1. Awˉ lawˉ peuˇ ve awˬ co˗e htaˇ, Yaˬhoˉvaˬ ve chaw hteˇ hteˇ shawˇ shawˇ hkʼaˬ hkʼe gu ve le?

 Yaˬhoˉvaˬ yawˇ ve kanˉ te ve chaw htaꞈ awˬ vuiˬ te tcuh htaˇ, yawˇ hui hteˇ hteˇ shawˇ shawˇ te leh yawˇ ve kanˉ hkʼaˇ gu taˍ ve hkʼe te gʼa tuˬ yawˇ dawˇ law ve yoˬ. (1 Kawˇrenˍhtuˆ 14:33) Tawˇ pa haˉ te kʼo, Yaˬhoˉvaˬ lehˬ miˬ guiˬ chi hkʼoˆ teˇ kaˬ le le lo ha lehˬ ve bon hkawˇ maˍ tcuh gaˇ ve yoˬ. (Maꞈhtehˍ 24:14) Hkʼe te leh, Yaˬhoˉvaˬ lehˬ kanˉ chi ve Yeˍsuˆ htaꞈ nyi haꞈ shaˉ tcuh leh Yeˍsuˆ kanˉ chi ve hteˇ hteˇ shawˇ shawˇ te tuˬ gu ve yoˬ. Awˉ lawˉ peuˇ ve awˬ co˗e htaˇ, laiˉ kaˬ lo Hkriꞈ yaˇ awˬ moˍ teh leh sheh kʼai tuˬ, leh Hkriꞈ yaˇ awˬ moˍ hkʼaw beˆ maˍ piˇ tuˬ, awˬ hoˉ chaw mawˇ leuˆ teh ve yoˬ. (Tcuh yaˇ 14:23) Yeˍruˆsaˍlehnˍ venˇ lo awˬ hoˉ chaw mawˇ teˇ moˍ cawˬ ve yoˬ. Chi ve hkʼaw tcuh yaˇ hui leh awˬ hoˉ chaw mawˇ kaꞈ cawˬ ve yoˬ. Yawˇ hui a yeˇ uiˍ ve awˬ lawn teˇ hpaˍ htaꞈ dawˇ cheˆ leh, chi ve htaꞈ awˬ viˉ awˬ nyi gʼaꞈ te tuˬ, Hkriꞈ yaˇ awˬ moˍ teˇ kaˬ le le lo liꞈ bvuhꞈ feu piˇ ve yoˬ. (Tcuh yaˇ 15:2; 16:4) Beˆ maˍ piˇ ve chi teˇ hpaˍ htaꞈ yawˇ hui gʼaꞈ te htaˇ, “Hkriꞈ yaˇ awˬ moˍ teˇ hpaˍ yonˍ ve awˬ hkʼaw lo awˬ gʼaˇ uiˍ la leh, teˇ nyi le le chaw maˇ la ve yoˬ.”—Tcuh yaˇ 16:5.

2. 1919 hkʼawꞈ tanˬ leh Yaˬhoˉvaˬ yawˇ ve chaw htaꞈ beˆ maˍ piˇ leh yonˍ hkʼaˇ hpawˇ yonˍ yeˬ tuˬ hkʼaˬ hkʼe ga piˇ ve le?

² Chi beuꞈ teˇ co˗e kaꞈ Yaˬhoˉvaˬ yawˇ ve chaw hteˇ hteˇ shawˇ shawˇ cawˬ tuˬ gu piˇ sheˍ ve yoˬ. 1919 hkʼawꞈ htaˇ, hto toˇ ve hteˇ hteˇ shawˇ shawˇ cawˬ tuˬ gu leh, co ha hpawˇ ve caˇ tuˬ pehˬ piˇ ve, maˇ heˆ leh Gʼuiˬ sha ve chaw yonˍ hkʼaˇ yonˍ yeˬ tuˬ Yeˍsuˆ lehˬ, leuˆ yuˬ taˍ ve awˬ viˉ awˬ nyi hawˉ hkʼaˆ awˬ moˍ ehˉ cawˬ tcuh ve yoˬ. a (Luˉkaꞈ 12:42) Yawˇ  hui kanˉ te ve htaꞈ Yaˬhoˉvaˬ awˬ bon naꞈ piˇ ve tehꞈ hkʼa tawˍ lehˆ gʼa mawˬ ve yoˬ.—Iˉsaˍyaˆ 60:22; 65:13, 14.

