1-2. Htaiˍ hkʼawꞈ ve awˬ hpfuhˇ aˬ htoꞈ ma le? Aˬ htoꞈ ma te ngaˬ hui htaꞈ htaiˍ hkʼawꞈ laˇ ve gʼa cawˬ cawˇ ve le?

 Aˍdanˍ lehˬ biˇ ve chaw hpehꞈ ve yoˬ. Yawˇ venˇ baˆ te yaꞈ ve pa taw, yawˇ awˬ to leh yawˇ ve awˬ hawehˍ awˬ haˆ co co taiˍ taiˍ a shaꞈ gʼa tuˬ shonˇ kʼai ve yoˬ. Yawˇ dawˇ taˍ leh venˇ baˆ te yaꞈ ve pa taw, maˇ yaꞈ tehꞈ kʼoˆ maˇ hpehꞈ. Yawˇ suh keunˍ ve yoˬ. Yawˇ ve awˬ hawehˍ awˬ haˆ teꞈ chiˉ maˇ gʼa te yaꞈ ve chaw kʼo˗ehꞈ? Yawˇ hui htaꞈ ga piˇ tuˬ aˬ htoꞈ ma cawˬ ve le? (Roˉmaꞈ 5:12, 14) Aˍdanˍ venˇ baˆ te yaꞈ peuˬ hkʼawꞈ nawˉ, maˇ maw Aˍdanˍ ve awˬ hawehˍ awˬ haˆ laiˉ lanˬ gʼaˇ venˇ baˆ leh suh ve htaꞈ ponˬ tuˬ Yaˬhoˉvaˬ yawˇ hui htaꞈ hkʼaˬ hkʼe ga piˇ tuˬ awˬ hkʼaˇ shiˍ la ve yoˬ. (Awˬ hkuiˉ puiˍ 3:15) Yaˬhoˉvaˬ tinˍ taˍ ve awˬ yanˇ gaˬ htaˇ, Gʼuiˬ sha yawˇ ve Yaˇ paˍ miˬ guiˬ hkʼoˆ lo peu laˇ leh “chaw maˇ maˇ htaꞈ htaiˍ hkʼawꞈ piˇ tuˬ, yawˇ ve a shaꞈ piˇ tuˬ awˬ pon laˬ” tcuh ve yoˬ.—Maˍkuˆ 10:45; Yoˇhanˬ 6:51.

² Htaiˍ hkʼawꞈ ve awˬ hpfuhˇ aˬ htoꞈ ma le? Htaiˍ hkʼawꞈ ve awˬ hpfuhˇ Liꞈ hpu hkʼaw Heˍlaˍsaˆ ve tawˇ hkawˇ tcuhˉ kuiˬ lehˬ, Aˍdanˍ te shonˇ kʼai taˍ ve a shaꞈ htaꞈ Yeˍsuˆ kʼawꞈ vuiˬ hkʼawꞈ laˇ ve htaꞈ kʼoˆ gaˇ ve yoˬ. (1 Kawˇrenˍhtuˆ 15:22) Aˬ htoꞈ ma te ngaˬ hui htaꞈ htaiˍ hkʼawꞈ laˇ ve gʼa cawˬ cawˇ ve le? Yaˬhoˉvaˬ ve awˬ liˇ tawˇ hkawˇ hteˇ ve cawˇ ve hkʼaw kʼoˆ ve, a shaꞈ awˬ tan a shaꞈ. (Tawˆ kʼai ve 21:23, 24) Aˍdanˍ yawˇ ve a shaꞈ biˇ jaˇ ve shonˇ kʼai ve yoˬ. Hkʼe te leh, Gʼuiˬ sha ve awˬ liˇ awˬ hkʼaˇ hteˇ ve cawˇ ve htaꞈ gʼaꞈ te tuˬ, Yeˍsuˆ yawˇ ve a shaꞈ biˇ jaˇ ve gʼa peꞈ laˇ ve yoˬ. (Roˉmaꞈ 5:17) Htaiˍ hkʼawꞈ ve htaꞈ yonˍ ve chaw teˇ gʼaˇ le le awˬ pon chi lehˬ, Yeˍsuˆ “co co taiˍ taiˍ teꞈ chehˇ ve Awˬ pa” hpehꞈ tuˬ te piˇ ve yoˬ.—Iˉsaˍyaˆ 9:6; Roˉmaꞈ 3:23, 24.

3. Yoˇhanˬ liꞈ 14:31 leh 15:13 hkʼaw kʼoˆ taˍ ve hkʼe, aˬ htoꞈ ma te Yeˍsuˆ yawˇ ve a shaꞈ biˇ jaˇ ve ha lehˬ ha kʼa tanˇ laˇ ve le?

