1-2. 1 Peˍtruˆ liꞈ 2:21 hkʼaw ve awˬ lawn ngaˬ hui na gʼa tuˬ hkʼaˬ hkʼe ga laˇ ve le?

 Nawˬ leh awˬ chawˇ heh puiˉ hkʼaw lo kʼai ve htaꞈ dawˇ nyi sheˍ. Oˇ kaˬ lo kawˆ tuˬ cawˬ jaˇ leh nawˬ kaꞈ maˇ kʼai jaw sheˍ. Nawˬ htaꞈ yaꞈ kʼaw maˍ laˇ ve chaw cawˬ leh yawˇ yaꞈ kʼaw oˇ ve htaꞈ hkʼa dehꞈ shiˍ ve yoˬ. Yaꞈ hkʼaˇ, teˇ tawn kʼai gaˬ˗oˬ htaˇ, yawˇ maˇ mawˬ˗o! Nawˬ yawˇ ve hkui ha htaꞈ mawˬ˗oˬ ve pa taw maˇ kawˆ. Nawˬ leh awˬ chawˇ yawˇ ve hkui ha htaꞈ gʼaꞈ nyi leh yawˇ awˬ hkʼaˇ suh gʼaꞈ kʼai ve yoˬ.

² Chi beuꞈ teˇ co˗e ve Hkriꞈ yaˇ, haiˬ ve miˬ guiˬ chi hkʼoˆ a shaꞈ teꞈ chehˇ ve lehˬ, heh puiˉ hkʼaw lo kawˆ tuˬ cawˬ ve kʼai chehˇ ve chaw htaꞈ shuˍ ve yoˬ. Yaꞈ hkʼaˇ, Yaˬhoˉvaˬ lehˬ ngaˬ hui htaꞈ yaꞈ kʼaw maˍ laˇ paˍ cheuˬ jaˇ ve peꞈ laˇ ve yoˬ. Oˇ ve lehˬ Gʼuiˬ sha ve Yaˇ paˍ Yeˍsuˆ Hkriꞈ ve hkui ha awˬ hkʼaˇ suh gʼaꞈ kʼai ve yoˬ. (1 Peˍtruˆ 2:21) Liꞈ hpu htaꞈ caˉ daꞈ ve liꞈ kʼoˆ teˇ kʼoˆ hkʼaw kʼoˆ ve 1 Peˍtruꞈ liꞈ 2:21 hkʼaw Peˍtruˆ lehˬ Yeˍsuˆ yaꞈ kʼaw maˍ paˍ htaꞈ tehˆ taˍ ve yoˬ. Yaꞈ kʼaw maˍ paˍ hkui ha cawˬ tcuh taˉ ve hkʼe, Yeˍsuˆ kaꞈ ngaˬ hui yawˇ awˬ hkʼaˇ suh gʼaꞈ kʼai tuˬ hkui ha cawˬ tcuh taˉ laˇ ve yoˬ. Chi teˇ hkui na hkawˇ 3 maˬ htaꞈ caˉ daꞈ ve teˇ geh henˇ tuˬ yoˬ. Yeˍsuˆ ve hkui ha awˬ hkʼaˇ suh gʼaꞈ kʼai ve tcuhˉ kuiˬ hkʼaˬ hkʼe kʼoˆ gaˇ ve le? Aˬ htoꞈ ma te ngaˬ hui chi hkʼe te cawˇ ve le? Leh chi ve ngaˬ hui hkʼaˬ hkʼe gʼaꞈ te gʼa tuˬ le?

3. Hkui ha awˬ hkʼaˇ suh gʼaꞈ kʼai ve tcuhˉ kuiˬ hkʼaˬ hkʼe kʼoˆ gaˇ ve le?

³ Hkui ha awˬ hkʼaˇ suh gʼaꞈ kʼai ve tcuhˉ kuiˬ hkʼaˬ hkʼe kʼoˆ gaˇ ve le? Chaw teˇ gʼaˇ a shaꞈ teꞈ hkʼaˇ htaꞈ kʼoˆ gaˇ ve yoˬ. (Awˬ hkuiˉ puiˍ 6:9; Tawˇ naˉ ve 4:26) Chi htaꞈ pa taw, ngaˬ hui a shu ve hkui ha awˬ hkʼaˇ suh gʼaꞈ kʼai ve kʼo, a shaꞈ teꞈ hkʼaˇ yawˇ hkʼa shuˍ gʼaꞈ te ve htaꞈ kʼoˆ gaˇ ve yoˬ.