3-4. (a) Hteˇ hteˇ shawˇ shawˇ gu ve ngaˬ hui awˬ pon aˬ htoꞈ ma awˬ bon cawˬ ve tawˇ pa haˉ kʼoˆ maˍ laˇ sheˍ. (b) Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

³ Chi beuꞈ teˇ co˗e hteˇ hteˇ shawˇ shawˇ gu ve maˇ cawˬ ve kʼo, Yeˍsuˆ ngaˬ hui htaꞈ te tcuh laˇ ve kanˉ te maˇ gʼa taˬ. (Maꞈhtehˍ 28:19, 20) Tawˇ pa haˉ te kʼo, hto toˇ kuiˬ awˬ ti hteˇ hteˇ shawˇ shawˇ gu ve maˇ cawˬ ve kʼo, teˇ gʼaˇ le le hkʼaˬ kaˬ lo hto toˇ˗e gaˇ kaꞈ kʼai ve yoˬ. Hto toˇ kuiˬ awˬ ti teˇ kaˬ kaˬ kʼo, hto toˇ peuˬ kaꞈ hto toˇ ve, maˇ heˆ leh teˇ kaˬ kaˬ kʼo maˇ hto toˇ jaw ve yoˬ. Nawˬ dawˇ kʼo hteˇ hteˇ shawˇ shawˇ gu ve, chi hkʼe ve aˬ htoꞈ ma awˬ bon gʼa sheˍ ve le?

⁴ Yeˍsuˆ miˬ guiˬ hkʼoˆ lo chehˇ htaˇ te ve awˬ ceuˬ lehˬ, yawˇ hteˇ hteˇ shawˇ shawˇ te ve tehꞈ chi beuꞈ ngaˬ hui shiˍ tuˬ te laˇ ve yoˬ. Awˬ lawn chi ve hkʼaw Yeˍsuˆ ve awˬ lawn htaꞈ teˇ geh henˇ leh, ngaˬ hui ve kanˉ hkʼaˇ Yeˍsuˆ htaꞈ hkʼaˬ hkʼe henˇ yuˬ ve kaꞈ teˇ geh henˇ tuˬ yoˬ. Chi hkʼoˆ kaꞈ, ngaˬ hui Yaˬhoˉvaˬ ve kanˉ hkʼaˇ htaꞈ awˬ hpfuhˇ shiˍ leh yonˍ gʼa ve tehꞈ hkʼaˬ hkʼe hpeuꞈ maw piˇ ve kaꞈ teˇ geh henˇ tuˬ yoˬ.

NGAˬ HUI VE KANˉ HKʼAˇ YEˍSUˆ HTAꞈ HENˇ YUˬ VE

5. Ngaˬ hui Yeˍsuˆ htaꞈ henˇ yuˬ ve teˇ hkʼaˇ lehˬ aˬ htoꞈ ma le? (Yoˇhanˬ 8:28)

⁵ Yeˍsuˆ lehˬ Yaˬhoˉvaˬ kʼoˆ ve leh te ve awˬ ceuˬ htaꞈ henˇ yuˬ ve. Yaˬhoˉvaˬ ve kanˉ hkʼaˇ kaꞈ Yeˍsuˆ htaꞈ henˇ yuˬ leh aˬ htoꞈ ma cawˇ ve, maˇ cawˇ ve, leh ngaˬ hui a shaꞈ teꞈ kuiˬ hkʼaw beˆ maˍ laˇ tuˬ teˇ ceuˬ le le Liꞈ hpu htaꞈ cuˇ ve yoˬ. (Yoˇhanˬ 8:28 gʼaw sheˍ; 2 Tiˆmoˉseˍ 3:16, 17) Chi beuꞈ teˇ co˗e ngaˬ hui teˇ nyi le le Liꞈ hpu gʼaw leh, gʼaw taˍ ve awˬ ceuˬ a shaꞈ teꞈ kuiˬ hkʼaw yuˬ yehˇ tuˬ awˬ gʼaˇ peꞈ laˇ ve yoˬ. Beˆ maˍ laˇ ve chi teˇ hpaˍ htaꞈ gʼaꞈ te ve aˬ htoꞈ ma awˬ bon gʼa ve le?

6. Liꞈ hpu henˇ htaˇ awˬ bon gʼa ve teˇ ceuˬ lehˬ aˬ htoꞈ ma le?

⁶ Ngaˬ hui Liꞈ hpu henˇ htaˇ, Gʼuiˬ sha ve kanˉ hkʼaˇ gu teh taˍ laˇ ve liꞈ kʼoˆ htaꞈ yehˇ ve awˬ bon gʼa jaˇ ve yoˬ. Tawˇ pa haˉ te kʼo, Liꞈ hpu hkʼaw maˍ laˇ ve awˬ ceuˬ leh Gʼuiˬ sha ve kanˉ hkʼaˇ beˆ maˍ laˇ ve ngaˬ hui tehˆ daꞈ gʼa ve yoˬ. Gʼuiˬ sha ve kanˉ hkʼaˇ beˆ maˍ laˇ ve Liꞈ hpu hkʼaw cuˇ ve tehꞈ ngaˬ hui mawˬ htaˇ, ngaˬ hui Yaˬhoˉvaˬ ve kanˉ hkʼaˇ htaꞈ leuˉ leh yonˍ maˇ la ve yoˬ.—Roˉmaꞈ 12:2.

