Yeˍsuˆ maˇ suh sheˍ htaˇ aˬ htoꞈ ma te Yeˍsuˆ Chiˇ mvuh ve liꞈ 22:1 hkʼaw Daˍviˆ kʼoˆ taˍ ve tawˇ hkawˇ hkʼe kʼoˆ ve le?

Yeˍsuˆ maˇ suh sheˍ htaˇ awˬ leh meuˇ yaw ve tawˇ hkawˇ lehˬ, Maꞈhtehˍ liꞈ 27:46 hkʼaw cawˬ taˍ ve yoˬ. Oˇ kaˬ lo kʼoˆ ve, “ngaˬ ve Gʼuiˬ sha˗oˬ, ngaˬ ve Gʼuiˬ sha˗oˬ, aˬ htoꞈ ma te nawˬ ngaˬ htaꞈ baˬ taˉ laˇ ve le?” Yeˍsuˆ kʼoˆ ve tawˇ hkawˇ chi lehˬ, Chiˇ mvuh ve liꞈ 22:1 hkʼaw Daˍviˆ kʼoˆ taˍ ve awˬ ceuˬ htaꞈ awˬ tehˬ hpehꞈ la ve yoˬ. (Maˍkuˆ 15:34) Oˇ ve teˇ yanˇ yawˇ chi hkʼe kʼoˆ ve lehˬ, yonˍ ve maˇ cawˬ ve maˇ heˆ, leh Yaˬhoˉvaˬ maˇ ga laˇ tehꞈ dawˇ leh nyi ma luˬ chehˇ ve maˇ heˆ. Aˬ htoꞈ ma te yawˇ gʼa suh˗e ve yawˇ hkʼa dehꞈ shiˍ leh yawˇ kaꞈ ha lehˬ ha kʼa ve hkʼaw chi hkʼe te ve yoˬ. (Maꞈhtehˍ 16:21; 20:28) Yeˍsuˆ yawˇ suh la yoˬ te htaˇ, Yaˬhoˉvaˬ Yeˍsuˆ htaꞈ maˇ “haꞈ shaˉ” laˇ ve tehꞈ yawˇ shiˍ ve yoˬ. (Yawˇbaˆ 1:10) Chi htaꞈ pa taw Yaˬhoˉvaˬ Yeˍsuˆ htaꞈ maˇ haꞈ shaˉ piˇ ve lehˬ yawˇ tuꞈ jaˇ hkanˍ jaˇ ve hkʼaw gʼa suh˗e ve htawˇ, yawˇ ka tiꞈ yeˬ gʼa ve tehꞈ hpeuꞈ maw piˇ gʼa tuˬ awˬ pon yoˬ.—Maˍkuˆ 14:35, 36.

Aˬ htoꞈ ma te Yeˍsuˆ Chiˇ mvuh ve liꞈ 22:1 hkʼaw ve kʼoˆ ve le? Chi ngaˬ hui hkʼa dehꞈ maˇ shiˍ ve htawˇ, hpehꞈ kʼai gʼa ve awˬ hkʼaˇ teˇ hpaˍ hpaˍ htaꞈ teˇ geh nyi sheˍ. *

Yeˍsuˆ chi hkʼe kʼoˆ ve lehˬ, yawˇ suh˗e ve htaꞈ Yaˬhoˉvaˬ maˇ tawˍ laˇ ve tehꞈ kʼoˆ ve hpehꞈ kʼai gʼa˗aw laˇ? Yeˍsuˆ htaiˍ hkʼawꞈ piˇ tuˬ “chaw hkʼa peu˗eˬ awˬ pon suh” htaˇ, Yaˬhoˉvaˬ maˇ ga piˇ.—Heˍbrehˇ 2:9.

Yeˍsuˆ yawˇ hkawˇ na ve chaw htaꞈ Chiˇ mvuh ve liꞈ kaˇ nanˉ uiˍ 22 hkʼa peu˗eˬ gʼaw nyi tuˬ kʼoˆ  piˇ ve hpehꞈ kʼai gʼa˗aw laˇ? Yuˇdaꞈ chaw maˇ˗awˍ ve kʼo, Chiˇ mvuh ve Liꞈ hpu awˬ tawn htaꞈ tawnˇ ve dawˇ cawˇ ve yoˬ. Chiˇ mvuh ve Liꞈ hpu awˬ tawn hkʼaw teˇ tawn htaꞈ yawˇ hui gʼa kaˇ htaˇ, yawˇ hui oˇ ve teˇ lawn hkʼaw laiˉ tawn htaꞈ tawnˇ gʼa ve yoˬ. Chiˇ mvuh ve liꞈ 22:1 hkʼaw ve awˬ lawn htaꞈ Yeˍsuˆ dawˇ nyi htaˇ, awˬ tawn chi ve hkʼaw yawˇ suh˗e tuˬ ve htaꞈ caˉ daꞈ ve tcuh kaˍ paˍ tawˇ hkawˇ kʼoˆ taˍ ve, yawˇ ve awˬ laꞈ gʼawˇ hpehꞈ ve Yuˇdaꞈ chaw awˬ nu ve Liꞈ hpu awˬ tawn htaꞈ kaꞈ tawnˇ gʼa tuˬ ga piˇ ve yoˬ. (Chiˇ mvuh ve 22:7, 8, 15, 16, 18, 24) Chi hkʼoˆ kaꞈ, Chiˇ mvuh ve liꞈ chi awˬ leh meuˇ teˇ tawn lo, Yaˬhoˉvaˬ lehˬ miˬ guiˬ chi ve hkʼa peu˗eˬ hkʼoˆ Jawˇmawˇ hpehꞈ leh uˉ peunˍ chehˇ ve tehꞈ yawˇ hui chiˇ mvuh tuˬ ga piˇ ve yoˬ.—Chiˇ mvuh ve 22:27-31.