4. Yeˍsuˆ ve hkui ha awˬ hkʼaˇ suh gʼaꞈ kʼai ve tcuhˉ kuiˬ hkʼaˬ hkʼe kʼoˆ gaˇ ve le?

 ⁴ Yeˍsuˆ ve hkui ha awˬ hkʼaˇ suh gʼaꞈ kʼai ve tcuhˉ kuiˬ hkʼaˬ hkʼe kʼoˆ gaˇ ve le? Chi lehˬ a shaꞈ teꞈ hkʼaˇ yawˇ hkʼa shuˍ te ve htaꞈ kʼoˆ gaˇ ve yoˬ. Awˬ lawn chi ve hkʼaw a yeˇ uiˍ ve Liꞈ hpu awˬ tawn htaꞈ Peˍtruˆ kʼoˆ ve lehˬ, Yeˍsuˆ tuꞈ ve hkanˍ ve htaꞈ gʼa yeunˇ hkanˍ ve yoˬ. Ngaˬ hui Yeˍsuˆ htaꞈ henˇ yuˬ gʼa ve laiˉ hkʼaˇ cawˬ sheˍ ve yoˬ. (1 Peˍtruˆ 2:18-25) Yeˍsuˆ a shaꞈ teꞈ kuiˬ hkʼaw kʼoˆ ve leh te ve teˇ ceuˬ le le ngaˬ hui henˇ yuˬ gʼa ve yoˬ.

5. Maˇ biˇ ve chaw yaˇ Yeˍsuˆ ve awˬ lawn htaꞈ gʼaꞈ te gʼa˗aw laˇ? Kʼoˆ maˍ laˇ sheˍ.

⁵ Nga hui maˇ biˇ ve chaw yaˇ hpehꞈ ve pa taw, Yeˍsuˆ ve awˬ lawn htaꞈ henˇ yuˬ gʼa˗aw laˇ? Henˇ yuˬ gʼa ve yoˬ. Peˍtruˆ kʼoˆ ve htaꞈ tawnˇ gʼa˗aw laˇ? Yawˇ kʼoˆ ve, “[Yeˍsuˆ] ve hkui ha awˬ hkʼaˇ suh gʼaꞈ kʼai ve yoˬ.” Yawˇ hkʼa shuˍ ngaˬ hui hkʼa biˇ gʼaꞈ te gʼa ve maˇ heˆ. Ngaˬ hui maˇ biˇ ve chaw yaˇ hpehꞈ ve htawˇ, yawˇ ve awˬ lawn htaꞈ ngaˬ hui hkʼa dehꞈ gʼaꞈ te sheˍ. 1 Yoˇhanˬ liꞈ 2:6 hkʼaw Yoˇhanˬ ngaˬ hui htaꞈ kʼoˆ laˇ ve, “Yeˍsuˆ te ve hkʼe” ngaˬ hui te chehˇ ve yoˬ.

6-7. Aˬ htoꞈ ma te Yeˍsuˆ ve hkui ha awˬ hkʼaˇ suh gʼaꞈ kʼai ve ngaˬ hui Yaˬhoˉvaˬ geh meuˆ daꞈ tuˬ te laˇ ve le?

⁶ Yeˍsuˆ ve hkui ha awˬ hkʼaˇ suh gʼaꞈ kʼai ve lehˬ ngaˬ hui Yaˬhoˉvaˬ geh meuˆ daꞈ tuˬ te laˇ ve. Aˬ htoꞈ ma te chi hkʼe kʼoˆ gʼa ve le? Awˉ lawˉ teˇ hkʼaˇ lehˬ, Yaˬhoˉvaˬ nyi hkʼaˇ suh tuˬ te ve Yeˍsuˆ lehˬ daꞈ jaˇ ve henˇ yuˬ tuˬ hpehꞈ ve yoˬ. (Yoˇhanˬ 8:29) Ngaˬ hui Yeˍsuˆ ve hkui ha awˬ hkʼaˇ suh gʼaꞈ kʼai ve kʼo, ngaˬ hui kaꞈ Yaˬhoˉvaˬ nyi hkʼaˇ suh tuˬ te piˇ ve yoˬ. Mvuhˇ naw ma hkʼoˆ Awˬ pa Gʼuiˬ sha geh awˬ chawˇ te gaˇ ve chaw htaꞈ yawˇ kaꞈ awˬ chawˇ te laˇ tuˬ yoˬ tehꞈ ngaˬ hui yonˍ gʼa ve yoˬ.—Yaˍkoˆ 4:8.

⁷ Nyiˇ hkʼaˇ lehˬ, Yeˍsuˆ Yaˬhoˉvaˬ htaꞈ hkʼa dehꞈ henˇ yuˬ gʼa ve yoˬ. Chi htaꞈ pa taw, “ngaˬ htaꞈ mawˬ ve chaw lehˬ Awˬ pa htaꞈ mawˬ peuˬ” tehꞈ Yeˍsuˆ hkʼa tawˍ lehˆ kʼoˆ gʼa ve yoˬ. (Yoˇhanˬ 14:9) Ngaˬ hui Yeˍsuˆ ve awˬ lawn leh te hkʼaˇ dawˇ hkʼaˇ htaꞈ henˇ yuˬ htaˇ, ngaˬ hui kaꞈ Yaˬhoˉvaˬ htaꞈ henˇ yuˬ chehˇ ve yoˬ. Yawˇ hkiˬ tuꞈ paˍ leh yaˇ miˇ naˬ chehˇ  ve htaꞈ ha kʼaˉ ve, leh haꞈ ve chaw suh˗e ve hkʼaˬ hkʼe dawˇ ve htaꞈ yawˇ na gʼa ve yoˬ. (Maˍkuˆ 1:40, 41; 5:25-34; Yoˇhanˬ 11:33-35) Yaˬhoˉvaˬ dawˇ ve hkʼe ngaˬ hui dawˇ ve kʼo, ngaˬ hui kaꞈ yawˇ geh meuˆ daꞈ jaˇ tuˬ yoˬ.