³ Yeˍsuˆ mvuhˇ naw ma hkʼoˆ yawˇ ve Awˬ pa htaꞈ haꞈ leh ngaˬ hui htaꞈ haꞈ ve pa taw, yawˇ ve a shaꞈ ha lehˬ ha kʼa tanˇ laˇ ve yoˬ. (Yoˇhanˬ  14:31; 15:13 gʼaw sheˍ.) Haꞈ ve chi htaꞈ pa taw, Yeˍsuˆ suh htaˇ hkʼa gaˬ ka tiꞈ yeˬ tuˬ dawˇ teh taˍ leh Awˬ pa loˍ ve awˬ ceuˬ htaꞈ te biˇ tuˬ dawˇ teh taˍ ve yoˬ. Chi htaꞈ pa taw, yawˇ suh htaˇ hkʼa gaˬ ka tiꞈ yeˬ ve yoˬ. Hkʼe te leh, Yaˬhoˉvaˬ ve a loˍ chaw yaˇ htaꞈ caˉ daꞈ ve lehˬ, miˬ guiˬ hkʼoˆ awˬ tehˬ hpehꞈ la tuˬ te piˇ ve yoˬ. Yeˍsuˆ maˇ suh sheˍ htaˇ, tuꞈ jaˇ hkanˍ jaˇ ve aˬ htoꞈ ma te gʼa hpuˇ tcuh ve le? Awˬ lawn chi ve hkʼaw kʼoˆ maˍ laˇ tuˬ yoˬ. Leh Liꞈ hpu bvuhꞈ paˍ teˇ gʼaˇ htaiˍ hkʼawꞈ ve awˬ hpfuhˇ htaꞈ shiˍ ve teˇ geh henˇ tuˬ yoˬ. Leh ngaˬ hui htaiˍ hkʼawꞈ ve awˬ hpfuhˇ htaꞈ hkʼaˬ hkʼe te shiˍ ve hpeuꞈ maw piˇ tuˬ, Yaˬhoˉvaˬ leh Yeˍsuˆ ngaˬ hui awˬ pon te laˇ ve awˬ hpfuhˇ htaꞈ shiˍ tuˬ ga laˇ ve kaꞈ teˇ geh henˇ tuˬ yoˬ.

4. Yeˍsuˆ hkʼaˬ hkʼe te suh˗e ve le?

⁴ Yeˍsuˆ maˇ suh sheˍ htaˇ, aˬ htoꞈ ma gʼa hpuˇ ve dawˇ nyi sheˍ. Awˬ tehˬ kʼo, Yeˍsuˆ mvuhˇ naw ma tcuh yaˇ awˬ moˍ lonˉ yawˇ htaꞈ ga laˇ tcuh kaꞈ gʼa ve yoˬ. Yaꞈ hkʼaˇ, Roˉmaꞈ maꞈ yaˇ Yeˍsuˆ htaꞈ yuˬ kʼai leh jawꞈ tcuh ve yoˬ. (Maꞈhtehˍ 26:52-54; Yoˇhanˬ 18:3; 19:1) Yawˇ hui Yeˍsuˆ ve awˬ shaˍ tzuhꞈ tawˆ la tuˬ ve aˉ hkeh yuˬ jawꞈ piˇ ve yoˬ. Yawˇ ve hkʼawꞈ nawˉ lo awˬ kuiˉ tiˉ cawˬ leh awˬ suhˍ tawˆ la ve htawˇ, yawˇ htaꞈ tiˇ pehˍ kuiˬ awˬ ti lo kʼai tuˬ suhˆ hkuiˉ daw kaꞈ taˆ tcuh ve yoˬ. Yeˍsuˆ suhˆ hkuiˉ daw hehnˇ jaˇ ve htaꞈ taˆ ve pa taw, awˬ gʼaˇ peuˬ˗e ve yoˬ. Hkʼe te leh, maꞈ yaˇ oˇ teˇ tawn lo chehˇ ve hawˉ hkʼaˆ teˇ gʼaˇ htaꞈ Yeˍsuˆ awˬ tan kʼawꞈ taˆ tcuh ve yoˬ. (Maꞈhtehˍ 27:32) Yeˍsuˆ yawˇ htaꞈ tiˇ pehˍ piˇ kuiˬ lo gaˬ htaˇ, maꞈ yaˇ yawˇ htaꞈ suhˆ hkuiˉ daw hkʼoˆ lo naˆ tiˍ piˇ leh yawˇ ve laꞈ taw kʼaw leh hkui sheh htaꞈ sho cuˇ htaꞈ keu piˇ ve yoˬ. Yawˇ hui suhˆ hkuiˉ daw htaꞈ cawˍ tu htaˇ, yawˇ ve awˬ to hehnˇ jaˇ leh sho cuˇ htaꞈ keu taˍ ve oˇ ve awˬ shaˍ tzuhꞈ tuˬ te piˇ ve yoˬ. Awˬ chawˇ teˇ hpaˍ leh awˬ e nyi ma luˬ jaˇ ve pa taw hawˬ ve yoˬ. Yaꞈ hkʼaˇ, Yuˇdaꞈ chaw awˬ hoˉ yawˇ htaꞈ kʼoˆ guiˇ gʼuiˬ guiˇ piˇ ve yoˬ. (Luˉkaꞈ 23:32-38; Yoˇhanˬ 19:25) Yeˍsuˆ laiˉ naˍ riˍ gʼa tuꞈ gʼa hkanˍ leh yawˇ htaꞈ chi hkʼe te piˇ htaˇ, nyi ma shiˍ leh awˬ tsuhˇ hpoˆ kanˉ te hehnˇ jaˇ leh shaˉ gʼawˬ haˍ jaˇ tuˬ te piˇ ve yoˬ. Yeˍsuˆ awˬ leh hkʼa gaˬ ka tiꞈ yeˬ peuˬ tehꞈ shiˍ ve yoˬ. Yawˇ Yaˬhoˉvaˬ geh awˬ leh meuˇ teˇ pawˆ bon lawˬ ve yoˬ. Peuˬ hkʼawꞈ nawˉ, oˉ kʼoˍ kʼawꞈ˗ehˍ te leh shaˉ cheˆ sheˬ ve yoˬ. (Maˍkuˆ 15:37; Luˉkaꞈ 23:46; Yoˇhanˬ 10:17, 18; 19:30) Yeˍsuˆ yaꞈ taw jaˇ ve leh naˬ jaˇ ve hkʼaw gʼa suh˗e ve yoˬ!

