AWˬ LAWN 42
KʼA MUIˬ HKAWˇ 103 Yawˬ hawˉ shehˍ hpaˇ lehˬ laꞈ shawnˍ hpehꞈ ve
‘Chaw yaˇ hpehꞈ ve laꞈ shawnˍ’ htaꞈ awˬ hpfuhˇ shiˍ ve
‘Yawˇ lehˬ mvuh kuiˬ lo taˆ˗e ve teˇ yanˇ, chaw yaˇ hpehꞈ ve laꞈ shawnˍ teˇ hpaˍ piˇ ve yoˬ.’—EˇFEˇSUꞈ 4:8.
A YEˇ UIˍ VE AWˬ LAWN
Ga piˇ shehˍ hpaˇ, nyi haꞈ shaˉ paˍ, leh toˇ nyi shehˍ hpaˇ ngaˬ hui htaꞈ hkʼaˬ hkʼe ga laˇ ve le? Yawˇ hui te ve awˬ ceuˬ htaꞈ ngaˬ hui awˬ hpfuhˇ shiˍ ve tehꞈ hkʼaˬ hkʼe hpeuꞈ maw piˇ gʼa tuˬ le?
1. Yeˍsuˆ ngaˬ hui htaꞈ aˬ htoꞈ ma laꞈ shawnˍ peꞈ laˇ ve le?
Yeˍsuˆ hkʼe leˇ shiˍ puiˉ leh ga piˇ puiˉ ve miˬ guiˬ hkʼoˆ lo chaw teˇ gʼaˇ kaꞈ maˇ cawˬ. Yawˇ miˬ guiˬ hkʼoˆ lo chehˇ htaˇ, yawˇ anˇ tuˬ te leh chaw maˇ maˇ htaꞈ ga piˇ ve yoˬ. (Luˉkaꞈ 9:12-17) Yawˇ chaw yaˇ htaꞈ laꞈ shawnˍ uiˍ jaˇ ve peꞈ laˇ ve lehˬ, yawˇ ve a shaꞈ tanˇ laˇ ve yoˬ. (Yoˇhanˬ 15:13) Leh yawˇ kʼawꞈ teꞈ tu la peuˬ hkʼawꞈ nawˉ, yawˇ ngaˬ hui htaꞈ caˉ leh ga laˇ sheˍ ve yoˬ. Ngaˬ hui htaꞈ maˍ laˇ leh awˬ gʼaˇ peꞈ laˇ tuˬ, Yaˬhoˉvaˬ geh daꞈ kehˬ ve awˬ ha hpu gʼa tuˬ yoˬ tehꞈ, Yeˍsuˆ ka tiꞈ te taˍ laˇ ve yoˬ. (Yoˇhanˬ 14:16, 17; 16:13) Chi hkʼoˆ kaꞈ, ngaˬ hui caˉ leh shu awˬ laꞈ gʼawˇ hpehꞈ la tuˬ maˍ piˇ ve, Yeˍsuˆ lehˬ ngaˬ hui htaꞈ Hkriꞈ yaˇ awˬ moˍ hkʼaw maˍ laˇ sheˍ ve yoˬ.—Maꞈhtehˍ 28:18-20.
2. ‘Chaw yaˇ hpehꞈ ve laꞈ shawnˍ’ chi Eˇfeˇsuꞈ liꞈ 4:7, 8 hkʼaw a shu htaꞈ kʼoˆ gaˇ ve le?
2 Yeˍsuˆ ngaˬ hui htaꞈ awˬ nu ve laꞈ shawnˍ peꞈ laˇ ve htaꞈ teˇ geh kʼawꞈ nyi sheˍ. Tcuh yaˇ Pawˇluꞈ kʼoˆ ve, Yeˍsuˆ mvuhˇ naw ma hkʼoˆ taˆ˗e peuˬ hkʼawꞈ nawˉ yawˇ lehˬ ‘chaw yaˇ hpehꞈ ve laꞈ shawnˍ’ ngaˬ hui htaꞈ peꞈ laˇ sheˍ ve yoˬ. (Eˇfeˇsuꞈ 4:7, 8 gʼaw sheˍ.) Pawˇluꞈ kʼoˆ maˍ laˇ ve, Yeˍsuˆ ngaˬ hui htaꞈ laꞈ shawnˍ chi peꞈ laˇ ve lehˬ, Hkriꞈ yaˇ awˬ moˍ hkʼaw laiˉ hkʼaˇ hpawˇ ga piˇ gʼa ve yoˬ. (Eˇfeˇsuꞈ 1:22, 23; 4:11-13) Chi beuꞈ teˇ co˗e ‘chaw yaˇ hpehꞈ ve laꞈ shawnˍ’ chi ve lehˬ, ga piˇ shehˍ hpaˇ, nyi haꞈ shaˉ paˍ, leh toˇ nyi shehˍ hpaˇ a htaꞈ kaꞈ kʼoˆ gaˇ ve yoˬ. Awˬ viˉ awˬ nyi hawˉ hkʼaˆ chi ve teˇ hpaˍ maˇ biˇ ve chaw hpehꞈ ve yoˬ. Hkʼe te leh, yawˇ hui te yaꞈ puiˉ ve yoˬ. (Yaˍkoˆ 3:2) Yaꞈ hkʼaˇ, ngaˬ hui ve Jawˇ mawˇ Yeˍsuˆ lehˬ, ngaˬ hui htaꞈ ga laˇ tuˬ yawˇ hui htaꞈ yehˇ ve yoˬ. Yawˇ hui lehˬ Yeˍsuˆ ngaˬ hui htaꞈ peꞈ laˇ taˍ ve laꞈ shawnˍ hkʼe hpehꞈ ve yoˬ.
3. Awˬ viˉ awˬ nyi hawˉ hkʼaˆ ‘chaw yaˇ hpehꞈ ve laꞈ shawnˍ’ htaꞈ ngaˬ hui hkʼaˬ hkʼe ga piˇ gʼa tuˬ tawˇ pa haˉ kʼoˆ maˍ laˇ sheˍ.