7. Yeˍsuˆ aˬ htoꞈ ma awˬ lawn bon maˍ ve le? Leh chi beuꞈ teˇ co˗e Yaˬhoˉvaˬ ve kanˉ hkʼaˇ Yeˍsuˆ htaꞈ hkʼaˬ hkʼe henˇ yuˬ chehˇ ve le?

⁷ Yeˍsuˆ “Guiˬ sha ve mvuhˇ miˬ ha lehˬ ve bon hkawˇ” ca maˍ ve. (Luˉkaꞈ 4:43, 44) Leh Yeˍsuˆ kaꞈ awˬ laꞈ gʼaw hui awˬ lawn chi maˍ tuˬ kʼoˆ piˇ taˉ ve yoˬ. (Luˉkaꞈ 9:1, 2; 10:8, 9) Chi beuꞈ teˇ co˗e Yaˬhoˉvaˬ ve kanˉ hkʼaˇ hkʼaw chehˇ ve chaw teˇ gʼaˇ le le yawˇ ve kanˉ hkʼaˇ hkʼaw aˬ htoꞈ ma awˬ vuiˬ cawˬ ve, maˇ heˆ leh hkʼaˬ ve teˇ mvuhˇ miˬ lo chehˇ ve htawˇ maˇ kʼoˆ, Gʼuiˬ sha ve mvuhˇ miˬ daꞈ ve awˬ lawn sha tanˇ hto toˇ ve yoˬ.

8. Ngaˬ hui daꞈ jaˇ ve awˬ vuiˬ aˬ htoꞈ ma cawˬ ve le?

⁸ Gʼuiˬ sha ve mvuhˇ miˬ daꞈ ve awˬ lawn sha tanˇ ngaˬ hui awˬ nu ve chaw htaꞈ gʼa hto maˍ piˇ ve daꞈ jaˇ ve awˬ vuiˬ hpehꞈ yoˬ. Awˬ tehˬ kʼo Yaˬhoˉvaˬ lehˬ awˬ vuiˬ chi teˇ gʼaˇ le le htaꞈ piˇ ve maˇ heˆ. Tawˇ pa haˉ te kʼo, Yeˍsuˆ ve awˬ co˗e htaˇ, Yeˍsuˆ htaꞈ caˉ daꞈ ve awˬ lawn yawˇ neˇ haiˬ htaꞈ maˇ kʼoˆ tcuh. (Luˉkaꞈ 4:41) Chi beuꞈ teˇ co˗e chaw teˇ gʼaˇ Yaˬhoˉvaˬ ve Shaˉhkiˆhkanˍ ve chaw geh teˇ geh hto toˇ gʼa tuˬ, yawˇ awˬ hkʼaˇ hkʼa dehꞈ gʼa shiˍ sheˍ ve yoˬ. Ngaˬ hui awˬ vuiˬ chi htaꞈ awˬ hpfuhˇ shiˍ ve tehꞈ hpeuꞈ maw piˇ tuˬ, teˇ gʼaˇ le le htaꞈ Liꞈ hpu hkʼaw ve awˬ lawn kʼoˆ maˍ piˇ ve yoˬ. Leh ngaˬ hui Yeˍsuˆ hkʼa shuˍ te gʼa tuˬ, chaw yaˇ ve nyi ma hkʼaw awˬ tehˬ ve awˬ yawˇ ti keu leh iˉ kaˆ pfuhˍ piˇ ve yoˬ.—Maꞈhtehˍ 13:3, 23; 1 Kawˇrenˍhtuˆ 3:6.

