1. Yaˬhoˉvaˬ yawˇ ve chaw teˇ hpaˍ htaꞈ hkʼaˬ hkʼe nyi mawˬ ve le?

 “Gʼuiˬ sha lehˬ yawˇ ve chaw teˇ hpaˍ htaꞈ nyi ma cawˇ ve yoˬ.” (Chiˇ mvuh ve 149:4) Chi ngaˬ hui ha lehˬ jaˇ tuˬ te laˇ ve yoˬ. Yaˬhoˉvaˬ ngaˬ hui htaꞈ daꞈ ve awˬ ceuˬ nyi mawˬ ve yoˬ. Ngaˬ hui hpehꞈ chehˇ ve htaꞈ mawˬ leh ngaˬ hui hkʼaˬ hkʼe taw uiˍ la mvuh la gʼa tuˬ yawˇ shiˍ ve yoˬ. Leh Gʼuiˬ sha ngaˬ hui yawˇ htaꞈ awˬ chawˇ te gʼa tuˬ ga laˇ ve yoˬ. Ngaˬ hui yawˇ htaꞈ hkʼaˬ htaˆ kaꞈ ka tiꞈ yeˬ ve kʼo, yawˇ ngaˬ hui awˬ paˇ lo chehˇ tuˬ yoˬ.—Yoˇhanˬ 6:44.

2. Aˬ htoꞈ ma te chaw teˇ hpaˍ hpaˍ Yaˬhoˉvaˬ yawˇ htaꞈ haꞈ ve laˇ tehꞈ maˇ yonˍ gʼa ve le?

² Chaw teˇ hpaˍ hpaˍ kʼoˆ ve, ‘Yaˬhoˉvaˬ yawˇ ve kanˉ te ve chaw htaꞈ haꞈ ve tehꞈ ngaˬ shiˍ ve yoˬ. Yaꞈ hkʼaˇ, Gʼuiˬ sha ngaˬ htaꞈ awˬ tehˬ tehˬ haꞈ ve laˇ tehꞈ, ngaˬ hkʼaˬ hkʼe te yonˍ gʼa tuˬ ve le?’ Aˬ htoꞈ ma te chaw teˇ hpaˍ hpaˍ chi hkʼe na ve le? Awˬ viˉ awˬ nyi yaˇ miˇ Oˇsaˆnaˇ, * maˇ uiˍ sheˍ htaˇ kaꞈ maˇ daꞈ ve awˬ ceuˬ gʼa hpuˇ ve yoˬ. Yawˇ kʼoˆ ve, “Baˆtiˆsaˬ haꞈ yuˬ htaˇ ngaˬ ha lehˬ jaˇ leh gʼuˇ suhˍ peuˍ ve tanˬ te ve yoˬ. Yaꞈ hkʼaˇ, 15 hkʼawꞈ peuˬ hkʼawꞈ nawˉ maˇ uiˍ sheˍ htaˇ, maˇ daꞈ ve awˬ lawn gʼa hpuˇ ve htaꞈ teˇ pawˆ kʼawꞈ dawˇ nawˇ la ve yoˬ. Yaˬhoˉvaˬ ngaˬ htaꞈ haꞈ laˇ tuˬ awˬ hpfuhˇ maˇ cawˬ tehꞈ tanˬ dawˇ la ve yoˬ. Leh yawˇ ngaˬ htaꞈ maˇ haꞈ laˇ˗oˬ tehꞈ dawˇ ve yoˬ.” Gʼuˇ suhˍ peuˍ ve Yoˍaˆ kaꞈ maˇ uiˍ sheˍ htaˇ maˇ daꞈ ve awˬ lawn hkʼa shuˍ gʼa hpuˇ ve yoˬ. Yawˇ kʼoˆ ve, “ngaˬ Yaˬhoˉvaˬ nyi hkʼaˇ suh tuˬ te piˇ gaˇ ve pa taw, ngaˬ awˬ to chiˇ aꞈ piˇ ve yoˬ. Yaꞈ hkʼaˇ, Gʼuiˬ sha ngaˬ htaꞈ haꞈ laˇ tuˬ awˬ nyi maˇ cawˬ tehꞈ ngaˬ dawˇ ve yoˬ.”

3. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

³ Chi awˬ gʼuˇ suhˍ htaˇ kʼoˆ kʼai peuˬ ve, awˬ viˉ awˬ nyi yaˇ miˇ 2 gʼaˇ hkʼe nawˬ kaꞈ dawˇ tuˬ yoˬ hehˉ. Nawˬ Yaˬhoˉvaˬ htaꞈ haꞈ jaˇ  ve htawˇ, Yaˬhoˉvaˬ nawˬ htaꞈ awˬ tehˬ haꞈ ve laˇ tehꞈ, nawˬ htawˇ dawˇ nawˬ dawˇ cawˬ ve yoˬ hehˉ. Yaˬhoˉvaˬ nawˬ htaꞈ haꞈ leh awˬ tehˬ dawˇ haˍ laˇ ve tehꞈ aˬ htoꞈ ma te nawˬ gʼa yonˍ cawˇ ve le? Yaˬhoˉvaˬ nawˬ htaꞈ maˇ haꞈ laˇ ve tehꞈ nawˬ dawˇ htaˇ aˬ htoꞈ ma ga laˇ tuˬ le? Na hkawˇ chi ve teˇ hpaˍ hkʼawꞈ laˇ hkawˇ htaꞈ teˇ geh nyi sheˍ.

