AWˬ LAWN 40
KʼA MUIˬ HKAWˇ 30 Ngaˬ ve awˬ pa, ngaˬ ve Gʼuiˬ sha leh ngaˬ ve awˬ chawˇ
‘Yaˬhoˉvaˬ lehˬ nyi ma luˬ chehˇ ve chaw hui htaꞈ gu na˗e piˇ ve’
“Yawˇ lehˬ nyi ma luˬ chehˇ ve chaw hui htaꞈ gu na˗e piˇ leh, yawˇ hui ve naˬ kuiˬ teˇ hpaˍ htaꞈ peh piˇ chehˇ ve yoˬ.”—CHIˇ MVUH VE 147:3.
A YEˇ UIˍ VE AWˬ LAWN
Nyi ma luˬ chehˇ ve chaw hui htaꞈ Yaˬhoˉvaˬ dawˇ haˍ ve yoˬ. Nyi ma luˬ ve htaꞈ ngaˬ hui hkʼaˬ hkʼe te yeunˇ hkanˍ gʼaˇ tuˬ, leh ngaˬ hui awˬ nu ve chaw htaꞈ awˬ gʼaˇ piˇ tuˬ yawˇ hkʼaˬ hkʼe ga laˇ gʼa ve, awˬ lawn chi ve hkʼaw teˇ geh henˇ tuˬ yoˬ.
1. Yaˬhoˉvaˬ yawˇ ve kanˉ te ve chaw htaꞈ hkʼaˬ hkʼe dawˇ ve le?
Yaˬhoˉvaˬ yawˇ ve kanˉ te ve miˬ guiˬ hkʼoˆ lo chehˇ ve chaw teˇ gʼaˇ le le htaꞈ nyi chehˇ ve yoˬ. Ngaˬ hui ha lehˬ ve cawˬ leh tuꞈ ve hkanˍ ve gʼa hpuˇ htaˇ kaꞈ yawˇ mawˬ ve yoˬ. (Chiˇ mvuh ve 37:18) Ngaˬ hui nyi ma luˬ jaˇ tuˬ te laˇ ve awˬ lawn gʼa hpuˇ ve htawˇ, Yaˬhoˉvaˬ ve kanˉ te tuˬ coˇ caˇ ve htaꞈ yawˇ mawˬ ve yoˬ. Chi hkʼe te htaˇ, yawˇ ngaˬ hui htaꞈ nyi hkʼaˇ suh jaˇ ve yoˬ! Leuˉ leh kʼo, yawˇ ngaˬ hui htaꞈ ga laˇ leh awˬ gʼaˇ peꞈ laˇ tuˬ gu hehnˇ taˍ ve yoˬ.
2. Nyi ma luˬ chehˇ ve chaw hui htaꞈ Yaˬhoˉvaˬ hkʼaˬ hkʼe haꞈ shaˉ piˇ ve le? Leh Yaˬhoˉvaˬ haꞈ shaˉ laˇ ve htaꞈ ngaˬ hui gʼa tuˬ hkʼaˬ hkʼe gʼa te cawˇ ve le?
2 Chiˇ mvuh ve liꞈ 147:3 hkʼaw Yaˬhoˉvaˬ lehˬ ‘nyi ma luˬ chehˇ ve chaw hui htaꞈ naˬ kuiˬ lo peh piˇ chehˇ ve yoˬ.’ Nyi ma luˬ chehˇ ve chaw hui htaꞈ Yaˬhoˉvaˬ haꞈ shaˉ piˇ ve awˬ hkʼaˇ, Liꞈ hpu chi ve teˇ tawn ngaˬ hui mawˬ tuˬ ga laˇ ve yoˬ. Yaꞈ hkʼaˇ, Yaˬhoˉvaˬ haꞈ shaˉ laˇ ve htaꞈ ngaˬ hui gʼa tuˬ hkʼaˬ hkʼe gʼa te cawˇ ve le? Naˬ ve chaw htaꞈ saˍ laꞈ gʼonˍ cheuˬ jaˇ ve haꞈ shaˉ piˇ ve awˬ lawn htaꞈ dawˇ nyi sheˍ. Saˍ laꞈ gʼonˍ hkʼaˬ hkʼe taw cheuˬ ve htawˇ, naˬ ve chaw na˗e la tuˬ, saˍ laꞈ gʼonˍ beˆ maˍ piˇ ve htaꞈ yawˇ gʼa gʼaꞈ te ve yoˬ. Nyi ma luˬ chehˇ ve chaw htaꞈ ga laˇ tuˬ, Liꞈ hpu hkʼaw Yaˬhoˉvaˬ aˬ htoꞈ ma beˆ maˍ laˇ taˍ ve, awˬ lawn chi ve hkʼaw teˇ geh henˇ tuˬ yoˬ. Leh yawˇ beˆ maˍ laˇ ve htaꞈ ngaˬ hui hkʼaˬ hkʼe gʼaꞈ te gʼa tuˬ kaꞈ teˇ geh henˇ tuˬ yoˬ.
