬ ve cuˇ yiˍ htaꞈ gʼa shiˍ ve lehˬ, heh ve caˇ tuˬ htaꞈ shuˍ leh ngaˬ hui co ha hpawˇ uiˍ la mvuh la tuˬ hkʼaˬ hkʼe ga laˇ gʼa ve le? Leh aˬ htoꞈ ma pa taw, a shu yawˇ awˬ to htaꞈ yonˍ gʼa jaˇ ve maˇ gʼa te tuˬ shaˍ tiꞈ gʼa te cawˇ ve le? Chi ve teˇ hpaˍ awˬ lawn chi ve hkʼaw teˇ geh henˇ tuˬ yoˬ.
CO HA HPAWˇ VE CHAW MAWˇ HPEHꞈ VE LEHˬ Aˬ HTOꞈ MA HTAꞈ KʼOˆ GAˇ VE LE?
3. Co ha hpawˇ ve chaw mawˇ hpehꞈ ve lehˬ aˬ htoꞈ ma htaꞈ kʼoˆ gaˇ ve le?
3 Liꞈ hpu hkʼaw Heˍlaˍsaˆ hkawˇ “chaw mawˇ” lehˬ “kehˆ jaˇ˗oˬ ve” htaꞈ kʼoˆ gaˇ ve yoˬ. a (1 Kawˇrenˍhtuˆ 2:6) Chi htaꞈ pa taw, yaˇ ehˉ awˬ meu˗eˇ awˬ meu˗eˇ uiˍ la leh chaw mawˇ hpehꞈ ve hkʼa shuˍ, ngaˬ hui kaꞈ co ha hpawˇ ve chaw mawˇ gʼa hpehꞈ cawˇ ve yoˬ. Chi ve lehˬ ngaˬ hui Yaˬhoˉvaˬ geh leuˉ leh gʼa meuˆ daꞈ ve yoˬ. Chi hkʼe te ve kʼo, ngaˬ hui co ha hpawˇ ve chaw mawˇ hpehꞈ ve yoˬ. Ngaˬ hui dawˇ teh taˍ ve htaꞈ te gʼa˗oˬ ve htawˇ, ngaˬ hui leuˉ leh kʼawꞈ te kʼai cawˇ ve yoˬ. (1 Tiˆmoˉseˍ 4:15) A shaꞈ i ve chaw htawˇ, teˇ gʼaˇ le le co ha hpawˇ ve chaw mawˇ hpehꞈ gʼa ve yoˬ. Yaꞈ hkʼaˇ, co ha hpawˇ ve chaw mawˇ hpehꞈ˗oˬ ve tehꞈ hkʼaˬ hkʼe hpeuꞈ maw piˇ gʼa tuˬ le?
4. Co ha hpawˇ ve chaw mawˇ hpehꞈ ve lehˬ hkʼaˬ hkʼe te ve le?
4 Co ha hpawˇ ve chaw mawˇ hpehꞈ ve chaw lehˬ, Yaˬhoˉvaˬ te tcuh gaˇ ve teˇ ceuˬ le le htaꞈ te ve yoˬ. Yawˇ te gaˇ ve awˬ ceuˬ htaꞈ maˇ te. Awˬ tehˬ kʼo, yawˇ maˇ biˇ ve chaw hpehꞈ leh te yaꞈ sheˍ ve yoˬ. Yaꞈ hkʼaˇ, teˇ nyi le le yawˇ dawˇ ve leh te ve awˬ ceuˬ Yaˬhoˉvaˬ nyi hkʼaˇ suh ve htaꞈ te ve tehꞈ hpeuꞈ maw piˇ ve yoˬ. Yawˇ te hkʼaˇ dawˇ hkʼaˇ awˬ suhˉ cawˬ tcuh leh Gʼuiˬ sha hkʼe ve dawˇ hkʼaˇ cawˬ tuˬ coˇ caˇ leh te ve yoˬ. (Eˇfeˇsuꞈ 4:22-24) Yawˇ cuˇ yiˍ cawˬ ve hkʼaw dawˇ cheˆ htaˇ, Yaˬhoˉvaˬ ve awˬ liˇ awˬ hkʼaˇ leh awˬ liˇ tawˇ hkawˇ htaꞈ cuˇ ve yoˬ. Yawˇ aˬ htoꞈ ma te cawˇ ve, maˇ te cawˇ ve, awˬ liˇ teh tuˬ maˇ loˍ. Leh yawˇ dawˇ cheˆ˗oˬ htaˇ, chi ve htaꞈ yawˇ gʼaꞈ te gʼa tuˬ coˇ caˇ ve yoˬ.—1 Kawˇrenˍhtuˆ 9:26, 27.
