1-2. Yeˍsuˆ maˇ suh sheˍ htaˇ awˬ leh meuˇ yaw ve tawˇ aˬ htoꞈ ma hpehꞈ la ve le?

 Niˆsanˍ Ha pa 14 nyi 33 hkʼawꞈ C.E. htaˇ, Yeˍsuˆ htaꞈ she pfuhˍ piˇ ve leh yawˇ teꞈ chiˉ maˇ gʼa te yaꞈ ve kaꞈ yaꞈ ve tehꞈ suhˉ jehˬ cheˆ piˇ peuˬ hkʼawꞈ nawˉ, yawˇ htaꞈ kʼoˆ guiˇ gʼuiˬ guiˇ piˇ ve, ciˍ yanˍ piˇ leh suhˆ hkuiˉ daw hkʼoˆ htaꞈ keu piˇ ve yoˬ. Maꞈ yaˇ Yeˍsuˆ ve laꞈ taw kʼaw leh hkui sheh htaꞈ sho cuˇ htaꞈ keu piˇ ve yoˬ. Yawˇ shaˉ gʼawˬ ve teˇ pawˆ le le leh, yawˇ tawˇ yaw ve teˇ pawˆ le le, naˬ jaˇ tuˬ te piˇ ve yoˬ. Yeˍsuˆ a yeˇ uiˍ ve tawˇ kʼoˆ laˇ tuˬ cawˬ ve pa taw yawˇ gʼa yaw ve yoˬ.

² Yeˍsuˆ suhˆ hkuiˉ daw hkʼoˆ lo suh la yoˬ te htaˇ, aˬ htoꞈ ma kʼoˆ ve leh tawˇ chi teˇ hpaˍ ngaˬ hui htaꞈ aˬ htoꞈ ma maˍ laˇ ve teˇ geh nyi sheˍ. Ngaˬ hui chi hkʼe te ve lehˬ “yawˇ ve hkawˇ htaꞈ na yuˬ” tuˬ ga laˇ ve yoˬ.—Maꞈhtehˍ 17:5.

3. “A pa˗oˬ, yawˇ hui ve venˇ baˆ htaꞈ hpehˇ hkʼa˗o” tehꞈ kʼoˆ htaˇ, Yeˍsuˆ a shu htaꞈ kʼoˆ gaˇ ve le?

³ Yeˍsuˆ aˬ htoꞈ ma kʼoˆ ve le? Yeˍsuˆ suhˆ hkuiˉ daw hkʼoˆ lo chehˇ htaˇ yawˇ bon lawˬ ve, “A pa˗oˬ, yawˇ hui ve venˇ baˆ htaꞈ hpehˇ hkʼa˗o.” Yeˍsuˆ yawˇ ve Awˬ pa a shu htaꞈ venˇ baˆ hpehˇ piˇ tcuh gaˇ ve le? Awˬ hawˉ lo Yeˍsuˆ kʼoˆ taˍ ve tawˇ ngaˬ hui htaꞈ hkʼawꞈ laˇ tuˬ yoˬ. Yawˇ kʼoˆ ve, “yawˇ hui hkʼaˬ hkʼe te ve htaꞈ yawˇ hui maˇ shiˍ.” (Luˉkaꞈ 23:33, 34) Roˉmaꞈ ve maꞈ yaˇ Yeˍsuˆ ve laꞈ taw kʼaw leh hkui sheh htaꞈ sho cuˇ htaꞈ keu piˇ ve chaw htaꞈ kʼoˆ gaˇ ve yoˬ. Yeˍsuˆ a shu hpehꞈ ve yawˇ hui maˇ shiˍ. Chaw awˬ moˍ lonˉ hkʼaw ve yawˇ htaꞈ tiˇ pehˍ loˬ kʼoˆ ve chaw teˇ hpaˍ hkʼawꞈ nawˉ htaˇ, venˇ baˆ dawˇ hpfuhˆ leh yawˇ htaꞈ yonˍ la tuˬ yoˬ hehˉ tehꞈ yawˇ dawˇ nyi  ve yoˬ. (Tcuh yaˇ 2:36-38) Yeˍsuˆ maˇ suh keunˍ ve htawˇ, yawˇ htaꞈ suh tuˬ te laˇ ve chaw htaꞈ yawˇ maˇ beuꞈ leh maˇ te hkʼawꞈ. (1 Peˍtruˆ 2:23) Yaˬhoˉvaˬ yawˇ hui htaꞈ venˇ baˆ hpehˇ piˇ tuˬ Yeˍsuˆ lawˬ ve yoˬ.