NGAˬ HUI AWˬ HPFUHˇ CAWˬ VE TEHꞈ YAˬHOˉVAˬ SHAWˍ LAˇ VE
3. Aˬ htoꞈ ma te chaw teˇ hpaˍ yawˇ awˬ to awˬ hpfuhˇ maˇ cawˬ ve tehꞈ dawˇ ve le?
3 Miˬ guiˬ hkʼoˆ lo haꞈ ve tehꞈ maˇ hpeuꞈ maw piˇ ve chaw hui geh ngaˬ hui chehˇ ve yoˬ. Hkʼe te leh, chaw laiˉ gʼaˇ yawˇ awˬ to awˬ hpfuhˇ maˇ cawˬ ve tehꞈ dawˇ ve yoˬ. Awˬ viˉ awˬ nyi yaˇ miˇ teˇ gʼaˇ Heh˗ren a kʼoˆ ve, “ngaˬ ve yehˬ kʼa maˇ haꞈ daꞈ ve geh ngaˬ uiˍ la ve yoˬ. Ngaˬ pa hehnˇ ve awˬ ceuˬ te leh yehˬ kʼa hkʼaw ve chaw tcuhˉ kuiˬ maˇ cawˬ leh awˬ bon maˇ cawˬ ve tehꞈ teˇ gʼaˇ le le htaꞈ kʼoˆ deˇ laˇ ve yoˬ.” Teˇ pawˆ pawˆ kʼo, nawˬ kaꞈ Heh˗ren hkʼa shuˍ gʼa hpuˇ ve yoˬ hehˉ. Nawˬ htaꞈ shu haiˬ ve awˬ ceuˬ te laˇ ve, teˇ hkui teˇ hkui deˇ laˇ ve, maˇ heˆ leh nawˬ awˬ to awˬ hpfuhˇ maˇ cawˬ ve tehꞈ shawˍ tuˬ te laˇ ve yoˬ. Chi hkʼe hpehꞈ ve kʼo, nawˬ htaꞈ haꞈ ve chaw cawˬ ve tehꞈ yonˍ gʼa tuˬ haˍ jaˇ ve yoˬ.
4. Chiˇ mvuh ve liꞈ 34:18 hkʼaw kʼoˆ taˍ ve hkʼe, Yaˬhoˉvaˬ ngaˬ hui htaꞈ aˬ htoꞈ ma ka tiꞈ te taˍ laˇ ve le?
4 Awˬ nu ve chaw nawˬ htaꞈ haiˬ ve awˬ ceuˬ te laˇ ve htawˇ, Yaˬhoˉvaˬ nawˬ htaꞈ haꞈ leh nawˬ awˬ hpfuhˇ cawˬ ve tehꞈ shawˍ ve yonˍ gʼa ve yoˬ. Yaˬhoˉvaˬ lehˬ “nyi ma luˬ chehˇ ve chaw hui awˬ paˇ neˇ lo chehˇ taˍ ve yoˬ.” (Chiˇ mvuh ve 34:18 gʼaw sheˍ.) Nawˬ “dawˇ law kuiˬ maˇ cawˬ ve chaw” hpehꞈ ve kʼo, Yaˬhoˉvaˬ nawˬ awˬ to hkʼaw daꞈ ve awˬ ceuˬ htaꞈ nyi mawˬ leh nawˬ yawˇ geh laˬ tuˬ yawˇ gʼawˬ veu laˇ ve tehꞈ tawnˇ taˍ sheˍ. (Yoˇhanˬ 6:44) Nawˬ Yaˬhoˉvaˬ awˬ pon awˬ hpfuhˇ hkʼaˆ jaˇ ve pa taw, yawˇ hkʼaˬ htaˆ kaꞈ nawˬ htaꞈ ga laˇ gaˇ ve yoˬ.
5. Shu nyi chaˬ piˇ ve chaw htaꞈ Yeˍsuˆ te piˇ ve awˬ hkʼaˇ ngaˬ hui aˬ htoꞈ ma henˇ yuˬ gʼa ve le?
5 Yeˍsuˆ ve awˬ lawn Yaˬhoˉvaˬ hkʼaˬ hkʼe dawˇ ve htaꞈ ngaˬ hui mawˬ tuˬ te laˇ ve yoˬ. Yeˍsuˆ miˬ guiˬ hkʼoˆ lo a shaꞈ teꞈ chehˇ htaˇ, shu nyi cha piˇ ve chaw htaꞈ Yeˍsuˆ chaˬ nyi leh yawˇ hui htaꞈ Yeˍsuˆ ha kʼaˉ ve hkʼaw ga piˇ ve yoˬ. (Maꞈhtehˍ 9:9-12) Yaˇ miˇ teˇ gʼaˇ naˬ jaˇ leh shu gu na˗e piˇ maˇ gʼa ve yoˬ. Yawˇ naˬ chehˇ ve na˗e la tuˬ tehꞈ dawˇ ve pa taw, Yeˍsuˆ aˉ poꞈ awˬ caˍ meuˇ lo yawˇ htawˇ ve yoˬ. Oˇ ve teˇ yanˇ yawˇ yonˍ ve htaꞈ Yeˍsuˆ awˬ gʼaˇ piˇ leh chiˇ mvuh piˇ ve yoˬ. (Maˍkuˆ 5:25-34) Yeˍsuˆ yawˇ ve Awˬ pa htaꞈ hkʼa dehꞈ henˇ yuˬ gʼa ve yoˬ. (Yoˇhanˬ 14:9) Chi htaꞈ pa taw, Yaˬhoˉvaˬ lehˬ nawˬ yawˇ awˬ pon awˬ hpfuhˇ cawˬ ve tehꞈ shawˍ ve yonˍ gʼa leh, nawˬ ve yonˍ hkʼaˇ leh nawˬ yawˇ htaꞈ haꞈ ve cawˬ ve kaꞈ yawˇ mawˬ gʼa ve yoˬ.
