Ngaˬ 13 hkʼawꞈ gaˬ leh Yaˬhoˉvaˬ geh hkʼa dehꞈ maˇ meuˆ daꞈ˗o. Hkriꞈ yaˇ ve te hkʼaˇ dawˇ hkʼaˇ chi ve, oˇ ve, te maˇ hpehꞈ tehꞈ ngaˬ pa ngaˬ e kʼoˆ laˇ ve yoˬ. Aˬ ma te gaˇ kaꞈ maˇ gʼa. Hkriꞈ yaˇ te tuˬ ve kanˉ teˇ hpaˍ maˇ jaˇ. Yaꞈ hkʼaˇ, liꞈ henˇ kuiˬ lo ve awˬ chawˇ nyi˗a kʼo laiˉ ceuˬ te gʼa ve yoˬ. Yawˇ hui te gaˇ ve hkʼe te ve yoˬ. Yaˬhoˉvaˬ awˬ tehˬ cawˬ ve tehꞈ ngaˬ yonˍ ve htawˇ, yawˇ geh hkʼe taw maˇ meuˆ daꞈ˗o.

Ngaˬ maˇ hto toˇ˗o ve chaw maˇ hpehꞈ gaˇ. Ngaˬ hto toˇ ve awˬ naˍ riˍ cawˬ tuˬ teˇ pawˆ pawˆ kʼai ve yoˬ. Yaꞈ hkʼaˇ, ngaˬ maˇ gu leh yehˬ shehˍ hpaˇ geh tawˇ yaw daꞈ htaˇ kaꞈ ngaˬ hkʼa dehꞈ maˇ yaw gʼa. Ca kʼawꞈ guiˇ˗e tuˬ ve chaw, Liꞈ hpu henˇ chehˇ ve chaw, maˇ cawˬ leh hto toˇ˗e htaˇ kaꞈ ngaˬ ha lehˬ ve maˇ cawˬ. Leh chi ngaˬ hto toˇ˗e ve maˇ dawˇ cawˇ tuˬ te laˇ ve yoˬ. Oˇ ve teˇ yanˇ ngaˬ dawˇ ve, ‘awˬ nu ve chaw hkʼaˬ hkʼe te, teˇ shinˉ le le hto toˇ gʼa ve le? Nyi˗a kʼo ha lehˬ kuiˬ kaꞈ maˇ cawˬ.’

Ngaˬ laiˉ ceuˬ te gaˇ ve yoˬ. Ngaˬ 17 hkʼawꞈ htaˇ mawˇ gʼawˆ leh Awˆsaˍteˇriˇ˗aˇ mvuhˇ miˬ lo ca chehˇ˗e ve yoˬ. Oˇ ve teˇ yanˇ, ngaˬ pa ngaˬ e nyi ma luˬ leh ngaˬ htaꞈ dawˇ haˍ jaˇ. Yaꞈ hkʼaˇ, ngaˬ hpawnˬ daꞈ˗e ve, hto toˇ˗e ve, kʼai sheˍ ve tehꞈ yawˇ hui dawˇ ve yoˬ hehˉ.

 Awˆsaˍteˇriˇ˗aˇ mvuhˇ miˬ lo kʼai htaˇ, ngaˬ hpawnˬ daꞈ˗e ve hkʼa dehꞈ maˇ kʼai leh, ngaˬ hkʼe dawˇ ve yaˇ nehˬ teˇ hpaˍ geh awˬ chawˇ tanˬ te ve yoˬ. Ngaˬ hui hpawnˬ daꞈ˗e ve neˬ. Yaꞈ hkʼaˇ, awˬ nu ve teˇ nyi htaˇ, ngaˬ hui teˇ geh tzuhˬ dawˬ˗e leh mvuhˇ hpeuꞈ guiˇ kuiˬ lo pawehˇ kaˆ ve yoˬ. Oˇ htaˇ ve htaꞈ dawˇ nyi htaˇ, ngaˬ ve hkui sheh teˇ paˉ awˬ tehˬ ve hkʼaw naˆ keu leh teˇ paˉ kʼo Saˍtanˍ ve miˬ guiˬ lo naˆ keu taˍ ve htaꞈ shuˍ ve yoˬ. Teˇ paˉ˗ehˬ kaꞈ ngaˬ chehˇ maˇ gʼa ve htaꞈ shuˍ ve yoˬ.

