1-2. (a) Yaˬhoˉvaˬ ve kanˉ te ve chaw htawˇ dawˇ nawˬ dawˇ aˬ htoꞈ ma cawˬ ve le? (b) Awˬ lawn chi ve hkʼaw ngaˬ hui aˬ htoꞈ ma awˬ lawn htaꞈ henˇ tuˬ le?

 Chaw teˇ gʼaˇ le le a shaꞈ hkʼaˬ hkʼe ma gaˬ˗oˬ ve htawˇ maˇ kʼoˆ, teˇ pawˆ pawˆ a htawˇ dawˇ nawˬ dawˇ cawˬ jaw ve yoˬ. Tawˇ pa haˉ te kʼo, Yaˬhoˉvaˬ ve Shaˉhkiˆhkanˍ ve chaw ve yaˇ nehˬ teˇ gʼaˇ Yaˬhoˉvaˬ yawˇ htaꞈ awˬ tehˬ awˬ na a yeˇ yuˬ laˇ ve laˇ tehꞈ, htawˇ dawˇ nawˬ dawˇ cawˬ ve htaꞈ teˇ geh nyi sheˍ. Chi yawˇ hkʼa dehꞈ maˇ yonˍ gʼa leh Baˆtiˆsaˬ maˇ haꞈ yuˬ haˆ ve yoˬ. Maˇ heˆ leh awˬ viˉ awˬ nyi hawˉ hkʼaˆ teˇ gʼaˇ ve awˬ lawn htaꞈ teˇ geh nyi sheˍ. Yawˇ yaˇ nehˬ htaˇ, hpu shi mawˇ jeˬ htaꞈ gʼaꞈ ca ve aꞈ kehˉ, Yaˬhoˉvaˬ ve kanˉ te tuˬ leuˆ yuˬ ve yoˬ. Yaꞈ hkʼaˇ, chi teˇ hkui yawˇ kanˉ te leh gʼa ve hpu lehˬ, teˇ nyi pon teˇ nyi ceh tiˉ yehˇ lawꞈ ve yoˬ. Hkʼe te leh, yawˇ yaˇ nehˬ htaˇ, Yaˬhoˉvaˬ ve kanˉ hkʼa dehꞈ te tuˬ dawˇ cheˆ ve cawˇ˗aw laˇ tehꞈ, htawˇ dawˇ nawˬ dawˇ cawˬ ve yoˬ. Maˇ heˆ leh awˬ viˉ awˬ nyi chaw mawˇ ma teˇ gʼaˇ, chi teˇ hkui hkʼa dehꞈ maˇ chehˇ sha leh awˬ gʼaˇ maˇ cawˬ ve htaꞈ teˇ geh nyi sheˍ. Yawˇ oˇ htaˇ hkʼe leˇ Yaˬhoˉvaˬ ve kanˉ hkʼa dehꞈ te maˇ gʼa ve pa taw, awˬ gʼaˇ nuˇ ve yoˬ. Nawˬ kaꞈ chi hkʼe ve htawˇ dawˇ nawˬ dawˇ cawˬ jaw˗aw laˇ? Tawˇ pa haˉ te kʼo, ‘Yaˬhoˉvaˬ ngaˬ htaꞈ a yeˇ yuˬ laˇ˗aw laˇ? Ngaˬ Yaˬhoˉvaˬ awˬ pon teˇ ceuˬ le le yuˬ tanˇ ve awˬ hpfuhˇ hkʼawꞈ˗aw laˇ? Maˇ heˆ leh ngaˬ yawˇ mehˆ gʼuˇ suhˍ lo awˬ bon cawˬ sheˍ ve laˇ?’

² Na hkawˇ chi ve teˇ hpaˍ ngaˬ hui hkʼawꞈ laˇ hkawˇ maˇ gʼaꞈ ca leh htawˇ dawˇ nawˬ dawˇ cawˬ chehˇ sheˍ ve kʼo, ngaˬ hui ve yonˍ hkʼaˇ awˬ gʼaˇ gʼaˇ hteꞈ nuˇ kʼai leh ngaˬ hui Yaˬhoˉvaˬ ve kanˉ maˇ te tuˬ te laˇ gʼa ve yoˬ hehˉ. Ngaˬ hui htawˇ dawˇ nawˬ dawˇ cawˬ ve kʼo, Liꞈ hpu hkʼaw ve awˬ liˇ awˬ hkʼaˇ hkʼaˬ hkʼe ga laˇ gʼa ve, awˬ lawn chi ve hkʼaw teˇ geh henˇ tuˬ yoˬ. (1) Yaˬhoˉvaˬ ngaˬ hui htaꞈ awˬ tehˬ awˬ na a yeˇ yuˬ laˇ ve laˇ, (2) ngaˬ hui dawˇ cheˆ ve cawˇ˗oˬ ve laˇ, leh (3) ngaˬ hui Yaˬhoˉvaˬ awˬ pon awˬ bon cawˬ sheˍ ve laˇ, chi ve teˇ geh henˇ tuˬ yoˬ.