3 Yeˍsuˆ lehˬ awˬ viˉ awˬ nyi hawˉ hkʼaˆ htaꞈ ‘chaw yaˇ hpehꞈ ve laꞈ shawnˍ’ te tuˬ, awˬ vuiˬ piˇ leh Hkriꞈ yaˇ awˬ moˍ hkʼaw yonˍ yeˬ ve cawˬ tuˬ ga piˇ tcuh ve yoˬ. (Eˇfeˇsuꞈ 4:12) Leh ngaˬ hui teˇ gʼaˇ le le kaꞈ awˬ viˉ awˬ nyi hawˉ hkʼaˆ chi ve teˇ hpaˍ ve awˬ vuiˬ htaꞈ ga piˇ gʼa ve yoˬ. Tawˇ pa haˉ te kʼo, hpawnˬ daꞈ kuiˬ yehˬ te htaˇ, awˬ viˉ awˬ nyi teˇ hpaˍ ca ga piˇ˗e gʼa ve yoˬ. Awˬ nu ve awˬ viˉ awˬ nyi teˇ hpaˍ kaꞈ kanˉ chi ve htaꞈ ga piˇ gʼa ve lehˬ, caˇ tuˬ te piˇ ve, awˬ viˉ awˬ nyi htaꞈ gʼawˬ kʼoˬ gʼawˬ hkʼawꞈ te piˇ ve, leh awˬ nu ve awˬ ceuˬ kaꞈ ga piˇ ve yoˬ. Ga piˇ shehˍ hpaˇ, nyi haꞈ shaˉ paˍ, leh toˇ nyi shehˍ hpaˇ htaꞈ ngaˬ hui teˇ gʼaˇ le le ga piˇ gʼa ve lehˬ, tawˇ daꞈ daꞈ yaw piˇ ve, leh ngaˬ hui te tawˆ la ve daꞈ ve awˬ ceuˬ kaꞈ hpehꞈ ve yoˬ. Awˬ viˉ awˬ nyi hawˉ hkʼaˆ chi ve teˇ hpaˍ kanˉ te hkeuꞈ ve htaꞈ ngaˬ hui aˬ htoꞈ ma awˬ bon gʼa ve teˇ geh henˇ leh, ngaˬ hui lehˬ yawˇ hui leh Yeˍsuˆ htaꞈ awˬ hpfuhˇ shiˍ ve tehꞈ hkʼaˬ hkʼe hpeuꞈ maw piˇ gʼa tuˬ chi ve kaꞈ teˇ geh henˇ tuˬ yoˬ.
“GA PIˇ SHEHˍ HPAˇ TEˇ HPAˍ” LAIˉ CEUˬ TE VE
4. Awˉ lawˉ peuˇ ve teˇ co˗e htaˇ “ga piˇ shehˍ hpaˇ teˇ hpaˍ” aˬ htoꞈ ma awˬ vuiˬ cawˬ ve le?
4 Awˉ lawˉ peuˇ ve teˇ co˗e htaˇ, awˬ viˉ awˬ nyi hawˉ hkʼaˆ teˇ hpaˍ hpaˍ htaꞈ ga piˇ shehˍ hpaˇ te tuˬ leuˆ yuˬ ve yoˬ. (1 Tiˆmoˉseˍ 3:8) Nyi˗a kʼo Pawˇluꞈ kʼoˆ taˍ ve hkʼe, yawˇ hui lehˬ “ga piˇ shehˍ hpawˇ teˇ hpaˍ” hpehꞈ ve yoˬ. (1 Kawˇrenˍhtuˆ 12:28) Chi htaꞈ pa taw, awˉ lawˉ peuˇ ve teˇ co˗e htaˇ ve ga piˇ shehˍ hpaˇ lehˬ, nyi haꞈ shaˉ paˍ maˍ ve kanˉ te leh awˬ gʼaˇ piˇ ve hkʼa shuˍ, yawˇ hui kaꞈ laiˉ ceuˬ te ve yoˬ. Tawˇ pa haˉ te kʼo, ga piˇ shehˍ hpaˇ lehˬ Liꞈ hpu bvuhꞈ tuˬ ga piˇ ve, maˇ heˆ leh Liꞈ hpu bvuhꞈ htaˇ yehˇ tuˬ ve awˬ hkʼeun awˬ hkʼaˇ kaꞈ ca vuiˬ piˇ gʼa ve yoˬ.
5. Chi beuꞈ teˇ co˗e ga piˇ shehˍ hpaˇ aˬ htoꞈ ma kanˉ cawˬ ve le?
5 Chi beuꞈ teˇ co˗e ve ga piˇ shehˍ hpaˇ kaꞈ nawˬ chehˇ kuiˬ Hkriꞈ yaˇ awˬ moˍ hkʼaw kanˉ laiˉ ceuˬ te ve yoˬ. (1 Peˍtruˆ 4:10) Tawˇ pa haˉ te kʼo, yawˇ hui Hkriꞈ yaˇ awˬ moˍ hkʼaw hpu caˇ laˇ te ve, maˇ heˆ leh hto toˇ kuiˬ awˬ ti htaꞈ nyi haꞈ shaˉ ve, awˬ viˉ awˬ nyi liꞈ kʼoˆ loˍ ve htaꞈ ca piˇ ve, awˬ hkawˇ tawˆ kuiˬ awˬ hkʼeun htaꞈ nyi haꞈ shaˉ ve, hpawnˬ daꞈ la ve chaw htaꞈ haꞈ yuˬ piˇ ve, leh hpawnˬ daꞈ kuiˬ yehˬ kaꞈ nyi haꞈ shaˉ ve yoˬ. Hkriꞈ yaˇ awˬ moˍ hkʼaw hkʼa sha sha˗ehˬ te kʼai gʼa tuˬ, kanˉ chi ve teˇ hpaˍ a yeˇ uiˍ jaˇ. (1 Kawˇrenˍhtuˆ 14:40) Chi hkʼoˆ kaꞈ, nyi haꞈ shaˉ paˍ teˇ hpaˍ hpaˍ kʼo, ngaˬ hui Hkriꞈ yaˇ a shaꞈ teꞈ hkʼaˇ leh Gʼuiˬ sha kanˉ te ve hpawnˬ daˬ ve te jaw tuˬ hkʼaw kaꞈ sheh kʼai ve yoˬ. Leh Hkriꞈ yaˇ awˬ moˍ hkʼaw kaꞈ bon maˍ ve yoˬ. Ga piˇ shehˍ hpaˇ htaꞈ hto toˇ ve awˬ moˍ ehˉ hkʼaw nyi haꞈ shaˉ tuˬ leuˆ teh ve yoˬ. Teˇ pawˆ pawˆ kʼo, ga piˇ shehˍ hpaˇ te hkʼaˇ dawˇ hkʼaˇ daꞈ ve chaw, nyi haꞈ shaˉ paˍ geh awˬ viˉ awˬ nyi htaꞈ awˬ gʼaˇ ca piˇ˗e gʼa ve yoˬ.