Nyiˇ hkʼawꞈ peuˬ hkʼawꞈ nawˉ, awˬ viˉ awˬ nyi yaˇ miˇ teˇ gʼaˇ htaꞈ mawˬ daꞈ leh, ngaˬ ve a shaꞈ yaꞈ kʼaw hkʼaˬ ve teˇ caˆ lo kʼai chehˇ ve dawˇ nyi tuˬ yawˇ ga laˇ ve yoˬ. Awˬ tehˬ kʼo, yawˇ ngaˬ htaꞈ ga laˇ chehˇ ve yawˇ maˇ shiˍ. Ngaˬ chehˇ taˍ ve yehˬ hkʼaw yaˇ miˇ haˉ 5 gʼaˇ teˇ geh chehˇ ve yoˬ. Toˇ nyi shehˍ hpaˇ leh awˬ miˇ ma Htaˍma˗la ngaˬ chehˇ taˍ ve yehˬ hkʼaw teˇ shinˉ ca haˉ la tuˬ jehˬ piˇ ve yoˬ. Yawˇ ve awˬ hpawˇ Hkriꞈ yaˇ awˬ moˍ hkʼaw ve chaw geh kanˉ teˇ geh te htaˇ, yawˇ ngaˬ hui geh chehˇ ve yoˬ. Tawˇ yaw daꞈ ve, gʼuiˬ yaw daꞈ ve yoˬ. Chi hkʼe ve ngaˬ dawˇ cawˇ jaˇ. Yawˇ geh tawˇ yaw daꞈ sha ve yoˬ. Yawˇ geh tawˇ yaw daꞈ htaˇ, nyi ma sha jaˇ. Gʼuiˬ sha ve kanˉ coˇ caˇ leh te ve chaw kaꞈ pyawˍ ve cawˬ ve tehꞈ ngaˬ maˇ dawˇ nyi jaw.

Htaˍma˗la Gʼuiˬ sha ve kanˉ te ve nyi ma pfuhˇ jaˇ. Yawˇ awˬ tehˬ ve leh Gʼuiˬ sha ve kanˉ te ve htaꞈ haꞈ ve ngaˬ mawˬ htaˇ, ngaˬ kaꞈ chi hkʼe dawˇ tuˬ te laˇ ve yoˬ. Yawˇ puiˉ ve hpehꞈ ve hkʼe Yaˬhoˉvaˬ htaꞈ te piˇ ve awˬ ceuˬ ha lehˬ jaˇ ve yoˬ. Ngaˬ Yaˬhoˉvaˬ ve kanˉ hkʼa dehꞈ maˇ te ve pa taw, ha lehˬ ve maˇ cawˬ. Yawˇ hkʼaˬ htaˆ kaꞈ daꞈ ve hpawˇ dawˇ leh awˬ tehˬ ha lehˬ ve htaꞈ ngaˬ gʼa mawˬ htaˇ, chi ngaˬ htaꞈ kaꞈ awˬ bon cawˬ tuˬ te laˇ ve yoˬ. Yawˇ ve awˬ lawn Liꞈ hpu hkʼaw a yeˇ uiˍ ve awˬ tehˬ ve teˇ lawn htaꞈ ngaˬ dawˇ nawˇ tuˬ te laˇ ve yoˬ. Oˇ ve lehˬ, “Gʼuiˬ sha htaꞈ ha lehˬ ha kʼa oˉ kʼoˍ pui˗o. Ha lehˬ ve kʼa muiˬ hkawˇ htaꞈ kʼa leh, yawˇ mehˆ gʼuˇ suhˍ” lo teˇ gʼaˇ le le htaꞈ chi hkʼe te tcuh gaˇ ve yoˬ.—Chiˇ mvuh ve 100:2.