Yeˍsuˆ yaꞈ kuiˬ maˇ cawˬ tehꞈ kʼoˆ tuˬ Daˍviˆ ve tawˇ hkawˇ htaꞈ kʼoˆ ve hpehꞈ kʼai gʼa˗aw laˇ? Yeˍsuˆ htaꞈ maˇ tiˇ pehˍ sheˍ htaˇ yawˇ Gʼuiˬ sha htaꞈ maˇ shawˍ maˇ caˆ kʼoˆ ve tehꞈ she pfuhˍ leh suhˉ jehˬ cheˆ piˇ ve yoˬ. (Maꞈhtehˍ 26:65, 66) Awˬ lawn chi mvuhˇ hpeuꞈ htaˇ haˆ haˆ jehˬ cheˆ piˇ ve yoˬ. Leh yawˇ hui te ve awˬ ceuˬ kaꞈ awˬ liˇ awˬ hkʼaˇ htaꞈ maˇ cawˇ. (Maꞈhtehˍ 26:59; Maˍkuˆ 14:56-59) Yeˍsuˆ chi hkʼe kʼoˆ htaˇ, yawˇ chi hkʼe te yaꞈ leh suh keunˍ ve maˇ heˆ tehꞈ kʼoˆ ve hpehꞈ kʼai gʼa ve yoˬ.

Chiˇ mvuh ve liꞈ bvuhꞈ paˍ Daˍviˆ Yaˬhoˉvaˬ Yeˍsuˆ htaꞈ nyi hkʼaˇ maˇ suh tehꞈ kʼoˆ ve tawˇ hkawˇ Yeˍsuˆ Daˍviˆ ve tawˇ htaꞈ kʼoˆ ve hpehꞈ kʼai gʼa˗aw laˇ? Daˍviˆ tuꞈ ve hkanˍ ve Yaˬhoˉvaˬ hpuˇ tcuh ve htawˇ, Gʼuiˬ sha yawˇ htaꞈ nyi hkʼaˇ maˇ suh ve tehꞈ kʼoˆ gaˇ ve maˇ heˆ. Daˍviˆ chi hkʼe kʼoˆ ve lehˬ, yawˇ maˇ yonˍ ve kaꞈ maˇ heˆ. Peuˬ hkʼawꞈ nawˉ Daˍviˆ kʼoˆ ve, Yaˬhoˉvaˬ yawˇ ve chaw htaꞈ awˬ tehˬ awˬ na ga ponˬ piˇ tuˬ tehꞈ Daˍviˆ yonˍ gʼa ve yoˬ. Chi hkʼe kʼoˆ peuˬ hkʼawˆ nawˉ, Yaˬhoˉvaˬ kaꞈ yawˇ htaꞈ awˬ bon naꞈ piˇ chehˇ sheˍ. (Chiˇ mvuh ve 22:23, 24, 27) Leh chi ve hkʼa shuˍ shuˍ Yeˍsuˆ lehˬ “Daˍviˆ ve Yaˇ hpu” hpehꞈ ve htawˇ, suhˆ hkuiˉ daw hkʼoˆ lo gʼa tuꞈ gʼa hkanˍ ve yoˬ. Yaꞈ hkʼaˇ, Yaˬhoˉvaˬ yawˇ htaꞈ nyi hkʼaˇ maˇ suh ve tehꞈ kʼoˆ gaˇ ve maˇ heˆ.—Maꞈhtehˍ 21:9.