6. Nawˬ awˬ to awˬ hpfuhˇ maˇ cawˬ ve tehꞈ dawˇ ve kʼo, hkʼaˬ hkʼe te cawˇ ve le?
6 Nawˬ awˬ to awˬ hpfuhˇ maˇ cawˬ ve tehꞈ hkʼaˬ htaˆ kaꞈ dawˇ chehˇ ve kʼo, hkʼaˬ hkʼe te cawˇ ve le? Nawˬ Yaˬhoˉvaˬ mehˆ gʼuˇ suhˍ awˬ hpfuhˇ cawˬ ve tehꞈ yonˍ gʼa tuˬ ga laˇ gʼa ve, Liꞈ hpu hkʼaw nawˬ gʼaw leh, awˬ tawn oˇ ve htaꞈ hkʼa dehꞈ dawˇ nyi sheˍ. b (Chiˇ mvuh ve 94:19) Nawˬ dawˇ teh taˍ ve hkʼe gʼaꞈ te maˇ gʼa sheˍ ve kʼo, shu hkʼe leˇ te maˇ gʼa tehꞈ dawˇ ve pa taw, awˬ gʼaˇ nuˇ ve yoˬ. Chi hkʼe hpehꞈ htaˇ, a shu yawˇ awˬ to htaꞈ taˇ taˍ nehˍ. Awˬ lawn kʼo, nawˬ te maˇ gʼa ve awˬ leuˉ Yaˬhoˉvaˬ maˇ te tcuh laˇ ve yoˬ. (Chiˇ mvuh ve 103:13, 14) Oˇ htaˇ nawˬ htaꞈ shu haiˬ ve awˬ ceuˬ te laˇ ve kʼo, nawˬ te yaꞈ ve pa taw chi hkʼe gʼa hpuˇ ve tehꞈ nawˬ awˬ to htaꞈ tiˉ venˇ baˆ maˇ taˍ cawˇ ve yoˬ. Awˬ tehˬ kʼo, a shu teˇ gʼaˇ kaꞈ chi hkʼe ve yawˇ awˬ to htaꞈ maˇ te gaˇ. Yaˬhoˉvaˬ lehˬ te yaꞈ ve chaw htaꞈ suhˉ jehˬ piˇ tuˬ yoˬ tehꞈ tawnˇ taˍ sheˍ. Maˇ te yaꞈ ve chaw htaꞈ suhˉ jehˬ piˇ tuˬ ve maˇ heˆ. (1 Peˍtruˆ 3:12) Shen˗daˇ yaˇ ehˉ htaˇ kaꞈ shu haiˬ ve awˬ ceuˬ te piˇ ve yoˬ. Yawˇ kʼoˆ ve, “Yaˬhoˉvaˬ ngaˬ htaꞈ ga laˇ tuˬ hkʼaˬ htaˆ kaꞈ bon lawˬ ve yoˬ. Yaˬhoˉvaˬ ngaˬ htaꞈ nyi ve hkʼe, ngaˬ kaꞈ ngaˬ awˬ to htaꞈ daꞈ ve awˬ ceuˬ nyi mawˬ tuˬ, yawˇ ga laˇ tuˬ bon lawˬ ve yoˬ.”
7. Peuˬ laˬ htaˇ gʼa hpuˇ jaw ve awˬ lawn Gʼuiˬ sha ve kanˉ te ve hkʼaw awˬ bon hkʼaˬ hkʼe cawˬ ve le?
7 Nawˬ awˬ to awˬ hpfuhˇ maˇ cawˬ ve tehꞈ taˇ dawˇ. Yaˬhoˉvaˬ lehˬ nawˬ shu htaꞈ ga piˇ tuˬ yawˇ yehˇ ve yoˬ. Yawˇ nawˬ htaꞈ yawˆ yan laˇ ve lehˬ, nawˬ yawˇ geh hto toˇ ve kanˉ teˇ geh te ve awˬ chawˇ tehꞈ shawˍ laˇ ve yoˬ. (1 Kawˇrenˍhtuˆ 3:9) Nawˬ shoꞈ shaꞈ ve gʼa hpuˇ leh nawˬ a shaꞈ teꞈ kuiˬ hkʼaw tuꞈ ve hkanˍ ve gʼa hpuˇ ve pa taw, nawˬ shu htaꞈ ha kʼaˉ ve na gʼa ve, leh hkʼa dehꞈ ga piˇ gʼa tuˬ te laˇ ve yoˬ. Heh˗ren yawˇ htaꞈ ga laˇ jaw ve awˬ lawn kʼawꞈ kʼoˆ maˍ laˇ ve yoˬ. Yaꞈ hkʼaˇ, chi teˇ hkui yawˇ shu htaꞈ ga piˇ gʼa˗oˬ. Yawˇ kʼoˆ ve, “Yaˬhoˉvaˬ ga laˇ ve pa taw, a shu yawˇ awˬ to awˬ hpfuhˇ maˇ cawˬ tehꞈ dawˇ leh ngaˬ hkʼe leˇ shu haꞈ laˇ ve maˇ cawˬ tehꞈ dawˇ ve chaw htaꞈ chi teˇ hkui shu htaꞈ ga piˇ gʼa˗oˬ.” Heh˗ren hkʼaˬ htaˆ kaꞈ gʼuˇ suhˍ peuˍ ve te leh ha lehˬ jaˇ ve yoˬ.