Htaˍma˗la hkʼa shuˍ ngaˬ ha lehˬ ve cawˬ gaˇ ve yoˬ. Yaꞈ hkʼaˇ, ngaˬ gʼa pa jaˇ tehꞈ shiˍ ve yoˬ. Teˇ pawˆ tiˉ hkʼa peu˗eˬ pa maˇ gʼa. Yaꞈ hkʼaˇ, awˬ lawn maˇ uiˍ ve htaꞈ awˉ lawˉ pa sheˍ ve yoˬ. Maˇ hto toˇ˗e sheˍ htaˇ, ngaˬ awˉ lawˉ gu leh teˇ pawˆ pawˆ kʼo teˇ tcuhˉ teˇ yanˇ gʼuˇ suhˍ peuˍ ve kaꞈ te ve yoˬ. Chi ngaˬ yonˍ gʼa tuˬ te laˇ ve yoˬ. Ngaˬ Liꞈ hpu htaꞈ yehˇ maˇ la htaˇ, Gʼuiˬ sha  ve kanˉ te ve pyawˍ jaˇ. Peuˬ hkʼawꞈ nawˉ maˇ maw, teˇ tcuhˉ teˇ yanˇ gʼuˇ suhˍ peuˍ ve teˇ ha pa le le te ve yoˬ.

Yaˬhoˉvaˬ ve kanˉ awˬ yanˇ hkʼa biˇ te ve chaw geh ngaˬ awˬ chawˇ te htaˇ, yawˇ hui a shaꞈ hkʼaˬ hkʼe ma gaˬ˗oˬ ve htawˇ maˇ kʼoˆ, Gʼuiˬ sha ve kanˉ teˇ geh te ve ha lehˬ ve yoˬ. Yawˇ hui ve daꞈ ve awˬ lawn ngaˬ a shaꞈ teꞈ kuiˬ hkʼaw aˬ htoꞈ ma a yeˇ uiˍ jaˇ ve dawˇ nyi tuˬ ga laˇ leh, ngaˬ teˇ nyi le le Liꞈ hpu gʼaw tuˬ kaꞈ ga laˇ ve yoˬ. Ngaˬ Gʼuiˬ sha ve kanˉ te ve ha lehˬ jaˇ leh, awˬ leh meuˇ htaˇ ngaˬ hkʼaˬ htaˆ kaꞈ gʼuˇ suhˍ peuˍ ve te ve yoˬ. Laiˉ hkʼawꞈ ve awˬ yanˇ awˬ hkʼaw lo chi ve teˇ pawˆ ngaˬ ha lehˬ tuˬ te laˇ leh Hkriꞈ yaˇ awˬ moˍ hkʼaw gʼa chehˇ ve nyi ma sha jaˇ.

Peuˬ hkʼawꞈ nawˉ teˇ hkʼawꞈ ngaˬ A˗lehˆ htaꞈ mawˬ daꞈ ve yoˬ. Yawˇ nyi ma nuˇ nehˬ leh ha lehˬ puiˉ jaˇ. Yawˇ Yaˬhoˉvaˬ htaꞈ haꞈ leh yawˇ ve kanˉ te ve htaꞈ dawˇ cawˇ jaˇ. Yawˇ ga piˇ shehˍ hpaˇ hpehꞈ leh hkʼaˬ htaˆ kaꞈ gʼuˇ suhˍ peuˍ ve te ve 6 hkʼawꞈ gaˬ˗oˬ. Maˬlaˬwiˬ mvuhˇ miˬ hto toˇ ve loˍ jaˇ kuiˬ awˬ ti lo teˇ pawˆ pawˆ yawˇ Gʼuiˬ sha ve kanˉ ca te ve yoˬ. Oˇ kaˬ lo daꞈ ve henˇ yuˬ tuˬ hpehꞈ ve Miˍshenˍnaˍliˍ te ve laiˉ gʼaˇ geh yawˇ Gʼuiˬ sha ve kanˉ teˇ geh te leh, a shaꞈ teꞈ kuiˬ hkʼaw Gʼuiˬ sha ve kanˉ te ve a yeˇ uiˍ jaˇ tehꞈ shawˍ tuˬ yawˇ htaꞈ awˬ gʼaˇ piˇ ve yoˬ.

