1-2. Yeˍsuˆ ve awˬ laꞈ gʼawˇ 2 gʼaˇ Eˇmawꞈ hkʼaˆ lo kʼai chehˇ htaˇ aˬ htoꞈ ma hpehꞈ la ve le?

 Niˆsanˍ Ha pa 16 nyi 33 hkʼawꞈ C.E. htaˇ, Yeˍsuˆ ve awˬ laꞈ gʼawˇ nyi ma luˬ jaˇ leh dawˇ haˍ jaˇ ve yoˬ. Awˬ laꞈ gʼawˇ 2 gʼaˇ Yeˍruˆsaˍlehnˍ venˇ lo tawˆ˗e leh Eˇmawꞈ hkʼaˆ lo kʼai ve yoˬ. Hkʼaˆ chi ve lehˬ, Yeˍruˆsaˍlehnˍ venˇ htaꞈ 11 kiˇ loˇ hkʼe taw vuiˇ daꞈ ve yoˬ. Awˬ laꞈ gʼawˇ chi ve 2 gʼaˇ awˬ gʼaˇ nuˇ jaˇ ve yoˬ. Awˬ lawn kʼo, yawˇ hui gʼaꞈ yuˬ chehˇ ve Yeˍsuˆ shu tiˇ pehˍ piˇ gehˇ sheˍ ve yoˬ. Meˍsiˉyaꞈ lehˬ, Yuˇdaꞈ chaw htaꞈ daꞈ ve awˬ ceuˬ te laˇ tuˬ yoˬ tehꞈ, yawˇ hui dawˇ law jaw ve yoˬ. Yaꞈ hkʼaˇ, chi teˇ hkui Meˍsiˉyaꞈ suh˗oˬ. Nyi˗a kʼo, yawˇ hui dawˇ law kuiˬ maˇ cawˬ˗o ve htaꞈ shuˍ ve yoˬ. Yaꞈ hkʼaˇ, oˇ ve teˇ yanˇ yawˇ hui anˇ lawꞈ lawꞈ ve awˬ lawn htaꞈ gʼa mawˬ ve yoˬ.

² Maˇ mawˬ jaw ve hawˉ hkʼaˆ teˇ gʼaˇ yawˇ hui geh laˬ leh tawˇ ca yaw la ve yoˬ. Hkʼe te leh, yawˇ hui geh teˇ geh juˇ kʼai ve yoˬ. Yaꞈ kʼaw kʼaˉ lo awˬ laꞈ gʼawˇ 2 gʼaˇ Yeˍsuˆ htaꞈ hkʼaˬ hkʼe hpehꞈ la ve awˬ lawn, yawˇ hui nyi ma hkʼaˬ hkʼe taw luˬ ve hawˉ hkʼaˆ chi ve teˇ gʼaˇ htaꞈ kʼoˆ maˍ piˇ ve yoˬ. Hawˉ hkʼaˆ chi ve teˇ gʼaˇ gʼa kaˇ peuˬ hkʼawꞈ nawˉ, awˬ laꞈ gʼawˇ chi 2 gʼaˇ a shaꞈ teꞈ chehˇ ve teˇ co˗e tawnˇ gʼa tuˬ yawˇ kʼoˆ maˍ piˇ ve yoˬ. Aˬ htoꞈ ma te Meˍsiˉyaꞈ tuꞈ ve hkanˍ ve hkʼaw gʼa suh˗e ve le, leh yawˇ gʼa suh˗e ve lehˬ “Moˉseˍ leh Gʼuiˬ sha ve tcuh kaˍ paˍ hkʼa peu˗eˬ” liꞈ hkʼaw bvuhꞈ taˍ ve kʼoˆ maˍ piˇ ve yoˬ. Yawˇ hui 3 gʼaˇ Eˇmawꞈ hkʼaˆ hkʼaw gaˬ la htaˇ, hawˉ hkʼaˆ chi teˇ gʼaˇ yawˇ awˬ to mawˬ piˇ ve lehˬ, awˬ tehˬ kʼo yawˇ kʼawꞈ teꞈ tu la˗oˬ ve Yeˍsuˆ hpehꞈ ve yoˬ. Awˬ laꞈ gʼawˇ chi 2 gʼaˇ Meˍsiˉyaꞈ a shaꞈ teꞈ chehˇ sheˍ ve htaꞈ yawˇ hui gʼa shiˍ ve ha lehˬ jaˇ ve tehꞈ ngaˬ hui dawˇ nyi sheˍ.—Luˉkaꞈ 24:13-35.

3-4. Yeˍsuˆ ve awˬ laꞈ gʼawˇ hui a shaꞈ teꞈ hkʼaˇ hkʼaˬ hkʼe pa kʼai ve le? Leh awˬ lawn chi ve hkʼaw ngaˬ hui aˬ htoꞈ ma htaꞈ gʼa henˇ tuˬ le? (Tcuh yaˇ 1:3)

³ Yeˍsuˆ mvuhˇ naw ma hkʼoˆ lo maˇ taˆ kʼoˬ˗e sheˍ htaˇ, miˬ guiˬ hkʼoˆ lo 40 nyi chehˇ ve yoˬ. Awˬ yanˇ chi ve htaˇ awˬ laꞈ gʼawˇ hui htaꞈ yawˇ ve awˬ to laiˉ pawˆ mawˬ tcuh leh, yawˇ yawˇ hui htaꞈ awˬ gʼaˇ piˇ ve yoˬ. (Tcuh yaˇ 1:3 gʼaw sheˍ.) Nyi ma luˬ jaˇ leh dawˇ haˍ jaˇ ve awˬ yanˇ  htaˇ, Yeˍsuˆ ve awˬ laꞈ gʼawˇ hui lehˬ yonˍ gʼa ve, ha lehˬ ve, leh Gʼuiˬ sha ve mvuhˇ miˬ daꞈ ve awˬ lawn sha tanˇ haꞈ hanˉ ve hkʼaw bon maˍ ve yoˬ. a