 NGAˬ HUI HTAWˇ DAWˇ NAWˬ DAWˇ CAWˬ VE KʼO, HKʼAˬ HKʼE TE CAWˇ VE LE?

3. Ngaˬ hui htawˇ dawˇ nawˬ dawˇ cawˬ ve htaꞈ tawˍ daꞈ gʼaˇ tuˬ ve teˇ ceuˬ lehˬ aˬ htoꞈ ma le?

³ Ngaˬ hui htawˇ dawˇ nawˬ dawˇ cawˬ ve kʼo, ngaˬ hui htaꞈ ga laˇ gʼa ve teˇ hkʼaˇ lehˬ, hkʼawꞈ laˇ hkawˇ ca gʼa tuˬ Liꞈ hpu hkʼaw hpfuhˆ nyi ve yoˬ. Ngaˬ hui chi hkʼe te ve kʼo, ngaˬ hui ve yonˍ hkʼaˇ yonˍ yeˬ ve, Yaˬhoˉvaˬ geh hkʼa dehꞈ meuˆ daꞈ gʼa ve, leh “yonˍ ve awˬ hkʼaw lo yeˬ lehˍ chehˇ” gʼa ve yoˬ.—1 Kawˇrenˍhtuˆ 16:13.

4. Ngaˬ hui “awˬ ceuˬ hkʼa peu˗eˬ htaꞈ” hkʼaˬ hkʼe te hkʼa dehꞈ hpfuhˆ nyi gʼa tuˬ le? (1 Hteˇsaˍlawˇniˆ 5:21)

⁴ 1 Hteˇsaˍlawˇniˆ liꞈ 5:21 gʼaw sheˍ. Liꞈ hpu hkʼaw ngaˬ hui htaꞈ “awˬ ceuˬ hkʼa peu˗eˬ htaꞈ lawˇ nyi˗o” tehꞈ kʼoˆ laˇ ve htaꞈ chaˬ nyi sheˍ. Chi ve ngaˬ hui hkʼaˬ hkʼe te gʼa tuˬ le? Ngaˬ hui aˬ htoꞈ ma ve awˬ lawn htaꞈ htawˇ dawˇ nawˬ dawˇ cawˬ ve kʼo, awˬ lawn oˇ ve Liꞈ hpu hkʼaw hpfuhˆ nyi sheˍ. Tawˇ pa haˉ te kʼo, yaˇ nehˬ teˇ gʼaˇ Yaˬhoˉvaˬ yawˇ htaꞈ awˬ tehˬ haꞈ ve laˇ tehꞈ, htawˇ dawˇ nawˬ dawˇ cawˬ ve awˬ lawn htaꞈ dawˇ nyi sheˍ. Yawˇ htawˇ dawˇ nawˬ dawˇ cawˬ ve htaꞈ teꞈ chiˉ maˇ te leh hkʼe leˇ hpehˇ baˬ taˍ ve laˇ? Maˇ heˆ. Awˬ lawn oˇ ve htaꞈ Yaˬhoˉvaˬ hkʼaˬ hkʼe dawˇ ve, yawˇ “awˬ ceuˬ hkʼa peu˗eˬ htaꞈ” hkʼa dehꞈ hpfuhˆ nyi ve yoˬ.