5. Co ha hpawˇ ve chaw mawˇ maˇ hpehꞈ ve chaw geh aˬ htoꞈ ma hpehꞈ la gʼa ve le? (Eˇfeˇsuꞈ 4:14, 15)
5 Co ha hpawˇ ve chaw mawˇ maˇ hpehꞈ ve chaw lehˬ, “cuˇ yiˍ te leh heˍ ve” tawˇ hkawˇ htaꞈ na ve yoˬ. Leh maˇ heˆ heˆ ve awˬ lawn htaꞈ yonˍ ve, in˗teu˗neꞈ hkʼaw heˍ piˇ ve htaꞈ yonˍ ve, leh Gʼuiˬ sha htaꞈ hpfuhˆ ve chaw heˍ piˇ ve hkawˇ htaꞈ kaꞈ yawˇ yonˍ ve yoˬ. b (Eˇfeˇsuꞈ 4:14, 15 gʼaw sheˍ.) Yawˇ hkawehˉ puiˉ jaˇ ve, shu geh deˆ daꞈ hkʼeh ve, beuꞈ puiˉ jaˇ ve, leh yawˇ beˬ ve lawˇ ve htaꞈ tawˍ daꞈ maˇ gʼaˇ ve chaw hpehꞈ ve yoˬ.—1 Kawˇrenˍhtuˆ 3:3.
6. Aˬ htoꞈ ma te co ha hpawˇ ve chaw mawˇ hpehꞈ˗oˬ ve chaw lehˬ, yaˇ uiˍ la˗oˬ ve htaꞈ tehˆ taˍ ve le? (Awˬ han htaꞈ nyi sheˍ.)
6 Henˇ kʼai peuˬ˗oˬ ve hkʼa shuˍ, Liꞈ hpu hkʼaw co ha hpawˇ chaw mawˇ hpehꞈ˗oˬ ve chaw lehˬ yaˇ uiˍ la˗oˬ ve htaꞈ tehˆ taˍ ve yoˬ. Awˬ tehˬ kʼo, yaˇ lehˬ hpehꞈ laˬ jaw ve awˬ lawn maˇ cawˬ sheˍ. Hkʼe te leh, yawˇ htaꞈ chaw mawˇ gʼa nyi haꞈ shaˉ piˇ ve yoˬ. Tawˇ pa haˉ teˇ maˬ htaꞈ teˇ geh nyi sheˍ. Awˬ e leh yaˇ miˇ yaꞈ kʼaw lonˉ juˇ hpanˍ˗a te ve htaꞈ dawˇ nyi sheˍ. Yaˇ maˇ uiˍ sheˍ htaˇ yaꞈ kʼaw lonˉ juˇ hpanˍ˗a te htaˇ, awˬ e ve laꞈ sheh htaꞈ caˉ taˍ tehꞈ kʼoˆ piˇ ve yoˬ. Yaꞈ hkʼaˇ, yaˇ uiˍ la˗oˬ htaˇ, awˬ e lehˬ yaˇ htaꞈ yaꞈ kʼaw lonˉ yawˇ hkʼaˇ yawˇ juˇ hpanˍ tcuh ve yoˬ. Yaꞈ kʼaw lonˉ juˇ hpanˍ˗a te htaˇ, awˬ e lehˬ yaˇ htaꞈ laꞈ mehˍ hpawˇ, laꞈ sha hpawˇ hkʼa dehꞈ nyi sheˍ tehꞈ kʼoˆ piˇ ve yoˬ. Yawˇ ve yaˇ miˇ uiˍ la˗oˬ htaˇ, teˇ pawˆ le le yaꞈ kʼaw lonˉ juˇ hpanˍ htaˇ hkʼaˬ hkʼe te leh kawˆ ve maˇ cawˬ tuˬ yaˇ shiˍ ve yoˬ. Kawˆ ve htaꞈ jaw kʼai gʼa tuˬ yaˇ chaw mawˇ ga piˇ ve hkʼa shuˍ, co ha hpawˇ ve chaw mawˇ maˇ hpehꞈ ve chaw lehˬ, yawˇ Yaˬhoˉvaˬ geh leuˉ leh kʼawꞈ meuˆ daꞈ gʼa tuˬ gʼa te leh yawˇ cuˇ yiˍ cawˬ ve hkʼaw dawˇ cheˆ gʼa tuˬ, co ha hpawˇ ve chaw mawˇ hpehꞈ ve chaw htaꞈ gʼa ga laˇ tcuh ve yoˬ. Yaꞈ hkʼaˇ, chi ve lehˬ co ha hpawˇ ve chaw mawˇ htaꞈ peun daꞈ ve yoˬ. Co ha hpawˇ ve chaw mawˇ hpehꞈ ve chaw lehˬ, a shu yawˇ hkʼaˇ yawˇ dawˇ cheˆ htaˇ, awˬ lawn chi ve htaꞈ Yaˬhoˉvaˬ hkʼaˬ hkʼe dawˇ ve leh hkʼaˬ hkʼe gʼaꞈ te gʼa tuˬ, Liꞈ hpu hkʼaw ve awˬ liˇ awˬ hkʼaˇ htaꞈ hpfuhˆ nyi ve yoˬ.
