Neuˇyawˆ venˇ Sa˗teh˗liˆ conˇ lo Viˆhtiˆyuˆ tawˆ kuiˬ awˬ ti chi ve htaꞈ WBBR te tuˬ, Beˍteˍlaˆ hkʼaw chehˇ ve awˬ viˉ awˬ nyi teˇ hkʼawꞈ hpaˆ gʼa te ve yoˬ. Awˉ lawˉ htaˇ yehˬ te tuˬ suhˆ cehˬ tawˆ baˬ leh miˬ guiˬ kaꞈ gʼa duˇ tawˍ ve yoˬ. Peuˬ hkʼawꞈ nawˉ yehˬ te la ve chaw haˉ kuiˬ uiˍ jaˇ ve yehˬ teˇ yehˬ te leh, laꞈ caˉ gʼawˆ keu kuiˬ yehˬ kaꞈ teˇ yehˬ te ve yoˬ. Yehˬ chi te peuˬ˗oˬ htaˇ “awˬ hkawˇ tawˆ tuˬ” awˬ hkʼeun awˬ hkʼaˇ yehˇ loˍ ve teˇ hpaˍ awˬ viˉ awˬ nyi ca ve yoˬ. Yaꞈ hkʼaˇ, chi hkʼe ve ca htaˇ yawˇ hui shoꞈ shaꞈ ve laiˉ ceuˬ gʼa hpuˇ ve yoˬ.

Viˆhtiˆyuˆ awˬ hkawˇ tawˆ tuˬ yehˬ hkuiˉ daw ti ve awˬ viˉ awˬ nyi shoꞈ shaꞈ ve gʼa hpuˇ ve yoˬ. Yehˬ hkuiˉ daw chi ve zuhˬ hpawˇ 91 meˆ cawˬ leh mvuhˇ hpawˇ 61 meˆ cawˬ leh 2 maˬ maˬ gʼa hpeh tsuhꞈ daꞈ taˍ ve yoˬ. Awˉ lawˉ teˇ pawˆ coˇ caˇ leh te ve kaꞈ te maˇ gʼa ve htawˇ, yawˇ hui Yaˬhoˉvaˬ htaꞈ gʼaˇ va ve pa taw, awˬ leh meuˇ htaˇ te gʼa ve yoˬ. Kanˉ chi ve htaꞈ te ve Keh˗vinˆ Baw˗suhˇ kʼoˆ ve, “ngaˬ hui awˉ lawˉ teˇ pawˆ htaˇ kaꞈ te gʼa ve kʼo, ngaˬ hui nyi hkʼaˇ suh jaˇ leh kʼoˆ daꞈ ve, ‘ngaˬ hui kanˉ te taˍ ve htaꞈ nyi sheˍ.’” Awˬ viˉ awˬ nyi teˇ gʼaˇ le le Yaˬhoˉvaˬ htaꞈ chiˇ mvuh ve yoˬ. Yaꞈ hkʼaˇ, shoꞈ shaꞈ ve gʼa hpuˇ sheˍ ve yoˬ.

Oˇ ve teˇ yanˇ Viˆhtiˆyuˆ awˬ hkawˇ tawˆ ve maˇ cawˬ maˇ sheˍ. Leh yehˇ tuˬ awˬ hkʼeun kaꞈ ca haˍ jaˇ. Yaꞈ hkʼaˇ, awˬ viˉ awˬ nyi awˬ hkawˇ tawˆ tuˬ awˬ cehˬ shu yehˇ jaw˗oˬ ve hawˇ taˍ ve htaꞈ ca gʼa ve yoˬ. Leh yawˇ hui awˬ cehˬ oˇ ve vuiˬ veu laˇ ve yoˬ. Chi hkʼoˆ kaꞈ, tawˇ yaw keu tuˬ awˬ hkʼeun awˬ suhˉ vuiˬ ve aꞈ kehˉ, yawˇ hui aˉ hkʼaw lo tawˇ yaw keu tuˬ ve awˬ hkʼeun awˬ hkawˇ tawˆ tuˬ kʼawꞈ te ve yoˬ. Awˬ leh meuˇ htaˇ ha pa 2 maˬ teˇ haˉ htaˇ, awˬ viˉ awˬ nyi dawˇ cheˆ leh awˬ hkʼeun chi ve teˇ hpaˍ hkʼa peu˗eˬ yehˇ nyi ve yoˬ. Yawˇ hui teˇ ceuˬ ceuˬ lawˇ nyi gaˇ ve pa taw, dawˇ cheˆ leh kʼa muiˬ hkawˇ kʼa keu nyi ve yoˬ. U˗nehˆ Law awˬ lawn oˇ ve htaꞈ hkʼa dehꞈ tawnˇ gʼa ve yoˬ. Yawˇ kʼoˆ ve, awˬ viˉ awˬ nyi kʼa muiˬ hkawˇ kʼa chehˇ htaˇ, Buˆlinˍ lo chehˇ ve awˬ viˉ awˬ nyi Raˆhteuˬfawˍ b Viˆhtiˆyuˆ chi htaꞈ na chehˇ ve, tawˇ yaw tuˬ  awˬ hkʼeun hkʼaw yawˇ hui geh te laˬ ve yoˬ. Yawˇ yawˇ hui htaꞈ 25 kiˇ loˇ hkʼe taw ceh vuiˇ daꞈ ve yoˬ.