4. Yaˬhoˉvaˬ ngaˬ hui htaꞈ haꞈ laˇ˗aw laˇ tehꞈ htawˇ dawˇ nawˬ dawˇ cawˬ htaˇ aˬ htoꞈ ma te kawˆ tuˬ uiˍ jaˇ ve le?

⁴ Haꞈ ve lehˬ kanˇ paˆ cawˬ jaˇ. Yaˬhoˉvaˬ ngaˬ hui htaꞈ haꞈ leh hkʼaˬ htaˆ kaꞈ ga laˇ gaˇ ve tehꞈ ngaˬ hui yonˍ htaˇ, ngaˬ hui a shaꞈ teꞈ kuiˬ hkʼaw shoꞈ shaꞈ ve aˬ htoꞈ ma gʼa hpuˇ ve htawˇ, nyi ma awˬ tawˬ hkʼa gaˬ Yaˬhoˉvaˬ ve kanˉ te gaˇ tuˬ yoˬ. Yaˬhoˉvaˬ ngaˬ hui htaꞈ haꞈ leh awˬ tehˬ dawˇ haˍ laˇ ve laˇ tehꞈ, htawˇ dawˇ nawˬ dawˇ cawˬ ve kʼo, “awˬ tehˬ awˬ na gʼaˇ nuˇ ve chaw hpehꞈ ve yoˬ.” (Tawˇ naˉ ve 24:10) Ngaˬ hui awˬ gʼaˇ nuˇ htaˇ, Gʼuiˬ sha maˇ haꞈ laˇ˗oˬ dawˇ ve yoˬ. Chi hkʼe te htaˇ Saˍtanˍ beˬ sha jaˇ.—Eˇfeˇsuꞈ 6:16.

5. Awˬ viˉ awˬ nyi teˇ hpaˍ Gʼuiˬ sha yawˇ htaꞈ haꞈ laˇ˗aw laˇ tehꞈ htawˇ dawˇ nawˬ dawˇ cawˬ ve chaw hkʼaˬ hkʼe hpehꞈ ve le?

⁵ Awˬ viˉ awˬ nyi teˇ hpaˍ kʼo, Yaˬhoˉvaˬ yawˇ htaꞈ haꞈ laˇ˗aw laˇ tehꞈ maˇ yonˍ gʼa ve pa taw, co ha hpawˇ awˬ gʼaˇ nuˇ ve yoˬ. Nyi haꞈ shaˉ paˍ teˇ gʼaˇ Cehˍenˍ kʼoˆ ve, “ngaˬ beˍteˍlaˆ hkʼaw kanˉ te leh shu mvuhˇ miˬ lo ve Hkriꞈ yaˇ awˬ moˍ hkʼaw Gʼuiˬ sha kanˉ gʼa te ve ha lehˬ jaˇ ve htawˇ, ngaˬ te ve awˬ ceuˬ Yaˬhoˉvaˬ htaꞈ te piˇ leh yawˇ haꞈ yuˬ laˇ tuˬ ve laˇ tehꞈ maˇ yonˍ gʼa ve yoˬ. Yaˬhoˉvaˬ ngaˬ ve bon lawˬ hkawˇ htaꞈ na laˇ˗aw laˇ tehꞈ ngaˬ kaꞈ hkʼa dehꞈ maˇ yonˍ gʼa˗oˬ ve yoˬ.” Eˇvaꞈ Gʼuiˬ sha kanˉ awˬ yanˇ hkʼa biˇ te ve kʼoˆ ve, “ngaˬ hkʼaˇ ngaˬ gʼa hpuˇ ve Gʼuiˬ sha ngaˬ hui htaꞈ haꞈ laˇ˗aw laˇ tehꞈ htawˇ dawˇ nawˬ dawˇ cawˬ ve kʼo kawˆ tuˬ cawˬ jaˇ. Chi ngaˬ hui Gʼuiˬ sha htaꞈ gʼaˇ va ve teˇ ceuˬ le le htaꞈ heuˆ la kuiˬ cawˬ jaˇ ve pa taw yoˬ. Chi ngaˬ hui ha lehˬ tuˬ maˇ te laˇ leh ngaˬ hui Gʼuiˬ sha ve kanˉ maˇ te gaˇ tuˬ kaꞈ te laˇ ve yoˬ.” Maiˉhkeunˇ hkʼaˬ htaˆ kaꞈ gʼuˇ suhˍ peuˍ ve leh nyi haꞈ shaˉ paˍ te chehˇ ve kʼoˆ ve, “Gʼuiˬ sha nawˬ htaꞈ haꞈ leh dawˇ haˍ ve tehꞈ nawˬ maˇ yonˍ ve kʼo, nawˬ Gʼuiˬ sha geh awˬ meu˗eˇ awˬ meu˗eˇ vuiˇ daꞈ kʼai tuˬ yoˬ.”