5. Ngaˬ hui htawˇ dawˇ nawˬ dawˇ cawˬ ve htaꞈ Yaˬhoˉvaˬ hkʼawꞈ laˇ ve htaꞈ “na” tuˬ hkʼaˬ hkʼe gʼa te ve le?

⁵ Ngaˬ hui Liꞈ hpu gʼaw htaˇ, Yaˬhoˉvaˬ ngaˬ hui htaꞈ tawˇ yaw laˇ chehˇ ve htaꞈ “na” chehˇ ve yoˬ. Yaꞈ hkʼaˇ, ngaˬ hui htawˇ dawˇ nawˬ dawˇ cawˬ ve awˬ lawn htaꞈ Yaˬhoˉvaˬ hkʼawꞈ laˇ tcuh gaˇ ve kʼo, na ve ceh tiˉ maˇ heˆ. Leuˉ leh te cawˇ sheˍ ve yoˬ. Ngaˬ hui htawˇ dawˇ nawˬ dawˇ cawˬ ve htaꞈ hkʼawꞈ laˇ gʼa tuˬ, ngaˬ hui Liꞈ hpu awˬ tawn gʼa gʼaꞈ ca leh hkʼa dehꞈ gʼa hpfuhˆ nyi ve yoˬ. Ngaˬ hui chi hkʼe te gʼa tuˬ, Yaˬhoˉvaˬ ve kanˉ hkʼaˇ gu teh taˍ laˇ ve laꞈ caˉ teˇ hpaˍ htaꞈ yehˇ gʼa ve yoˬ. (Tawˇ naˉ ve 2:3-6) Ngaˬ hui hkʼa dehꞈ hpfuhˆ nyi ve htaꞈ Yaˬhoˉvaˬ beˆ maˍ laˇ tuˬ bon lawˬ leh, awˬ lawn oˇ ve htaꞈ Yaˬhoˉvaˬ hkʼaˬ hkʼe dawˇ ve ga laˇ tuˬ kaꞈ lawˬ sheˍ. Peuˬ hkʼawꞈ nawˉ, Liꞈ hpu hkʼaw ve awˬ liˇ awˬ hkʼaˇ teˇ hpaˍ htaꞈ ngaˬ hui nyi leh, beˆ maˍ laˇ ve teˇ hpaˍ ngaˬ hui awˬ pon hkʼaˬ hkʼe yuˬ yehˇ gʼa tuˬ kaꞈ nyi cawˇ ve yoˬ. Chi hkʼoˆ kaꞈ, Liꞈ hpu hkʼaw Yaˬhoˉvaˬ ve kanˉ te ve chaw yawˇ hui ngaˬ hui hkʼa shuˍ dawˇ ve awˬ lawn kaꞈ gʼaw nyi cawˇ ve yoˬ.

6. Hpawnˬ daꞈ ve ngaˬ hui htawˇ dawˇ nawˬ dawˇ cawˬ ve htaꞈ hkʼaˬ hkʼe ga laˇ gʼa ve le?

⁶ Chi hkʼoˆ kaꞈ, hpawnˬ daꞈ kuiˬ hkʼaw Yaˬhoˉvaˬ ngaˬ hui htaꞈ tawˇ yaw laˇ ve gʼa “na” sheˍ ve yoˬ. Ngaˬ hui hpawnˬ daꞈ ve hkʼaˬ htaˆ kaꞈ kʼai ve kʼo, bon maˍ hkawˇ maˇ heˆ leh awˬ viˉ awˬ nyi awˬ gʼaˇ piˇ daꞈ ve kaꞈ gʼa na ve yoˬ. Yawˇ hui ve hkʼawꞈ laˇ hkawˇ ngaˬ hui htawˇ dawˇ nawˬ dawˇ cawˬ ve htaꞈ, maˇ kʼawꞈ cawˬ tuˬ kaꞈ te laˇ gʼa ve yoˬ. (Tawˇ naˉ ve 27:17) Ngaˬ hui htawˇ dawˇ nawˬ dawˇ cawˬ ve, leh hkʼaˬ hkʼe ga laˇ gʼa ve, teˇ lawn lawn htaꞈ teˇ geh nyi sheˍ.

YAˬHOˉVAˬ NAWˬ HTAꞈ A YEˇ YUˬ LAˇ VE LAˇ?

7. Chaw teˇ hpaˍ aˬ htoꞈ ma htaꞈ htawˇ dawˇ nawˬ dawˇ cawˬ ve le?

⁷ ‘Yaˬhoˉvaˬ ngaˬ htaꞈ a yeˇ yuˬ laˇ ve laˇ’ tehꞈ nawˬ htawˇ dawˇ nawˬ dawˇ cawˬ jaw˗aw laˇ? Nawˬ a yeˇ uiˍ ve chaw maˇ hpehꞈ ve tehꞈ dawˇ ve kʼo, mvuhˇ naw ma, miˬ naˆ ma htaꞈ hpanˍ sheh hpaˇ Gʼuiˬ sha htaꞈ nawˬ awˬ chawˇ te maˇ gʼa ve tehꞈ dawˇ ve yoˬ hehˉ. Jawˇ mawˇ Daˍviˆ kaꞈ chi hkʼe dawˇ jaw ve yoˬ. Yaˬhoˉvaˬ chaw yaˇ htaꞈ a yeˇ yuˬ ve tehꞈ yawˇ gʼa mawˬ htaˇ, ha lehˬ jaˇ ve yoˬ. Yawˇ kʼoˆ ve, “Gʼuiˬ sha˗oˬ, nawˬ chaw yaˇ htaꞈ gʼa dawˇ nyi tuˬ, chaw yaˇ lehˬ aˬ htoꞈ ma hpehꞈ ve le? Yawˇ htaꞈ haꞈ shaˉ piˇ tuˬ, chaw yaˇ lehˬ aˬ htoꞈ ma hpehꞈ ve le?” (Chiˇ mvuh ve 144:3) Yaˬhoˉvaˬ ngaˬ hui teˇ gʼaˇ leh teˇ gʼaˇ htaꞈ a yeˇ yuˬ laˇ˗aw laˇ tehꞈ nawˬ htawˇ dawˇ nawˬ dawˇ cawˬ ve kʼo, hkʼawꞈ laˇ hkawˇ hkʼaˬ kaˬ lo nawˬ ca tuˬ le?