Awˬ viˉ awˬ nyi Raˆhteuˬfawˍ kʼoˆ ve, “nawˬ hui kʼa ve awˬ hkawˇ hawˬ ve htaꞈ shuˍ ve yoˬ. Taˇ kʼa loˬ!” Hkʼe te leh, awˬ viˉ awˬ nyi yaꞈ taw ve pa taw, yawˇ hui hpaw chehˇ ve awˬ hkawˇ haˆ hoˆ ve yoˬ. Yaꞈ hkʼaˇ, yawˇ hui te ve teˇ ceuˬ le le daꞈ ve tehꞈ yonˍ gʼa ve yoˬ. Chi teˇ hkui Viˆhtiˆyuˆ hkʼaw awˉ lawˉ teˇ pawˆ tawˆ tuˬ gu hehnˇ taˍ gʼa˗oˬ.

Ha pa 2 maˬ 24 nyi 1924 hkʼawꞈ htaˇ, Viˆhtiˆyuˆ hkʼaw awˉ lawˉ teˇ pawˆ tawˆ ve yoˬ. Viˆhtiˆyuˆ tawˆ kuiˬ chi ve awˬ viˉ awˬ nyi Raˆhteuˬfawˍ “Meˍsiˉyaꞈ ve mvuhˇ miˬ awˬ pon awˬ bon cawˬ tuˬ” chiˇ aꞈ piˇ ve yoˬ. Yawˇ kʼoˆ ve, Viˆhtiˆyuˆ awˬ hkawˇ tawˆ kuiˬ awˬ ti chi ve awˬ pon lehˬ, “aˬ htoꞈ ma ve chaw ceuˬ htawˇ maˇ kʼoˆ Liꞈ hpu hkʼaw awˬ tehˬ ve htaꞈ na gʼa tuˬ ga piˇ leh ngaˬ hui awˬ yanˇ hkʼaˬ ve teˇ yanˇ chehˇ ve kaꞈ na gʼa tuˬ ga laˇ ve yoˬ.”

Awˬ viˉ awˬ nyi Viˆhtiˆyuˆ hkʼaw awˬ hkawˇ tawˆ ve awˉ lawˉ teˇ pawˆ hkʼa dehꞈ te gʼa ve yoˬ. Gʼuiˬ sha ve kanˉ hkʼaˇ Viˆhtiˆyuˆ hkʼaw tawˆ tuˬ awˬ pon oˇ htaˇ tanˬ leh, Viˆhtiˆyuˆ tawˆ kuiˬ WBBR chi ve yehˇ ve 33 hkʼawꞈ gaˬ˗oˬ ve yoˬ.