9. Ngaˬ hui ve kanˉ hkʼaˇ chaw yaˇ Yaˬhoˉvaˬ ve awˬ meh htaꞈ shiˍ tuˬ hkʼaˬ hkʼe te ve le?

⁹ Yeˍsuˆ lehˬ chaw yaˇ Gʼuiˬ sha ve awˬ meh htaꞈ shiˍ tuˬ kʼoˆ maˍ piˇ ve. Yeˍsuˆ mvuhˇ naw ma hkʼoˆ Awˬ pa geh bon lawˬ ve, “nawˬ ve awˬ meh ngaˬ yawˇ hui htaꞈ shiˍ piˇ lawˬ peuˬ.” (Yoˇhanˬ 17:26) Ngaˬ hui ve kanˉ hkʼaˇ Yeˍsuˆ htaꞈ henˇ yuˬ leh chaw yaˇ Yaˬhoˉvaˬ ve awˬ meh htaꞈ shiˍ tuˬ te gʼa ve hkʼe teˇ ceuˬ le le te ve yoˬ. Miˬ guiˬ awˬ suhˉ yuˬ tawˆ ve Liꞈ hpu hkʼaw Yaˬhoˉvaˬ ve awˬ meh cawˬ kuiˬ cawˬ cawˇ ve hkʼaw cawˬ tcuh tuˬ ve a yeˇ uiˍ jaˇ. Chi teˇ hkui 270  chaw ceuˬ hpaˆ Miˬ guiˬ awˬ suhˉ yuˬ tawˆ ve Liꞈ hpu teˇ chaw ceuˬ ceuˬ kʼo hkʼa peu˗eˬ cawˬ leh, teˇ chaw ceuˬ ceuˬ kʼo hkʼa peu˗eˬ maˇ cawˬ sheˍ. Miˬ guiˬ awˬ suhˉ yuˬ tawˆ ve Liꞈ hpu awˬ hkʼawꞈ nawˉ hpawˇ lo A4 leh A5 htaꞈ nyi sheˍ. Yaˬhoˉvaˬ ve awˬ meh Liꞈ hpu hkʼaw kʼawꞈ keu taˍ ve awˬ lawn kʼoˆ maˍ laˇ taˍ ve htaꞈ nawˬ gʼa mawˬ tuˬ yoˬ. Chi hkʼoˆ kaꞈ, Liꞈ hpu awˬ hkʼawꞈ nawˉ hpawˇ C. (kaˇ laˇ hkawˇ) hkʼaw nyi sheˍ. Aˬ htoꞈ ma te Heˍlaˍsaˆ ve Liꞈ hpu Yaˬhoˉvaˬ ve awˬ meh cawˬ jaw kuiˬ lo 237 pawˆ cawˬ ve tehꞈ, Liꞈ hpu henˇ tuˬ ve liꞈ hkʼaw ngaˬ hui shiˍ tuˬ te laˇ ve awˬ leuˉ kʼawꞈ cawˬ ve yoˬ.

10. Man mvuhˇ miˬ lo chehˇ ve chaw mawˇ ma 1 gʼaˇ ve tawˇ hkawˇ nawˬ htaꞈ hkʼaˬ hkʼe maˍ laˇ ve le?

¹⁰ Ngaˬ hui kaꞈ Yeˍsuˆ htaꞈ henˇ yuˬ gʼa ve lehˬ, chaw yaˇ Gʼuiˬ sha ve awˬ meh htaꞈ shiˍ tuˬ ngaˬ hui te gʼa ve hkʼe te leh ga piˇ ve yoˬ. Nyi ma pfuhˇ lawꞈ lawꞈ ve awˬ lawn teˇ lawn htaꞈ teˇ geh nyi sheˍ. Man mvuhˇ miˬ lo chehˇ ve chaw mawˇ ma 67 hkʼawꞈ gaˬ˗oˬ ve teˇ gʼaˇ Gʼuiˬ sha ve awˬ meh htaꞈ shiˍ la ve yoˬ. Yawˇ dawˇ cawˇ jaˇ ve pa taw hawˬ leh kʼoˆ ve, “Gʼuiˬ sha ve awˬ meh lehˬ Yaˬhoˉvaˬ meh ve tehꞈ kʼoˆ ve ngaˬ gʼa kaˇ ve awˉ lawˉ teˇ pawˆ hpehꞈ ve yoˬ. . . . Yaˇ miˇ˗oˬ nawˬ a yeˇ uiˍ jaˇ ve ngaˬ htaꞈ maˍ laˇ ve yoˬ.” Nyi ma nuˇ nehˬ ve chaw Gʼuiˬ sha ve awˬ meh htaꞈ gʼa shiˍ htaˇ, yawˇ hui awˬ pon awˬ bon cawˬ jaˇ ve tehꞈ awˬ lawn chi ve shiˍ tuˬ te laˇ ve yoˬ.

YAˬHOˉVAˬ VE KANˉ HKʼAˇ HTAꞈ AWˬ HPFUHˇ SHIˍ LEH YONˍ GʼA VE

11. Nyi haꞈ shaˉ paˍ lehˬ Gʼuiˬ sha ve kanˉ hkʼaˇ htaꞈ awˬ hpfuhˇ shiˍ leh yonˍ gʼa ve tehꞈ hkʼaˬ hkʼe hpeuꞈ maw piˇ gʼa ve le? (Awˬ han htaꞈ nyi sheˍ.)