5. Yeˍsuˆ awˬ pon haˍ jaˇ ve awˬ ceuˬ hpehꞈ ve aˬ htoꞈ ma le?

⁵ Yeˍsuˆ chi hkʼe te suh˗e ve lehˬ, yawˇ awˬ pon haˍ jaˇ ve awˬ ceuˬ hpehꞈ ve maˇ heˆ. Chi aꞈ kehˉ yawˇ dawˇ maˇ jaˇ tuˬ te piˇ ve lehˬ, Yeˍsuˆ Gʼuiˬ sha ve awˬ meh htaꞈ nyi cha ve tehꞈ she pfuhˍ leh suh keunˍ ve tehꞈ yawˇ hui kʼoˆ ve yoˬ. (Maꞈhtehˍ 26:64-66) Chi lehˬ yawˇ dawˇ maˇ jaˇ tuˬ te piˇ leh yawˇ Awˬ pa yawˇ htaꞈ chi hkʼe maˇ she pfuhˍ tcuh gaˇ ve tehꞈ yawˇ dawˇ ve yoˬ. (Maꞈhtehˍ 26:38, 39, 42) Yaꞈ hkʼaˇ, aˬ htoꞈ ma te Yaˬhoˉvaˬ yawˇ haꞈ jaˇ ve Yaˇ paˍ tuꞈ ve hkanˍ ve hkʼaw suh˗e tcuh ve le? 3 hkʼaˇ htaꞈ teˇ geh nyi sheˍ.

6. Aˬ htoꞈ ma te Yeˍsuˆ htaꞈ suhˆ hkuiˉ daw hkʼoˆ lo gʼa htaꞈ keu taˍ ve le?

⁶ Awˉ lawˉ teˇ hkʼaˇ lehˬ, Yuˇdaꞈ chaw hkeu piˇ ve htaꞈ gʼa ponˬ tuˬ Yeˍsuˆ suhˆ hkuiˉ daw hkʼoˆ gʼa hkanˍ suh ve yoˬ. (Gaˍlaˍtiˆ 3:10, 13) Yuˇdaꞈ chaw Gʼuiˬ sha ve awˬ liˇ tawˇ hkawˇ htaꞈ na yuˬ tuˬ ka tiꞈ te taˍ peuˬ ve yoˬ. Yaꞈ hkʼaˇ, yawˇ hui kʼoˆ taˍ ve hkʼe maˇ gʼaꞈ te. Chi htaꞈ pa taw, yawˇ hui Aˍdanˍ ve awˬ hawehˍ awˬ haˆ hpehꞈ ve ceh pa taw leh suh keunˍ ve maˇ heˆ. Gʼuiˬ sha hkawˇ maˇ na ve pa taw, suh keunˍ ve yoˬ. Yaꞈ hkʼaˇ, yawˇ hui hkeu ve htaꞈ gʼa hkanˍ ve yoˬ. (Roˉmaꞈ 5:12) Gʼuiˬ sha ve awˬ liˇ tawˇ hkawˇ hkʼaw kʼoˆ ve, chaw teˇ gʼaˇ suh keunˍ ve venˇ baˆ htaꞈ te yaꞈ ve kʼo gʼa tiˇ pehˍ piˇ ve yoˬ. Chaw suh taˍ ve htaꞈ suhˆ hkuiˉ daw hkʼoˆ lo gʼa htaꞈ keu taˍ ve yoˬ. * Chi lehˬ Gʼuiˬ sha hkeu piˇ taˍ ve yoˬ. (Bon maˍ ve 21:22, 23; 27:26) Chi htaꞈ pa taw, Yeˍsuˆ htaꞈ suhˆ hkuiˉ daw hkʼoˆ htaꞈ keu piˇ htaˇ, yawˇ Yuˇdaꞈ chaw awˬ tan hkeu ve htaꞈ hkanˍ piˇ ve yoˬ. Yawˇ hui hkeu ve htaꞈ gʼa ponˬ leh yawˇ hui Yeˍsuˆ htaꞈ maˇ  haꞈ yuˬ ve htawˇ htaiˍ hkʼawꞈ ve awˬ hpfuhˇ htaꞈ awˬ bon gʼa ve yoˬ.