4. Yeˍsuˆ yawˇ htaꞈ tawˍ ve chaw htaꞈ venˇ baˆ hpehˇ piˇ ve ngaˬ hui htaꞈ aˬ htoꞈ ma maˍ laˇ ve le?

⁴ Yeˍsuˆ kʼoˆ ve tawˇ hkawˇ ngaˬ hui htaꞈ aˬ htoꞈ ma maˍ laˇ ve le? Yeˍsuˆ shu htaꞈ venˇ baˆ hpehˇ piˇ ve hkʼa shuˍ, ngaˬ hui kaꞈ shu htaꞈ venˇ baˆ hpehˇ piˇ cawˇ ve yoˬ. (Kawˇlawˇsehˇ 3:13) Ngaˬ hui chi hkʼe yonˍ ve leh a shaꞈ teꞈ hkʼaˇ chi hkʼe te ve yawˇ hui maˇ na gʼa ve pa taw, ngaˬ hui ve awˬ viˉ awˬ nyi teˇ hpaˍ kaꞈ ngaˬ hui htaꞈ tawˍ laˇ ve yoˬ. Yawˇ hui ngaˬ hui htaꞈ she pfuhˍ laˇ ve, yaꞈ taw tuˬ te laˇ ve, ngaˬ hui ve liꞈ kʼoˆ htaꞈ te luˬ laˇ ve, maˇ heˆ leh ngaˬ hui htaꞈ kaꞈ te luˬ laˇ tuˬ yoˬ tehꞈ kawˆ ho laˇ ve yoˬ. Ngaˬ hui ve nyi ma hkʼaw beuꞈ ve cawˬ tcuh ve aꞈ kehˉ, Yaˬhoˉvaˬ yawˇ htaꞈ ga piˇ leh teˇ nyi kʼo Liꞈ hpu hkʼaw awˬ tehˬ ve htaꞈ haꞈ yuˬ tuˬ ngaˬ hui Yaˬhoˉvaˬ geh lawˬ cawˇ ve yoˬ. (Maꞈhtehˍ 5:44, 45) Yawˇ hui ngaˬ hui htaꞈ nyi ma naˬ jaˇ tuˬ te laˇ htaˇ, teˇ pawˆ pawˆ kʼo yawˇ hui htaꞈ venˇ baˆ hpehˇ piˇ tuˬ, haˍ jaˇ tehꞈ dawˇ ve yoˬ. Yaꞈ hkʼaˇ, ngaˬ hui hkʼaˬ htaˆ kaꞈ beuꞈ leh venˇ baˆ maˇ hpehˇ piˇ ve kʼo, ngaˬ hui awˬ to htaꞈ te luˬ chehˇ ve yoˬ. Awˬ viˉ awˬ nyi yaˇ miˇ teˇ gʼaˇ kʼoˆ ve, “venˇ baˆ hpehˇ piˇ ve lehˬ yawˇ hui te ve awˬ ceuˬ cawˇ ve tehꞈ ngaˬ dawˇ leh, ngaˬ htaꞈ maˇ hteˇ maˇ cawˇ te laˇ tcuh ve kʼoˆ gaˇ ve maˇ heˆ tehꞈ, ngaˬ na gʼa la ve yoˬ. Kʼoˆ gaˇ ve lehˬ ngaˬ yawˇ hui htaꞈ maˇ beuꞈ˗o ve yoˬ.” (Chiˇ mvuh ve 37:8) Ngaˬ hui shu htaꞈ venˇ baˆ hpehˇ piˇ ve kʼo, maˇ daꞈ ve awˬ lawn ngaˬ hui nyi ma maˇ sha tuˬ leh beuꞈ tuˬ maˇ te laˇ tcuh.—Eˇfeˇsuꞈ 4:31, 32.

5. Yeˍsuˆ awˬ paˇ lo htaꞈ keu taˍ ve chaw hkʼawˇ teˇ gʼaˇ htaꞈ yawˇ aˬ htoꞈ ma ka tiꞈ te piˇ ve le?

⁵ Yeˍsuˆ aˬ htoꞈ ma kʼoˆ ve le? Yeˍsuˆ awˬ paˇ lo chaw hkʼawˇ nyiˇ gʼaˇ htaꞈ keu taˍ ve, awˉ lawˉ htaˇ yawˇ huiˉ maˬ Yeˍsuˆ htaꞈ maˇ shawˍ maˇ caˆ kʼoˆ piˇ ve yoˬ. (Maꞈhtehˍ 27:44) Hkʼawꞈ nawˉ htaˇ teˇ gʼaˇ Yeˍsuˆ “teꞈ chiˉ kaꞈ maˇ te yaꞈ” tehꞈ dawˇ gʼa ve yoˬ. (Luˉkaꞈ 23:40, 41) Chi hkʼoˆ kaꞈ yawˇ Yeˍsuˆ htaꞈ kʼoˆ piˇ ve, “Yeˍsuˆ˗oˬ, nawˬ hkunˉ hawˉ hkanˇ te laˬ ve teˇ yanˇ, ngaˬ htaꞈ dawˇ nawˇ laˇ˗oˆ.” (Luˉkaꞈ 23:42) Yawˇ Yeˍsuˆ kʼawꞈ teꞈ tu la tuˬ leh awˬ gʼuˇ suhˍ hpawˇ Yeˍsuˆ Jawˇmawˇ te tuˬ ve htaꞈ yonˍ ve tehꞈ, yawˇ ve tawˇ hkawˇ hpeuꞈ maw laˇ ve yoˬ. Hawˉ hkʼaˆ chi teˇ gʼaˇ lehˬ yonˍ ve cawˬ ve yoˬ. Yeˍsuˆ yawˇ htaꞈ kʼoˆ piˇ ve, “yaꞈ nyi nawˬ ngaˬ geh teˇ geh [mvuhˇ naw ma hkʼoˆ lo gʼa chehˇ tuˬ ve maˇ heˆ] Paˍraˍdiˇsuˆ awˬ hkʼaw lo gʼa chehˇ tuˬ yoˬ.” (Luˉkaꞈ 23:43) Yeˍsuˆ “nawˬ” leh “ngaˬ” kʼoˆ ve tawˇ htaꞈ chaˬ nyi sheˍ. Awˬ lawn chi Yeˍsuˆ yawˇ htaꞈ ceh ka tiꞈ te piˇ ve htaꞈ hpeuꞈ maw laˇ ve yoˬ. Chaw hkʼawˇ chi teˇ gʼaˇ suh la yoˬ te chehˇ ve htaꞈ Yeˍsuˆ dawˇ lawˬ kuiˬ piˇ ve yoˬ. Awˬ lawn kʼo, Yeˍsuˆ yawˇ Awˬ pa ha kʼaˉ puiˉ ve Gʼuiˬ sha hpehꞈ ve tehꞈ shiˍ ve yoˬ.—Chiˇ mvuh ve 103:8.