8. Aˬ htoꞈ ma te Yeˍsuˆ ve hkui ha awˬ hkʼaˇ suh gʼaꞈ kʼai ve lehˬ “miˬ guiˬ htaꞈ gʼaˇ” tuˬ ga laˇ ve le?

⁸ Yeˍsuˆ ve hkui ha awˬ hkʼaˇ suh gʼaꞈ kʼai ve lehˬ, miˬ guiˬ chi hkʼoˆ haiˬ jaˇ ve awˬ hkʼaˇ suh maˇ kʼai tuˬ ga laˇ ve. Yeˍsuˆ miˬ guiˬ hkʼoˆ chehˇ ve awˬ leh meuˇ teˇ haˉ htaˇ yawˇ kʼoˆ ve, ngaˬ “miˬ guiˬ htaꞈ gʼaˇ peuˬ.” (Yoˇhanˬ 16:33) Yawˇ chi hkʼe kʼoˆ gʼa ve lehˬ miˬ guiˬ hkʼoˆ lo chehˇ ve awˬ yanˇ htaˇ, yawˇ ve dawˇ hkʼaˇ, dawˇ teh taˍ ve, leh miˬ guiˬ yaˇ ve te hkʼaˇ dawˇ hkʼaˇ yawˇ htaꞈ maˇ heuˆ la tcuh. Yawˇ miˬ guiˬ hkʼoˆ lo laˬ ve lehˬ, Gʼuiˬ sha ve awˬ meh htaꞈ yawˆ yan te piˇ tuˬ laˬ ve tehꞈ maˇ leunˇ jaw. Ngaˬ hui kaꞈ hkʼa suhˍ yoˬ. Miˬ guiˬ chi hkʼoˆ lo ngaˬ hui Yaˬhoˉvaˬ ve kanˉ maˇ te tuˬ te laˇ ve laiˉ hkʼaˇ cawˬ ve yoˬ. Yaꞈ hkʼaˇ, ngaˬ hui Yeˍsuˆ htaꞈ henˇ yuˬ leh Yaˬhoˉvaˬ loˍ ve awˬ ceuˬ htaꞈ a yeˇ uiˍ jaˇ tehꞈ shawˍ ve kʼo, ngaˬ hui kaꞈ “miˬ guiˬ htaꞈ” gʼaˇ gʼa ve yoˬ.—1 Yoˇhanˬ 5:5.

9. Co co taiˍ taiˍ ve a shaꞈ gʼa tuˬ ngaˬ hui hkʼaˬ hkʼe gʼa te cawˇ ve le?

⁹ Yeˍsuˆ ve hkui ha awˬ hkʼaˇ suh gʼaꞈ kʼai ve lehˬ, ngaˬ hui co co taiˍ taiˍ a shaꞈ gʼa tuˬ ga laˇ ve. Paw sha jaˇ ve hawˉ hkʼaˆ teˇ gʼaˇ co co taiˍ taiˍ ve a shaꞈ gʼa gaˇ ve kʼo, hkʼaˬ hkʼe gʼa te cawˇ ve tehꞈ Yeˍsuˆ htaꞈ na piˇ ve yoˬ. Yeˍsuˆ hkʼawꞈ piˇ ve, “ngaˬ hkʼaˇ suh laˬ˗oꞈ.” (Maꞈhtehˍ 19:16-21) Yeˍsuˆ Hkriꞈ hpehꞈ ve yoˬ tehꞈ maˇ yonˍ ve Yuˇdaꞈ chaw htaꞈ kʼoˆ piˇ ve, ‘ngaˬ ve yawˬ teˇ hpaˍ lehˬ ngaˬ awˬ hkʼaˇ suh laˬ ve yoˬ. Ngaˬ yawˇ hui htaꞈ co tiꞈ ha tiꞈ piˇ tuˬ yoˬ.’ (Yoˇhanˬ 10:24-29) Suhˉ jehˬ shehˍ hpaˇ awˬ moˍ hkʼaw ve Niˆkawˇdeˍ kaꞈ teˇ gʼaˇ hpehꞈ leh Yeˍsuˆ geh tawˇ yaw daꞈ htaˇ, yawˇ ve awˬ lawn shiˍ gaˇ ve yoˬ. Yawˇ kʼoˆ ve, ‘Yaˇ hpu htaꞈ hkʼa yonˍ ve chaw hkʼa peu˗eˬ co tiꞈ ha tiꞈ htaꞈ gʼa ve yoˬ.’ (Yoˇhanˬ 3:16) Ngaˬ hui Yeˍsuˆ htaꞈ yonˍ ve tehꞈ hpeuꞈ maw piˇ ve lehˬ, yawˇ htaꞈ henˇ yuˬ leh yawˇ maˍ ve htaꞈ gʼaꞈ te ve yoˬ. Ngaˬ hui chi hkʼe te ve kʼo, co co taiˍ taiˍ ve a shaꞈ gʼa tuˬ yoˬ.—Maꞈhtehˍ 7:14.