8. 1 Saˍmo˗eˍlaˆ liꞈ 16:6, 7, 10-12 hkʼaw kʼoˆ taˍ ve hkʼe, chaw yaˇ htaꞈ Yaˬhoˉvaˬ a yeˇ hkʼaˬ hkʼe yuˬ ve le?

⁸ Liꞈ hpu hkʼaw awˬ nu ve chaw mehˆ gʼuˇ suhˍ lo a yeˇ maˇ uiˍ tehꞈ dawˇ ve chaw htaꞈ Yaˬhoˉvaˬ a yeˇ yuˬ ve tehꞈ ngaˬ hui gʼa shiˍ ve yoˬ. Tawˇ pa haˉ te kʼo, Yeˍsehˇ ve yaˇ paˍ awˬ gʼuˇ suhˍ hpawˇ Iˉsaˍreˍlaˆ chaw ve jawˇ mawˇ te tuˬ leuˆ yuˬ tuˬ, Yaˬhoˉvaˬ Saˍmo˗eˍlaˆ htaꞈ Yeˍsehˇ ve aˉ hkʼaw lo kʼai tcuh ve yoˬ. Yeˍsehˇ yaˇ paˍ 8 gʼaˇ cawˬ ve yoˬ. Yaꞈ hkʼaˇ, yawˇ yaˇ paˍ 7 gʼaˇ htaꞈ Saˍmo˗eˍlaˆ geh shiˍ veu laˇ ve yoˬ. b  Yaˇ paˍ leh Daˍviˆ htaꞈ yawˇ maˇ gʼa shiˍ veu laˇ piˇ ve htawˇ, Yaˬhoˉvaˬ Daˍviˆ htaꞈ leuˆ yuˬ ve yoˬ. (1 Saˍmo˗eˍlaˆ 16:6, 7, 10-12 gʼaw sheˍ.) Daˍviˆ hkʼaˬ hkʼe ve chaw hpehꞈ ve htaꞈ Yaˬhoˉvaˬ shiˍ leh Daˍviˆ yawˇ htaꞈ haꞈ jaˇ ve kaꞈ shiˍ ve yoˬ.

9. Yaˬhoˉvaˬ nawˬ htaꞈ a yeˇ yuˬ ve tehꞈ aˬ htoꞈ ma te nawˬ yonˍ gʼa ve le? (Awˬ han htaꞈ nyi sheˍ.)

⁹ Peuˬ laˬ htaˇ Yaˬhoˉvaˬ nawˬ htaꞈ a yeˇ hkʼaˬ hkʼe yuˬ ve hpeuꞈ maw laˇ ve htaꞈ dawˇ nyi sheˍ. Nawˬ loˍ ve awˬ yanˇ htaˇ, yawˇ beˆ maˍ laˇ ve yoˬ. (Chiˇ mvuh ve 32:8) Chi Gʼuiˬ sha nawˬ htaꞈ hkʼa dehꞈ shiˍ ve tehꞈ hpeuꞈ maw laˇ ve yoˬ. (Chiˇ mvuh ve 139:1) Leh Yaˬhoˉvaˬ beˆ maˍ laˇ ve htaꞈ nawˬ yuˬ yehˇ htaˇ, nawˬ htaꞈ hkʼaˬ hkʼe ga laˇ gʼa ve gʼa mawˬ ve yoˬ. Yaˬhoˉvaˬ nawˬ htaꞈ awˬ tehˬ awˬ na a yeˇ yuˬ ve tehꞈ nawˬ yonˍ gʼa ve yoˬ. (1 Raˍsaˍvanˍ 28:9; Tcuh yaˇ 17:26, 27) Nawˬ Yaˬhoˉvaˬ ve kanˉ te leh yawˇ ve hkawˇ na yuˬ tuˬ, te ve teˇ ceuˬ le le htaꞈ yawˇ mawˬ ve yoˬ. Nawˬ daꞈ ve awˬ ceuˬ htaꞈ Gʼuiˬ sha mawˬ leh yawˇ nawˬ geh awˬ chawˇ te gaˇ ve yoˬ. (Yeˍraˍmiˆ 17:10) Nawˬ Yaˬhoˉvaˬ geh awˬ chawˇ te gaˇ ve kʼo, yawˇ ha lehˬ jaˇ ve yoˬ.—1 Yoˇhanˬ 4:19.

NAWˬ DAWˇ CHEˆ VE CAWˇ˗Oˬ VE LAˇ?

10. Oˇ htaˇ ngaˬ hui dawˇ cheˆ jaw ve awˬ lawn htaꞈ kʼawꞈ dawˇ nyi htaˇ, ngaˬ hui htawˇ dawˇ nawˬ dawˇ cawˬ tuˬ aˬ htoꞈ ma te laˇ ve le?