6. Gʼuiˬ sha ngaˬ htaꞈ haꞈ laˇ˗aw laˇ tehꞈ htawˇ dawˇ nawˬ dawˇ cawˬ la htaˇ hkʼaˬ hkʼe te cawˇ ve le?

⁶ Htawˇ dawˇ nawˬ dawˇ cawˬ ve ngaˬ hui ve yonˍ hkʼaˇ htaꞈ heuˆ la kuiˬ cawˬ jaˇ tehꞈ, awˬ lawn chi ve teˇ hpaˍ ngaˬ hui htaꞈ maˍ laˇ ve yoˬ. Chi hkʼe hpehꞈ ve kʼo, dawˇ hkʼaˇ chi hkʼe ve nawˬ ve nyi ma hkʼaw cawˬ htaˇ nawˬ hkʼaˬ hkʼe te cawˇ ve le? Awˬ lawn oˇ ve htaꞈ nawˬ taˇ kʼawꞈ dawˇ nyi˗o. Awˬ lawn oˇ ve htaꞈ maˇ gʼa “dawˇ hkiˉ” tuˬ nawˬ htaꞈ Yaˬhoˉvaˬ ga laˇ tcuh sheˍ. ‘Gʼuiˬ sha lo laˬ ve, dawˇ sha gaˇ sha ve teˇ ceuˬ lehˬ, nawˬ ve nyi ma leh nawˬ ve dawˇ hkʼaˇ teˇ hpaˍ htaꞈ haꞈ shaˉ laˇ tcuh˗o.’ (Chiˇ mvuh ve 139:23; Hpiˇliˇpiˆ  4:6, 7) Nawˬ teˇ gʼaˇ tiˉ chehˇ taˍ ve maˇ heˆ tehꞈ tawnˇ taˍ sheˍ. Awˬ nu ve awˬ viˉ awˬ nyi kaꞈ awˬ lawn chi hkʼe ve gʼa hpuˇ ve yoˬ. Oˇ htaˇ ve Gʼuiˬ sha kanˉ te ve chaw kaꞈ, dawˇ hkʼaˇ chi hkʼe ve htaꞈ gʼa tawˍ daꞈ ve yoˬ. Tcuh yaˇ Pawˇluꞈ ve awˬ lawn ngaˬ hui htaꞈ hkʼaˬ hkʼe maˍ laˇ gʼa ve teˇ geh nyi sheˍ.

7. Pawˇluꞈ shoꞈ shaꞈ ve aˬ htoꞈ ma gʼa hpuˇ ve le?

⁷ Teˇ pawˆ pawˆ nawˬ awˬ vuiˬ laiˉ ceuˬ cawˬ leh te maˇ gʼa tehꞈ dawˇ ve pa taw, htawˇ dawˇ nawˬ dawˇ cawˬ˗aw laˇ? Cawˬ ve kʼo nawˬ kaꞈ Pawˇluꞈ hkʼa shuˍ dawˇ ve yoˬ. Yawˇ Hkriꞈ yaˇ awˬ moˍ teˇ moˍ htaꞈ ceh tiˉ dawˇ haˍ ve maˇ heˆ. Yaꞈ hkʼaˇ, yawˇ “Hkriꞈ yaˇ awˬ moˍ hkʼa peu˗eˬ awˬ pon dawˇ haˍ dawˇ hkiˉ ve” yoˬ. (2 Kawˇrenˍhtuˆ 11:23-28) Nawˬ maˇ chehˇ sha ve pa taw, ha lehˬ ve maˇ cawˬ tehꞈ dawˇ˗aw laˇ? Pawˇluꞈ kaꞈ, ‘awˬ suhˍ awˬ shaˍ hpawˇ aˉ chuˇ teˇ maˬ tcuhˍ piˇ ve’ htaꞈ gʼa yeunˇ hkanˍ ve yoˬ. Maˇ chehˇ sha leh yawˇ naˬ jaˇ tuˬ te piˇ ve htaꞈ yuˬ baˬ gaˇ ve yoˬ hehˉ. (2 Kawˇrenˍhtuˆ 12:7-10) Maˇ biˇ ve chaw hpehꞈ leh a shu yawˇ awˬ to htaꞈ awˬ gʼaˇ nuˇ ve pa taw, nawˬ nyi ma luˬ˗aw laˇ? Pawˇluꞈ kaꞈ hkʼa shuˍ yoˬ. Yawˇ kʼoˆ ve, “ngaˬ lehˬ hpehꞈ bawˬ jaˇ, dawˇ haˍ jaˇ ve chaw teˇ gʼaˇ hpehꞈ ve yoˬ.” Cawˇ ve htaꞈ te tuˬ yawˇ awˬ to htaꞈ hkʼaˬ htaˆ kaꞈ gʼa tawˍ daꞈ ve yoˬ.—Roˉmaꞈ 7:21-24.