10. Ngaˬ hui Yeˍsuˆ htaꞈ hkʼa dehꞈ shiˍ daꞈ tuˬ hkʼaˬ hkʼe te cawˇ ve le? (Yoˇhanˬ 17:3)

¹⁰ Ngaˬ hui Yeˍsuˆ ve hkui ha awˬ hkʼaˇ suh maˇ gʼaꞈ kʼai sheˍ htaˇ, ngaˬ hui yawˇ htaꞈ awˉ lawˉ gʼa shiˍ daꞈ sheˍ ve yoˬ. (Yoˇhanˬ 17:3 gʼaw sheˍ.) Yeˍsuˆ htaꞈ “shiˍ” daꞈ ve lehˬ teˇ pawˆ tiˉ te ve maˇ heˆ. Hkʼaˬ htaˆ kaꞈ gʼa te ve yoˬ. Ngaˬ hui yawˇ htaꞈ hkʼa dehꞈ gʼa shiˍ daꞈ ve yoˬ. Yawˇ ve te hkʼaˇ dawˇ hkʼaˇ leh, yawˇ a shaꞈ teꞈ chehˇ kuiˬ hkʼaw awˬ liˇ awˬ hkʼaˇ hkʼaˬ hkʼe yuˬ yehˇ ve kaꞈ ngaˬ hui gʼa shiˍ cawˇ ve yoˬ. Ngaˬ hui awˬ tehˬ ve hkʼaw hkʼaˬ hkʼe maw chehˇ˗oˬ ve htawˇ, ngaˬ hui Yaˬhoˉvaˬ leh yawˇ ve Yaˇ Yeˍsuˆ htaꞈ hkʼa dehꞈ gʼa “shiˍ” daꞈ ve yoˬ.

11. Ha lehˬ ve bon hkawˇ liꞈ 4 daw aˬ htoꞈ ma ve awˬ lawn cawˬ ve le?

¹¹ Yaˬhoˉvaˬ ngaˬ hui htaꞈ haꞈ leh yawˇ ve yaˇ paˍ htaꞈ shiˍ daꞈ tcuh gaˇ ve yoˬ. Hkʼe te leh, yawˇ ha lehˬ ve bon hkawˇ liꞈ 4 daw chi Liꞈ hpu hkʼaw cawˬ tcuh laˇ ve yoˬ. Oˇ ve lehˬ Maꞈhtehˍ, Maˍkuˆ, Luˉkaꞈ, leh  Yoˇhanˬ yoˬ. Liꞈ chi teˇ hpaˍ hkʼaw Yeˍsuˆ a shaꞈ teꞈ kuiˬ hkʼaw caˉ daꞈ ve leh yawˇ Gʼuiˬ sha ve kanˉ te ve awˬ lawn cawˬ ve yoˬ. Yawˇ hkʼaˬ hkʼe kʼoˆ ve, hkʼaˬ hkʼe te ve, leh hkʼaˬ hkʼe dawˇ ve ngaˬ hui htaꞈ shiˍ tcuh gaˇ ve yoˬ. Chi Yeˍsuˆ ve hkui ha ngaˬ hui htaꞈ mawˬ tcuh laˇ ve hkʼe hpehꞈ ve yoˬ. Ha lehˬ ve bon hkawˇ liꞈ 4 daw chi ngaˬ hui Yeˍsuˆ ve awˬ lawn “dawˇ nyi tuˬ” te laˇ ve yoˬ. (Heˍbrehˇ 12:3) Ha lehˬ ve bon hkawˇ liꞈ 4 daw chi ngaˬ hui henˇ htaˇ, ngaˬ hui Yeˍsuˆ htaꞈ hkʼa dehꞈ shiˍ daꞈ leh yawˇ ve hkui ha awˬ hkʼaˇ suh gʼaꞈ kʼai gʼa tuˬ yoˬ.