2003 hkʼawꞈ htaˇ, ngaˬ hui heuˆ daꞈ leh oˇ htaˇ tanˬ leh ngaˬ hui Gʼuiˬ sha ve kanˉ awˬ yanˇ hkʼa biˇ teˇ geh te ve yoˬ. Ngaˬ hui daꞈ ve henˇ yuˬ tuˬ laiˉ ceuˬ gʼa leh Yaˬhoˉvaˬ ngaˬ hui htaꞈ awˬ bon naꞈ laˇ jaˇ.

2009 hkʼawꞈ htaˇ, Enˬdoˬneˇshaˇ conˇ hkʼaw Tiˬmawˇ˗Leˇsuhꞈteˇ mvuhˇ miˬ ehˉ hkʼaw ngaˬ hui htaꞈ Miˍshenˍnaˍliˍ te tcuh laˇ ve yoˬ. Ngaˬ hui cheˆ˗ehꞈ kʼai ve, ha lehˬ jaˇ ve, leh dawˇ haˍ ve yoˬ. 5 ha pa peuˬ hkʼawꞈ nawˉ, oˇ kaˬ lo Dinˍliˍ venˇ lonˉ lo gaˬ˗e ve yoˬ.

Ngaˬ hui oˇ kaˬ lo jiˆ kʼai htaˇ, laiˉ ceuˬ gʼa pa ve yoˬ. Chaw liˇ vaˇ liˇ awˬ suhˉ, chaw ceuˬ tawˇ hkawˇ awˬ suhˉ gʼa henˇ leh, maˇ caˇ jaw ve caˇ tuˬ gʼa caˇ leh, maˇ chehˇ jaw ve chehˇ kuiˬ htaꞈ chehˇ gʼa tuˬ, gʼa pa ve yoˬ. Ngaˬ hui hto toˇ˗e htaˇ, laiˉ gʼaˇ haˍ gʼawˇ jaˇ ve, shu fawˉ mehˍ piˇ ve, leh teˇ hpaˍ kʼo liꞈ kaꞈ maˇ gʼa henˇ ve htaꞈ gʼa mawˬ ve yoˬ. Chaw yaˇ hehnˇ jaˇ ve te  piˇ ve htaꞈ pa taw, laiˉ gʼaˇ awˬ suhˍ awˬ shaˍ hpawˇ leh nyi ma hpawˇ maˇ chehˇ sha ve yoˬ. *

