1. Aˬ htoꞈ ma te ngaˬ hui Yaˬhoˉvaˬ htaꞈ gʼa beˆ maˍ laˇ tcuh cawˇ ve le? Tawˇ pa haˉ kʼoˆ maˍ laˇ sheˍ.

 Nawˬ heh puiˉ hkʼaw lo yaꞈ kʼaw yaꞈ leh oˇ kaˬ lo kawˆ tuˬ cawˬ maˇ jaˇ ve htaꞈ dawˇ nyi sheˍ. To nuˇ to shaˆ haiˬ jaˇ ve, puiˉ cheꞈ htaˇ a naˍ cawˬ ve, aˉ hpaꞈ awˬ tawꞈ ma cawˬ ve, chi teˇ hpaˍ cawˬ ve yoˬ. Chi hkʼe ve htaꞈ nawˬ kawˆ jaˇ tuˬ yoˬ hehˉ. Yaꞈ hkʼaˇ, nawˬ yaꞈ kʼaw shiˍ maˍ laˇ paˍ geh teˇ geh kʼai ve kʼo, kawˆ tuˬ hkʼaˬ kaꞈ lo cawˬ ve htaꞈ yawˇ shiˍ leh nawˬ htaꞈ ga laˇ gʼa ve yoˬ. Chi hkʼe ve chaw geh teˇ geh kʼai ve kʼo, nawˬ nyi ma sha ve maˇ heˆ laˇ? Chi teˇ hkui ngaˬ hui chehˇ ve miˬ guiˬ lehˬ heh puiˉ hkʼaw htaꞈ shuˍ ve pa taw, kawˆ tuˬ cawˬ jaˇ leh, ngaˬ hui ve yonˍ hkʼaˇ awˬ gʼaˇ nuˇ tuˬ te laˇ gʼa ve yoˬ. Yaꞈ hkʼaˇ, ngaˬ hui htaꞈ yaꞈ kʼaw shiˍ maˍ laˇ paˍ daꞈ jaˇ ve lehˬ Yaˬhoˉvaˬ hpehꞈ ve yoˬ. Yaˬhoˉvaˬ ngaˬ hui htaꞈ kawˆ ve maˇ cawˬ tuˬ ga laˇ gʼa leh, ngaˬ hui htaꞈ awˬ ti lo hkʼa gaˬ shiˍ kʼai laˇ tuˬ ve lehˬ, miˬ guiˬ awˬ suhˉ hkʼaw co co taiˍ taiˍ a shaꞈ gʼa htaˇ hkʼa gaˬ yoˬ.

2. Yaˬhoˉvaˬ ngaˬ hui htaꞈ hkʼaˬ hkʼe beˆ maˍ laˇ ve le?

² Yaˬhoˉvaˬ ngaˬ hui htaꞈ hkʼaˬ hkʼe beˆ maˍ laˇ ve le? Yawˇ yehˇ ve awˬ hkʼaˇ teˇ hkʼaˇ lehˬ Liꞈ hpu hpehꞈ ve yoˬ. Yaꞈ hkʼaˇ, ngaˬ hui htaꞈ beˆ maˍ laˇ tuˬ, Yaˬhoˉvaˬ yawˇ awˬ tan hpehꞈ ve chaw yaˇ htaꞈ yehˇ sheˍ ve yoˬ. Tawˇ pa haˉ te kʼo, ngaˬ hui yonˍ hkʼaˇ hpawˇ yonˍ yeˬ leh cuˇ yiˍ cawˬ ve hkʼaw dawˇ cheˆ gʼa tuˬ, Yaˬhoˉvaˬ lehˬ “ka tiꞈ yeˬ leh cuˇ yiˍ cawˬ ve awˬ ceˬ” htaꞈ cuˇ leh ga laˇ ve yoˬ. (Maꞈhtehˍ 24:45) Chi hkʼe ceh tiˉ maˇ heˆ. Ngaˬ hui htaꞈ beˆ maˍ laˇ gʼa ve hawˉ hkʼaˆ htaꞈ kaꞈ yehˇ sheˍ ve yoˬ. Tawˇ pa haˉ te kʼo, ngaˬ hui tuꞈ jaˇ hkanˍ jaˇ ve htaꞈ ponˬ kʼai gʼa tuˬ, Yaˬhoˉvaˬ lehˬ toˇ nyi shehˍ hpaˇ leh Hkriꞈ yaˇ awˬ moˍ hkʼaw nyi haꞈ shaˉ paˍ htaꞈ cuˇ leh ngaˬ hui htaꞈ awˬ gʼaˇ peꞈ laˇ leh beˆ maˍ laˇ tcuh ve yoˬ. Ngaˬ hui awˬ leh meuˇ ve awˬ yanˇ hkʼaw shoꞈ shaꞈ ve htaꞈ yeunˇ hkanˍ gʼaˇ tuˬ ga laˇ gʼa ve, yonˍ gʼa ve beˆ maˍ laˇ hkawˇ cawˬ ve awˬ bon uiˍ jaˇ. Ngaˬ hui Yaˬhoˉvaˬ haꞈ yuˬ laˇ ve chaw hpehꞈ tuˬ leh co co taiˍ taiˍ a shaꞈ gʼa tuˬ yaꞈ kʼaw hkʼoˆ chehˇ tuˬ ga laˇ gʼa ve awˬ bon uiˍ jaˇ.

3. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

 ³ Teˇ pawˆ pawˆ kʼo Yaˬhoˉvaˬ lehˬ maˇ biˇ ve chaw yaˇ htaꞈ cuˇ leh ngaˬ hui htaꞈ beˆ maˍ laˇ tcuh ve kʼo, beˆ maˍ laˇ ve htaꞈ gʼaꞈ te tuˬ haˍ jaˇ tehꞈ dawˇ ve yoˬ. Aˬ htoꞈ ma pa taw le? Awˬ lawn kʼo, beˆ maˍ laˇ ve chi lehˬ ngaˬ hui maˇ dawˇ cawˇ ve, maˇ heˆ leh beˆ maˍ laˇ ve chi cuˇ yiˍ hkʼa dehꞈ maˇ cawˬ tehꞈ dawˇ ve yoˬ. Beˆ maˍ laˇ ve chi Yaˬhoˉvaˬ geh laˬ ve maˇ heˆ tehꞈ a shu yawˇ hkʼaˇ yawˇ dawˇ ve yoˬ. Ngaˬ hui chi hkʼe dawˇ htaˇ, Yaˬhoˉvaˬ yawˇ ve mvuhˇ miˬ yaˇ htaꞈ beˆ maˍ piˇ chehˇ ve tehꞈ ngaˬ hui yonˍ gʼa tuˬ gʼa te leh, yawˇ beˆ maˍ laˇ ve htaꞈ gʼaꞈ te ve lehˬ ngaˬ hui awˬ bon gʼa tuˬ te laˇ ve yoˬ. Ngaˬ hui hkʼa dehꞈ yonˍ gʼa tuˬ ga laˇ gʼa ve, (1) Liꞈ hpu ve awˬ co˗e htaˇ Yaˬhoˉvaˬ yawˇ ve chaw htaꞈ hkʼaˬ hkʼe beˆ maˍ piˇ ve le, (2) chi beuꞈ teˇ co˗e Yaˬhoˉvaˬ ngaˬ hui htaꞈ hkʼaˬ hkʼe beˆ maˍ laˇ chehˇ ve le, leh (3) Yaˬhoˉvaˬ beˆ maˍ laˇ ve htaꞈ ngaˬ hui gʼaꞈ te ve kʼo aˬ htoꞈ ma awˬ bon gʼa tuˬ ve le? Chi ve teˇ hpaˍ teˇ geh henˇ tuˬ yoˬ.

YAˬHOˉVAˬ IˉSAˍREˍLAˆ CHAW HTAꞈ HKʼAˬ HKʼE BEˆ MAˍ PIˇ VE LE?

4-5. Yaˬhoˉvaˬ Moˉseˍ htaꞈ cuˇ leh Iˉsaˍreˍlaˆ chaw htaꞈ ga piˇ chehˇ ve tehꞈ hkʼaˬ hkʼe hpeuꞈ maw piˇ ve le? (Awˬ htaꞈ hpawˇ ve awˬ han htaꞈ nyi sheˍ.)

⁴ Yaˬhoˉvaˬ Moˉseˍ htaꞈ leuˆ yuˬ leh Iˉsaˍreˍlaˆ chaw htaꞈ Eˇjiˇtuꞈ mvuhˇ miˬ lo shiˍ tawˆ la tcuh leh, yawˇ hui htaꞈ sheh kʼai piˇ tuˬ Yaˬhoˉvaˬ Moˉseˍ htaꞈ yehˇ chehˇ ve tehꞈ, yawˇ hui yonˍ gʼa tuˬ hkʼa tawˍ lehˆ hpeuꞈ maw piˇ ve yoˬ. Tawˇ pa haˉ te kʼo, Yaˬhoˉvaˬ lehˬ tanˇ vaˇ htaˇ moˬ yehˬ hkuiˉ daw htaꞈ yehˇ leh, mvuhˇ hpeuꞈ htaˇ aˬ miˍ yehˬ hkuiˉ daw htaꞈ yehˇ leh yawˇ hui htaꞈ sheh kʼai piˇ ve yoˬ. (Tawˆ kʼai ve 13:21) Moˉseˍ leh Iˉsaˍreˍlaˆ chaw hkʼa peu˗eˬ aˬ miˍ yehˬ hkuiˉ daw chi ve hkʼaˇ suh kʼai leh laˇ tsuhˇ gʼuiˬ nyi awˬ paˇ lo deh chehˇ taˍ ve yoˬ. Iˉsaˍreˍlaˆ chaw awˬ gʼuˇ suhˍ lo laˇ tsuhˇ gʼuiˬ nyi tawˍ taˍ piˇ leh hkʼawꞈ nawˉ hpawˇ lo Eˇjiˇtuꞈ maꞈ yaˇ gʼaˇ hteꞈ gʼaꞈ yuˬ laˬ chehˇ ve pa taw, yawˇ hui kawˆ jaˇ ve yoˬ. Moˉseˍ yawˇ hui htaꞈ yaꞈ kʼaw sheh yaꞈ laˇ ve tehꞈ dawˇ ve yoˬ. Yaꞈ hkʼaˇ, awˬ tehˬ kʼo maˇ heˆ. Yaˬhoˉvaˬ lehˬ Moˉseˍ yawˇ hui htaꞈ choˬ kaˬ lo shiˍ laˬ tcuh ve yoˬ. (Tawˆ kʼai ve 14:2) Yaˬhoˉvaˬ yawˇ hui htaꞈ ga ponˬ piˇ tuˬ anˇ tuˬ te ve yoˬ.—Tawˆ kʼai ve 14:26-28.