12. Ha lehˬ ve bon hkawˇ liꞈ 4 daw chi htaꞈ ngaˬ hui awˬ bon gʼa tuˬ hkʼaˬ hkʼe gʼa te cawˇ ve le?

¹² Ha lehˬ ve bon hkawˇ liꞈ 4 daw chi htaꞈ ngaˬ hui awˬ bon gʼa gaˇ ve kʼo, gʼaw ve ceh maˇ lawꞈ. Ngaˬ hui henˇ htaˇ awˬ yanˇ hkʼa dehꞈ yehˇ leh gʼaw taˍ ve awˬ lawn htaꞈ hkʼa dehꞈ gʼa dawˇ nyi ve yoˬ. (Yawˇsuˆ 1:8 htaꞈ tehˆ daꞈ nyi sheˍ.) Ha lehˬ ve bon hkawˇ liꞈ 4 daw chi htaꞈ ngaˬ hui hkʼa dehꞈ dawˇ nyi tuˬ, beˆ maˍ laˇ gʼa ve 2 hkʼaˇ htaꞈ teˇ geh nyi sheˍ. Leh ngaˬ hui gʼaw taˍ ve a shaꞈ teꞈ hkʼaˇ hkʼaw hkʼaˬ hkʼe te yuˬ yehˇ gʼa ve awˬ lawn kaꞈ teˇ geh nyi sheˍ.

13. Ngaˬ hui gʼaw taˍ ve awˬ lawn htaꞈ dawˇ nyi gʼa tuˬ hkʼaˬ hkʼe gʼa te ve le?

¹³ Awˉ lawˉ teˇ hkʼaˇ lehˬ gʼaw taˍ ve awˬ lawn htaꞈ hkʼa dehꞈ dawˇ nyi ve. Nawˬ awˬ yanˇ oˇ ve hkʼaw chehˇ ve kʼo, aˬ htoꞈ ma gʼa mawˬ ve le? Aˬ htoꞈ ma gʼa kaˇ ve le? Leh nawˬ hkʼaˬ hkʼe dawˇ ve le? Dawˇ mawˬ nyi sheˍ. Nawˬ chi hkʼe te gʼa tuˬ, nawˬ Gʼuiˬ sha ve kanˉ hkʼaˇ hkʼaw ve liꞈ kʼoˆ leh, awˬ lawn teˇ hpaˍ htaꞈ hpfuhˆ nyi gʼa ve yoˬ. Awˬ lawn oˇ ve hkʼaw awˉ lawˉ htaˇ leh hkʼawꞈ nawˉ htaˇ hkʼaˬ hkʼe hpehꞈ la ve oˇ ve htaꞈ nawˬ dawˇ nyi sheˍ. Chaw yaˇ leh awˬ ti htaꞈ caˉ daꞈ ve awˬ leuˉ kʼawꞈ shiˍ gaˇ ve kʼo, nawˬ awˬ lawn oˇ ve htaꞈ hpfuhˆ nyi gʼa ve yoˬ. Chi hkʼoˆ kaꞈ, nawˬ gʼaw chehˇ ve awˬ lawn htaꞈ shuˍ daꞈ ve awˬ nu ve ha lehˬ ve bon hkawˇ liꞈ hkʼaw kaꞈ tehˆ daꞈ nyi sheˍ. Teˇ pawˆ pawˆ kʼo, ha lehˬ ve bon hkawˇ liꞈ teˇ daw leh teˇ daw hkʼaw ve awˬ lawn maˇ shuˍ daꞈ.

14-15. Yeˍsuˆ ve awˬ lawn htaꞈ caˉ daꞈ ve ngaˬ hui gʼa gʼaw taˍ ve htaꞈ a shaꞈ teꞈ kuiˬ hkʼaw yuˬ yehˇ gʼa tuˬ, aˬ htoꞈ ma gʼa te cawˇ ve le?

¹⁴ Nyiˇ ceuˬ lehˬ, gʼaw taˍ ve awˬ ceuˬ a shaꞈ teꞈ kuiˬ hkʼaw yuˬ yehˇ ve. (Yoˇhanˬ 13:17) Peuˬ leh ha lehˬ ve bon hkawˇ liꞈ hkʼaw nawˬ teˇ daw hkʼa dehꞈ henˇ  peuˬ hkʼawꞈ nawˉ, a shu yawˇ awˬ to htaꞈ na nyi cawˇ ve, ‘awˬ lawn chi ve ngaˬ htaꞈ aˬ htoꞈ ma maˍ laˇ ve le? Leh awˬ lawn chi ngaˬ shu htaꞈ hkʼaˬ hkʼe ga piˇ gʼa tuˬ le?’ Nawˬ shiˍ daꞈ ve chaw teˇ gʼaˇ htaꞈ dawˇ nyi sheˍ. Awˬ lawn chi nawˬ htaꞈ aˬ htoꞈ ma maˍ laˇ ve yawˇ htaꞈ kʼoˆ maˍ piˇ sheˍ. Yaꞈ hkʼaˇ, yawˇ nyi ma maˇ sha tuˬ taˇ te piˇ.