8. Pawˇluꞈ shoꞈ shaꞈ ve gʼa hpuˇ ve htaꞈ tawˍ daꞈ gʼaˇ tuˬ aˬ htoꞈ ma ga piˇ ve le?

⁸ Pawˇluꞈ shoꞈ shaꞈ ve gʼa hpuˇ maˇ jaˇ leh yawˇ awˬ gʼaˇ nuˇ tuˬ te piˇ ve htawˇ, Yaˬhoˉvaˬ ve kanˉ caˉ leh te sheˍ ve yoˬ. Chi hkʼe te gʼa tuˬ yawˇ htaꞈ aˬ htoꞈ ma ga piˇ ve le? Pawˇluꞈ yawˇ awˬ gʼaˇ nuˇ ve aˬ htoꞈ ma cawˬ ve hkʼa dehꞈ shiˍ ve yoˬ. Yaꞈ hkʼaˇ, htaiˍ hkʼawꞈ laˇ ve awˬ hpfuhˇ htaꞈ yawˇ hkʼa dehꞈ yonˍ ve yoˬ. Yawˇ Yeˍsuˆ ka tiꞈ te taˍ laˇ ve htaꞈ shiˍ ve yoˬ. Oˇ kaˬ lo kʼoˆ ve, ‘Yaˇ hpu htaꞈ hkʼa yonˍ ve chaw hkʼa peu˗eˬ co tiꞈ ha tiꞈ htaꞈ gʼa ve yoˬ.’ (Yoˇhanˬ 3:16; Roˉmaꞈ 6:23) Htaiˍ hkʼawꞈ ve awˬ hpfuhˇ htaꞈ yonˍ ve awˬ moˍ hkʼaw Pawˇluꞈ kaꞈ teˇ gʼaˇ chehˇ taˍ ve yoˬ. Yawˇ ve venˇ baˆ hkʼaˬ hkʼe taw uiˍ jaˇ ve htawˇ, venˇ baˆ te yaꞈ leh dawˇ hpfuhˆ ve chaw htaꞈ Yaˬhoˉvaˬ venˇ baˆ hpehˇ laˇ tuˬ yoˬ tehꞈ yawˇ yonˍ ve yoˬ.—Chiˇ mvuh ve 86:5.

9. Gaˍlaˍtiˆ liꞈ 2:20 hkʼaw Pawˇluꞈ kʼoˆ ve tawˇ hkawˇ ngaˬ hui htaꞈ aˬ htoꞈ ma maˍ laˇ ve le?

⁹ Pawˇluꞈ Yaˬhoˉvaˬ ve kanˉ caˉ leh te gʼa tuˬ ga piˇ ve teˇ ceuˬ lehˬ, Gʼuiˬ sha Yeˍsuˆ htaꞈ cuˇ leh Pawˇluꞈ htaꞈ haꞈ ve tehꞈ hpeuꞈ maw laˇ ve htaꞈ yawˇ yonˍ ve yoˬ. Pawˇluꞈ kʼoˆ ve, ‘Gʼuiˬ sha ve Yaˇ hpu ngaˬ htaꞈ haꞈ leh ngaˬ awˬ pon yawˇ awˬ to tanˇ laˇ peuˬ ve’ yoˬ. (Gaˍlaˍtiˆ 2:20 gʼaw sheˍ.) Pawˇluꞈ yawˇ awˬ to haiˬ jaˇ leh Gʼuiˬ sha maˇ haꞈ laˇ tehꞈ maˇ dawˇ. ‘Aˬ htoꞈ ma te Yaˬhoˉvaˬ awˬ viˉ awˬ nyi htaꞈ haꞈ ve ngaˬ na gʼa ve yoˬ. Yaꞈ hkʼaˇ, Gʼuiˬ sha ngaˬ htaꞈ maˇ haꞈ laˇ’ tehꞈ maˇ dawˇ. Pawˇluꞈ Roˉmaꞈ venˇ hkʼaw ve awˬ viˉ awˬ nyi htaꞈ shaˍ tiꞈ piˇ ve, “ngaˬ hui venˇ baˆ yaˇ hpehꞈ chehˇ ve teˇ yanˇ htaˇ, Hkriꞈ ngaˬ hui awˬ pon hkanˍ suh” ve yoˬ. (Roˉmaꞈ 5:8) Gʼuiˬ sha ngaˬ hui htaꞈ maˇ haꞈ laˇ tuˬ teˇ ceuˬ˗ehˬ kaꞈ tawˍ piˇ maˇ gʼa.