Hkriꞈ yaˇ co ha hpawˇ ve chaw mawˇ maˇ hpehꞈ sheˍ ve chaw cuˇ yiˍ cawˬ ve hkʼaw dawˇ cheˆ gʼa tuˬ Liꞈ hpu hkʼaw ve awˬ liˇ awˬ hkʼaˇ htaꞈ gʼa yehˇ cawˇ ve (Awˬ tawn 6 nyi sheˍ)
7. Co ha hpawˇ ve chaw mawˇ hpehꞈ ve chaw lehˬ awˬ nu ve chaw ga laˇ tuˬ lawˬ cawˇ˗aw laˇ?
7 Chi lehˬ co ha hpawˇ ve chaw mawˇ hpehꞈ˗oˬ ve chaw awˬ nu ve chaw ga laˇ tuˬ maˇ loˍ ve htaꞈ kʼoˆ gaˇ ve laˇ? Maˇ heˆ. Teˇ pawˆ pawˆ kʼo, co ha hpawˇ ve chaw mawˇ hpehꞈ˗oˬ ve chaw kaꞈ awˬ nu ve chaw ga laˇ tuˬ lawˬ ve yoˬ. Co ha hpawˇ ve chaw mawˇ maˇ hpehꞈ ve chaw lehˬ, yawˇ aˬ htoꞈ ma gʼa te cawˇ ve, maˇ heˆ leh yawˇ awˬ pon shu dawˇ cheˆ laˇ tuˬ kʼoˆ laˇ tcuh gaˇ ve yoˬ. Chi ve lehˬ co ha hpawˇ ve chaw mawˇ htaꞈ peun daꞈ ve yoˬ. Yawˇ htaꞈ ga laˇ tuˬ lawˬ ve, cuˇ yiˍ cawˬ ve chaw htaꞈ na piˇ ve, maˇ heˆ leh hpehꞈ laˬ jaw ve awˬ lawn cawˬ ve chaw htaꞈ kaꞈ na piˇ ve yoˬ. Yaꞈ hkʼaˇ, yawˇ hkʼaˇ yawˇ gʼa dawˇ cheˆ leh Yaˬhoˉvaˬ lehˬ yawˇ htaꞈ “a shu yawˇ ve awˬ vuiˬ pfuhˇ tcuh gaˇ ve” tehꞈ shiˍ ve yoˬ.—Gaˍlaˍtiˆ 6:5.
8. Co ha hpawˇ ve chaw mawˇ hpehꞈ ve chaw lehˬ teˇ gʼaˇ leh teˇ gʼaˇ hkʼaˬ hkʼe maˇ shuˍ daꞈ ve le?
8 Maˇ˗awˍ ve kʼo, chaw mawˇ lehˬ awˬ hoꞈ awˬ han leh mehˆ hpfuhˇ kaꞈ maˇ shuˍ daꞈ ve yoˬ. Co ha hpawˇ ve chaw mawˇ hpehꞈ ve chaw kaꞈ te hkʼaˇ dawˇ hkʼaˇ teˇ gʼaˇ leh teˇ gʼaˇ maˇ shuˍ daꞈ ve yoˬ. Tawˇ pa haˉ te kʼo, cuˇ yiˍ, haꞈ hanˉ ve, shiˍ puiˉ ve, maˇ heˆ leh shu htaꞈ ha kʼaˉ puiˉ ve kaꞈ maˇ shuˍ daꞈ ve yoˬ. Chi hkʼoˆ kaꞈ, co ha hpawˇ ve chaw mawˇ 2 gʼaˇ awˬ lawn hkʼa shuˍ˗ehˬ gʼa hpuˇ htaˇ, yawˇ hui Liꞈ hpu hkʼaw ve awˬ liˇ awˬ hkʼaˇ htaꞈ yehˇ leh dawˇ cheˆ ve yoˬ. Dawˇ shiˍ puiˉ ve htaꞈ caˉ daꞈ ve teˇ gʼaˇ leh teˇ gʼaˇ dawˇ cheˆ ve maˇ shuˍ daꞈ ve yoˬ hehˉ. Chi hkʼe hpehꞈ ve kʼo, awˬ nu ve teˇ gʼaˇ dawˇ cheˆ ve maˇ shuˍ daꞈ ve htaꞈ maˇ kʼoˆ guiˇ piˇ. Yaꞈ hkʼaˇ, yawˇ huiˉ maˬ hawˍ daꞈ tuˬ ve htaꞈ a yeˇ uiˍ jaˇ tehꞈ shawˍ ve yoˬ.—Roˉmaꞈ 14:10; 1 Kawˇrenˍhtuˆ 1:10.
CO HA HPAWˇ VE CHAW MAWˇ HPEHꞈ TUˬ NGAˬ HUI HKʼAˬ HKʼE GʼA TE VE LE?
9. Ngaˬ hui co ha hpawˇ ve chaw mawˇ hpehꞈ tuˬ yawˇ hkʼaˇ yawˇ hpehꞈ la gʼa ve laˇ? Tawˇ pa haˉ kʼoˆ maˍ laˇ sheˍ.
9 Awˬ yanˇ ponˬ kʼai htaˇ ngaˬ hui teˇ gʼaˇ le le kaꞈ uiˍ la ve yoˬ. Yaꞈ hkʼaˇ, co ha hpawˇ ve chaw mawˇ hpehꞈ tuˬ yawˇ hkʼaˇ yawˇ hpehꞈ la gʼa ve maˇ heˆ. Tawˇ pa haˉ te kʼo, Kawˇrenˍhtuˆ venˇ hkʼaw chehˇ ve chaw daꞈ ve awˬ lawn sha tanˇ htaꞈ haꞈ yuˬ ve pa taw, Baˆtiˆsaˬ haꞈ yuˬ ve, daꞈ kehˬ ve awˬ han hpu gʼa ve, leh tcuh yaˇ Pawˇluꞈ beˆ maˍ piˇ ve htaꞈ yawˇ hui awˬ bon laiˉ ceuˬ gʼa ve yoˬ. (Tcuh yaˇ 18:8-11) Yawˇ hui Baˆtiˆsaˬ haꞈ yuˬ ve teˇ tcuhˉ teˇ yanˇ gaˬ˗oˬ ve htawˇ, laiˉ gʼaˇ co ha hpawˇ ve chaw mawˇ maˇ hpehꞈ sheˍ. (1 Kawˇrenˍhtuˆ 3:2) Hkʼaˬ hkʼe te, ngaˬ hui yawˇ hui hkʼe leˇ maˇ hpehꞈ tuˬ le?
