Iˉsaˍreˍlaˆ chaw kʼa muiˬ hkawˇ kʼa ve htaꞈ dawˇ cawˇ jaˇ. Chaw teˇ hpaˍ tinˍ hteˆ ve leh kʼa muiˬ hkawˇ kʼa ve htaꞈ Liꞈ hpu hkʼaw kʼoˆ taˍ ve yoˬ. Liꞈ hpu hkʼaw kʼa muiˬ hkawˇ teˇ hpaˍ lehˬ, Chiˇ mvuh ve liꞈ, Sawˉlaꞈmonˍ ve kʼa muiˬ hkawˇ, Dawˇ haˍ ve kʼa muiˬ hkawˇ, chi ve teˇ hpaˍ hpehꞈ ve yoˬ. Liꞈ hpu ve awˬ co˗e htaˇ, tinˍ cheˆ ve liꞈ kʼoˆ hkʼaw kʼoˆ taˍ ve hkʼe, (Kaˇlaˇ hkawˇ) kʼa muiˬ hkawˇ kʼa ve Iˉsaˍreˍlaˆ chaw awˬ pon a yeˇ uiˍ jaˇ.

Teˇ nyi le le a shaꞈ teꞈ kuiˬ hkʼaw kʼa muiˬ hkawˇ kʼa ve. Iˉsaˍreˍlaˆ chaw tinˍ hteˆ ve, leh kʼa muiˬ hkawˇ kʼa ve, nyi ma hkʼaw cawˬ ve awˬ ceuˬ te tawˆ la ve yoˬ. (Iˉsaˍyaˆ 30:29) Iˉsaˍreˍlaˆ chaw pawehˇ teˇ hpaˍ cawˬ htaˇ, maꞈ bawˆ gʼaˇ ve awˬ yanˇ htaˇ, leh jawˇ mawˇ te tuˬ leuˆ htaˇ, Iˉsaˍreˍlaˆ chaw yaˇ miˇ tinˍ hteˆ, kʼaˍ hkʼeˆ, leh kʼa muiˬ hkawˇ kʼa ve yoˬ. (Suhˉ jehˬ ve 11:34; 1 Saˍmo˗eˍlaˆ 18:6, 7; 1 Jawˇmawˇ 1:39, 40) Iˉsaˍreˍlaˆ chaw nyi ma luˬ htaˇ kaꞈ kʼa muiˬ hkawˇ kʼa ve yoˬ. (2 Raˍsaˍvanˍ 35:25) Liꞈ kʼoˆ teˇ kʼoˆ hkʼaw kʼoˆ ve, “Heˍbrehˇ chaw tinˍ hteˆ ve leh kʼa muiˬ hkawˇ kʼa ve dawˇ cawˇ jaˇ.”

Jawˇ mawˇ ve hawˉ yehˬ hkʼaw ve kʼa muiˬ hkawˇ. Iˉsaˍreˍlaˆ chaw ve jawˇ mawˇ tinˍ hteˆ hkawˇ htaꞈ dawˇ cawˇ jaˇ. Tawˇ pa haˉ te kʼo, jawˇ mawˇ Sawˉluꞈ lehˬ, Daˍviˆ tinˍ hteˆ maˍ laˇ tuˬ hawˉ yehˬ hkʼaw laˬ tcuh ve yoˬ. (1 Saˍmo˗eˍlaˆ 16:18, 23) Peuˬ hkʼawꞈ nawˉ Daˍviˆ jawˇ mawˇ hpehꞈ˗oˬ htaˇ, tinˍ hteˆ tuˬ awˬ hkʼaˇ laiˉ hkʼaˇ ca ve yoˬ. Yawˇ kʼa muiˬ hkawˇ na sha jaˇ ve laiˉ hkawˇ yuˬ tawˆ leh Yaˬhoˉvaˬ ve bon yehˬ hkʼaw tinˍ hteˆ leh kʼa muiˬ hkawˇ kʼa tuˬ awˬ moˍ shawˍ teh ve yoˬ. (2 Raˍsaˍvanˍ 7:6; Aˍmoˆ 6:5) Chi hkʼoˆ kaꞈ, jawˇ mawˇ Sawˉlaꞈmonˍ yawˇ ve hawˉ yehˬ hkʼaw hawˉ hkʼaˆ leh yaˇ miˇ kʼa muiˬ hkawˇ kʼa ve chaw cawˬ ve yoˬ.—Cuˇ yiˍ piˇ ve 2:8.