YAˬHOˉVAˬ VENˇ BAˆ HPEHˇ LAˇ VE HTAꞈ NGAˬ HUI HAꞈ YUˬ TCUH GAˇ VE
8. Iˉsaˍyaˆ liꞈ 1:18 hkʼaw Yaˬhoˉvaˬ ka tiꞈ te taˍ laˇ ve htaꞈ ngaˬ hui aˬ htoꞈ ma mawˬ ve le?
8 Yaˬhoˉvaˬ ve kanˉ te ve chaw Baˆteˆsaˬ maˇ haꞈ yuˬ sheˍ htaˇ leh haꞈ yuˬ peuˬ hkʼawꞈ nawˉ kaꞈ, peuˬ laˬ htaˇ yawˇ hui te yaꞈ jaw ve awˬ ceuˬ htaꞈ nyi ma luˬ chehˇ sheˍ ve yoˬ. Yaꞈ hkʼaˇ, Yaˬhoˉvaˬ ngaˬ hui htaꞈ haꞈ jaˇ ve pa taw, htaiˍ hkʼawꞈ ve cawˬ tcuh laˇ ve tehꞈ tawnˇ taˍ sheˍ. Leh Yaˬhoˉvaˬ kaꞈ laꞈ shawnˍ chi ve ngaˬ hui htaꞈ gʼa tcuh gaˇ ve yoˬ. Yaˬhoˉvaˬ ngaˬ hui htaꞈ ka tiꞈ te laˇ ve, ngaˬ hui yawˇ geh “laˬ” c leh cawˇ daꞈ hawˍ daꞈ peuˬ hkʼawꞈ nawˉ, ngaˬ hui te yaꞈ jaw ve awˬ ceuˬ htaꞈ yawˇ maˇ tawnˇ taˍ˗o ve yoˬ. (Iˉsaˍyaˆ 1:18 gʼaw sheˍ.) Yaˬhoˉvaˬ ngaˬ hui htaꞈ haꞈ leh venˇ baˆ hpehˇ laˇ ve, ngaˬ hui te yaꞈ jaw ve awˬ ceuˬ htaꞈ yawˇ maˇ tawnˇ taˍ ve, chi yawˇ htaꞈ awˬ bon uiˍ jaˇ ve yoˬ! Chi hkʼoˆ kaꞈ, ngaˬ hui yawˇ awˬ pon daꞈ ve awˬ ceuˬ te piˇ ve kaꞈ yawˇ maˇ leunˇ ve yoˬ.—Chiˇ mvuh ve 103:9, 12; Heˍbrehˇ 6:10.
9. Peuˬ laˬ htaˇ ngaˬ hui te yaꞈ jaw ve venˇ baˆ htaꞈ aˬ htoꞈ ma te maˇ dawˇ nyi cawˇ ve le?
9 Peuˬ laˬ htaˇ nawˬ te yaꞈ jaw ve awˬ ceuˬ htaꞈ pa taw, nawˬ nyi ma luˬ chehˇ ve kʼo, chi teˇ hkui nawˬ te chehˇ ve awˬ ceuˬ htaꞈ hkʼa dehꞈ dawˇ nyi sheˍ. Peuˬ laˬ htaˇ te jaw ve awˬ ceuˬ htaꞈ dawˇ nyi ve aꞈ kehˉ, awˬ gʼuˇ suhˍ hpawˇ te tuˬ ve awˬ ceuˬ htaꞈ dawˇ nyi sheˍ. Tcuh yaˇ Pawˇluꞈ ve awˬ lawn htaꞈ teˇ geh nyi sheˍ. Pawˇluꞈ yawˇ Hkriꞈ yaˇ htaꞈ fawˉ mehˍ piˇ jaw ve awˬ lawn htaꞈ nyi ma luˬ jaˇ ve yoˬ. Yaꞈ hkʼaˇ, Yaˬhoˉvaˬ yawˇ htaꞈ venˇ baˆ hpehˇ laˇ˗oˬ ve tehꞈ yawˇ shiˍ ve yoˬ. (1 Tiˆmoˉseˍ 1:12-15) Pawˇluꞈ yawˇ te jaw ve venˇ baˆ htaꞈ ceh tiˉ dawˇ nyi chehˇ˗aw laˇ? Maˇ dawˇ nyi. Yawˇ Hpaˍriˍsehˇ chaw hpehꞈ htaˇ te gʼa jaw ve awˬ ceuˬ htaꞈ maˇ dawˇ nyi˗o ve hkʼe, yawˇ te yaꞈ jaw ve awˬ ceuˬ htaꞈ kaꞈ maˇ dawˇ nyi˗o ve yoˬ. (Hpiˇliˇpiˆ 3:4-8, 13-15) Chi hkʼe dawˇ nyi ve aꞈ kehˉ Pawˇluꞈ Yaˬhoˉvaˬ ve kanˉ kaiˬ ve hkʼaw te leh, awˬ gʼuˇ suhˍ hpawˇ ve awˬ ceuˬ htaꞈ dawˇ nyi ve yoˬ. Nawˬ kaꞈ Pawˇluꞈ hkʼa shuˍ te gʼa ve yoˬ. Nawˬ peuˬ laˬ htaˇ ve awˬ ceuˬ htaꞈ pa piˇ maˇ gʼa ve htawˇ, chi teˇ hkui nawˬ Yaˬhoˉvaˬ htaꞈ chiˇ mvuh gʼa leh yawˇ ha lehˬ tuˬ te piˇ gʼa ve yoˬ. Yaˬhoˉvaˬ lehˬ awˬ gʼuˇ suhˍ hpawˇ nawˬ htaꞈ daꞈ ve awˬ ceuˬ peꞈ laˇ tuˬ yoˬ tehꞈ ka tiꞈ te taˍ laˇ ve htaꞈ dawˇ nyi sheˍ.
10. Nawˬ shu nyi ma naˬ tuˬ te piˇ jaw ve kʼo, nawˬ aˬ htoꞈ ma te gʼa sheˍ ve le?
10 Peuˬ laˬ htaˇ nawˬ awˬ nu ve chaw nyi ma luˬ tuˬ te piˇ jaw ve awˬ ceuˬ htaꞈ nyi ma luˬ ve yoˬ hehˉ. Hkʼe kʼo nawˬ htaꞈ aˬ htoꞈ ma ga laˇ gʼa tuˬ le? Chaw oˇ ve teˇ gʼaˇ htaꞈ lawˬ hkawˉ piˇ leh meuˆ daꞈ tuˬ coˇ caˇ leh te sheˍ. (2 Kawˇrenˍhtuˆ 7:11) Nawˬ te ve awˬ ceuˬ htaꞈ pa taw, nyi ma luˬ chehˇ ve chaw htaꞈ Yaˬhoˉvaˬ ga piˇ tuˬ bon lawˬ sheˍ. Yaˬhoˉvaˬ nawˬ htaꞈ kaꞈ ga laˇ leh yawˇ dawˇ sha gawˬ lehˍ ve kʼawꞈ cawˬ leh Yaˬhoˉvaˬ ve kanˉ caˉ leh te gʼa tuˬ nawˬ bon lawˬ piˇ sheˍ.