7. Yaˬhoˉvaˬ yawˇ ve Yaˇ paˍ gʼa tuꞈ gʼa hkanˍ tcuh ve nyiˇ hkʼaˇ teˇ hkʼaˇ aˬ htoꞈ ma le?

⁷ Aˬ htoꞈ ma te Gʼuiˬ sha yawˇ ve Yaˇ paˍ tuꞈ ve hkanˍ ve hkʼaw gʼa hkanˍ tcuh ve nyiˇ hkʼaˇ teˇ hkʼaˇ htaꞈ teˇ geh nyi sheˍ. Chi hkʼe te ve lehˬ, Yeˍsuˆ awˬ gʼuˇ suhˍ hpawˇ Paw hkuˇ te tuˬ gu hehnˇ taˍ gʼa tuˬ te jawˬ tcuh ve yoˬ. Beˬ ve lawˇ ve gʼa hpuˇ htaˇ, Yeˍsuˆ Yaˬhoˉvaˬ hkawˇ na yuˬ ve hkʼaˬ hkʼe taw haˍ jaˇ ve, Yeˍsuˆ yawˇ gʼa hpuˇ ve yoˬ. Yeˍsuˆ dawˇ haˍ jaˇ leh “mehˆ gʼuiˬ yaꞈ la ve awˬ hkʼaw lo bon lawˬ leh lawˬ hkawˉ ve yoˬ.” Yawˇ chi hkʼe gʼa hpuˇ jaw ve pa taw, ngaˬ hui aˬ htoꞈ ma loˍ ve htaꞈ yawˇ na gʼa ve yoˬ. Ngaˬ hui ‘beˬ ve lawˇ ve htaꞈ gʼa hkanˍ ve yawˇ ga laˇ hpehꞈ ve yoˬ.’ Yaˬhoˉvaˬ lehˬ ha kʼaˉ puiˉ jaˇ ve Paw hkuˇ lonˉ htaꞈ leuˆ teh leh, ‘ngaˬ hui awˬ gʼaˇ nuˇ ve teˇ yanˇ, ha kʼaˉ laˇ ve’ pa taw, Yaˬhoˉvaˬ htaꞈ awˬ bon uiˍ jaˇ kʼoˆ piˇ gaˇ ve yoˬ.—Heˍbrehˇ 2:17, 18; 4:14-16; 5:7-10.

8. Yaˬhoˉvaˬ Yeˍsuˆ htaꞈ beˬ ve lawˇ ve gʼa hpuˇ tcuh ve shehˆ hkʼaˇ teˇ hkʼaˇ aˬ htoꞈ ma le?

⁸ Shehˆ hkʼaˇ teˇ hkʼaˇ lehˬ, Yaˬhoˉvaˬ Yeˍsuˆ htaꞈ tuꞈ ve hkanˍ ve gʼa hpuˇ tcuh ve leh chaw yaˇ beˬ ve lawˇ ve gʼa hpuˇ htaˇ, Yaˬhoˉvaˬ htaꞈ ka tiꞈ yeˬ sheˍ ve laˇ? tehꞈ, a yeˇ uiˍ ve na hkawˇ chi hkʼawꞈ laˇ tuˬ yoˬ. Saˍtanˍ kʼoˆ ve hpehꞈ kʼai maˇ gʼa taˬ. Chaw yaˇ a shu yawˇ awˬ pon tiˉ dawˇ nyi leh chaw yaˇ Gʼuiˬ sha ve kanˉ te ve lehˬ, yawˇ geh teˇ ceuˬ ceuˬ gʼa gaˇ ve tehꞈ Saˍtanˍ kʼoˆ ve yoˬ. Yawˇ kʼoˆ ve, teˇ gʼaˇ le le kaꞈ Aˍdanˍ htaꞈ shuˍ ve yoˬ. Gʼuiˬ sha htaꞈ awˬ tehˬ haꞈ ve teˇ gʼaˇ kaꞈ maˇ cawˬ. (Yawˇbaˆ 1:9-11; 2:4, 5) Yeˍsuˆ ka tiꞈ yeˬ gʼa tuˬ Yaˬhoˉvaˬ yonˍ ve yoˬ. Hkʼe te leh, beˬ ve lawˇ ve chaw yaˇ hkanˍ maˇ gʼaˇ ve Gʼuiˬ sha Yeˍsuˆ htaꞈ awˬ leh hkʼa gaˬ gʼa hpuˇ tcuh ve yoˬ. Leh Yeˍsuˆ kaꞈ chi hkʼe te gʼa ve yoˬ. Yawˇ Saˍtanˍ heˍ ve tehꞈ hpeuꞈ maw laˇ ve yoˬ.