⁴ Yeˍsuˆ awˬ leh meuˇ ve awˬ yanˇ a shaꞈ teꞈ chehˇ ve hkʼaw, ngaˬ hui laiˉ ceuˬ henˇ yuˬ leh awˬ bon gʼa ve yoˬ. Awˬ lawn chi ve hkʼaw Yeˍsuˆ miˬ guiˬ hkʼoˆ lo chehˇ ve awˬ leh meuˇ ve awˬ yanˇ htaˇ, awˬ yanˇ hkʼaˬ hkʼe yehˇ ve ngaˬ hui gʼa mawˬ tuˬ yoˬ. (1) Yawˇ ve awˬ laꞈ gʼawˇ htaꞈ awˬ gʼaˇ piˇ ve, (2) yawˇ hui Liꞈ hpu hkʼaw hkʼa dehꞈ na gʼa tuˬ ga piˇ ve, leh (3) yawˇ hui awˬ gʼuˇ suhˍ hpawˇ ve awˬ vuiˬ htaꞈ hkʼa dehꞈ te gʼa tuˬ kaꞈ maˍ piˇ ve yoˬ. Chi ve 3 lawn ngaˬ hui Yeˍsuˆ htaꞈ hkʼaˬ hkʼe te henˇ yuˬ gʼa tuˬ kaꞈ teˇ geh henˇ tuˬ yoˬ.

SHU HTAꞈ AWˬ GʼAˇ PIˇ VE

5. Aˬ htoꞈ ma te Yeˍsuˆ ve awˬ laꞈ gʼawˇ hui awˬ gʼaˇ gʼa tuˬ loˍ ve le?

⁵ Yeˍsuˆ ve awˬ laꞈ gʼawˇ hui awˬ gʼaˇ gʼa gaˇ ve yoˬ. Aꞈ htoꞈ ma pa taw le? Awˬ lawn kʼo, yawˇ hui teˇ hpaˍ Yeˍsuˆ awˬ hkʼaˇ suh gʼaꞈ kʼai tuˬ, yehˬ gʼa baˬ taˉ ve, yehˬ kʼa htaꞈ gʼa vuiˇ daꞈ ve, leh yawˇ hui kanˉ te caˇ ve htaꞈ kaꞈ gʼa baˬ taˉ ve yoˬ. (Maꞈhtehˍ 19:27) Teˇ hpaˍ kʼo, Yeˍsuˆ ve awˬ laꞈ gʼawˇ hpehꞈ tuˬ leuˆ yuˬ ve pa taw, maˇ hteˇ maˇ cawˇ ve gʼa hpuˇ ve yoˬ. (Yoˇhanˬ 9:22) Awˬ lawn kʼo, Yeˍsuˆ lehˬ Gʼuiˬ sha ka tiꞈ te taˍ laˇ ve Meˍsiˉyaꞈ hpehꞈ ve tehꞈ yawˇ hui yonˍ ve pa taw, yawˇ hui laiˉ ceuˬ yuˬ tanˇ leh gʼa yeunˇ hkanˍ ve yoˬ. (Maꞈhtehˍ 16:16) Hkʼaˬ hkʼe hpehꞈ ve htawˇ, Yeˍsuˆ htaꞈ shu tiˇ pehˍ piˇ htaˇ, yawˇ hui ve dawˇ law kuiˬ maˇ cawˬ˗o leh, chi yawˇ hui awˬ gʼaˇ nuˇ jaˇ tuˬ te piˇ ve yoˬ.

6. Yeˍsuˆ kʼawꞈ teꞈ tu la peuˬ hkʼawꞈ nawˉ yawˇ aˬ htoꞈ ma te ve le?

⁶ Yeˍsuˆ ve awˬ laꞈ gʼawˇ hui nyi ma luˬ jaˇ ve htawˇ, yawˇ hui ve yonˍ hkʼaˇ awˬ gʼaˇ nuˇ ve htaꞈ kʼoˆ gaˇ ve maˇ heˆ tehꞈ, Yeˍsuˆ hkʼa dehꞈ shiˍ ve yoˬ. Maˇ˗awˍ ve kʼo, a shu yawˇ haꞈ ve chaw suh˗e ve lehˬ, nyi ma luˬ jaˇ ve tehꞈ Yeˍsuˆ na gʼa ve yoˬ. Chi htaꞈ pa taw, Yeˍsuˆ kʼawꞈ teꞈ tu la ve awˬ nyi htaˇ, yawˇ ve awˬ chawˇ geh laꞈ haˉ kʼai leh awˬ gʼaˇ piˇ ve yoˬ. Tawˇ pa haˉ te kʼo, Yeˍsuˆ tuˍ hpfuh awˬ gʼuˇ suhˍ lo Maˍriˆ Maˍgaˍdaˍlaˆ hawˬ chehˇ ve htaꞈ yawˇ awˬ to mawˬ tcuh ve yoˬ. (Yoˇhanˬ 20:11, 16) Chi hkʼoˆ kaꞈ, awˬ lawn chi ve hkʼaw gʼa henˇ˗oˬ ve hkʼa shuˍ, awˬ laꞈ gʼawˇ 2 gʼaˇ leh tcuh yaˇ Peˍtruˆ htaꞈ kaꞈ yawˇ awˬ to mawˬ tcuh piˇ ve yoˬ. (Luˉkaꞈ 24:34) Yeˍsuˆ ve awˬ lawn htaꞈ ngaˬ hui aˬ htoꞈ ma gʼa henˇ ve le? Maˍriˆ Maˍgaˍdaˍlaˆ htaꞈ yawˇ awˬ to mawˬ piˇ htaˇ ve awˬ lawn htaꞈ teˇ geh nyi sheˍ.