Oˇ kaˬ lo Gʼuiˬ sha kanˉ te ve daꞈ jaˇ! Teˇ pawˆ htaˇ 13 hkʼawꞈ ve yaˇ miˇ Maˍriˆ htaꞈ ngaˬ mawˬ daꞈ ve yoˬ. * Yawˇ awˬ e suh˗e ve 2, 3 hkʼawꞈ gaˬ˗oˬ leh yawˇ awˬ pa htaꞈ kaꞈ maˇ mawˬ jaw. A shaꞈ htaꞈ hkʼaˬ hkʼe te tuˬ maˇ shiˍ ve yaˇ hkʼe yawˇ kaꞈ shuˍ ve yoˬ. Teˇ pawˆ htaˇ, ngaˬ tawnˇ gʼa ve yawˇ hawˬ leh nyi ma hkʼaw cawˬ ve awˬ ceuˬ ngaˬ htaꞈ kʼoˆ maˍ laˇ ve yoˬ. Ngaˬ yawˇ ve chaw ceuˬ tawˇ hkawˇ hkʼa dehꞈ maˇ yaw gʼa sheˍ ve pa taw, yawˇ aˬ htoˬ ma kʼoˆ ve ngaˬ maˇ na gʼa. Ngaˬ yawˇ htaꞈ awˬ gʼaˇ hkʼaˬ hkʼe te piˇ tuˬ awˬ hkʼaˇ shiˍ tuˬ, Yaˬhoˉvaˬ ga laˇ tuˬ bon lawˬ ve yoˬ. Peuˬ hkʼawꞈ nawˉ, yawˇ htaꞈ awˬ gʼaˇ piˇ tuˬ Liꞈ hpu awˬ tawn gʼaw maˍ piˇ ve yoˬ. 2, 3 hkʼawꞈ peuˬ hkʼawꞈ nawˉ, Maˍriˆ pa kʼai jaˇ ve htaꞈ ngaˬ gʼa mawˬ ve yoˬ. Yawˇ ha lehˬ ve cawˬ la leh, veuꞈ kʼaˇ veuꞈ ve kaꞈ pa ve yoˬ. Awˬ tehˬ ve yawˇ ve a shaꞈ teꞈ hkʼaˇ htaꞈ pa piˇ jaˇ. Yawˇ Baˆtiˆsaˬ haꞈ yuˬ˗oˬ leh Liꞈ hpu henˇ ve chaw kaꞈ laiˉ gʼaˇ cawˬ ve yoˬ. Chi teˇ hkui Maˍriˆ haꞈ laˇ ve leh gawˬ lehˍ ve htaꞈ gʼa ve yoˬ. Hkriꞈ yaˇ ve yehˬ kʼa lonˉ hkʼaw yawˇ gʼa chehˇ ve yoˬ.

Tiˬmawˇ˗Leˇsuhꞈteˇ mvuhˇ miˬ ehˉ hkʼaw hto toˇ ve kanˉ htaꞈ Yaˬhoˉvaˬ awˬ bon naꞈ laˇ jaˇ. Oˇ kaˬ lo hto toˇ ve maˇ˗awˍ ve chaw Baˆtiˆsaˬ haꞈ yuˬ ve 10 hkʼawꞈ ceh gaˬ sheˍ ve htawˇ, laiˉ gʼaˇ gʼuˇ suhˍ peuˍ ve te ve, ga piˇ shehˍ hpaˇ te ve, leh nyi haꞈ shaˉ paˍ te ve yoˬ. Laiˉ gʼaˇ kʼo oˇ kaˬ lo chaw ceuˬ tawˇ hkawˇ yuˬ tawˆ kuiˬ hkʼaw kanˉ te leh, laiˉ chaw ceuˬ tawˇ hkawˇ hkʼaw maˍ laˇ ve awˬ ceuˬ teˇ hpaˍ htaꞈ yuˬ tawˆ ve ga piˇ ve yoˬ. Hpawnˬ daꞈ htaˇ awˬ viˉ awˬ nyi kʼa muiˬ hkawˇ kʼa ve htaꞈ ngaˬ gʼa kaˇ ve, yawˇ hui kʼehˇ suhˍ lehˬ te ve htaꞈ gʼa mawˬ ve, leh yawˇ hui co ha hpawˇ uiˍ la mvuh la ve htaꞈ ngaˬ gʼa mawˬ ve ha lehˬ jaˇ.