10. Ngaˬ hui co ha hpawˇ ve chaw mawˇ hpehꞈ tuˬ hkʼaˬ hkʼe gʼa te cawˇ ve le? (Yuˇdaꞈ 20)
10 Ngaˬ hui co ha hpawˇ ve chaw mawˇ hpehꞈ gʼa tuˬ, chi ve htaꞈ awˉ lawˉ a yeˇ gʼa yuˬ ve yoˬ. “Chaw luˬ paˍ teˇ hpaˍ” a shu yawˇ cawˬ taˍ ve awˬ ceuˬ htaꞈ nyi hkʼaˇ suh chehˇ ve pa taw, co ha hpawˇ ve chaw mawˇ hpehꞈ maˇ gʼa. (Tawˇ naˉ ve 1:22) Ngaˬ hui awˬ to ceh tiˉ uiˍ la leh hkʼaˬ htaˆ kaꞈ awˬ pa awˬ e dawˇ cheˆ laˇ tcuh ve maˇ hpehꞈ gaˇ. Yaꞈ hkʼaˇ, ngaˬ hui yonˍ hkʼaˇ hpawˇ uiˍ la mvuh la tuˬ a shu yawˇ hkʼaˇ yawˇ te gaˇ ve yoˬ. (Yuˇdaꞈ 20 gʼaw sheˍ.) Nawˬ co ha hpawˇ ve chaw mawˇ hpehꞈ tuˬ coˇ caˇ chehˇ ve kʼo, ‘Gʼuiˬ sha nyi ma cawˇ ve htaꞈ nawˬ te gaˇ ve nyi ma cawˬ tuˬ’ Gʼuiˬ sha ga laˇ tuˬ bon lawˬ sheˍ.—Hpiˇliˇpiˆ 2:13.
11. Ngaˬ hui co ha hpawˇ ve chaw mawˇ hpehꞈ gʼa tuˬ Yaˬhoˉvaˬ aˬ htoꞈ ma gu teh taˍ laˇ ve le? (Eˇfeˇsuꞈ 4:11-13)
11 Ngaˬ hui co ha hpawˇ ve chaw mawˇ hpehꞈ tuˬ a shu yawˇ hkʼaˇ yawˇ coˇ caˇ leh te ve htaꞈ Yaˬhoˉvaˬ maˇ dawˇ law. Ngaˬ hui teˇ gʼaˇ le le “uiˍ la peuˬ ve chaw hpehꞈ leh Hkriꞈ biˇ ve hkʼa shuˍ shuˍ ngaˬ hui htawˇ biˇ la htaˇ hkʼa gaˬ” Yaˬhoˉvaˬ lehˬ, nyi haꞈ shaˉ paˍ htaꞈ cuˇ leh ngaˬ hui htaꞈ awˬ gʼaˇ peꞈ laˇ tcuh leh Hkriꞈ yaˇ awˬ moˍ hkʼaw kaꞈ maˍ laˇ tcuh ve yoˬ. (Eˇfeˇsuꞈ 4:11-13 gʼaw sheˍ.) Ngaˬ hui “Hkriꞈ ve nyi ma” cawˬ tuˬ Yaˬhoˉvaˬ daꞈ kehˬ ve awˬ ha hpu peꞈ laˇ ve yoˬ. (1 Kawˇrenˍhtuˆ 2:14-16) Chi hkʼoˆ kaꞈ, Yeˍsuˆ miˬ guiˬ hkʼoˆ lo chehˇ leh Gʼuiˬ sha ve kanˉ te htaˇ dawˇ ve, kʼoˆ ve, te ve awˬ ceuˬ ngaˬ hui shiˍ tuˬ, Yaˬhoˉvaˬ lehˬ ha lehˬ ve bon hkawˇ liꞈ 4 daw htaꞈ dawˇ pawnˍ piˇ leh bvuhꞈ tcuh taˍ ve yoˬ. Yeˍsuˆ dawˇ ve leh te ve awˬ ceuˬ htaꞈ nawˬ henˇ yuˬ ve kʼo, nawˬ co ha hpawˇ ve chaw mawˇ hpehꞈ gʼa ve yoˬ.
AWˬ TEHˬ VE CUˇ YIˍ HEH VE CAˇ TUˬ HTAꞈ SHUˍ VE
12. “Hkriꞈ ve awˬ lawn awˬ hkuiˉ puiˍ ngaˬ hui shiˍ taˍ ve teˇ hpaˍ” aˬ htoꞈ ma htaꞈ kʼoˆ gaˇ ve le?