7. Yoˇhanˬ liꞈ 20:11-16 hkʼaw kʼoˆ taˍ ve hkʼe, Niˆsanˍ Ha pa 16 nyi mvuhˇ shawˉ naꞈ htaˇ, Maˍriˆ aˬ htoꞈ ma te chehˇ ve htaꞈ Yeˍsuˆ gʼa mawˬ ve le? Leh chi Yeˍsuˆ aˬ htoꞈ ma te gaˇ tuˬ te piˇ ve le? (Awˬ han htaꞈ nyi sheˍ.)

 ⁷ Yoˇhanˬ liꞈ 20:11-16 gʼaw sheˍ. Niˆsanˍ Ha pa 16 nyi mvuhˇ shawˉ teˇ naꞈ htaˇ, ka tiꞈ yeˬ ve yaˇ miˇ teˇ moˍ Yeˍsuˆ ve tuˍ hpfuh lo kʼai ve yoˬ. (Luˉkaꞈ 24:1, 10) Yaˇ miˇ 1 gʼaˇ ve awˬ lawn htaꞈ teˇ geh nyi sheˍ. Yawˇ lehˬ Maˍriˆ Maˍgaˍdaˍlaˆ hpehꞈ ve yoˬ. Yawˇ Yeˍsuˆ ve tuˍ hpfuh lo gaˬ la htaˇ, yawˇ Yeˍsuˆ ve awˬ to htaꞈ maˇ mawˬ˗o. Hkʼe te leh, yawˇ haˆ gʼuiˇ kʼai leh Peˍtruˆ leh Yoˇhanˬ htaꞈ kʼoˆ piˇ ve yoˬ. Yawˇ huiˉ maˬ gʼa shiˍ htaˇ, yawˇ hui haˆ ca nyi la leh Maˍriˆ kaꞈ yawˇ hui geh teˇ geh laˬ ve yoˬ. Yeˍsuˆ ve awˬ to maˇ mawˬ˗o ve tehꞈ, yawˇ huiˉ maˬ mehˆ shiˍ hkʼa biˇ gʼa mawˬ peuˬ hkʼawꞈ nawˉ, yawˇ hui kʼoꞈ˗e ve yoˬ. Yaꞈ hkʼaˇ, Maˍriˆ maˇ kʼoꞈ˗e. Yawˇ oˇ kaˬ lo chehˇ leh hawˬ chehˇ sheˍ ve yoˬ. Oˇ ve teˇ yanˇ Yeˍsuˆ yawˇ htaꞈ mawˬ leh nyi chehˇ ve tehꞈ yawˇ maˇ shiˍ ve yoˬ. Maˍriˆ nyi ma hkʼaˬ hkʼe taw luˬ ve htaꞈ Yeˍsuˆ mawˬ leh awˬ gʼaˇ piˇ gaˇ ve yoˬ. Hkʼe te leh, yawˇ awˬ to Maˍriˆ htaꞈ mawˬ tcuh leh teˇ ceuˬ ceuˬ te piˇ ve yoˬ. Chi nyi˗a kʼo, awˬ lawn maˇ uiˍ ve htawˇ, yawˇ awˬ gʼaˇ gʼa jaˇ tuˬ te piˇ ve yoˬ. Yeˍsuˆ yawˇ htaꞈ tawˇ yaw piˇ leh a yeˇ uiˍ ve awˬ vuiˬ yawˇ htaꞈ te tcuh ve yoˬ. Chi ve lehˬ Yeˍsuˆ kʼawꞈ teꞈ tu la˗oˬ ve tehꞈ, awˬ viˉ awˬ nyi htaꞈ ca kʼoˆ piˇ tcuh ve yoˬ.—Yoˇhanˬ 20:17, 18.