¹¹ Nyi haꞈ shaˉ paˍ lehˬ Yaˬhoˉvaˬ ve kanˉ hkʼaˇ htaꞈ awˬ hpfuhˇ shiˍ leh yonˍ gʼa ve tehꞈ hkʼaˬ hkʼe hpeuꞈ maw piˇ gʼa ve le? Beˆ maˍ laˇ ve gʼa htaˇ yawˇ hui hkʼa dehꞈ gʼaw nyi leh, gʼaꞈ te tuˬ yawˇ hui coˇ caˇ jaˇ ve yoˬ. Tawˇ pa haˉ te kʼo, nyi haꞈ shaˉ paˍ htaꞈ Hkriꞈ yaˇ awˬ moˍ hkʼaw awˬ vuiˬ te tuˬ beˆ maˍ piˇ ve yoˬ. Hpawnˬ daꞈ ve hkʼaw awˬ viˉ awˬ nyi awˬ tan bon lawˬ ve, Yeˍsuˆ Hkriꞈ ve yawˬ htaꞈ nyi haꞈ shaˉ tuˬ kaꞈ beˆ maˍ piˇ ve yoˬ. Nyi haꞈ shaˉ paˍ Gʼuiˬ sha ve kanˉ hkʼaˇ beˆ maˍ laˇ ve htaꞈ gʼaꞈ teˇ htaˇ, awˬ viˉ awˬ nyi kawˆ ve maˇ cawˬ tuˬ yawˇ hui ga piˇ gʼa leh, awˬ viˉ awˬ nyi kaꞈ Gʼuiˬ sha yawˇ htaꞈ haꞈ ve tehꞈ dawˇ ve yoˬ.

12. (a) Awˬ viˉ awˬ nyi sheh kʼai paˍ beˆ maˍ laˇ ve htaꞈ ngaˬ hui hkʼaˬ hkʼe gʼaꞈ te cawˇ ve le? (Heˍbrehˇ 13:7, 17) (b) Aˬ htoꞈ ma te ngaˬ hui awˬ viˉ awˬ nyi sheh kʼai paˍ htaꞈ daꞈ ve hpawˇ nyi cawˇ ve le?

¹² Nyi haꞈ shaˉ paˍ beˆ maˍ laˇ ve htaꞈ ngaˬ hui gʼa htaˇ, gʼaꞈ te cawˇ ve yoˬ. Ngaˬ hui chi hkʼe te ve kʼo, yawˇ hui kanˉ hkʼa dehꞈ te sha tuˬ ngaˬ hui ga piˇ ve yoˬ. Liꞈ hpu hkʼaw kʼoˆ ve, awˬ viˉ awˬ nyi sheh kʼai paˍ hkawˇ ngaˬ hui na leh haꞈ yuˬ cawˇ ve yoˬ. (Heˍbrehˇ 13:7, 17 gʼaw sheˍ.) Yaꞈ hkʼaˇ, chi hkʼe te tuˬ teˇ pawˆ pawˆ kʼo maˇ sha. Aˬ htoꞈ ma pa taw le? Awˬ lawn kʼo, yawˇ hui kaꞈ maˇ biˇ ve chaw hpehꞈ ve yoˬ. Yawˇ hui daꞈ ve awˬ ceuˬ htaꞈ nyi cawˇ ve htawˇ, maˇ daꞈ ve awˬ ceuˬ htaꞈ ngaˬ hui nyi ve kʼo, ngaˬ hui ve canˇ paˍ hkʼa shuˍ te chehˇ ve yoˬ. Nyi haꞈ shaˉ paˍ htaꞈ maˇ daꞈ ve hpawˇ ngaˬ hui nyi ve kʼo, Gʼuiˬ sha ve kanˉ hkʼaˇ htaꞈ kaꞈ ngaˬ hui maˇ daꞈ ve hpawˇ nyi leh, maˇ yonˍ gʼa la ve yoˬ. Awˬ lawn teˇ ceuˬ ceuˬ htaꞈ ngaˬ hui gʼa kaˇ htaˇ, canˇ paˍ heˍ laˇ ve awˬ lawn htaꞈ ngaˬ hui maˇ gʼa caˉ daꞈ tuˬ hkʼaˬ hkʼe gʼa te cawˇ ve le?