6. Yeˍsuˆ chaw hkʼawˇ chi teˇ gʼaˇ htaꞈ kʼoˆ piˇ ve awˬ ceuˬ ngaˬ hui htaꞈ aˬ htoꞈ ma maˍ laˇ ve le?

⁶ Yeˍsuˆ kʼoˆ ve tawˇ hkawˇ ngaˬ hui htaꞈ aˬ htoꞈ ma maˍ laˇ ve le? Yeˍsuˆ yawˇ Awˬ pa htaꞈ shuˍ daꞈ jaˇ. (Heˍbrehˇ 1:3) Yaˬhoˉvaˬ ngaˬ hui htaꞈ hkʼaˬ htaˆ kaꞈ venˇ baˆ hpehˇ laˇ leh ha kʼaˉ laˇ ve tehꞈ hpeuꞈ maw laˇ ve yoˬ. Yaꞈ hkʼaˇ, ngaˬ hui te jaw ve maˇ daꞈ ve awˬ ceuˬ htaꞈ awˬ tehˬ awˬ na nyi ma luˬ leh, Yeˍsuˆ htaiˍ hkʼawꞈ laˇ ve awˬ hpfuhˇ htaꞈ yonˍ ve tehꞈ gʼa hpeuꞈ maw piˇ ve yoˬ. (1 Yoˇhanˬ 1:7) Yaꞈ hkʼaˇ, chaw teˇ hpaˍ awˬ pon kʼo, Yaˬhoˉvaˬ yawˇ hui htaꞈ awˬ tehˬ awˬ na venˇ baˆ hpehˇ laˇ˗oˬ ve laˇ? tehꞈ yonˍ maˇ gʼa ve yoˬ hehˉ. Teˇ pawˆ pawˆ kʼo nawˬ kaꞈ chi hkʼe dawˇ ve kʼo, Yeˍsuˆ maˇ suh sheˍ htaˇ ve awˬ lawn chi htaꞈ dawˇ nyi sheˍ. Chaw hkʼawˇ Yeˍsuˆ htaꞈ yonˍ la ve pa taw yawˇ ha kʼaˉ piˇ ve yoˬ. Hkʼe kʼo, Gʼuiˬ sha ve kanˉ te ve ka tiꞈ yeˬ ve chaw, Yaˬhoˉvaˬ hkawˇ na yuˬ tuˬ coˇ caˇ leh teˇ ceuˬ le le te ve kʼo˗ehꞈ? Yaˬhoˉvaˬ yawˇ hui htaꞈ leuˉ leh ha kʼaˉ piˇ tuˬ ve maˇ heˆ laˇ?—Chiˇ mvuh ve 51:1; 1 Yoˇhanˬ 2:1, 2.

7. Yoˇhanˬ liꞈ 19:26, 27 hkʼaw kʼoˆ taˍ ve hkʼe, Maˍriˆ leh Yoˇhanˬ htaꞈ Yeˍsuˆ aˬ htoꞈ ma kʼoˆ piˇ ve le? Leh aˬ htoꞈ ma pa taw yawˇ chi hkʼe kʼoˆ ve le?