10. Roˉmaꞈ liꞈ 8:38, 39 hkʼaw ngaˬ hui htaꞈ aˬ htoꞈ ma maˍ laˇ ve le?

 ¹⁰ Roˉmaꞈ liꞈ 8:38, 39 gʼaw sheˍ. Pawˇluꞈ Gʼuiˬ sha haꞈ laˇ ve kanˇ paˆ htaꞈ yonˍ ve yoˬ. Yawˇ bvuhꞈ ve, “Gʼuiˬ sha ve haꞈ pehnˇ ve awˬ hkʼaw lo ngaˬ hui htaꞈ yuˬ hpaˆ laˇ maˇ hpehꞈ.” Pawˇluꞈ awˬ lawn chi htaꞈ yonˍ gʼa tuˬ te piˇ ve teˇ ceuˬ lehˬ, Yaˬhoˉvaˬ Iˉsaˍreˍlaˆ chaw htaꞈ hkʼaˬ hkʼe taw yeunˇ hkanˍ piˇ ve yawˇ shiˍ ve yoˬ. Leh Yaˬhoˉvaˬ kaꞈ yawˇ htaꞈ ha kʼaˉ laˇ ve tehꞈ yawˇ shiˍ ve yoˬ. Chi Pawˇluꞈ kʼoˆ chehˇ ve hkʼe hpehꞈ leh, ‘Yaˬhoˉvaˬ yawˇ ve Yaˇ htaꞈ cuˇ leh ngaˬ awˬ pon suh tcuh laˇ ve yoˬ. Yaˬhoˉvaˬ ngaˬ htaꞈ maˇ haꞈ laˇ tehꞈ htawˇ dawˇ nawˬ dawˇ gʼa cawˬ tuˬ sheˍ ve laˇ?’—Roˉmaꞈ 8:32.

11. 1 Tiˆmoˉseˍ liꞈ 1:12-15 hkʼaw Pawˇluꞈ te yaꞈ jaw ve awˬ lawn htaꞈ kʼoˆ ve htawˇ, aˬ htoꞈ ma te Gʼuiˬ sha haꞈ laˇ sheˍ ve tehꞈ yonˍ gʼa ve le?

¹¹ 1 Tiˆmoˉseˍ liꞈ 1:12-15 gʼaw sheˍ. Pawˇluꞈ oˇ htaˇ te yaꞈ jaw ve awˬ lawn htaꞈ kʼawꞈ dawˇ nyi htaˇ, teˇ pawˆ pawˆ yawˇ nyi ma luˬ jaˇ tuˬ te piˇ ve yoˬ. Yawˇ venˇ baˆ yaˇ hpehꞈ leh, “shu aꞈ kehˉ venˇ baˆ uiˍ ve” yawˇ awˬ to yawˇ chi hkʼe kʼoˆ ve, ngaˬ hui anˇ tuˬ maˇ loˍ. Pawˇluꞈ awˬ tehˬ ve htaꞈ maˇ henˇ sheˍ htaˇ, yawˇ Hkriꞈ yaˇ htaꞈ fawˉ mehˍ tuˬ, htawnˍ hkʼaw yuˬ keu piˇ tuˬ, leh Hkriꞈ yaˇ teˇ hpaˍ htaꞈ tiˇ pehˍ ve awˬ gʼaˇ piˇ tuˬ, yawˇ venˇ teˇ hpaˍ hpaˍ lo kʼai ve yoˬ. (Tcuh yaˇ 26:10, 11) Pawˇluꞈ htaꞈ pa taw, Hkriꞈ yaˇ yaˇ nehˬ teˇ gʼaˇ ve awˬ pa awˬ e htaꞈ tiˇ pehˍ piˇ ve chaw htaꞈ, yawˇ gʼa maw daꞈ htaˇ, yawˇ hkʼaˬ hkʼe dawˇ ve htaꞈ nawˬ dawˇ nyi sheˍ. Pawˇluꞈ yawˇ gʼa te ve awˬ ceuˬ htaꞈ nyi ma luˬ jaˇ. Yaꞈ hkʼaˇ, peuˬ taˉ ve awˬ yanˇ htaꞈ yawˇ teˇ pawˆ kʼawꞈ pa piˇ maˇ gʼa tehꞈ shiˍ ve yoˬ. Yeˍsuˆ yawˇ awˬ pon suh laˇ ve tehꞈ yawˇ yonˍ gʼa ve hkʼaw bvuhꞈ ve, “Gʼuiˬ sha ve awˬ bon ngaˬ geh cawˬ leh, awˬ bon oˇ ve kanˉ te ve yoˬ.” (1 Kawˇrenˍhtuˆ 15:3, 10) Ngaˬ hui henˇ yuˬ tuˬ awˬ pon aˬ htoꞈ ma le? Yeˍsuˆ nawˬ awˬ pon suh laˇ leh nawˬ Yaˬhoˉvaˬ geh meuˆ daꞈ tuˬ te laˇ ve tehꞈ nawˬ gʼa yonˍ cawˇ ve yoˬ. (Tcuh yaˇ 3:19) Oˇ htaˇ nawˬ Yaˬhoˉvaˬ ve Shaˉhkiˆhkanˍ ve chaw hpehꞈ ve maˇ heˆ leh maˇ hpehꞈ ve htawˇ, nawˬ te yaꞈ jaw ve awˬ ceuˬ htaꞈ cawˬ ve maˇ heˆ. Gʼuiˬ sha awˬ pon a yeˇ uiˍ jaˇ ve awˬ ceuˬ lehˬ chi teˇ hkui nawˬ te ve awˬ ceuˬ leh awˬ  gʼuˇ suhˍ hpawˇ nawˬ te tuˬ ve awˬ ceuˬ htaꞈ cawˬ ve yoˬ.—Iˉsaˍyaˆ 1:18.