12 Uiˍ la mvuh la leh co ha hpawˇ ve chaw mawˇ hpehꞈ tuˬ, “Hkriꞈ ve awˬ lawn awˬ hkuiˉ puiˍ ngaˬ hui shiˍ taˍ ve teˇ hpaˍ htaꞈ” gʼa te cawˇ ve yoˬ. Chi ve lehˬ, Hkriꞈ yaˇ ve awˬ lawn lonˉ ma htaꞈ gʼa shiˍ cawˇ ve yoˬ. Tawˇ pa haˉ te kʼo, venˇ baˆ dawˇ hpfuhˆ ve, yonˍ ve, Baˆtiˆsaˬ haꞈ yuˬ ve, leh kʼawꞈ teꞈ tu la ve, chi ve teˇ hpaˍ htaꞈ gʼa shiˍ ve yoˬ. (Heˍbrehˇ 6:1, 2) Chi ve lehˬ, Hkriꞈ yaˇ teˇ gʼaˇ le le gʼa yonˍ cawˇ ve awˬ lawn lonˉ ma hpehꞈ ve yoˬ. Hkʼe te leh, tcuh yaˇ Peˍtruˆ Peˍteˍkoˆteˍ awˬ nyi yawˇ bon maˍ htaˇ, chaw yaˇ htaꞈ chi ve teˇ hpaˍ kʼoˆ maˍ piˇ ve yoˬ. (Tcuh yaˇ 2:32-35, 38) Ngaˬ hui Yeˍsuˆ ve awˬ laꞈ gʼawˇ hpehꞈ tuˬ awˬ lawn lonˉ ma htaꞈ gʼa shiˍ cawˇ ve yoˬ. Pawˇluꞈ kaꞈ awˬ lawn chi ve htaꞈ kʼoˆ ve yoˬ. Tawˇ pa haˉ te kʼo, a shu teˇ gʼaˇ kʼawꞈ teꞈ tu la ve awˬ lawn htaꞈ maˇ yonˍ ve kʼo, yawˇ awˬ tehˬ ve Hkriꞈ yaˇ maˇ heˆ tehꞈ Pawˇluꞈ shaˍ tiꞈ peꞈ laˇ ve yoˬ. (1 Kawˇrenˍhtuˆ 15:12-14) Yaꞈ hkʼaˇ, ngaˬ hui awˬ lawn lonˉ ma htaꞈ ceh shiˍ leh nyi hkʼaˇ maˇ suh cawˇ.
13. Heˍbrehˇ liꞈ 5:14 hkʼaw heh ve caˇ tuˬ ngaˬ hui awˬ bon gʼa tuˬ hkʼaˬ hkʼe gʼa te cawˇ ve le? (Awˬ han htaꞈ nyi sheˍ.)
13 Liꞈ hpu hkʼaw awˬ tehˬ ve cuˇ yiˍ lehˬ heh ve caˇ tuˬ htaꞈ shuˍ leh, Liꞈ hpu hkʼaw awˬ lawn lonˉ ma htaꞈ peun daꞈ ve yoˬ. Heh ve caˇ tuˬ lehˬ Yaˬhoˉvaˬ ve awˬ liˇ tawˇ hkawˇ ceh tiˉ cawˬ ve maˇ heˆ. Yaꞈ hkʼaˇ, Liꞈ hpu hkʼaw Yaˬhoˉvaˬ ve awˬ liˇ awˬ hkʼaˇ kaꞈ hpehꞈ ve yoˬ. Chi ve lehˬ, Yaˬhoˉvaˬ hkʼaˬ hkʼe dawˇ ve htaꞈ ngaˬ hui na gʼa tuˬ ga laˇ ve yoˬ. Awˬ tehˬ ve cuˇ yiˍ chi teˇ hpaˍ htaꞈ ngaˬ hui awˬ bon gʼa tuˬ, ngaˬ hui gʼa gʼaw ve, gʼa hpfuhˆ nyi ve, hkʼa dehꞈ gʼa dawˇ nyi ve, leh Liꞈ hpu hkʼaw beˆ maˍ laˇ ve teˇ hpaˍ ngaˬ hui gʼa yuˬ yehˇ ve yoˬ. Ngaˬ hui chi hkʼe te ve kʼo, dawˇ cheˆ ve awˬ ceuˬ Yaˬhoˉvaˬ nyi hkʼaˇ suh tuˬ te piˇ gʼa ve yoˬ. c—Heˍbrehˇ 5:14 gʼaw sheˍ.
Awˬ tehˬ ve cuˇ yiˍ heh ve caˇ tuˬ htaꞈ shuˍ ve. Yaˬhoˉvaˬ nyi hkʼaˇ suh ve hkʼe ngaˬ hui dawˇ cheˆ gʼa tuˬ maˍ laˇ ve (Awˬ tawn 13 nyi sheˍ) d
14. Kawˇrenˍhtuˆ venˇ hkʼaw ve Hkriꞈ yaˇ uiˍ la mvuh la leh co ha hpawˇ ve chaw mawˇ hpehꞈ tuˬ Pawˇluꞈ hkʼaˬ hkʼe maˍ piˇ ve le?