8. Ngaˬ hui Yeˍsuˆ htaꞈ hkʼaˬ hkʼe te henˇ yuˬ gʼa tuˬ le?

⁸ Ngaˬ hui Yeˍsuˆ htaꞈ hkʼaˬ hkʼe te henˇ yuˬ gʼa tuˬ le? Ngaˬ hui Yeˍsuˆ htaꞈ henˇ yuˬ gʼa ve awˬ hkʼaˇ lehˬ, awˬ nu ve chaw aˬ htoꞈ ma awˬ lawn gʼa hpuˇ ve htaꞈ chaˬ nyi leh, haꞈ hanˉ ve hkʼaw yawˇ hui htaꞈ awˬ gʼaˇ piˇ ve yoˬ. Ngaˬ hui chi hkʼe te ve kʼo, awˬ viˉ awˬ nyi awˬ gʼaˇ cawˬ leh, Yaˬhoˉvaˬ ve kanˉ caˉ leh te tuˬ ngaˬ hui ga piˇ ve yoˬ. Co˗seh˗lin ve awˬ nyi ma maˇ dawˇ maˇ gaˇ ve awˬ lawn gʼa hpuˇ leh suh˗e ve htaꞈ teˇ geh nyi sheˍ. Yawˇ kʼoˆ ve, “laiˉ ha pa peuˬ kʼai˗o ve htawˇ, ngaˬ nyi ma luˬ chehˇ sheˍ.” Awˬ viˉ awˬ nyi teˇ ca yawˇ yawˇ hui ve aˉ hkʼaw lo laˬ tuˬ jehˬ piˇ ve yoˬ. Yawˇ kʼoˆ maˍ piˇ ve htaꞈ yawˇ huiˉ maˬ a yeˇ te leh hkʼa dehꞈ na taˍ piˇ ve yoˬ. Yawˇ Gʼuiˬ sha awˬ pon awˬ hpfuhˇ hkʼaˆ jaˇ ve tehꞈ yonˍ gʼa tuˬ, yawˇ huiˉ maˬ ga piˇ ve yoˬ. Co˗seh˗lin kʼoˆ ve, “Yaˬhoˉvaˬ awˬ viˉ awˬ nyi chi 2 gʼaˇ htaꞈ yehˇ leh ngaˬ htaꞈ ga laˇ tcuh ve tehꞈ dawˇ ve yoˬ. Laˇ tsuhˇ gʼuiˬ taˆ taˆ yaꞈ yaꞈ te chehˇ ve hkʼaw yawˇ huiˉ maˬ ngaˬ htaꞈ gʼawˬ tawˆ laˇ leh heuˇ shan hpawˇ kawˆ tuˬ maˇ cawˬ ve hkʼaw ciˇ la tuˬ ngaˬ htaꞈ gʼawˬ keu laˇ ve htaꞈ shuˍ ve yoˬ. Ngaˬ awˬ gʼaˇ cawˬ leh Yaˬhoˉvaˬ ve kanˉ teˇ pawˆ kʼawꞈ te tuˬ yawˇ huiˉ maˬ ga laˇ ve yoˬ.” Ngaˬ hui kaꞈ shu htaꞈ awˬ gʼaˇ piˇ gʼa ve lehˬ, yawˇ hui nyi ma hkʼaw cawˬ ve awˬ ceuˬ kʼoˆ maˍ laˇ htaˇ hkʼa dehꞈ na taˍ piˇ ve yoˬ. Ha kʼaˉ ve hkʼaw kʼoˆ piˇ ve lehˬ, yawˇ hui Yaˬhoˉvaˬ ve kanˉ teˇ pawˆ kʼawꞈ te tuˬ ga piˇ gʼa ve yoˬ.—Roˉmaꞈ 12:15.

LIꞈ HPU HKʼAW VE AWˬ LAWN KʼOˆ MAˍ PIˇ VE

9. Yeˍsuˆ ve awˬ laꞈ gʼawˇ aˬ htoꞈ ma gʼa hpuˇ ve le? Leh Yeˍsuˆ yawˇ hui htaꞈ hkʼaˬ hkʼe ga piˇ ve le?

⁹ Yeˍsuˆ ve awˬ laꞈ gʼawˇ Gʼuiˬ sha maˍ laˇ ve tawˇ hkawˇ htaꞈ yonˍ leh gʼa henˇ taˍ ve awˬ ceuˬ yawˇ hui a shaꞈ teꞈ kuiˬ hkʼaw yuˬ yehˇ tuˬ coˇ caˇ jaˇ ve yoˬ. (Yoˇhanˬ 17:6) Chi hkʼe te ve htawˇ, aˬ htoꞈ ma te Yeˍsuˆ chaw haiˬ hkʼa shuˍ suhˆ hkuiˉ daw hkʼoˆ lo gʼa suh˗e ve htaꞈ yawˇ hui maˇ na gʼa ve yoˬ. Yawˇ hui chi ve htaꞈ htawˇ dawˇ nawˬ dawˇ cawˬ ve lehˬ, yawˇ hui nyi ma maˇ nuˇ nehˬ ve maˇ heˆ tehꞈ Yeˍsuˆ hkʼa dehꞈ shiˍ ve yoˬ. Yaꞈ hkʼaˇ, yawˇ hui hkʼa dehꞈ maˇ na gʼa ve pa taw yoˬ. (Luˉkaꞈ 9:44, 45; Yoˇhanˬ 20:9) Chi htaꞈ pa taw, yawˇ yawˇ hui htaꞈ Liꞈ hpu hkʼaw awˬ hkʼaˇ ca leh maˍ piˇ ve yoˬ. Eˇmawꞈ hkʼaˆ lo kʼai ve awˬ laꞈ gʼawˇ 2 gʼaˇ htaꞈ yawˇ hkʼaˬ hkʼe ga piˇ ve teˇ geh nyi sheˍ.

10. Yeˍsuˆ lehˬ Meˍsiˉyaꞈ hpehꞈ ve tehꞈ awˬ laꞈ gʼawˇ hui yonˍ gʼa tuˬ hkʼaˬ hkʼe ga piˇ ve le? (Luˉkaꞈ 24:18-27)

¹⁰ Luˉkaꞈ liꞈ 24:18-27 gʼaw sheˍ. Yeˍsuˆ yawˇ a shu hpehꞈ ve tehꞈ awˬ laꞈ gʼawˇ chi ve 2 gʼaˇ htaꞈ laꞈ haˉ maˇ kʼoˆ piˇ ve htaꞈ chaˬ nyi sheˍ. Yaꞈ hkʼaˇ, Yeˍsuˆ yawˇ hui htaꞈ na nyi piˇ tuˬ na hkawˇ yehˇ ve yoˬ. Aˬ htoꞈ ma pa taw le? Yeˍsuˆ lehˬ yawˇ hui nyi ma hkʼaw cawˬ ve awˬ ceuˬ kʼoˆ maˍ laˇ tcuh gaˇ ve yoˬ hehˉ. Hkʼe te leh, yawˇ hui kaꞈ kʼoˆ maˍ piˇ ve yoˬ. Yawˇ hui Yeˍsuˆ htaꞈ kʼoˆ piˇ ve, Iˉsaˍreˍlaˆ chaw lehˬ Roˉmaꞈ chaw fawˉ mehˍ laˇ ve htaꞈ Meˍsiˉyaꞈ hpehˇ laˇ tuˬ yawˇ hui dawˇ law taˍ ve yoˬ. Yawˇ hui dawˇ haˍ ve awˬ ceuˬ hkʼa peu˗eˬ kʼoˆ piˇ peuˬ hkʼawꞈ nawˉ, Liꞈ hpu hkʼaw tcuh kaˍ paˍ ve tawˇ hkawˇ awˬ tehˬ hpehꞈ la tuˬ ve awˬ ceuˬ htaꞈ yawˇ hui na gʼa tuˬ, Yeˍsuˆ ga piˇ ve yoˬ. b Leh oˇ ve teˇ nyi tiˉ hkʼaw  mvuhˇ hpeuꞈ la htaˇ, tcuh kaˍ paˍ ve tawˇ hkawˇ chi ve teˇ hpaˍ awˬ laꞈ gʼawˇ hui hkʼa dehꞈ yonˍ gʼa tuˬ, Yeˍsuˆ kʼoˆ maˍ piˇ ve yoˬ. (Luˉkaꞈ 24:33-48) Awˬ lawn chi ngaˬ hui htaꞈ hkʼaˬ hkʼe maˍ laˇ ve le?