9. Tcuh yaˇ Yoˇhanˬ ngaˬ hui henˇ yuˬ tuˬ aˬ htoꞈ ma te maˍ laˇ ve le?

⁹ Hkriꞈ yaˇ laiˉ gʼaˇ lehˬ tawˍ ve tsuhˇ ve leh tuꞈ ve hkanˍ ve laiˉ ceuˬ gʼa hpuˇ ve yoˬ. Yawˇ hui mawˇ jaˇ˗oˬ ve htawˇ, htaiˍ hkʼawꞈ ve awˬ lawn yawˇ hui maˍ ve pa taw, yonˍ hkʼaˇ yonˍ yeˬ leh yawˇ hui yeunˇ hkanˍ leh hto toˇ gʼa sheˍ. Tcuh yaˇ Yoˇhanˬ Yeˍsuˆ Hkriꞈ htaꞈ caˉ daꞈ ve awˬ tehˬ ve maˍ leh htaiˍ hkʼawꞈ ve awˬ lawn yawˇ ka tiꞈ yeˬ ve hkʼaw 60 hkʼawꞈ hpaˆ maˍ ve htaꞈ teˇ geh nyi sheˍ. Yawˇ a shaꞈ aˬ laˬ hkʼe 100 hkʼawꞈ gaˬ htaˇ, Roˉmaꞈ uˉ peunˍ ve awˬ yanˇ htaˇ, Yoˇhanˬ kawˆ tuˬ cawˬ ve chaw hpehꞈ ve tehꞈ yawˇ hui dawˇ leh, Paˍmoˆ conˇ lo gʼawˬ baˬ piˇ ve yoˬ. Yawˇ aˬ htoꞈ ma te yaꞈ ve le? Yawˇ “Gʼuiˬ sha ve tawˇ hkawˇ maˍ leh Yeˍsuˆ awˬ lawn shaˉ hkiˆ hkanˍ ve pa taw” yoˬ. (Hpeuꞈ maˍ ve 1:9) Yonˍ ve leh yeunˇ hkanˍ ve yawˇ daꞈ ve henˇ yuˬ tuˬ te maˍ laˇ ve yoˬ.

10. Yoˇhanˬ bvuhꞈ ve awˬ ceuˬ lehˬ yawˇ htaiˍ hkʼawꞈ ve awˬ hpfuhˇ htaꞈ shiˍ ve tehꞈ hkʼaˬ hkʼe hpeuꞈ maw laˇ ve le?

¹⁰ Yoˇhanˬ bvuhꞈ ve liꞈ hkʼaw yawˇ Yeˍsuˆ htaꞈ haꞈ jaˇ leh htaiˍ hkʼawꞈ ve awˬ hpfuhˇ htaꞈ hkʼaˬ hkʼe taw shiˍ ve kʼoˆ maˍ laˇ ve yoˬ. Liꞈ chi ve teˇ hpaˍ hkʼaw htaiˍ hkʼawꞈ ve awˬ hpfuhˇ leh htaiˍ hkʼawꞈ ve htaꞈ awˬ bon gʼa ve 100 pawˇ hpaˆ kʼoˆ ve yoˬ. Tawˇ pa haˉ te kʼo, yawˇ bvuhꞈ ve, “teˇ gʼaˇ gʼaˇ venˇ baˆ te ve kʼo, ngaˬ hui htaꞈ ga laˇ shehˍ hpaˇ teˇ gʼaˇ lehˬ Awˬ pa geh chehˇ taˍ ve yoˬ. Yawˇ lehˬ, hteˇ ve cawˇ ve awˬ shehˍ hpaˇ Yeˍsuˆ Hkriꞈ yoˬ.” (1 Yoˇhanˬ 2:1, 2) Leh liꞈ chi teˇ hpaˍ hkʼaw a yeˇ uiˍ ve, “Yeˍsuˆ awˬ pon shaˉ hkiˆ hkanˍ ve” yoˬ. (Hpeuꞈ maˍ ve 19:10) Yoˇhanˬ htaiˍ hkʼawꞈ ve htaꞈ awˬ hpfuhˇ shiˍ jaˇ tehꞈ ngaˬ hui mawˬ ve yoˬ. Leh ngaˬ hui kaꞈ htaiˍ hkʼawꞈ ve htaꞈ awˬ hpfuhˇ shiˍ tuˬ hkʼaˬ hkʼe hpeuꞈ maw piˇ gʼa tuˬ le?