¹⁰ Awˬ viˉ awˬ nyi teˇ hpaˍ Yaˬhoˉvaˬ ve kanˉ hkʼa dehꞈ te gʼa tuˬ, oˇ htaˇ gʼaˇ hpfuhˇ gʼa daꞈ ve kanˉ maˇ te tuˬ, maˇ heˆ leh tanˇ kaˬ hkʼaˇ maˇ te tuˬ, dawˇ cheˆ ve cawˇ˗aw laˇ tehꞈ kʼawꞈ dawˇ nyi ve yoˬ. Yaꞈ hkʼaˇ, awˬ yanˇ ponˬ kʼai htaˇ, laiˉ chi hkʼawꞈ gaˬ˗oˬ. Yawˇ hui dawˇ cheˆ ve cawˇ˗aw laˇ tehꞈ, htawˇ dawˇ nawˬ dawˇ cawˬ ve yoˬ. Yawˇ hui shiˍ daꞈ ve chaw teˇ hpaˍ hpu gʼaꞈ ca tuˬ leuˆ yuˬ ve pa taw, a shaꞈ teꞈ hkʼaˇ hpehꞈ sha leh paw sha jaˇ ve yoˬ. Hkʼe te leh, chi yawˇ hui htawˇ dawˇ nawˬ dawˇ cawˬ tuˬ te piˇ ve, ‘ngaˬ Yaˬhoˉvaˬ awˬ pon yuˬ tanˇ ve awˬ hpfuhˇ hkʼawꞈ˗aw laˇ? Maˇ heˆ leh chi ngaˬ teˇ ceuˬ ceuˬ shonˇ kʼai tuˬ te laˇ ve laˇ?’

11. Chiˇ mvuh ve liꞈ kaˇ nanˉ uiˍ 73 bvuhꞈ paˍ nyi ma maˇ sha tuˬ aˬ htoꞈ ma te piˇ ve le?

¹¹ Nawˬ htawˇ dawˇ nawˬ dawˇ chi ve hkʼa shuˍ shuˍ cawˬ ve kʼo, Chiˇ mvuh ve liꞈ kaˇ nanˉ uiˍ 73 bvuhꞈ paˍ ve awˬ lawn htaꞈ teˇ geh kʼawꞈ dawˇ nyi sheˍ. Yaˬhoˉvaˬ ve kanˉ maˇ te ve chaw lehˬ, awˬ gʼaˇ  hehnˇ ve, paw sha ve, leh teꞈ chiˉ dawˇ haˍ dawˉ hkiˉ tuˬ maˇ cawˬ ve htaꞈ shuˍ ve yawˇ gʼa mawˬ ve yoˬ. (Chiˇ mvuh ve 73:3-5, 12) Chaw chi ve teˇ hpaˍ htaꞈ yawˇ gʼa mawˬ htaˇ, teˇ ceuˬ le le hkʼa dehꞈ te gʼa ve htaꞈ shuˍ ve yoˬ. Hkʼe te leh, yawˇ Yaˬhoˉvaˬ ve kanˉ te ve lehˬ, awˬ bon maˇ cawˬ ve tehꞈ dawˇ tuˬ te piˇ ve yoˬ. Chi hkʼe ve dawˇ hkʼaˇ lehˬ, yawˇ htaꞈ “teˇ nyi tanˇ vanˇ tuꞈ hkanˍ chehˇ tcuh laˇ ve yoˬ.” (Chiˇ mvuh ve 73:13, 14) Leh chi hkʼe ve dawˇ hkʼaˇ htaꞈ yawˇ hkʼaˬ hkʼe te gu ve le?

12. Chiˇ mvuh ve liꞈ 73:16-18 hkʼaw kʼoˆ taˍ ve hkʼe, Chiˇ mvuh ve liꞈ bvuhꞈ paˍ yawˇ htawˇ dawˇ nawˬ dawˇ cawˬ ve htaꞈ hkʼaˬ hkʼe gu ve le?

¹² Chiˇ mvuh ve liꞈ 73:16-18 gʼaw sheˍ. Chiˇ mvuh ve liꞈ bvuhꞈ paˍ Yaˬhoˉvaˬ ve daꞈ kehˬ ve bon yehˬ hkʼaw loꞈ˗e ve yoˬ. Choˬ kaˬ lo yawˇ hkʼa dehꞈ dawˇ nyi gʼa tuˬ te piˇ ve yoˬ. Chaw teˇ hpaˍ nyi˗a kʼo, a shaꞈ teꞈ hkʼaˇ hpehꞈ hpehꞈ sha sha ve cawˬ ve htaꞈ yawˇ hkʼa dehꞈ na gʼa la ve htawˇ, yawˇ hui awˬ gʼuˇ suhˍ hpawˇ dawˇ law kuiˬ maˇ cawˬ. Yawˇ chi hkʼe dawˇ nyi gʼa htaˇ, nyi ma gawˬ lehˍ cawˬ leh Yaˬhoˉvaˬ ve kanˉ te ve lehˬ, dawˇ cheˆ ve daꞈ jaˇ ve tehꞈ yawˇ yonˍ gʼa ve yoˬ. Awˬ bon gʼa ve lehˬ, yawˇ Yaˬhoˉvaˬ ve kanˉ caˉ leh te tuˬ dawˇ teh taˍ ve yoˬ.—Chiˇ mvuh ve 73:23-28.