⁵ Moˉseˍ Iˉsaˍreˍlaˆ chaw hui htaꞈ heh puiˉ hkʼaw lo shiˍ tawˆ la gʼa tuˬ, 40 hkʼawꞈ ve awˬ yanˇ Moˉseˍ moˬ yehˬ hkuiˉ daw beˆ maˍ laˇ tuˬ htaꞈ cuˇ sheˍ ve yoˬ. a Awˬ yanˇ teˇ yanˇ htaˇ Yaˬhoˉvaˬ moˬ yehˬ hkuiˉ daw htaꞈ cuˇ leh Moˉseˍ ve aˉ po kʼo hkʼoˆ lo jehˇ taˍ tcuh ve yoˬ. Chi ve lehˬ mvuhˇ miˬ yaˇ teˇ gʼaˇ le le gʼa mawˬ ve yoˬ. (Tawˆ kʼai ve 33:7, 9, 10) Yaˬhoˉvaˬ moˬ yehˬ hkuiˉ daw htaꞈ cuˇ leh Moˉseˍ geh tawˇ yaw piˇ ve yoˬ. Leh Moˉseˍ kaꞈ Gʼuiˬ sha kʼoˆ piˇ taˍ ve hkʼe, mvuhˇ miˬ yaˇ htaꞈ kʼawꞈ kʼoˆ piˇ ve yoˬ. (Chiˇ mvuh ve 99:7) Chi htaꞈ pa taw, Yaˬhoˉvaˬ Moˉseˍ htaꞈ cuˇ leh Iˉsaˍreˍlaˆ chaw htaꞈ beˆ maˍ laˇ tcuh chehˇ ve tehꞈ yawˇ hui hkʼa tawˍ lehˆ gʼa mawˬ ve yoˬ.

6. Iˉsaˍreˍlaˆ chaw Yaˬhoˉvaˬ beˆ maˍ piˇ ve htaꞈ haꞈ yuˬ˗aw laˇ? (Heh puiˉ hkʼaw 14:2, 10, 11)

⁶ Moˉseˍ Yaˬhoˉvaˬ ve awˬ tan te shehˍ hpaˇ hpehꞈ ve tehꞈ, Iˉsaˍreˍlaˆ chaw shaˉ hkiˆ hkʼa biˇ gʼa mawˬ ve htawˇ, a yeˇ maˇ yuˬ ve nyi ma luˬ jaˇ. (Heh puiˉ hkʼaw 14:2, 10, 11 gʼaw sheˍ.) Yawˇ hui laiˉ pawˆ kʼo Moˉseˍ lehˬ Gʼuiˬ sha maˇ yehˇ ve tehꞈ kʼoˆ ve yoˬ. Chi ve lehˬ Iˉsaˍreˍlaˆ chaw oˇ teˇ co˗e chehˇ ve chaw Gʼuiˬ sha ka tiꞈ te taˍ piˇ ve mvuhˇ miˬ hkʼaw maˇ gʼa loꞈ˗e ve yoˬ.—Heh puiˉ hkʼaw 14:30.

7. Yaˬhoˉvaˬ beˆ maˍ piˇ ve htaꞈ gʼaꞈ te ve a shu cawˬ ve le? (Heh puiˉ hkʼaw 14:24) (Awˬ han htaꞈ nyi sheˍ.)

⁷ Yaꞈ hkʼaˇ, Iˉsaˍreˍlaˆ chaw teˇ hpaˍ Yaˬhoˉvaˬ beˆ maˍ piˇ ve htaꞈ gʼaꞈ te ve yoˬ. Tawˇ pa haˉ te kʼo, Yaˬhoˉvaˬ Kaˍlehˆ htaꞈ kʼoˆ piˇ ve, ‘nawˬ lehˬ ngaˬ htaꞈ ka tiꞈ yeˬ chehˇ ve yoˬ.’ (Heh puiˉ hkʼaw 14:24 gʼaw sheˍ.) Yaˬhoˉvaˬ Kaˍlehˆ htaꞈ laꞈ shawnˍ piˇ ve lehˬ, Hkʼaˬnaˬ mvuhˇ miˬ lo yawˇ hkʼaˬ kaˬ lo chehˇ tuˬ leuˆ yuˬ tcuh ve yoˬ. (Yawˇsuˆ 14:12-14) Chi hkʼoˆ kaꞈ, Iˉsaˍreˍlaˆ chaw ve awˬ yaˇ awˬ duˬ Gʼuiˬ sha ka tiꞈ te taˍ piˇ ve mvuhˇ miˬ hkʼaw loꞈ˗e ve chaw, Gʼuiˬ sha beˆ maˍ piˇ ve htaꞈ gʼaꞈ te ve daꞈ ve henˇ tuˬ hpehꞈ ve yoˬ. Yawˇsuˆ Moˉseˍ awˬ tan te leh Iˉsaˍreˍlaˆ chaw htaꞈ sheh kʼai piˇ peuˬ hkʼawꞈ nawˉ, “Yawˇsuˆ a shaꞈ leh htaˇ hkʼa gaˬ yawˇ hui yawˇ htaꞈ yawˆ yan ve yoˬ.” (Yawˇsuˆ 4:14) Chi ve htaꞈ pa taw, Yaˬhoˉvaˬ yawˇ hui htaꞈ awˬ bon naꞈ piˇ ve lehˬ,  yawˇ ka tiꞈ te taˍ piˇ ve mvuhˇ miˬ hkʼaw yawˇ hui htaꞈ chehˇ tcuh ve yoˬ.—Yawˇsuˆ 21:43, 44.

8. Iˉsaˍreˍlaˆ chaw jawˇ mawˇ cawˬ ve awˬ co˗e htaˇ, Yaˬhoˉvaˬ yawˇ ve chaw htaꞈ hkʼaˬ hkʼe beˆ maˍ piˇ ve le? (Awˬ han htaꞈ nyi sheˍ.)