⁷ Yeˍsuˆ aˬ htoꞈ ma kʼoˆ ve le? (Yoˇhanˬ 19:26, 27 gʼaw sheˍ.) Yeˍsuˆ yawˇ ve awˬ e htaꞈ dawˇ haˍ jaˇ. Yeˍsuˆ yaˇ ehˉ htaˇ kaꞈ Maˍriˆ nyi haꞈ shaˉ piˇ leh chi teˇ hkui yawˇ suh la paˇ neˇ ve awˬ paˇ lo Maˍriˆ huˉ taˍ ve yoˬ. Yawˇ lehˬ mehˇ chawˇ ma hpehꞈ ve yoˬ. Awˬ tehˬ kʼo, yawˇ awˬ nyi teˇ hpaˍ cawˬ leh awˬ e htaꞈ nyi haꞈ shaˉ gʼa ve yoˬ. Yaꞈ hkʼaˇ, awˬ e ve yonˍ hkʼaˇ hpawˇ a shu nyi haꞈ shaˉ piˇ tuˬ le? Oˇ ve teˇ yanˇ, Yeˍsuˆ ve awˬ nyi teˇ hpaˍ awˬ laꞈ gʼawˇ hpehꞈ la˗oˬ ve tehꞈ Liꞈ hpu hkʼaw teˇ kaˬ˗ehˬ kaꞈ maˇ kʼoˆ taˍ laˇ. Yaˬhoˉvaˬ htaꞈ oˉ kʼoˍ pui la ve chaw lehˬ, Yeˍsuˆ ve yehˬ kʼa hkʼaw ve chaw hkʼe hpehꞈ ve tehꞈ yawˇ shawˍ ve yoˬ. Chi  ve hkʼaw ve teˇ gʼaˇ lehˬ Yoˇhanˬ yoˬ. Yawˇ lehˬ ka tiꞈ yeˬ ve tcuh yaˇ hpehꞈ leh, Yeˍsuˆ htaꞈ meuˆ daꞈ jaˇ. (Maꞈhtehˍ 12:46-50) Yawˇ ve awˬ e yonˍ hkʼaˇ hpawˇ nyi haꞈ shaˉ piˇ leh Gʼuiˬ sha ve kanˉ caˉ leh te kʼai gʼa tuˬ, Yoˇhanˬ ga piˇ gʼa ve tehꞈ Yeˍsuˆ shiˍ ve pa taw, yawˇ Yoˇhanˬ htaꞈ leuˆ ve yoˬ. Yeˍsuˆ awˬ e htaꞈ kʼoˆ piˇ ve “yaˇ miˇ˗oˬ, nawˬ ve yaˇ paˍ htaꞈ nyi˗o.” Leh Yeˍsuˆ Yoˇhanˬ htaꞈ kʼawꞈ kʼoˆ piˇ ve, “nawˬ ve awˬ e htaꞈ nyi˗o.” Oˇ ve teˇ yanˇ tanˬ leh Yoˇhanˬ lehˬ Maˍriˆ htaꞈ yawˇ awˬ e hkʼe shawˍ leh nyi haꞈ shaˉ piˇ ve yoˬ. Chi htaꞈ nyi kʼo, Yeˍsuˆ lehˬ yawˇ ve awˬ e htaꞈ haꞈ jaˇ ve yoˬ.

8. Yeˍsuˆ Maˍriˆ leh Yoˇhanˬ htaꞈ kʼoˆ piˇ ve awˬ ceuˬ ngaˬ hui htaꞈ aˬ htoꞈ ma maˍ laˇ ve le?

⁸ Yeˍsuˆ kʼoˆ ve tawˇ hkawˇ ngaˬ hui htaꞈ aˬ htoꞈ ma maˍ laˇ ve le? Yehˬ kʼa hkʼaw ve chaw leh awˬ viˉ awˬ nyi aꞈ kehˉ ngaˬ hui Hkriꞈ yaˇ awˬ moˍ hkʼaw ve chaw htaꞈ meuˆ daꞈ ve yoˬ hehˉ. Ngaˬ hui ve awˬ viˉ awˬ nyi tawˍ laˇ ve maˇ heˆ leh baˬ taˉ laˇ ve htawˇ, Yeˍsuˆ ngaˬ hui htaꞈ ka tiꞈ te taˍ laˇ ve ngaˬ hui Yaˬhoˉvaˬ leh yawˇ ve kanˉ hkʼaˇ htaꞈ hkʼaˬ htaˆ kaꞈ meuˆ daꞈ ve kʼo, ngaˬ hui ‘teˇ ha pun gʼa tuˬ yoˬ.’ (Maˍkuˆ 10:29, 30) Laiˉ gʼaˇ ngaˬ hui ve awˬ pa, awˬ e, yaˇ paˍ, leh yaˇ miˇ hkʼe hpehꞈ tuˬ yoˬ. Yonˍ ve htaꞈ pa taw, ngaˬ hui Yaˬhoˉvaˬ htaꞈ haꞈ leh teˇ gʼaˇ leh teˇ gʼaˇ haꞈ daꞈ leh Hkriꞈ yaˇ ve yehˬ kʼa teˇ moˍ tiˉ hpehꞈ ve hkʼaw nawˬ gʼa chehˇ ve hkʼaˬ hkʼe dawˇ ve le?—Kawˇlawˇsehˇ 3:14; 1 Peˍtruˆ 2:17.