Oˉ kʼoˍ pui tuˬ ve kʼa muiˬ hkawˇ. Iˉsaˍreˍlaˆ chaw Yaˬhoˉvaˬ htaꞈ oˉ kʼoˍ pui tuˬ a yeˇ uiˍ jaˇ ve awˬ hkʼaˇ teˇ hkʼaˇ lehˬ, tinˍ hteˆ leh kʼa muiˬ hkawˇ kʼa ve yoˬ. Yeˍruˆsaˍlehnˍ venˇ lo Yaˬhoˉvaˬ ve bon yehˬ hkʼaw, tinˍ hteˆ leh muiˬ hkawˇ kʼa ve chaw 4,000 gʼaˇ cawˬ ve yoˬ. (1 Raˍsaˍvanˍ 23:5) Yawˇ hui lehˬ nawˍ meuˆ, tinˍ hteˆ, shehnˍ hehˆ, cehnˬ dawˆ, Lehˉ lu meuˆ leh ha lehˬ ha kʼa te chehˇ ve yoˬ. (2 Raˍsaˍvanˍ 5:12) Yaꞈ hkʼaˇ, Yaˬhoˉvaˬ htaꞈ oˉ kʼoˍ pui ve hkʼaw tinˍ hteˆ ve yawˇ hui ceh tiˉ maˇ heˆ. Iˉsaˍreˍlaˆ chaw teˇ hkʼawꞈ le le Yeˍruˆsaˍlehnˍ venˇ lo pawehˇ cawˬ ve awˬ yanˇ htaˇ, laiˉ gʼaˇ kʼa muiˬ hkawˇ kʼa ve yoˬ. Yawˇ hui kʼa ve kʼa muiˬ hkawˇ ve awˬ meh lehˬ, ga laˇ tuˬ lawˬ ve bon lawˬ hkawˇ hpehꞈ ve yoˬ. (Chiˇ mvuh ve 120–134) Chi hkʼoˆ kaꞈ, Yuˇdaꞈ chaw ve liꞈ bvuhꞈ taˍ ve hkʼaw Iˉsaˍreˍlaˆ chaw Paˍsaˍhkaˍ a pawehˇ cawˬ ve awˬ yanˇ htaˇ, Gʼuiˬ sha htaꞈ kʼa muiˬ hkawˇ kʼa chiˇ mvuh ve yoˬ.

Chi beuꞈ teˇ co˗e kaꞈ kʼa muiˬ hkawˇ kʼa ve Yaˬhoˉvaˬ ve chaw awˬ pon a yeˇ uiˍ jaˇ. (Yaˍkoˆ 5:13) Ngaˬ hui kʼa muiˬ hkawˇ kʼa ve lehˬ, Yaˬhoˉvaˬ htaꞈ oˉ kʼoˍ pui ve yoˬ. (Eˇfeˇsuꞈ 5:19) Kʼa muiˬ hkawˇ kʼa ve lehˬ, miˬ guiˬ hkʼoˆ lo ve awˬ viˉ awˬ nyi geh ngaˬ hui teˇ moˍ tiˉ hpehꞈ ve yoˬ. (Kawˇlawˇsehˇ 3:16) Ngaˬ hui tuꞈ ve hkanˍ ve gʼa hpuˇ htaˇ, kʼa muiˬ hkawˇ kʼa ve lehˬ, yonˍ hkʼaˇ yonˍ yeˬ tuˬ te laˇ ve yoˬ. (Tcuh yaˇ 16:25) Ngaˬ hui ve yonˍ hkʼaˇ yonˍ yeˬ leh Yaˬhoˉvaˬ htaꞈ haꞈ ve tehꞈ hpeuꞈ maw piˇ tuˬ, kʼa muiˬ hkawˇ kʼa ve lehˬ daꞈ jaˇ ve awˬ hkʼaˇ hpehꞈ ve yoˬ.