6. Aˬ htoꞈ ma te ngaˬ hui ga piˇ shehˍ hpaˇ kanˉ te hkeuꞈ ve htaꞈ awˬ hpfuhˇ shiˍ cawˇ ve le?
6 Ga piˇ shehˍ hpaˇ ve kanˉ Hkriꞈ yaˇ awˬ moˍ hkʼaw awˬ bon hkʼaˬ hkʼe cawˬ ve le? Boˬliˇviˇ˗aˇ mvuhˇ miˬ lo chehˇ ve awˬ viˉ awˬ nyi yaˇ miˇ Beu˗beh˗liˇ b kʼoˆ ve, “ngaˬ chehˇ ve Hkriꞈ yaˇ awˬ moˍ hkʼaw ve ga piˇ shehˍ hpaˇ htaꞈ awˬ bon uiˍ jaˇ ve yoˬ. Hpawnˬ daꞈ kuiˬ hkʼaw ngaˬ awˬ bon gʼa jaˇ. Awˬ lawn kʼo, ngaˬ kʼa muiˬ hkawˇ gʼa kʼa ve, awˬ gʼaˇ piˇ daꞈ gʼa ve, bon maˍ hkawˇ gʼa na ve, VDO leh awˬ han teˇ hpaˍ kaꞈ ngaˬ awˬ bon gʼa ve yoˬ. Hpawnˬ daꞈ ve kawˆ ve maˇ cawˬ tuˬ yawˇ hui hkʼa dehꞈ nyi haꞈ shaˉ laˇ ve yoˬ. Hpawnˬ daꞈ la maˇ gʼa ve chaw htaꞈ shon (zoom) hkʼaw lo hpawnˬ daꞈ la tuˬ kaꞈ yawˇ hui ga piˇ sheˍ ve yoˬ. Hpawnˬ daꞈ peuˬ hkʼawꞈ nawˉ ga piˇ shehˍ hpaˇ lehˬ, daꞈ kehˬ tuˬ haˆ te ve yoˬ. Hkriꞈ yaˇ awˬ moˍ hkʼaw hpu caˇ laˇ te tuˬ, ga piˇ ve leh hto toˇ tuˬ awˬ pon liꞈ kʼoˆ hkʼa dehꞈ cawˬ tuˬ kaꞈ yawˇ hui gʼa nyi ve yoˬ. Ngaˬ yawˇ hui htaꞈ awˬ bon uiˍ jaˇ ve yoˬ.” Hkon˗la˗bi mvuhˇ miˬ lo chehˇ ve Lehn˗leˇ yawˇ ve awˬ hpawˇ nyi haꞈ shaˉ paˍ hpehꞈ ve yawˇ kʼoˆ ve, “ngaˬ chehˇ ve Hkriꞈ yaˇ awˬ moˍ hkʼaw ga piˇ shehˍ hpaˇ lehˬ, yawˇ hui kanˉ laiˉ ceuˬ te ve yoˬ. Yawˇ hui maˇ cawˬ ve kʼo ngaˬ hpawˇ kanˉ maˇ jaˇ. Yawˇ hui ha lehˬ ha kʼa ve hkʼaw awˬ viˉ awˬ nyi htaꞈ hkʼa dehꞈ ga piˇ ve, ngaˬ yawˇ hui htaꞈ awˬ bon uiˍ jaˇ ve yoˬ.” Nawˬ kaꞈ nawˬ chehˇ ve Hkriꞈ yaˇ awˬ moˍ hkʼaw ga piˇ shehˍ hpaˇ htaꞈ chi hkʼe dawˇ˗aw laˇ?—1 Tiˆmoˉseˍ 3:13.
7. Ngaˬ hui ga piˇ shehˍ hpaˇ htaꞈ awˬ bon uiˍ hkawˇ kʼoˆ piˇ tuˬ hkʼaˬ hkʼe hpeuꞈ maw piˇ gʼa ve le? (Awˬ han htaꞈ nyi sheˍ.)
7 Ngaˬ hui ga piˇ shehˍ hpaˇ htaꞈ awˬ bon uiˍ jaˇ ve htawˇ, Liꞈ hpu hkʼaw ‘awˬ bon htaꞈ dawˇ nawˇ˗oˆ’ tehꞈ awˬ gʼaˇ peꞈ laˇ ve yoˬ. (Kawˇlawˇsehˇ 3:15) Fiˬlanˬ mvuhˇ miˬ lo chehˇ ve nyi haꞈ shaˉ paˍ Viˆtawnˍ kʼoˆ ve, “ngaˬ ga piˇ shehˍ hpaˇ htaꞈ awˬ bon uiˍ hkawˇ kʼoˆ piˇ tuˬ, liꞈ bvuhꞈ piˇ ve, maˇ heˆ leh Liꞈ hpu awˬ tawn kaꞈ bvuhꞈ piˇ ve yoˬ. Leh yawˇ hui ngaˬ htaꞈ awˬ gʼaˇ hkʼaˬ hkʼe peꞈ laˇ ve kaꞈ kʼoˆ piˇ ve yoˬ. Leh yawˇ hui kanˉ te ve htaꞈ ngaˬ awˬ bon uiˍ jaˇ ve kaꞈ kʼoˆ piˇ ve yoˬ.” Ne˗hkeh˗leˆdon˗ni mvuhˇ miˬ lo chehˇ ve, Pa˗hkʼanˆ leh Yawˇlaˆ ga piˇ shehˍ hpaˇ awˬ pon bon lawˬ piˇ ve yoˬ. Pa˗hkʼanˆ kʼoˆ ve, “ngaˬ hui chehˇ ve Hkriꞈ yaˇ awˬ moˍ hkʼaw ve ga piˇ shehˍ hpaˇ htaꞈ ngaˬ hui bon hkʼa dehꞈ lawˬ piˇ ve yoˬ. Yaˬhoˉvaˬ lehˬ ga piˇ shehˍ hpaˇ cawˬ tcuh laˇ ve awˬ bon uiˍ jaˇ leh Gʼuiˬ sha yawˇ hui geh chehˇ leh ga piˇ tuˬ kaꞈ ngaˬ hui lawˬ ve yoˬ.” Bon lawˬ hkawˇ chi hkʼe ve htaꞈ Yaˬhoˉvaˬ na leh Hkriꞈ yaˇ awˬ moˍ hkʼaw teˇ gʼaˇ le le kaꞈ awˬ bon gʼa ve yoˬ.—2 Kawˇrenˍhtuˆ 1:11.