9. Maꞈhtehˍ liꞈ 27:46 hkʼaw Yeˍsuˆ kʼoˆ taˍ ve tawˇ hkawˇ ngaˬ hui htaꞈ aˬ htoꞈ ma maˍ laˇ ve le?

⁹ Yeˍsuˆ aˬ htoꞈ ma kʼoˆ ve le? Yeˍsuˆ maˇ suh sheˍ htaˇ yawˇ kuˬ leh kʼoˆ ve, “ngaˬ ve Gʼuiˬ sha˗oˬ, ngaˬ ve Gʼuiˬ sha˗oˬ, aˬ htoꞈ ma te nawˬ ngaˬ htaꞈ baˬ taˉ laˇ ve le?” (Maꞈhtehˍ 27:46) Aˬ htoꞈ ma te Yeˍsuˆ chi hkʼe kʼoˆ ve Liꞈ hpu hkʼaw maˇ gʼa kʼoˆ maˍ laˇ taˍ. Chi ve htaꞈ ngaˬ hui teˇ ceuˬ ceuˬ henˇ yuˬ gʼa ve yoˬ. Teˇ ceuˬ lehˬ, Chiˇ mvuh ve liꞈ 22:1 * hkʼaw tcuh kaˍ paˍ ve tawˇ hkawˇ awˬ tehˬ hpehꞈ la tuˬ Yeˍsuˆ te chehˇ ve yoˬ. Chi hkʼoˆ kaꞈ, Yaˬhoˉvaˬ yawˇ ve Yaˇ htaꞈ maˇ “haꞈ shaˉ piˇ” ve htaꞈ ngaˬ hui mawˬ ve yoˬ. (Yawˇbaˆ 1:10) Yeˍsuˆ beˬ ve lawˇ ve awˬ leh hkʼa gaˬ Yaˬhoˉvaˬ hpuˇ tcuh gaˇ ve tehꞈ yawˇ shiˍ ve yoˬ. Chaw yaˇ teˇ gʼaˇ˗ehˬ kaꞈ beˬ ve lawˇ ve hehnˇ jaˇ ve chi hkʼe ve maˇ gʼa hpuˇ jaw sheˍ. Leh Yeˍsuˆ kʼoˆ ve tawˇ lehˬ yawˇ maˇ yaꞈ leh maˇ suh keunˍ ve tehꞈ hpeuꞈ maw laˇ ve yoˬ.

10. Yeˍsuˆ yawˇ ve Awˬ pa htaꞈ kʼoˆ piˇ ve awˬ ceuˬ ngaˬ hui htaꞈ aˬ htoꞈ ma maˍ laˇ ve le?

¹⁰ Yeˍsuˆ kʼoˆ ve tawˇ hkawˇ ngaˬ hui htaꞈ aˬ htoꞈ ma maˍ laˇ ve le? Ngaˬ hui beˬ ve lawˇ ve maˇ gʼa hpuˇ tuˬ, Yaˬhoˉvaˬ haꞈ shaˉ laˇ gʼa ve tehꞈ maˇ dawˇ law cawˇ. Yeˍsuˆ suh htaˇ hkʼa gaˬ beˬ ve lawˇ ve gʼa hpuˇ ve hkʼe, ngaˬ hui gʼa suh˗e ve htawˇ ka tiꞈ yeˬ ve tehꞈ hpeuꞈ maw piˇ gʼa tuˬ gu hehnˇ taˍ cawˇ ve yoˬ. (Maꞈhtehˍ 16:24, 25) Ngaˬ hui hkanˍ maˇ gʼa ve beˬ ve lawˇ ve htaꞈ gʼa hpuˇ tuˬ Gʼuiˬ sha maˇ hpuˇ tcuh laˇ tehꞈ ngaˬ hui yonˍ gʼa ve yoˬ. (1 Kawˇrenˍhtuˆ 10:13) Awˬ nu ve teˇ hkʼaˇ lehˬ, Yeˍsuˆ maˇ hteˇ maˇ cawˇ ve gʼa hpuˇ ve hkʼe, ngaˬ hui kaꞈ gʼa hpuˇ tuˬ yoˬ hehˉ. (1 Peˍtruˆ 2:19, 20) Ngaˬ hui te yaꞈ ve pa taw fawˉ mehˍ ve gʼa hpuˇ ve maˇ heˆ. Yaꞈ hkʼaˇ, ngaˬ hui miˬ guiˬ htaꞈ maˇ caˉ daꞈ leh awˬ tehˬ ve htaꞈ hto toˇ ve pa taw yoˬ. (Yoˇhanˬ 17:14; 1 Peˍtruˆ 4:15, 16) Aˬ htoꞈ ma te Yaˬhoˉvaˬ Yeˍsuˆ htaꞈ tuꞈ ve hkanˍ ve hpuˇ tcuh laˇ ve le tehꞈ Yeˍsuˆ na gʼa ve yoˬ. Teˇ pawˆ pawˆ Yaˬhoˉvaˬ ve kanˉ te ve ka tiꞈ yeˬ ve chaw, aˬ htoꞈ ma te maˇ daꞈ ve awˬ lawn chi hkʼe hpuˇ tcuh laˇ ve le naˍ tehꞈ, yawˇ hui htawˇ dawˇ nawˬ dawˇ cawˬ ve yoˬ. (Haˍbaˍkuˆ 1:3) Yaˬhoˉvaˬ lehˬ ha kʼaˉ puiˉ leh, yeunˇ hkanˍ puiˉ ve Gʼuiˬ sha hpehꞈ ve yoˬ. Gʼuiˬ sha ve kanˉ te ve chaw chi hkʼe dawˇ ve, yawˇ hui yonˍ ve maˇ cawˬ ve pa taw maˇ heˆ tehꞈ Gʼuiˬ sha na gʼa ve yoˬ. Yaꞈ hkʼaˇ, yawˇ hui awˬ gʼaˇ loˍ htaˇ Gʼuiˬ sha teˇ gʼaˇ ceh tiˉ awˬ gʼaˇ piˇ gʼa ve yoˬ.—2 Kawˇrenˍhtuˆ 1:3, 4.