⁸ Laiˉ hkʼawꞈ peuˬ hkʼawꞈ nawˉ, Yaˬhoˉvaˬ suhˉ jehˬ paˍ hui htaꞈ yawˇ ve mvuhˇ miˬ yaˇ htaꞈ sheh kʼai tuˬ leuˆ yuˬ piˇ ve yoˬ. Leh peuˬ hkʼawꞈ nawˉ, Iˉsaˍreˍlaˆ chaw ve jawˇ mawˇ kʼawꞈ cawˬ tcuh ve yoˬ. Yaˬhoˉvaˬ tcuh kaˍ paˍ htaꞈ leuˆ yuˬ leh yawˇ ve mvuhˇ miˬ yaˇ Iˉsaˍreˍlaˆ chaw htaꞈ sheh kʼai tcuh ve yoˬ. Iˉsaˍreˍlaˆ chaw ve jawˇ mawˇ laiˉ gʼaˇ Yaˬhoˉvaˬ htaꞈ ka tiꞈ yeˬ leh tcuh kaˍ paˍ beˆ maˍ piˇ ve htaꞈ na yuˬ ve yoˬ. Tawˇ pa haˉ te kʼo, jawˇ mawˇ Daˍviˆ lehˬ tcuh kaˍ paˍ Naˍtanˍ beˆ maˍ piˇ ve htaꞈ na yuˬ ve yoˬ. (2 Saˍmo˗eˍlaˆ 12:7, 13; 1 Raˍsaˍvanˍ 17:3, 4) Jawˇ mawˇ Yawˇshaˍhpaˆ lehˬ Yeˍhaˍzeˍlaˆ beˆ maˍ laˇ tuˬ htaꞈ lawˬ leh Yuˇdaꞈ chaw ‘Yaˬhoˉvaˬ kʼoˆ laˇ ve htaꞈ hkʼa dehꞈ yonˍ taˍ˗oˆ’ tehꞈ awˬ gʼaˇ piˇ ve yoˬ. (2 Raˍsaˍvanˍ 20:14, 15, 20) Jawˇ mawˇ Heˍsaˍkiˆ ve awˬ co˗e htaˇ yawˇ dawˇ haˍ jaˇ leh tcuh kaˍ paˍ Iˉsaˍyaˆ ga laˇ tuˬ lawˬ ve yoˬ. (Iˉsaˍyaˆ 37:1-6) Iˉsaˍreˍlaˆ chaw ve jawˇ mawˇ Yaˬhoˉvaˬ beˆ maˍ piˇ ve htaꞈ gʼaꞈ te ve teˇ pawˆ le le mvuhˇ miˬ yaˇ hkʼa peu˗eˬ htaꞈ Gʼuiˬ sha awˬ bon naꞈ piˇ leh haꞈ shaˉ piˇ ve yoˬ. Chi ve lehˬ, Yaˬhoˉvaˬ tcuh kaˍ paˍ htaꞈ cuˇ leh yawˇ ve mvuhˇ miˬ yaˇ htaꞈ beˆ maˍ laˇ chehˇ ve tehꞈ, yawˇ hui shiˍ tuˬ shaˉ hkiˆ hpehꞈ ve yoˬ. (2 Raˍsaˍvanˍ 20:29, 30; 32:22) Chi hkʼe hpehꞈ ve htawˇ, jawˇ mawˇ leh mvuhˇ miˬ yaˇ maˇ˗awˍ ve Yaˬhoˉvaˬ ve tcuh kaˍ paˍ ve tawˇ hkawˇ maˇ na yuˬ.—Yeˍraˍmiˆ 35:12-15.

YAˬHOˉVAˬ AWˉ LAWˉ PEUˇ VE HKRIꞈ YAˇ HTAꞈ HKʼAˬ HKʼE BEˆ MAˍ PIˇ VE LE?

9. Yaˬhoˉvaˬ awˉ lawˉ peuˇ ve Hkriꞈ yaˇ htaꞈ beˆ maˍ piˇ tuˬ a shu htaꞈ cuˇ ve le? (Awˬ han htaꞈ nyi sheˍ.)

⁹ Awˉ lawˉ peuˇ ve Hkriꞈ yaˇ teˇ co˗e htaˇ, Yaˬhoˉvaˬ Hkriꞈ yaˇ awˬ moˍ cawˬ tcuh ve yoˬ. Leh Yaˬhoˉvaˬ yawˇ hui htaꞈ hkʼaˬ hkʼe beˆ maˍ piˇ ve le? Yaˬhoˉvaˬ Yeˍsuˆ htaꞈ Hkriꞈ yaˇ awˬ moˍ hkʼoˆ sheh kʼai shehˍ hpaˇ te tcuh ve yoˬ. (Eˇfeˇsuꞈ 5:23) Chi hkʼe hpehꞈ ve htawˇ, Yeˍsuˆ lehˬ, awˬ laꞈ gʼawˇ hui teˇ gʼaˇ leh teˇ gʼaˇ hkʼaˬ hkʼe te cawˇ ve htaꞈ maˇ gʼa kʼoˆ piˇ. Yaꞈ hkʼaˇ, Yeˍsuˆ lehˬ tcuh yaˇ hui leh Yeˍruˆsaˍlehnˍ venˇ lo chehˇ ve awˬ hoˉ chaw mawˇ teˇ hpaˍ htaꞈ cuˇ leh sheh kʼai tcuh ve yoˬ. (Tcuh yaˇ 15:1, 2) Chi hkʼoˆ kaꞈ, Hkriꞈ yaˇ awˬ moˍ teˇ moˍ leh teˇ moˍ htaꞈ nyi haꞈ shaˉ tuˬ, Yeˍsuˆ lehˬ nyi haꞈ shaˉ paˍ leuˆ teh ve yoˬ.—1 Hteˇsaˍlawˇniˆ 5:12; Tiˇtuˆ 1:5.