11-12. (a) Yeˍsuˆ awˬ tehˬ ve awˬ lawn maˍ ve awˬ hkʼaˇ ngaˬ hui htaꞈ aˬ htoꞈ ma maˍ laˇ gʼa ve le? (Awˬ han htaꞈ nyi sheˍ.) (b) Nawn˗teˇ htaꞈ Liꞈ hpu maˍ piˇ ve chaw yawˇ htaꞈ hkʼaˬ hkʼe ga piˇ gʼa ve le?

¹¹ Ngaˬ hui Yeˍsuˆ htaꞈ hkʼaˬ hkʼe te henˇ yuˬ gʼa tuˬ le? Ngaˬ hui geh Liꞈ hpu henˇ chehˇ ve chaw htaꞈ maˍ piˇ htaˇ, yawˇ hkʼaˬ hkʼe dawˇ ve htaꞈ shiˍ tuˬ na hkawˇ na piˇ sheˍ. (Tawˇ naˉ ve 20:5) Yawˇ shiˍ˗oˬ htaˇ, yawˇ gʼa hpuˇ chehˇ ve awˬ lawn htaꞈ hawˍ daꞈ ve, Liꞈ hpu awˬ tawn ca gʼa tuˬ nawˬ ga piˇ sheˍ. Chi hkʼe te cawˇ ve, oˇ hkʼe te cawˇ ve tehꞈ, nawˬ geh Liꞈ hpu henˇ chehˇ ve chaw htaꞈ taˇ kʼoˆ piˇ. Chi hkʼe te ve aꞈ kehˉ Liꞈ hpu hkʼaw ve awˬ hkʼaˇ ca leh yawˇ htaꞈ ga piˇ leh, yawˇ a shaꞈ teꞈ kuiˬ hkʼaw hkʼaˬ hkʼe yuˬ yehˇ tuˬ kaꞈ ga piˇ sheˍ. Gaˬnaˬ mvuhˇ miˬ lo chehˇ ve awˬ viˉ aw nyi hawˉ hkʼaˆ Nawn˗teˇ ve awˬ lawn htaꞈ teˇ geh nyi sheˍ.

¹² Nawn˗teˇ 16 hkʼawꞈ htaˇ, Liꞈ hpu tanˬ henˇ ve yoˬ. Yaꞈ hkʼaˇ, peuˬ hkʼawꞈ nawˉ maˇ maw, yehˬ kʼa hkʼaw ve chaw yawˇ htaꞈ tawˍ piˇ ve yoˬ. Nawn˗teˇ awˬ gʼaˇ maˇ nuˇ leh Liꞈ hpu henˇ kʼai tuˬ aˬ htoꞈ ma ga piˇ ve le? Awˬ tehˬ ve Hkriꞈ yaˇ lehˬ, fawˉ ve mehˍ ve gʼa hpuˇ tuˬ yoˬ tehꞈ, yawˇ htaꞈ Liꞈ hpu maˍ piˇ ve chaw Maꞈhtehˍ liꞈ kaˇ nanˉ uiˍ 10 hkʼaw kʼoˆ maˍ piˇ ve yoˬ. Nawn˗teˇ kʼoˆ ve, “ngaˬ fawˉ ve mehˍ ve gʼa hpuˇ htaˇ, ngaˬ awˬ tehˬ ve htaꞈ ca mawˬ˗oˬ ve tehꞈ yonˍ gʼa ve yoˬ.” Chi hkʼoˆ kaꞈ, yehˬ kʼa hkʼaw ve chaw htaꞈ yawˇ ve yonˍ hkʼaˇ yawˆ yan leh shaˍ tiꞈ te ve hkʼaw kʼoˆ maˍ piˇ gʼa tuˬ, yawˇ htaꞈ Liꞈ hpu maˍ piˇ ve chaw Maꞈhtehˍ liꞈ 10:16 hkʼaw yawˇ yuˬ yehˇ puiˉ tuˬ maˍ piˇ ve yoˬ. Nawn˗teˇ Baˆtiˆsaˬ haꞈ yuˬ peuˬ hkʼawꞈ nawˉ, yawˇ gʼuˇ suhˍ peuˍ ve te gaˇ ve yoˬ. Yaꞈ hkʼaˇ, yawˇ ve awˬ pa lehˬ yawˇ liꞈ tanˇ mvuh ve hkʼaw henˇ tcuh gaˇ ve yoˬ. Yawˇ hkʼaˬ hkʼe te cawˇ ve htaꞈ Liꞈ hpu maˍ piˇ ve chaw kʼoˆ piˇ ve aꞈ kehˉ, Liꞈ hpu hkʼaw ve awˬ liˇ awˬ hkʼaˇ htaꞈ Nawn˗teˇ awˬ hkʼaˇ ca gʼa tuˬ, yawˇ na hkawˇ yehˇ ve yoˬ. Awˬ bon hkʼaˬ hkʼe gʼa ve le? Nawn˗teˇ Gʼuiˬ sha ve kanˉ awˬ yanˇ hkʼa biˇ te tuˬ dawˇ cheˆ ve yoˬ. Hkʼe te leh, awˬ pa Nawn˗teˇ htaꞈ aˉ hkʼaw lo gʼaꞈ kʼoˬ piˇ ve yoˬ. Hpehꞈ la ve awˬ ceuˬ hkʼa peu˗eˬ htaꞈ Nawn˗teˇ hkʼaˬ hkʼe dawˇ ve le? Yawˇ kʼoˆ ve, “ngaˬ dawˇ cheˆ ve cawˇ jaˇ˗oˬ ve tehꞈ yonˍ gʼa ve yoˬ.” Awˬ nu ve chaw Liꞈ hpu hkʼaw awˬ hkʼaˇ ca puiˉ tuˬ, ngaˬ hui ga piˇ htaˇ chi ngaˬ hui shiˍ tuˬ ga laˇ ve yoˬ. Yawˇ yonˍ hkʼaˇ yonˍ yeˬ ve Hkriꞈ yaˇ hpehꞈ leh, Yaˬhoˉvaˬ ve kanˉ caˉ leh te tuˬ ngaˬ hui ga piˇ gʼa ve yoˬ.—Eˇfeˇsuꞈ 3:16-19.