14 Co ha hpawˇ ve chaw mawˇ maˇ hpehꞈ ve chaw lehˬ, Liꞈ hpu hkʼaw awˬ liˇ awˬ hkʼaˇ htaꞈ hkʼa tawˍ lehˆ maˇ kʼoˆ laˇ taˍ ve kʼo, yawˇ hui hkʼaˬ hkʼe dawˇ cheˆ tuˬ maˇ shiˍ ve yoˬ. Yawˇ hui a shu yawˇ ve a loˍ htaꞈ te ve, maˇ heˆ leh awˬ nu ve chaw yawˇ hui htaꞈ awˬ liˇ teh laˇ tcuh gaˇ ve yoˬ hehˉ. Tawˇ pa haˉ te kʼo, Kawˇrenˍhtuˆ venˇ hkʼaw ve Hkriꞈ yaˇ chi hkʼe hpehꞈ ve yoˬ. Nyi˗a kʼo, shaˉ hoꞈ htaꞈ tanˇ taˍ ve caˇ tuˬ awˬ lawn Pawˇluꞈ awˬ liˇ teh laˇ tcuh gaˇ ve yoˬ. Yaꞈ hkʼaˇ, Pawˇluꞈ yawˇ hui htaꞈ awˬ liˇ teh piˇ ve aꞈ kehˉ, Kawˇrenˍhtuˆ venˇ hkʼaw ve Hkriꞈ yaˇ dawˇ shiˍ puiˉ ve nyi ma cawˬ tuˬ, leh a shu yawˇ hkʼaˇ yawˇ caˇ tuˬ, maˇ caˇ tuˬ, Pawˇluꞈ Liꞈ hpu hkʼaw ve awˬ liˇ awˬ hkʼaˇ htaꞈ yehˇ leh awˬ gʼaˇ piˇ ve yoˬ. Yawˇ hui dawˇ cheˆ ve htaꞈ nyi ma maˇ luˬ leh shu nyi ma maˇ sha tuˬ maˇ te piˇ tuˬ chi ga piˇ ve yoˬ. (1 Kawˇrenˍhtuˆ 8:4, 7-9) Kawˇrenˍhtuˆ Hkriꞈ yaˇ yawˇ hui dawˇ cheˆ ve awˬ nu ve chaw htaꞈ maˇ cuˇ ve, awˬ nu ve chaw awˬ liˇ maˇ teh laˇ tcuh tuˬ leh, yawˇ hui Liꞈ hpu hkʼaw hpfuhˆ nyi leh dawˇ cheˆ puiˉ tuˬ, Pawˇluꞈ yawˇ hui htaꞈ maˍ piˇ ve yoˬ.
15. Pawˇluꞈ Heˍbrehˇ chaw Hkriꞈ yaˇ uiˍ la mvuh la leh co ha hpawˇ ve chaw mawˇ hpehꞈ tuˬ hkʼaˬ hkʼe ga piˇ ve le?
15 Pawˇluꞈ Heˍbrehˇ chaw Hkriꞈ yaˇ htaꞈ liꞈ bvuhꞈ piˇ ve awˬ lawn lehˬ, ngaˬ hui awˬ pon daꞈ ve henˇ yuˬ tuˬ hpehꞈ ve yoˬ. Heˍbrehˇ chaw Hkriꞈ yaˇ yonˍ hkʼaˇ maˇ yonˍ yeˬ ve lehˬ, ‘heh ve caˇ tuˬ htaꞈ caˇ maˇ gʼa ve pa taw cuˉ gʼuiˬ htaꞈ dawˬ cawˇ sheˍ ve yoˬ.’ (Heˍbrehˇ 5:12) Yawˇ hui Yaˬhoˉvaˬ maˍ piˇ ve awˬ ceuˬ htaꞈ maˇ henˇ leh maˇ haꞈ yuˬ. (Tawˇ naˉ ve 4:18) Tawˇ pa haˉ te kʼo, Yeˍsuˆ ve a shaꞈ tanˇ laˇ leh htaiˍ hkʼawꞈ laˇ peuˬ hkʼawꞈ nawˉ, Heˍbrehˇ chaw Hkriꞈ yaˇ Moˉseˍ ve awˬ liˇ tawˇ hkawˇ maˇ yehˇ˗oˬ ve 30 hkʼawꞈ gaˬ˗oˬ ve htawˇ, yehˇ chehˇ sheˍ ve yoˬ. (Roˉmaꞈ 10:4; Tiˇtuˆ 1:10) Awˬ tehˬ kʼo, Hkriꞈ yaˇ chi ve teˇ hpaˍ 30 hkʼawꞈ ve awˬ yanˇ yawˇ hui ve dawˇ hkʼaˇ pa cawˇ ve yoˬ. Hkʼe te leh, Pawˇluꞈ yawˇ hui htaꞈ liꞈ bvuhꞈ piˇ ve yoˬ. Liꞈ chi ve hkʼaw yawˇ hui awˬ tehˬ ve cuˇ yiˍ cawˬ leh Yaˬhoˉvaˬ htaꞈ oˉ kʼoˍ pui tuˬ ga piˇ ve yoˬ. Chi ve lehˬ, Yeˍsuˆ htaꞈ cuˇ leh gu teh taˍ laˇ ve pa taw, yawˇ hui Yuˇdaꞈ chaw tawˍ piˇ ve htaꞈ gʼa hpuˇ ve htawˇ, caˉ leh bon maˍ kʼai tuˬ ga piˇ ve yoˬ.—Heˍbrehˇ 10:19-23.