10. (a) Awˉ lawˉ peuˇ ve Hkriꞈ yaˇ beˆ maˍ piˇ ve htaꞈ na yuˬ˗aw laˇ? (Tcuh yaˇ 15:30, 31) (b) Aˬ htoꞈ ma te Liꞈ hpu ve awˬ co˗e htaˇ, Yaˬhoˉvaˬ ve awˬ tan te shehˍ hpaˇ htaꞈ maˇ haꞈ yuˬ ve le? (Awˇ caˍ awˇ fa “ Chaw teˇ hpaˍ Shaˉ hkiˆ hkʼa biˇ mawˬ ve htaꞈ maˇ haꞈ yuˬ ve” htaꞈ nyi sheˍ.)

¹⁰ Awˉ lawˉ peuˇ ve Hkriꞈ yaˇ beˆ maˍ piˇ ve htaꞈ hkʼaˬ hkʼe na yuˬ ve le? Beˆ maˍ piˇ ve htaꞈ yawˇ hui maˇ˗awˍ  ve chaw ha lehˬ ha kʼa na yuˬ ve yoˬ. Liꞈ hpu hkʼaw kʼoˆ ve, tcuh yaˇ hui liꞈ bvuhꞈ piˇ ve htaꞈ yawˇ hui gʼa gʼaw htaˇ, “yawˇ hui htaꞈ awˬ gʼaˇ peꞈ laˇ ve pa taw ha lehˬ jaˇ ve yoˬ.” (Tcuh yaˇ 15:30, 31 gʼaw sheˍ.) Ngaˬ hui ve awˬ co˗e Yaˬhoˉvaˬ yawˇ ve chaw htaꞈ hkʼaˬ hkʼe beˆ maˍ piˇ chehˇ ve le?

CHI BEUꞈ TEˇ CO˗E YAˬHOˉVAˬ NGAˬ HUI HTAꞈ HKʼAˬ HKʼE BEˆ MAˍ LAˇ VE LE?

11. Chi beuꞈ teˇ co˗e Yaˬhoˉvaˬ yawˇ ve chaw htaꞈ hkʼaˬ hkʼe beˆ maˍ piˇ chehˇ ve le? Tawˇ pa haˉ kʼoˆ maˍ laˇ sheˍ.

¹¹ Chi beuꞈ teˇ co˗e Yaˬhoˉvaˬ yawˇ ve chaw htaꞈ beˆ maˍ piˇ tuˬ Liꞈ hpu htaꞈ cuˇ leh yawˇ ve Yaˇ paˍ Yeˍsuˆ Hkriꞈ yaˇ awˬ moˍ hkʼoˆ sheh kʼai shehˍ hpaˇ htaꞈ kaꞈ cuˇ ve yoˬ. Yaˬhoˉvaˬ yawˇ ve awˬ tan te tuˬ chaw yaˇ htaꞈ cuˇ ve tehꞈ ngaˬ hui shaˉ hkiˆ hkʼa dehꞈ mawˬ ve maˇ heˆ laˇ? Mawˬ ve yoˬ. Tawˇ pa haˉ te kʼo, 1870 hkʼawꞈ C. E. hkʼawꞈ nawˉ, ChanˍHtehˍ Raˆsenˍ leh awˬ chawˇ teˇ hpaˍ 1914 hkʼawꞈ htaˇ, Yaˬhoˉvaˬ mvuhˇ naw ma hkʼoˆ lo yawˇ ve mvuhˇ miˬ teh ve a yeˇ uiˍ jaˇ ve htaꞈ yawˇ hui gʼa mawˬ ve yoˬ. (Daˍyeˍlaˆ 4:25, 26) Liꞈ hpu hkʼaw tcuh kaˍ paˍ ve tawˇ hkawˇ laiˉ tawn htaꞈ yawˇ hui chaˬ nyi ve pa taw, chi hkʼe yonˍ gʼa ve yoˬ. Yawˇ hui awˬ lawn chi htaꞈ hpfuhˆ nyi ve Yaˬhoˉvaˬ beˆ maˍ piˇ˗aw laˇ? Beˆ maˍ piˇ ve yoˬ. 1914 hkʼawꞈ htaˇ, miˬ guiˬ hkʼoˆ lo ve awˬ heˆ teˇ hpaˍ mvuhˇ naw ma hkʼoˆ lo Gʼuiˬ sha ve mvuhˇ miˬ teh˗oˬ ve tehꞈ hkʼa tawˍ lehˆ gʼa mawˬ ve yoˬ. Tawˇ pa haˉ te kʼo, maꞈ lonˉ awˉ lawˉ teˇ pawˆ hpehꞈ ve, naˬ beuˬ a naˍ hehnˇ jaˇ ve, laiˉ mvuhˇ miˬ lo miˬ hiˆ hehnˇ jaˇ ve, leh caˇ tuˬ maˇ cawˬ ve, chi teˇ hpaˍ hpehꞈ ve yoˬ. (Luˉkaꞈ 21:10, 11) Yaˬhoˉvaˬ chaw chi teˇ hpaˍ htaꞈ cuˇ leh yawˇ ve chaw htaꞈ ga piˇ chehˇ ve tehꞈ hkʼa tawˍ lehˆ gʼa mawˬ ve yoˬ.

12-13. Maꞈ lonˉ 2 pawˆ teˇ pawˆ ve awˬ yanˇ htaˇ, hto toˇ ve leh Liꞈ hpu hkʼa dehꞈ maˍ tuˬ aˬ htoꞈ ma gu teh taˍ piˇ ve le?