Ha pa 7 maˬ 1924 hkʼawꞈ htaˇ, O˗hai˗oˇ lo Hkon˗la˗bi venˇ hkʼaw Liꞈ hpu henˇ yaˇ awˬ moˍ hpawnˬ daꞈ lonˉ te tuˬ gu ve yoˬ. Choˬ kaˬ lo hpawnˬ daꞈ la ve laiˉ kaˬ lo ve awˬ tan te shehˍ hpaˇ laˬ ve yoˬ. Aˬreˇ, Eˍgaˍlanˍ, Hpaˉlanˍ, Jaˬmaˬniˬ, Heˍlaˍsaˆ, Haˍgeˬriˬ, Iˉtaˬliˬ, Liꞈtuˬreˇne˗aˇ, Poˬlan, Ruˇsaˆ, Saˬkenˬdiˬneˬviˇ˗aˇ, leh Yuˬkaˬrenˇ chaw ceuˬ chi teˇ hpaˍ ve tawˇ hkawˇ bon maˍ ve htaꞈ yawˇ hui gʼa kaˇ ve yoˬ. Bon maˍ hkawˇ teˇ hpaˍ hpaˍ Viˆhtiˆyuˆ awˬ hkawˇ tawˆ kuiˬ lo kaꞈ tawˆ tcuh ve yoˬ. Liꞈ sha tanˇ O˗hai˗oˇ Sha˗teh Con liꞈ hkʼaw ngaˬ hui ve hpawnˬ daꞈ ve htaꞈ caˉ daꞈ ve awˬ lawn keu laˇ tuˬ awˬ viˉ awˬ nyi caˉ daꞈ ve yoˬ.

Ha pa 7 maˬ 24 nyi shinˉ peuˬ 4 nyi htaˇ, awˬ viˉ awˬ nyi 5,000 gʼaˇ hpaˆ hto toˇ˗e ve yoˬ. Yawˇ hui liꞈ kʼoˆ aˬ laˬ hkʼe 30,000 kʼoˆ awˬ nu ve chaw htaꞈ piˇ leh 1,000 gʼaˇ hpaˆ htaꞈ Liꞈ hpu tanˬ maˍ piˇ ve yoˬ. Shaw nyi kuiˬ Taꞈ yehˬ hkʼaw oˇ ve teˇ nyi htaꞈ “hpawnˬ daꞈ lonˉ ve awˬ yanˇ htaˇ ha lehˬ jaˇ ve” tehꞈ kʼoˆ ve yoˬ.

Hpawnˬ daꞈ lonˉ chi teˇ pawˆ a yeˇ uiˍ ve awˬ lawn cawˬ ve lehˬ, Ha pa 7 maˬ 25 nyi shinˉ peuˬ 4 nyi htaˇ hpehꞈ ve yoˬ. Awˬ viˉ awˬ nyi Raˆhteuˬfawˍ ve bon maˍ hkawˇ teˇ maˬ hkʼaw mvuhˇ miˬ hpawˇ awˬ lawn te daꞈ taˍ ve liꞈ teˇ kʼoˆ htaꞈ yawˇ gʼaw ve yoˬ. Liꞈ chi ve hkʼaw bon awˬ hoˉ teˇ hpaˍ htaꞈ maˇ dawˇ cawˇ ve awˬ lawn kʼoˆ taˍ ve yoˬ. Tawˇ pa haˉ te kʼo, choˬ kaˬ lo kʼoˆ ve bon awˬ hoˉ teˇ hpaˍ, mvuhˇ miˬ kanˉ te paˍ teˇ hpaˍ, leh mvuhˇ miˬ hpawˇ tanˇ kaˬ paˍ teˇ hpaˍ, yawˇ hui te yaꞈ ve awˬ ceuˬ “Gʼuiˬ sha chaw yaˇ htaꞈ awˬ bon naꞈ piˇ tuˬ yawˇ ve mvuhˇ miˬ htaꞈ caˉ daꞈ ve chaw yaˇ maˇ gʼa henˇ, maˇ gʼa shiˍ tuˬ yawˇ hui faˉ taˍ ve yoˬ.” Chi hkʼoˆ kaꞈ, liꞈ chi ve hkʼaw kʼoˆ maˍ laˇ sheˍ ve, bon awˬ hoˉ chi ve teˇ hpaˍ te yaꞈ ve lehˬ “mvuhˇ miˬ teˇ hpaˍ caˉ daꞈ tuˬ ve awˬ moˍ htaꞈ awˬ gʼaˇ piˇ leh, awˬ moˍ chi ve lehˬ miˬ guiˬ chi ve htaꞈ uˉ peunˍ tuˬ ‘Gʼuiˬ sha ve mvuhˇ miˬ’ tehꞈ kʼoˆ sheˍ ve yoˬ.” Liꞈ hpu henˇ yaˇ awˬ moˍ awˬ lawn chi ve yawˇ hui chaw yaˇ htaꞈ hto maˍ piˇ tuˬ gʼa haꞈ hanˉ jaˇ ve yoˬ.