12. Ngaˬ hui awˬ to awˬ hpfuhˇ maˇ cawˬ ve maˇ heˆ leh shu haꞈ laˇ maˇ keunˍ ve tehꞈ dawˇ htaˇ, 1 Yoˇhanˬ liꞈ 3:19, 20 hkʼaw ngaˬ hui htaꞈ hkʼaˬ hkʼe ga laˇ ve le?

¹² Nawˬ ve venˇ baˆ awˬ pon Yeˍsuˆ suh laˇ ve htaꞈ caˉ daꞈ ve dawˇ nyi htaˇ, ‘ngaˬ maˇ daꞈ leh awˬ hpfuhˇ hkʼaˆ jaˇ ve chi ngaˬ awˬ pon maˇ keunˍ’ nawˬ dawˇ tuˬ yoˬ hehˉ. Aˬ htoꞈ ma te nawˬ chi hkʼe dawˇ ve hehˉ le? Ngaˬ hui maˇ biˇ ve chaw hpehꞈ leh awˬ hpfuhˇ maˇ cawˬ leh shu haꞈ laˇ tuˬ maˇ keunˍ tehꞈ dawˇ tuˬ te laˇ ve yoˬ. (1 Yoˇhanˬ 3:19, 20 gʼaw sheˍ.) Ngaˬ hui chi hkʼe dawˇ htaˇ, ‘ngaˬ hui ve nyi ma aꞈ kehˉ Gʼuiˬ sha lehˬ hkʼa peu˗eˬ htaꞈ yawˇ shiˍ ve’ tehꞈ tawnˇ taˍ cawˇ ve yoˬ. Yaˬhoˉvaˬ ngaˬ hui htaꞈ haꞈ laˇ leh venˇ baˆ hpehˇ laˇ tuˬ yoˬ tehꞈ ngaˬ hui maˇ yonˍ ve htawˇ, Gʼuiˬ sha ngaˬ hui htaꞈ haꞈ leh venˇ baˆ hpehˇ laˇ sheˍ ve yoˬ. Yaˬhoˉvaˬ ngaˬ hui htaꞈ awˬ tehˬ awˬ na chi hkʼe haꞈ ve tehꞈ yonˍ gʼa tuˬ gʼa te cawˇ ve yoˬ. Chi hkʼe te gʼa tuˬ, ngaˬ hui hkʼaˬ htaˆ kaꞈ Liꞈ hpu gʼa henˇ ve, Gʼuiˬ sha geh bon hkʼaˬ htaˆ kaꞈ gʼa lawˬ ve, Gʼuiˬ sha ve kanˉ te ve chaw geh awˬ chawˇ te ve yoˬ. Aˬ htoꞈ ma te chi teˇ hpaˍ te ve ngaˬ hui awˬ pon a yeˇ uiˍ jaˇ ve le?

13. Liꞈ hpu henˇ ve ngaˬ hui htaꞈ hkʼaˬ hkʼe ga laˇ ve le? (Awˇ ceˍ awˇ fa “ Liꞈ hpu yawˇ hui htaꞈ hkʼaˬ hkʼe ga piˇ ve le?” htaꞈ nyi sheˍ.)

¹³ Teˇ nyi le le Liꞈ hpu henˇ ve kʼo, Yaˬhoˉvaˬ ve te hkʼaˇ dawˇ hkʼaˇ daꞈ ve htaꞈ nawˬ na gʼa la tuˬ yoˬ. Gʼuiˬ sha nawˬ htaꞈ haꞈ laˇ ve htaꞈ nawˬ shiˍ tuˬ yoˬ. Nawˬ teˇ nyi le le Liꞈ hpu gʼaw taˍ ve htaꞈ hkʼa dehꞈ dawˇ nyi ve kʼo, nawˬ kaꞈ awˬ hkʼaˇ laiˉ hkʼaˇ htaꞈ dawˇ nyi puiˉ la tuˬ yoˬ. Nawˬ ve dawˇ hkʼaˇ leh maˇ daꞈ ve awˬ ceuˬ htaꞈ pa laˇ tuˬ, Liꞈ hpu ga laˇ gʼa ve yoˬ. (2 Tiˆmoˉseˍ 3:16) Nyi haꞈ shaˉ paˍ Hki˗vaw kaꞈ yawˇ awˬ to awˬ hpfuhˇ hkʼa dehꞈ maˇ cawˬ ve tehꞈ dawˇ jaw ve yoˬ. Yawˇ kʼoˆ ve, “Chiˇ mvuh ve liꞈ kaˇ nanˉ uiˍ 103 ngaˬ gʼaw leh awˬ lawn oˇ ve htaꞈ caˉ daꞈ ve hkʼa dehꞈ dawˇ nyi htaˇ, chi ngaˬ ve dawˇ hkʼaˇ pa tuˬ ga laˇ leh, Yaˬhoˉvaˬ ngaˬ htaꞈ hkʼaˬ hkʼe dawˇ ve na gʼa la ve yoˬ.” Chi awˬ gʼuˇ suhˍ htaˇ kʼoˆ kʼai peuˬ ve Eˇvaꞈ kʼoˆ ve, “Yaˬhoˉvaˬ ngaˬ htaꞈ hkʼaˬ hkʼe dawˇ ve leh awˬ lawn teˇ hpaˍ htaꞈ hkʼaˬ hkʼe dawˇ ve teˇ haˉ le le ngaˬ awˬ yanˇ yehˇ leh dawˇ nyi ve yoˬ. Chi ngaˬ nyi ma gawˬ lehˍ cawˬ tuˬ te laˇ leh ngaˬ ve yonˍ hkʼaˇ yonˍ yeˬ ve cawˬ ve yoˬ.”