¹² Chi hkʼoˆ kaꞈ, maꞈ lonˉ 2 pawˆ teˇ pawˆ htaˇ, Gʼuiˬ sha ve kanˉ hkʼaˇ hkʼaw sheh kʼai paˍ awˬ viˉ awˬ nyi Hpeuꞈ maˍ ve liꞈ 17:8 hkʼaw hkʼa dehꞈ hpfuhˆ nyi ve htaꞈ dawˇ nyi sheˍ. Maꞈ lonˉ chi ve teˇ pawˆ lehˬ Aˍmaˍgeˍdonˍ maˇ gaˬ la sheˍ ve tehꞈ yawˇ hui shiˍ ve yoˬ. Yaꞈ hkʼaˇ, teˇ tcuhˉ teˇ yanˇ gawˬ lehˍ cawˬ leh gʼaˇ hteꞈ hto toˇ kʼai tuˬ awˬ yanˇ cawˬ tuˬ te laˇ ve tehꞈ yawˇ hui shiˍ ve yoˬ. Nyi˗a kʼo oˇ ve teˇ yanˇ chi anˇ tuˬ hkʼe hpehꞈ ve htawˇ, Miˍshenˍnaˍliˍ miˬ guiˬ chi hkʼoˆ lo hto toˇ leh Liꞈ hpu maˍ piˇ kʼai tuˬ Yaˬhoˉvaˬ ve kanˉ hkʼaˇ Giˉlaˆ liꞈ henˇ yehˬ teh ve yoˬ. Oˇ ve teˇ yanˇ maꞈ lonˉ te daꞈ chehˇ ve htawˇ, mvuhˇ miˬ teˇ hpaˍ hkʼaw Miˍshenˍnaˍliˍ hto toˇ˗e tuˬ kʼai tcuh ve yoˬ. Chi hkʼoˆ kaꞈ, awˬ viˉ awˬ nyi hto toˇ leh Liꞈ hpu hkʼa dehꞈ maˍ piˇ gʼa tuˬ, ka tiꞈ yeˬ leh cuˇ yiˍ cawˬ ve chaw Gʼuiˬ sha ve kanˉ te ve liꞈ henˇ yehˬ cawˬ tcuh ve yoˬ. b Chi ve hkʼa peu˗eˬ Yaˬhoˉvaˬ ve chaw hto toˇ tuˬ cawˬ maˇ jaˇ sheˍ ve pa taw, gu teh laˇ ve yoˬ.

 ¹³ Ponˬ laˬ ve awˬ yanˇ htaꞈ kʼawꞈ dawˇ nyi htaˇ, Yaˬhoˉvaˬ ve chaw tuꞈ ve hkanˍ ve gʼa hpuˇ ve htawˇ, yawˇ hkʼa dehꞈ beˆ maˍ piˇ chehˇ ve htaꞈ gʼa mawˬ ve yoˬ. Maꞈ lonˉ 2 pawˆ teˇ pawˆ htaˇ tanˬ leh laiˉ mvuhˇ miˬ hkʼaw Yaˬhoˉvaˬ ve chaw hto toˇ gʼa ve yoˬ. Chi ve lehˬ chaw yaˇ maˇ maˇ Yaˬhoˉvaˬ htaꞈ shiˍ la tuˬ te piˇ leh yawˇ ve kanˉ te la tuˬ kaꞈ te piˇ ve yoˬ. Leh chi teˇ hkui hto toˇ ve kanˉ miˬ guiˬ chi hkʼoˆ lo tzuhˇ kʼai˗oˬ ve yoˬ.

14. Yaˬhoˉvaˬ ve kanˉ hkʼaˇ leh nyi haꞈ shaˉ paˍ beˆ maˍ laˇ ve htaꞈ aˬ htoꞈ ma te ngaˬ hui yonˍ gʼa ve le? (Hpeuꞈ maˍ ve 2:1) (Awˬ han htaꞈ sheˍ.)

¹⁴ Chi beuꞈ teˇ co˗e Uˉ peunˍ ve Kawˍmiˍtiˍ kaꞈ Yeˍsuˆ beˆ maˍ laˇ ve htaꞈ yehˇ chehˇ sheˍ ve yoˬ. Yawˇ hui awˬ viˉ awˬ nyi htaꞈ Yaˬhoˉvaˬ leh Yeˍsuˆ loˍ ve hkʼe beˆ maˍ piˇ chehˇ sheˍ ve yoˬ. Yawˇ hui Hkriꞈ yaˇ awˬ moˍ hkʼaw ve awˬ viˉ awˬ nyi htaꞈ beˆ maˍ piˇ tuˬ, toˇ nyi shehˍ hpaˇ leh nyi haꞈ shaˉ paˍ htaꞈ yehˇ ve yoˬ. c Liꞈ hpu hkʼaw kʼoˆ ve, leuˆ yuˬ taˍ ve chaw hpehꞈ ve nyi haꞈ shaˉ paˍ leh Hkriꞈ yaˇ awˬ moˍ hkʼaw nyi haꞈ shaˉ paˍ hkʼa peu˗eˬ Yeˍsuˆ ve “laꞈ sha paˉ” lo chehˇ taˍ ve yoˬ. (Hpeuꞈ maˍ ve 2:1 gʼaw sheˍ.) Chi hkʼe hpehꞈ ve htawˇ, nyi haꞈ shaˉ paˍ teˇ gʼaˇ le le maˇ biˇ ve chaw hpehꞈ ve yoˬ. Yawˇ hui te yaꞈ la ve yoˬ. Moˉseˍ, Yawˇsuˆ leh tcuh yaˇ hui kaꞈ teˇ pawˆ pawˆ kʼo te yaꞈ ve yoˬ. (Heh puiˉ hkʼaw 20:12; Yawˇsuˆ 9:14, 15; Roˉmaꞈ 3:23) Yaꞈ hkʼaˇ, Yeˍsuˆ Hkriꞈ lehˬ ka tiꞈ yeˬ leh cuˇ yiˍ cawˬ ve, leh nyi haꞈ shaˉ paˍ teˇ gʼaˇ le le htaꞈ kaꞈ beˆ maˍ piˇ chehˇ ve tehꞈ ngaˬ hui hkʼa tawˍ lehˆ gʼa mawˬ ve yoˬ. “Miˬ guiˬ chi awˬ yanˇ leh htaˇ hkʼa gaˬ” yawˇ chi hkʼe te tuˬ yoˬ. (Maꞈhtehˍ 28:20) Chi htaꞈ pa taw, awˬ viˉ awˬ nyi leuˆ yuˬ taˍ ve chaw htaꞈ cuˇ leh Yeˍsuˆ chi hkʼe te beˆ maˍ laˇ chehˇ ve tehꞈ, ngaˬ hui yonˍ ve yoˬ.