AWˬ VIˉ AWˬ NYI HAWˉ HKʼAˆ ‘CHAW YAˇ HPEHꞈ VE LAꞈ SHAWNˍ’ HPEHꞈ TUˬ MAˍ PIˇ VE

13. Yeˍsuˆ mvuhˇ naw ma hkʼoˆ lo kʼawꞈ˗e peuˬ hkʼawꞈ nawˉ bon maˍ ve kanˉ te ve chaw cawˬ sheˍ ve tehꞈ yonˍ gʼa tuˬ hkʼaˬ hkʼe te ve le? (Eˇfeˇsuꞈ 4:8)

¹³ Yeˍsuˆ miˬ guiˬ hkʼoˆ lo chehˇ htaˇ, yawˇ Yaˬhoˉvaˬ te tcuh ve teˇ ceuˬ le le htaꞈ te ve yoˬ. (Yoˇhanˬ 17:4) ‘Hkʼa dehꞈ daꞈ ve te tawˆ la tcuh gaˇ  ve kʼo, ngaˬ gʼa te cawˇ ve’ tehꞈ dawˇ hkʼaˇ chi hkʼe ve yawˇ maˇ cawˬ. Yeˍsuˆ miˬ guiˬ hkʼoˆ lo chehˇ leh Gʼuiˬ sha ve kanˉ te ve 3 hkʼawꞈ hpaˆ ve awˬ yanˇ htaˇ, laiˉ gʼaˇ kanˉ te tuˬ yawˇ maˍ piˇ leh, yawˇ mvuhˇ naw ma hkʼoˆ lo maˇ kʼawꞈ˗e sheˍ htaˇ kaꞈ, awˬ laꞈ gʼawˇ hui htaꞈ awˬ vuiˬ piˇ taˉ ve yoˬ. Oˇ ve teˇ yanˇ awˬ laꞈ gʼawˇ teˇ hpaˍ kʼo, a shaꞈ 20 hkʼawꞈ hpaˆ˗oˬ ve yoˬ hehˉ. Yaˬhoˉvaˬ awˬ pon awˬ hpfuhˇ hkʼaˆ jaˇ ve yawˬ ehˉ htaꞈ nyi haꞈ shaˉ tuˬ, Yeˍsuˆ yawˇ hui htaꞈ awˬ vuiˬ piˇ leh, bon maˍ ve kanˉ sheh kʼai tuˬ awˬ vuiˬ piˇ ve yoˬ. (Eˇfeˇsuꞈ 4:8 gʼaw sheˍ.) Ka tiꞈ yeˬ ve awˬ laꞈ gʼawˇ htaꞈ ga piˇ leh ‘chaw yaˇ hpehꞈ ve laꞈ shawnˍ’ hpehꞈ leh kaiˬ ve hkʼaw kanˉ te tuˬ ga piˇ ve, Yeˍsuˆ miˬ guiˬ hkʼoˆ lo chehˇ ve 40 nyi ve awˬ yanˇ hkʼaw hkʼaˬ hkʼe te ve le?

14. Yeˍsuˆ miˬ guiˬ hkʼoˆ lo chehˇ ve awˬ leh meuˇ ve awˬ yanˇ 40 nyi ve hkʼaw awˬ laꞈ gʼawˇ hui htaꞈ aˬ htoꞈ ma maˍ piˇ ve le? (Awˬ han htaꞈ nyi sheˍ.)

