Sawˉlaꞈmonˍ ve bon yehˬ lehˬ loꞈ˗e kuiˬ cawˬ ve yoˬ. Peuˬ laˬ ve 2023 hkʼawꞈ awˬ gʼuˇ shiˍ htaˇ, Miˬ guiˬ awˬ suhˉ yuˬ tawˆ ve Liꞈ hpu bvuhꞈ taˍ ve hkʼaw kʼoˆ ve, “bon yehˬ hkʼaw tanˬ loꞈ˗e ve teˇ bawehˇ lehˬ, zuhˬ hpawˇ kʼehˬ hpawˇ 20 shawꞈ hkʼa shuˍ hpehꞈ leh, mvuh ve hpawˇ 120 shawꞈ cawˬ ve yoˬ.” (2 Raˍsaˍvanˍ 3:4) Leh awˬ nu ve Liꞈ hpu yuˬ tawˆ ve hkʼaw kʼoˆ ve, bon yehˬ hkʼaw tanˬ loꞈ˗e kuiˬ “mvuh ve hpawˇ 120 shawꞈ cawˬ ve” maˇ heˆ leh 53 meˆ cawˬ ve yoˬ.

Yaꞈ hkʼaˇ, 2023 hkʼawꞈ Miˬ guiˬ awˬ suhˉ yuˬ tawˆ ve Liꞈ hpu hkʼaw kʼoˆ ve, Sawˉlaꞈmonˍ ve bon yehˬ tanˬ loꞈ˗e kuiˬ “mvuh hpawˇ 20 shawꞈ cawˬ ve” maˇ heˆ leh aˬ laˬ hkʼe 9 meˆ cawˬ ve yoˬ. a Chi hkʼe te pa ve awˬ hkʼaˇ teˇ hkʼaˇ hkʼaˇ htaꞈ teˇ geh nyi sheˍ.

1 Jawˇmawˇ liꞈ 6:3 hkʼaw mvuh hpawˇ ve awˬ lawn maˇ gʼa kʼoˆ laˇ taˍ. Chi teˇ tawn bvuhꞈ paˍ Yeˍraˍmiˆ lehˬ bon yehˬ loꞈ˗e kuiˬ kʼehˬ hpawˇ leh naˉ hpawˇ ceh tiˉ bvuhꞈ taˍ ve yoˬ. Yaꞈ hkʼaˇ, hkʼaˬ hkʼe mvuh cawˬ ve maˇ gʼa kʼoˆ laˇ taˍ. Peuˬ hkʼawꞈ nawˉ awˬ nu ve teˇ puꞈ hkʼaw bon yehˬ lonˉ htaꞈ caˉ daꞈ ve, awˬ nu ve awˬ ceuˬ nyi ma pfuhˇ lawꞈ lawꞈ ve Yeˍraˍmiˆ kʼawꞈ kʼoˆ taˍ ve yoˬ. Bon yehˬ hkʼaw loꞈ˗e kuiˬ paˇ lo kuiˇ iˉ kaˆ punˇ kʼoˍ lonˉ 1 maˬ, kuiˇ lawˬ ehˉ 10 maˬ, kuiˇ yehˬ hkuiˉ daw lonˉ 2 maˬ cawˬ taˍ ve yoˬ. (1 Jawˇmawˇ 7:15-37) Bon yehˬ lonˉ chi mvuh hpawˇ 50 meˆ hpaˆ cawˬ ve kʼo, chi bon yehˬ lonˉ htaꞈ caˉ daꞈ ve awˬ nu ve teˇ hpaˍ aꞈ kehˉ mvuh ve pa taw hkʼa dehꞈ mawˬ gʼa ve yoˬ. Chi hkʼe hpehꞈ ve kʼo, Yeˍraˍmiˆ lehˬ bon yehˬ lonˉ chi loꞈ˗e kuiˬ hpawˇ hkʼaˬ hkʼe mvuh cawˬ ve htaꞈ kʼoˆ cawˇ ve yoˬ. Peuˬ hkʼawꞈ nawˉ, laiˉ ha hkʼawꞈ gaˬ leh Yuˇdaꞈ chaw chaˬ nyi tehˆ nyi paˍ laiˉ gʼaˇ bon yehˬ lonˉ hkʼaw tanˬ loꞈ˗e kuiˬ chi, Sawˉlaꞈmonˍ ve bon yehˬ lonˉ hkʼe taw maˇ mvuh ve htaꞈ yawˇ hui kʼoˆ taˍ ve yoˬ.