¹⁵ Yeˍsuˆ bon yehˬ lonˉ hkʼaw haˍ gʼawˇ ve mehˇ chawˇ ma htaꞈ mawˬ ve awˬ lawn htaꞈ teˇ geh dawˇ nyi sheˍ. Leh beˆ maˍ laˇ ve 2 hkawˇ chi htaꞈ hkʼaˬ hkʼe te yuˬ yehˇ gʼa ve teˇ geh nyi sheˍ.

16. Maˍkuˆ liꞈ 12:41 nawˬ gʼaw peuˬ hkʼawꞈ nawˉ aˬ htoꞈ ma mawˬ ve kʼoˆ maˍ laˇ sheˍ.

¹⁶ Gʼaw taˍ ve awˬ lawn htaꞈ hkʼa dehꞈ dawˇ nyi ve. (Maˍkuˆ 12:41 gʼaw sheˍ.) Oˇ ve teˇ yanˇ lehˬ Niˆsanˍ Ha pa 11 nyi 33 hkʼawꞈ C.E. htaˇ Yeˍsuˆ suh tuˬ ve hkʼaˬ nyiˇ nyi maˇ cawˬ˗o. Chi hkʼe hpehꞈ ve htawˇ, Yeˍsuˆ bon yehˬ hkʼaw teˇ nyi mvuhˇ hkʼa hpeuꞈ bon maˍ ve yoˬ. Mvuhˇ shawˉ teˇ naꞈ kaꞈ bon awˬ hoˉ teˇ hpaˍ Yeˍsuˆ htaꞈ yaꞈ kuiˬ ca ve yoˬ. Bon awˬ hoˉ teˇ hpaˍ hpaˍ Yeˍsuˆ ve kanˇ paˆ htaꞈ htawˇ dawˇ nawˬ dawˇ cawˬ ve yoˬ. Teˇ hpaˍ hpaˍ kʼo, Yeˍsuˆ hkʼawꞈ maˇ gʼa tuˬ na hkawˇ na piˇ ve yoˬ. (Maˍkuˆ 11:27-33; 12:13-34) Leh bon yehˬ lonˉ teˇ hpawˇ lo yaˇ miˇ muiˬ kuiˬ lo Yeˍsuˆ juˇ kʼai ve yoˬ. Hkʼe te leh, yawˇ hpu tanˇ keu kuiˬ htaꞈ mawˬ leh, chaw yaˇ yawˇ hui ve hpu yuˬ leh hpu tanˇ keu kuiˬ lo keu chehˇ ve htaꞈ Yeˍsuˆ mui nyi chehˇ ve yoˬ. Paw sha ve chaw laiˉ gʼaˇ hpu tanˇ tanˇ la ve yoˬ. Yeˍsuˆ hpu tanˇ tanˇ kuiˬ paˇ lo mui taˍ leh hpu tanˇ keu kuiˬ hkʼaw hpu keu ve aw hkawˇ kaˇ ve yoˬ.

17. Maˍkuˆ liꞈ 12:42 hkʼaw haˍ gʼawˇ ve mehˇ chawˇ ma aˬ htoꞈ ma te ve le?

¹⁷ Maˍkuˆ liꞈ 12:42 gʼaw sheˍ. Peuˬ hkʼawꞈ nawˉ Yeˍsuˆ yaˇ miˇ teˇ gʼaˇ htaꞈ mawˬ ve yoˬ. Yawˇ “haˍ gʼawˇ ve mehˇ chawˇ ma” hpehꞈ ve yoˬ. (Luˉkaꞈ 21:2) Yawˇ ve a shaꞈ teꞈ hkʼaˇ tuꞈ hkanˍ jaˇ. Caˇ tuˬ leh loˍ ve awˬ ceuˬ vuiˬ tuˬ hpu kaꞈ maˇ cawˬ. Yawˇ hpu tanˇ tanˇ kuiˬ lo kʼai leh pehꞈ shanˍ ehˉ nyiˇ pehꞈ keu ve yoˬ. Oˇ ve teˇ yanˇ yawˇ hpu keu ve awˬ hkawˇ teˇ gʼaˇ˗ehˬ kaꞈ maˇ kaˇ. Oˇ htaˇ teˇ co˗e awˬ hpfuhˇ i jaˇ ve pehꞈ shanˍ ehˉ nyiˇ pehꞈ mehˇ chawˇ ma keu chehˇ ve htaꞈ Yeˍsuˆ mawˬ ve yoˬ. Yawˇ tanˇ ve hpu lehˬ awˬ hpfuhˇ a ciˉ ceh tiˉ cawˬ ve yoˬ. Jaˍ meuˇ lehˬ awˬ hpfuhˇ pawˇ jaˇ ve htawˇ yawˇ tanˇ ve hpu lehˬ jaˍ meuˇ teˇ hkeh kaꞈ vuiˬ maˇ gʼa ve yoˬ.