11. Tcuh kaˍ paˍ Yoˇnaˆ ve awˬ lawn ngaˬ hui htaꞈ aˬ htoꞈ ma maˍ laˇ ve le? (Awˬ htaꞈ hpawˇ ve awˬ han htaꞈ nyi sheˍ.)
11 Nawˬ a shu yawˇ awˬ to te yaꞈ jaw ve awˬ ceuˬ maˍ laˇ tcuh leh, aˬ htoꞈ ma awˬ lawn hpehꞈ ve htawˇ maˇ kʼoˆ, Yaˬhoˉvaˬ ga laˇ tcuh sheˍ. Tcuh kaˍ paˍ Yoˇnaˆ ve awˬ lawn htaꞈ teˇ geh nyi sheˍ. Yaˬhoˉvaˬ lehˬ Yoˇnaˆ htaꞈ Niˇnaˍveˍ venˇ lo bon maˍ˗e tcuh ve yoˬ. Yaꞈ hkʼaˇ, yawˇ teˇ hpawˇ lo hpaw˗e ve yoˬ. Hkʼe te leh, Yaˬhoˉvaˬ Yoˇnaˆ htaꞈ maˍ piˇ leh yawˇ te yaꞈ jaw ve awˬ ceuˬ kaꞈ yawˇ htaꞈ maˍ laˇ tcuh ve yoˬ. (Yoˇnaˆ 1:1-4, 15-17; 2:7-10) Yaˬhoˉvaˬ lehˬ Yoˇnaˆ htaꞈ dawˇ law chehˇ sheˍ. Yoˇnaˆ Niˇnaˍveˍ venˇ lo kʼawꞈ kʼai tuˬ, Yaˬhoˉvaˬ yawˇ htaꞈ awˬ yanˇ teˇ pawˆ kʼawꞈ piˇ leh chi teˇ pawˆ lehˬ Yoˇnaˆ Yaˬhoˉvaˬ ve hkawˇ laꞈ haˉ na yuˬ ve yoˬ. Yoˇnaˆ yawˇ te yaꞈ jaw ve awˬ ceuˬ htaꞈ ceh tiˉ nyi ma maˇ luˬ chehˇ leh, Yaˬhoˉvaˬ yawˇ htaꞈ awˬ vuiˬ piˇ ve htaꞈ kaꞈ maˇ haꞈ yuˬ ve maˇ te.—Yoˇnaˆ 3:1-3
Yaˬhoˉvaˬ tcuh kaˍ paˍ Yoˇnaˆ htaꞈ ga piˇ leh ngaˇ lonˉ gʼoˇ peꞈ hkʼaw tawˆ la peuˬ hkʼawꞈ nawˉ, Yoˇnaˆ Niˇnaˍveˍ venˇ lo kʼai tuˬ yawˇ teˇ pawˆ kʼawꞈ kʼoˆ piˇ leh yawˇ ve awˬ lawn bon maˍ tcuh ve (Awˬ tawn 11 nyi sheˍ)
YAˬHOˉVAˬ NGAˬ HUI HTAꞈ AWˬ GʼAˇ PEꞈ LAˇ TUˬ DAꞈ KEHˬ VE AWˬ HA HPU HTAꞈ CUˇ VE
12. Ngaˬ hui nyi ma luˬ ve maˇ heˆ leh haꞈ ve chaw suh˗e htaˇ Yaˬhoˉvaˬ ngaˬ hui htaꞈ dawˇ sha gaˇ sha ve hkʼaˬ hkʼe peꞈ laˇ ve le? (Hpiˇliˇpiˆ 4:6, 7)
12 Ngaˬ hui nyi ma luˬ htaˇ maˇ heˆ leh haꞈ ve chaw suh˗e htaˇ, awˬ gʼaˇ peꞈ laˇ tuˬ Yaˬhoˉvaˬ daꞈ kehˬ ve awˬ ha hpu htaꞈ cuˇ ve yoˬ. Lawn leh Hkeh˗law ve awˬ lawn htaꞈ teˇ geh nyi sheˍ. Yawˇ hui ve yaˇ paˍ yawˇ awˬ to yawˇ tiˇ pehˍ ve yoˬ. Lawn leh Hkeh˗law kʼoˆ ve, “ngaˬ huiˉ maˬ tuꞈ ve hkanˍ ve gʼa hpuˇ jaw ve yoˬ. Yaꞈ hkʼaˇ, oˇ ve teˇ pawˆ ngaˬ hui awˬ pon haꞈ yuˬ tuˬ haˍ jaˇ. Hkʼe te leh, ngaˬ hui zuhꞈ muiˉ maˇ k’a ve teˇ haˉ htaˇ, bon lawˬ ve yoˬ. Hpiˇliˇpiˆ liꞈ 4:6, 7 hkʼaw kʼoˆ taˍ ve hkʼe, ngaˬ hui dawˇ sha gaˇ sha ve cawˬ ve yoˬ. (Gʼaw sheˍ.) Nyi ma luˬ jaˇ tuˬ te laˇ ve awˬ lawn gʼa hpuˇ htaˇ, nyi ma hkʼaw cawˬ ve awˬ ceuˬ bon lawˬ ve hkʼaw Yaˬhoˉvaˬ htaꞈ kʼoˆ piˇ leh nawˬ bon lawˬ htaˇ hkʼaˬ hkʼe taw maˇ heˆ leh hkʼaˬ hkʼe maw lawˬ gaˇ kaꞈ gʼa ve yoˬ. (Chiˇ mvuh ve 86:3; 88:1) Yaˬhoˉvaˬ nawˬ htaꞈ caˉ leh daꞈ kehˬ ve awˬ ha hpu peꞈ laˇ tuˬ lawˬ leh nawˬ lawˬ ve hkʼe yawˇ peꞈ laˇ tuˬ yoˬ.—Luˉkaꞈ 11:9-13.