11. Aˬ htoꞈ ma te Yeˍsuˆ “iˉ kaˆ shiˉ ve” tehꞈ kʼoˆ ve le?

¹¹ Yeˍsuˆ aˬ htoꞈ ma kʼoˆ ve le? (Yoˇhanˬ 19:28  gʼaw sheˍ.) Aˬ htoꞈ ma te Yeˍsuˆ “iˉ kaˆ shiˉ ve” tehꞈ kʼoˆ ve le? Yawˇ chi hkʼe kʼoˆ ve lehˬ “Liꞈ hpu tawˇ hkawˇ kʼoˆ taˍ ve hkʼe biˇ la ve yoˬ.” Chiˇ mvuh ve liꞈ 22:15 hkʼaw kʼoˆ taˍ ve hkʼe, “ngaˬ ve hkʼawꞈ hkʼaw lehˬ, jeꞈ meu˗e hkʼa shuˍ goˇ jaˇ ve yoˬ. Ngaˬ ve ha tehˍ htawˇ, mawꞈ kʼaw awˬ na paˉ lo ngawˉ taˍ ve yoˬ.” Chi hkʼoˆ kaꞈ, Yeˍsuˆ suhˆ hkuiˉ daw hkʼoˆ gʼa tuꞈ gʼa hkanˍ ve awˬ ceuˬ lehˬ yawˇ iˉ kaˆ shiˉ jaˇ tuˬ te piˇ ve yoˬ. Chi htaꞈ pa taw yawˇ htaꞈ ga laˇ tuˬ lawˬ ve yoˬ.

12. Yeˍsuˆ “iˉ kaˆ shiˉ ve” kʼoˆ htaˇ ngaˬ hui aˬ htoꞈ ma henˇ yuˬ gʼa ve le?

¹² Yeˍsuˆ kʼoˆ ve tawˇ hkawˇ ngaˬ hui htaꞈ aˬ htoꞈ ma maˍ laˇ ve le? Yeˍsuˆ ve te hkʼaˇ dawˇ hkʼaˇ yawˇ awˬ gʼaˇ nuˇ ve tehꞈ hpeuꞈ maw laˇ ve maˇ heˆ. Chi ngaˬ hui yawˇ htaꞈ henˇ yuˬ cawˇ ve yoˬ. Teˇ pawˆ pawˆ ngaˬ hui shu ga laˇ tuˬ maˇ lawˬ gaˇ. Yaꞈ hkʼaˇ, loˍ jaˇ ve kʼo, shu ga laˇ tuˬ lawˬ ve htawˇ dawˇ nawˬ dawˇ taˇ cawˬ. Tawˇ pa haˉ te kʼo, ngaˬ hui mawˇ˗oˬ leh maˇ chehˇ sha puiˉ ve kʼo, awˬ viˉ awˬ nyi geh mawˇ vuiˬ ve, saˍ laꞈ gʼonˍ geh shiˍ kʼai laˇ tuˬ lawˬ cawˇ ve yoˬ. (Tawˇ naˉ ve 12:25) Ngaˬ hui “loˍ htaˇ” awˬ viˉ awˬ nyi ngaˬ hui htaꞈ haꞈ leh ga laˇ gaˇ ve tehꞈ tawnˇ taˍ cawˇ ve yoˬ. Yaꞈ hkʼaˇ, ngaˬ hui hkʼaˬ hkʼe dawˇ ve yawˇ hui maˇ shiˍ. Yawˇ hui ngaˬ hui htaꞈ ga laˇ gʼa tuˬ ngaˬ hui gʼa kʼoˆ piˇ cawˇ ve yoˬ.—Tawˇ naˉ ve 17:17.

13. Yeˍsuˆ suh htaˇ hkʼa gaˬ ka tiꞈ yeˬ ve yawˇ aˬ htoꞈ ma te biˇ gʼa ve le?

¹³ Yeˍsuˆ aˬ htoꞈ ma kʼoˆ ve le? Niˆsanˇ Ha pa 14 nyi aˬ laˬ hkʼe 3 naˍ riˍ htaˇ, Yeˍsuˆ “kanˉ te peuˬ” tehꞈ awˬ hkawˇ bvuhˬ chaweh kuˬ ve yoˬ. (Yoˇhanˬ 19:30) Yeˍsuˆ maˇ suh sheˍ htaˇ, Yaˬhoˉvaˬ yawˇ htaꞈ te tcuh gaˇ ve teˇ ceuˬ le le yawˇ te peuˬ˗oˬ tehꞈ shiˍ ve yoˬ. Yeˍsuˆ suh htaˇ hkʼa gaˬ ka tiꞈ yeˬ ve lehˬ yawˇ laiˉ ceuˬ te peuˬ gʼa ve yoˬ. Awˉ lawˉ teˇ ceuˬ lehˬ, Saˍtanˍ heˍ shehˍ hpaˇ hpehꞈ ve tehꞈ Yeˍsuˆ hpeuꞈ maw piˇ ve yoˬ. Saˍtanˍ biˇ ve chaw yaˇ htaꞈ aˬ htoꞈ ma te piˇ ve htawˇ, ka tiꞈ yeˬ gʼa ve tehꞈ hpeuꞈ maw laˇ ve yoˬ. Nyiˇ ceuˬ lehˬ, Yeˍsuˆ ve a shaꞈ htaiˍ hkʼawꞈ laˇ ve yoˬ. Chi lehˬ maˇ biˇ ve chaw yaˇ Gʼuiˬ sha geh meuˆ daꞈ gʼa tuˬ te laˇ leh co co taiˍ taiˍ dawˇ lawˬ kuiˬ cawˬ tuˬ te laˇ ve yoˬ. Leh shehˆ ceuˬ lehˬ, Yaˬhoˉvaˬ uˉ peunˍ keunˍ ve tehꞈ Yeˍsuˆ hpeuꞈ maw laˇ leh Gʼuiˬ sha ve awˬ meh htaꞈ maˇ gʼa she pfuhˍ tuˬ yawˇ te ve yoˬ.