NYI HAꞈ SHAˉ PAˍ LEHˬ ‘NAWˬ HUI AWˬ HKʼAW LO VE KANˉ TE HKEUꞈ VE’
8. Aˬ htoꞈ ma te Pawˇluꞈ lehˬ awˉ lawˉ peuˇ ve awˬ hoˉ chaw mawˇ ‘kanˉ te hkeuꞈ ve’ tehꞈ bvuhꞈ taˍ ve le? (1 Hteˇsaˍlawˇniˆ 5:12, 13)
8 Awˉ lawˉ peuˇ teˇ co˗e htaˇ, awˬ hoˉ chaw mawˇ lehˬ Hkriꞈ yaˇ awˬ moˍ hkʼaw kanˉ te hkeuꞈ jaˇ. (1 Hteˇsaˍlawˇniˆ 5:12, 13; gʼaw sheˍ. 1 Tiˆmoˉseˍ 5:17) Yawˇ hui lehˬ Hkriꞈ yaˇ awˬ moˍ hkʼaw hpawnˬ daꞈ ve, leh awˬ hoˉ chaw mawˇ awˬ moˍ hkʼaw awˬ lawn teˇ hpaˍ htaꞈ dawˇ cheˆ tuˬ, yawˇ hui “haꞈ shaˉ” ve yoˬ. Awˬ viˉ awˬ nyi yonˍ hkʼaˇ yonˍ yeˬ tuˬ, yawˇ hui awˬ viˉ awˬ nyi htaꞈ haꞈ pehnˇ ve hkʼaw beˆ maˍ piˇ leh “shaˍ tiꞈ” piˇ ve yoˬ. (1 Hteˇsaˍlawˇniˆ 2:11, 12; 2 Tiˆmoˉseˍ 4:2) Awˬ viˉ awˬ nyi hawˉ hkʼaˆ chi ve teˇ hpaˍ lehˬ, yawˇ hui ve yehˬ kʼa htaꞈ kaꞈ gʼa hu ve yoˬ. Leh yawˇ hui ve yonˍ hkʼaˇ yonˍ yeˬ ve cawˬ tuˬ kaꞈ gʼa te cawˇ ve yoˬ.—1 Tiˆmoˉseˍ 3:2, 4; Tiˇtuˆ 1:6-9.
9. Chi beuꞈ teˇ co˗e ve nyi haꞈ shaˉ paˍ aˬ htoꞈ ma awˬ vuiˬ cawˬ ve le?
9 Chi beuꞈ teˇ co˗e ve nyi haꞈ shaˉ paˍ kaꞈ kanˉ maˇ jaˇ. Yawˇ hui daꞈ ve awˬ lawn sha tanˇ hto toˇ ve yoˬ. (2 Tiˆmoˉseˍ 4:5) Yawˇ hui hto toˇ ve hkʼaw kaiˬ ve daꞈ jaˇ ve henˇ yuˬ tuˬ hpehꞈ ve yoˬ. Hkriꞈ yaˇ awˬ moˍ hkʼaw hto toˇ ve hteˇ hteˇ shawˇ shawˇ cawˬ tuˬ gu leh, awˬ viˉ awˬ nyi hto toˇ ve leh hkʼa dehꞈ maˍ puiˉ tuˬ maˍ piˇ ve yoˬ. Chi hkʼoˆ kaꞈ, yawˇ hui Hkriꞈ yaˇ awˬ moˍ hkʼaw ha kʼaˉ ve leh chaw mehˆ hpfuhˇ htaꞈ maˇ nyi ve awˬ lawn gʼa dawˇ cheˆ ve yoˬ. Awˬ viˉ awˬ nyi venˇ baˆ uiˍ jaˇ ve htaꞈ te htaˇ, awˬ viˉ awˬ nyi oˇ ve teˇ gʼaˇ Yaˬhoˉvaˬ geh hkʼa dehꞈ meuˆ daꞈ tuˬ, nyi haꞈ shaˉ paˍ coˇ caˇ leh ga piˇ ve yoˬ. Leh chi hkʼe ve awˬ yanˇ htaˇ, Hkriꞈ yaˇ awˬ moˍ hkʼaw daꞈ kehˬ ve cawˬ tuˬ kaꞈ gʼa haꞈ shaˉ ve yoˬ. (1 Kawˇrenˍhtuˆ 5:12, 13; Gaˍlaˍtiˆ 6:1) Nyi haꞈ shaˉ paˍ teˇ gʼaˇ le le ve awˬ vuiˬ lehˬ, Gʼuiˬ sha ve yawˬ ehˉ htaꞈ yawˇ hui hkʼa dehꞈ nyi haꞈ shaˉ leh a yeˇ gʼa yuˬ ve yoˬ. (1 Peˍtruˆ 5:1-3) Nyi haꞈ shaˉ paˍ lehˬ Hkriꞈ yaˇ awˬ moˍ hkʼaw bon maˍ tuˬ kaꞈ hkʼa dehꞈ gʼa gu ve yoˬ. Yawˇ hui Hkriꞈ yaˇ awˬ moˍ hkʼaw awˬ viˉ awˬ nyi teˇ gʼaˇ le le htaꞈ hkʼa dehꞈ shiˍ daꞈ tuˬ gʼa te leh, awˬ viˉ awˬ nyi htaꞈ awˬ gʼaˇ kaꞈ gʼa piˇ ve yoˬ. Nyi haꞈ shaˍ paˍ teˇ hpaˍ hpaˍ kʼo, Gʼuiˬ sha ve kanˉ hkʼaˇ hpawˇ yehˬ te ve htaꞈ ga piˇ leh, hpawnˬ daꞈ kuiˬ yehˬ htaꞈ kaꞈ nyi haꞈ shaˉ ve yoˬ. Hpawnˬ daꞈ lonˉ te tuˬ gu ve kaꞈ ga piˇ ve yoˬ. Nyi haꞈ shaˉ paˍ teˇ hpaˍ hpaˍ naˆ tsuhˇ yehˬ lo caˉ daꞈ ve awˬ moˍ hkʼaw kanˉ te leh, chaw naˬ geh kaꞈ ca guiˇ˗e piˇ ve yoˬ. Leh awˬ nu ve kanˉ laiˉ ceuˬ kaꞈ te sheˍ ve yoˬ. Nyi haꞈ shaˉ paˍ kanˉ te hkeuꞈ jaˇ ve htaꞈ ngaˬ hui mawˬ ve yoˬ.