¹⁴ Yeˍsuˆ awˬ laꞈ gʼawˇ hui htaꞈ hteˇ˗ehˬ beˆ maˍ piˇ ve htawˇ, haꞈ pehnˇ ve hkʼaw te ve yoˬ. Tawˇ pa haˉ te kʼo, Yeˍsuˆ suh˗e leh kʼawꞈ teꞈ tu la˗oˬ ve laˇ tehꞈ, awˬ laꞈ gʼawˇ teˇ hpaˍ htawˇ dawˇ nawˬ dawˇ cawˬ ve htaꞈ yawˇ chaˬ nyi chehˇ ve yoˬ. Yawˇ hui yawˇ htaꞈ shiˍ tuˬ yawˇ beˆ maˍ piˇ ve yoˬ. (Luˉkaꞈ 24:25-27; Yoˇhanˬ 20:27) Yawˇ hui ve tanˇ kaˬ hpawˇ maˇ heˆ leh kanˉ te caˇ ve htaꞈ a yeˇ yuˬ ve aꞈ kehˉ, yawˇ hui Yaˬhoˉvaˬ ve chaw htaꞈ hkʼa dehꞈ nyi haꞈ shaˉ tuˬ, Yeˍsuˆ maˍ piˇ ve yoˬ. (Yoˇhanˬ 21:15) Yawˇ hui awˬ nu ve chaw daꞈ ve awˬ vuiˬ gʼa ve htaꞈ a yeˇ hkʼe taw maˇ yuˬ jaˇ tuˬ, Yeˍsuˆ yawˇ hui htaꞈ shaˍ tiꞈ piˇ ve yoˬ. (Yoˇhanˬ 21:20-22) Leh awˬ laꞈ gʼawˇ teˇ hpaˍ Gʼuiˬ sha ve mvuhˇ miˬ htaꞈ caˉ daꞈ ve, maˇ daꞈ ve dawˇ hkʼaˇ cawˬ htaˇ, yawˇ hui bon maˍ ve kanˉ htaꞈ a yeˇ yuˬ tuˬ Yeˍsuˆ ga piˇ ve yoˬ. (Tcuh yaˇ 1:6-8) Leh chi beuꞈ teˇ co˗e ve nyi haꞈ shaˉ paˍ Yeˍsuˆ htaꞈ hkʼaˬ hkʼe te henˇ yuˬ gʼa tuˬ le?

15-16. (a) Nyi haꞈ shaˉ paˍ Yeˍsuˆ htaꞈ hkʼaˬ hkʼe te henˇ yuˬ gʼa tuˬ le? Tawˇ pa haˉ kʼoˆ maˍ laˇ sheˍ. (b) Beˆ maˍ piˇ ve htaꞈ Hpehˆ˗hteꞈ awˬ bon hkʼaˬ hkʼe gʼa ve le?

¹⁵ Nyi haꞈ shaˉ paˍ hkʼaˬ hkʼe te Yeˍsuˆ htaꞈ henˇ yuˬ gʼa tuˬ le? Nyi haꞈ shaˉ paˍ lehˬ awˬ viˉ awˬ nyi hawˉ hkʼaˆ a shaꞈ i ve htaꞈ awˬ vuiˬ hkʼa dehꞈ te gʼa tuˬ gʼa maˍ piˇ ve yoˬ. c Nyi haꞈ shaˉ paˍ maˍ piˇ ve chaw yawˇ biˇ ve chaw hpehꞈ ve tehꞈ maˇ dawˇ law cawˇ. Awˬ viˉ awˬ nyi hawˉ hkʼaˆ a shaꞈ i ve chi teˇ hpaˍ hpehꞈ laˬ jaw ve awˬ lawn cawˬ la tuˬ, nyi haꞈ shaˉ paˍ lehˬ haꞈ pehnˇ ve hkʼaw yawˇ hui htaꞈ gʼa maˍ piˇ ve yoˬ. Yawˇ hui nyi ma nuˇ nehˬ ve, ka tiꞈ yeˬ ve, leh ha lehˬ ha kʼa ve hkʼaw awˬ nu ve chaw htaꞈ ga piˇ puiˉ tuˬ, a yeˇ uiˍ ve tehꞈ gʼa shawˍ cawˇ ve yoˬ.—1 Tiˆmoˉseˍ 3:1; 2 Tiˆmoˉseˍ 2:2; 1 Peˍtruˆ 5:5.

 ¹⁶ Awˬ viˉ awˬ nyi hawˉ hkʼaˆ teˇ gʼaˇ Hpehˆ˗hteꞈ meh ve awˬ lawn htaꞈ teˇ geh nyi sheˍ. Yawˇ lehˬ shu beˆ maˍ laˇ ve htaꞈ awˬ bon gʼa ve yoˬ. Yawˇ yaˇ nehˬ htaˇ shu maˇ dawˇ cawˇ tuˬ te leh awˬ viˉ awˬ nyi yaˇ miˇ htaꞈ kaꞈ maˇ daꞈ ve tawˇ yaw piˇ ve yoˬ. Nyi haꞈ shaˉ paˍ teˇ gʼaˇ Hpehˆ˗hteꞈ ve gʼaˇ nuˇ kuiˬ htaꞈ yawˇ chaˬ nyi mawˬ leh yawˇ htaꞈ hteˇ˗ehˬ beˆ maˍ piˇ ve htawˇ nyi ma nuˇ nehˬ ve hkʼaw te ve yoˬ. Hpehˆ˗hteꞈ kʼoˆ ve, “yawˇ chi hkʼe te ve ngaˬ ha lehˬ jaˇ. Daꞈ ve awˬ vuiˬ ngaˬ te gaˇ ve htaꞈ awˬ nu ve chaw gʼa te htaˇ ngaˬ hkawehˉ ve yoˬ. Yaꞈ hkʼaˇ, nyi haꞈ shaˉ paˍ chi ve teˇ gʼaˇ ngaˬ htaꞈ beˆ maˍ laˇ ve lehˬ, Hkriꞈ yaˇ awˬ moˍ hkʼaw aˉ yaˇ leh daꞈ ve awˬ vuiˬ htaꞈ a yeˇ yuˬ ve aꞈ kehˉ, nyi ma nuˇ nehˬ ve hkʼaw awˬ viˉ awˬ nyi htaꞈ ga piˇ cawˇ ve tehꞈ beˆ maˍ laˇ ve yoˬ.” Awˬ bon gʼa ve lehˬ, Hpehˆ˗hteꞈ 23 hkʼawꞈ htaˇ nyi haꞈ shaˉ paˍ te tuˬ leuˆ piˇ ve yoˬ.—Tawˇ naˉ ve 27:9.