18. Maˍkuˆ liꞈ 12:43, 44 hkʼaw Yeˍsuˆ mehˇ chawˇ ma htaꞈ hkʼaˬ hkʼe kʼoˆ ve le?

¹⁸ Maˍkuˆ liꞈ 12:43, 44 gʼaw sheˍ. Yeˍsuˆ mehˇ chawˇ ma chi teˇ gʼaˇ htaꞈ nyi hkʼaˇ suh jaˇ. Hkʼe te leh, yawˇ awˬ laꞈ gʼawˇ htaꞈ kuˬ la leh kʼoˆ piˇ ve, “hpu tanˇ tanˇ kuiˬ lo keu ve chaw hkʼa peu˗eˬ aꞈ kehˉ haˍ gʼawˇ ve mehˇ chawˇ ma chi teˇ gʼaˇ lehˬ leuˉ leh keu maˇ ve yoˬ.” Leh yawˇ kʼawꞈ kʼoˆ ve, “[paw sha ve chaw] lehˬ yawˇ hui cawˬ maˇ jaˇ ve awˬ hkʼaw lo yuˬ tawˆ leh keu ve yoˬ. Yaꞈ hkʼaˇ, yaˇ miˇ chi teˇ gʼaˇ lehˬ, haˍ gʼawˇ jaˇ ve awˬ hkʼaw lo, yawˇ ve a shaꞈ hu tuˬ hkʼa cawˬ ve hkʼa peu˗eˬ htaꞈ yuˬ tawˆ leh keu ve yoˬ.” Mehˇ chawˇ ma chi hkʼe te ve lehˬ, yawˇ ve a shaꞈ Yaˬhoˉvaˬ htaꞈ chiˇ aꞈ piˇ leh yawˇ htaꞈ nyi haꞈ shaˉ laˇ tuˬ yoˬ tehꞈ yonˍ ve hpeuꞈ maw laˇ ve yoˬ.—Chiˇ mvuh ve 26:3.

19. Yeˍsuˆ haˍ gʼawˇ ve mehˇ chawˇ ma ve awˬ lawn kʼoˆ htaˇ, ngaˬ hui htaꞈ aˬ htoꞈ ma maˍ laˇ ve le?

¹⁹ Gʼaw taˍ ve awˬ lawn a shaꞈ teꞈ kuiˬ hkʼaw yuˬ yehˇ ve. A shu yawˇ awˬ to htaꞈ na nyi cawˇ ve, ‘Yeˍsuˆ haˍ gʼawˇ ve mehˇ chawˇ ma chi teˇ gʼaˇ htaꞈ kʼoˆ htaˇ, ngaˬ htaꞈ aˬ htoꞈ ma maˍ laˇ ve le?’ Mehˇ chawˇ ma chi teˇ gʼaˇ htaꞈ caˉ daꞈ ve awˬ lawn dawˇ nyi sheˍ. Yawˇ Yaˬhoˉvaˬ htaꞈ chi aꞈ kehˉ piˇ gaˇ ve yoˬ. Yawˇ chi hkʼe te maˇ gʼa ve htawˇ, yawˇ Yaˬhoˉvaˬ htaꞈ piˇ gʼa ve hkʼe piˇ leh yawˇ piˇ ve awˬ ceuˬ Yaˬhoˉvaˬ mehˆ gʼuˇ suhˍ awˬ hpfuhˇ hkʼaˆ jaˇ ve tehꞈ Yeˍsuˆ shiˍ ve yoˬ. Chi htaꞈ pa taw, ngaˬ hui henˇ yuˬ tuˬ awˬ pon lehˬ, ngaˬ hui Yaˬhoˉvaˬ ve kanˉ nyi ma awˬ tawˬ hkʼa gaˬ te ve htaꞈ yawˇ mawˬ htaˇ, ha lehˬ jaˇ ve yoˬ. (Maꞈhtehˍ 22:37; Kawˇlawˇsehˇ 3:23) Awˬ liˇ awˬ hkʼaˇ chi ngaˬ hui kaꞈ yehˇ gʼa ve yoˬ. Ngaˬ hui Yaˬhoˉvaˬ htaꞈ oˉ kʼoˍ pui ve, hto toˇ ve, maˇ heˆ leh hpawnˬ daꞈ ve, ngaˬ hui te gʼa ve hkʼe te htaˇ, chi hkʼe te ve htaꞈ Yaˬhoˉvaˬ mawˬ htaˇ ha lehˬ jaˇ tuˬ yoˬ.