11. Beˬ ve lawˇ ve htaꞈ ngaˬ hui tawˍ daꞈ gʼaˇ tuˬ aˬ htoꞈ ma ga laˇ ve le?

¹¹ Venˇ baˆ maˇ te yaꞈ tuˬ beˬ ve lawˇ ve htaꞈ tawˍ daꞈ ve. Htaiˍ hkʼawꞈ ve htaꞈ ngaˬ hui awˬ hpfuhˇ shiˍ ve kʼo, ‘ngaˬ beˬ ve lawˇ ve gʼa hpuˇ ve kʼo ngaˬ teꞈ chiˉ te tuˬ maˇ loˍ. Yaˬhoˉvaˬ venˇ baˆ hpehˇ laˇ tuˬ yoˬ.’ tehꞈ taˇ dawˇ. Yaꞈ hkʼaˇ, ngaˬ hui beˬ ve lawˇ ve gʼa hpuˇ htaˇ, ‘Yaˬhoˉvaˬ leh Yeˍsuˆ ngaˬ awˬ pon te laˇ maˇ jaˇ ve ngaˬ hkʼaˬ hkʼe te yawˇ huiˉ maˬ htaꞈ  te yaꞈ hpehꞈ tuˬ le?’ tehꞈ gʼa dawˇ cawˇ ve yoˬ. Chi hkʼoˆ kaꞈ, ‘beˬ ve lawˇ ve htaꞈ gʼaˇ tuˬ’ Yaˬhoˉvaˬ ga laˇ tuˬ lawˬ leh lawˬ hkawˉ cawˇ ve yoˬ.—Maꞈhtehˍ 6:13.

12. 1 Yoˇhanˬ liꞈ 3:16-18 hkʼaw beˆ maˍ laˇ taˍ ve htaꞈ ngaˬ hui hkʼaˬ hkʼe gʼaꞈ te gʼa tuˬ le?

¹² Awˬ viˉ awˬ nyi htaꞈ haꞈ ve. Ngaˬ hui awˬ viˉ awˬ nyi htaꞈ haꞈ ve kʼo, htaiˍ hkʼawꞈ ve awˬ hpfuhˇ htaꞈ ngaˬ hui shiˍ ve tehꞈ hpeuꞈ maw piˇ ve yoˬ. Aˬ htoꞈ ma pa taw le? Awˬ lawn kʼo, Yeˍsuˆ ngaˬ hui awˬ pon ceh tiˉ suh laˇ ve maˇ heˆ. Awˬ viˉ awˬ nyi teˇ gʼaˇ le le awˬ pon kaꞈ yoˬ. Yawˇ ngaˬ hui awˬ pon hkanˍ suh laˇ ve kʼo, ngaˬ hui teˇ gʼaˇ le le yawˇ awˬ pon awˬ hpfuhˇ hkʼaˆ jaˇ ve yoˬ. (1 Yoˇhanˬ 3:16-18 gʼaw sheˍ.) Awˬ viˉ awˬ nyi htaꞈ haꞈ ve kʼoˆ ve lehˬ, ngaˬ hui te ve gʼa hpeuꞈ maw piˇ ve yoˬ. (Eˇfeˇsuꞈ 4:29, 31–5:2) Tawˇ pa haˉ te kʼo, awˬ viˉ awˬ nyi naˬ ve leh yawˇ hui mvuhˇ yeˬ mvuhˇ haw gʼa hpuˇ htaˇ, ngaˬ hui ga piˇ ve yoˬ. Yaꞈ hkʼaˇ, awˬ viˉ awˬ nyi tawˇ yaw ve leh ngaˬ hui nyi ma maˇ sha tuˬ te laˇ ve kʼo˗ehꞈ? Ngaˬ hui hkʼaˬ hkʼe te cawˇ ve le?