13. Peuˬ laˬ htaˇ nawˬ dawˇ cheˆ ve cawˇ˗oˬ ve laˇ tehꞈ, htawˇ dawˇ nawˬ dawˇ cawˬ ve kʼo, nawˬ htawˇ dawˇ nawˬ dawˇ maˇ cawˬ leh nyi ma gawˬ lehˍ ve cawˬ tuˬ hkʼaˬ hkʼe te gʼa ve le? (Awˬ han htaꞈ nyi sheˍ.)

¹³ Liꞈ hpu hkʼaw nawˬ htawˇ dawˇ nawˬ dawˇ cawˬ ve htaꞈ gu leh, nyi ma sha tuˬ ga laˇ gʼa ve yoˬ. Chi ve hkʼaˬ hkʼe te gʼa tuˬ le? Nawˬ Yaˬhoˉvaˬ geh awˬ bon gʼa maˇ jaˇ ve pa taw, chi teˇ hkui nawˬ gʼa ve daꞈ ve awˬ ceuˬ teˇ hpaˍ htaꞈ dawˇ nyi sheˍ. Leh Yaˬhoˉvaˬ ve kanˉ maˇ te ve chaw htaꞈ nawˬ tehˆ daꞈ nyi sheˍ. Yawˇ hui ve a shaꞈ teꞈ hkʼaˇ hkʼaˬ hkʼe hpehꞈ ve le? Yawˇ hui maˇ˗awˍ ve dawˇ ve, kanˉ daꞈ daꞈ ve cawˬ leh a shaꞈ teꞈ hkʼaˇ hpehꞈ hpehꞈ sha sha ve lehˬ, a yeˇ uiˍ jaˇ ve tehꞈ dawˇ ve yoˬ. Awˬ lawn kʼo, yawˇ hui awˬ gʼuˇ suhˍ hpawˇ lo ve htaꞈ caˉ daꞈ ve dawˇ law kuiˬ maˇ cawˬ. Yaꞈ hkʼaˇ, nawˬ awˬ pon kʼo chi hkʼe maˇ heˆ. Nawˬ gʼa ve daꞈ ve awˬ ceuˬ lehˬ, chi teˇ hkui  ceh tiˉ maˇ heˆ. Yaꞈ hkʼaˇ, awˬ gʼuˇ suhˍ hpawˇ chi aꞈ kehˉ daꞈ jaˇ ve Yaˬhoˉvaˬ peꞈ laˇ tuˬ yoˬ tehꞈ, yawˇ ka tiꞈ te taˍ laˇ ve yoˬ. (Chiˇ mvuh ve 145:16) Chi hkʼoˆ kaꞈ, chi hkʼe dawˇ nyi sheˍ. Nawˬ chi hkʼe dawˇ cheˆ ve kʼo, a shaꞈ teꞈ hkʼaˇ chi aꞈ kehˉ daꞈ tuˬ yoˬ tehꞈ, nawˬ yonˍ gʼa˗aw laˇ? Yaꞈ hkʼaˇ, nawˬ Yaˬhoˉvaˬ leh awˬ nu ve chaw htaꞈ haꞈ ve tehꞈ dawˇ cheˆ ve kʼo, nawˬ yonˍ gʼa jaˇ ve teˇ ceuˬ lehˬ, nawˬ ve a shaꞈ teꞈ hkʼaˇ ha lehˬ jaˇ tuˬ yoˬ.

NAWˬ YAˬHOˉVAˬ AWˬ PON AWˬ BON CAWˬ VE LAˇ?

14. Aˬ htoꞈ ma te chaw teˇ hpaˍ maˇ yonˍ gʼa ve le? Leh yawˇ hui aˬ htoꞈ ma htaꞈ htawˇ dawˇ nawˬ dawˇ cawˬ ve le?

¹⁴ Yaˬhoˉvaˬ ve kanˉ te ve chaw teˇ hpaˍ a shaꞈ maˇ ve, hkʼa dehꞈ maˇ chehˇ sha ve, maˇ heˆ leh hkui luˬ laꞈ luˬ ve cawˬ ve yoˬ. Chi ve teˇ hpaˍ yawˇ hui Yaˬhoˉvaˬ ve mehˆ gʼuˇ suhˍ lo awˬ hpfuhˇ cawˬ ve laˇ tehꞈ, maˇ yonˍ gʼa tuˬ te piˇ ve yoˬ. Hkʼe te leh, yawˇ hui htawˇ dawˇ nawˬ dawˇ cawˬ ve, ‘ngaˬ Yaˬhoˉvaˬ awˬ pon awˬ bon cawˬ sheˍ ve laˇ?’