A SHU YAWˇ AWˬ TO HTAꞈ YONˍ GʼA JAˇ VE MAˇ GʼA TE TUˬ SHAˍ TIꞈ TE SHEˍ
16. Ngaˬ hui uiˍ la mvuh la leh co ha hpawˇ ve chaw mawˇ hpehꞈ˗oˬ ve kʼo, ngaˬ hui aˬ htoꞈ ma gʼa te cawˇ sheˍ ve le?
16 Ngaˬ hui uiˍ la mvuh la leh co ha hpawˇ ve chaw mawˇ hpehꞈ˗oˬ ve kʼo, ngaˬ hui leuˉ leh chi hkʼe hpehꞈ tuˬ gʼa coˇ caˇ cawˇ ve yoˬ. Chi htaꞈ pa taw, ngaˬ hui a shu yawˇ awˬ to htaꞈ yonˍ gʼa jaˇ ve maˇ te cawˇ. (1 Kawˇrenˍhtuˆ 10:12) Ngaˬ hui uiˍ la mvuh la chehˇ˗aw laˇ tehꞈ “a shu yawˇ awˬ to htaꞈ hkʼa dehꞈ tehˆ nyi lawˇ nyi sheˍ.”—2 Kawˇrenˍhtuˆ 13:5.
17. Pawˇluꞈ Kawˇlawˇsehˇ venˇ hkʼaw chehˇ ve awˬ viˉ awˬ nyi htaꞈ liꞈ bvuhꞈ piˇ ve hkʼaw, yawˇ hui yonˍ hkʼaˇ hpawˇ hkʼaˬ htaˆ kaꞈ chaw mawˇ gʼa hpehꞈ cawˇ ve tehꞈ hkʼaˬ hkʼe hpeuꞈ maw piˇ ve le?
17 Pawˇluꞈ Kawˇlawˇsehˇ venˇ hkʼaw chehˇ ve Hkriꞈ yaˇ htaꞈ liꞈ bvuhꞈ piˇ ve hkʼaw hkʼaˬ htaˆ kaꞈ co ha hpawˇ ve chaw mawˇ hpehꞈ tuˬ a yeˇ uiˍ jaˇ tehꞈ yawˇ kʼoˆ ve yoˬ. Kawˇlawˇsehˇ venˇ hkʼaw chehˇ ve Hkriꞈ yaˇ co ha hpawˇ ve chaw mawˇ hpehꞈ˗oˬ ve htawˇ, miˬ guiˬ ve dawˇ hkʼaˇ maˇ gʼa heˍ laˇ tuˬ, Pawˇluꞈ yawˇ hui htaꞈ shaˍ tiꞈ piˇ ve yoˬ. (Kawˇlawˇsehˇ 2:6-10) Pawˇluꞈ kʼoˆ ve, yawˇ hui “uiˍ la leh hkʼa dehꞈ yeˬ chehˇ hpehꞈ tuˬ” Eˇpaˍhpaˍraˆ kaꞈ Kawˇlawˇsehˇ venˇ hkʼaw chehˇ ve awˬ viˉ awˬ nyi awˬ pon hkʼaˬ htaˆ kaꞈ bon lawˬ ve yoˬ. (Kawˇlawˇsehˇ 4:12) Awˬ lawn chi ve ngaˬ hui htaꞈ hkʼaˬ hkʼe maˍ laˇ ve le? Pawˇluꞈ leh Eˇpaˍhpaˍraˆ shiˍ ve, co ha hpawˇ hkʼaˬ htaˆ kaꞈ chaw mawˇ hpehꞈ tuˬ gʼa coˇ caˇ jaˇ leh, Yaˬhoˉvaˬ gʼa ga laˇ tcuh ve yoˬ. Kawˇlawˇsehˇ venˇ hkʼaw ve awˬ viˉ awˬ nyi tuꞈ ve hkanˍ ve aˬ htoꞈ ma gʼa hpuˇ ve htawˇ maˇ kʼoˆ, Pawˇluꞈ leh Eˇpaˍhpaˍraˆ lehˬ awˬ viˉ awˬ nyi htaꞈ hkʼaˬ htaˆ kaꞈ co ha hpawˇ ve chaw mawˇ hpehꞈ tcuh gaˇ ve yoˬ.