10. Aˬ htoꞈ ma te nyi haꞈ shaˉ paˍ kanˉ te hkeuꞈ jaˇ ve htaꞈ ngaˬ hui awˬ hpfuhˇ shiˍ ve le?
10 Yaˬhoˉvaˬ awˬ gʼuˇ suhˍ htaˇ kaꞈ kʼoˆ laˇ taˍ ve, yawˬ hawˉ paˍ lehˬ ngaˬ hui htaꞈ hkʼa dehꞈ nyi haꞈ shaˉ laˇ leh, “teˇ pawˆ kaꞈ gʼa kʼawꞈ kawˆ jehˇ chehˇ tuˬ ve maˇ heˆ.” (Yeˍraˍmiˆ 23:4) Fiˬlanˬ mvuhˇ miˬ lo chehˇ ve awˬ viˉ awˬ nyi yaˇ miˇ Haˍnaˆ yawˇ awˬ e naˬ jaˇ htaˇ, tawˇ hkawˇ chi yawˇ hui awˬ pon awˬ tehˬ hpehꞈ la ve htaꞈ gʼa mawˬ ve yoˬ. Yawˇ kʼoˆ ve, “ngaˬ ve dawˇ hkʼaˇ kʼoˆ maˍ laˇ tuˬ hkʼa dehꞈ maˇ cheuˬ ve htawˇ, ngaˬ hkʼa dehꞈ maˇ meuˆ daꞈ ve nyi haꞈ shaˉ paˍ teˇ gʼaˇ ngaˬ nyi ma hkʼaw cawˬ ve awˬ ceuˬ kʼoˆ maˍ piˇ htaˇ, hkʼa dehꞈ na taˍ laˇ ve yoˬ. Yawˇ ngaˬ geh teˇ geh bon lawˬ laˇ leh Yaˬhoˉvaˬ haꞈ pehnˇ ve htaꞈ ngaˬ yonˍ gʼa tuˬ te laˇ ve yoˬ. Yawˇ aˬ htoꞈ ma kʼoˆ ve ngaˬ hkʼa dehꞈ maˇ tawnˇ gʼa ve yoˬ. Yaꞈ hkʼaˇ, ngaˬ yawˇ geh tawˇ yaw daꞈ peuˬ hkʼawꞈ nawˉ kawˆ tuˬ maˇ cawˬ leh, nyi ma sha jaˇ ve htaꞈ tawnˇ gʼa ve yoˬ. Ngaˬ loˍ jaˇ ve awˬ yanˇ htaˇ, Yaˬhoˉvaˬ yawˇ ngaˬ geh laˬ tcuh laˇ ve tehꞈ yonˍ gʼa ve yoˬ.” Nawˬ chehˇ kuiˬ lo ve nyi haꞈ shaˉ paˍ nawˬ htaꞈ hkʼaˬ hkʼe ga laˇ ve le?
11. Ngaˬ hui hkʼaˬ hkʼe te nyi haꞈ shaˉ paˍ htaꞈ awˬ bon uiˍ jaˇ kʼoˆ piˇ gʼa tuˬ le? (Awˬ han htaꞈ nyi sheˍ.)
11 Nyi haꞈ shaˉ paˍ “te ve kanˉ teˇ hpaˍ htaꞈ pa taw” Yaˬhoˉvaˬ lehˬ ngaˬ hui yawˇ hui htaꞈ awˬ bon uiˍ hkawˇ kʼoˆ piˇ tcuh gaˇ ve yoˬ. (1 Hteˇsaˍlawˇniˆ 5:12, 13) Fiˬlanˬ mvuhˇ miˬ lo chehˇ ve Heu˗li˗tanˇ kʼoˆ ve, “nyi haꞈ shaˉ paˍ lehˬ awˬ nu ve chaw htaꞈ ga piˇ gaˇ ve yoˬ. Yaꞈ hkʼaˇ, chi ve lehˬ yawˇ hui awˬ yanˇ leh awˬ gʼaˇ awˬ nu ve chaw aꞈ kehˉ cawˬ ve tehꞈ kʼoˆ gaˇ ve maˇ heˆ. Maˇ heˆ leh yawˇ hui shoꞈ shaꞈ ve maˇ cawˬ ve htaꞈ kaꞈ kʼoˆ gaˇ ve maˇ heˆ. Teˇ pawˆ pawˆ kʼo, ngaˬ yawˇ hui htaꞈ kʼoˆ piˇ ve, ‘nawˬ daꞈ ve nyi haꞈ shaˉ paˍ hpehꞈ ve tehꞈ shiˍ˗aˬ laˇ?’ Htu˗hke˗a mvuhˇ miˬ lo chehˇ ve awˬ viˉ awˬ nyi She˗laˇ c kʼoˆ ve, “nyi haꞈ shaˉ paˍ caˉ leh kanˉ te kʼai gʼa tuˬ, awˬ gʼaˇ gʼa tuˬ loˍ ve yoˬ. Chi htaꞈ pa taw, ngaˬ yawˇ hui htaꞈ awˬ bon uiˍ hkawˇ kʼoˆ piˇ tuˬ liꞈ bvuhꞈ piˇ ve yoˬ. Yawˇ hui ngaˬ geh teˇ geh awˍ caˇ la tuˬ jehˬ piˇ leh, hto toˇ ve kaꞈ teˇ geh te ve yoˬ.” Nawˬ awˬ bon uiˍ jaˇ tehꞈ kʼoˆ piˇ gaˇ ve nyi haꞈ shaˉ paˍ hkʼaˬ ve teˇ gʼaˇ cawˬ ve le? Nawˬ yawˇ hui htaꞈ awˬ bon uiˍ jaˇ kʼoˆ piˇ tuˬ awˬ hkʼaˇ ca sheˍ.—1 Kawˇrenˍhtuˆ 16:18.