Bon yehˬ lonˉ chi tanˬ loꞈ˗e kuiˬ 120 shawꞈ cawˬ ve tehꞈ cuˇ yiˍ cawˬ paˍ maˇ yonˍ gʼa. Yehˬ miˉ loꞈ˗e kuiˬ lo ve gʼoꞈ pa hehnˇ jaˇ ve kʼo maˇ paˆ˗e tuˬ ve laˇ? Oˇ htaˇ teˇ co˗e yehˬ te ve mvuh jaˇ ve kʼo, haˉ pui leh li kiˉ shiˍ yehˇ ve yoˬ. Tawˇ pa haˉ te kʼo, Eˇjiˇtuꞈ chaw ve bon yehˬ ve yehˬ miˉ hpeꞈ awˬ hkuiˉ peuˬ tanˬ kawˍ kuiˬ lo uiˍ jaˇ leh kʼehˬ jaˇ ve yoˬ. Leh awˬ meuˇ˗eˇ awˬ meuˇ˗eˇ i kʼai ve yoˬ. Yaꞈ hkʼaˇ, Sawˉlaꞈmonˍ ve bon yehˬ lonˉ lehˬ chi hkʼe maˇ heˆ. Cuˇ yiˍ cawˬ paˍ laiˉ gʼaˇ yonˍ ve, bon yehˬ chi ve htu ve 6 shawꞈ, maˇ heˆ leh aˬ laˬ hkʼe 2.7 meˆ cawˬ ve yoˬ. Chaˬ nyi tehˆ nyi paˍ Ti˗o˗daw Be˗siˉ yehˬ te ve hpawˇ awˬ han shawehˇ paˍ hpehꞈ leh kʼoˆ ve, “bon yehˬ hkʼaw tanˬ loꞈ˗e kuiˬ gʼoꞈ pa htu jaˇ ve htaꞈ caˉ daꞈ ve kʼoˆ ve kʼo, tanˬ loꞈ˗e kuiˬ chi mvuh hpawˇ 120 shawꞈ maˇ cawˬ taˍ.”

2 Raˍsaˍvanˍ liꞈ 3:4 hkʼaw ve awˬ lawn bvuhꞈ taˍ ve lehˬ maˇ cawˇ ve yoˬ hehˉ. Chi ve teˇ tawn Liꞈ hpu teˇ kʼoˆ kʼoˆ hkʼaw bvuhꞈ taˍ ve, “120” shawꞈ cawˬ ve yoˬ. Yaꞈ hkʼaˇ, awˬ nu ve Liꞈ hpu hkʼaw yonˍ gʼa sheˍ ve yoˬ. Tawˇ pa haˉ te kʼo, 500 hkʼawꞈ htaˇ te tawˆ taˍ ve Hkon˗denˬ Leh˗ne˗kaˆ hpehꞈ leh, 600 hkʼawꞈ htaˇ te tawˆ taˍ ve Hkon˗denˬ A˗pon˗si˗nuˆ hkʼaw kʼoˆ ve, “20 shawꞈ cawˬ ve yoˬ.” Hkʼe kʼo aˬ htoꞈ ma te “120” shawꞈ bvuhꞈ yaꞈ ve le? Awˬ lawn kʼo, Heˍbrehˇ hkawˇ “100” leh “shawꞈ” liꞈ mehˆ hkʼa shuˍ hpehꞈ ve yoˬ. Chi htaꞈ pa taw, bvuhꞈ paˍ “shawꞈ” bvuhꞈ ve aꞈ kehˉ “100” bvuhꞈ ve yoˬ.

Awˬ tehꞈ kʼo Sawˉlaꞈmonˍ ve bon lonˉ htaꞈ caˉ daꞈ ve awˬ lawn awˬ tanˇ hkʼa dehꞈ na gʼa tuˬ te cawˇ ve yoˬ. Yaꞈ hkʼaˇ, a yeˇ uiˍ ve lehˬ Sawˉlaꞈmonˍ ve bon lonˉ aˬ htoꞈ ma awˬ pon cawˬ ve, ngaˬ hui na gʼa tcuh gaˇ ve yoˬ. Bon yehˬ lonˉ chi ve lehˬ, Yaˬhoˉvaˬ gu teh taˍ laˇ ve co ha hpawˇ ve bon yehˬ lonˉ htaꞈ ngaˬ hui dawˇ mawˬ tuˬ te laˇ ve yoˬ. Yaˬhoˉvaˬ ve kanˉ te ve chaw teˇ gʼaˇ le le, co ha hpawˇ ve bon yehˬ lonˉ hkʼaw yawˇ htaꞈ oˉ kʼoˍ pui la tuˬ, kuˬ laˇ ve ngaˬ hui yawˇ htaꞈ awˬ bon uiˍ jaˇ ve yoˬ.—Heˍbrehˇ 9:11-14; Hpeuꞈ maˍ ve 3:12; 7:9-17.