18. Co ha hpawˇ ve chaw mawˇ htaꞈ aˬ htoꞈ ma hpehꞈ la gʼa ve le? (Awˬ han htaꞈ nyi sheˍ.)
18 Pawˇluꞈ Heˍbrehˇ chaw Hkriꞈ yaˇ htaꞈ shaˍ tiꞈ piˇ ve, co ha hpawˇ ve chaw mawˇ hpehꞈ˗oˬ ve htawˇ, shaˍ tiꞈ gʼa te cawˇ ve yoˬ. Awˬ lawn kʼo, yawˇ hui nyi ma heh leh venˇ baˆ maˇ dawˇ hpfuhˆ ve htaꞈ Yaˬhoˉvaˬ maˇ haꞈ yuˬ leh, yawˇ venˇ baˆ hpehˇ piˇ ve htaꞈ kaꞈ yawˇ hui maˇ haꞈ yuˬ ve yoˬ. Heˍbrehˇ chaw Hkriꞈ yaˇ chi hkʼe maˇ te ve ha lehˬ jaˇ. (Heˍbrehˇ 6:4-9) Leh chi beuꞈ teˇ co˗e awˬ viˉ awˬ nyi teˇ hpaˍ maˇ hto toˇ˗o ve, maˇ heˆ leh Hkriꞈ yaˇ awˬ moˍ hkʼaw tawˆ cheˆ piˇ ve htawˇ, peuˬ hkʼawꞈ nawˉ yawˇ hui venˇ baˆ dawˇ hpfuhˆ ve kʼo, hkʼaˬ hkʼe te tuˬ le? Yawˇ hui nyi ma nuˇ nehˬ leh venˇ baˆ dawˇ hpfuhˆ ve kʼo, yawˇ hui Pawˇluꞈ kʼoˆ taˍ ve chaw hkʼe maˇ hpehꞈ. Chi hkʼe hpehꞈ ve htawˇ, yawˇ hui ga laˇ tuˬ htaꞈ loˍ sheˍ ve yoˬ. (Yeˍsaˍkeˍlaˆ 34:15, 16) Chaw chi teˇ hpaˍ yonˍ hkʼaˇ yonˍ yeˬ leh Yaˬhoˉvaˬ geh kʼawꞈ meuˆ daꞈ tuˬ, co ha hpawˇ ve chaw mawˇ awˬ viˉ awˬ nyi yawˇ hui htaꞈ ga piˇ tuˬ nyi haꞈ shaˉ paˍ lawˬ piˇ ve yoˬ.
Awˬ gʼaˇ nuˇ ve chaw awˬ gʼaˇ kʼawꞈ cawˬ leh Yaˬhoˉvaˬ geh teˇ pawˆ kʼawꞈ meuˆ daꞈ tuˬ ga laˇ gʼa ve awˬ hkʼaˇ yawˇ gu teh taˍ laˇ ve (Awˬ tawn 18 nyi sheˍ)
19. Ngaˬ hui aˬ htoꞈ ma te tuˬ dawˇ teh taˍ cawˇ ve le?
19 Nawˬ co ha hpawˇ ve chaw mawˇ hpehꞈ tuˬ coˇ caˇ leh uiˍ la mvuh la tuˬ gʼa te ve yoˬ. Nawˬ te gʼa tuˬ yoˬ tehꞈ yonˍ sheˍ. Heh ve caˇ tuˬ caˇ ve, maˇ heˆ leh awˬ tehˬ ve cuˇ yiˍ cawˬ tuˬ caˉ leh te sheˍ. Leh Yaˬhoˉvaˬ hkʼe ve dawˇ hkʼaˇ cawˬ tuˬ coˇ caˇ leh te sheˍ. Nawˬ co ha hpawˇ ve chaw mawˇ hpehꞈ˗oˬ ve kʼo, leuˉ leh te kʼai sheˍ.
NAWˬ HKʼAˬ HKʼE HKʼAWꞈ TUˬ LE?
-
Co ha hpawˇ ve chaw mawˇ hpehꞈ ve aˬ htoꞈ ma htaꞈ kʼoˆ gaˇ ve le?
-
Ngaˬ hui uiˍ la mvuh la leh co ha hpawˇ ve chaw mawˇ hpehꞈ tuˬ hkʼaˬ hkʼe gʼa te cawˇ ve le?
-
Aˬ htoꞈ ma te ngaˬ hui a shu yawˇ awˬ to htaꞈ yonˍ gʼa jaˇ ve maˇ gʼa te cawˇ ve le?
KʼA MUIˬ HKAWˇ 65 Gʼuˇ suhˍ kʼai!
a Heˍbrehˇ ve Liꞈ hpu hkʼaw “chaw mawˇ” maˇ heˆ leh “chaw mawˇ maˇ hpehꞈ ve” maˇ cawˬ ve htawˇ, chi htaꞈ caˉ daꞈ ve awˬ lawn cawˬ sheˍ ve yoˬ. Tawˇ pa haˉ te kʼo, Tawˇ naˉ ve liꞈ hkʼaw a shaꞈ i ve chaw, teꞈ chiˉ maˇ shiˍ ve chaw, cuˇ yiˍ cawˬ ve chaw hui htaꞈ leuˉ leh kʼawꞈ shiˍ maˇ la piˇ ve htaꞈ tehˆ taˍ ve yoˬ.—Tawˇ naˉ ve 1:4, 5.
b Vehˆsaiˉ jw.org leh JW Laiˉbaˍliˍ® ehˆ hkʼaw laiˉ lawn cawˬ ve, “Nawˬ maˇ heˆ heˆ ve awˬ lawn htaꞈ maˇ gʼa yonˍ tuˬ hkʼaˬ hkʼe gʼa te ve le?” “Maˍ laˇ ve awˬ ceuˬ teˇ hpaˍ” hkʼaw nyi sheˍ.
c Awˬ lawn “Liꞈ hpu henˇ tuˬ ve awˬ hkʼaˇ” hkʼaw nyi sheˍ.
d AWˬ HAN HTAꞈ KʼOˆ MAˍ TAˍ VE Liꞈ mehˆ hpfuhˇ 5: Awˬ viˉ awˬ nyi hawˉ hkʼaˆ awˬ han nyi tuˬ leuˆ htaˇ Liꞈ hpu hkʼaw ve awˬ liˇ awˬ hkʼaˇ htaꞈ yuˬ yehˇ ve.