13. Yaˬhoˉvaˬ ve kanˉ ka tiꞈ yeˬ ve hkʼaw caˉ leh te tuˬ daꞈ kehˬ ve awˬ ha hpu hkʼaˬ hkʼe ga laˇ ve le? (Eˇfeˇsuꞈ 3:16)
13 Nawˬ shoꞈ shaꞈ ve awˬ lawn gʼa hpuˇ jaˇ leh awˬ gʼaˇ maˇ cawˬ tuˬ te laˇ jaw˗aw laˇ? Yaˬhoˉvaˬ ve kanˉ ka tiꞈ yeˬ ve hkʼaw caˉ leh te gʼa tuˬ daꞈ kehˬ ve awˬ ha hpu yawˇ nawˬ htaꞈ peꞈ laˇ gʼa ve yoˬ. (Eˇfeˇsuꞈ 3:16 gʼaw sheˍ.) Awˬ viˉ awˬ nyi yaˇ miˇ teˇ gʼaˇ Hpaw˗laˇ meh ve awˬ lawn htaꞈ teˇ geh nyi sheˍ. Yawˇ leh awˬ hpawˇ Miˍshenˍnaˍliˍ teˇ geh te ve yoˬ. Yaꞈ hkʼaˇ, awˬ hpawˇ haˉ chawˇ haˉ paˆ te leh yawˇ huiˉ maˬ baˬ daꞈ ve yoˬ. Yawˇ kʼoˆ ve, “ngaˬ hpawˇ ngaˬ htaꞈ hpfuhˆ laˇ ve pa taw, ngaˬ nyi ma luˬ jaˇ. Hkʼe te leh, ngaˬ teꞈ chiˉ kaꞈ dawˇ maˇ gʼa. Ngaˬ yeunˇ hkanˍ gʼaˇ tuˬ Yaˬhoˉvaˬ daꞈ kehˬ ve awˬ ha hpu ga laˇ tuˬ lawˬ ve yoˬ. Yawˇ ngaˬ htaꞈ awˬ gʼaˇ peꞈ laˇ leh ngaˬ gʼa hpuˇ ve shoꞈ shaꞈ ve awˬ lawn awˉ lawˉ htaˇ nyi˗a kʼo, yeunˇ hkanˍ maˇ gʼaˇ tehꞈ dawˇ ve htawˇ, yeunˇ hkanˍ gʼaˇ tuˬ yawˇ ga laˇ ve yoˬ.” Hpaw˗laˇ gʼa hpuˇ ve shoꞈ shaꞈ ve teˇ hpaˍ htaꞈ yeunˇ hkanˍ gʼaˇ tuˬ, Yaˬhoˉvaˬ ga laˇ ve tehꞈ yonˍ gʼa tuˬ te laˇ ve yoˬ. Yawˇ kʼawꞈ kʼoˆ ve, “Chiˇ mvuh ve liꞈ 119:32 hkʼaw ngaˬ ve a shaꞈ teꞈ hkʼaˇ htaꞈ hawˍ daꞈ jaˇ. Chi ve teˇ tawn hkʼaw kʼoˆ ve, ‘nawˬ ngaˬ htaꞈ shiˍ puiˉ ve nyi ma piˇ laˇ tuˬ ve pa taw, nawˬ ve awˬ liˇ tawˇ hkawˇ teˇ hpaˍ htaꞈ ngaˬ hkʼa dehꞈ na yuˬ tuˬ yoˬ.’”
14. Yaˬhoˉvaˬ ve daꞈ kehˬ ve awˬ ha hpu ngaˬ hui ve awˬ to hkʼaw kanˉ hkʼaˬ hkʼe te tcuh gʼa ve le?
14 Nawˬ daꞈ kehˬ ve awˬ ha hpu gʼa tuˬ lawˬ peuˬ hkʼaw nawˉ, nawˬ hkʼaˬ hkʼe te cawˇ ve le? Daꞈ kehˬ ve awˬ ha hpu nawˬ awˬ to hkʼaw kanˉ te laˇ gʼa tuˬ ve awˬ ceuˬ teˇ hpaˍ htaꞈ te sheˍ. Tawˇ pa haˉ te kʼo, hpawnˬ daꞈ˗e ve, hto toˇ˗e ve, leh nawˬ Yaˬhoˉvaˬ dawˇ ve hkʼe dawˇ tuˬ ga laˇ gʼa ve, teˇ nyi le le Liꞈ hpu gʼaw sheˍ. (Hpiˇliˇpiˆ 4:8, 9) Nawˬ Liꞈ hpu gʼaw htaˇ, Liꞈ hpu hkʼaw oˇ htaˇ teˇ co˗e ve chaw yawˇ hui hkʼaˬ hkʼe gʼa hpuˇ ve htaꞈ chaˬ nyi leh, yawˇ hui shoꞈ shaꞈ ve htaꞈ hkʼaˬ hkʼe te yeunˇ hkanˍ gʼaˇ tuˬ, Yaˬhoˉvaˬ ga piˇ ve htaꞈ kaꞈ chaˬ nyi sheˍ. Shen˗daˇ shoꞈ shaꞈ ve laiˉ ceuˬ gʼa hpuˇ ve awˬ lawn htaꞈ kʼoˆ maˍ laˇ ve yoˬ. Yawˇ kʼoˆ ve, “Yoˇsehꞈ ve awˬ lawn ngaˬ htaꞈ awˬ gʼaˇ peꞈ laˇ jaˇ. Yoˇsehꞈ yawˇ gʼa hpuˇ ve shoꞈ shaꞈ ve awˬ lawn, maˇ heˆ leh maˇ hteˇ maˇ cawˇ ve yawˇ Yaˬhoˉvaˬ geh maˇ meuˆ daꞈ tuˬ maˇ te laˇ tcuh.”—Awˬ hkuiˉ puiˍ 39:21-23.