NAWˬ YAˬHOˉVAˬ VE KANˉ HKʼAˇ HTAꞈ MAˇ YONˍ GʼA TUˬ AWˬ NU VE CHAW TAˇ TE LAˇ TCUH

13. Gʼuiˬ sha ve canˇ paˍ yawˇ ve kanˉ hkʼaˇ htaꞈ maˇ daꞈ ve hpawˇ hkʼaˬ hkʼe kʼoˆ ve le?

¹³ Gʼuiˬ sha ve canˇ paˍ yawˇ ve kanˉ hkʼaˇ htaꞈ awˬ nu ve chaw maˇ daꞈ ve hpawˇ nyi tuˬ coˇ caˇ leh te piˇ ve yoˬ. Tawˇ pa haˉ te kʼo, Liꞈ hpu hkʼaw ngaˬ hui gʼa henˇ ve, Yaˬhoˉvaˬ yawˇ ve kanˉ te ve chaw awˬ to hpawˇ, leh awˬ liˇ awˬ hkʼaˇ hpawˇ kaꞈ daꞈ kehˬ tcuh gaˇ ve yoˬ. Gʼuiˬ sha lehˬ ngaˬ hui htaꞈ yawˇ haꞈ yuˬ gʼa ve hkʼaw oˉ kʼoˍ pui tcuh gaˇ ve yoˬ. A shu teˇ gʼaˇ haiˬ ve awˬ ceuˬ htaꞈ te leh venˇ baˆ maˇ dawˇ hpfuhˆ ve kʼo, yawˇ htaꞈ tawˆ cheˆ piˇ leh Hkriꞈ yaˇ awˬ moˍ hkʼaw maˇ kʼawꞈ chehˇ tcuh. (1 Kawˇrenˍhtuˆ 5:11-13; 6:9, 10) Awˬ lawn chi ve ngaˬ hui teˇ gʼaˇ le le kaꞈ Liꞈ hpu hkʼaw beˆ maˍ laˇ ve hkʼe gʼaꞈ te ve yoˬ. Yaꞈ hkʼaˇ, Gʼuiˬ sha ve canˇ paˍ lehˬ, ngaˬ hui awˬ nu ve chaw htaꞈ dawˇ cheˆ piˇ leh haꞈ pehnˇ ve maˇ cawˬ ve pa taw, hawˉ hkʼaˆ chawˇ hawˉ hkʼaˆ yaˇ miˇ chawˇ yaˇ miˇ heuˆ daꞈ ve htaꞈ ngaˬ hui maˇ haꞈ yuˬ ve tehꞈ she pfuhˍ laˇ ve yoˬ.

14. Gʼuiˬ sha ve kanˉ hkʼaˇ htaꞈ caˉ daꞈ ve heˍ laˇ ve hkʼawꞈ nawˉ lo a shu chehˇ taˍ ve le?

 ¹⁴ Canˇ paˍ hpawˇ a shu chehˇ ve htaꞈ shiˍ gʼa ve. Saˍtanˍ lehˬ heˍ ve tawˇ hkawˇ htaꞈ cuˇ leh Gʼuiˬ sha ve kanˉ hkʼaˇ htaꞈ te luˬ laˇ chehˇ ve yoˬ. Saˍtanˍ lehˬ “heˍ ve teˇ ceuˬ ve awˬ pa htawˇ hpehꞈ ve yoˬ.” (Yoˇhanˬ 8:44; Awˬ hkuiˉ puiˍ 3:1-5) Chi htaꞈ pa taw, yawˇ hpawˇ chehˇ ve chaw htaꞈ cuˇ leh Yaˬhoˉvaˬ ve kanˉ hkʼaˇ htaꞈ caˉ daꞈ ve heˍ tcuh chehˇ ve tehꞈ ngaˬ hui shiˍ ve yoˬ. Awˬ lawn chi ve htaꞈ caˉ daꞈ ve awˉ lawˉ peuˇ ve awˬ co˗e htaˇ ve htaꞈ ngaˬ hui gʼa shiˍ ve yoˬ.