Leuˆ teh taˍ ve hawˉ hkʼaˆ caˉ leh kanˉ te kʼai gʼa tuˬ yawˇ hui htaꞈ nawˬ awˬ gʼaˇ piˇ sheˍ (awˬ tawn 7, 11, 15 nyi sheˍ)
TOˇ NYI SHEHˍ HPAˇ LEHˬ HKRIꞈ YAˇ AWˬ MOˍ HKʼAW YONˍ YEˬ TUˬ GA PIˇ VE
12. Awˉ lawˉ peuˇ ve teˇ co˗e htaˇ Hkriꞈ yaˇ awˬ moˍ hkʼaw yonˍ yeˬ ve cawˬ tuˬ aˬ htoꞈ ma gu teh taˍ piˇ ve le? (1 Hteˇsaˍlawˇniˆ 2:7, 8)
12 Yeˍsuˆ lehˬ awˬ viˉ awˬ nyi hawˉ hkʼaˆ ‘chaw yaˇ hpehꞈ ve laꞈ shawnˍ’ awˬ nu ve kanˉ teˇ hkʼaˇ kʼawꞈ te tcuh sheˍ ve yoˬ. Yeˍsuˆ lehˬ Yeˍruˆsaˍlehnˍ venˇ lo chehˇ ve awˬ hoˉ chaw mawˇ htaꞈ beˆ maˍ piˇ leh Pawˇluꞈ, Baˍnaˍbaˆ leh awˬ nu ve chaw htaꞈ yawˇ hui laiˉ kaˬ lo kʼai tcuh ve yoˬ. (Tcuh yaˇ 11:22) Aˬ htoꞈ ma awˬ pon le? Ga piˇ shehˍ hpaˇ, nyi haꞈ shaˉ paˍ, Hkriꞈ yaˇ awˬ moˍ hkʼaw yonˍ yeˬ ve cawˬ tuˬ ga piˇ ve hkʼa shuˍ, yawˇ hui kaꞈ Hkriꞈ yaˇ awˬ moˍ teˇ hpaˍ yonˍ yeˬ ve cawˬ tuˬ ga piˇ ve yoˬ. (Tcuh yaˇ 15:40, 41) Awˬ viˉ awˬ nyi chi ve teˇ hpaˍ yawˇ hui hpehꞈ hpehꞈ sha sha ve htaꞈ baˬ taˉ leh, yawˇ hui ve a shaꞈ yuˬ tanˇ leh awˬ viˉ awˬ nyi htaꞈ maˍ piˇ leh awˬ gʼaˇ piˇ ve yoˬ.—1 Hteˇsaˍlawˇniˆ 2:7, 8 gʼaw sheˍ.
13. Toˇ nyi shehˍ hpaˇ lehˬ aˬ htoꞈ ma awˬ vuiˬ cawˬ ve le?
13 Toˇ nyi shehˍ hpaˇ lehˬ hkʼaˬ htaˆ kaꞈ Hkriꞈ yaˇ awˬ moˍ teˇ kaˬ peuˬ teˇ kaˬ lo gʼa kʼai ve yoˬ. Teˇ pawˆ pawˆ kʼo, Hkriꞈ yaˇ awˬ moˍ teˇ hpaˍ hpaˍ geh ca guiˇ˗e tuˬ, yawˇ hui laiˉ ha kiˇ loˇ gʼa kʼai ve yoˬ. Teˇ shinˉ le le toˇ nyi shehˍ hpaˇ bon laiˉ pawˆ gʼa maˍ ve yoˬ. Awˬ viˉ awˬ nyi htaꞈ awˬ gʼaˇ ca piˇ˗e ve, gʼuˇ suhˍ peuˍ ve chaw htaꞈ maˍ piˇ ve, Hkriꞈ yaˇ awˬ moˍ nyi haꞈ shaˉ paˍ geh hpawnˬ daꞈ ve, leh hto toˇ˗e tuˬ awˬ pon hpawnˬ daꞈ ve yoˬ. Yawˇ hui hpawnˬ daꞈ lonˉ 1 nyi leh hpawnˬ daꞈ lonˉ 3 nyi awˬ pon bon maˍ hkawˇ gʼa gu cawˇ ve yoˬ. Yawˇ hui gʼuˇ suhˍ peuˍ ve liꞈ henˇ yehˬ lo gʼa maˍ piˇ ve, leh awˬ nu ve awˬ ceuˬ kaꞈ gʼa te sheˍ ve yoˬ. Teˇ pawˆ pawˆ kʼo yawˇ hui lehˬ awˬ tcuhˆ puiˍ lo laˬ ve kanˉ laꞈ tcuh laꞈ haˉ gʼa te cawˇ ve kaꞈ cawˬ ve yoˬ.