 Shaw nyi kuiˬ Taꞈ yehˬ hkʼaw hpawnˬ daꞈ lonˉ chi teˇ pawˆ htaꞈ kʼoˆ ve, “jawˇ mawˇ ve maꞈ moˍ˗ehˉ Hkon˗la˗bi venˇ lo hpawnˬ daꞈ la ve chaw yonˍ hkʼaˇ yonˍ yeˬ ve hkʼaw kʼawꞈ˗e ve yoˬ. Canˇ paˍ yawˇ hui htaꞈ ca yaꞈ la tuˬ tawˍ laˇ ve, maˇ heˆ leh laꞈ caˉ hkʼaˬ hkʼe ve htaꞈ htawˇ yawˇ hui maˇ kawˆ ve yoˬ.” Oˇ ve teˇ pawˆ hpawnˬ daꞈ lonˉ hkʼaw laˬ ve Le˗o Hkanˇ kʼoˆ ve, “ngaˬ hui hto toˇ kuiˬ awˬ ti lo ve chaw htaꞈ awˬ lawn chi ve haꞈ hanˉ ve hkʼaw hto maˍ piˇ tuˬ awˬ gʼaˇ cawˬ ve yoˬ.”

Ha pa 10 maˬ htaˇ, liꞈ kʼoˆ ehˉ chi ve awˬ meh Bon awˬ hoˉ teˇ hpaˍ htaꞈ suhˉ jehˬ piˇ tuˬ Liꞈ hpu henˇ yaˇ awˬ moˍ awˬ nu ve chaw htaꞈ laiˉ lanˬ kʼoˆ piˇ ve yoˬ. (Kaˇlaˇ hkawˇ) Liꞈ kʼoˆ ehˉ chi ve hkʼaw awˬ viˉ awˬ nyi Raˆhteuˬfawˍ bon maˍ htaˇ gʼaw maˍ piˇ ve yoˬ. Oˆkaˬlaˬhoˉmaˇ lo Cliˬlenˇ venˇ hkʼaw liꞈ kʼoˆ ehˉ chi ve awˬ viˉ awˬ nyi Fehˇ Caw˗shan kaꞈ awˬ nu ve chaw htaꞈ piˇ ve teˇ gʼaˇ hpehꞈ ve yoˬ. Hto toˇ kuiˬ awˬ ti yawˇ awˬ vuiˬ gʼa taˍ ve htaꞈ hto toˇ peuˬ hkʼawꞈ nawˉ, awˬ viˉ awˬ nyi yawˇ htaꞈ ca gʼawˬ laˇ tuˬ awˬ yanˇ 20 miꞈ niꞈ leuˉ taˍ sheˍ ve yoˬ. Yaꞈ hkʼaˇ, awˬ viˉ awˬ nyi yawˇ htaꞈ maˇ gʼawˬ la sheˍ htaˇ, yawˇ taꞈ iˉ huˉ taˍ maˇ gʼa. Awˬ lawn kʼo, venˇ oˇ ve hkʼaw ve laiˉ gʼaˇ awˬ viˉ awˬ nyi Fehˇ liꞈ kʼoˆ ehˉ piˇ ve htaꞈ nyi ma zuhˆ jaˇ leh, yawˇ htaꞈ yaꞈ tuˬ ca hpfuhˆ chehˇ ve yoˬ. Hkʼe te leh, awˬ viˉ awˬ nyi Fehˇ maˇ vuiˇ maˇ neˇ kuiˬ bon yehˬ teˇ yehˬ hkʼaw ca hpaw vaꞈ taˍ ve yoˬ. Bon yehˬ hkʼaw loꞈ˗e htaˇ, yawˇ chaw teˇ gʼaˇ htaꞈ kaꞈ maˇ mawˬ. Hkʼe te leh, Bon awˬ hoˉ teˇ hpaˍ htaꞈ suhˉ jehˬ piˇ tuˬ ve liꞈ kʼoˆ ehˉ Caˬbuˉ awˬ hoˉ ve Liꞈ hpu hkʼaw keu taˉ piˇ ve yoˬ. Piˉ htawˆ teˇ maˬ le le hkʼoˆ kaꞈ teh taˉ piˇ leh, yawˇ haˆ tawˆ la ve yoˬ. Awˬ yanˇ cawˬ sheˍ ve pa taw, yawˇ bon yehˬ 2 yehˬ hkʼaw kaꞈ chi hkʼa shuˍ te ve yoˬ.