YAˬHOˉVAˬ NGAˬ HUI HTAꞈ AWˬ GʼAˇ PEꞈ LAˇ TUˬ AWˬ VIˉ AWˬ NYI HTAꞈ CUˇ VE
15. Ngaˬ hui a shu geh awˬ gʼaˇ gʼa tuˬ le? Leh yawˇ hui ngaˬ hui htaꞈ hkʼaˬ hkʼe ga laˇ tuˬ le? (Awˬ han htaꞈ nyi sheˍ.)
15 Ngaˬ hui shoꞈ shaꞈ ve htaꞈ gʼa yeunˇ hkanˍ jaˇ htaˇ, awˬ viˉ awˬ nyi ngaˬ hui ‘maˇ maˇ dawˇ sha la tuˬ awˬ gʼaˇ peꞈ laˇ ve yoˬ.’ (Kawˇlawˇsehˇ 4:11) Yaˬhoˉvaˬ ngaˬ hui htaꞈ haꞈ ve tehꞈ hpeuꞈ maw laˇ tuˬ, yawˇ awˬ viˉ awˬ nyi htaꞈ cuˇ ve yoˬ. Yawˇ hui ngaˬ hui htaꞈ awˬ gʼaˇ peꞈ laˇ ve lehˬ, ha kʼaˉ ve hkʼaw ngaˬ hui hkawˇ na laˇ ve, leh ngaˬ hui geh awˬ chawˇ te laˇ ve yoˬ. Yawˇ hui ngaˬ hui htaꞈ awˬ gʼaˇ peꞈ laˇ ve lehˬ, Liꞈ hpu awˬ tawn awˬ gʼaˇ peꞈ laˇ ve, maˇ heˆ leh ngaˬ hui geh teˇ geh bon lawˬ laˇ ve yoˬ. d (Roˉmaꞈ 15:4) Awˬ lawn teˇ hpaˍ htaꞈ Yaˬhoˉvaˬ hkʼaˬ hkʼe dawˇ ve ngaˬ hui maˇ leunˇ tuˬ awˬ viˉ awˬ nyi ga laˇ ve yoˬ. Chi ve ngaˬ hui keunˍ lawꞈ cawˇ lawꞈ ve dawˇ hkʼaˇ cawˬ tuˬ ga laˇ ve yoˬ. Ngaˬ hui nyi ma luˬ htaˇ, awˬ viˉ awˬ nyi ngaˬ hui htaꞈ ga laˇ ve lehˬ, caˇ tuˬ te laˇ ve yoˬ.
Co ha hpawˇ ve awˬ chawˇ yonˍ gʼa ve awˬ gʼaˇ peꞈ laˇ gʼa ve, leh nawˬ htaꞈ ga laˇ gʼa ve (Awˬ tawn 15 nyi sheˍ)
16. Awˬ nu ve chaw ga laˇ ve htaꞈ gʼa tuˬ ngaˬ hui aˬ htoꞈ ma gʼa te cawˇ ve le?
16 Awˬ nu ve chaw ga laˇ ve htaꞈ gʼa tuˬ, teˇ pawˆ pawˆ kʼo, ngaˬ hui yawˇ hui htaꞈ gʼa kʼoˆ piˇ ve yoˬ. Awˬ viˉ awˬ nyi ngaˬ hui htaꞈ haꞈ leh ga laˇ gaˇ ve yoˬ. (Tawˇ naˉ ve 17:17) Yaꞈ hkʼaˇ, ngaˬ hui hkʼaˬ hkʼe dawˇ ve, leh aˬ htoꞈ ma loˍ ve htaꞈ yawˇ hui maˇ shiˍ ve yoˬ hehˉ. (Tawˇ naˉ ve 14:10) Nawˬ nyi ma luˬ ve maˇ heˆ leh dawˇ haˍ jaˇ htaˇ, nawˬ gʼa hpuˇ chehˇ ve awˬ ceuˬ co ha hpawˇ ve awˬ viˉ awˬ nyi htaꞈ kʼoˆ piˇ sheˍ. Yawˇ nawˬ htaꞈ hkʼaˬ hkʼe hpawˇ ga laˇ gʼa tuˬ kaꞈ kʼoˆ piˇ sheˍ. Nawˬ tawˇ yaw daꞈ leh nyi ma sha ve, nyi haꞈ shaˉ paˍ 1 gʼaˇ maˇ heˆ leh 2 gʼaˇ geh yaw daꞈ sheˍ. Awˬ viˉ awˬ nyi yaˇ miˇ teˇ hpaˍ kʼo, co ha hpawˇ ve chaw mawˇ hpehꞈ ve yaˇ miˇ geh yaw daꞈ tuˬ leuˆ gʼa ve yoˬ.
17. Ngaˬ hui awˬ viˉ awˬ nyi awˬ gʼaˇ peꞈ laˇ ve htaꞈ maˇ gʼa tuˬ aˬ htoꞈ ma te laˇ ve le? Leh ngaˬ hui hkʼaˬ hkʼe te cawˇ ve le?