14. Teˇ nyi le le ngaˬ hui aˬ htoꞈ ma te tuˬ dawˇ teh taˍ cawˇ ve le? Kʼoˆ maˍ laˇ sheˍ.

¹⁴ Yeˍsuˆ ve tawˇ hkawˇ ngaˬ hui htaꞈ aˬ htoꞈ ma maˍ laˇ ve le? Teˇ nyi le le ngaˬ hui Yaˬhoˉvaˬ htaꞈ ka tiꞈ yeˬ tuˬ dawˇ teh taˍ cawˇ ve yoˬ. Awˬ viˉ awˬ nyi Mehˆvawnˆ Faw Giˉlaˆ Liꞈ henˇ yehˬ hkʼaw maˍ ve htaꞈ dawˇ nyi sheˍ. Laiˉ mvuhˇ miˬ lo laˬ ve hpawnˬ daꞈ lonˉ hkʼaw yawˇ ka tiꞈ yeˬ ve awˬ lawn htaꞈ maˍ ve yoˬ. “Nawˬ aˬ htoꞈ ma tawˇ yaw ve maˇ heˆ leh aˬ htoꞈ ma te gʼa ve shawˉ pawˍ taˇ law chehˇ. Nawˬ shawˉ pawˍ gʼa teꞈ chehˇ sheˍ ve tehꞈ yonˍ gʼa˗aw laˇ? Teˇ nyi leh teˇ nyi a shaꞈ teꞈ chehˇ ve lehˬ, awˬ leh meuˇ ve awˬ yanˇ hkʼaw chehˇ taˍ ve hkʼe shawˍ leh nawˬ co co taiˍ taiˍ a shaꞈ gʼa keunˍ ve tehꞈ hpeuꞈ maw piˇ sheˍ.” Awˬ leh meuˇ ve awˬ yanˇ hkʼaw ngaˬ hui teˇ nyi le le Yaˬhoˉvaˬ htaꞈ ka tiꞈ yeˬ ve tehꞈ te sheˍ. Ngaˬ hui chi hkʼe te ve kʼo, ngaˬ hui gʼa suh ve htawˇ “Yaˬhoˉvaˬ˗oˬ, ngaˬ awˬ leh hkʼa gaˬ ka tiꞈ yeˬ peuˬ˗oˬ. Saˍtanˍ heˍ ve tehꞈ ngaˬ hpeuꞈ maw laˇ peuˬ˗oˬ. Yaˬhoˉvaˬ teˇ gʼaˇ ceh tiˉ uˉ peunˍ keunˍ ve yoˬ. Yaˬhoˉvaˬ ve awˬ meh htaꞈ maˇ gʼa she pfuhˍ tuˬ ngaˬ te peuˬ˗oˬ!”

15. Luˉkaꞈ liꞈ 23:46 hkʼaw kʼoˆ taˍ ve hkʼe, Yeˍsuˆ aˬ htoꞈ ma ve awˬ lawn htaꞈ yonˍ gʼa ve le?

¹⁵ Yeˍsuˆ aˬ htoꞈ ma kʼoˆ ve le? (Luˉkaꞈ 23:46 gʼaw sheˍ.) Yeˍsuˆ yonˍ gʼa ve hkʼaw kʼoˆ ve, “A pa˗oˬ, ngaˬ ve co ha nawˬ ve laꞈ hkʼaw lo ngaˬ chiˇ aꞈ laˇ ve yoˬ.” Yeˍsuˆ chi hkʼe kʼoˆ ve lehˬ, awˬ gʼuˇ suhˍ hpawˇ yawˇ ve a shaꞈ Yaˬhoˉvaˬ ve laꞈ hkʼaw lo cawˬ leh Awˬ pa yawˇ htaꞈ maˇ leunˇ laˇ taˍ tehꞈ yonˍ gʼa ve yoˬ.