Tiˬmawˇ˗Leˇsuhꞈteˇ leh Awˆsaˍteˇriˇ˗aˇ hkʼaw ve a shaꞈ teꞈ hkʼaˇ peun daꞈ jaˇ. Yaꞈ hkʼaˇ, ngaˬ ha lehˬ tuˬ te laˇ ve chi aꞈ kehˉ daꞈ ve maˇ cawˬ˗o tehꞈ dawˇ ve yoˬ. Teˇ pawˆ pawˆ chaw gʼawˬ caˇ ve kaˇ ehˉ chaw maˇ jaˇ ve hkʼaw gʼa mui ve yoˬ. Chi hkʼoˆ kaꞈ, shu tcuh hkʼaw lo ngaˇ guˇ leh gʼawˇ caˉ vuiˬ laˇ ve kaˇ hkʼaw kaꞈ gʼa mui ve yoˬ. Leh teˇ nyi nyi kʼo yehˬ ehˉ maˇ uiˍ leh haw jaˇ ve hkʼaw Liꞈ hpu gʼa maˍ ve yoˬ. Yehˬ oˇ ve hkʼaw teꞈ chiˉ maˇ hkʼawˇ leh gʼaˆ kaꞈ kʼaˆ caˇ chehˇ ve maˇ jaˇ. Choˬ kaˬ lo ve a shaꞈ teꞈ hkʼaˇ maˇ sha ve htawˇ, ngaˬ dawˇ ve “chi lehˬ ha lehˬ jaˇ!”

Ngaˬ pa ngaˬ e ngaˬ htaꞈ Yaˬhoˉvaˬ ve awˬ lawn maˍ laˇ tuˬ te gʼa ve hkʼe te leh, ngaˬ yaˇ nehˬ hpehꞈ htaˇ shoꞈ shaꞈ ve awˬ lawn cawˬ ve htaꞈ hkʼaˬ htaˆ kaꞈ ga laˇ ve awˬ bon uiˍ jaˇ. Tawˇ naˉ ve liꞈ 22:6 ngaˬ htaꞈ awˬ tehˬ hpehꞈ la ve gʼa mawˬ ve yoˬ. Ngaˬ pa ngaˬ e ngaˬ leh A˗lehˆ htaꞈ nyi hkʼaˇ suh jaˇ. Ngaˬ hui Yaˬhoˉvaˬ ve kanˉ te ve yawˇ hui gʼa mawˬ htaˇ ha lehˬ jaˇ. 2016 hkʼawꞈ gaˬ leh Awˆsaˍteˇriˇaˍshaˆ awˬ tcuhˆ puiˍ nyi haꞈ shaˉ ve awˬ ti lo ngaˬ hui htaꞈ toˇ nyi shehˍ hpaˇ te tcuh laˇ ve yoˬ.

Hto toˇ ve kanˉ ngaˬ maˇ dawˇ cawˇ tehꞈ dawˇ jaw ve htawˇ, chi teˇ hkui kanˉ te ve htaꞈ ngaˬ haꞈ jaˇ. A shaꞈ teꞈ hkʼaˇ hkʼaˬ hkʼe hpehꞈ ve htawˇ, awˬ tehˬ ha lehˬ ve lehˬ Yaˬhoˉvaˬ ve kanˉ nyi ma awˬ tawˬ hkʼa gaˬ te ve geh laˬ ve tehꞈ ngaˬ shiˍ ve yoˬ. 18 hkʼawꞈ A˗lehˆ geh Gʼuiˬ sha ve kanˉ teˇ geh te ve ngaˬ ha lehˬ jaˇ tuˬ te laˇ ve yoˬ. Daˍviˆ Yaˬhoˉvaˬ htaꞈ caˉ daꞈ ve awˬ tehˬ ve kʼoˆ ve, ‘nawˬ awˬ hkʼaw lo gawˬ lehˍ gʼa chehˇ ve chaw hkʼa peu˗eˬ gʼa ha lehˬ tuˬ yoˬ. Yawˇ hui ha lehˬ ve pa taw hkʼaˬ htaˆ kaꞈ kʼa muiˬ hkawˇ kʼa chiˇ mvuh chehˇ tuˬ yoˬ. Nawˬ htaꞈ pa taw yawˇ hui gʼa ha lehˬ chehˇ ve yoˬ.’ Chi ngaˬ na gʼa la ve yoˬ.—Chiˇ mvuh ve 5:11.