15. Chiˇ mvuh ve liꞈ kaˇ nanˉ uiˍ 71 bvuhꞈ paˍ aˬ htoꞈ ma awˬ lawn htaꞈ yonˍ gʼa ve le?

¹⁵ Chiˇ mvuh ve liꞈ kaˇ nanˉ uiˍ 71 bvuhꞈ paˍ kaꞈ chi hkʼe dawˇ jaw ve yoˬ. Yawˇ bon lawˬ ve hkʼaw kʼoˆ ve, “ngaˬ awˬ gʼaˇ nuˇ la peuˬ ve pa taw, ngaˬ htaꞈ taˇ baˬ taˉ laˇ˗oˆ.” (Chiˇ mvuh ve 71:9, 18) Chi hkʼe hpehꞈ ve htawˇ, yawˇ Yaˬhoˉvaˬ ve kanˉ ka tiꞈ yeˬ ve hkʼaw te tuˬ yoˬ tehꞈ yonˍ gʼa ve yoˬ. Yaˬhoˉvaˬ kaꞈ yawˇ htaꞈ beˆ maˍ piˇ leh ga piˇ ve yoˬ. Hkʼa dehꞈ maˇ te gʼa ve htawˇ, Yaˬhoˉvaˬ ve kanˉ coˇ caˇ leh hkʼa dehꞈ te ve htaꞈ yawˇ nyi hkʼaˇ suh ve tehꞈ, Chiˇ mvuh ve liꞈ bvuhꞈ paˍ gʼa shiˍ ve yoˬ.—Chiˇ mvuh ve 37:23-25.

16. A shaꞈ maˇ ve chaw Yaˬhoˉvaˬ awˬ pon awˬ bon hkʼaˬ hkʼe cawˬ ve le? (Chiˇ mvuh ve 92:12-15)

¹⁶ Chi teˇ hkui nawˬ a shaꞈ maˇ˗oˬ ve kʼo, Yaˬhoˉvaˬ nawˬ htaꞈ hkʼaˬ hkʼe dawˇ ve dawˇ nyi sheˍ. Nawˬ teˇ ceuˬ ceuˬ te maˇ gʼa ve htawˇ, nawˬ yawˇ ve kanˉ ka tiꞈ yeˬ ve hkʼaw caˉ leh te gʼa tuˬ yawˇ ga laˇ tuˬ yoˬ. (Chiˇ mvuh ve 92:12-15 gʼaw sheˍ.) Nawˬ te maˇ gʼa ve awˬ ceuˬ htaꞈ dawˇ nyi ve aꞈ kehˉ, chi teˇ hkui nawˬ te gʼa ve awˬ ceuˬ htaꞈ dawˇ nyi sheˍ. Tawˇ pa haˉ te kʼo, nawˬ shu htaꞈ awˬ gʼaˇ piˇ gʼa ve lehˬ, nawˬ ve daꞈ ve awˬ lawn shu htaꞈ kʼoˆ maˍ piˇ leh, shu  htaꞈ a yeˇ yuˬ ve tehꞈ hpeuꞈ maw piˇ sheˍ. Peuˬ laˬ ve laiˉ hkʼawꞈ htaˇ, Yaˬhoˉvaˬ nawˬ htaꞈ hkʼaˬ hkʼe ga laˇ jaw ve yawˇ hui htaꞈ kʼoˆ maˍ piˇ leh, Liꞈ hpu hkʼaw ve ka tiꞈ nawˬ yonˍ gʼa ve hkʼaw law chehˇ ve kaꞈ kʼoˆ maˍ piˇ sheˍ. Nawˬ bon lawˬ ve awˬ nu ve chaw awˬ pon awˬ bon cawˬ ve tehꞈ, taˇ leunˇ sheˍ. (1 Peˍtruˆ 3:12) Chi htaꞈ pa taw, ngaˬ hui teˇ gʼaˇ leh teˇ gʼaˇ gʼa hpuˇ ve maˇ shuˍ daꞈ ve htawˇ, Yaˬhoˉvaˬ leh awˬ nu ve chaw awˬ pon teˇ ceuˬ ceuˬ te piˇ gʼa ve yoˬ.