15. Bon awˬ hoˉ teˇ hpaˍ Yeˍsuˆ leh yawˇ ve awˬ laꞈ gʼawˇ htaꞈ hkʼaˬ hkʼe te piˇ ve le?

¹⁵ Gʼuiˬ sha ve Yaˇ Yeˍsuˆ biˇ jaˇ ve chaw hpehꞈ leh anˇ tuˬ laiˉ ceuˬ te ve yoˬ. Chi hkʼe te gʼa ve htawˇ, Saˍtanˍ yawˇ ve chaw htaꞈ cuˇ leh Yeˍsuˆ htaꞈ caˉ daꞈ ve heˍ tcuh ve yoˬ. Tawˇ pa haˉ te kʼo, bon awˬ hoˉ teˇ hpaˍ lehˬ mvuhˇ miˬ yaˇ htaꞈ kʼoˆ piˇ ve, yawˇ “neˇ jawˇ mawˇ” ve kanˇ paˆ htaꞈ yehˇ ve pa taw, neˇ htaꞈ gʼaꞈ kʼoˬ gʼa ve yoˬ. (Maˍkuˆ 3:22) Leh Yeˍsuˆ htaꞈ suhˉ jehˬ piˇ htaˇ, yawˇ Gʼuiˬ sha htaꞈ maˇ shawˍ maˇ caˆ kʼoˆ ve tehꞈ, bon awˬ hoˉ teˇ hpaˍ she pfuhˍ piˇ sheˍ ve yoˬ. Yeˍsuˆ htaꞈ tiˇ pehˍ tuˬ mvuhˇ miˬ yaˇ kʼoˆ tuˬ kaꞈ awˬ gʼaˇ piˇ sheˍ ve yoˬ. (Maꞈhtehˍ 27:20) Peuˬ hkʼaw nawˉ Yeˍsuˆ ve awˬ laꞈ gʼawˇ laiˉ kaˬ lo ha lehˬ ve bon hkawˇ maˍ piˇ ve yoˬ. Yaꞈ hkʼaˇ, tawˍ taˍ paˍ “chaw awˬ moˍ lonˉ htaꞈ beˬ piˇ” leh Hkriꞈ yaˇ htaꞈ fawˉ mehˍ tcuh ve yoˬ. (Tcuh yaˇ 14:2, 19) Shaw nyi kuiˬ Taꞈ yehˬ Ha pa 12 maˬ 1 nyi 1998 hkʼawꞈ Tcuh yaˇ liꞈ 14:2 hkʼaw caˉ daꞈ taˍ ve htaꞈ kʼoˆ ve yoˬ. Oˇ kaˬ lo kʼoˆ ve, “Yuˇdaꞈ chaw tawˍ taˍ paˍ ha lehˬ ve bon hkawˇ htaꞈ maˇ haꞈ yuˬ ve ceh tiˉ maˇ heˆ. Maˇ dawˇ cawˇ ve yoˬ. Maˇ heˆ heˆ she pfuhˍ piˇ tuˬ awˬ hkʼaˇ ca ve lehˬ buiˇ shaˆ aˉ naˆ chaw hui Hkriꞈ yaˇ htaꞈ nyi cha tuˬ coˇ caˇ leh te piˇ ve yoˬ.”

16. Heˍ ve awˬ lawn htaꞈ ngaˬ hui gʼa kaˇ htaˇ, aˬ htoꞈ ma htaꞈ tawnˇ taˍ cawˇ ve le?

¹⁶ Saˍtanˍ lehˬ awˉ lawˉ peuˇ ve awˬ co˗e htaˇ ceh tiˉ heˍ piˇ ve maˇ heˆ. Yaꞈ hkʼaˇ, chi beuꞈ hkʼa gaˬ kaꞈ yawˇ heˍ chehˇ sheˍ ve yoˬ. Liꞈ hpu hkʼaw kʼoˆ ve, Saˍtanˍ lehˬ “miˬ guiˬ yaˇ hkʼa peu˗eˬ htaꞈ heˍ shehˍ hpaˇ hpehꞈ” ve yoˬ. (Hpeuꞈ maˍ ve 12:9) Gʼuiˬ sha ve kanˉ  hkʼaˇ maˇ heˆ leh sheh kʼai paˍ awˬ viˉ awˬ nyi htaꞈ caˉ daꞈ ve maˇ daꞈ ve awˬ lawn nawˬ gʼa kaˇ ve kʼo, Gʼuiˬ sha ve canˇ paˍ awˉ lawˉ peuˇ ve awˬ co˗e htaˇ, Yeˍsuˆ leh yawˇ ve awˬ laꞈ gʼawˇ htaꞈ hkʼaˬ hkʼe te piˇ jaw ve awˬ lawn htaꞈ tawnˇ taˍ sheˍ. Chi beuꞈ teˇ co˗e Yaˬhoˉvaˬ ve chaw htaꞈ fawˉ mehˍ piˇ leh Liꞈ hpu hkʼaw awˉ lawˉ htaˇ kʼoˆ laˇ taˍ ve hkʼa shuˍ she pfuhˍ piˇ chehˇ ve yoˬ. (Maꞈhtehˍ 5:11, 12) A shu hkʼawꞈ nawˉ lo chehˇ leh heˍ chehˇ ve htaꞈ ngaˬ hui shiˍ leh, heˍ ve htaꞈ ngaˬ hui maˇ gʼa na tuˬ teˇ ceuˬ ceuˬ gʼa te ve yoˬ. Awˬ ceuˬ oˇ ve lehˬ aˬ htoꞈ ma le?