YAˬHOˉVAˬ BEˆ MAˍ LAˇ VE HTAꞈ NGAˬ HUI GʼAꞈ TE HTAˇ AWˬ BON GʼA VE

15-16. Yaˬhoˉvaˬ beˆ maˍ piˇ ve htaꞈ gʼaꞈ te ve chaw awˬ lawn nawˬ htaꞈ aˬ htoꞈ ma maˍ laˇ ve le?

¹⁵ Yaˬhoˉvaˬ beˆ maˍ laˇ ve htaꞈ ngaˬ hui caˉ leh gʼaꞈ te ve kʼo, chi teˇ hkui kaꞈ ngaˬ hui awˬ bon gʼa ve yoˬ. Eh˗beˇ leh Lo˗beuꞈ lehˬ beˆ maˍ piˇ ve htaꞈ a shaꞈ teꞈ hkʼaˇ hkʼa sha sha˗ehˬ gʼaꞈ te ve htaꞈ teˇ geh nyi sheˍ. (Maꞈhtehˍ 6:22) Chi ve htaꞈ pa taw, yawˇ huiˉ maˬ Gʼuiˬ sha ve kanˉ hkʼaˇ hkʼaw yehˬ te ve hpawˇ ga piˇ gʼa ve yoˬ. Lo˗beuꞈ kʼoˆ ve, “ngaˬ hui yehˬ maˇ uiˍ ve hkʼaw gʼa chehˇ leh teˇ pawˆ pawˆ awˬ chiˇ awˍ te caˇ tuˬ awˬ hkʼeunˍ maˇ cawˬ ve yoˬ. Awˬ han htawˍ tuˬ awˬ hkʼeun ngaˬ dawˇ cawˇ jaˇ ve htawˇ, gʼa hawˇ ve pa taw ngaˬ hawˬ ve yoˬ. Aˍbraˍhanˍ ve awˬ miˇ ma Saˍraˇ awˬ gʼuˇ suhˍ hpawˇ ve htaꞈ nyi ve hkʼe, ngaˬ te gaˇ leh peuˬ laˬ ve awˬ ceuˬ htaꞈ kaꞈ maˇ dawˇ nyi gaˇ ve yoˬ.” (Heˍbrehˇ 11:15) Awˬ hpawˇ awˬ miˇ ma chi teˇ ca chi hkʼe dawˇ cheˆ ve aˬ htoꞈ ma awˬ bon gʼa ve le? Lo˗beuꞈ kʼoˆ ve, “ngaˬ hui cawˬ taˍ ve teˇ ceuˬ le le Yaˬhoˉvaˬ htaꞈ piˇ ve tehꞈ gʼa shiˍ htaˇ, ha lehˬ jaˇ ve yoˬ. Yaˬhoˉvaˬ awˬ vuiˬ peꞈ laˇ ve htaꞈ ngaˬ hui te htaˇ, miˬ guiˬ awˬ suhˉ hkʼaw ve a shaꞈ teꞈ hkʼaˇ hkʼaˬ hkʼe hpehꞈ tuˬ ve htaꞈ ngaˬ hui dawˇ mawˬ gʼa ve yoˬ.” Eh˗beˇ kʼawꞈ kʼoˆ ve, “Gʼuiˬ sha  ve mvuhˇ miˬ awˬ pon teˇ ceuˬ le le kanˉ te tuˬ ngaˬ hui yuˬ tanˇ ve ha lehˬ jaˇ.”

¹⁶ Ngaˬ hui Yaˬhoˉvaˬ beˆ maˍ laˇ ve htaꞈ caˉ leh gʼaꞈ te htaˇ, aˬ htoꞈ ma awˬ bon gʼa sheˍ ve le? Ma˗shen liꞈ 12 tanˇ henˇ peuˬ hkʼawꞈ nawˉ, yawˇ a shaꞈ teꞈ kuiˬ hkʼaw Yaˬhoˉvaˬ ve kanˉ awˉ lawˉ te tehꞈ beˆ maˍ laˇ ve htaꞈ gʼaꞈ te gaˇ ve yoˬ. (Maꞈhtehˍ 6:33; Roˉmaꞈ 12:11) Yawˇ kʼoˆ ve, “ngaˬ liꞈ tanˇ mvuh ve hkʼaw 4 hkʼawꞈ henˇ leh awˬ hpfuhˇ maˇ peuˬ tuˬ liꞈ maꞈ gʼa ve yoˬ. Yaꞈ hkʼaˇ, ngaˬ Gʼuiˬ sha ve kanˉ te tuˬ dawˇ teh taˍ ve htaꞈ te gaˇ ve yoˬ. Ngaˬ gʼuˇ suhˍ peuˍ ve te htaˇ kanˉ cawˬ tuˬ, kanˉ haˆ haˆ te gʼa tuˬ htaꞈ leuˆ henˇ ve yoˬ. Chi ve lehˬ ngaˬ a shaꞈ teꞈ kuiˬ hkʼaw dawˇ cheˆ ve daꞈ jaˇ ve awˬ ceuˬ hpehꞈ ve yoˬ. Chi teˇ hkui ngaˬ hkʼaˬ htaˆ kaꞈ gʼuˇ suhˍ peuˍ ve te leh ha lehˬ jaˇ. Ngaˬ awˬ suhˍ awˬ shaˍ hpawˇ kanˉ hkʼaˬ htaˆ kaꞈ maˇ gʼa te ve pa taw, Beˍteˍlaˆ hkʼaw kanˉ ca ga piˇ˗e gʼa ve yoˬ. Leh ngaˬ Gʼuiˬ sha ve kanˉ hkʼaˇ hkʼaw awˬ nu ve chaw htaꞈ kaꞈ ga piˇ ve daꞈ jaˇ ve awˬ vuiˬ gʼa sheˍ ve yoˬ.”