Gʼuiˬ sha yawˇ chi hkʼe te ve lehˬ, Yeˍsuˆ suh htaˇ hkʼa gaˬ ka tiꞈ yeˬ ve tehꞈ hpeuꞈ maw laˇ tuˬ Yaˬhoˉvaˬ Yeˍsuˆ htaꞈ maˇ nyi haꞈ shaˉ piˇ ve pa taw, Yeˍsuˆ nyi ma luˬ jaˇ tehꞈ kʼoˆ ve hpehꞈ kʼai gʼa˗aw laˇ? Yaˬhoˉvaˬ yawˇ ve Yaˇ gʼa tuꞈ gʼa hkanˍ leh gʼa suh˗e tuˬ tehꞈ yawˇ awˉ lawˉ htaˇ kaꞈ maˇ gʼa dawˇ teh taˍ. Yaꞈ hkʼaˇ, Aˍdanˍ leh Eˇvaꞈ Gʼuiˬ sha htaꞈ hpfuhˆ peuˬ hkʼawꞈ nawˉ, chi hkʼe te tuˬ loˍ ve yoˬ. Yeˍsuˆ teꞈ chiˉ kaꞈ maˇ gʼa te yaꞈ. Yaꞈ hkʼaˇ, Saˍtanˍ kʼoˆ ve htaꞈ hkʼawꞈ piˇ tuˬ, Yeˍsuˆ gʼa tuꞈ gʼa hkanˍ leh gʼa suh˗e ve yoˬ. Aˍdanˍ te shonˇ kʼai taˍ ve htaꞈ kʼawꞈ gʼa hkʼawꞈ tuˬ, Yeˍsuˆ htaiˍ hkʼawꞈ laˇ ve yoˬ. (Maˍkuˆ 8:31; 1 Peˍtruˆ 2:21-24) Yaˬhoˉvaˬ Yeˍsuˆ htaꞈ teˇ tcuhˉ teˇ yanˇ maˇ haꞈ shaˉ piˇ htaˇ, awˬ lawn chi hpehꞈ kʼai gʼa ve yoˬ. Chi lehˬ Gʼuiˬ sha Yeˍsuˆ htaꞈ te piˇ ve awˉ lawˉ teˇ pawˆ hpehꞈ ve yoˬ.

Aˬ htoꞈ ma te Yaˬhoˉvaˬ Yeˍsuˆ htaꞈ chi hkʼe te suh˗e tcuh ve le? tehꞈ, awˬ laꞈ gʼawˇ teˇ hpaˍ awˬ lawn chi shiˍ tuˬ Yeˍsuˆ ga piˇ ve hpehꞈ kʼai gʼa˗aw laˇ? * Yeˍsuˆ suhˆ hkuiˉ daw hkʼoˆ lo chaw haiˬ hkʼe leˇ gʼa te suh˗e ve lehˬ, laiˉ gʼaˇ awˬ pon kʼo haꞈ yuˬ maˇ gʼa. (1 Kawˇrenˍhtuˆ 1:23) Aˬ htoꞈ ma te Yeˍsuˆ chi hkʼe gʼa te suh˗e ve le tehꞈ, awˬ laꞈ gʼawˇ teˇ hpaˍ hkʼa dehꞈ dawˇ nyi htaˇ, yawˇ chaw haiˬ hpehꞈ ve maˇ heˆ. Yawˇ chaw yaˇ htaꞈ ga ponˬ laˇ shehˍ hpaˇ hpehꞈ ve tehꞈ yawˇ hui na gʼa la ve yoˬ.—Gaˍlaˍtiˆ 3:13, 14.

Chiˇ mvuh ve liꞈ 22:1 hkʼaw ve Yeˍsuˆ hkʼaˬ hkʼe kʼoˆ ve htawˇ maˇ kʼoˆ, oˇ ve teˇ yanˇ Yaˬhoˉvaˬ loˍ ve htaꞈ yawˇ gʼaꞈ te chehˇ ve tehꞈ shiˍ ve yoˬ. Liꞈ hpu awˬ tawn chi ve htaꞈ yawˇ kʼoˆ peuˬ hkʼawꞈ nawˉ, “kanˉ te peuˬ” tehꞈ yawˇ kʼoˆ ve yoˬ. (Yoˇhanˬ 19:30; Luˉkaꞈ 22:37) Yaˬhoˉvaˬ Yeˍsuˆ htaꞈ maˇ haꞈ shaˉ piˇ ve awˬ yanˇ teˇ yanˇ htaˇ, yawˇ miˬ guiˬ hkʼoˆ lo ve kanˉ hkʼa peu˗eˬ htaꞈ te biˇ gʼa ve yoˬ. “Moˉseˍ ve awˬ liˇ tawˇ hkawˇ liꞈ awˬ hkʼaw lo maˇ kʼoˆ, Gʼuiˬ sha ve tcuh kaˍ paˍ hui ve liꞈ teˇ hpaˍ awˬ hkʼaw lo maˇ kʼoˆ, chiˇ mvuh ve liꞈ teˇ hpaˍ awˬ hkʼaw lo htawˇ maˇ kʼoˆ” Yeˍsuˆ htaꞈ hkʼa caˉ daꞈ ve bvuhꞈ taˍ ve awˬ ceuˬ hkʼa peu˗eˬ htaꞈ yawˇ te biˇ gʼa ve yoˬ.—Luˉkaꞈ 24:44.