16. Awˬ viˉ awˬ nyi hawˉ hkʼaˆ 16 hkʼawꞈ ve awˬ lawn nawˬ htaꞈ aˬ htoꞈ ma maˍ laˇ ve le?

 ¹⁶ Yeˍsuˆ kʼoˆ ve tawˇ hkawˇ ngaˬ hui htaꞈ aˬ htoꞈ ma maˍ laˇ ve le? Nawˬ ve a shaꞈ teꞈ hkʼaˇ aˬ htoꞈ ma gʼa hpuˇ ve htawˇ maˇ kʼoˆ, Yaˬhoˉvaˬ htaꞈ chiˇ aꞈ piˇ sheˍ. Nawˬ chi hkʼe te gʼa tuˬ, “nyi ma awˬ tawˬ hkʼa gaˬ Gʼuiˬ sha htaꞈ gʼaˇ va˗o.” (Tawˇ naˉ ve 3:5) Awˬ viˉ awˬ nyi Co˗cho 15 hkʼawꞈ ve awˬ lawn htaꞈ teˇ geh nyi sheˍ. Yawˇ naˬ jaˇ ve htawˇ, Gʼuiˬ sha ve awˬ liˇ awˬ hkʼaˇ htaꞈ maˇ cawˇ ve awˬ hkʼaˇ yawˇ maˇ haꞈ shaˉ. Yawˇ maˇ suh sheˍ htaˇ awˬ e htaꞈ kʼoˆ piˇ ve, “ngaˬ e˗oˬ, ngaˬ ve a shaꞈ Yaˬhoˉvaˬ ve laꞈ hkʼaw lo cawˬ leh awˬ ceuˬ chi ve ngaˬ e htaꞈ yonˍ gʼa ve hkʼaw kʼoˆ piˇ ve yoˬ. Yaˬhoˉvaˬ ngaˬ htaꞈ kʼawꞈ teꞈ tu la tcuh laˇ tuˬ yoˬ tehꞈ ngaˬ yonˍ gʼa ve yoˬ. Yaˬhoˉvaˬ ngaˬ ve nyi ma htaꞈ shiˍ ve yoˬ. Leh ngaˬ yawˇ htaꞈ haꞈ jaˇ.” * Teˇ gʼaˇ le le kaꞈ a shu yawˇ awˬ to htaꞈ na nyi cawˇ ve, “beˬ ve lawˇ ve gʼa hpuˇ leh ngaˬ gʼa suh˗e ve kʼo, ngaˬ ve a shaꞈ Yaˬhoˉvaˬ htaꞈ chiˇ aꞈ piˇ leh ka tiꞈ yeˬ ve yoˬ. Gʼuiˬ sha ngaˬ htaꞈ maˇ leunˇ laˇ taˍ tehꞈ yonˍ gʼa˗aw laˇ?”

17-18. Ngaˬ hui htaꞈ aˬ htoꞈ ma maˍ laˇ ve le? (Awˇ ceˍ awˇ fa “ Yeˍsuˆ kʼoˆ ve tawˇ hkawˇ ngaˬ hui htaꞈ aˬ htoꞈ ma maˍ laˇ ve le?” hkʼaw nyi sheˍ.)

¹⁷ Yeˍsuˆ maˇ suh sheˍ htaˇ kʼoˆ ve tawˇ hkawˇ ngaˬ hui laiˉ ceuˬ henˇ yuˬ gʼa ve yoˬ. Yeˍsuˆ ve tawˇ hkawˇ ngaˬ hui shu htaꞈ venˇ baˆ hpehˇ piˇ tuˬ shaˍ tiꞈ peꞈ laˇ leh Yaˬhoˉvaˬ ngaˬ hui htaꞈ venˇ baˆ hpehˇ laˇ tuˬ yoˬ tehꞈ yonˍ gʼa ve yoˬ. Ngaˬ hui htaꞈ ga laˇ tuˬ gu hehnˇ taˍ ve Hkriꞈ yaˇ ve yehˬ kʼa hkʼaw ngaˬ hui gʼa chehˇ ve daꞈ jaˇ ve awˬ ceuˬ hpehꞈ ve yoˬ. Yaꞈ hkʼaˇ, ngaˬ hui ga laˇ tuˬ loˍ htaˇ, yawˇ hui geh lawˬ ve htawˇ dawˇ nawˬ dawˇ taˇ cawˬ. Ngaˬ hui shoꞈ shaꞈ ve aˬ htoꞈ ma gʼa hpuˇ ve htawˇ, ngaˬ hui yeunˇ hkanˍ gʼaˇ tuˬ Yaˬhoˉvaˬ ga laˇ ve tehꞈ shiˍ ve yoˬ. Ngaˬ hui teˇ nyi leh teˇ nyi awˬ leh meuˇ ve awˬ yanˇ hkʼaw chehˇ taˍ ve tehꞈ shawˍ leh Yaˬhoˉvaˬ htaꞈ ka tiꞈ yeˬ gʼa tuˬ a yeˇ uiˍ jaˇ ve yoˬ. Ngaˬ hui ve a shaꞈ Yaˬhoˉvaˬ htaꞈ chiˇ aꞈ piˇ ve kʼo, yawˇ maˇ leunˇ laˇ taˍ tehꞈ ngaˬ hui yonˍ gʼa ve yoˬ.

¹⁸ Yeˍsuˆ maˇ suh sheˍ htaˇ kʼoˆ ve tawˇ hkawˇ ngaˬ hui henˇ yuˬ gʼa tuˬ laiˉ ceuˬ cawˬ ve tehꞈ gʼa mawˬ ve yoˬ. Chi ve teˇ hpaˍ ngaˬ hui yuˬ yehˇ ve kʼo, Yaˬhoˉvaˬ ngaˬ hui htaꞈ kʼoˆ laˇ ve hkʼe, “Yeˍsuˆ ve tawˇ hkawˇ htaꞈ na yuˬ” chehˇ ve yoˬ.—Maꞈhtehˍ 17:5.