14. Aˬ htoꞈ ma te toˇ nyi shehˍ hpaˇ kanˉ te hkeuꞈ ve htaꞈ ngaˬ hui awˬ hpfuhˇ shiˍ ve le?
14 Toˇ nyi shehˍ hpaˇ geh Hkriꞈ yaˇ awˬ moˍ hkʼaw aˬ htoꞈ ma awˬ bon gʼa ve le? Htu˗hke˗a mvuhˇ miˬ lo chehˇ ve awˬ viˉ awˬ nyi hawˉ hkʼaˆ teˇ gʼaˇ kʼoˆ ve, “toˇ nyi shehˍ hpaˇ ca guiˇ la ve teˇ pawˆ le le ngaˬ awˬ viˉ awˬ nyi htaꞈ ga piˇ gʼa tuˬ, toˇ nyi shehˍ hpaˇ ngaˬ htaꞈ awˬ gʼaˇ peꞈ laˇ ve yoˬ. Teˇ pawˆ le le toˇ nyi shehˍ hpaˇ ca guiˇ la htaˇ, yawˇ hui kanˉ maˇ jaˇ ve pa taw, ngaˬ geh tawˇ yaw daꞈ tuˬ ve awˬ yanˇ maˇ cawˬ ve maˇ te laˇ jaw.” Haˍnaˆ kʼawꞈ kʼoˆ ve, yawˇ toˇ nyi shehˍ hpaˇ geh teˇ geh hto toˇ˗e htaˇ, aˉ hkʼaw lo chaw chehˇ˗aˬ laˇ ve htaꞈ maˇ mawˬ daꞈ. Yawˇ kʼoˆ ve, “ngaˬ oˇ ve teˇ nyi toˇ nyi shehˍ hpaˇ geh hto toˇ˗e ve htaꞈ maˇ leunˇ jaw. Ngaˬ viˉ ma 2 gʼaˇ awˬ nu ve teˇ kaˬ lo jiˆ kʼai leh ngaˬ yawˇ hui htaꞈ dawˇ nawˇ jaˇ tehꞈ kʼoˆ maˍ piˇ ve yoˬ. Chi teˇ hkui ngaˬ hui yehˬ kʼa maˇ heˆ leh awˬ chawˇ geh teˇ geh maˇ gʼa chehˇ ve htawˇ, miˬ guiˬ awˬ suhˉ hkʼaw kʼo ngaˬ hui co co taiˍ taiˍ teˇ geh gʼa chehˇ tuˬ yoˬ tehꞈ, toˇ nyi shehˍ hpaˇ ngaˬ htaꞈ awˬ gʼaˇ peꞈ laˇ ve yoˬ.” Nawˬ kaꞈ toˇ nyi shehˍ hpaˇ geh chi ve hkʼa shuˍ awˬ gʼaˇ peꞈ laˇ ve htaꞈ gʼa jaw ve maˇ heˆ laˇ?—Tcuh yaˇ 20:37–21:1.
15. (a) 3 Yoˇhanˬ liꞈ 5-8 hkʼaw kʼoˆ taˍ ve hkʼe, ngaˬ hui toˇ nyi shehˍ hpaˇ htaꞈ hkʼaˬ hkʼe te awˬ bon uiˍ hkawˇ kʼoˆ piˇ gʼa tuˬ le? (Awˬ han htaꞈ nyi sheˍ.) (b) Aˬ htoꞈ ma te toˇ nyi shehˍ hpaˇ ve awˬ miˇ ma htaꞈ ngaˬ hui dawˇ nyi piˇ cawˇ ve le? Leh chi ngaˬ hui hkʼaˬ hkʼe te gʼa tuˬ le? (Awˇ ceˍ awˇ fa “ Yawˇ hui ve awˬ miˇ ma htaꞈ dawˇ nyi piˇ˗oˆ” htaꞈ nyi sheˍ.)
15 Tcuh yaˇ Yoˇhanˬ Gaˍyuˆ htaꞈ liꞈ bvuhꞈ piˇ leh ca guiˇ la ve awˬ viˉ awˬ nyi “Gʼuiˬ sha htaꞈ keunˍ daꞈ ve hkʼe nawˬ yawˇ hui htaꞈ awˬ gʼuˇ suhˍ shiˍ kʼoˬ piˇ ve kʼo, daꞈ jaˇ ve yoˬ.” (3 Yoˇhanˬ 5-8 gʼaw sheˍ.) Ngaˬ hui chi hkʼe te gʼa tuˬ ve awˬ hkʼaˇ teˇ hkʼaˇ lehˬ, toˇ nyi shehˍ hpaˇ ngaˬ hui geh awˍ caˇ la tuˬ jehˬ piˇ ve yoˬ. Leh awˬ nu ve teˇ hkʼaˇ lehˬ, toˇ nyi shehˍ hpaˇ ca guiˇ la ve teˇ shinˉ htaˇ, hto toˇ˗e cawˇ ve yoˬ. Lehn˗leˇ kʼawꞈ kʼoˆ ve, toˇ nyi shehˍ hpaˇ htaꞈ awˬ bon uiˍ hkawˇ kʼoˆ piˇ gʼa tuˬ awˬ nu ve teˇ hkʼaˇ cawˬ sheˍ ve yoˬ. Yawˇ kʼoˆ ve, “yawˇ hui loˍ ve awˬ ceuˬ cawˬ tuˬ Yaˬhoˉvaˬ ga piˇ tuˬ ngaˬ bon lawˬ ve yoˬ. Yawˇ hui ca guiˇ la ve ngaˬ hui htaꞈ ga laˇ gʼa jaˇ tehꞈ ngaˬ hpawˇ ngaˬ huiˉ maˬ liꞈ bvuhꞈ piˇ ve yoˬ.” Toˇ nyi shehˍ hpaˇ lehˬ, chaw yaˇ teˇ gʼaˇ le le aꞈ kehˉ cheuˬ jaˇ ve maˇ heˆ tehꞈ tawnˇ taˍ sheˍ. Teˇ pawˆ pawˆ kʼo, yawˇ hui maˇ chehˇ sha ve, dawˇ haˍ dawˇ hkiˉ ve, leh awˬ gʼaˇ nuˇ ve chi ve teˇ hpaˍ gʼa hpuˇ ve yoˬ. Teˇ pawˆ pawˆ kʼo, na sha ve tawˇ yaw piˇ ve, maˇ heˆ leh laꞈ shawnˍ a ciˉ ciˉ piˇ ve kaꞈ yawˇ hui bon lawˬ ve htaꞈ Yaˬhoˉvaˬ hkʼawꞈ laˇ ve tehꞈ dawˇ ve yoˬ.—Tawˇ naˉ ve 12:25.
‘CHAW YAˇ HPEHꞈ VE LAꞈ SHAWNˍ’ NGAˬ HUI CAWˬ TUˬ LOˍ VE
16. Tawˇ naˉ ve liꞈ 3:27 hkʼaw kʼoˆ taˍ ve hkʼe, awˬ viˉ awˬ nyi hawˉ hkʼaˆ a shu yawˇ awˬ to htaꞈ aˬ htoꞈ ma na nyi cawˇ ve le?