20. Nawˬ mehˇ chawˇ ma ve awˬ lawn htaꞈ hkʼaˬ hkʼe te yuˬ yehˇ tuˬ le? Tawˇ pa haˉ kʼoˆ maˍ laˇ sheˍ.

 ²⁰ Nawˬ mehˇ chawˇ ma ve awˬ lawn htaꞈ hkʼaˬ hkʼe te yuˬ yehˇ tuˬ le? Dawˇ nyi sheˍ. A shu teˇ gʼaˇ awˬ gʼaˇ peꞈ laˇ tuˬ loˍ ve leh yawˇ te ve htaꞈ Yaˬhoˉvaˬ awˬ hpfuhˇ shiˍ ve tehꞈ kʼoˆ ve htaꞈ kaˇ gaˇ ve yoˬ. Tawˇ pa haˉ te kʼo, awˬ viˉ awˬ nyi chaw mawˇ ma maˇ chehˇ sha puiˉ leh Yaˬhoˉvaˬ ve kanˉ oˇ htaˇ hkʼe leˇ hkʼa dehꞈ te maˇ gʼa ve pa taw, nyi ma luˬ leh awˬ hpfuhˇ maˇ cawˬ tehꞈ dawˇ ve hkʼaˬ ve teˇ gʼaˇ htaꞈ nawˬ shiˍ daꞈ ve le? Awˬ viˉ awˬ nyi hawˉ hkʼaˆ naˬ maw jaˇ˗oˬ leh teˇ pawˆ pawˆ kʼo hpawnˬ daꞈ˗e maˇ gʼa ve pa taw, awˬ gʼaˇ nuˇ chehˇ ve hkʼaˬ ve teˇ gʼaˇ htaꞈ nawˬ shiˍ daꞈ ve le? Nawˬ yawˇ hui htaꞈ ga piˇ gʼa ve lehˬ ‘daꞈ ve awˬ ceuˬ ceh tiˉ shu htaꞈ uiˍ la yeˬ la piˇ puiˉ ve yoˬ.’ (Eˇfeˇsuꞈ 4:29) Haˍ gʼawˇ ve mehˇ chawˇ ma ve awˬ lawn nawˬ awˬ gʼaˇ hkʼaˬ hkʼe gʼa ve yawˇ hui htaꞈ kʼoˆ maˍ piˇ sheˍ. Nawˬ tawˇ yaw ve awˬ ceuˬ yawˇ hui yonˍ gʼa tuˬ ga piˇ leh, Yaˬhoˉvaˬ awˬ pon yawˇ hui te gʼa ve hkʼe te htaˇ, yawˇ ha lehˬ jaˇ tuˬ yoˬ. (Tawˇ naˉ ve 15:23; 1 Hteˇsaˍlawˇniˆ 5:11) Awˬ viˉ awˬ nyi yawˇ hui te gʼa ve hkʼe te leh nawˬ chiˇ mvuh piˇ htaˇ, yawˇ hui hkʼaˬ hkʼe taw piˇ gʼa maˇ ve htawˇ maˇ kʼoˆ, nawˬ kaꞈ Yeˍsuˆ ve hkui ha awˬ hkʼaˇ suh gʼaꞈ kʼai chehˇ ve yoˬ.

21. Nawˬ aˬ htoꞈ ma te tuˬ dawˇ teh taˍ ve le?

²¹ Ha lehˬ ve bon hkawˇ liꞈ hkʼaw Yeˍsuˆ ve a shaꞈ teꞈ hkʼaˇ htaꞈ caˉ daꞈ ve laiˉ ceuˬ cawˬ ve yoˬ. Ha lehˬ ve bon hkawˇ liꞈ 4 daw cawˬ ve ngaˬ hui awˬ bon uiˍ jaˇ. Awˬ lawn kʼo, chi ngaˬ hui Yeˍsuˆ htaꞈ henˇ yuˬ leh yawˇ ve hkui ha awˬ hkʼaˇ suh gʼaꞈ kʼai gʼa tuˬ te laˇ ve yoˬ. A shu yawˇ hkʼaˇ yawˇ Liꞈ hpu henˇ ve maˇ heˆ leh, yehˬ kʼa hkʼaw oˉ kʼoˍ pui htaˇ, ha lehˬ ve bon hkawˇ liꞈ 4 daw chi ve htaꞈ caˉ daꞈ ve henˇ nyi sheˍ. Ngaˬ hui awˬ bon hkʼa dehꞈ gʼa gaˇ ve kʼo, ngaˬ hui gʼaw taˍ ve awˬ lawn htaꞈ hkʼa dehꞈ dawˇ nyi leh a shaꞈ teꞈ kuiˬ hkʼaw gʼa yuˬ yehˇ ve tehꞈ taˇ leunˇ. Chi hkʼoˆ kaꞈ, Yeˍsuˆ te ve htaꞈ ngaˬ hui gʼa henˇ yuˬ leh yawˇ kʼoˆ ve htaꞈ gʼa na ve yoˬ. Yeˍsuˆ maˇ suh sheˍ htaˇ kʼoˆ taˉ ve tawˇ htaꞈ ngaˬ hui aˬ htoꞈ ma henˇ yuˬ gʼa ve, gʼuˇ suhˍ teˇ lawn hkʼaw teˇ geh henˇ tuˬ yoˬ.