13. Aˬ htoꞈ ma te ngaˬ hui awˬ viˉ awˬ nyi htaꞈ venˇ baˆ hpehˇ piˇ cawˇ ve le?

¹³ Teˇ pawˆ pawˆ nawˬ awˬ viˉ awˬ nyi htaꞈ venˇ baˆ hpehˇ piˇ tuˬ haˍ jaˇ tehꞈ dawˇ˗aw laˇ? (Oˉ kʼoˍ pui ve 19:18) Chi hkʼe hpehꞈ ve kʼo, “teˇ gʼaˇ leh teˇ gʼaˇ yeunˇ hkanˍ daꞈ˗oꞈ. Teˇ gʼaˇ leh teˇ gʼaˇ venˇ baˆ taˍ daꞈ kuiˬ cawˬ kʼo, venˇ baˆ hpehˇ daꞈ˗oꞈ. Jawˇmawˇ Gʼuiˬ sha nawˬ hui ve venˇ baˆ htaꞈ hpehˇ hkʼa peuˬ ve hkʼe, nawˬ hui htawˇ venˇ baˆ hpehˇ daꞈ˗oꞈ.” Beˆ maˍ laˇ hkawˇ chi htaꞈ gʼaꞈ te sheˍ. (Kawˇlawˇsehˇ 3:13) Awˬ viˉ awˬ nyi htaꞈ venˇ baˆ hpehˇ piˇ ve teˇ pawˆ le le, htaiˍ hkʼawꞈ laˇ ve htaꞈ ngaˬ hui awˬ hpfuhˇ shiˍ ve tehꞈ, Awˬ pa Yaˬhoˉvaˬ htaꞈ hpeuꞈ maw piˇ chehˇ ve yoˬ.

14. Htaiˍ hkʼawꞈ ve awˬ hpfuhˇ htaꞈ ngaˬ hui shiˍ tuˬ ga laˇ gʼa ve teˇ hkʼaˇ lehˬ aˬ htoꞈ ma le?

¹⁴ Htaiˍ hkʼawꞈ laˇ ve awˬ pon Yaˬhoˉvaˬ htaꞈ awˬ bon uiˍ jaˇ. I˗diˉyaˆ mvuhˇ miˬ lo chehˇ ve Con˗en˗na 83 hkʼawꞈ ve kʼoˆ ve, “teˇ nyi le le ngaˬ bon lawˬ htaˇ htaiˍ hkʼawꞈ laˇ ve htaꞈ kʼoˆ ve a yeˇ uiˍ jaˇ tehꞈ, ngaˬ dawˇ leh Yaˬhoˉvaˬ htaiˍ hkʼawꞈ ve cawˬ tcuh laˇ ve awˬ bon uiˍ jaˇ.” Nawˬ bon lawˬ htaˇ, oˇ ve teˇ nyi nawˬ aˬ htoꞈ ma te yaꞈ ve, Yaˬhoˉvaˬ htaꞈ kʼoˆ maˍ piˇ leh nawˬ htaꞈ venˇ baˆ hpehˇ laˇ tuˬ lawˬ sheˍ. Yaꞈ hkʼaˇ, nawˬ venˇ baˆ uiˍ jaˇ ve htaꞈ te yaꞈ ve kʼo, Hkriꞈ yaˇ awˬ moˍ hkʼaw nyi haꞈ shaˉ paˍ nawˬ htaꞈ ga laˇ tuˬ lawˬ cawˇ ve yoˬ. Yawˇ hui nawˬ kʼoˆ maˍ piˇ ve hkawˇ hkʼa dehꞈ na leh haꞈ pehnˇ ve hkʼaw Liꞈ hpu hkʼaw ve beˆ maˍ laˇ tuˬ yoˬ. Yawˇ hui nawˬ geh teˇ geh bon lawˬ tuˬ yoˬ. Nawˬ Yaˬhoˉvaˬ geh teˇ pawˆ kʼawꞈ meuˆ daꞈ tuˬ, Yaˬhoˉvaˬ htaiˍ hkʼawꞈ ve awˬ hpfuhˇ htaꞈ cuˇ leh nawˬ htaꞈ venˇ baˆ hpehˇ laˇ tuˬ lawˬ sheˍ.—Yaˍkoˆ 5:14-16.

15. Aˬ htoꞈ ma te htaiˍ hkʼawꞈ ve awˬ lawn htaꞈ ngaˬ hui gʼaw leh dawˇ nyi cawˇ ve le?

 ¹⁵ Htaiˍ hkʼawꞈ ve awˬ lawn htaꞈ dawˇ nyi ve. La˗ca˗ma˗nyi 73 hkʼawꞈ ve kʼoˆ ve, “Yeˍsuˆ naˬ ve leh tuꞈ jaˇ hkanˍ jaˇ ve awˬ lawn htaꞈ ngaˬ gʼaw nyi htaˇ, hawˬ ve yoˬ.” Nawˬ kaꞈ awˬ viˉ awˬ nyi yaˇ miˇ chi teˇ gʼaˇ hkʼe dawˇ tuˬ yoˬ. Yeˍsuˆ yawˇ awˬ to hkʼaˬ hkʼe taw gʼa yuˬ tanˇ jaˇ ve htaꞈ nawˬ dawˇ nyi htaˇ, nawˬ Yeˍsuˆ leh yawˇ ve Awˬ pa htaꞈ haꞈ jaˇ tuˬ yoˬ. Htaiˍ hkʼawꞈ ve awˬ lawn htaꞈ nawˬ hkʼa dehꞈ dawˇ nyi leh ga laˇ gʼa tuˬ awˬ lawn chi ve htaꞈ hkʼa dehꞈ hpfuhˆ nyi sheˍ.