16 ‘Chaw yaˇ hpehꞈ ve laꞈ shawnˍ’ Gʼuiˬ sha ve kanˉ hkʼa dehꞈ te gʼa tuˬ, miˬ guiˬ hkʼoˆ lo awˬ viˉ awˬ nyi hawˉ hkʼaˆ htaꞈ loˍ jaˇ ve yoˬ. Nawˬ Baˆtiˆsaˬ haꞈ yuˬ˗oˬ ve awˬ viˉ awˬ nyi hawˉ hkʼaˆ hpehꞈ ve kʼo, nawˬ “loˍ ve chaw htaꞈ ga piˇ” gʼa˗aw laˇ? (Tawˇ naˉ ve 3:27 gʼaw sheˍ.) Nawˬ ga piˇ shehˍ hpaˇ te gʼa tuˬ coˇ caˇ˗aw laˇ? Nawˬ ga piˇ shehˍ hpaˇ hpehꞈ˗oˬ ve kʼo, nawˬ nyi haꞈ shaˉ paˍ hpehꞈ tuˬ coˇ caˇ˗aw laˇ? d Gʼuiˬ sha ve mvuhˇ miˬ hto toˇ ve liꞈ henˇ yehˬ hkʼaw kʼai tuˬ, nawˬ a shaꞈ teꞈ hkʼaˇ pa˗aw laˇ? Liꞈ henˇ yehˬ chi ve lehˬ, Yeˍsuˆ peꞈ laˇ ve awˬ vuiˬ htaꞈ nawˬ hkʼa dehꞈ te gʼa tuˬ ga laˇ gʼa ve yoˬ. Nawˬ te maˇ keunˍ sheˍ tehꞈ dawˇ ve kʼo, chi teˇ hkui nawˬ gʼa ve awˬ vuiˬ htaꞈ hkʼa dehꞈ te gʼa tuˬ, Yaˬhoˉvaˬ geh daꞈ kehˬ ve awˬ ha hpu gʼa tuˬ lawˬ sheˍ.—Luˉkaꞈ 11:13; Tcuh yaˇ 20:28.
17. ‘Chaw yaˇ hpehꞈ ve laꞈ shawnˍ’ ngaˬ hui ve Jawˇ mawˇ Yeˍsuˆ htaꞈ caˉ daꞈ ve hkʼaˬ hkʼe hpeuꞈ maw laˇ ve le?
17 Yeˍsuˆ lehˬ, awˬ viˉ awˬ nyi hawˉ hkʼaˆ htaꞈ ‘chaw yaˇ hpehꞈ ve laꞈ shawnˍ’ leuˆ teh htaˇ, awˬ leh meuˇ ve awˬ yanˇ chi ve hkʼaw Yeˍsuˆ beˆ maˍ laˇ chehˇ ve tehꞈ hkʼa tawˍ lehˆ gʼa mawˬ ve yoˬ. (Maꞈhtehˍ 28:20) Ngaˬ hui htaꞈ haꞈ ve Jawˇ mawˇ cawˬ ve, piˇ gaˇ puiˉ ve Jawˇ mawˇ cawˬ ve, ngaˬ hui htaꞈ hkʼa dehꞈ haꞈ shaˉ laˇ ve Jawˇ mawˇ cawˬ ve, leh ngaˬ hui htaꞈ hkʼa dehꞈ nyi haꞈ shaˉ laˇ ve awˬ viˉ awˬ nyi hawˉ hkʼaˆ cawˬ ve htaꞈ nawˬ awˬ bon uiˍ jaˇ tehꞈ dawˇ ve maˇ heˆ laˇ? Chi htaꞈ pa taw, kanˉ te hkeuꞈ ve awˬ viˉ awˬ nyi hawˉ hkʼaˆ chi ve teˇ hpaˍ htaꞈ nawˬ awˬ bon uiˍ jaˇ tehꞈ kʼoˆ piˇ tuˬ awˬ hkʼaˇ ca sheˍ. Awˬ lawn kʼo, “daꞈ ve awˬ bon hkʼa peu˗eˬ leh, biˇ ve laꞈ shawnˍ hkʼa peu˗eˬ” Yaˬhoˉvaˬ ngaˬ hui htaꞈ peꞈ laˇ ve awˬ bon uiˍ jaˇ tehꞈ kʼoˆ piˇ gaˇ ve yoˬ.—Yaˍkoˆ 1:17.
KʼA MUIˬ HKAWˇ 99 Awˬ viˉ awˬ nyi awˬ moˍ lonˉ
a Uˉ peunˍ ve Kawˍmiˍtiˍ hpehꞈ ve nyi haꞈ shaˉ paˍ, Uˉ peunˍ ve Kawˍmiˍtiˍ htaꞈ ga piˇ shehˍ hpaˇ, awˬ tcuhˆ puiˍ lo ve kawˍmiˍtiˍ leh, awˬ nu ve awˬ ceuˬ sheh kʼai laˇ chehˇ ve awˬ viˉ awˬ nyi hawˉ hkʼaˆ chi ve teˇ hpaˍ lehˬ, ‘chaw yaˇ hpehꞈ ve laꞈ shawnˍ’ hpehꞈ ve yoˬ.
b Awˬ lawn chi ve hkʼaw awˬ meh teˇ hpaˍ hpaˍ pa ve.
c Awˉ lawˉ htaˇ ve mvuhˇ miˬ awˬ meh Tuˬraˬkiˬ.
d Awˬ leuˉ kʼawꞈ shiˍ gaˇ ve kʼo, Shaw nyi kuiˬ Taꞈ yehˬ Ha pa 11 maˬ 2024 hkʼawꞈ ga piˇ shehˍ hpaˇ maˇ heˆ leh nyi haꞈ shaˉ paˍ hkʼaˬ hkʼe te cawˇ ve, awˬ lawn “Awˬ viˉ awˬ nyi hawˉ hkʼaˆ˗oˬ,—Ga piˇ shehˍ hpaˇ te gʼa tuˬ coˇ caˇ chehˇ˗aw laˇ?” Leh “Awˬ viˉ awˬ nyi hawˉ hkʼaˆ˗oˬ,—Nawˬ nyi haꞈ shaˉ paˍ te gʼa tuˬ coˇ caˇ chehˇ˗aw laˇ?” htaꞈ nyi sheˍ.