17. Heˍ ve tawˇ hkawˇ kawˆ tuˬ cawˬ ve htaꞈ ngaˬ hui hkʼaˬ hkʼe te jaw hpaw˗e gʼa tuˬ le? (2 Tiˆmoˉseˍ 1:13) (Awˇ ceˍ awˇ fa “ Heˍ ve awˬ lawn gʼa kaˇ htaˇ hkʼaˬ hkʼe te cawˇ ve le?” htaꞈ nyi sheˍ.)

¹⁷ Heˍ ve awˬ lawn htaꞈ ngaˬ hui maˇ caˉ daꞈ. Heˍ ve awˬ lawn htaꞈ ngaˬ hui gʼa kaˇ htaˇ, hkʼaˬ hkʼe te cawˇ ve tcuh yaˇ Pawˇluꞈ hkʼa tawˍ lehˆ beˆ maˍ laˇ taˍ ve yoˬ. Yawˇ Tiˆmoˉseˍ htaꞈ kʼoˆ piˇ ve, ‘chaw teˇ hpaˍ kaˇ puiˇ kaˇ lao htaꞈ maˇ yonˍ tuˬ tawˇ piˇ leh Gʼuiˬ sha htaꞈ maˇ yawˆ yan ve kaˇ lao teˇ hpaˍ htaꞈ taˇ na.’ (1 Tiˆmoˉseˍ 1:3, 4; 4:7) Yaˇ ehˉ lehˬ miˬ chaˇ hkʼoˆ lo ce taˍ ve awˬ ceuˬ mawꞈ kʼaw hkʼaw gʼawˆ keu ve yoˬ. Yaꞈ hkʼaˇ, chaw mawˇ chi hkʼe maˇ te taˬ. Chi hkʼe te ve kʼo, kawˆ tuˬ cawˬ ve tehꞈ yawˇ shiˍ yoˬ. Chi hkʼa shuˍ shuˍ, heˍ ve awˬ lawn hkʼaˬ kaˬ lo laˬ ve ngaˬ hui shiˍ ve pa taw, maˇ caˉ daꞈ ve yoˬ. Ngaˬ hui hkʼaˬ htaˆ kaꞈ “daꞈ jaˇ biˇ jaˇ ve tawˇ hkawˇ htaꞈ” gʼa gʼawˆ tiˍ taˍ ve yoˬ.—2 Tiˆmoˉseˍ 1:13 gʼaw sheˍ.

18. Yaˬhoˉvaˬ ve kanˉ hkʼaˇ htaꞈ ngaˬ hui awˬ hpfuhˇ shiˍ leh yonˍ ve tehꞈ hkʼaˬ hkʼe hpeuꞈ maw piˇ gʼa ve le?

¹⁸ Ngaˬ hui ve kanˉ hkʼaˇ Yeˍsuˆ htaꞈ henˇ yuˬ ve 3 lawn htaꞈ caˉ daꞈ ve, awˬ lawn chi ve hkʼaw teˇ geh henˇ˗oˬ ve yoˬ. Nawˬ a shu yawˇ hkʼaˇ yawˇ Liꞈ hpu henˇ htaˇ, Gʼuiˬ sha ve kanˉ hkʼaˇ Yeˍsuˆ htaꞈ henˇ yuˬ ve awˬ nu ve awˬ hkʼaˇ htaꞈ chaˬ nyi sheˍ. Hkriꞈ yaˇ awˬ moˍ hkʼaw ve chaw Gʼuiˬ sha ve kanˉ hkʼaˇ htaꞈ yonˍ gʼa leh awˬ hpfuhˇ shiˍ tuˬ nawˬ ga piˇ sheˍ. Leh Yaˬhoˉvaˬ ve kanˉ hkʼaˇ htaꞈ awˬ hpfuhˇ shiˍ ve tehꞈ hpeuꞈ maw piˇ ve lehˬ, yawˇ ve kanˉ ka tiꞈ yeˬ ve hkʼaw caˉ leh te kʼai ve, Gʼuiˬ sha ve kanˉ hkʼaˇ beˆ maˍ laˇ ve htaꞈ hkʼa dehꞈ na yuˬ sheˍ. Awˬ lawn kʼo, chi Yaˬhoˉvaˬ ve a loˍ biˇ la tuˬ yawˇ yehˇ ve kanˉ hkʼaˇ hpehꞈ ve yoˬ. (Chiˇ mvuh ve 37:28) Yaˬhoˉvaˬ htaꞈ haꞈ leh yawˇ htaꞈ ka tiꞈ yeˬ ve kanˉ hkʼaˇ hkʼaw ngaˬ hui gʼa chehˇ ve daꞈ jaˇ ve awˬ vuiˬ hpehꞈ ve htaꞈ awˬ hpfuhˇ shiˍ sheˍ.