16. Shu htaꞈ htaiˍ hkʼawꞈ ve awˬ lawn maˍ piˇ ve ngaˬ hui awˬ pon awˬ bon hkʼaˬ hkʼe cawˬ ve le? (Awˬ htaꞈ hpawˇ ve awˬ han htaꞈ nyi sheˍ.)

¹⁶ Shu htaꞈ htaiˍ hkʼawꞈ ve awˬ lawn maˍ piˇ ve. Shu htaꞈ htaiˍ hkʼawꞈ ve awˬ lawn maˍ piˇ ve teˇ pawˆ le le, ngaˬ hui kaꞈ htaiˍ hkʼawꞈ ve awˬ hpfuhˇ htaꞈ gʼaˇ hteꞈ kʼawꞈ shiˍ la ve yoˬ. Ngaˬ hui liꞈ kʼoˆ leh VDO daꞈ jaˇ ve laiˉ ceuˬ cawˬ leh, aˬ htoꞈ ma te Yeˍsuˆ gʼa suh˗e ve shu na gʼa tuˬ maˍ piˇ gʼa ve yoˬ. Tawˇ pa haˉ te kʼo, Gʼuiˬ sha geh laˬ ve daꞈ ve awˬ lawn sha tanˇ awˬ lawn 4 hkʼaw “Yeˍsuˆ lehˬ a shu le?” maˇ heˆ leh Liꞈ hpu ngaˬ hui htaꞈ aˬ htoꞈ ma maˍ laˇ gʼa ve le? awˬ lawn 5 hkʼaw “Htaiˍ hkʼawꞈ ve—Gʼuiˬ sha peꞈ laˇ ve daꞈ jaˇ ve laꞈ shawnˍ” ngaˬ hui liꞈ kʼoˆ chi yehˇ gʼa ve yoˬ. Chi hkʼoˆ kaꞈ, Yeˍsuˆ suh ve dawˇ nawˇ tuˬ hpawnˬ daꞈ ve teˇ hkʼawꞈ le le, ngaˬ hui hpawnˬ daꞈ˗e htaˇ htaiˍ hkʼawꞈ ve awˬ hpfuhˇ htaꞈ kʼawꞈ shiˍ maˇ la leh awˬ nu ve chaw kaꞈ hpawnˬ daꞈ ve chi hkʼaw laˬ tuˬ jehˬ piˇ sheˍ. Yaˬhoˉvaˬ ve Yaˇ paˍ htaꞈ caˉ daꞈ ve ngaˬ hui shu htaꞈ gʼa maˍ piˇ ve lehˬ daꞈ jaˇ ve teˇ ceuˬ hpehꞈ ve yoˬ.

17. Aˬ htoꞈ ma te Yaˬhoˉvaˬ htaiˍ hkʼawꞈ ve chaw yaˇ htaꞈ peꞈ laˇ ve daꞈ jaˇ ve laꞈ shawnˍ hpehꞈ ve le?

¹⁷ Htaiˍ hkʼawꞈ ve htaꞈ ngaˬ hui awˬ hpfuhˇ shiˍ tuˬ awˬ hkʼaˇ laiˉ hkʼaˇ cawˬ ve yoˬ. Htaiˍ hkʼawꞈ ve htaꞈ pa taw, ngaˬ hui maˇ biˇ ve chaw yaˇ hpehꞈ ve htawˇ, Yaˬhoˉvaˬ geh meuˆ daꞈ gʼa ve yoˬ. Htaiˍ hkʼawꞈ ve htaꞈ pa taw, Saˍtanˍ ve kanˉ hkʼaˇ htaꞈ hkʼa peu˗eˬ te luˬ tuˬ yoˬ. (1 Yoˇhanˬ 3:8) Htaiˍ hkʼawꞈ ve htaꞈ pa taw, Yaˬhoˉvaˬ ve a loˍ miˬ guiˬ htaꞈ caˉ daꞈ ve awˬ tehˬ hpehꞈ la tuˬ yoˬ. Miˬ guiˬ hkʼoˆ Paˍraˍdiˇsuˆ hpehꞈ la tuˬ yoˬ. Oˇ kaˬ lo nawˬ mawˬ ve chaw teˇ gʼaˇ le le, Yaˬhoˉvaˬ htaꞈ haꞈ leh yawˇ htaꞈ oˉ kʼoˍ pui tuˬ yoˬ. Yaˬhoˉvaˬ htaiˍ hkʼawꞈ ve ngaˬ hui htaꞈ peꞈ laˇ ve daꞈ jaˇ ve laꞈ shawnˍ htaꞈ awˬ hpfuhˇ shiˍ ve tehꞈ hpeuꞈ maw piˇ tuˬ, ngaˬ hui teˇ nyi le le awˬ yanˇ ca sheˍ.