Awˬ viˉ awˬ nyi Fehˇ awˬ viˉ awˬ nyi htaꞈ tinˍ daꞈ kuiˬ lo haˆ kʼai ve yoˬ. Leh yawˇ naˍ manˇ keu kuiˬ teˇ kaˬ lo hpaw vaꞈ taˍ ve yoˬ. A shu teˇ gʼaˇ yawˇ hkʼaˇ suh gʼaꞈ yuˬ laˬ ve htaꞈ nyi chehˇ ve yoˬ. Chaw teˇ moˍ kaˇ gʼaꞈ kʼai ve htawˇ, awˬ viˉ awˬ nyi Fehˇ htaꞈ maˇ mawˬ. Awˬ viˉ awˬ nyi Fehˇ ve awˬ chawˇ maˇ vuiˇ maˇ neˇ kuiˬ lo hto toˇ chehˇ ve kaꞈ tinˍ daꞈ kuiˬ lo haˆ laˬ leh yawˇ htaꞈ haˆ shiˍ kʼai ve yoˬ.

Awˬ viˉ awˬ nyi hawˉ hkʼaˆ teˇ gʼaˇ awˬ lawn oˇ teˇ yanˇ ve htaꞈ kʼoˆ ve, “ngaˬ hui venˇ hkʼaw lo kaˇ gʼaꞈ tawˆ la chehˇ htaˇ bon yehˬ 3 yehˬ htaꞈ hpanˍ kʼai ve yoˬ. Bon yehˬ teˇ yehˬ leh teˇ yehˬ gʼuˇ suhˍ lo aˬ laˬ hkʼe chaw 50 gʼaˇ huˉ taˍ ve yoˬ. Chaw teˇ hpaˍ ngaˬ hui piˇ ve liꞈ kʼoˆ ehˉ htaꞈ gʼaw chehˇ ve yoˬ. Leh chaw teˇ hpaˍ kʼo, liꞈ kʼoˆ ehˉ oˇ ve Caˬbuˉ awˬ hoˉ htaꞈ piˇ chehˇ ve yoˬ. Ngaˬ hui aˬ laˬ hkʼe maˇ ponˬ˗a te ve yoˬ. Yaꞈ hkʼaˇ, Yaˬhoˉvaˬ ngaˬ hui htaꞈ haꞈ shaˉ laˇ ve htaꞈ awˬ bon uiˍ jaˇ leh canˇ paˍ chi ve teˇ hpaˍ maˇ gʼaꞈ yuˬ gʼa tuˬ ga laˇ leh cuˇ yiˍ peꞈ laˇ ve kaꞈ awˬ bon uiˍ jaˇ ve yoˬ.”