17. Yaˬhoˉvaˬ beˆ maˍ laˇ ve htaꞈ caˉ leh gʼaꞈ te ve lehˬ aˬ htoꞈ ma awˬ bon gʼa sheˍ ve le? (Iˉsaˍyaˆ 48:17, 18)

¹⁷ Teˇ pawˆ pawˆ kʼo, ngaˬ hui htaꞈ haꞈ shaˉ laˇ tuˬ beˆ maˍ laˇ hkawˇ cawˬ ve yoˬ. Tawˇ pa haˉ te kʼo, hpu htaꞈ haꞈ ve chaw maˇ hpehꞈ tuˬ, maˇ heˆ leh Gʼuiˬ sha ve awˬ liˇ tawˇ hkawˇ htaꞈ maˇ gʼa te yaꞈ tuˬ beˆ maˍ laˇ ve yoˬ. Beˆ maˍ laˇ ve chi htaꞈ ngaˬ hui awˬ bon gʼa tuˬ gʼa gʼaꞈ te ve yoˬ. Ngaˬ hui ve dawˇ shiˍ puiˉ ve nyi ma htaꞈ maˇ shoꞈ shaꞈ laˇ tuˬ, maˇ gʼa dawˇ hkiˉ tuˬ, shoꞈ shaꞈ ve laiˉ ceuˬ htaꞈ jaw kʼai gʼa tuˬ, chi ve teˇ hpaˍ beˆ maˍ laˇ ve yoˬ. (1 Tiˆmoˉseˍ 6:9, 10) Awˬ bon gʼa ve lehˬ, ngaˬ hui Yaˬhoˉvaˬ ve kanˉ hkʼa dehꞈ te gʼa ve yoˬ. Chi ve lehˬ ngaˬ hui ha lehˬ ve cawˬ leh nyi ma gawˬ lehˍ ve cawˬ tuˬ te laˇ ve yoˬ.—Iˉsaˍyaˆ 48:17, 18 gʼaw sheˍ.

18. Aˬ htoꞈ ma te nawˬ Yaˬhoˉvaˬ beˆ maˍ laˇ ve htaꞈ caˉ leh gʼaꞈ te tuˬ dawˇ teh taˍ gʼa ve le?

¹⁸ Tuꞈ jaˇ hkanˍ jaˇ ve awˬ yanˇ hkʼaw leh 1,000 hkʼawꞈ ve awˬ yanˇ hkʼa gaˬ Yaˬhoˉvaˬ yawˇ ve chaw htaꞈ hkʼa dehꞈ beˆ maˍ piˇ tuˬ, Yaˬhoˉvaˬ yawˇ ve awˬ tan te ve chaw yaˇ htaꞈ yehˇ sheˍ ve tehꞈ ngaˬ hui yonˍ gʼa ve yoˬ. (Chiˇ mvuh ve 45:16) Oˇ ve teˇ yanˇ beˆ maˍ laˇ ve htaꞈ ngaˬ hui maˇ dawˇ cawˇ ve htawˇ, gʼaꞈ te chehˇ sheˍ˗aw laˇ? Chi teˇ hkui kaꞈ ngaˬ hui gʼaꞈ te ve kʼo, awˬ gʼuˇ suhˍ hpawˇ Yaˬhoˉvaˬ beˆ maˍ laˇ ve htaꞈ ngaˬ hui gʼaꞈ te sha ve yoˬ. Chi htaꞈ pa taw, Yaˬhoˉvaˬ beˆ maˍ laˇ ve htaꞈ hkʼaˬ htaˆ kaꞈ gʼaꞈ te sheˍ. Ngaˬ hui htaꞈ nyi haꞈ shaˉ laˇ tuˬ awˬ viˉ awˬ nyi hawˉ hkʼaˆ leuˆ teh taˍ ve chaw hkawˇ hkʼa dehꞈ na sheˍ. (Iˉsaˍyaˆ 32:1, 2; Heˍbrehˇ 13:17) Ngaˬ hui Yaˬhoˉvaˬ htaꞈ hkʼa dehꞈ yonˍ gʼa ve yoˬ. Yawˇ lehˬ ngaˬ hui htaꞈ yaꞈ kʼaw shiˍ maˍ laˇ shehˍ hpaˇ daꞈ jaˇ ve hpehꞈ leh ngaˬ hui Yaˬhoˉvaˬ geh meuˆ daꞈ ve htaꞈ maˇ te luˬ laˇ tuˬ kaꞈ ga laˇ gʼa ve yoˬ. Leh ngaˬ hui miˬ guiˬ awˬ suhˉ hkʼaw co co taiˍ taiˍ ve a shaꞈ gʼa htaˇ hkʼa gaˬ yawˇ ga laˇ tuˬ yoˬ.