17. Ngaˬ hui awˬ nu ve chaw htaꞈ tehˆ daꞈ gaˇ ve dawˇ hkʼaˇ htaꞈ aˬ htoꞈ ma te gʼa tawˍ daꞈ ve le?

¹⁷ Nawˬ Yaˬhoˉvaˬ ve kanˉ hkʼa dehꞈ te maˇ ve pa taw, nyi ma maˇ sha ve kʼo, nawˬ yawˇ awˬ pon te ve teˇ ceuˬ le le htaꞈ yawˇ awˬ hpfuhˇ shiˍ ve tehꞈ yonˍ gʼa ve yoˬ. Teˇ pawˆ pawˆ kʼo, nawˬ awˬ to leh awˬ nu ve chaw htaꞈ tehˆ daꞈ puiˉ la ve yoˬ. Yaꞈ hkʼaˇ, chi hkʼe ve dawˇ hkʼaˇ htaꞈ nawˬ gʼa tawˍ daꞈ ve yoˬ. Aˬ htoꞈ ma pa taw le? Awˬ lawn kʼo, Yaˬhoˉvaˬ lehˬ nawˬ awˬ to shu htaꞈ maˇ tehˆ daꞈ jaw. (Gaˍlaˍtiˆ 6:4) Tawˇ pa haˉ te kʼo, Maˍriˆ awˬ hpfuhˇ hkʼaˆ jaˇ ve naˍ manˇ hawnˉ Yeˍsuˆ htaꞈ laꞈ shawnˍ te piˇ ve yoˬ. (Yoˇhanˬ 12:3-5) Yaꞈ hkʼaˇ, mehˆ chawˇ ma bon yehˬ lonˉ hkʼaw pehꞈ shanˍ ehˉ 2 pehꞈ hpu tanˇ tanˇ ve yoˬ. (Luˉkaꞈ 21:1-4) Yaˇ miˇ chi ve 2 gʼaˇ te ve peun daꞈ jaˇ ve htawˇ, yawˇ hui te ve awˬ ceuˬ lehˬ, yawˇ hui yonˍ ve cawˬ ve tehꞈ Yeˍsuˆ gʼa mawˬ ve yoˬ. Yeˍsuˆ Yaˬhoˉvaˬ htaꞈ hkʼa dehꞈ henˇ yuˬ gʼa ve awˬ hkʼoˆ kaꞈ, nawˬ te ve teˇ ceuˬ le le haꞈ pehnˇ leh yonˍ ve hkʼaw te ve tehꞈ, Yaˬhoˉvaˬ mawˬ ve htaꞈ nawˬ hkʼa dehꞈ yonˍ gʼa ve yoˬ. Nawˬ te ve awˬ ceuˬ a ciˉ ceh tiˉ hpehꞈ ve htawˇ, Yaˬhoˉvaˬ awˬ pon awˬ hpfuhˇ hkʼaˆ jaˇ ve tehꞈ shawˍ ve yoˬ.

18. Ngaˬ hui htawˇ dawˇ nawˬ dawˇ cawˬ ve htaꞈ tawˍ daꞈ gʼaˇ tuˬ aˬ htoꞈ ma ga laˇ gʼa ve le? (Awˇ ceˍ awˇ fa “ Yaˬhoˉvaˬ ve tawˇ hkawˇ lehˬ nawˬ htawˇ dawˇ nawˬ dawˇ cawˬ ve htaꞈ tawˍ daꞈ gʼaˇ tuˬ ga laˇ gʼa ve” htaꞈ nyi sheˍ.)

¹⁸ Ngaˬ hui teˇ gʼaˇ le le kaꞈ teˇ pawˆ pawˆ htawˇ dawˇ nawˬ dawˇ cawˬ ve yoˬ. Yaꞈ hkʼaˇ, awˬ lawn chi ve hkʼaw ngaˬ hui gʼa henˇ˗oˬ ve hkʼe, Liꞈ hpu lehˬ Gʼuiˬ sha maˍ ve awˬ tehˬ ve tawˇ hkawˇ hpehꞈ ve pa taw, ngaˬ hui htawˇ dawˇ nawˬ dawˇ cawˬ ve htaꞈ tawˍ daꞈ gʼaˇ tuˬ ga laˇ gʼa ve yoˬ. Chi htaꞈ pa taw, nawˬ hkʼa dehꞈ yonˍ gʼa leh awˬ gʼaˇ maˇ nuˇ tuˬ, nawˬ htawˇ dawˇ nawˬ dawˇ cawˬ ve hkʼawꞈ laˇ hkawˇ ca gʼa tuˬ, coˇ caˇ leh ca sheˍ. Yaˬhoˉvaˬ nawˬ htaꞈ a yeˇ yuˬ ve tehꞈ yonˍ sheˍ. Nawˬ Yaˬhoˉvaˬ awˬ pon te ve teˇ ceuˬ le le htaꞈ yawˇ awˬ hpfuhˇ shiˍ leh, yawˇ nawˬ htaꞈ laꞈ shawnˍ peꞈ laˇ tuˬ yoˬ. Yaˬhoˉvaˬ ve kanˉ ka tiꞈ yeˬ ve hkʼaw te ve chaw teˇ gʼaˇ le le htaꞈ yawˇ haꞈ leh a yeˇ yuˬ ve tehꞈ yonˍ sheˍ.