14. Liꞈ hpu maˇ henˇ sheˍ htaˇ bon lawˬ ve ngaˬ hui htaꞈ hkʼaˬ hkʼe ga laˇ ve le?

¹⁴ Hkʼaˬ htaˆ kaꞈ bon lawˬ ve. (1 Hteˇsaˍlawˇniˆ 5:17) Ngaˬ hui chaw teˇ gʼaˇ htaꞈ meuˆ daꞈ gaˇ ve kʼo, yawˇ geh hkʼaˬ htaˆ kaꞈ tawˇ gʼa yaw daꞈ leh ngaˬ hui hkʼaˬ hkʼe dawˇ ve kʼoˆ maˍ piˇ cawˇ ve yoˬ. Yaˬhoˉvaˬ htaꞈ awˬ chawˇ te ve kaꞈ chi hkʼa shuˍ shuˍ yoˬ. Ngaˬ hui hkʼaˬ hkʼe dawˇ chehˇ ve, aˬ htoꞈ ma awˬ lawn dawˇ hkiˉ ve bon lawˬ ve hkʼaw kʼoˆ piˇ ve kʼo, ngaˬ hui Yaˬhoˉvaˬ htaꞈ yonˍ ve tehꞈ hpeuꞈ maw piˇ chehˇ leh yawˇ ngaˬ hui htaꞈ haꞈ laˇ ve tehꞈ shiˍ ve yoˬ. (Chiˇ mvuh ve 94:17-19; 1 Yoˇhanˬ 5:14, 15) Yoˍaˆ chi awˬ gʼuˇ suhˍ htaˇ kʼoˆ kʼai peuˬ ve kʼoˆ ve, “ngaˬ bon lawˬ htaˇ yaꞈ nyi ngaˬ aˬ htoꞈ ma te ve ceh Yaˬhoˉvaˬ htaꞈ kʼoˆ piˇ ve maˇ heˆ. Ngaˬ nyi ma hkʼaw cawˬ ve awˬ ceuˬ yawˇ htaꞈ kʼoˆ piˇ ve yoˬ. Ngaˬ hkʼaˬ hkʼe dawˇ ve Gʼuiˬ sha htaꞈ kʼoˆ piˇ ve yoˬ. Ngaˬ chi hkʼe te˗oˬ htaˇ kanˉ te kuiˬ awˬ hkʼaw lo ve awˬ hoˉ  hkʼe maˇ heˆ. Yaˬhoˉvaˬ lehˬ awˬ pa yaˇ htaꞈ haꞈ jaˇ ve ve hkʼe hpehꞈ ve tehꞈ ngaˬ dawˇ la ve yoˬ.”—Awˇ ceˍ awˇ fa “ Nawˬ gʼaw˗oˬ laˇ?” htaꞈ nyi sheˍ.

15. Yaˬhoˉvaˬ ngaˬ hui htaꞈ a yeˇ yuˬ laˇ ve tehꞈ hkʼaˬ hkʼe hpeuꞈ maw laˇ ve le?

¹⁵ Ka tiꞈ yeˬ ve chaw geh awˬ chawˇ te ve kʼo, yawˇ hui lehˬ Yaˬhoˉvaˬ geh laˬ ve laꞈ shawnˍ hkʼe hpehꞈ ve yoˬ. (Yaˍkoˆ 1:17) “Teˇ gʼaˇ htaꞈ teˇ gʼaˇ haꞈ daꞈ puiˉ ve” Hkriꞈ yaˇ ve yehˬ kʼa hkʼaw ngaˬ hui gʼa chehˇ ve lehˬ, mvuhˇ naw ma hkʼoˆ ve Awˬ pa ngaˬ hui htaꞈ a yeˇ yuˬ laˇ ve tehꞈ hpeuꞈ maw laˇ ve yoˬ. (Tawˇ naˉ ve 17:17) Kawˇlawˇsehˇ venˇ hkʼaw Hkriꞈ yaˇ htaꞈ Pawˇluꞈ liꞈ bvuhꞈ piˇ ve hkʼaw yawˇ htaꞈ ga laˇ ve chaw teˇ hpaˍ hpaˍ htaꞈ kʼoˆ ve yoˬ. Oˇ kaˬ lo kʼoˆ ve, “yawˇ hui htaꞈ pa taw ngaˬ maˇ maˇ dawˇ sha la ve yoˬ.” (Kawˇlawˇsehˇ 4:10, 11) Yeˍsuˆ kaꞈ yawˇ ve awˬ chawˇ ga laˇ tuˬ htaꞈ loˍ ve yoˬ. Yawˇ ve awˬ chawˇ lehˬ mvuhˇ naw ma tcuh yaˇ leh chaw yaˇ hpehꞈ ve yoˬ. Yawˇ hui ga laˇ ve htaꞈ Yeˍsuˆ awˬ hpfuhˇ shiˍ ve yoˬ.—Luˉkaꞈ 22:28, 43.