17. Yeˍsuˆ awˬ laꞈ gʼawˇ hui htaꞈ yonˍ gʼa jaˇ ve tehꞈ hkʼaˬ hkʼe hpeuꞈ maw laˇ ve le?

¹⁷ Yeˍsuˆ awˬ laꞈ gʼawˇ hui htaꞈ bon maˍ ve ceh tiˉ a yeˇ yuˬ tuˬ awˬ vuiˬ piˇ ve maˇ heˆ. Yaꞈ hkʼaˇ, hkʼa dehꞈ maˍ piˇ tuˬ kaꞈ awˬ vuiˬ piˇ ve yoˬ. (Liꞈ hpu henˇ tuˬ ve liꞈ hkʼaw “yawˇ hui htaꞈ maˍ piˇ ve” Maꞈhtehˍ liꞈ 28:20 hkʼaw nyi sheˍ.) Awˬ laꞈ gʼawˇ hui lehˬ awˬ vuiˬ chi teˇ hpaˍ htaꞈ yawˇ hui te maˇ keunˍ tehꞈ dawˇ ve yoˬ. Yaꞈ hkʼaˇ, yawˇ hui te gʼa ve tehꞈ Yeˍsuˆ yonˍ ve yoˬ. Yeˍsuˆ yawˇ hui htaꞈ yonˍ gʼa jaˇ leh kʼoˆ piˇ ve, “Awˬ pa ngaˬ htaꞈ peu laˇ ve hkʼe, ngaˬ htawˇ nawˬ hui htaꞈ peu kʼai ve yoˬ.”—Yoˇhanˬ 20:21.

18. Nyi haꞈ shaˉ paˍ hkʼaˬ hkʼe te Yeˍsuˆ htaꞈ henˇ yuˬ gʼa tuˬ le?

¹⁸ Nyi haꞈ shaˉ paˍ Yeˍsuˆ htaꞈ hkʼaˬ hkʼe te henˇ yuˬ gʼa tuˬ le? Nyi haꞈ shaˉ paˍ hpehꞈ laˬ jaw ve awˬ lawn cawˬ ve chaw lehˬ, awˬ nu ve chaw awˬ vuiˬ htaꞈ hkʼa dehꞈ te gʼa tuˬ maˍ piˇ ve yoˬ. (Hpiˇliˇpiˆ 2:19-22) Tawˇ pa haˉ te kʼo, nyi haꞈ shaˉ paˍ lehˬ, yaˇ nehˬ htaꞈ hpawnˬ daꞈ kuiˬ yehˬ daꞈ kehˬ tuˬ te leh, hkʼa dehꞈ nyi haꞈ shaˉ tuˬ awˬ vuiˬ piˇ ve yoˬ. Nyi haꞈ shaˉ paˍ yawˇ hui htaꞈ awˬ vuiˬ piˇ˗oˬ htaˇ, nyi haꞈ shaˉ paˍ yawˇ hui htaꞈ hkʼa dehꞈ yonˍ gʼa ve tehꞈ hpeuꞈ maw piˇ ve lehˬ, yawˇ hui htaꞈ hkʼa dehꞈ maˍ piˇ leh kanˉ chi ve yawˇ hui te gʼa tuˬ yoˬ tehꞈ yonˍ gʼa ve yoˬ. Nyi haꞈ shaˉ paˍ te gehˇ sheˍ ve Maꞈhtehˍ kʼoˆ ve, Hkriꞈ yaˇ awˬ moˍ hkʼaw ve nyi haꞈ shaˉ paˍ yawˇ htaꞈ maˍ laˇ jaw ve htaꞈ awˬ hpfuhˇ shiˍ leh, kanˉ chi ve htaꞈ yawˇ te gʼa tuˬ yoˬ tehꞈ kaꞈ yawˇ hui yonˍ gʼa ve yoˬ. Maꞈhtehˍ kʼoˆ ve, “ngaˬ awˬ bon gʼa jaˇ ve lehˬ ngaˬ kanˉ te ve hkʼa dehꞈ maˇ cawˇ htaˇ, ngaˬ te maˇ cawˇ ve awˬ ceuˬ htaꞈ henˇ yuˬ gʼa ve tehꞈ mawˬ tuˬ, nyi haꞈ shaˉ paˍ ga laˇ ve yoˬ. Leh gʼuˇ suhˍ teˇ pawˆ hkʼaˬ hkʼe te hkʼa dehꞈ te gʼa tuˬ kaꞈ ga laˇ ve yoˬ.” d

19. Ngaˬ hui aˬ htoꞈ ma te tuˬ dawˇ teh taˍ gʼa ve le?

¹⁹ Yeˍsuˆ miˬ guiˬ hkʼoˆ lo chehˇ ve awˬ leh meuˇ ve 40 nyi ve awˬ yanˇ hkʼaw, shu htaꞈ awˬ gʼaˇ piˇ ve, maˍ piˇ ve, leh te jaw tuˬ kaꞈ maˍ piˇ ve yoˬ. Yeˍsuˆ htaꞈ hkʼa dehꞈ henˇ yuˬ tuˬ dawˇ teh taˍ sheˍ. (1 Peˍtruˆ 2:21) Ngaˬ hui chi hkʼe te gʼa tuˬ yawˇ ga laˇ tuˬ yoˬ. “Miˬ guiˬ chi awˬ yanˇ leh htaˇ hkʼa gaˬ, ngaˬ nawˬ hui geh hkʼaˬ htaˆ kaꞈ chehˇ tuˬ yoˬ” tehꞈ Yeˍsuˆ ka tiꞈ te piˇ ve yoˬ.—Maꞈhtehˍ 28:20.