17 Teˇ gʼaˇ tiˉ chi maw maw taˇ chehˇ. Nawˬ nyi ma luˬ htaˇ awˬ nu ve chaw geh maˇ chehˇ gaˇ ve yoˬ. Awˬ viˉ awˬ nyi nawˬ hkʼaˬ hkʼe dawˇ ve htaꞈ maˇ na gʼa laˇ ve, maˇ heˆ leh yawˇ hui nawˬ nyi ma maˇ sha tuˬ tawˇ yaw laˇ ve tehꞈ, chi hkʼe dawˇ ve pa taw yoˬ. (Yaˍkoˆ 3:2) Chi hkʼe hpehꞈ ve htawˇ, awˬ viˉ awˬ nyi geh maˇ chehˇ ve taˇ te. Yaˬhoˉvaˬ yawˇ hui htaꞈ cuˇ leh nawˬ htaꞈ ga laˇ gʼa ve yoˬ. Nyi haꞈ shaˉ paˍ 1 gʼaˇ Ka˗vin meh ve dawˇ maˇ ve a naˍ hpehꞈ ve yoˬ. Yawˇ kʼoˆ ve, “ngaˬ maˇ te gaˇ ve awˬ ceuˬ lehˬ, awˬ nu ve chaw geh tawˇ yaw daꞈ ve yoˬ. Chi hkʼe hpehꞈ ve htawˇ, Ka˗vin awˬ viˉ awˬ nyi geh chehˇ tuˬ coˇ caˇ ve yoˬ.” Leh chi hkʼe te htaˇ, yawˇ nyi ma sha tuˬ te piˇ ve yoˬ. Awˬ viˉ awˬ nyi yaˇ miˇ Eh˗miˇ kʼoˆ ve, “ngaˬ gʼa hpuˇ jaw ve haiˬ ve awˬ ceuˬ ngaˬ shu htaꞈ yonˍ gʼa tuˬ haˍ jaˇ tuˬ te laˇ ve yoˬ. Yaˬhoˉvaˬ te ve hkʼa shuˍ awˬ viˉ awˬ nyi htaꞈ haꞈ leh yonˍ gʼa tuˬ, chi teˇ hkui ngaˬ htaꞈ maˍ laˇ chehˇ ve yoˬ. Awˬ lawn kʼo, chi ve Yaˬhoˉvaˬ ha lehˬ tuˬ te piˇ ve tehꞈ ngaˬ gʼa shiˍ leh ngaˬ kaꞈ ha lehˬ jaˇ tuˬ te laˇ ve yoˬ.”
AWˬ GʼUˇ SUHˍ HPAWˇ VE HTAꞈ CAˉ DAꞈ VE YAˬHOˉVAˬ KA TIꞈ TE TAˍ LAˇ VE NGAˬ HUI HTAꞈ AWˬ GʼAˇ PEꞈ LAˇ VE
18. Ngaˬ hui awˬ gʼuˇ suhˍ hpawˇ ve awˬ ceuˬ aˬ htoꞈ ma htaꞈ law chehˇ ve le? Leh chi teˇ hkui kaꞈ ngaˬ hui aˬ htoꞈ ma htaꞈ te gʼa ve le?
18 Ngaˬ hui awˬ gʼuˇ suhˍ hpawˇ ve htaꞈ yonˍ gʼa ve hkʼaw nyi mawˬ gʼa ve yoˬ. Maˇ maw ve awˬ yanˇ Yaˬhoˉvaˬ ngaˬ hui htaꞈ awˬ to hpawˇ leh nyi ma hpawˇ kaꞈ nyi haꞈ shaˉ laˇ tuˬ yoˬ. (Hpeuꞈ maˍ ve 21:3, 4) Oˇ ve teˇ yanˇ gaˬ kʼo, ngaˬ hui nyi ma luˬ tuˬ te laˇ jaw ve awˬ ceuˬ htaꞈ “kʼawꞈ dawˇ nawˇ tuˬ ve maˇ heˆ.” (Iˉsaˍyaˆ 65:17) Ngaˬ hui gʼa henˇ˗oˬ ve hkʼa shuˍ, ngaˬ hui nyi ma naˬ jaˇ ve htawˇ, Yaˬhoˉvaˬ chi teˇ hkui kaꞈ ‘ngaˬ hui ve naˬ kuiˬ htaꞈ peh laˇ chehˇ ve yoˬ.’ Chi htaꞈ pa taw, Yaˬhoˉvaˬ ngaˬ hui htaꞈ ga laˇ tuˬ gu teh ta laˇ ve awˬ ceuˬ teˇ hpaˍ htaꞈ haꞈ yuˬ sheˍ. Leh “Gʼuiˬ sha nawˬ hui awˬ pon dawˇ nyi puiˉ ve” tehꞈ nawˬ yonˍ gʼa ve yoˬ.—1 Peˍtruˆ 5:7.
KʼA MUIˬ HKAWˇ 7 Yaˬhoˉvaˬ, ngaˬ hui ve awˬ gʼaˇ awˬ shaˉ
a Awˬ lawn chi ve hkʼaw awˬ meh teˇ hpaˍ hpaˍ pa ve.
b Awˇ ceˍ awˇ fa “ Nawˬ awˬ hpfuhˇ cawˬ ve tehꞈ Yaˬhoˉvaˬ shawˍ ve” htaꞈ nyi sheˍ.
c Yaˬhoˉvaˬ geh ‘laˬ tuˬ’ ngaˬ hui awˬ tehˬ awˬ na venˇ baˆ dawˇ hpvuhˆ˗oˬ ve tehꞈ gʼa hpeuꞈ maw piˇ cawˇ ve yoˬ. Yawˇ ngaˬ hui htaꞈ venˇ baˆ hpehˇ laˇ tuˬ lawˬ leh ngaˬ hui maˇ kʼawꞈ te yaꞈ tuˬ kaꞈ lawˬ cawˇ ve yoˬ. Ngaˬ hui venˇ baˆ uiˍ jaˇ ve htaꞈ te yaꞈ puiˉ ve kʼo, Hkriꞈ yaˇ awˬ moˍ hkʼaw nyi haꞈ shaˉ paˍ ga laˇ tuˬ gʼa lawˬ cawˇ ve yoˬ.—Yaˍkoˆ 5:14, 15.
d Hkriꞈ yaˇ a shaꞈ teꞈ hkʼaˇ yehˇ tuˬ ve Liꞈ hpu awˬ tawn liꞈ kʼoˆ hkʼaw “Dawˇ haˍ ve” leh “Awˬ gʼaˇ peꞈ laˇ ve” chi ve hkʼaw hpfuhˆ nyi sheˍ.