Awˬ nu ve mvuhˇ miˬ lo chehˇ ve Liꞈ hpu henˇ yaˇ awˬ moˍ haꞈ hanˉ ve hkʼaw hkʼa shuˍ hto toˇ ve yoˬ. Tawˇ pa haˉ te kʼo, Hpaˉlanˍ mvuhˇ miˬ awˬ na hpawˇ lo chehˇ ve Co˗sehˆ Hkawn lehˬ, Poˬlan mvuhˇ miˬ lo hpaw la taˍ ve haˉ pui naˆ te kuiˬ lo ve chaw teˇ moˍ htaꞈ, yawˇ bon gʼa maˍ piˇ ve yoˬ. “Maˇ maw ve awˬ yanˇ suh˗oˬ ve chaw kʼawꞈ teꞈ tu la tuˬ yoˬ” tehꞈ kʼoˆ ve awˬ lawn yawˇ bon maˍ piˇ tuˬ awˬ hkʼaˇ gu teh ve yoˬ. Bon maˍ hkawˇ chi ve ca na la tuˬ, ngaˬ hui ve awˬ viˉ awˬ nyi awˬ nu ve chaw htaꞈ jehˬ piˇ htaˇ, Caˬbuˉ awˬ hoˉ teˇ gʼaˇ bon maˍ hkawˇ chi taˇ na˗e tehꞈ, oˇ kaˬ lo ve chaw htaꞈ kʼoˆ piˇ ve yoˬ. Yaꞈ hkʼaˇ, tawˍ piˇ ve htawˇ bon maˍ hkawˇ chi ve ca na la ve chaw 5,000 gʼaˇ hpaˇ cawˬ ve yoˬ. Leh Caˬbuˉ awˬ hoˉ chi teˇ gʼaˇ kaꞈ ca na la ve yoˬ. Leh awˬ viˉ awˬ nyi Co˗sehˆ kaꞈ Caˬbuˉ awˬ hoˉ chi ve teˇ gʼaˇ yawˇ ve yonˍ hkʼaˇ htaꞈ kʼoˆ laˇ tcuh ve yoˬ. Yaꞈ hkʼaˇ, yawˇ maˇ kʼoˆ. Bon maˍ peuˬ hkʼawꞈ nawˉ, awˬ viˉ awˬ nyi Co˗sehˆ liꞈ kʼoˆ ehˉ leuˉ taˍ ve laˬ ve chaw teˇ gʼaˇ le le htaꞈ piˇ ve yoˬ. Awˬ lawn kʼo, chaw chi teˇ hpaˍ lehˬ Liꞈ hpu hkʼaw awˬ tehˬ ve htaꞈ shiˍ gaˇ jaˇ ve tehꞈ yawˇ gʼa mawˬ ve yoˬ.—Aˍmoˆ 8:11.

Aˍfaˍriˆkaˆ miˬ guiˬ lo chehˇ ve awˬ viˉ awˬ nyi Hkeh Banˬ lehˬ, Kon˗Hkonˆ mvuhˇ miˬ lo hto toˇ ve yoˬ. Chi teˇ hkui chi Gaˬnaˬ mvuhˇ miˬ tehꞈ kʼoˆ ve yoˬ. Yawˇ ve bon maˍ hkawˇ leh yawˇ liꞈ kʼoˆ ehˉ awˬ nu ve chaw htaꞈ piˇ ve pa taw, mvuhˇ miˬ chi ve hkʼaw awˬ tehˬ ve haˆ haˆ zuhˇ kʼai ve yoˬ. Oˇ ve teˇ yanˇ hawˉ hkʼaˆ teˇ gʼaˇ Yoˇhanˬ Behn˗san meh ve yawˇ saˍ laꞈ gʼonˍ te tuˬ liꞈ henˇ chehˇ ve yoˬ. Yawˇ kaꞈ teˇ gʼaˇ awˬ viˉ awˬ nyi Hkeh ve bon maˍ hkawˇ gʼa na ve yoˬ. Yawˇ na peuˬ hkʼawꞈ nawˉ chi ve lehˬ, awˬ tehˬ ve hpehꞈ ve tehꞈ yawˇ laꞈ haˉ shiˍ la ve yoˬ. Yoˇhanˬ kʼoˆ ve, “awˬ tehˬ ve ngaˬ ha lehˬ jaˇ tuˬ te laˇ ve yoˬ. Saˍ laꞈ gʼonˍ  te tuˬ liꞈ teˇ geh henˇ chehˇ ve laiˉ gʼaˇ htaꞈ awˬ lawn chi ngaˬ kʼoˆ maˍ piˇ ve yoˬ.”

3 gʼaˇ teˇ to tiˉ hpehꞈ ve Gʼuiˬ sha Liꞈ hpu hkʼaw maˇ hawˍ daꞈ ve htaꞈ Yoˇhanˬ shiˍ la ve yoˬ. Awˬ lawn chi ve Caˬbuˉ awˬ hoˉ htaꞈ na nyi tuˬ teˇ nyi htaˇ, yawˇ Heh˗hkʼa˗ri˗hkʼa ve bon yehˬ lo kʼai ve yoˬ. Caˬbuˉ awˬ hoˉ yawˇ htaꞈ haˆ gʼaꞈ tawˆ leh kʼoˆ piˇ ve, “nawˬ Hkriꞈ yaˇ maˇ heˆ. Nawˬ neˇ haiˬ hpehꞈ ve, chi teˇ hkui choˬ kaˬ lo haˆ tawˆ˗e!”