16. Ka tiꞈ yeˬ ve awˬ chawˇ ngaˬ hui Yaˬhoˉvaˬ geh meuˆ daꞈ tuˬ hkʼaˬ hkʼe ga laˇ ve le?

¹⁶ Hkriꞈ yaˇ awˬ moˍ hkʼaw ve awˬ viˉ awˬ nyi ga laˇ tuˬ nawˬ lawˬ leh yawˇ hui htaꞈ ga laˇ tcuh˗aw laˇ? Co ha hpawˇ ve chaw mawˇ geh nawˬ nyi ma hkʼaw cawˬ ve kʼoˆ maˍ piˇ htaˇ, nawˬ awˬ gʼaˇ nuˇ ve tehꞈ kʼoˆ gaˇ ve maˇ heˆ. Yaꞈ hkʼaˇ, chi hkʼe te ve lehˬ, nawˬ htaꞈ haꞈ shaˉ laˇ tuˬ yoˬ. Cehˍenˍ chi awˬ gʼuˇ suhˍ htaˇ kʼoˆ kʼai peuˬ ve kʼoˆ ve, “co ha hpawˇ ve chaw mawˇ geh ngaˬ awˬ chawˇ gʼa te htaˇ, ngaˬ htaꞈ ga laˇ gʼa jaˇ. Ngaˬ dawˇ haˍ jaˇ leh maˇ daꞈ ve dawˇ htaˇ yawˇ hui ngaˬ htaꞈ yeunˇ hkanˍ ve hkʼaw na taˍ laˇ leh, yawˇ hui ngaˬ htaꞈ hkʼaˬ hkʼe taw haꞈ ve shiˍ tuˬ kaꞈ kʼoˆ laˇ ve yoˬ. Yaˬhoˉvaˬ ngaˬ htaꞈ haꞈ leh dawˇ haˍ laˇ ve tehꞈ yawˇ hui te laˇ ve htaꞈ shiˍ gʼa ve yoˬ.” Ngaˬ hui ve awˬ viˉ awˬ nyi geh meuˆ daꞈ ve lehˬ, a yeˇ uiˍ jaˇ ve awˬ ceuˬ hpehꞈ ve tehꞈ shiˍ ve yoˬ.

17-18. Ngaˬ hui a shu ve hkawˇ na cawˇ ve le? Leh aˬ htoꞈ ma pa taw le?

¹⁷ Saˍtanˍ ngaˬ hui htaꞈ cawˇ ve awˬ ceuˬ maˇ te tcuh gaˇ. Yaˬhoˉvaˬ ngaˬ hui htaꞈ maˇ haꞈ laˇ leh, yawˇ ngaˬ hui htaꞈ ga laˇ tuˬ maˇ keunˍ tehꞈ Saˍtanˍ ngaˬ hui htaꞈ yonˍ tcuh gaˇ ve yoˬ. Yaꞈ hkʼaˇ, awˬ lawn chi ve hkʼaw ngaˬ hui gʼa henˇ˗oˬ ve Saˍtanˍ kʼoˆ ve maˇ cawˇ.

¹⁸ Yaˬhoˉvaˬ nawˬ htaꞈ haꞈ jaˇ. Leh nawˬ Yaˬhoˉvaˬ mehˆ gʼuˇ suhˍ awˬ hpfuhˇ hkʼaˆ jaˇ. Nawˬ Gʼuiˬ sha ve hkawˇ na ve kʼo, Yeˍsuˆ hkʼa shuˍ nawˬ kaꞈ ‘Gʼuiˬ sha haꞈ pehnˇ ve awˬ hkʼaw lo hkʼaˬ htaˆ kaꞈ chehˇ ve yoˬ.’ (Yoˇhanˬ 15:10) Saˍtanˍ hkawˇ taˇ na. Nawˬ Yaˬhoˉvaˬ awˬ pon maˇ daꞈ ve tehꞈ nawˬ ve nyi ma hkʼaw kʼoˆ laˇ ve awˬ ceuˬ htaꞈ taˇ na. Yaˬhoˉvaˬ Gʼuiˬ sha ngaˬ hui teˇ gʼaˇ leh teˇ gʼaˇ nyi ma hkʼaw daꞈ ve awˬ ceuˬ htaꞈ mawˬ ve hkawˇ na sheˍ. Nawˬ htaꞈ kaꞈ Yaˬhoˉvaˬ Gʼuiˬ sha lehˬ, “yawˇ ve chaw teˇ hpaˍ htaꞈ nyi ma cawˇ ve” hkʼe nyi ma cawˇ ve yoˬ.