Yoˇhanˬ aˉ hkʼaw lo gaˬ la htaˇ, chaw guiˇ kuiˬ lo mawˬ daꞈ leh 3 gʼaˇ teˇ to tiˉ ve Gʼuiˬ sha htaꞈ caˉ daꞈ ve yaw daꞈ tuˬ, Caˬbuˉ awˬ hoˉ htaꞈ liꞈ bvuhꞈ piˇ ve yoˬ. Yaꞈ hkʼaˇ, Caˬbuˉ awˬ hoˉ chi ve teˇ gʼaˇ lehˬ, yawˇ saˍ laꞈ gʼonˍ te tuˬ liꞈ henˇ kuiˬ lo saˍ laꞈ liꞈ maˍ paˍ awˬ hoˉ ve bawehˇ hkʼaw, Yoˇhanˬ htaꞈ mawˬ daꞈ tuˬ liꞈ bvuhꞈ piˇ ve yoˬ. Liꞈ maˍ paˍ saˍ laꞈ chi ve teˇ gʼaˇ Yoˇhanˬ htaꞈ na piˇ ve, liꞈ chi ve Caˬbuˉ awˬ hoˉ oˇ ve teˇ gʼaˇ bvuhꞈ˗aˬ ve awˬ tehˬ hpehꞈ ve laˇ?

Yoˇhanˬ hkʼawꞈ piˇ ve “yoˬ.”

Saˍ laꞈ liꞈ maˍ paˍ Yoˇhanˬ htaꞈ kʼoˆ piˇ ve, Caˬbuˉ awˬ hoˉ htaꞈ lawˬ hkawˉ piˇ tuˬ, chi teˇ hkui liꞈ haˆ bvuhꞈ piˇ. Hkʼe te leh, Yoˇhanˬ bvuhꞈ ve.

“Caˬbuˉ awˬ hoˉ˗oˬ, liꞈ maˍ paˍ saˍ laꞈ ngaˬ nawˬ htaꞈ lawˬ hkawˉ tuˬ liꞈ bvuhꞈ tcuh laˇ ve yoˬ. Leh ngaˬ kaꞈ chi hkʼe te ve yoˬ. Caˬbuˉ awˬ hoˉ nawˬ maˍ ve awˬ lawn awˬ tehˬ maˇ heˆ ve htaꞈ haꞈ yuˬ ve kʼo.”

Liꞈ maˍ paˍ saˍ laꞈ cheˆ˗ehꞈ kʼai leh na piˇ ve, “Yoˇhanˬ˗oˬ, nawˬ awˬ tehˬ tehˬ, chi hkʼe bvuhꞈ piˇ gaˇ ve laˇ?”

“Yoˬ. Chi ve ngaˬ nyi ma hkʼaw tawˆ la ve awˬ ceuˬ bvuhꞈ piˇ gaˇ ve yoˬ.”

“Nawˬ htaꞈ liꞈ henˇ kuiˬ lo gʼa tawˆ laˇ tuˬ yoˬ. Mvuhˇ miˬ hpawˇ ga piˇ chehˇ ve bon yehˬ hkʼaw ve Caˬbuˉ awˬ hoˉ oˇ ve teˇ gʼaˇ htaꞈ hkʼaˬ hkʼe te nawˬ chi hkʼe kʼoˆ piˇ haˆ ve le?”

“Yaꞈ hkʼaˇ, saˍ laꞈ˗oˬ, nawˬ liꞈ maˍ htaˇ ngaˬ hui maˇ na gʼa ve cawˬ ve kʼo, nawˬ htaꞈ gʼa kʼawꞈ na cawˇ ve maˇ heˆ laˇ?”

“Gʼa kʼawꞈ na ve yoˬ.”

“Saˍ laꞈ˗oˬ, awˬ lawn chi ve lehˬ chi hkʼe yoˬ. Caˬbuˉ awˬ hoˉ oˇ ve teˇ gʼaˇ Liꞈ hpu hkʼaw maˍ laˇ ve htaꞈ ngaˬ htawˇ dawˇ nawˬ dawˇ cawˬ leh na piˇ ve yoˬ. Yawˇ maˇ hkʼawꞈ laˇ gʼa ve kʼo, aˬ htoꞈ ma te ngaˬ yawˇ htaꞈ liꞈ bvuhꞈ leh lawˬ hkawˉ piˇ cawˇ ve le?”

Awˬ leh meuˇ htaˇ Yoˇhanˬ htaꞈ liꞈ henˇ kuiˬ lo maˇ gʼaꞈ tawˆ piˇ leh Caˬbuˉ awˬ hoˉ htaꞈ kaꞈ lawˬ hkawˉ piˇ tuˬ maˇ loˍ˗o ve yoˬ.

Shaw nyi kuiˬ Taꞈ yehˬ hkʼaw chi teˇ hkʼawꞈ hpehꞈ la ve awˬ lawn htaꞈ kʼoˆ ve, “ngaˬ hui Daˍviˆ hkʼa shuˍ kʼoˆ gʼa ve, ‘maꞈ bawˆ tuˬ awˬ pon nawˬ ngaˬ htaꞈ awˬ gʼaˇ awˬ shaˉ piˇ laˇ’ ve yoˬ.” (Chiˇ mvuh ve 18:39) Chi ve teˇ hkʼawꞈ ngaˬ hui awˬ gʼaˇ gʼa tuˬ te laˇ jaˇ ve yoˬ. Awˬ lawn kʼo, jawˇ mawˇ ve laꞈ sheh lehˬ yawˇ ve kanˉ ka tiꞈ yeˬ ve hkʼaw te ve chaw htaꞈ ha lehˬ ha kʼa hto toˇ ve htaꞈ yawˇ ga piˇ chehˇ ve tehꞈ gʼa mawˬ ve yoˬ.”

Ponˬ laˬ ve laiˉ hkʼawꞈ htaˇ, awˬ viˉ awˬ nyi Viˆhtiˆyuˆ awˬ hkawˇ tawˆ kuiˬ teˇ kaˬ kʼawꞈ te tuˬ awˬ hkʼaˇ gu te chehˇ ve yoˬ. Chi ve lehˬ awˬ meh Veunꞈ tehꞈ kʼoˆ leh, Chiˬkaˬgoˬ venˇ awˬ paˇ lo te ve yoˬ. Gʼuiˬ sha ve mvuhˇ miˬ daꞈ ve awˬ lawn sha tanˇ leuˉ leh gʼaˇ hteꞈ zuhˇ kʼai tuˬ, Viˆhtiˆyuˆ chi ve awˬ hkʼeun awˬ hkawˇ bvuhˬ tawˆ˗e gʼa tuˬ, aˬ miˍ awˬ gʼaˇ 5,000 hkʼe taw gʼa yehˇ ve yoˬ. Chi ve Kaˬneˬdaˬ mvuhˇ miˬ awˬ na hpawˇ hkʼa gaˬ gaˬ˗e ve yoˬ.

1925 hkʼawꞈ htaˇ, Liꞈ hpu henˇ yaˇ awˬ moˍ awˬ tehˬ ve awˬ gʼeuˆ hkʼa tawˍ lehˆ gʼa mawˬ ve yoˬ. Awˬ lawn kʼo, chi ve lehˬ Hpeuꞈ maˍ ve liꞈ kaˇ nanˉ uiˍ 12 hkʼaw awˬ lawn awˬ tanˇ htaꞈ yawˇ hui hkʼa dehꞈ na gʼa ve yoˬ. Hkʼe te leh, awˬ lawn chi ve htaꞈ chaw teˇ hpaˍ nyi cha leh, Yaˬhoˉvaˬ ve kanˉ maˇ te tuˬ te piˇ ve yoˬ. Yaꞈ hkʼaˇ, chaw laiˉ gʼaˇ mvuhˇ naw ma hkʼoˆ lo hpehꞈ la ve awˬ ceuˬ htaꞈ na gʼa ve ha lehˬ jaˇ leh, miˬ guiˬ hkʼoˆ lo chehˇ ve Gʼuiˬ sha ve chaw htaꞈ hkʼaˬ hkʼe heuˆ la kuiˬ cawˬ ve kaꞈ na gʼa ve ha lehˬ jaˇ ve yoˬ.